শ্রীমদ্ভাগবতম্ ৮.৮

শ্রীশুক উবাচ
পীতে গরে বৃষাঙ্কেণ প্রীতাস্তেঽমরদানবাঃ ।
মমন্থুস্তরসা সিন্ধুং হবির্ধানী ততোঽভবত্ ॥ ১ ॥

তামগ্নিহোত্রীমৃষযো জগৃহুর্ব্রহ্মবাদিনঃ ।
যজ্ঞস্য দেবযানস্য মেধ্যায হবিষে নৃপ ॥ ২ ॥

তত উচ্চৈঃশ্রবা নাম হযোঽভূচ্চন্দ্রপাণ্ডুরঃ ।
তস্মিন্বলিঃ স্পৃহাং চক্রে নেন্দ্র ঈশ্বরশিক্ষযা ॥ ৩ ॥

তত ঐরাবতো নাম বারণেন্দ্রো বিনির্গতঃ ।
দন্তৈশ্চতুর্ভিঃ শ্বেতাদ্রের্হরন্ভগবতো মহিম্ ॥ ৪ ॥

ঐরাবণাদযস্ত্বষ্টৌ দিগ্ গজা অভবংস্ততঃ ।
অভ্রমুপ্রভৃতযোঽষ্টৌ চ করিণ্যস্ত্বভবন্নৃপ ॥ ৫ ॥

কৌস্তুভাখ্যমভূদ্ রত্নং পদ্মরাগো মহোদধেঃ ।
তস্মিন্ মণৌ স্পৃহাং চক্রে বক্ষোঽলঙ্করণে হরিঃ ।
ততোঽভবত্ পারিজাতঃ সুরলোকবিভূষণম্ ।
পূরযত্যর্থিনো যোঽর্থৈঃ শশ্বদ্ ভুবি যথা ভবান্ ॥ ৬ ॥

ততশ্চাপ্সরসো জাতা নিষ্ককণ্ঠ্যঃ সুবাসসঃ ।
রমণ্যঃ স্বর্গিণাং বল্গুগতিলীলাবলোকনৈঃ ॥ ৭ ॥

ততশ্চাবিরভূত্ সাক্ষাচ্ছ্রী রমা ভগবত্পরা ।
রঞ্জযন্তী দিশঃ কান্ত্যা বিদ্যুত্ সৌদামনী যথা ॥ ৮ ॥

তস্যাং চক্রুঃ স্পৃহাং সর্বে সসুরাসুরমানবাঃ ।
রূপৌদার্যবযোবর্ণমহিমাক্ষিপ্তচেতসঃ ॥ ৯ ॥

তস্যা আসনমানিন্যে মহেন্দ্রো মহদদ্ভুতম্ ।
মূর্তিমত্যঃ সরিচ্ছ্রেষ্ঠা হেমকুম্ভৈর্জলং শুচি ॥ ১০ ॥

আভিষেচনিকা ভূমিরাহরত্ সকলৌষধীঃ ।
গাবঃ পঞ্চ পবিত্রাণি বসন্তো মধুমাধবৌ ॥ ১১ ॥

ঋষযঃ কল্পযাংচক্রুরাভিষেকং যথাবিধি ।
জগুর্ভদ্রাণি গন্ধর্বা নট্যশ্চ ননৃতুর্জগুঃ ॥ ১২ ॥

মেঘা মৃদঙ্গপণবমুরজানকগোমুখান্ ।
ব্যনাদযন্ শঙ্খবেণুবীণাস্তুমুলনিঃস্বনান্ ॥ ১৩ ॥

ততোঽভিষিষিচুর্দেবীং শ্রিযং পদ্মকরাং সতীম্ ।
দিগিভাঃ পূর্ণকলশৈঃ সূক্তবাক্যৈর্দ্বিজেরিতৈঃ ॥ ১৪ ॥

সমুদ্রঃ পীতকৌশেযবাসসী সমুপাহরত্ ।
বরুণঃ স্রজং বৈজযন্তীং মধুনা মত্তষট্পদাম্ ॥ ১৫ ॥

ভূষণানি বিচিত্রাণি বিশ্বকর্মা প্রজাপতিঃ ।
হারং সরস্বতী পদ্মমজো নাগাশ্চ কুণ্ডলে ॥ ১৬ ॥

ততঃ কৃতস্বস্ত্যযনোত্পলস্রজং
নদদ্দ্বিরেফাং পরিগৃহ্য পাণিনা ।
চচাল বক্ত্রং সুকপোলকুণ্ডলং
সব্রীডহাসং দধতী সুশোভনম্ ॥ ১৭ ॥

স্তনদ্বযং চাতিকৃশোদরী সমং
নিরন্তরং চন্দনকুঙ্কুমোক্ষিতম্ ।
ততস্ততো নূপুরবল্গুশিঞ্জিতৈ-
র্বিসর্পতী হেমলতেব সা বভৌ ॥ ১৮ ॥

বিলোকযন্তী নিরবদ্যমাত্মনঃ
পদং ধ্রুবং চাব্যভিচারিসদ্গুণম্ ।
গন্ধর্বসিদ্ধাসুরযক্ষচারণ-
ত্রৈপিষ্টপেযাদিষু নান্ববিন্দত ॥ ১৯ ॥

নূনং তপো যস্য ন মন্যুনির্জযো
জ্ঞানং ক্বচিত্ তচ্চ ন সঙ্গবর্জিতম্ ।
কশ্চিন্মহাংস্তস্য ন কামনির্জযঃ
স ঈশ্বরঃ কিং পরতোব্যপাশ্রযঃ ॥ ২০ ॥

ধর্মঃ ক্বচিত্ তত্র ন ভূতসৌহৃদং
ত্যাগঃ ক্বচিত্ তত্র ন মুক্তিকারণম্ ।
বীর্যং ন পুংসোঽস্ত্যজবেগনিষ্কৃতং
ন হি দ্বিতীযো গুণসঙ্গবর্জিতঃ ॥ ২১ ॥

ক্বচিচ্চিরাযুর্ন হি শীলমঙ্গলং
ক্বচিত্ তদপ্যস্তি ন বেদ্যমাযুষঃ ।
যত্রোভযং কুত্র চ সোঽপ্যমঙ্গলঃ
সুমঙ্গলঃ কশ্চ ন কাঙ্ক্ষতে হি মাম্ ॥ ২২ ॥

এবং বিমৃশ্যাব্যভিচারিসদ্গুণৈ-
র্বরং নিজৈকাশ্রযতযাগুণাশ্রযম্ ।
বব্রে বরং সর্বগুণৈরপেক্ষিতং
রমা মুকুন্দং নিরপেক্ষমীপ্সিতম্ ॥ ২৩ ॥

তস্যাংসদেশ উশতীং নবকঞ্জমালাং
মাদ্যন্মধুব্রতবরূথগিরোপঘুষ্টাম্ ।
তস্থৌ নিধায নিকটে তদুরঃ স্বধাম
সব্রীডহাসবিকসন্নযনেন যাতা ॥ ২৪ ॥

তস্যাঃ শ্রিযস্ত্রিজগতো জনকো জনন্যা
বক্ষোনিবাসমকরোত্ পরমং বিভূতেঃ ।
শ্রীঃ স্বাঃ প্রজাঃ সকরুণেন নিরীক্ষণেন
যত্র স্থিতৈধযত সাধিপতীংস্ত্রিলোকান্ ॥ ২৫ ॥

শঙ্খতূর্যমৃদঙ্গানাং বাদিত্রাণাং পৃথুঃ স্বনঃ ।
দেবানুগানাং সস্ত্রীণাং নৃত্যতাং গাযতামভূত্ ॥ ২৬ ॥

ব্রহ্মরুদ্রাঙ্গিরোমুখ্যাঃ সর্বে বিশ্বসৃজো বিভুম্ ।
ঈডিরেঽবিতথৈর্মন্ত্রৈস্তল্লিঙ্গৈঃ পুষ্পবর্ষিণঃ ॥ ২৭ ॥

শ্রিযাবলোকিতা দেবাঃ সপ্রজাপতযঃ প্রজাঃ ।
শীলাদিগুণসম্পন্না লেভিরে নির্বৃতিং পরাম্ ॥ ২৮ ॥

নিঃসত্ত্বা লোলুপা রাজন্ নিরুদ্যোগা গতত্রপাঃ ।
যদা চোপেক্ষিতা লক্ষ্ম্যা বভূবুর্দৈত্যদানবাঃ ॥ ২৯ ॥

অথাসীদ্ বারুণী দেবী কন্যা কমললোচনা ।
অসুরা জগৃহুস্তাং বৈ হরেরনুমতেন তে ॥ ৩০ ॥

অথোদধের্মথ্যমানাত্ কাশ্যপৈরমৃতার্থিভিঃ ।
উদতিষ্ঠন্মহারাজ পুরুষঃ পরমাদ্ভুতঃ ॥ ৩১ ॥

দীর্ঘপীবরদোর্দণ্ডঃ কম্বুগ্রীবোঽরুণেক্ষণঃ ।
শ্যামলস্তরুণঃ স্রগ্বী সর্বাভরণভূষিতঃ ॥ ৩২ ॥

পীতবাসা মহোরস্কঃ সুমৃষ্টমণিকুণ্ডলঃ ।
স্নিগ্ধকুঞ্চিতকেশান্তসুভগঃ সিংহবিক্রমঃ ।
অমৃতাপূর্ণকলসং বিভ্রদ্ বলযভূষিতঃ ॥ ৩৩ ॥

স বৈ ভগবতঃ সাক্ষাদ্বিষ্ণোরংশাংশসম্ভবঃ ।
ধন্বন্তরিরিতি খ্যাত আযুর্বেদদৃগিজ্যভাক্ ॥ ৩৪ ॥

তমালোক্যাসুরাঃ সর্বে কলসং চামৃতাভৃতম্ ।
লিপ্সন্তঃ সর্ববস্তূনি কলসং তরসাহরন্ ॥ ৩৫ ॥

নীযমানেঽসুরৈস্তস্মিন্কলসেঽমৃতভাজনে ।
বিষণ্ণমনসো দেবা হরিং শরণমাযযুঃ ॥ ৩৬ ॥

ইতি তদ্দৈন্যমালোক্য ভগবান্ভৃত্যকামকৃত্ ।
মা খিদ্যত মিথোঽর্থং বঃ সাধযিষ্যে স্বমাযযা ॥ ৩৭ ॥

মিথঃ কলিরভূত্তেষাং তদর্থে তর্ষচেতসাম্ ।
অহং পূর্বমহং পূর্বং ন ত্বং ন ত্বমিতি প্রভো ॥ ৩৮ ॥

দেবাঃ স্বং ভাগমর্হন্তি যে তুল্যাযাসহেতবঃ ।
সত্রযাগ ইবৈতস্মিন্নেষ ধর্মঃ সনাতনঃ ॥ ৩৯ ॥

ইতি স্বান্প্রত্যষেধন্বৈ দৈতেযা জাতমত্সরাঃ ।
দুর্বলাঃ প্রবলান্ রাজন্গৃহীতকলসান্ মুহুঃ ॥ ৪০ ॥

এতস্মিন্নন্তরে বিষ্ণুঃ সর্বোপাযবিদীশ্বরঃ ।
যোষিদ্রূপমনির্দেশ্যং দধার পরমাদ্ভুতম্ ॥ ৪১ ॥

প্রেক্ষণীযোত্পলশ্যামং সর্বাবযবসুন্দরম্ ।
সমানকর্ণাভরণং সুকপোলোন্নসাননম্ ॥ ৪২ ॥

নবযৌবননির্বৃত্তস্তনভারকৃশোদরম্ ।
মুখামোদানুরক্তালিঝঙ্কারোদ্বিগ্নলোচনম্ ॥ ৪৩ ॥

বিভ্রত্ সুকেশভারেণ মালামুত্ফুল্লমল্লিকাম্ ।
সুগ্রীবকণ্ঠাভরণং সুভুজাঙ্গদভূষিতম্ ॥ ৪৪ ॥

বিরজাম্বরসংবীতনিতম্বদ্বীপশোভযা ।
কাঞ্চ্যা প্রবিলসদ্বল্গুচলচ্চরণনূপুরম্ ॥ ৪৫ ॥

সব্রীডস্মিতবিক্ষিপ্তভ্রূবিলাসাবলোকনৈঃ ।
দৈত্যযূথপচেতঃসু কামমুদ্দীপযন্ মুহুঃ ॥ ৪৬ ॥