1.6 - ರಾಜಸೂಯಾನುಬ್ರಾಹ್ಮಣಂ - ಕೃಷ್ಣ ಯಜುರ್ವೇದ ತೈತ್ತಿರೀಯ ಬ್ರಾಹ್ಮಣ ಪಾಠಃ - ಅನುಮತ್ಯೈ ಪುರೋಡಾಶಮ್

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ಷಷ್ಠಃ ಪ್ರಪಾಠಕಃ - ರಾಜಸೂಯಾನುಬ್ರಾಹ್ಮಣಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ಅನುವಾಕಂ 1 - ಅನುಮತ್ಯಾದ್ಯಾ ಇಷ್ಟಯಃ
ಅನುಮತ್ಯೈ ಪುರೋಡಾಶ-ಮಷ್ಟಾಕಪಾಲ-ನ್ನಿರ್ವಪತಿ । ಯೇ ಪ್ರತ್ಯಞ್ಚ-ಶ್ಶಮ್ಯಾಯಾ ಅವಶೀಯನ್ತೇ । ತನ್ನೈರ್ಋತ-ಮೇಕಕಪಾಲಮ್ । ಇಯಂ-ವಾಁ ಅನುಮತಿಃ । ಇಯ-ನ್ನಿರ್-ಋತಿಃ । ನೈರ್ಋತೇನ ಪೂರ್ವೇಣ ಪ್ರಚರತಿ । ಪಾಪ್ಮಾನಮೇವ ನಿರ್-ಋತಿ-ಮ್ಪೂರ್ವಾ-ನ್ನಿರವದಯತೇ । ಏಕ ಕಪಾಲೋ ಭವತಿ । ಏಕಧೈವ ನಿರ್-ಋತಿ-ನ್ನಿರವದಯತೇ । ಯದಹುತ್ವಾ ಗಾರ್ಹಪತ್ಯ ಈಯುಃ ॥ 1 ॥
ರುದ್ರೋ ಭೂತ್ವಾ-ಽಗ್ನಿರನೂತ್ಥಾಯ । ಅದ್ಧ್ವರ್ಯು-ಞ್ಚ ಯಜಮಾನ-ಞ್ಚ ಹನ್ಯಾತ್ । ವೀಹಿ ಸ್ವಾಹಾ ಽಽಹುತಿ-ಞ್ಜುಷಾಣ ಇತ್ಯಾಹ । ಆಹುತ್ಯೈವೈನಗ್ಂ ಶಮಯತಿ । ನಾರ್ತಿಮಾರ್ಚ್ಛ-ತ್ಯದ್ಧ್ವರ್ಯುರ್ನ ಯಜಮಾನಃ । ಏಕೋಲ್ಮುಕೇನ ಯನ್ತಿ । ತದ್ಧಿ ನಿರ್-ಋತ್ಯೈ ಭಾಗಧೇಯಮ್ । ಇಮಾ-ನ್ದಿಶಂ-ಯಁನ್ತಿ । ಏಷಾ ವೈ ನಿರ್-ಋತ್ಯೈ ದಿಕ್ । ಸ್ವಾಯಾಮೇವ ದಿಶಿ ನಿರ್-ಋತಿ-ನ್ನಿರವದಯತೇ ॥ 2 ॥
ಸ್ವಕೃತ ಇರಿಣೇ ಜುಹೋತಿ ಪ್ರದರೇ ವಾ । ಏತದ್ವೈ ನಿರ್-ಋತ್ಯಾ ಆಯತನಮ್ । ಸ್ವ ಏವಾಯತನೇ ನಿರ್-ಋತಿ-ನ್ನಿರವದಯತೇ । ಏಷ ತೇ ನಿರ್-ಋತೇ ಭಾಗ ಇತ್ಯಾಹ । ನಿರ್ದಿಶತ್ಯೇವೈನಾಮ್ । ಭೂತೇ ಹವಿಷ್ಮತ್ಯಸೀತ್ಯಾಹ । ಭೂತಿಮೇವೋಪಾವರ್ತತೇ । ಮುಞ್ಚೇಮಮಗ್ಂಹಸ ಇತ್ಯಾಹ । ಅಗ್ಂಹಸ ಏವೈನ-ಮ್ಮುಞ್ಚತಿ । ಅಙ್ಗುಷ್ಠಾಭ್ಯಾ-ಞ್ಜುಹೋತಿ ॥ 3 ॥
ಅನ್ತತ ಏವ ನಿರ್-ಋತಿ-ನ್ನಿರವದಯತೇ । ಕೃಷ್ಣಂ-ವಾಁಸಃ ಕೃಷ್ಣತೂಷ-ನ್ದಕ್ಷಿಣಾ । ಏತ-ದ್ವೈ ನಿರ್-ಋತ್ಯೈ ರೂಪಮ್ । ರೂಪೇಣೈವ ನಿರ್-ಋತಿ-ನ್ನಿರವದಯತೇ । ಅಪ್ರತೀಕ್ಷಮಾಯನ್ತಿ । ನಿರ್-ಋತ್ಯಾ ಅನ್ತರ್ಹಿತ್ಯೈ । ಸ್ವಾಹಾ ನಮೋ ಯ ಇದ-ಞ್ಚಕಾರೇತಿ ಪುನರೇತ್ಯ ಗಾರ್ಹಪತ್ಯೇ ಜುಹೋತಿ । ಆಹುತ್ಯೈವ ನಮಸ್ಯನ್ತೋ ಗಾರ್ಹಪತ್ಯ-ಮುಪಾವರ್ತನ್ತೇ । ಆನುಮತೇನ ಪ್ರಚರತಿ । ಇಯಂ-ವಾಁ ಅನುಮತಿಃ ॥ 4 ॥
ಇಯಮೇವಾಸ್ಮೈ ರಾಜ್ಯಮನುಮನ್ಯತೇ । ಧೇನು-ರ್ದಕ್ಷಿಣಾ । ಇಮಾಮೇವ ಧೇನು-ಙ್ಕುರುತೇ । ಆದಿತ್ಯ-ಞ್ಚರು-ನ್ನಿರ್ವಪತಿ । ಉಭಯೀಷ್ವೇವ ಪ್ರಜಾಸ್ವಭಿಷಿಚ್ಯತೇ । ದೈವೀಷು ಚ ಮಾನುಷೀಷು ಚ । ವರೋ ದಕ್ಷಿಣಾ । ವರೋ ಹಿ ರಾಜ್ಯಗ್ಂ ಸಮೃದ್ಧ್ಯೈ । ಆಗ್ನಾವೈಷ್ಣವ-ಮೇಕಾದಶಕಪಾಲ-ನ್ನಿರ್ವಪತಿ । ಅಗ್ನಿ-ಸ್ಸರ್ವಾ ದೇವತಾಃ ॥ 5 ॥
ವಿಷ್ಣುರ್ಯಜ್ಞಃ । ದೇವತಾಶ್ಚೈವ ಯಜ್ಞ-ಞ್ಚಾವ ರುನ್ಧೇ । ವಾಮನೋ ವಹೀ ದಕ್ಷಿಣಾ । ಯ-ದ್ವಹೀ । ತೇನಾಗ್ನೇಯಃ । ಯ-ದ್ವಾಮನಃ । ತೇನ ವೈಷ್ಣವ-ಸ್ಸಮೃದ್ಧ್ಯೈ । ಅಗ್ನೀಷೋಮೀಯ-ಮೇಕಾದಶಕಪಾಲ-ನ್ನಿರ್ವಪತಿ । ಅಗ್ನೀಷೋಮಾಭ್ಯಾಂ-ವಾಁ ಇನ್ದ್ರೋ ವೃತ್ರಮಹನ್ನಿತಿ । ಯದಗ್ನೀಷೋಮೀಯ-ಮೇಕಾದಶಕಪಾಲ-ನ್ನಿರ್ವಪತಿ ॥ 6 ॥
ವಾರ್ತ್ರಘ್ನಮೇವ ವಿಜಿತ್ಯೈ । ಹಿರಣ್ಯ-ನ್ದಕ್ಷಿಣಾ ಸಮೃದ್ಧ್ಯೈ । ಇನ್ದ್ರೋ ವೃತ್ರಗ್ಂ ಹತ್ವಾ । ದೇವತಾಭಿಶ್ಚೇನ್ದ್ರಿಯೇಣ ಚ ವ್ಯಾರ್ಧ್ಯತ । ಸ ಏತಮೈನ್ದ್ರಾಗ್ನ-ಮೇಕಾದಶಕಪಾಲ-ಮಪಶ್ಯತ್ । ತನ್ನಿರವಪತ್ । ತೇನ ವೈ ಸ ದೇವತಾಶ್ಚೇನ್ದ್ರಿಯ-ಞ್ಚಾವಾರುನ್ಧ । ಯದೈನ್ದ್ರಾಗ್ನ-ಮೇಕಾದಶಕಪಾಲ-ನ್ನಿರ್ವಪತಿ । ದೇವತಾಶ್ಚೈವ ತೇನೇನ್ದ್ರಿಯ-ಞ್ಚ ಯಜಮಾನೋ-ಽವ ರುನ್ಧೇ । ಋಷಭೋ ವಹೀ ದಕ್ಷಿಣಾ ॥ 7 ॥
ಯ-ದ್ವಹೀ । ತೇನಾಗ್ನೇಯಃ । ಯದೃಷಭಃ । ತೇನೈನ್ದ್ರ-ಸ್ಸಮೃದ್ಧ್ಯೈ । ಆಗ್ನೇಯಮಷ್ಟಾಕಪಾಲ-ನ್ನಿರ್ವಪತಿ । ಐನ್ದ್ರ-ನ್ದಧಿ । ಯದಾಗ್ನೇಯೋ ಭವತಿ । ಅಗ್ನಿರ್ವೈ ಯಜ್ಞಮುಖಮ್ । ಯಜ್ಞಮುಖಮೇವರ್ಧಿ-ಮ್ಪುರಾಸ್ತಾದ್ಧತ್ತೇ । ಯದೈನ್ದ್ರ-ನ್ದಧಿ ॥ 8 ॥
ಇನ್ದ್ರಿಯಮೇವಾವ ರುನ್ಧೇ । ಋಷಭೋ ವಹೀ ದಕ್ಷಿಣಾ । ಯದ್ವಹೀ । ತೇನಾಗ್ನೇಯಃ । ಯದೃಷಭಃ । ತೇನೈನ್ದ್ರ-ಸ್ಸಮೃದ್ಧ್ಯೈ । ಯಾವತೀರ್ವೈ ಪ್ರಜಾ ಓಷಧೀನಾ-ಮಹುತಾನಾ-ಮಾಶ್ಞನ್ನ್ । ತಾಃ ಪರಾ-ಽಭವನ್ನ್ । ಆಗ್ರಯಣ-ಮ್ಭವತಿ ಹುತಾದ್ಯಾಯ । ಯಜಮಾನಸ್ಯಾಪರಾಭಾವಾಯ ॥ 9 ॥
ದೇವಾ ವಾ ಓಷಧೀಷ್ವಾಜಿಮಯುಃ । ತಾ ಇನ್ದ್ರಾಗ್ನೀ ಉದಜಯತಾಮ್ । ತಾವೇತಮೈನ್ದ್ರಾಗ್ನ-ನ್ದ್ವಾದಶಕಪಾಲ-ನ್ನಿರವೃಣಾತಾಮ್ । ಯದೈನ್ದ್ರಾಗ್ನೋ ಭವತ್ಯುಜ್ಜಿತ್ಯೈ । ದ್ವಾದಶಕಪಾಲೋ ಭವತಿ । ದ್ವಾದಶ ಮಾಸಾ-ಸ್ಸಂವಁಥ್ಸರಃ । ಸಂವಁಥ್ಸರೇಣೈವಾಸ್ಮಾ ಅನ್ನಮವರುನ್ಧೇ । ವೈಶ್ವದೇವಶ್ಚರು-ರ್ಭವತಿ । ವೈಶ್ವದೇವಂ-ವಾಁ ಅನ್ನಮ್ । ಅನ್ನಮೇವಾಸ್ಮೈ ಸ್ವದಯತಿ ॥ 10 ॥
ಪ್ರಥಮಜೋ ವಥ್ಸೋ ದಕ್ಷಿಣಾ ಸಮೃದ್ಧ್ಯೈ । ಸೌಮ್ಯಗ್ಗ್ ಶ್ಯಾಮಾಕ-ಞ್ಚರು-ನ್ನಿರ್ವಪತಿ । ಸೋಮೋ ವಾ ಅಕೃಷ್ಟಪಚ್ಯಸ್ಯ ರಾಜಾ । ಅಕೃಷ್ಟಪಚ್ಯಮೇವಾಸ್ಮೈ ಸ್ವದಯತಿ । ವಾಸೋ ದಕ್ಷಿಣಾ । ಸೌಮ್ಯಗ್ಂಹಿ ದೇವತಯಾ ವಾಸ-ಸ್ಸಮೃದ್ಧ್ಯೈ । ಸರಸ್ವತ್ಯೈ ಚರು-ನ್ನಿರ್ವಪತಿ । ಸರಸ್ವತೇ ಚರುಮ್ । ಮಿಥುನಮೇವಾವ ರುನ್ಧೇ । ಮಿಥುನೌ ಗಾವೌ ದಕ್ಷಿಣಾ ಸಮೃದ್ಧ್ಯೈ । ಏತಿ ವಾ ಏಷ ಯಜ್ಞಮುಖಾದೃದ್ಧ್ಯಾಃ । ಯೋ-ಽಗ್ನೇರ್ದೇವತಾಯಾ ಏತಿ । ಅಷ್ಟಾವೇತಾನಿ ಹವೀಗ್ಂಷಿ ಭವನ್ತಿ । ಅಷ್ಟಾಕ್ಷರಾ ಗಾಯತ್ರೀ । ಗಾಯತ್ರೋ-ಽಗ್ನಿಃ । ತೇನೈವ ಯಜ್ಞಮುಖಾದೃದ್ಧ್ಯಾ ಅಗ್ನೇರ್ದೇವತಾಯೈ ನೈತಿ ॥ 11 ॥

(ಈಯು--ರ್ ನಿರವದಯತೇ - ಽಙ್ಗುಷ್ಠಾಭ್ಯಾ-ಞ್ಜುಹೋ - ತ್ಯನುಮತಿ--ರ್ ದೇವತಾ - ನಿರ್ವಪತಿ - ವಹೀ ದಕ್ಷಿಣಾ - ಯದೈನ್ದ್ರ-ನ್ದ - ಧ್ಯಪರಾಭಾವಾಯ - ಸ್ವದಯತಿ - ಗಾವೌ ದಕ್ಷಿಣಾ ಸಮೃದ್ಧ್ಯೈ ಷಟ್ಚ) (ಅ. 1)
ಅನುವಾಕಂ 2 - ಚಾತುರ್ಮಾಸ್ಯೇ ವೈಶ್ವದೇವಹವೀಂಷಿ

ವೈಶ್ವದೇವೇನ ವೈ ಪ್ರಜಾಪತಿಃ ಪ್ರಜಾ ಅಸೃಜತ । ತಾ-ಸ್ಸೃಷ್ಟಾ ನ ಪ್ರಾಜಾಯನ್ತ । ಸೋ-ಽಗ್ನಿರಕಾಮಯತ । ಅಹಮಿಮಾಃ ಪ್ರಜನಯೇಯಮಿತಿ । ಸ ಪ್ರಜಾಪತಯೇ ಶುಚಮದಧಾತ್ । ಸೋ-ಽಶೋಚತ್-ಪ್ರಜಾಮಿಚ್ಛಮಾನಃ । ತಸ್ಮಾದ್ಯ-ಞ್ಚ ಪ್ರಜಾ ಭುನಕ್ತಿ ಯ-ಞ್ಚ ನ । ತಾವುಭೌ ಶೋಚತಃ ಪ್ರಜಾಮಿಚ್ಛಮಾನೌ । ತಾಸ್ವಗ್ನಿಮಪ್ಯ ಸೃಜತ್ । ತಾ ಅಗ್ನಿರದ್ಧ್ಯೈತ್ ॥ 12 ॥
ಸೋಮೋ ರೇತೋ-ಽದಧಾತ್ । ಸವಿತಾ ಪ್ರಾಜನಯತ್ । ಸರಸ್ವತೀ ವಾಚಮದಧಾತ್ । ಪೂಷಾ ಽಪೋಷಯತ್ । ತೇ ವಾ ಏತೇ ತ್ರಿ-ಸ್ಸಂವಁಥ್ಸರಸ್ಯ ಪ್ರಯುಜ್ಯನ್ತೇ । ಯೇ ದೇವಾಃ ಪುಷ್ಟಿಪತಯಃ । ಸಂವಁಥ್ಸರೋ ವೈ ಪ್ರಜಾಪತಿಃ । ಸಂವಁಥ್ಸರೇಣೈವಾಸ್ಮೈ ಪ್ರಜಾಃ ಪ್ರಾಜನಯತ್ । ತಾಃ ಪ್ರಜಾ ಜಾತಾ ಮರುತೋ ಘ್ನನ್ನ್ । ಅಸ್ಮಾನಪಿ ನ ಪ್ರಾಯುಕ್ಷತೇತಿ ॥ 13 ॥
ಸ ಏತ-ಮ್ಪ್ರಜಾಪತಿರ್ಮಾರುತಗ್ಂ ಸಪ್ತಕಪಾಲ-ಮಪಶ್ಯತ್ । ತ-ನ್ನಿರವಪತ್ । ತತೋ ವೈ ಪ್ರಜಾಭ್ಯೋಕಲ್ಪತ । ಯನ್ಮಾರುತೋ ನಿರುಪ್ಯತೇ । ಯಜ್ಞಸ್ಯ ಕ್ಲೃಪ್ತ್ಯೈ । ಪ್ರಜಾನಾ-ಮಘಾತಾಯ । ಸಪ್ತಕಪಾಲೋ ಭವತಿ । ಸಪ್ತಗಣಾ ವೈ ಮರುತಃ । ಗಣಶ ಏವಾಸ್ಮೈ ವಿಶ-ಙ್ಕಲ್ಪಯತಿ । ಸ ಪ್ರಜಾಪತಿ-ರಶೋಚತ್ ॥ 14 ॥
ಯಾಃ ಪೂರ್ವಾಃ ಪ್ರಜಾ ಅಸೃಕ್ಷಿ । ಮರುತಸ್ತಾ ಅವಧಿಷುಃ । ಕಥಮಪರಾ-ಸ್ಸೃಜೇಯೇತಿ । ತಸ್ಯ ಶುಷ್ಮ ಆಣ್ಡ-ಮ್ಭೂತ-ನ್ನಿರವರ್ತತ । ತದ್ವ್ಯುದಹರತ್ । ತದಪೋಷಯತ್ । ತ-ತ್ಪ್ರಾಜಾಯತ । ಆಣ್ಡಸ್ಯ ವಾ ಏತ-ದ್ರೂಪಮ್ । ಯದಾಮಿಕ್ಷಾ । ಯದ್ವ್ಯುದ್ಧರತಿ ॥ 15 ॥
ಪ್ರಜಾ ಏವ ತ-ದ್ಯಜಮಾನಃ ಪೋಷಯತಿ । ವೈಶ್ವದೇವ್ಯಾಮಿಕ್ಷಾ ಭವತಿ । ವೈಶ್ವದೇವ್ಯೋ ವೈ ಪ್ರಜಾಃ । ಪ್ರಜಾ ಏವಾಸ್ಮೈ ಪ್ರಜನಯತಿ । ವಾಜಿನಮಾನಯತಿ । ಪ್ರಜಾಸ್ವೇವ ಪ್ರಜಾತಾಸು ರೇತೋ ದಧಾತಿ । ದ್ಯಾವಾಪೃಥಿವ್ಯ ಏಕಕಪಾಲೋ ಭವತಿ । ಪ್ರಜಾ ಏವ ಪ್ರಜಾತಾ ದ್ಯಾವಾಪೃಥಿವೀಭ್ಯಾ-ಮುಭಯತಃ ಪರಿ ಗೃಹ್ಣಾತಿ । ದೇವಾಸುರಾ-ಸ್ಸಂಯಁತ್ತಾ ಆಸನ್ನ್ । ಸಾ-ಽಗ್ನಿರಬ್ರವೀತ್ ॥ 16 ॥
ಮಾಮಗ್ರೇ ಯಜತ । ಮಯಾ ಮುಖೇನಾಸುರಾ-ಞ್ಜೇಷ್ಯಥೇತಿ । ಮಾ-ನ್ದ್ವಿತೀಯಮಿತಿ ಸೋಮೋ-ಽಬ್ರವೀತ್ । ಮಯಾ ರಾಜ್ಞಾ ಜೇಷ್ಯಥೇತಿ । ಮಾ-ನ್ತೃತೀಯಮಿತಿ ಸವಿತಾ । ಮಯಾ ಪ್ರಸೂತಾ ಜೇಷ್ಯಥೇತಿ । ಮಾ-ಞ್ಚತುರ್ಥೀಮಿತಿ ಸರಸ್ವತೀ । ಇನ್ದ್ರಿಯಂ-ವೋಁ-ಽಹ-ನ್ಧಾಸ್ಯಾಮೀತಿ । ಮಾ-ಮ್ಪಞ್ಚಮಮಿತಿ ಪೂಷಾ । ಮಯಾ ಪ್ರತಿಷ್ಠಯಾ ಜೇಷ್ಯಥೇತಿ ॥ 17 ॥
ತೇ-ಽಗ್ನಿನಾ ಮುಖೇನಾಸುರಾನಜಯನ್ನ್ । ಸೋಮೇನ ರಾಜ್ಞಾ । ಸವಿತ್ರಾ ಪ್ರಸೂತಾಃ । ಸರಸ್ವತೀನ್ದ್ರಿಯ-ಮದಧಾತ್ । ಪೂಷಾ ಪ್ರತಿಷ್ಠಾ ಽಽಸೀತ್ । ತತೋ ವೈ ದೇವಾ ವ್ಯಜಯನ್ತ । ಯದೇತಾನಿ ಹವೀಗ್ಂಷಿ ನಿರುಪ್ಯನ್ತೇ ವಿಜಿತ್ಯೈ । ನೋತ್ತರವೇದಿಮುಪ- ವಪತಿ । ಪಶವೋ ವಾ ಉತ್ತರವೇದಿಃ । ಅಜಾತಾ ಇವ ಹ್ಯೇತರ್ಹಿ ಪಶವಃ ॥ 18 ॥

(ಐ-ದ್- ಇತ್ಯ - ಶೋಚ-ದ್- ವ್ಯುದ್ಧರ - ತ್ಯಬ್ರವೀತ್ - ಪ್ರತಿಷ್ಠಯಾ ಜೇಷ್ಯಥೇ ತ್ಯೇತರಃಇ ಪಶವಃ) (ಅ. 2)
ಅನುವಾಕಂ 3 - ವೈಶ್ವದೇವಪರ್ಗತಾನಿ ವಿಶ್ವೇಷಾಙ್ಗಾನಿ

ತ್ರಿವೃ-ದ್ಬರ್ಹಿ-ರ್ಭವತಿ । ಮಾತಾ ಪಿತಾ ಪುತ್ರಃ । ತದೇವ ತ-ನ್ಮಿಥುನಮ್ । ಉಲ್ಬ-ಙ್ಗರ್ಭೋ ಜರಾಯು । ತದೇವ ತ-ನ್ಮಿಥುನಮ್ । ತ್ರೇಧಾ ಬರ್ಹಿ-ಸ್ಸನ್ನದ್ಧ-ಮ್ಭವತಿ । ತ್ರಯ ಇಮೇ ಲೋಕಾಃ । ಏಷ್ವೇವ ಲೋಕೇಷು ಪ್ರತಿ ತಿಷ್ಠತಿ । ಏಕಧಾ ಪುನ-ಸ್ಸನ್ನದ್ಧ-ಮ್ಭವತಿ । ಏಕ ಇವ ಹ್ಯಯಂ-ಲೋಁಕಃ ॥ 19 ॥
ಅಸ್ಮಿನ್ನೇವ ತೇನ ಲೋಕೇ ಪ್ರತಿ ತಿಷ್ಠತಿ । ಪ್ರಸುವೋ ಭವನ್ತಿ । ಪ್ರಥಮಜಾಮೇವ ಪುಷ್ಟಿಮವ ರುನ್ಧೇ । ಪ್ರಥಮಜೋ ವಥ್ಸೋ ದಕ್ಷಿಣಾ ಸಮೃದ್ಧ್ಯೈ । ಪೃಷದಾಜ್ಯ-ಙ್ಗೃಹ್ಣಾತಿ । ಪಶವೋ ವೈ ಪೃಷದಾಜ್ಯಮ್ । ಪಶೂನೇವಾವ ರುನ್ಧೇ । ಪಞ್ಚಗೃಹೀತ-ಮ್ಭವತಿ । ಪಾಙ್ಕ್ತಾ ಹಿ ಪಶವಃ । ಬಹುರೂಪ-ಮ್ಭವತಿ ॥ 20 ॥
ಬಹುರೂಪಾ ಹಿ ಪಶವ-ಸ್ಸಮೃದ್ಧ್ಯೈ । ಅಗ್ನಿ-ಮ್ಮನ್ಥನ್ತಿ । ಅಗ್ನಿಮುಖಾ ವೈ ಪ್ರಜಾಪತಿಃ ಪ್ರಜಾ ಅಸೃಜತ । ಯದಗ್ನಿ-ಮ್ಮನ್ಥನ್ತಿ । ಅಗ್ನಿಮುಖಾ ಏವ ತ-ತ್ಪ್ರಜಾ ಯಜಮಾನ-ಸ್ಸೃಜತೇ । ನವ ಪ್ರಯಾಜಾ ಇಜ್ಯನ್ತೇ । ನವಾನೂಯಾಜಾಃ । ಅಷ್ಟೌ ಹವೀಗ್ಂಷಿ । ದ್ವಾವಾಘಾರೌ । ದ್ವಾವಾಜ್ಯಭಾಗೌ ॥ 21 ॥
ತ್ರಿಗ್ಂಶ-ಥ್ಸಮ್ಪದ್ಯನ್ತೇ । ತ್ರಿಗ್ಂಶದಕ್ಷರಾ ವಿರಾಟ್ । ಅನ್ನಂ-ವಿಁರಾಟ್ । ವಿರಾಜೈವಾನ್ನಾದ್ಯಮವ ರುನ್ಧೇ । ಯಜಮಾನೋ ವಾ ಏಕಕಪಾಲಃ । ತೇಜ ಆಜ್ಯಮ್ । ಯದೇಕಕಪಾಲ ಆಜ್ಯಮಾನಯತಿ । ಯಜಮಾನಮೇವ ತೇಜಸಾ ಸಮರ್ಧಯತಿ । ಯಜಮಾನೋ ವಾ ಏಕಕಪಾಲಃ । ಪಶವ ಆಜ್ಯಮ್ ॥ 22 ॥
ಯದೇಕಕಪಾಲ ಆಜ್ಯಮಾನಯತಿ । ಯಜಮಾನಮೇವ ಪಶುಭಿ-ಸ್ಸಮರ್ಧಯತಿ । ಯದಲ್ಪಮಾನಯೇತ್ । ಅಲ್ಪಾ ಏನ-ಮ್ಪಶವೋ ಭುಞ್ಜನ್ತ ಉಪತಿಷ್ಠೇರನ್ನ್ । ಯ-ದ್ಬಹ್ವಾನಯೇತ್ । ಬಹವ ಏನ-ಮ್ಪಶವೋ ಭುಞ್ಜನ್ತ ಉಪತಿಷ್ಠೇರನ್ನ್ । ಬಹ್ವಾನೀಯಾವಿಃ ಪೃಷ್ಠ-ಙ್ಕುರ್ಯಾತ್ । ಬಹವ ಏವೈನ-ಮ್ಪಶವೋ ಭುಞ್ಜನ್ತ ಉಪತಿಷ್ಠನ್ತೇ । ಯಜಮಾನೋ ವಾ ಏಕಕಪಾಲಃ । ಯದೇಕಕಪಾಲಸ್ಯಾವದ್ಯೇತ್ ॥ 23 ॥
ಯಜಮಾನಸ್ಯಾವದ್ಯೇತ್ । ಉದ್ವಾ ಮಾದ್ಯೇ-ದ್ಯಜಮಾನಃ । ಪ್ರ ವಾ ಮೀಯೇತ । ಸಕೃದೇವ ಹೋತವ್ಯಃ । ಸಕೃದಿವ ಹಿ ಸುವರ್ಗೋ ಲೋಕಃ । ಹುತ್ವಾ-ಽಭಿ ಜುಹೋತಿ । ಯಜಮಾನಮೇವ ಸುವರ್ಗಂ-ಲೋಁಕ-ಙ್ಗಮಯಿತ್ವಾ । ತೇಜಸಾ ಸಮರ್ಧಯತಿ । ಯಜಮಾನೋ ವಾ ಏಕಕಪಾಲಃ । ಸುವರ್ಗೋ ಲೋಕ ಆಹವನೀಯಃ ॥ 24 ॥
ಯದೇಕಕಪಾಲ-ಮಾಹವನೀಯೇ ಜುಹೋತಿ । ಯಜಮಾನಮೇವ ಸುವರ್ಗಂ-ಲೋಁಕ-ಙ್ಗಮಯತಿ । ಯದ್ಧಸ್ತೇನ ಜುಹುಯಾತ್ । ಸುವರ್ಗಾ-ಲ್ಲೋಕಾ-ದ್ಯಜಮಾನ-ಮವವಿದ್ಧ್ಯೇತ್ । ಸ್ರುಚಾ ಜುಹೋತಿ । ಸುವರ್ಗಸ್ಯ ಲೋಕಸ್ಯ ಸಮಷ್ಟ್ಯೈ । ಯ-ತ್ಪ್ರಾಮ್ಪದ್ಯೇತ । ದೇವಲೋಕಮಭಿ ಜಯೇತ್ । ಯ-ದ್ದಕ್ಷಿಣಾ ಪಿತೃಲೋಕಮ್ । ಯ-ತ್ಪ್ರತ್ಯಕ್ ॥ 25 ॥
ರಕ್ಷಾಗ್ಂಸಿ ಯಜ್ಞಗ್ಂ ಹನ್ಯುಃ । ಯದುದಙ್ಙ್ । ಮನುಷ್ಯಲೋಕ-ಮಭಿಜಯೇತ್ । ಪ್ರತಿಷ್ಠಿತೋ ಹೋತವ್ಯಃ । ಏಕಕಪಾಲಂ-ವೈಁ ಪ್ರತಿತಿಷ್ಠನ್ತ-ನ್ದ್ಯಾವಾಪೃಥಿವೀ ಅನು ಪ್ರತಿತಿಷ್ಠತಃ । ದ್ಯಾವಾಪೃಥಿವೀ ಋತವಃ । ಋತೂನ್. ಯಜ್ಞಃ । ಯಜ್ಞಂ-ಯಁಜಮಾನಃ । ಯಜಮಾನ-ಮ್ಪ್ರಜಾಃ । ತಸ್ಮಾತ್-ಪ್ರತಿಷ್ಠಿತೋ ಹೋತವ್ಯಃ ॥ 26 ॥
ವಾಜಿನೋ ಯಜತಿ । ಅಗ್ನಿರ್ವಾಯು-ಸ್ಸೂರ್ಯಃ । ತೇ ವೈ ವಾಜಿನಃ । ತಾನೇವ ತ-ದ್ಯಜತಿ । ಅಥೋ ಖಲ್ವಾಹುಃ । ಛನ್ದಾಗ್ಂಸಿ ವೈ ವಾಜಿನ ಇತಿ । ತಾನ್ಯೇವ ತ-ದ್ಯಜತಿ । ಋಖ್ಸಾಮೇ ವಾ ಇನ್ದ್ರಸ್ಯ ಹರೀ ಸೋಮಪಾನೌ । ತಯೋಃ ಪರಿಧಯ ಆಧಾನಮ್ । ವಾಜಿನ-ಮ್ಭಾಗಧೇಯಮ್ ॥ 27 ॥
ಯದಪ್ರಹೃತ್ಯ ಪರಿಧೀಞ್ಜುಹುಯಾತ್ । ಅನ್ತರಾಧಾನಾಭ್ಯಾ-ಙ್ಘಾಸ-ಮ್ಪ್ರಯಚ್ಛೇತ್ । ಪ್ರಹೃತ್ಯ ಪರಿಧೀಞ್ಜುಹೋತಿ । ನಿರಾಧಾನಾಭ್ಯಾಮೇವ ಘಾಸ-ಮ್ಪ್ರಯಚ್ಛತಿ । ಬರ್ಹಿಷಿ ವಿಷಿಞ್ಚನ್ವಾಜಿನ-ಮಾನಯತಿ । ಪ್ರಜಾ ವೈ ಬರಃಇಃ । ರೇತೋ ವಾಜಿನಮ್ । ಪ್ರಜಾಸ್ವೇವ ರೇತೋ ದಧಾತಿ । ಸಮುಪಹೂಯ ಭಕ್ಷಯನ್ತಿ । ಏತ-ಥ್ಸೋಮಪೀಥಾ ಹ್ಯೇತೇ । ಅಥೋ ಆತ್ಮನ್ನೇವ ರೇತೋ ದಧತೇ । ಯಜಮಾನ ಉತ್ತಮೋ ಭಕ್ಷಯತಿ । ಪಶವೋ ವೈ ವಾಜಿನಮ್ । ಯಜಮಾನ ಏವ ಪಶೂ-ನ್ಪ್ರತಿಷ್ಠಾಪಯನ್ತಿ ॥ 28 ॥

(ಲೋಕೋ - ಬಹುರೂಪ-ಮ್ಭವ - ತ್ಯಾಜ್ಯಭಾಗೌ - ಪಶವ ಆಜ್ಯ - ಮವದ್ಯೇ - ದಾಹವನೀಯಃ - ಪ್ರತ್ಯಕ್ - ತಸ್ಮಾ-ತ್ಪ್ರತಿಷ್ಠಿತೋ ಹೋತವ್ಯೋ - ಭಾಗಧೇಯ - ಮೇತೇ ಚತ್ವಾರಿ ಚ) (ಅ. 3)
ಅನುವಾಕಂ 4 - ವರುಣಪ್ರಘಾಸಾಃ

ಪ್ರಜಾಪತಿ-ಸ್ಸವಿತಾ ಭೂತ್ವಾ ಪ್ರಜಾ ಅಸೃಜತ । ತಾ ಏನಮತ್ಯಮನ್ಯನ್ತ । ತಾ ಅಸ್ಮಾದಪಾಕ್ರಾಮನ್ನ್ । ತಾ ವರುಣೋ ಭೂತ್ವಾ ಪ್ರಜಾ ವರುಣೇನಾಗ್ರಾಹಯತ್ । ತಾಃ ಪ್ರಜಾ ವರುಣಗೃಹೀತಾಃ । ಪ್ರಜಾಪತಿ-ಮ್ಪುನರುಪಾಧಾವನ್ನಾಥ-ಮಿಚ್ಛಮಾನಾಃ । ಸ ಏತಾನ್-ಪ್ರಜಾಪತಿ-ರ್ವರುಣ ಪ್ರಘಾಸಾನಪಶ್ಯತ್ । ತಾನ್ನಿರವಪತ್ । ತೈರ್ವೈ ಸ ಪ್ರಜಾ ವರುಣ-ಪಾಶಾದಮುಞ್ಚತ್ । ಯ-ದ್ವರುಣ-ಪ್ರಘಾಸಾ ನಿರುಪ್ಯನ್ತೇ ॥ 29 ॥
ಪ್ರಜಾನಾಮವರುಣಗ್ರಾಹಾಯ । ತಾಸಾ-ನ್ದಕ್ಷಿಣೋ ಬಾಹು-ರ್ನ್ಯಕ್ನ ಆಸೀತ್ । ಸವ್ಯಃ ಪ್ರಸೃತಃ । ಸ ಏತಾ-ನ್ದ್ವಿತೀಯಾ-ನ್ದಕ್ಷಿಣತೋ ವೇದಿಮುದಹನ್ನ್ । ತತೋ ವೈ ಸ ಪ್ರಜಾನಾ-ನ್ದಕ್ಷಿಣ-ಮ್ಬಾಹು-ಮ್ಪ್ರಾಸಾರಯತ್ । ಯ-ದ್ದ್ವಿತೀಯಾ-ನ್ದಕ್ಷಿಣತೋ ವೇದಿಮುದ್ಧನ್ತಿ । ಪ್ರಜಾನಾಮೇವ ತ-ದ್ಯಜಮಾನೋ ದಕ್ಷಿಣ-ಮ್ಬಾಹು-ಮ್ಪ್ರಸಾರಯತಿ । ತಸ್ಮಾಚ್ಚಾತುರ್ಮಾಸ್ಯಯಾಜ್ಯಮುಷ್ಮಿನ್ ಁಲೋಕ ಉಭಯಾಬಾಹುಃ । ಯಜ್ಞಾಭಿಜಿತಗ್ಗ್ ಹ್ಯಸ್ಯ । ಪೃಥಮಾತ್ರಾ-ದ್ವೇದೀ ಅಸಭಿನ್ನ್ನೇ ಭವತಃ ॥ 30 ॥
ತಸ್ಮಾತ್-ಪೃಥಮಾತ್ರಂ-ವ್ಯಁಗ್ಂಸೌ । ಉತ್ತರಸ್ಯಾಂ-ವೇಁದ್ಯಾಮುತ್ತರವೇದಿಮುಪ ವಪತಿ । ಪಶವೋ ವಾ ಉತ್ತರವೇದಿಃ । ಪಶೂನೇವಾವ ರುನ್ಧೇ । ಅಥೋ ಯಜ್ಞಪರುಷೋ-ಽನನ್ತರಿತ್ಯೈ । ಏತ-ದ್ಬ್ರಾಹ್ಮಣಾನ್ಯೇವ ಪಞ್ಚ ಹವೀಗ್ಂಷಿ । ಅಥೈಷ ಐನ್ದ್ರಾಗ್ನೋ ಭವತಿ । ಪ್ರಾಣಾಪಾನೌ ವಾ ಏತೌ ದೇವಾನಾಮ್ । ಯದಿನ್ದ್ರಾಗ್ನೀ । ಯದೈನ್ದ್ರಾಗ್ನೋ ಭವತಿ ॥ 31 ॥
ಪ್ರಾಣಾಪಾನಾವೇವಾವ ರುನ್ಧೇ । ಓಜೋ ಬಲಂ-ವಾಁ ಏತೌ ದೇವಾನಾಮ್ । ಯದಿನ್ದ್ರಾಗ್ನೀ । ಯದೈನ್ದ್ರಾಗ್ನೋ ಭವತಿ । ಓಜೋ ಬಲಮೇವಾವ ರುನ್ಧೇ । ಮಾರುತ್ಯಾಮಿಕ್ಷಾ ಭವತಿ । ವಾರುಣ್ಯಾಮಿಕ್ಷಾ । ಮೇಷೀ ಚ ಮೇಷಶ್ಚ ಭವತಃ । ಮಿಥುನಾ ಏವ ಪ್ರಜಾ ವರುಣಪಾಶಾ-ನ್ಮುಞ್ಚತಿ । ಲೋಮಶೌ ಭವತೋ ಮೇದ್ಧ್ಯತ್ವಾಯ ॥ 32 ॥
ಶಮೀಪರ್ಣಾನ್ಯುಪ ವಪತಿ । ಘಾಸಮೇವಾಭ್ಯಾಮಪಿ ಯಚ್ಛತಿ । ಪ್ರಜಾಪತಿಮನ್ನಾದ್ಯ-ನ್ನೋಪಾನಮತ್ । ಸ ಏತೇನ ಶತೇದ್ಧ್ಮೇನ ಹವಿಷಾ ಽನ್ನಾದ್ಯಮ-ವಾರುನ್ಧ । ಯ-ತ್ಪರ-ಶ್ಶತಾನಿ ಶಮೀಪರ್ಣಾನಿ ಭವನ್ತಿ । ಅನ್ನಾದ್ಯಸ್ಯಾವ-ರುದ್ಧ್ಯೈ । ಸೌಮ್ಯಾನಿ ವೈ ಕರೀರಾಣಿ । ಸೌಮ್ಯಾ ಖಲು ವಾ ಆಹುತಿ-ರ್ದಿವೋ ವೃಷ್ಟಿ-ಞ್ಚ್ಯಾವಯತಿ । ಯತ್-ಕರೀರಾಣಿ ಭವನ್ತಿ । ಸೌಮ್ಯಯೈವಾಹುತ್ಯಾ ದಿವೋ ವೃಷ್ಟಿಮವ ರುನ್ಧೇ । ಕಾಯ ಏಕಕಪಾಲೋ ಭವತಿ । ಪ್ರಜಾನಾ-ಙ್ಕತ್ವಾಂಯಁ । ಪ್ರತಿಪೂರುಷ-ಙ್ಕರಮ್ಭ ಪಾತ್ರಾಣಿ ಭವನ್ತಿ । ಜಾತಾ ಏವ ಪ್ರಜಾ ವರುಣಪಾಶಾ-ನ್ಮುಞ್ಚತಿ । ಏಕ-ಮತಿರಿಕ್ತಮ್ । ಜನಿಷ್ಯಮಾಣಾ ಏವ ಪ್ರಜಾ ವರುಣಪಾಶಾ-ನ್ಮುಞ್ಚತಿ ॥ 33 ॥

(ನಿರುಪ್ಯನ್ತೇ- ಭವತೋ - ಭವತಿ - ಮೇದ್ಧ್ಯತ್ವಾಯ - ರುನ್ಧೇ ಷಟ್ಚ) (ಅ. 4)
ಅನುವಾಕಂ 5 - ತಚ್ಛೇಷಃ

ಉತ್ತರಸ್ಯಾಂ-ವೇಁದ್ಯಾಮನ್ಯಾನಿ ಹವೀಗ್ಂಷಿ ಸಾದಯತಿ । ದಕ್ಷಿಣಾಯಾ-ಮ್ಮಾರುತೀಮ್ । ಅಪಧುರಮೇವೈನಾ ಯುನಕ್ತಿ । ಅಥೋ ಓಜ ಏವಾಸಾಮವಹರತಿ । ತಸ್ಮಾ-ದ್ಬ್ರಹ್ಮಣಶ್ಚ ಕ್ಷತ್ರಾಚ್ಚ ವಿಶೋ-ಽನ್ಯತೋ-ಽಪಕ್ರಮಿಣೀಃ । ಮಾರುತ್ಯಾ ಪೂರ್ವಯಾ ಪ್ರಚರತಿ । ಅನೃತಮೇವಾವ ಯಜತೇ । ವಾರುಣ್ಯೋತ್ತರಯಾ । ಅನ್ತತ ಏವ ವರುಣಮವ-ಯಜತೇ । ಯದೇವಾದ್ಧ್ವರ್ಯುಃ ಕರೋತಿ ॥ 34 ॥
ತ-ತ್ಪ್ರತಿಪ್ರಸ್ಥಾತಾ ಕರೋತಿ । ತಸ್ಮಾ-ದ್ಯಚ್ಛ್ರೇಯಾನ್-ಕರೋತಿ । ತ-ತ್ಪಾಪೀಯಾನ್-ಕರೋತಿ । ಪತ್ನೀಂ ಁವಾಚಯತಿ । ಮೇದ್ಧ್ಯಾಮೇವೈನಾ-ಙ್ಕರೋತಿ । ಅಥೋ ತಪ ಏವೈನಾಮುಪ ನಯತಿ । ಯಜ್ಜಾರಗ್ಂ ಸನ್ತ-ನ್ನ ಪ್ರಬ್ರೂಯಾತ್ । ಪ್ರಿಯ-ಞ್ಜ್ಞಾತಿಗ್ಂ ರುನ್ಧ್ಯಾತ್ । ಅಸೌ ಮೇ ಜಾರ ಇತಿ ನಿರ್ದಿಶೇತ್ । ನಿರ್ದಿಶ್ಯೈವೈನಂ-ವಁರುಣಪಾಶೇನ ಗ್ರಾಹಯತಿ ॥ 35 ॥
ಪ್ರಘಾಸ್ಯಾನ್. ಹವಾಮಹ ಇತಿ ಪತ್ನೀ-ಮುದಾನಯತಿ । ಅಹ್ವತೈವೈನಾಮ್ । ಯತ್-ಪತ್ನೀ ಪುರೋನುವಾಕ್ಯಾಮನು ಬ್ರೂಯಾತ್ । ನಿರ್ವೀರ್ಯೋ ಯಜಮಾನ-ಸ್ಸ್ಯಾತ್ । ಯಜಮಾನೋ ಽನ್ವಾಹ । ಆತ್ಮನ್ನೇವ ವೀರ್ಯ-ನ್ಧತ್ತೇ । ಉಭೌ ಯಾಜ್ಯಾಗ್ಂ ಸವೀರ್ಯತ್ವಾಯ । ಯದ್ಗ್ರಾಮೇ ಯದರಣ್ಯ ಇತ್ಯಾಹ । ಯಥೋದಿತಮೇವ ವರುಣಮವ ಯಜತೇ । ಯಜಮಾನದೇವತ್ಯೋ ವಾ ಆಹವನೀಯಃ ॥ 36 ॥
ಭ್ರಾತೃವ್ಯ ದೇವತ್ಯೋ ದಕ್ಷಿಣಃ । ಯದಾಹವನೀಯೇ ಜುಹುಯಾತ್ । ಯಜಮಾನಂ-ವಁರುಣಪಾಶೇನ ಗ್ರಾಹಯೇತ್ । ದಕ್ಷಿಣೇ ಽಗ್ನೌ ಜುಹೋತಿ । ಭ್ರಾತೃವ್ಯಮೇವ ವರುಣಪಾಶೇನ ಗ್ರಾಹಯತಿ । ಶೂರ್ಪೇಣ ಜುಹೋತಿ । ಅನ್ಯಮೇವ ವರುಣಮವಯಜತೇ । ಶೀರ್ಷನ್ನಧಿ ನಿಧಾಯ ಜುಹೋತಿ । ಶೀರ್ಷತ ಏವ ವರುಣಮವ ಯಜತೇ । ಪ್ರತ್ಯನ್ತಿಷ್ಠಞ್ಜುಹೋತಿ ॥ 37 ॥
ಪ್ರತ್ಯಙ್ಙೇವ ವರುಣಪಾಶಾ-ನ್ನಿರ್ಮುಚ್ಯತೇ । ಅಕ್ರನ್ಕರ್ಮ ಕರ್ಮಕೃತ ಇತ್ಯಾಹ । ದೇವಾನೃಣ-ನ್ನಿರವದಾಯ । ಅನೃಣಾ ಗೃಹಾನುಪ-ಪ್ರೇತೇತಿ ವಾವೈತದಾಹ । ವರುಣ ಗೃಹೀತಂ-ವಾಁ ಏತ-ದ್ಯಜ್ಞಸ್ಯ । ಯ-ದ್ಯಜುಷಾ ಗೃಹೀತಸ್ಯಾತಿರಿಚ್ಯತೇ । ತುಷಾಶ್ಚ ನಿಷ್ಕಾಸಶ್ಚ । ತುಷೈಶ್ಚ ನಿಷ್ಕಾಸೇನ ಚಾವಭೃಥಮವೈತಿ । ವರುಣ-ಗೃಹೀತೇನೈವ ವರುಣಮವಯಜತೇ । ಅಪೋ-ಽವಭೃಥಮವೈತಿ ॥ 38 ॥
ಅಫ್ಸು ವೈ ವರುಣಃ । ಸಾಕ್ಷಾದೇವ ವರುಣಮವ ಯಜತೇ । ಪ್ರತಿಯುತೋ ವರುಣಸ್ಯ ಪಾಶ ಇತ್ಯಾಹ । ವರುಣಪಾಶಾದೇವ ನಿರ್ಮುಚ್ಯತೇ । ಅಪ್ರತೀಕ್ಷ-ಮಾಯನ್ತಿ । ವರುಣಸ್ಯಾನ್ತರ್ಹಿತ್ಯೈ । ಏಧೋ-ಽಸ್ಯೇಧಿಷೀಮಹೀತ್ಯಾಹ । ಸಮಿಧೈವಾಗ್ನಿ-ನ್ನಮಸ್ಯನ್ತ ಉಪಾಯನ್ತಿ । ತೇಜೋ-ಽಸಿ ತೇಜೋ ಮಯಿ ಧೇಹೀತ್ಯಾಹ । ತೇಜ ಏವಾತ್ಮನ್ಧತ್ತೇ ॥ 39 ॥

(ಕರೋತಿ - ಗ್ರಾಹಯ - ತ್ಯಾಹವನೀಯ - ಸ್ತಿಷ್ಠಞ್ಜುಹೋ - ತ್ಯಪೋ-ಽವಭೃಥಮವೈತಿ - ಧತ್ತೇ) (ಅ. 5)
ಅನುವಾಕಂ 6 - ಸಾಕಮೇಧಾಃ

ದೇವಾಸುರಾ-ಸ್ಸಂಯಁತ್ತಾ ಆಸನ್ನ್ । ಸೋ-ಽಗ್ನಿರಬ್ರವೀತ್ । ಮಮೇಯ-ಮನೀಕವತೀ ತನೂಃ । ತಾ-ಮ್ಪ್ರೀಣೀತ । ಅಥಾಸುರಾನಭಿ ಭವಿಷ್ಯಥೇತಿ । ತೇ ದೇವಾ ಅಗ್ನಯೇ-ಽನೀಕವತೇ ಪುರೋಡಾಶಮಷ್ಟಾಕಪಾಲ-ನ್ನಿರವಪನ್ನ್ । ಸೋ-ಽಗ್ನಿರನೀಕವಾನ್-ಥ್ಸ್ವೇನ ಭಾಗಧೇಯೇನ ಪ್ರೀತಃ । ಚತುರ್ಧಾ ಽನೀಕಾ-ನ್ಯಜನಯತ । ತತೋ ದೇವಾ ಅಭವನ್ನ್ । ಪರಾ ಽಸುರಾಃ ॥ 40 ॥
ಯದಗ್ನಯೇ-ಽನೀಕವತೇ ಪುರೋಡಾಶಮಷ್ಟಾಕಪಾಲ-ನ್ನಿರ್ವಪತಿ । ಅಗ್ನಿಮೇವಾನೀಕವನ್ತಗ್ಗ್ ಸ್ವೇನ ಭಾಗಧೇಯೇನ ಪ್ರೀಣಾತಿ । ಸೋ-ಽಗ್ನಿರನೀಕವಾನ್-ಥ್ಸ್ವೇನ ಭಾಗಧೇಯೇನ ಪ್ರೀತಃ । ಚತುರ್ಧಾ ಽನೀಕಾನಿ ಜನಯತೇ । ಅಸೌ ವಾ ಆದಿತ್ಯೋ-ಽಗ್ನಿ-ರನೀಕವಾನ್ । ತಸ್ಯ ರಶ್ಮಯೋ-ಽನೀಕಾನಿ । ಸಾಕಗ್ಂ ಸೂರ್ಯೇಣೋದ್ಯತಾ ನಿರ್ವಪತಿ । ಸಾಕ್ಷಾದೇವಾಸ್ಮಾ ಅನೀಕಾನಿ ಜನಯತಿ । ತೇ-ಽಸುರಾಃ ಪರಾಜಿತಾ ಯನ್ತಃ । ದ್ಯಾವಾಪೃಥಿವೀ ಉಪಾಶ್ರಯನ್ನ್ ॥ 41 ॥
ತೇ ದೇವಾ ಮರುದ್ಭ್ಯಃ ಸಾನ್ತಪನೇಭ್ಯಶ್ಚರು-ನ್ನಿರವಪನ್ನ್ । ತಾ-ನ್ದ್ಯಾವಾಪೃಥಿವೀಭ್ಯಾ-ಮೇವೋಭಯತ-ಸ್ಸಮತಪನ್ನ್ । ಯನ್ಮರುದ್ಭ್ಯಃ ಸಾನ್ತಪನೇಭ್ಯಶ್ಚರು-ನ್ನಿರ್ವಪತಿ । ದ್ಯಾವಾಪೃಥಿವೀಭ್ಯಾಮೇವ ತದುಭಯತೋ ಯಜಮಾನೋ ಭ್ರಾತೃವ್ಯಾನ್-ಥ್ಸನ್ತಪತಿ । ಮದ್ಧ್ಯನ್ದಿನೇ ನಿರ್ವಪತಿ । ತರ್ಹಿ ಹಿ ತೇ-ಽಕ್ಷ್ಣಿಷ್ಠ-ನ್ತಪತಿ । ಚರುರ್ಭವತಿ । ಸರ್ವತ ಏವೈನಾನ್-ಥ್ಸನ್ತಪತಿ । ತೇ ದೇವಾ-ಶ್ಶ್ವೋ ವಿಜಯಿನ-ಸ್ಸನ್ತಃ । ಸರ್ವಾಸಾ-ನ್ದುಗ್ಧೇ ಗೃಹಮೇಧೀಯ-ಞ್ಚರು-ನ್ನಿರವಪನ್ನ್ ॥ 42 ॥
ಆಶಿತಾ ಏವಾದ್ಯೋಪವಸಾಮ । ಕಸ್ಯ ವಾ-ಽಹೇದಮ್ । ಕಸ್ಯ ವಾ ಶ್ವೋ ಭವಿತೇತಿ । ಸ ಶೃತೋ-ಽಭವತ್ । ತಸ್ಯಾಹುತಸ್ಯ ನಾಶ್ಞನ್ನ್ । ನ ಹಿ ದೇವಾ ಅಹುತಸ್ಯಾಶ್ಞನ್ತಿ । ತೇ-ಽಬ್ರುವನ್ನ್ । ಕಸ್ಮಾ ಇಮಗ್ಂ ಹೋಷ್ಯಾಮ ಇತಿ । ಮರುದ್ಭ್ಯೋ ಗೃಹಮೇಧಿಭ್ಯ ಇತ್ಯಬ್ರುವನ್ನ್ । ತ-ಮ್ಮರುದ್ಭ್ಯೋ ಗೃಹಮೇಧಿಭ್ಯೋ-ಽಜುಹವುಃ ॥ 43 ॥
ತತೋ ದೇವಾ ಅಭವನ್ನ್ । ಪರಾ-ಽಸುರಾಃ । ಯಸ್ಯೈವಂ-ವಿಁದುಷೋ ಮರುದ್ಭ್ಯೋ ಗೃಹಮೇಧಿಭ್ಯೋ ಗೃಹೇ ಜುಹ್ವತಿ । ಭವತ್ಯಾತ್ಮನಾ । ಪರಾ-ಽಸ್ಯ ಭ್ರಾತೃವ್ಯೋ ಭವತಿ । ಯದ್ವೈ ಯಜ್ಞಸ್ಯ ಪಾಕತ್ರಾ ಕ್ರಿಯತೇ । ಪಶವ್ಯ-ನ್ತತ್ । ಪಾಕತ್ರಾ ವಾ ಏತತ್ಕ್ರಿಯತೇ । ಯನ್ನೇದ್ಧ್ಮಾಬರ್ಹಿ-ರ್ಭವತಿ । ನ ಸಾಮಿಧೇನೀ-ರನ್ವಾಹ ॥ 44 ॥
ನ ಪ್ರಯಾಜಾ ಇಜ್ಯನ್ತೇ । ನಾನೂಯಾಜಾಃ । ಯ ಏವಂ-ವೇಁದ । ಪಶುಮಾ-ನ್ಭವತಿ । ಆಜ್ಯಭಾಗೌ ಯಜತಿ । ಯಜ್ಞಸ್ಯೈವ ಚಕ್ಷುಷೀ ನಾನ್ತರೇತಿ । ಮರುತೋ ಗೃಹಮೇಧಿನೋ ಯಜತಿ । ಭಾಗಧೇಯೇ-ನೈವೈನಾನ್-ಥ್ಸಮರ್ಧಯತಿ । ಅಗ್ನಿಗ್ಗ್ ಸ್ವಿಷ್ಟಕೃತಂ-ಯಁಜತಿ ಪ್ರತಿಷ್ಠಿತ್ಯೈ । ಇಡಾನ್ತೋ ಭವತಿ । ಪಶವೋ ವಾ ಇಡಾ । ಪಶುಷ್ವೇವೋಪರಿಷ್ಟಾ-ತ್ಪ್ರತಿ ತಿಷ್ಠತಿ ॥ 45 ॥

(ಅಸುರಾ - ಅಶ್ರಯನ್ - ಗೃಹಮೇಧೀಯಂ ಚರು-ನ್ನಿರವಪನ್ - ನಜುಹವು - ರನ್ವಾ - ಹೇಡಾನ್ತೋ ಭವತಿ ದ್ವೇ ಚ) (ಅ. 6)
ಅನುವಾಕಂ 7 - ತಚ್ಛೇಷಃ

ಯತ್ಪತ್ನೀ ಗೃಹಮೇಧೀಯ-ಸ್ಯಾಶ್ಞೀಯಾತ್ । ಗೃಹಮೇದ್ಧ್ಯೇವ ಸ್ಯಾತ್ । ವಿ ತ್ವಸ್ಯ ಯಜ್ಞ ಋಧ್ಯೇತ । ಯನ್ನಾಶ್ಞೀಯಾತ್ । ಅಗೃಹಮೇಧೀ ಸ್ಯಾತ್ । ನಾಸ್ಯ ಯಜ್ಞೋ ವ್ಯೃದ್ಧ್ಯೇತ । ಪ್ರತಿವೇಶ-ಮ್ಪಚೇಯುಃ । ತಸ್ಯಾಶ್ಞೀಯಾತ್ । ಗೃಹಮೇದ್ಧ್ಯೇವ ಭವತಿ । ನಾಸ್ಯ ಯಜ್ಞೋ ವ್ಯೃದ್ಧ್ಯತೇ ॥ 46 ॥
ತೇ ದೇವಾ ಗೃಹಮೇಧೀಯೇನೇಷ್ಟ್ವಾ । ಆಶಿತಾ ಅಭವನ್ನ್ । ಆಞ್ಜತಾಭ್ಯಞ್ಜತ । ಅನು ವಥ್ಸಾ-ನವಾಸಯನ್ನ್ । ತೇಭ್ಯೋ-ಽಸುರಾಃ, ಕ್ಷುಧ-ಮ್ಪ್ರಾಹಿಣ್ವನ್ನ್ । ಸಾ ದೇವೇಷು ಲೋಕಮವಿತ್ತ್ವಾ । ಅಸುರಾನ್-ಪುನರಗಚ್ಛತ್ । ಗೃಹಮೇಧೀಯೇನೇಷ್ಟ್ವಾ । ಆಶಿತಾ ಭವನ್ತಿ । ಆಞ್ಜತೇ-ಽಭ್ಯಞ್ಜತೇ ॥ 47 ॥
ಅನು ವಥ್ಸಾನ್. ವಾಸಯನ್ತಿ । ಭ್ರಾತೃವ್ಯಾಯೈವ ತ-ದ್ಯಜಮಾನಃ, ಕ್ಷುಧ-ಮ್ಪ್ರಹಿಣೋತಿ । ತೇ ದೇವಾ ಗೃಹಮೇಧೀಯೇನೇಷ್ಟ್ವಾ । ಇನ್ದ್ರಾಯ ನಿಷ್ಕಾಸ-ನ್ನ್ಯದಧುಃ । ಅಸ್ಮಾನೇವ ಶ್ವ ಇನ್ದ್ರೋ ನಿಹಿತಭಾಗ ಉಪಾವರ್ತಿತೇತಿ । ತಾನಿನ್ದ್ರೋ ನಿಹಿತಭಾಗ ಉಪಾವರ್ತತ । ಗೃಹಮೇಧೀಯೇನೇಷ್ಟ್ವಾ । ಇನ್ದ್ರಾಯ ನಿಷ್ಕಾಸ-ನ್ನಿದದ್ಧ್ಯಾತ್ । ಇನ್ದ್ರ ಏವೈನ-ನ್ನಿಹಿತಭಾಗ ಉಪಾವರ್ತತೇ । ಗಾರ್ಹಪತ್ಯೇ ಜುಹೋತಿ ॥ 48 ॥
ಭಾಗಧೇಯೇನೇವೈನಗ್ಂ ಸಮರ್ಧಯತಿ । ಋಷಭಮಾಹ್ವಯತಿ । ವಷಟ್ಕಾರ ಏವಾಸ್ಯ ಸಃ । ಅಥೋ ಇನ್ದ್ರಿಯಮೇವ ತ-ದ್ವೀರ್ಯಂ-ಯಁಜಮಾನೋ ಭ್ರಾತೃವ್ಯಸ್ಯ ವೃಙ್ಕ್ತೇ । ಇನ್ದ್ರೋ ವೃತ್ರಗ್ಂ ಹತ್ವಾ । ಪರಾ-ಮ್ಪರಾವತ-ಮಗಚ್ಛತ್ । ಅಪಾರಾಧಮಿತಿ ಮನ್ಯಮಾನಃ । ಸೋ-ಽಬ್ರವೀತ್ । ಕ ಇದಂ-ವೇಁದಿಷ್ಯತೀತಿ । ತೇ-ಽಬ್ರುವ-ನ್ಮರುತೋ ವರಂ-ವೃಁಣಾಮಹೈ ॥ 49 ॥
ಅಥ ವಯಂ-ವೇಁದಾಮ । ಅಸ್ಮಭ್ಯಮೇವ ಪ್ರಥಮಗ್ಂ ಹವಿರ್ನಿರುಪ್ಯಾತಾ ಇತಿ । ತ ಏನಮದ್ಧ್ಯ-ಕ್ರೀಡನ್ನ್ । ತತ್ಕ್ರೀಡಿನಾ-ಙ್ಕ್ರೀಡಿತ್ವಮ್ । ಯ-ನ್ಮರುದ್ಭ್ಯಃ ಕ್ರೀಡಿಭ್ಯಃ ಪ್ರಥಮಗ್ಂ ಹವಿರ್ನಿರುಪ್ಯತೇ ವಿಜಿತ್ಯೈ । ಸಾಕಗ್ಂ ಸೂರ್ಯೇಣೋದ್ಯತಾ ನಿರ್ವಪತಿ । ಏತಸ್ಮಿನ್ ವೈ ಲೋಕ ಇನ್ದ್ರೋ ವೃತ್ರಮಹನ್-ಥ್ಸಮೃದ್ಧ್ಯೈ । ಏತ-ದ್ಬ್ರಾಹ್ಮಣಾನ್ಯೇವ ಪಞ್ಚ ಹವೀಗ್ಂಷಿ । ಏತ-ದ್ಬ್ರಾಹ್ಮಣ ಐನ್ದ್ರಾಗ್ನಃ । ಅಥೈಷ ಐನ್ದ್ರಶ್ಚರು-ರ್ಭವತಿ ॥ 50 ॥
ಉದ್ಧಾರಂ-ವಾಁ ಏತಮಿನ್ದ್ರ ಉದಹರತ । ವೃತ್ರಗ್ಂ ಹತ್ವಾ । ಅನ್ಯಾಸು ದೇವತಾಸ್ವಧಿ । ಯದೇಷ ಐನ್ದ್ರ-ಶ್ಚರು-ರ್ಭವತಿ । ಉದ್ಧಾರಮೇವ ತಂ-ಯಁಜಮಾನ ಉದ್ಧರತೇ । ಅನ್ಯಾಸು ಪ್ರಜಾಸ್ವಧಿ । ವೈಶ್ವಕರ್ಮಣ ಏಕಕಪಾಲೋ ಭವತಿ । ವಿಶ್ವಾನ್ಯೇವ ತೇನ ಕರ್ಮಾಣಿ ಯಜಮಾನೋ ಽವರುನ್ಧೇ ॥ 51 ॥

(ಋದ್ಧ್ಯತೇ-ಽ-ಭ್ಯಞ್ಜತೇ-ಜುಹೋತಿ-ವೃಣಾಮಹೈ-ಭವತ್ಯ- +ಷ್ಟೌ ಚ) (ಅ. 7)
ಅನುವಾಕಂ 8 - ಪಿತೃಯಜ್ಞಃ

ವೈಶ್ವದೇವೇನ ವೈ ಪ್ರಜಾಪತಿಃ ಪ್ರಜಾ ಅಸೃಜತ । ತಾ ವರುಣ-ಪ್ರಘಾಸೈ-ರ್ವರುಣಪಾಶಾದಮುಞ್ಚತ್ । ಸಾಕಮೇಧೈಃ ಪ್ರತ್ಯಸ್ಥಾಪಯತ್ । ತ್ರ್ಯಮ್ಬಕೈ ರುದ್ರ-ನ್ನಿರವಾದಯತ । ಪಿತೃಯಜ್ಞೇನ ಸುವರ್ಗಂ-ಲೋಁಕಮಗಮಯತ್ । ಯ-ದ್ವೈಶ್ವದೇವೇನ ಯಜತೇ । ಪ್ರಜಾ ಏವ ತ-ದ್ಯಜಮಾನ-ಸ್ಸೃಜತೇ । ತಾ ವರುಣ-ಪ್ರಘಾಸೈ-ರ್ವರುಣಪಾಶಾ-ನ್ಮುಞ್ಚತಿ । ಸಾಕಮೇಧೈಃ ಪ್ರತಿಷ್ಠಾಪಯತಿ । ತ್ರ್ಯಮ್ಬಕೈರುದ್ರ-ನ್ನಿರವದಯತೇ ॥ 52 ॥
ಪಿತೃಯಜ್ಞೇನ ಸುವರ್ಗಂ-ಲೋಁಕ-ಙ್ಗಮಯತಿ । ದಕ್ಷಿಣತಃ ಪ್ರಾಚೀನಾವೀತೀ ನಿರ್ವಪತಿ । ದಕ್ಷಿಣಾವೃದ್ಧಿ ಪಿತೃಣಾಮ್ । ಅನಾದೃತ್ಯ ತತ್ । ಉತ್ತರತ ಏವೋಪವೀಯ ನಿರ್ವಪೇತ್ । ಉಭಯೇ ಹಿ ದೇವಾಶ್ಚ ಪಿತರಶ್ಚೇಜ್ಯನ್ತೇ । ಅಥೋ ಯದೇವ ದಕ್ಷಿಣಾರ್ಧೇ-ಽಧಿ ಶ್ರಯತಿ । ತೇನ ದಕ್ಷಿಣಾವೃತ್ । ಸೋಮಾಯ ಪಿತೃಮತೇ ಪುರೋಡಾಶಗ್ಂ ಷಟ್ಕಪಾಲ-ನ್ನಿರ್ವಪತಿ । ಸಂವಁಥ್ಸರೋ ವೈ ಸೋಮಃ ಪಿತೃಮಾನ್ ॥ 53 ॥
ಸಂವಁಥ್ಸರಮೇವ ಪ್ರೀಣಾತಿ । ಪಿತೃಭ್ಯೋ ಬರ್ಹಿಷದ್ಭ್ಯೋ ಧಾನಾಃ । ಮಾಸಾ ವೈ ಪಿತರೋ ಬರ್ಹಿಷದಃ । ಮಾಸಾನೇವ ಪ್ರೀಣಾತಿ । ಯಸ್ಮಿನ್ ವಾ ಋತೌ ಪುರುಷಃ ಪ್ರಮೀಯತೇ । ಸೋ-ಽಸ್ಯಾಮುಷ್ಮಿನ್ ಁಲೋಕೇ ಭವತಿ । ಬಹುರೂಪಾ ಧಾನಾ ಭವನ್ತಿ । ಅಹೋರಾತ್ರಾಣಾ-ಮಭಿಜಿತ್ಯೈ । ಪಿತೃಭ್ಯೋ ಽಗ್ನಿಷ್ವಾತ್ತೇಭ್ಯೋ ಮನ್ಥಮ್ । ಅರ್ಧಮಾಸಾ ವೈ ಪಿತರೋ-ಽಗ್ನಿಷ್ವಾತ್ತಾಃ ॥ 54 ॥
ಅರ್ಧಮಾಸಾನೇವ ಪ್ರೀಣಾತಿ । ಅಭಿವಾನ್ಯಾಯೈ ದುಗ್ಧೇ ಭವತಿ । ಸಾ ಹಿ ಪಿತೃದೇವತ್ಯ-ನ್ದುಹೇ । ಯ-ತ್ಪೂರ್ಣಮ್ । ತ-ನ್ಮನುಷ್ಯಾಣಾಮ್ । ಉಪರ್ಯರ್ಧೋ ದೇವಾನಾಮ್ । ಅರ್ಧಃ ಪಿತೃಣಾಮ್ । ಅರ್ಧ ಉಪಮನ್ಥತಿ । ಅರ್ಧೋ ಹಿ ಪಿತೃಣಾಮ್ । ಏಕಯೋಪಮನ್ಥತಿ ॥ 55 ॥
ಏಕಾ ಹಿ ಪಿತೃಣಾಮ್ । ದಕ್ಷಿಣೋಪಮನ್ಥತಿ । ದಕ್ಷಿಣಾ ವೃದ್ಧಿ ಪಿತೃಣಾಮ್ । ಅನಾರಭ್ಯೋಪಮನ್ಥತಿ । ತದ್ಧಿ ಪಿತೄನ್-ಗಚ್ಛತಿ । ಇಮಾ-ನ್ದಿಶಂ-ವೇಁದಿಮುದ್ಧನ್ತಿ । ಉಭಯೇ ಹಿ ದೇವಾಶ್ಚ ಪಿತರಶ್ಚೇಜ್ಯನ್ತೇ । ಚತುಃ ಸ್ರಕ್ತಿರ್ಭವತಿ । ಸರ್ವಾ ಹ್ಯನು ದಿಶಃ ಪಿತರಃ । ಅಖಾತಾ ಭವತಿ ॥ 56 ॥
ಖಾತಾ ಹಿ ದೇವಾನಾಮ್ । ಮದ್ಧ್ಯತೋ ಽಗ್ನಿರಾಧೀಯತೇ । ಅನ್ತತೋ ಹಿ ದೇವಾನಾ-ಮಾಧೀಯತೇ । ವರ್ಷೀಯಾನಿದ್ಧ್ಮ ಇದ್ಧ್ಮಾ-ದ್ಭವತಿ ವ್ಯಾವೃತ್ತ್ಯೈ । ಪರಿ ಶ್ರಯತಿ । ಅನ್ತರ್ಹಿತೋ ಹಿ ಪಿತೃಲೋಕೋ ಮನುಷ್ಯಲೋಕಾತ್ । ಯತ್-ಪರುಷಿ ದಿನಮ್ । ತ-ದ್ದೇವಾನಾಮ್ । ಯದನ್ತರಾ । ತ-ನ್ಮನುಷ್ಯಾಣಾಮ್ ॥ 57 ॥
ಯ-ಥ್ಸಮೂಲಮ್ । ತ-ತ್ಪಿತೃಣಾಮ್ । ಸಮೂಲ-ಮ್ಬರ್ಹಿ-ರ್ಭವತಿ ವ್ಯಾವೃತ್ತ್ಯೈ । ದಕ್ಷಿಣಾ ಸ್ತೃಣಾತಿ । ದಕ್ಷಿಣಾ ವೃದ್ಧಿ ಪಿತೃಣಾಮ್ । ತ್ರಿಃ ಪರ್ಯೇತಿ । ತೃತೀಯೇ ವಾ ಇತೋ ಲೋಕೇ ಪಿತರಃ । ತಾನೇವ ಪ್ರೀಣಾತಿ । ತ್ರಿಃ ಪುನಃ ಪರ್ಯೇತಿ । ಷಟ್ಥ್ಸಮ್ಪದ್ಯನ್ತೇ ॥ 58 ॥
ಷಡ್ವಾ ಋತವಃ । ಋತೂನೇವ ಪ್ರೀಣಾತಿ । ಯ-ತ್ಪ್ರಸ್ತರಂ-ಯಁಜುಷಾ ಗೃಹ್ಣೀಯಾತ್ । ಪ್ರಮಾಯುಕೋ ಯಜಮಾನ-ಸ್ಸ್ಯಾತ್ । ಯನ್ನ ಗೃಹ್ಣೀಯಾತ್ । ಅನಾಯತನ-ಸ್ಸ್ಯಾತ್ । ತೂಷ್ಣೀಮೇವ ನ್ಯಸ್ಯೇತ್ । ನ ಪ್ರಮಾಯುಕೋ ಭವತಿ । ನಾನಾಯತನಃ । ಯತ್-ತ್ರೀನ್-ಪರಿಧೀ-ನ್ಪರಿದದ್ಧ್ಯಾತ್ ॥ 59 ॥
ಮೃತ್ಯುನಾ ಯಜಮಾನ-ಮ್ಪರಿ ಗೃಹ್ಣೀಯಾತ್ । ಯನ್ನ ಪರಿ-ದದ್ಧ್ಯಾತ್ । ರಕ್ಷಾಗ್ಂಸಿ ಯಜ್ಞಗ್ಂ ಹನ್ಯುಃ । ದ್ವೌ ಪರಿಧೀ ಪರಿದಧಾತಿ । ರಕ್ಷಸಾ-ಮಪಹತ್ಯೈ । ಅಥೋ ಮೃತ್ಯೋರೇವ ಯಜಮಾನ-ಮುಥ್ಸೃಜತಿ । ಯ-ತ್ತ್ರೀಣಿ ತ್ರೀಣಿ ಹವೀಗ್ಷ್ಯುದಾಹರೇಯುಃ । ತ್ರಯಸ್ತ್ರಯ ಏಷಾಗ್ಂ ಸಾಕ-ಮ್ಪ್ರಮೀಯೇರನ್ನ್ । ಏಕೈಕ-ಮನೂಚೀನಾ-ನ್ಯುದಾಹರನ್ತಿ । ಏಕೈಕ ಏವೈಷಾಮನ್ವಞ್ಚಃ ಪ್ರಮೀಯತೇ । ಕಶಿಪು ಕಶಿಪವ್ಯಾಯ । ಉಪಬರ್ಹಣ-ಮುಪಬರ್ಹಣ್ಯಾಯ । ಆಞ್ಜನ-ಮಾಞ್ಜನ್ಯಾಯ । ಅಭ್ಯಞ್ಜನ-ಮಭ್ಯಞ್ಜನ್ಯಾಯ । ಯಥಾಭಾಗಮೇವೈನಾ-ನ್ಪ್ರೀಣಾತಿ ॥ 60 ॥
(ನಿರವದಯತೇ - ಪಿತೃಮಾ - ನಗ್ನಿಷ್ವಾತ್ತಾ - ಏಕಯೋಪ ಮನ್ಥ - ತ್ಯಖಾತಾ ಭವತಿ-ಮನುಷ್ಯಾಣಾಂ - ಪದ್ಯನ್ತೇ - ಪರಿದದ್ಧ್ಯಾನ್ - ಮೀಯತೇ ಪಞ್ಚ ಚ) (ಅ. 8)
ಅನುವಾಕಂ 9 - ತಚ್ಛೇಷಃ

ಅಗ್ನಯೇ ದೇವೇಭ್ಯಃ ಪಿತೃಭ್ಯಃ ಸಮಿದ್ಧ್ಯಮಾನಾಯಾನುಬ್ರೂಹೀತ್ಯಾಹ ।

ಉಭಯೇ ಹಿ ದೇವಾಶ್ಚ ಪಿತರಶ್ಚೇಜ್ಯನ್ತೇ । ಏಕಾಮನ್ವಾಹ । ಏಕಾ ಹಿ ಪಿತೃಣಾಮ್ । ತ್ರಿರನ್ವಾಹ । ತ್ರಿರ್ಹಿ ದೇವಾನಾಮ್ । ಆಘಾರಾವಾಘಾರಯತಿ । ಯಜ್ಞ ಪರುಷೋರನನ್ತರಿತ್ಯೈ । ನಾರ್ಷೇಯಂ-ವೃಁಣೀತೇ । ನ ಹೋತಾರಮ್ ॥ 61 ॥
ಯದಾರ್ಷೇಯಂ-ವೃಁಣೀತ । ಯದ್ಧೋತಾರಮ್ । ಪ್ರಮಾಯುಕೋ ಯಜಮಾನ-ಸ್ಸ್ಯಾತ್ । ಪ್ರಮಾಯುಕೋ ಹೋತಾ । ತಸ್ಮಾನ್ನ ವೃಣೀತೇ । ಯಜಮಾನಸ್ಯ ಹೋತು-ರ್ಗೋಪೀಥಾಯ । ಅಪಬರ್ಹಿಷಃ ಪ್ರಯಾಜಾನ್.-ಯಜತಿ । ಪ್ರಜಾ ವೈ ಬರ್ಹಿಃ । ಪ್ರಜಾ ಏವ ಮೃತ್ಯೋರುಥ್ಸೃಜತಿ । ಆಜ್ಯಭಾಗೌ ಯಜತಿ ॥ 62 ॥
ಯಜ್ಞಸ್ಯೈವ ಚಕ್ಷುಷೀ ನಾನ್ತರೇತಿ । ಪ್ರಾಚೀನಾವೀತೀ ಸೋಮಂ-ಯಁಜತಿ । ಪಿತೃದೇವತ್ಯಾ ಹಿ । ಏಷಾ ಽಽಹುತಿಃ । ಪಞ್ಚ ಕೃತ್ವೋ-ಽವದ್ಯತಿ । ಪಞ್ಚ ಹ್ಯೇತಾ ದೇವತಾಃ । ದ್ವೇ ಪುರೋ-ಽನುವಾಕ್ಯೇ । ಯಾಜ್ಯಾ ದೇವತಾ ವಷಟ್ಕಾರಃ । ತಾ ಏವ ಪ್ರೀಣಾತಿ । ಸನ್ತತಮವ ದ್ಯತಿ ॥ 63 ॥
ಋತೂನಾಗ್ಂ ಸನ್ತತ್ಯೈ । ಪ್ರೈವೈಭ್ಯಃ ಪೂರ್ವಯಾ ಪುರೋ-ಽನುವಾಕ್ಯಯಾ ಽಽಹ । ಪ್ರಣಯತಿ ದ್ವಿತೀಯಯಾ । ಗಮಯತಿ ಯಾಜ್ಯಯಾ । ತೃತೀಯೇ ವಾ ಇತೋ ಲೋಕೇ ಪಿತರಃ । ಅಹ್ನ ಏವೈನಾ-ನ್ಪೂರ್ವಯಾ ಪುರೋ-ಽನುವಾಕ್ಯಯಾ ಽತ್ಯಾನಯತಿ । ರಾತ್ರಿಯೈ ದ್ವಿತೀಯಯಾ । ಐವೈನಾನ್. ಯಾಜ್ಯಯಾ ಗಮಯತಿ । ದಕ್ಷಿಣತೋ-ಽವದಾಯ । ಉದಙ್ಙತಿ ಕ್ರಾಮತಿ ವ್ಯಾವೃತ್ತ್ಯೈ ॥ 64 ॥
ಆ ಸ್ವಧೇತ್ಯಾ-ಶ್ರಾವಯತಿ । ಅಸ್ತು ಸ್ವಧೇತಿ ಪ್ರತ್ಯಾಶ್ರಾವಯತಿ । ಸ್ವಧಾ ನಮ ಇತಿ ವಷಟ್ಕರೋತಿ । ಸ್ವಧಾಕಾರೋ ಹಿ ಪಿತೃಣಾಮ್ । ಸೋಮಮಗ್ರೇ ಯಜತಿ । ಸೋಮ ಪ್ರಯಾಜಾ ಹಿ ಪಿತರಃ । ಸೋಮ-ಮ್ಪಿತೃಮನ್ತಂ-ಯಁಜತಿ । ಸಂವಁಥ್ಸರೋ ವೈ ಸೋಮಃ ಪಿತೃಮಾನ್ । ಸಂವಁಥ್ಸರಮೇವ ತ-ದ್ಯಜತಿ । ಪಿತೄನ್-ಬರ್ಹಿಷದೋ ಯಜತಿ ॥ 65 ॥
ಯೇ ವೈ ಯಜ್ವಾನಃ । ತೇ ಪಿತರೋ ಬರ್ಹಿಷದಃ । ತಾನೇವ ತ-ದ್ಯಜತಿ । ಪಿತೄನಗ್ನಿಷ್ವಾತ್ತಾನ್. ಯಜತಿ । ಯೇ ವಾ ಅಯಜ್ವಾನೋ ಗೃಹಮೇಧಿನಃ । ತೇ ಪಿತರೋ-ಽಗ್ನಿಷ್ವಾತ್ತಾಃ । ತಾನೇವ ತ-ದ್ಯಜತಿ । ಅಗ್ನಿ-ಙ್ಕವ್ಯವಾಹನಂ-ಯಁಜತಿ । ಯ ಏವ ಪಿತೃಣಾಮಗ್ನಿಃ । ತಮೇವ ತ-ದ್ಯಜತಿ ॥ 66 ॥
ಅಥೋ ಯಥಾ-ಽಗ್ನಿಗ್ಗ್ ಸ್ವಿಷ್ಟಕೃತಂ-ಯಁಜತಿ । ತಾದೃಗೇವ ತತ್ । ಏತತ್ತೇ ತತ ಯೇ ಚ ತ್ವಾಮನ್ವಿತಿ ತಿಸೃಷು ಸ್ರಕ್ತೀಷು ನಿದಧಾತಿ । ತಸ್ಮಾದಾ ತೃತೀಯಾ-ತ್ಪುರುಷಾನ್ನಾಮ ನ ಗೃಹ್ಣನ್ತಿ । ಏತಾವನ್ತೋ ಹೀಜ್ಯನ್ತೇ । ಅತ್ರ ಪಿತರೋ ಯಥಾಭಾಗ-ಮ್ಮನ್ದದ್ಧ್ವಮಿತ್ಯಾಹ । ಹ್ಲೀಕಾ ಹಿ ಪಿತರಃ । ಉದಞ್ಚೋ ನಿಷ್ಕ್ರಾಮನ್ತಿ । ಏಷಾ ವೈ ಮನುಷ್ಯಾಣಾ-ನ್ದಿಕ್ । ಸ್ವಾಮೇವ ತ-ದ್ದಿಶಮನು ನಿಷ್ಕ್ರಾಮನ್ತಿ ॥ 67 ॥
ಆಹವನೀಯ-ಮುಪತಿಷ್ಠನ್ತೇ । ನ್ಯೇವಾಸ್ಮೈ ತದ್ಧ್ನುವತೇ । ಯಥ್ಸತ್ಯಾಹವನೀಯೇ । ಅಥಾನ್ಯತ್ರ ಚರನ್ತಿ । ಆತಮಿತೋರುಪತಿಷ್ಠನ್ತೇ । ಅಗ್ನಿಮೇವೋಪದ್ರಷ್ಟಾರ-ಙ್ಕೃತ್ವಾ । ಪಿತೄ-ನ್ನಿರವದಯನ್ತೇ । ಅನ್ತಂ-ವಾಁ ಏತೇ ಪ್ರಾಣಾನಾ-ಙ್ಗಚ್ಛನ್ತಿ । ಯ ಆತಮಿತೋರುಪತಿಷ್ಠನ್ತೇ । ಸುಸನ್ದೃಶ-ನ್ತ್ವಾ ವಯಮಿತ್ಯಾಹ ॥ 68 ॥
ಪ್ರಾಣೋ ವೈ ಸುಸನ್ದೃಕ್ । ಪ್ರಾಣಮೇವಾತ್ಮನ್-ದಧತೇ । ಯೋಜಾ ನ್ವಿನ್ದ್ರ ತೇ ಹರೀ ಇತ್ಯಾಹ । ಪ್ರಾಣಮೇವ ಪುನರಯುಕ್ತ । ಅಕ್ಷನ್ನಮೀಮದನ್ತ ಹೀತಿ ಗಾರ್ಹಪತ್ಯ-ಮುಪತಿಷ್ಠನ್ತೇ । ಅಕ್ಷನ್ನಮೀಮದನ್ತಾಥ ತ್ವೋಪತಿಷ್ಠಾಮಹ ಇತಿ ವಾವೈತದಾಹ । ಅಮೀಮದನ್ತ ಪಿತರಃ ಸೋಮ್ಯಾ ಇತ್ಯಭಿ ಪ್ರಪದ್ಯನ್ತೇ । ಅಮೀಮದನ್ತ ಪಿತರೋ-ಽಥ ತ್ವಾ-ಽಭಿ ಪ್ರಪದ್ಯಾಮಹ ಇತಿ ವಾವೈತದಾಹ । ಅಪಃ ಪರಿಷಿಞ್ಚತಿ । ಮಾರ್ಜಯತ್ಯೇವೈನಾನ್ ॥ 69 ॥
ಅಥೋ ತರ್ಪಯತ್ಯೇವ । ತೃಪ್ಯತಿ ಪ್ರಜಯಾ ಪಶುಭಿಃ । ಯ ಏವಂ-ವೇಁದ । ಅಪ ಬರ್ಹಿಷಾವನೂಯಾಜೌ ಯಜತಿ । ಪ್ರಜಾ ವೈ ಬರ್ಹಿಃ । ಪ್ರಜಾ ಏವ ಮೃತ್ಯೋರುಥ್ಸೃಜತಿ । ಚತುರಃ ಪ್ರಯಾಜಾನ್. ಯಜತಿ । ದ್ವಾವನೂಯಾಜೌ । ಷಟ್ಥ್ಸಮ್ಪದ್ಯನ್ತೇ । ಷಡ್ವಾ ಋತವಃ ॥ 70 ॥
ಋತೂನೇವ ಪ್ರೀಣಾತಿ । ನ ಪತ್ನ್ಯನ್ವಾಸ್ತೇ । ನ ಸಂಯಾಁಜಯನ್ತಿ । ಯತ್ಪತ್ನ್ಯನ್ವಾಸೀತ । ಯಥ್ಸಂಯಾಁಜಯೇಯುಃ । ಪ್ರಮಾಯುಕಾ ಸ್ಯಾತ್ । ತಸ್ಮಾನ್ನಾನ್ವಾಸ್ತೇ । ನ ಸಂಯಾಁಜಯನ್ತಿ । ಪತ್ನಿಯೈ ಗೋಪೀಥಾಯ ॥ 71 ॥

(ಹೋತಾರ - ಮಾಜ್ಯಭಾಗೌ ಯಜತಿ - ಸನ್ತತಮವದ್ಯತಿ - ವ್ಯಾವೃತ್ತ್ಯೈ - ಬರ್ಹಿಷದೋ ಯಜತಿ - ತಮೇವ ತ-ದ್ಯಜ- ತ್ಯನು ನಿಷ್ಕ್ರಾಮನ್ತ್ಯಾ - ಹೈ - ನಾನ್ - ಋತವೋ - +ನವ ಚ) (ಅ. 9)
ಅನುವಾಕಂ 10 - ತ್ರ್ಯಮ್ಬಕಹವೀಂಷಿ

ಪ್ರತಿಪೂರುಷಮೇಕಕಪಾಲಾ-ನ್ನಿರ್ವಪತಿ । ಜಾತಾ ಏವ ಪ್ರಜಾ ರುದ್ರಾನ್ನಿರವದಯತೇ । ಏಕಮತಿರಿಕ್ತಮ್ । ಜನಿಷ್ಯಮಾಣಾ ಏವ ಪ್ರಜಾ ರುದ್ರಾನ್ನಿರವದಯತೇ । ಏಕಕಪಾಲಾ ಭವನ್ತಿ । ಏಕಧೈವ ರುದ್ರ-ನ್ನಿರವದಯತೇ । ನಾಭಿಘಾರಯತಿ । ಯದಭಿಘಾರಯೇತ್ । ಅನ್ತರವಚಾರಿಣಗ್ಂ ರುದ್ರ-ಙ್ಕುರ್ಯಾತ್ । ಏಕೋಲ್ಮುಕೇನ ಯನ್ತಿ ॥ 72 ॥
ತದ್ಧಿ ರುದ್ರಸ್ಯ ಭಾಗಧೇಯಮ್ । ಇಮಾ-ನ್ದಿಶಂ-ಯಁನ್ತಿ । ಏಷಾ ವೈ ರುದ್ರಸ್ಯ ದಿಕ್ । ಸ್ವಾಯಾಮೇವ ದಿಶಿ ರುದ್ರ-ನ್ನಿರವದಯತೇ । ರುದ್ರೋ ವಾ ಅಪಶುಕಾಯಾ ಆಹುತ್ಯೈ ನಾತಿಷ್ಠತ । ಅಸೌ ತೇ ಪಶುರಿತಿ ನಿರ್ದಿಶೇದ್ಯ-ನ್ದ್ವಿಷ್ಯಾತ್ । ಯಮೇವ ದ್ವೇಷ್ಟಿ । ತಮಸ್ಮೈ ಪಶು-ನ್ನಿರ್ದಿಶತಿ । ಯದಿ ನ ದ್ವಿಷ್ಯಾತ್ । ಆಖುಸ್ತೇ ಪಶುರಿತಿ ಬ್ರೂಯಾತ್ ॥ 73 ॥
ನ ಗ್ರಾಮ್ಯಾ-ನ್ಪಶೂನ್. ಹಿನಸ್ತಿ । ನಾರಣ್ಯಾನ್ । ಚತುಷ್ಪಥೇ ಜುಹೋತಿ । ಏಷ ವಾ ಅಗ್ನೀನಾ-ಮ್ಪಡ್ಬೀಶೋ ನಾಮ । ಅಗ್ನಿವತ್ಯೇವ ಜುಹೋತಿ । ಮದ್ಧ್ಯಮೇನ ಪರ್ಣೇನ ಜುಹೋತಿ । ಸ್ರುಗ್ಘ್ಯೇಷಾ । ಅಥೋ ಖಲು । ಅನ್ತಮೇನೈವ ಹೋತವ್ಯಮ್ । ಅನ್ತತ ಏವ ರುದ್ರ-ನ್ನಿರವದಯತೇ ॥ 74 ॥
ಏಷ ತೇ ರುದ್ರ ಭಾಗ-ಸ್ಸಹ ಸ್ವಸ್ರಾ-ಽಮ್ಬಿಕಯೇತ್ಯಾಹ । ಶರದ್ವಾ ಅಸ್ಯಾಮ್ಬಿಕಾ ಸ್ವಸಾ । ತಯಾ ವಾ ಏಷ ಹಿನಸ್ತಿ । ಯಗ್ಂ ಹಿನಸ್ತಿ । ತಯೈವೈನಗ್ಂ ಸಹ ಶಮಯತಿ । ಭೇಷಜ-ಙ್ಗವ ಇತ್ಯಾಹ । ಯಾವನ್ತ ಏವ ಗ್ರಾಮ್ಯಾಃ ಪಶವಃ । ತೇಭ್ಯೋ ಭೇಷಜ-ಙ್ಕರೋತಿ । ಅವಾಮ್ಬ ರುದ್ರಮದಿಮಹೀತ್ಯಾಹ । ಆಶಿಷಮೇವೈತಾಮಾಶಾಸ್ತೇ ॥ 75 ॥
ತ್ರ್ಯಮ್ಬಕಂ-ಯಁಜಾಮಹ ಇತ್ಯಾಹ । ಮೃತ್ಯೋ-ರ್ಮುಕ್ಷೀಯ ಮಾ ಽಮೃತಾದಿತಿ ವಾವೈತದಾಹ । ಉತ್ಕಿರನ್ತಿ । ಭಗಸ್ಯ ಲೀಫ್ಸನ್ತೇ । ಮೂತೇ ಕೃತ್ವಾ-ಽಽಸಜನ್ತಿ । ಯಥಾ ಜನಂ-ಯಁತೇ-ಽವಸ-ಙ್ಕರೋತಿ । ತಾದೃಗೇವತತ್ । ಏಷ ತೇ ರುದ್ರ ಭಾಗ ಇತ್ಯಾಹ ನಿರವತ್ತ್ಯೈ । ಅಪ್ರತೀಕ್ಷಮಾಯನ್ತಿ । ಅಪಃ ಪರಿಷಿಞ್ಚತಿ । ರುದ್ರಸ್ಯಾನ್ತರ್ಹಿತ್ಯೈ । ಪ್ರ ವಾ ಏತೇ-ಽಸ್ಮಾ-ಲ್ಲೋಕಾಚ್ಚ್ಯವನ್ತೇ । ಯೇ ತ್ರ್ಯಮ್ಬಕೈಶ್ಚರನ್ತಿ । ಆದಿತ್ಯ-ಞ್ಚರು-ಮ್ಪುನರೇತ್ಯ ನಿರ್ವಪತಿ । ಇಯಂ-ವಾಁ ಅದಿತಿಃ । ಅಸ್ಯಾಮೇವ ಪ್ರತಿ ತಿಷ್ಠನ್ತಿ ॥ 76 ॥