শ্রীমদ্ভাগবতম্ ৮.২৪

শ্রীরাজোবাচ
ভগবঞ্ছ্রোতুমিচ্ছামি হরেরদ্ভুতকর্মণঃ ।
অবতারকথামাদ্যাং মাযামত্স্যবিডম্বনম্ ॥ ১ ॥

যদর্থমদধাদ্ রূপং মাত্স্যং লোকজুগুপ্সিতম্ ।
তমঃপ্রকৃতি দুর্মর্ষং কর্মগ্রস্ত ইবেশ্বরঃ ॥ ২ ॥

এতন্নো ভগবন্ সর্বং যথাবদ্ বক্তুমর্হসি ।
উত্তমশ্লোকচরিতং সর্বলোকসুখাবহম্ ॥ ৩ ॥

শ্রীসূত উবাচ
ইত্যুক্তো বিষ্ণুরাতেন ভগবান্ বাদরাযণিঃ ।
উবাচচরিতং বিষ্ণোর্মত্স্যরূপেণ যত্ কৃতম্ ॥ ৪ ॥

শ্রীশুক উবাচ
গোবিপ্রসুরসাধূনাং ছন্দসামপি চেশ্বরঃ ।
রক্ষামিচ্ছংস্তনূর্ধত্তে ধর্মস্যার্থস্য চৈব হি ॥ ৫ ॥

উচ্চাবচেষু ভূতেষু চরন্ বাযুরিবেশ্বরঃ ।
নোচ্চাবচত্বং ভজতে নির্গুণত্বাদ্ধিযো গুণৈঃ ॥ ৬ ॥

আসীদতীতকল্পান্তে ব্রাহ্মো নৈমিত্তিকো লযঃ ।
সমুদ্রোপপ্লুতাস্তত্র লোকা ভূরাদযো নৃপ ॥ ৭ ॥

কালেনাগতনিদ্রস্য ধাতুঃ শিশযিষোর্বলী ।
মুখতো নিঃসৃতান্ বেদান্ হযগ্রীবোঽন্তিকেঽহরত্ ॥ ৮ ॥

জ্ঞাত্বা তদ্ দানবেন্দ্রস্য হযগ্রীবস্য চেষ্টিতম্ ।
দধার শফরীরূপং ভগবান্ হরিরীশ্বরঃ ॥ ৯ ॥

তত্র রাজঋষিঃ কশ্চিন্নাম্না সত্যব্রতো মহান্ ।
নারাযণপরোঽতপত্ তপঃ স সলিলাশনঃ ॥ ১০ ॥

যোঽসাবস্মিন্ মহাকল্পে তনযঃ স বিবস্বতঃ ।
শ্রাদ্ধদেব ইতি খ্যাতো মনুত্বে হরিণার্পিতঃ ॥ ১১ ॥

একদা কৃতমালাযাং কুর্বতো জলতর্পণম্ ।
তস্যাঞ্জল্যুদকে কাচিচ্ছফর্যেকাভ্যপদ্যত ॥ ১২ ॥

সত্যব্রতোঽঞ্জলিগতাং সহ তোযেন ভারত ।
উত্সসর্জ নদীতোযে শফরীং দ্রবিডেশ্বরঃ ॥ ১৩ ॥

তমাহ সাতিকরুণং মহাকারুণিকং নৃপম্ ।
যাদোভ্যো জ্ঞাতিঘাতিভ্যো দীনাং মাং দীনবত্সল ।
কথং বিসৃজসে রাজন্ ভীতামস্মিন্ সরিজ্জলে ॥ ১৪ ॥

তমাত্মনোঽনুগ্রহার্থং প্রীত্যা মত্স্যবপুর্ধরম্ ।
অজানন্ রক্ষণার্থায শফর্যাঃ স মনো দধে ॥ ১৫ ॥

তস্যা দীনতরং বাক্যমাশ্রুত্য স মহীপতিঃ ।
কলশাপ্সু নিধাযৈনাং দযালুর্নিন্য আশ্রমম্ ॥ ১৬ ॥

সা তু তত্রৈকরাত্রেণ বর্ধমানা কমণ্ডলৌ ।
অলব্ধ্বাত্মাবকাশং বা ইদমাহ মহীপতিম্ ॥ ১৭ ॥

নাহং কমণ্ডলাবস্মিন্ কৃচ্ছ্রং বস্তুমিহোত্সহে ।
কল্পযৌকঃ সুবিপুলং যত্রাহং নিবসে সুখম্ ॥ ১৮ ॥

স এনাং তত আদায ন্যধাদৌদঞ্চনোদকে ।
তত্র ক্ষিপ্তা মুহূর্তেন হস্তত্রযমবর্ধত ॥ ১৯ ॥

ন ম এতদলং রাজন্ সুখং বস্তুমুদঞ্চনম্ ।
পৃথু দেহি পদং মহ্যং যত্ ত্বাহং শরণং গতা ॥ ২০ ॥

তত আদায সা রাজ্ঞা ক্ষিপ্তা রাজন্ সরোবরে ।
তদাবৃত্যাত্মনা সোঽযং মহামীনোঽন্ববর্ধত ॥ ২১ ॥

নৈতন্মে স্বস্তযে রাজন্নুদকং সলিলৌকসঃ ।
নিধেহি রক্ষাযোগেন হ্রদে মামবিদাসিনি ॥ ২২ ॥

ইত্যুক্তঃ সোঽনযন্মত্স্যং তত্র তত্রাবিদাসিনি ।
জলাশযেঽসম্মিতং তং সমুদ্রে প্রাক্ষিপজ্ঝষম্ ॥ ২৩ ॥

ক্ষিপ্যমাণস্তমাহেদমিহ মাং মকরাদযঃ ।
অদন্ত্যতিবলা বীর মাং নেহোত্স্রষ্টুমর্হসি ॥ ২৪ ॥

এবং বিমোহিতস্তেন বদতা বল্গুভারতীম্ ।
তমাহ কো ভবানস্মান্ মত্স্যরূপেণ মোহযন্ ॥ ২৫ ॥

নৈবংবীর্যো জলচরো দৃষ্টোঽস্মাভিঃ শ্রুতোঽপি বা ।
যো ভবান্ যোজনশতমহ্নাভিব্যানশে সরঃ ॥ ২৬ ॥

নূনং ত্বং ভগবান্ সাক্ষাদ্ধরির্নারাযণোঽব্যযঃ ।
অনুগ্রহায ভূতানাং ধত্সে রূপং জলৌকসাম্ ॥ ২৭ ॥

নমস্তে পুরুষশ্রেষ্ঠ স্থিত্যুত্পত্ত্যপ্যযেশ্বর ।
ভক্তানাং নঃ প্রপন্নানাং মুখ্যো হ্যাত্মগতির্বিভো ॥ ২৮ ॥

সর্বে লীলাবতারাস্তে ভূতানাং ভূতিহেতবঃ ।
জ্ঞাতুমিচ্ছাম্যদো রূপং যদর্থং ভবতা ধৃতম্ ॥ ২৯ ॥

ন তেঽরবিন্দাক্ষ পদোপসর্পণং
মৃষা ভবেত্ সর্বসুহৃত্প্রিযাত্মনঃ ।
যথেতরেষাং পৃথগাত্মনাং সতা-
মদীদৃশো যদ্ বপুরদ্ভুতং হি নঃ ॥ ৩০ ॥

শ্রীশুক উবাচ
ইতি ব্রুবাণং নৃপতিং জগত্পতিঃ
সত্যব্রতং মত্স্যবপুর্যুগক্ষযে ।
বিহর্তুকামঃ প্রলযার্ণবেঽব্রবী-
চ্চিকীর্ষুরেকান্তজনপ্রিযঃ প্রিযম্ ॥ ৩১ ॥

শ্রীভগবানুবাচ
সপ্তমে হ্যদ্যতনাদূর্ধ্বমহন্যেতদরিংদম ।
নিমঙ্ক্ষ্যত্যপ্যযাম্ভোধৌ ত্রৈলোক্যং ভূর্ভুবাদিকম্ ॥ ৩২ ॥

ত্রিলোক্যাং লীযমানাযাং সংবর্তাম্ভসি বৈ তদা ।
উপস্থাস্যতি নৌঃ কাচিদ্ বিশালা ত্বাং মযেরিতা ॥ ৩৩ ॥

ত্বং তাবদোষধীঃ সর্বা বীজান্যুচ্চাবচানি চ ।
সপ্তর্ষিভিঃ পরিবৃতঃ সর্বসত্ত্বোপবৃংহিতঃ ॥ ৩৪ ॥

আরুহ্য বৃহতীং নাবং বিচরিষ্যস্যবিক্লবঃ ।
একার্ণবে নিরালোকে ঋষীণামেব বর্চসা ॥ ৩৫ ॥

দোধূযমানাং তাং নাবং সমীরেণ বলীযসা ।
উপস্থিতস্য মে শৃঙ্গে নিবধ্নীহি মহাহিনা ॥ ৩৬ ॥

অহং ত্বামৃষিভিঃ সার্ধং সহনাবমুদন্বতি ।
বিকর্ষন্ বিচরিষ্যামি যাবদ্ ব্রাহ্মী নিশা প্রভো ॥ ৩৭ ॥

মদীযং মহিমানং চ পরং ব্রহ্মেতি শব্দিতম্ ।
বেত্স্যস্যনুগৃহীতং মে সম্প্রশ্নৈর্বিবৃতং হৃদি ॥ ৩৮ ॥

ইত্থমাদিশ্য রাজানং হরিরন্তরধীযত ।
সোঽন্ববৈক্ষত তং কালং যং হৃষীকেশ আদিশত্ ॥ ৩৯ ॥

আস্তীর্য দর্ভান্ প্রাক্কূলান্ রাজর্ষিঃ প্রাগুদঙ্মুখঃ ।
নিষসাদ হরেঃ পাদৌ চিন্তযন্ মত্স্যরূপিণঃ ॥ ৪০ ॥

ততঃ সমুদ্র উদ্বেলঃ সর্বতঃ প্লাবযন্ মহীম্ ।
বর্ধমানো মহামেঘৈর্বর্ষদ্ভিঃ সমদৃশ্যত ॥ ৪১ ॥

ধ্যাযন্ ভগবদাদেশং দদৃশে নাবমাগতাম্ ।
তামারুরোহ বিপ্রেন্দ্রৈরাদাযৌষধিবীরুধঃ ॥ ৪২ ॥

তমূচুর্মুনযঃ প্রীতা রাজন্ ধ্যাযস্ব কেশবম্ ।
স বৈ নঃ সঙ্কটাদস্মাদবিতা শং বিধাস্যতি ॥ ৪৩ ॥

সোঽনুধ্যাতস্ততো রাজ্ঞা প্রাদুরাসীন্মহার্ণবে ।
একশৃঙ্গধরো মত্স্যো হৈমো নিযুতযোজনঃ ॥ ৪৪ ॥

নিবধ্য নাবং তচ্ছৃঙ্গে যথোক্তো হরিণা পুরা ।
বরত্রেণাহিনা তুষ্টস্তুষ্টাব মধুসূদনম্ ॥ ৪৫ ॥

শ্রীরাজোবাচ
অনাদ্যবিদ্যোপহতাত্মসংবিদ-
স্তন্মূলসংসারপরিশ্রমাতুরাঃ ।
যদৃচ্ছযোপসৃতা যমাপ্নুযু-
র্বিমুক্তিদো নঃ পরমো গুরুর্ভবান্ ॥ ৪৬ ॥

জনোঽবুধোঽযং নিজকর্মবন্ধনঃ
সুখেচ্ছযা কর্ম সমীহতেঽসুখম্ ।
যত্সেবযা তাং বিধুনোত্যসন্মতিং
গ্রন্থিং স ভিন্দ্যাদ্ ধৃদযং স নো গুরুঃ ॥ ৪৭ ॥

যত্সেবযাগ্নেরিব রুদ্ররোদনং
পুমান্ বিজহ্যান্মলমাত্মনস্তমঃ ।
ভজেত বর্ণং নিজমেষ সোঽব্যযো
ভূযাত্ স ঈশঃ পরমো গুরোর্গুরুঃ ॥ ৪৮ ॥

ন যত্প্রসাদাযুতভাগলেশ-
মন্যে চ দেবা গুরবো জনাঃ স্বযম্ ।
কর্তুং সমেতাঃ প্রভবন্তি পুংস-
স্তমীশ্বরং ত্বাং শরণং প্রপদ্যে ॥ ৪৯ ॥

অচক্ষুরন্ধস্য যথাগ্রণীঃ কৃত-
স্তথা জনস্যাবিদুষোঽবুধো গুরুঃ ।
ত্বমর্কদৃক্ সর্বদৃশাং সমীক্ষণো
বৃতো গুরুর্নঃ স্বগতিং বুভুত্সতাম্ ॥ ৫০ ॥

জনো জনস্যাদিশতেঽসতীং গতিং
যযা প্রপদ্যেত দুরত্যযং তমঃ ।
ত্বং ত্বব্যযং জ্ঞানমমোঘমঞ্জসা
প্রপদ্যতে যেন জনো নিজং পদম্ ॥ ৫১ ॥

ত্বং সর্বলোকস্য সুহৃত্ প্রিযেশ্বরো
হ্যাত্মা গুরুর্জ্ঞানমভীষ্টসিদ্ধিঃ ।
তথাপি লোকো ন ভবন্তমন্ধধী-
র্জানাতি সন্তং হৃদি বদ্ধকামঃ ॥ ৫২ ॥

ত্বং ত্বামহং দেববরং বরেণ্যং
প্রপদ্য ঈশং প্রতিবোধনায ।
ছিন্ধ্যর্থদীপৈর্ভগবন্ বচোভি-
র্গ্রন্থীন্ হৃদয্যান্ বিবৃণু স্বমোকঃ ॥ ৫৩ ॥

শ্রীশুক উবাচ
ইত্যুক্তবন্তং নৃপতিং ভগবানাদিপূরুষঃ ।
মত্স্যরূপী মহাম্ভোধৌ বিহরংস্তত্ত্বমব্রবীত্ ॥ ৫৪ ॥

পুরাণসংহিতাং দিব্যাং সাঙ্খ্যযোগক্রিযাবতীম্ ।
সত্যব্রতস্য রাজর্ষেরাত্মগুহ্যমশেষতঃ ॥ ৫৫ ॥

অশ্রৌষীদৃষিভিঃ সাকমাত্মতত্ত্বমসংশযম্ ।
নাব্যাসীনো ভগবতা প্রোক্তং ব্রহ্ম সনাতনম্ ॥ ৫৬ ॥

অতীতপ্রলযাপায উত্থিতায স বেধসে ।
হত্বাসুরং হযগ্রীবং বেদান্ প্রত্যাহরদ্ধরিঃ ॥ ৫৭ ॥

স তু সত্যব্রতো রাজা জ্ঞানবিজ্ঞানসংযুতঃ ।
বিষ্ণোঃ প্রসাদাত্ কল্পেঽস্মিন্নাসীদ্ বৈবস্বতো মনুঃ ॥ ৫৮ ॥

সত্যব্রতস্য রাজর্ষের্মাযামত্স্যস্য শার্ঙ্গিণঃ ।
সংবাদং মহদাখ্যানং শ্রুত্বা মুচ্যেত কিল্বিষাত্ ॥ ৫৯ ॥

অবতারং হরের্যোঽযং কীর্তযেদন্বহং নরঃ ।
সঙ্কল্পাস্তস্য সিধ্যন্তি স যাতি পরমাং গতিম্ ॥ ৬০ ॥

প্রলযপযসি ধাতুঃ সুপ্তশক্তের্মুখেভ্যঃ
শ্রুতিগণমপনীতং প্রত্যুপাদত্ত হত্বা ।
দিতিজমকথযদ্ যো ব্রহ্ম সত্যব্রতানাং
তমহমখিলহেতুং জিহ্মমীনং নতোঽস্মি ॥ ৬১ ॥
স বৈ মনঃ কৃষ্ণপদারবিন্দযো-
র্বচাংসি বৈকুণ্ঠগুণানুবর্ণনে ।
করৌ হরের্মন্দিরমার্জনাদিষু
শ্রুতিং চকারাচ্যুতসত্কথোদযে ॥