అమృత సఞ్జీవని ధన్వన్తరీ స్తోత్రమ్

అథాపరమహం వక్ష్యేఽమృతసఞ్జీవనం స్తవమ్ ।
యస్యానుష్ఠానమాత్రేణ మృత్యుర్దూరాత్పలాయతే ॥ 1 ॥

అసాధ్యాః కష్టసాధ్యాశ్చ మహారోగా భయఙ్కరాః ।
శీఘ్రం నశ్యన్తి పఠనాదస్యాయుశ్చ ప్రవర్ధతే ॥ 2 ॥

శాకినీడాకినీదోషాః కుదృష్టిగ్రహశత్రుజాః ।
ప్రేతవేతాలయక్షోత్థా బాధా నశ్యన్తి చాఖిలాః ॥ 3 ॥

దురితాని సమస్తాని నానాజన్మోద్భవాని చ ।
సంసర్గజవికారాణి విలీయన్తేఽస్య పాఠతః ॥ 4 ॥

సర్వోపద్రవనాశాయ సర్వబాధాప్రశాన్తయే ।
ఆయుః ప్రవృద్ధయే చైతత్ స్తోత్రం పరమమద్భుతమ్ ॥ 5 ॥

బాలగ్రహాభిభూతానాం బాలానాం సుఖదాయకమ్ ।
సర్వారిష్టహరం చైతద్బలపుష్టికరం పరమ్ ॥ 6 ॥

బాలానాం జీవనాయైతత్ స్తోత్రం దివ్యం సుధోపమమ్ ।
మృతవత్సత్వహరణం చిరఞ్జీవిత్వకారకమ్ ॥ 7 ॥

మహారోగాభిభూతానాం భయవ్యాకులితాత్మనామ్ ।
సర్వాధివ్యాధిహరణం భయఘ్నమమృతోపమమ్ ॥ 8 ॥

అల్పమృత్యుశ్చాపమృత్యుః పాఠాదస్యః ప్రణశ్యతి ।
జలాఽగ్నివిషశస్త్రారి న హి శృఙ్గి భయం తథా ॥ 9 ॥

గర్భరక్షాకరం స్త్రీణాం బాలానాం జీవనప్రదమ్ ।
మహారోగహరం నౄణామల్పమృత్యుహరం పరమ్ ॥ 10 ॥

బాలా వృద్ధాశ్చ తరుణా నరా నార్యశ్చ దుఃఖితాః ।
భవన్తి సుఖినః పాఠాదస్య లోకే చిరాయుషః ॥ 11 ॥

అస్మాత్పరతరం నాస్తి జీవనోపాయ ఐహికః ।
తస్మాత్ సర్వప్రయత్నేన పాఠమస్య సమాచరేత్ ॥ 12 ॥

అయుతావృత్తికం వాథ సహస్రావృత్తికం తథా ।
తదర్ధం వా తదర్ధం వా పఠేదేతచ్చ భక్తితః ॥ 13 ॥

కలశే విష్ణుమారాధ్య దీపం ప్రజ్వాల్య యత్నతః ।
సాయం ప్రాతశ్చ విధివత్ స్తోత్రమేతత్ పఠేత్ సుధీః ॥ 14 ॥

సర్పిషా హవిషా వాఽపి సంయావేనాథ భక్తితః ।
దశాంశమానతో హోమం కుర్యాత్ సర్వార్థసిద్ధయే ॥ 15 ॥
అథ స్తోత్రమ్
నమో నమో విశ్వవిభావనాయ
నమో నమో లోకసుఖప్రదాయ ।
నమో నమో విశ్వసృజేశ్వరాయ
నమో నమో ముక్తివరప్రదాయ ॥ 1 ॥
నమో నమస్తేఽఖిలలోకపాయ
నమో నమస్తేఽఖిలకామదాయ ।
నమో నమస్తేఽఖిలకారణాయ
నమో నమస్తేఽఖిలరక్షకాయ ॥ 2 ॥
నమో నమస్తే సకలార్తిహర్త్రే
నమో నమస్తే విరుజః ప్రకర్త్రే ।
నమో నమస్తేఽఖిలవిశ్వధర్త్రే
నమో నమస్తేఽఖిలలోకభర్త్రే ॥ 3 ॥
సృష్టం దేవ చరాచరం జగదిదం బ్రహ్మస్వరూపేణ తే
సర్వం తత్పరిపాల్యతే జగదిదం విష్ణుస్వరూపేణ తే ।
విశ్వం సంహ్రితయే తదేవ నిఖిలం రుద్రస్వరూపేణ తే
సంసిచ్యామృతశీకరైర్హర మహారిష్టం చిరం జీవయ ॥ 4 ॥
యో ధన్వన్తరిసఞ్జ్ఞయా నిగదితః క్షీరాబ్ధితో నిఃసృతో
హస్తాభ్యాం జనజీవనాయ కలశం పీయూషపూర్ణం దధత్ ।
ఆయుర్వేదమరీరచజ్జనరుజాం నాశాయ స త్వం ముదా
సంసిచ్యామృతశీకరైర్హర మహారిష్టం చిరం జీవయ ॥ 5 ॥
స్త్రీరూపం వరభూషణామ్బరధరం త్రైలోక్యసమ్మోహనం
కృత్వా పాయయతి స్మ యః సురగణాన్ పీయూషమత్యుత్తమమ్ ।
చక్రే దైత్యగణాన్ సుధావిరహితాన్ సమ్మోహ్య స త్వం ముదా
సంసిచ్యామృతశీకరైర్హర మహారిష్టం చిరం జీవయ ॥ 6 ॥
చాక్షుషోదధిసమ్ప్లావ భూవేదప ఝషాకృతే ।
సిఞ్చ సిఞ్చామృతకణైశ్చిరం జీవయ జీవయ ॥ 7 ॥
పృష్ఠమన్దరనిర్ఘూర్ణనిద్రాక్ష కమఠాకృతే ।
సిఞ్చ సిఞ్చామృతకణైశ్చిరం జీవయ జీవయ ॥ 8 ॥
యాఞ్చాచ్ఛలబలిత్రాసముక్తనిర్జర వామన ।
సిఞ్చ సిఞ్చామృతకణైశ్చిరం జీవయ జీవయ ॥ 9 ॥
ధరోద్ధార హిరణ్యాక్షఘాత క్రోడాకృతే ప్రభో ।
సిఞ్చ సిఞ్చామృతకణైశ్చిరం జీవయ జీవయ ॥ 10 ॥
భక్తత్రాసవినాశాత్తచణ్డత్వ నృహరే విభో ।
సిఞ్చ సిఞ్చామృతకణైశ్చిరం జీవయ జీవయ ॥ 11 ॥
క్షత్రియారణ్యసఞ్ఛేదకుఠారకరరైణుక ।
సిఞ్చ సిఞ్చామృతకణైశ్చిరం జీవయ జీవయ ॥ 12 ॥
రక్షోరాజప్రతాపాబ్ధిశోషణాశుగ రాఘవ ।
సిఞ్చ సిఞ్చామృతకణైశ్చిరం జీవయ జీవయ ॥ 13 ॥
భూభారాసురసన్దోహకాలాగ్నే రుక్మిణీపతే ।
సిఞ్చ సిఞ్చామృతకణైశ్చిరం జీవయ జీవయ ॥ 14 ॥
వేదమార్గరతానర్హవిభ్రాన్త్యై బుద్ధరూపధృక్ ।
సిఞ్చ సిఞ్చామృతకణైశ్చిరం జీవయ జీవయ ॥ 15 ॥
కలివర్ణాశ్రమాస్పష్టధర్మర్ధ్యై కల్కిరూపభాక్ ।
సిఞ్చ సిఞ్చామృతకణైశ్చిరం జీవయ జీవయ ॥ 16 ॥
అసాధ్యాః కష్టసాధ్యా యే మహారోగా భయఙ్కరాః ।
ఛిన్ధి తానాశు చక్రేణ చిరం జీవయ జీవయ ॥ 17 ॥
అల్పమృత్యుం చాపమృత్యుం మహోత్పాతానుపద్రవాన్ ।
భిన్ధి భిన్ధి గదాఘాతైశ్చిరం జీవయ జీవయ ॥ 18 ॥
అహం న జానే కిమపి త్వదన్యత్
సమాశ్రయే నాథ పదామ్బుజం తే ।
కురుష్వ తద్యన్మనసీప్సితం తే
సుకర్మణా కేన సమక్షమీయామ్ ॥ 19 ॥
త్వమేవ తాతో జననీ త్వమేవ
త్వమేవ నాథశ్చ త్వమేవ బన్ధుః ।
విద్యాధనాగారకులం త్వమేవ
త్వమేవ సర్వం మమ దేవదేవ ॥ 20 ॥
న మేఽపరాధం ప్రవిలోకయ ప్రభో-
-ఽపరాధసిన్ధోశ్చ దయానిధిస్త్వమ్ ।
తాతేన దుష్టోఽపి సుతః సురక్షతే
దయాలుతా తేఽవతు సర్వదాఽస్మాన్ ॥ 21 ॥
అహహ విస్మర నాథ న మాం సదా
కరుణయా నిజయా పరిపూరితః ।
భువి భవాన్ యది మే న హి రక్షకః
కథమహో మమ జీవనమత్ర వై ॥ 22 ॥
దహ దహ కృపయా త్వం వ్యాధిజాలం విశాలం
హర హర కరవాలం చాల్పమృత్యోః కరాలమ్ ।
నిజజనపరిపాలం త్వాం భజే భావయాలం
కురు కురు బహుకాలం జీవితం మే సదాఽలమ్ ॥ 23 ॥
న యత్ర ధర్మాచరణం న జానం
వ్రతం న యోగో న చ విష్ణుచర్చా ।
న పితృగోవిప్రవరామరార్చా
స్వల్పాయుషస్తత్ర జనా భవన్తి ॥ 24 ॥
అథ మన్త్రమ్
క్లీం శ్రీం క్లీం శ్రీం నమో భగవతే జనార్దనాయ సకల దురితాని నాశయ నాశయ ।
క్ష్రౌం ఆరోగ్యం కురు కురు । హ్రీం దీర్ఘమాయుర్దేహి దేహి స్వాహా ॥
ఫలశ్రుతిః
అస్య ధారణతో జాపాదల్పమృత్యుః ప్రశామ్యతి ।
గర్భరక్షాకరం స్త్రీణాం బాలానాం జీవనం పరమ్ ॥ 1 ॥
శతం పఞ్చాశతం శక్త్యాఽథవా పఞ్చాధివింశతిమ్ ।
పుస్తకానాం ద్విజేభ్యస్తు దద్యాద్దీర్ఘాయుషాప్తయే ॥ 2 ॥
భూర్జపత్రే విలిఖ్యేదం కణ్ఠే వా బాహుమూలకే ।
సన్ధారయేద్గర్భరక్షా బాలరక్షా చ జాయతే ॥ 3 ॥
సర్వే రోగా వినశ్యన్తి సర్వా బాధాః ప్రశామ్యతి ।
కుదృష్టిజం భయం నశ్యేత్ తథా ప్రేతాదిజం భయమ్ ॥ 4 ॥
మయా కథితమేతత్తేఽమృతసఞ్జీవనం పరమ్ ।
అల్పమృత్యుహరం స్తోత్రం మృతవత్సత్వనాశనమ్ ॥ 5 ॥