শ্রীমদ্ভাগবতম্ ৯.১০

শ্রীশুক উবাচ
খট্বাঙ্গাদ্ দীর্ঘবাহুশ্চ রঘুস্তস্মাত্ পৃথুশ্রবাঃ ।
অজস্ততো মহারাজস্তস্মাদ্ দশরথোঽভবত্ ॥ ১ ॥

তস্যাপি ভগবানেষ সাক্ষাদ্ ব্রহ্মমযো হরিঃ ।
অংশাংশেন চতুর্ধাগাত্ পুত্রত্বং প্রার্থিতঃ সুরৈঃ ।
রামলক্ষ্মণভরতশত্রুঘ্না ইতি সংজ্ঞযা ॥ ২ ॥

তস্যানুচরিতং রাজন্নৃষিভিস্তত্ত্বদর্শিভিঃ ।
শ্রুতং হি বর্ণিতং ভূরি ত্বযা সীতাপতের্মুহুঃ ॥ ৩ ॥

গুর্বর্থে ত্যক্তরাজ্যো ব্যচরদনুবনং পদ্মপদ্ভ্যাং প্রিযাযাঃ
পাণিস্পর্শাক্ষমাভ্যাং মৃজিতপথরুজো যো হরীন্দ্রানুজাভ্যাম্ ।
বৈরূপ্যাচ্ছূর্পণখ্যাঃ প্রিযবিরহরুষারোপিতভ্রূবিজৃম্ভ-
ত্রস্তাব্ধির্বদ্ধসেতুঃ খলদবদহনঃ কোসলেন্দ্রোঽবতান্নঃ ॥ ৪ ॥

বিশ্বামিত্রাধ্বরে যেন মারীচাদ্যা নিশাচরাঃ ।
পশ্যতো লক্ষ্মণস্যৈব হতা নৈর্ঋতপুঙ্গবাঃ ॥ ৫ ॥

যো লোকবীরসমিতৌ ধনুরৈশমুগ্রং
সীতাস্বযংবরগৃহে ত্রিশতোপনীতম্ ।
আদায বালগজলীল ইবেক্ষুযষ্টিং
সজ্জ্যীকৃতং নৃপ বিকৃষ্য বভঞ্জ মধ্যে ॥ ৬ ॥

জিত্বানুরূপগুণশীলবযোঽঙ্গরূপাং
সীতাভিধাং শ্রিযমুরস্যভিলব্ধমানাম্ ।
মার্গে ব্রজন্ ভৃগুপতের্ব্যনযত্ প্ররূঢং
দর্পং মহীমকৃত যস্ত্রিররাজবীজাম্ ॥ ৭ ॥

যঃ সত্যপাশপরিবীতপিতুর্নিদেশং
স্ত্রৈণস্য চাপি শিরসা জগৃহে সভার্যঃ ।
রাজ্যং শ্রিযং প্রণযিনঃ সুহৃদো নিবাসং
ত্যক্ত্বা যযৌ বনমসূনিব মুক্তসঙ্গঃ ॥ ৮ ॥

রক্ষঃস্বসুর্ব্যকৃত রূপমশুদ্ধবুদ্ধে-
স্তস্যাঃ খরত্রিশিরদূষণমুখ্যবন্ধূন্ ।
জঘ্নে চতুর্দশসহস্রমপারণীয-
কোদণ্ডপাণিরটমান উবাস কৃচ্ছ্রম্ ॥ ৯ ॥

সীতাকথাশ্রবণদীপিতহৃচ্ছযেন
সৃষ্টং বিলোক্য নৃপতে দশকন্ধরেণ ।
জঘ্নেঽদ্ভুতৈণবপুষাশ্রমতোঽপকৃষ্টো
মারীচমাশু বিশিখেন যথা কমুগ্রঃ ॥ ১০ ॥

রক্ষোঽধমেন বৃকবদ্ বিপিনেঽসমক্ষং
বৈদেহরাজদুহিতর্যপযাপিতাযাম্ ।
ভ্রাত্রা বনে কৃপণবত্ প্রিযযা বিযুক্তঃ
স্ত্রীসঙ্গিনাং গতিমিতি প্রথযংশ্চচার ॥ ১১ ॥

দগ্ধ্বাত্মকৃত্যহতকৃত্যমহন্ কবন্ধং
সখ্যং বিধায কপিভির্দযিতাগতিং তৈঃ ।
বুদ্ধ্বাথ বালিনি হতে প্লবগেন্দ্রসৈন্যৈ-
র্বেলামগাত্ স মনুজোঽজভবার্চিতাঙ্ঘ্রিঃ ॥ ১২ ॥

যদ্রোষবিভ্রমবিবৃত্তকটাক্ষপাত-
সম্ভ্রান্তনক্রমকরো ভযগীর্ণঘোষঃ ।
সিন্ধুঃ শিরস্যর্হণং পরিগৃহ্য রূপী
পাদারবিন্দমুপগম্য বভাষ এতত্ ॥ ১৩ ॥

ন ত্বাং বযং জডধিযো নু বিদাম ভূমন্
কূটস্থমাদিপুরুষং জগতামধীশম্ ।
যত্সত্ত্বতঃ সুরগণা রজসঃ প্রজেশা
মন্যোশ্চ ভূতপতযঃ স ভবান্ গুণেশঃ ॥ ১৪ ॥

কামং প্রযাহি জহি বিশ্রবসোঽবমেহং
ত্রৈলোক্যরাবণমবাপ্নুহি বীর পত্নীম্ ।
বধ্নীহি সেতুমিহ তে যশসো বিতত্যৈ
গাযন্তি দিগ্বিজযিনো যমুপেত্য ভূপাঃ ॥ ১৫ ॥

বদ্ধ্বোদধৌ রঘুপতির্বিবিধাদ্রিকূটৈঃ
সেতুং কপীন্দ্রকরকম্পিতভূরুহাঙ্গৈঃ ।
সুগ্রীবনীলহনুমত্প্রমুখৈরনীকৈ-
র্লঙ্কাং বিভীষণদৃশাবিশদগ্রদগ্ধাম্ ॥ ১৬ ॥

সা বানরেন্দ্রবলরুদ্ধবিহারকোষ্ঠ-
শ্রীদ্বারগোপুরসদোবলভীবিটঙ্কা ।
নির্ভজ্যমানধিষণধ্বজহেমকুম্ভ-
শৃঙ্গাটকা গজকুলৈর্হ্রদিনীব ঘূর্ণা ॥ ১৭ ॥

রক্ষঃপতিস্তদবলোক্য নিকুম্ভকুম্ভ-
ধূম্রাক্ষদুর্মুখসুরান্তকনরান্তকাদীন্ ।
পুত্রং প্রহস্তমতিকাযবিকম্পনাদীন্
সর্বানুগান্ সমহিনোদথ কুম্ভকর্ণম্ ॥ ১৮ ॥

তাং যাতুধানপৃতনামসিশূলচাপ-
প্রাসর্ষ্টিশক্তিশরতোমরখড্গদুর্গাম্ ।
সুগ্রীবলক্ষ্মণমরুত্সুতগন্ধমাদ-
নীলাঙ্গদর্ক্ষপনসাদিভিরন্বিতোঽগাত্ ॥ ১৯ ॥

তেঽনীকপা রঘুপতেরভিপত্য সর্বে
দ্বন্দ্বং বরূথমিভপত্তিরথাশ্বযোধৈঃ ।
জঘ্নুর্দ্রুমৈর্গিরিগদেষুভিরঙ্গদাদ্যাঃ
সীতাভিমর্ষহতমঙ্গলরাবণেশান্ ॥ ২০ ॥

রক্ষঃপতিঃ স্ববলনষ্টিমবেক্ষ্য রুষ্ট
আরুহ্য যানকমথাভিসসার রামম্ ।
স্বঃস্যন্দনে দ্যুমতি মাতলিনোপনীতে
বিভ্রাজমানমহনন্নিশিতৈঃ ক্ষুরপ্রৈঃ ॥ ২১ ॥

রামস্তমাহ পুরুষাদপুরীষ যন্নঃ
কান্তাসমক্ষমসতাপহৃতা শ্ববত্ তে ।
ত্যক্তত্রপস্য ফলমদ্য জুগুপ্সিতস্য
যচ্ছামি কাল ইব কর্তুরলঙ্ঘ্যবীর্যঃ ॥ ২২ ॥

এবং ক্ষিপন্ ধনুষি সংধিতমুত্সসর্জ
বাণং স বজ্রমিব তদ্ধৃদযং বিভেদ ।
সোঽসৃগ্ বমন্ দশমুখৈর্ন্যপতদ্ বিমানা-
দ্ধাহেতি জল্পতি জনে সুকৃতীব রিক্তঃ ॥ ২৩ ॥

ততো নিষ্ক্রম্য লঙ্কাযা যাতুধান্যঃ সহস্রশঃ ।
মন্দোদর্যা সমং তত্র প্ররুদন্ত্য উপাদ্রবন্ ॥ ২৪ ॥

স্বান্ স্বান্ বন্ধূন্ পরিষ্বজ্য লক্ষ্মণেষুভিরর্দিতান্ ।
রুরুদুঃ সুস্বরং দীনা ঘ্নন্ত্য আত্মানমাত্মনা ॥ ২৫ ॥

হা হতাঃ স্ম বযং নাথ লোকরাবণ রাবণ ।
কং যাযাচ্ছরণং লঙ্কা ত্বদ্বিহীনা পরার্দিতা ॥ ২৬ ॥

ন বৈ বেদ মহাভাগ ভবান্ কামবশং গতঃ ।
তেজোঽনুভাবং সীতাযা যেন নীতো দশামিমাম্ ॥ ২৭ ॥

কৃতৈষা বিধবা লঙ্কা বযং চ কুলনন্দন ।
দেহঃ কৃতোঽন্নং গৃধ্রাণামাত্মা নরকহেতবে ॥ ২৮ ॥

শ্রীশুক উবাচ
স্বানাং বিভীষণশ্চক্রে কোসলেন্দ্রানুমোদিতঃ ।
পিতৃমেধবিধানেন যদুক্তং সাম্পরাযিকম্ ॥ ২৯ ॥

ততো দদর্শ ভগবানশোকবনিকাশ্রমে ।
ক্ষামাং স্ববিরহব্যাধিং শিংশপামূলমাশ্রিতাম্ ॥ ৩০ ॥

রামঃ প্রিযতমাং ভার্যাং দীনাং বীক্ষ্যান্বকম্পত ।
আত্মসন্দর্শনাহ্লাদবিকসন্মুখপঙ্কজাম্ ॥ ৩১ ॥

আরোপ্যারুরুহে যানং ভ্রাতৃভ্যাং হনুমদ্যুতঃ ।
বিভীষণায ভগবান্ দত্ত্বা রক্ষোগণেশতাম্ ।
লঙ্কামাযুশ্চ কল্পান্তং যযৌ চীর্ণব্রতঃ পুরীম্ ॥ ৩২ ॥

অবকীর্যমাণঃ সুকুসুমৈর্লোকপালার্পিতৈঃ পথি ।
উপগীযমানচরিতঃ শতধৃত্যাদিভির্মুদা ॥ ৩৩ ॥

গোমূত্রযাবকং শ্রুত্বা ভ্রাতরং বল্কলাম্বরম্ ।
মহাকারুণিকোঽতপ্যজ্জটিলং স্থণ্ডিলেশযম্ ॥ ৩৪ ॥

ভরতঃ প্রাপ্তমাকর্ণ্য পৌরামাত্যপুরোহিতৈঃ ।
পাদুকে শিরসি ন্যস্য রামং প্রত্যুদ্যতোঽগ্রজম্ ॥ ৩৫ ॥

নন্দিগ্রামাত্ স্বশিবিরাদ্ গীতবাদিত্রনিঃস্বনৈঃ ।
ব্রহ্মঘোষেণ চ মুহুঃ পঠদ্ভির্ব্রহ্মবাদিভিঃ ॥ ৩৬ ॥

স্বর্ণকক্ষপতাকাভির্হৈমৈশ্চিত্রধ্বজৈ রথৈঃ ।
সদশ্বৈ রুক্মসন্নাহৈর্ভটৈঃ পুরটবর্মভিঃ ॥ ৩৭ ॥

শ্রেণীভির্বারমুখ্যাভির্ভৃত্যৈশ্চৈব পদানুগৈঃ ।
পারমেষ্ঠ্যান্যুপাদায পণ্যান্যুচ্চাবচানি চ ।
পাদযোর্ন্যপতত্ প্রেম্ণা প্রক্লিন্নহৃদযেক্ষণঃ ॥ ৩৮ ॥

পাদুকে ন্যস্য পুরতঃ প্রাঞ্জলির্বাষ্পলোচনঃ ।
তমাশ্লিষ্য চিরং দোর্ভ্যাং স্নাপযন্ নেত্রজৈর্জলৈঃ ॥ ৩৯ ॥

রামো লক্ষ্মণসীতাভ্যাং বিপ্রেভ্যো যেঽর্হসত্তমাঃ ।
তেভ্যঃ স্বযং নমশ্চক্রে প্রজাভিশ্চ নমস্কৃতঃ ॥ ৪০ ॥

ধুন্বন্ত উত্তরাসঙ্গান্ পতিং বীক্ষ্য চিরাগতম্ ।
উত্তরাঃ কোসলা মাল্যৈঃ কিরন্তো ননৃতুর্মুদা ॥ ৪১ ॥

পাদুকে ভরতোঽগৃহ্ণাচ্চামরব্যজনোত্তমে ।
বিভীষণঃ সসুগ্রীবঃ শ্বেতচ্ছত্রং মরুত্সুতঃ ॥ ৪২ ॥

ধনুর্নিষঙ্গাঞ্ছত্রুঘ্নঃ সীতা তীর্থকমণ্ডলুম্ ।
অবিভ্রদঙ্গদঃ খড্গং হৈমং চর্মর্ক্ষরাণ্নৃপ ॥ ৪৩ ॥

পুষ্পকস্থো নুতঃ স্ত্রীভিঃ স্তূযমানশ্চ বন্দিভিঃ ।
বিরেজে ভগবান্ রাজন্ গ্রহৈশ্চন্দ্র ইবোদিতঃ ॥ ৪৪ ॥

ভ্রাত্রাভিনন্দিতঃ সোঽথ সোত্সবাং প্রাবিশত্ পুরীম্ ।
প্রবিশ্য রাজভবনং গুরুপত্নীঃ স্বমাতরম্ ॥ ৪৫ ॥

গুরূন্ বযস্যাবরজান্ পূজিতঃ প্রত্যপূজযত্ ।
বৈদেহী লক্ষ্মণশ্চৈব যথাবত্ সমুপেযতুঃ ॥ ৪৬ ॥

পুত্রান্ স্বমাতরস্তাস্তু প্রাণাংস্তন্ব ইবোত্থিতাঃ ।
আরোপ্যাঙ্কেঽভিষিঞ্চন্ত্যো বাষ্পৌঘৈর্বিজহুঃ শুচঃ ॥ ৪৭ ॥

জটা নির্মুচ্য বিধিবত্ কুলবৃদ্ধৈঃ সমং গুরুঃ ।
অভ্যষিঞ্চদ্ যথৈবেন্দ্রং চতুঃসিন্ধুজলাদিভিঃ ॥ ৪৮ ॥

এবং কৃতশিরঃস্নানঃ সুবাসাঃ স্রগ্ব্যলঙ্কৃতঃ ।
স্বলঙ্কৃতৈঃ সুবাসোভির্ভ্রাতৃভির্ভার্যযা বভৌ ॥ ৪৯ ॥

অগ্রহীদাসনং ভ্রাত্রা প্রণিপত্য প্রসাদিতঃ ।
প্রজাঃ স্বধর্মনিরতা বর্ণাশ্রমগুণান্বিতাঃ ।
জুগোপ পিতৃবদ্ রামো মেনিরে পিতরং চ তম্ ॥ ৫০ ॥

ত্রেতাযাং বর্তমানাযাং কালঃ কৃতসমোঽভবত্ ।
রামে রাজনি ধর্মজ্ঞে সর্বভূতসুখাবহে ॥ ৫১ ॥

বনানি নদ্যো গিরযো বর্ষাণি দ্বীপসিন্ধবঃ ।
সর্বে কামদুঘা আসন্ প্রজানাং ভরতর্ষভ ॥ ৫২ ॥

নাধিব্যাধিজরাগ্লানিদুঃখশোকভযক্লমাঃ ।
মৃত্যুশ্চানিচ্ছতাং নাসীদ্ রামে রাজন্যধোক্ষজে ॥ ৫৩ ॥

একপত্নীব্রতধরো রাজর্ষিচরিতঃ শুচিঃ ।
স্বধর্মং গৃহমেধীযং শিক্ষযন্ স্বযমাচরত্ ॥ ৫৪ ॥

প্রেম্ণানুবৃত্ত্যা শীলেন প্রশ্রযাবনতা সতী ।
ভিযা হ্রিযা চ ভাবজ্ঞা ভর্তুঃ সীতাহরন্মনঃ ॥ ৫৫ ॥