ద్విరదవదన విషమరద వరద జయేశాన శాన్తవరసదన ।
సదనవసాదన దయయా కురు సాదనమన్తరాయస్య ॥ 1 ॥
సదనవసాదన దయయా కురు సాదనమన్తరాయస్య ॥ 1 ॥
ఇన్దుకలా కలితాలిక సాలికశుమ్భత్కపోలపాలియుగ ।
వికటస్ఫుటకటధారాధారోఽస్యస్య ప్రపఞ్చస్య ॥ 2 ॥
వికటస్ఫుటకటధారాధారోఽస్యస్య ప్రపఞ్చస్య ॥ 2 ॥
వరపరశుపాశపాణే పణితపణాయాపణాయితోఽసి యతః ।
ఆరూహ్య వజ్రదన్తం ఆఖుం విదధాసి విపదన్తమ్ ॥ 3 ॥
ఆరూహ్య వజ్రదన్తం ఆఖుం విదధాసి విపదన్తమ్ ॥ 3 ॥
లమ్బోదర దూర్వాసన శయధృతసామోదమోదకాశనక ।
శనకైరవలోకయ మాం యమాన్తరాయాపహారిచారుదృశా ॥ 4 ॥
శనకైరవలోకయ మాం యమాన్తరాయాపహారిచారుదృశా ॥ 4 ॥
ఆనన్దతున్దిలాఖిలవృన్దారకవృన్దవన్దితాఙ్ఘ్రియుగ ।
సుఖధృతదణ్డరసాలో నాగజభాలోఽతిభాసి విభో ॥ 5 ॥
సుఖధృతదణ్డరసాలో నాగజభాలోఽతిభాసి విభో ॥ 5 ॥
అగణేయగుణేశాత్మజ చిన్తకచిన్తామణే గణేశాన ।
స్వచరణశరణం కరుణావరుణాలయ దేవ పాహి మాం దీనమ్ ॥ 6 ॥
స్వచరణశరణం కరుణావరుణాలయ దేవ పాహి మాం దీనమ్ ॥ 6 ॥
రుచిరవచోఽమృతరావోన్నీతా నీతా దివం స్తుతిః స్ఫీతా ।
ఇతి షట్పదీ మదీయా గణపతిపాదామ్బుజే విశతు ॥ 7 ॥
ఇతి షట్పదీ మదీయా గణపతిపాదామ్బుజే విశతు ॥ 7 ॥
ఇతి చిన్తామణిషట్పదీ ॥