3.10 - sāvitracayanam - kṛṣṇa yajurveda taittirīya brāhmaṇa kāṭha praśnaḥ pāṭhaḥ - sañjñānaṃ vijñānaṃ

kṛṣṇa yajurvedīya taittirīya brāhmaṇe kāṭhake prathamaḥ praśnaḥ - sāvitracayanam
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
sa॒ñjñānaṃ̭-vi~॒jñāna̭-mpra॒jñāna̭-ñjā॒nada̭bhijā॒nat | sa॒kaṃ​lpa~̭māna-mpra॒kalpa̭māna-mupa॒kalpa̭māna॒-mupa̭klṛpta-ṅklṛ॒ptam |
śreyo॒ vasī̭ya ā॒yathsambhṷ̄ta-mbhū॒tam ||
ci॒traḥ ke॒tuḥ pra॒bhānā॒bhān-thsa॒bhānn |
jyoti̭ṣmā॒g॒-steja̭svānā॒tapa॒gg॒-stapa̭nnabhi॒tapanṋ |
ro॒ca॒no roca̭mānaḥ-śobha॒naḥ-śobha̭mānaḥ ka॒lyāṇaḥ̭ || dar​śā̭ dṛ॒ṣṭā da̭r​śa॒tā vi॒śvarṷ̄pā sudar​śa॒nā | ā॒pyāya̭mānā॒ pyāya̭mānā॒-pyāyā̭ sū॒nṛterā᳚ |
ā॒pūrya̭māṇā॒ pūrya̭māṇā pū॒raya̭ntī pū॒rṇā pau᳚rṇamā॒sī || dā॒tā pra̭dā॒tā-''na॒ndo modaḥ̭ pramo॒daḥ || 1 ||

ā॒ve॒śaya̭-nnive॒śayan᳚thsaṃ॒​ve~śa̭na॒-ssagg​śā᳚nta-śśā॒ntaḥ | ā॒bhava̭-npra॒bhavan᳚-thsa॒bhaṃ​va~॒n-thsambhṷ̄to bhū॒taḥ ||
prastṷtaṃ॒-vi~ṣṭṷta॒gṃ॒ sagg​stṷta-ṅka॒lyāṇaṃ̭-vi~॒śvarṷ̄pam | śu॒krama॒mṛta̭-nteja॒svi teja॒-ssami̭ddham | a॒ru॒ṇa-mbhā̭nu॒ma-nmarī̭cimadabhi॒tapa॒-ttapa̭svat || sa॒vi॒tā pra̭savi॒tā dī॒pto dī॒paya॒-ndīpya̭mānaḥ | jvala̭-ñjvali॒tā tapa̭n vi॒tapan᳚-thsa॒ntapanṋ | ro॒ca॒no roca̭māna-śśu॒bhūṃ-śśumbha̭māno vā॒maḥ ||
su॒tā sṷnva॒tī prasṷtā sū॒yamā̭nā 'bhiṣū॒yamā̭ṇā | pītī᳚ pra॒pā sa॒pā-ntṛpti̭-sta॒rpaya̭ntī || 2 ||

kā॒ntā kā॒myā kā॒majā॒tā ''yṷṣmatī kāma॒dughā᳚ || a॒bhi॒śā॒stā 'nṷma॒ntā-''na॒ndo modaḥ̭ pramo॒daḥ | ā॒sā॒daya̭-nniṣā॒dayan᳚-thsa॒gṃ॒sāda̭na॒-ssagṃsa̭nna-ssa॒nnaḥ |
ā॒bhū rvi॒bhūḥ pra॒bhū-śśa॒bhūṃ rbhuvaḥ̭ ||
pa॒vitra̭-mpavayi॒ṣya-npū॒to meddhyaḥ̭ |
yaśo॒ yaśa̭svā-nā॒yura॒mṛtaḥ̭ | jī॒vo jī̭vi॒ṣya-nthsva॒rgo lo॒kaḥ || saha̭svā॒-nthsahī̭yā॒-noja̭svā॒-nthsaha̭mānaḥ | jaya̭nna-bhi॒jayan᳚-thsu॒dravi̭ṇo draviṇo॒dāḥ | ā॒rdrapa̭vitro॒ hari̭keśo॒ modaḥ̭ pramo॒daḥ || 3 ||

a॒ru॒ṇo̭ 'ru॒ṇara̭jāḥ pu॒ṇḍarī̭ko viśva॒jida̭-bhi॒jit | ā॒rdraḥ pinva̭mā॒no 'nna̭vā॒n-rasa̭vā॒-nirā̭vān |
sa॒rvau॒ṣa॒dha-ssa̭bhaṃ॒ro maha̭svān || e॒ja॒tkā jo̭va॒tkāḥ | kṣu॒lla॒kā-śśi̭piviṣṭa॒kāḥ |
sa॒ri॒stra॒rā-ssu॒śera̭vaḥ | a॒ji॒rāso̭ gami॒ṣṇavaḥ̭ || i॒dānī᳚-nta॒dānī̭-me॒tar​hi̭ kṣi॒prama̭ji॒ram | ā॒śu rni̭me॒ṣaḥ pha॒ṇo drava̭nnati॒-dravanṋ | tvara॒gg॒ stvara̭māṇa ā॒śurāśī̭yāñja॒vaḥ {ā॒śurāśī̭yān ja॒vaḥ} ||
a॒gni॒ṣṭo॒ma u॒kthyo̭ 'tirā॒tro dvi̭rā॒tra-stri̭rā॒tra-śca̭tūrā॒traḥ | a॒gnir-ṛ॒tu-ssūrya̭ ṛ॒tuśca॒ndramā̭ ṛ॒tuḥ || pra॒jāpa̭ti-ssaṃ​va~thsa॒ro ma॒hānkaḥ || 4 ||

(pra॒mo॒da - sta॒rpaya̭ntī - pramo॒do - ja॒vastrīṇi̭ ca) (a. 1)
anuvākaṃ 2 - anuvākeṣu navasu lekhāsu nābhyā-ñceṣṭakopadhānaṃ
svayamātṛṇṇopadhāna-ñcocyate
bhūra॒gni-ñca̭ pṛthi॒vī-ñca॒ mā-ñca̭ |
trīg​śca̭ lo॒kā-nthsaṃ̭​va~thsa॒ra-ñca̭ |
pra॒jāpa̭tistvā sādayatu | tayā̭ de॒vata̭yā 'ṅgira॒sva-ddhru॒vā sī̭da ||
bhuvo̭ vā॒yu-ñcā॒ntari̭kṣa-ñca॒ mā-ñca̭ | trīg​śca̭ lo॒kā-nthsaṃ̭​va~thsa॒ra-ñca̭ |
pra॒jāpa̭tistvā sādayatu | tayā̭ de॒vata̭yā-' ṅgiṃra॒sva-ddhru॒vā sī̭da | sva̭rādi॒tya-ñca॒ diva̭-ñca॒ mā-ñca̭ | trīg​śca̭ lo॒kā-nthsaṃ̭​va~thsa॒ra-ñca̭ | pra॒jāpa̭tistvā sādayatu | tayā̭ de॒vata̭yā 'ṅgiṃra॒sva-ddhru॒vā sī̭da | bhūrbhuva॒-ssva̭-śca॒ndrama̭sa-ñca॒ diśa̭śca॒ mā-ñca̭ |
trīg​śca̭ lo॒kā-nthsa̭van​thsa॒ra-ñca̭ | pra॒jāpa̭tistvā sādayatu | tayā̭ de॒vata̭yā 'ṅgira॒sva-ddhru॒vā sī̭da || 5 ||

(saṃ॒​va~॒thsa॒ra॒-ñca॒ ṣaṭ ca̭)(ā2)
anuvākaṃ 3 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
tvame॒va tvāṃ-ve~᳚ttha॒ yo̭-'si॒ so-'si̭ | tvame॒va tvāma̭caiṣīḥ | ci॒taścāsi॒ sañci̭ta-ścāsyagne | e॒tāvā॒g॒ścāsi॒ bhūyāg̭ścāsyagne |
yattḙ agne॒ nyṷ̄naṃ॒-ya~du॒ te-'ti̭riktam | ā॒di॒tyā-stadaṃṅgi̭rasa-ścinvantu |
viśvḙ te de॒vāściti॒-māpṷ̄rayantu | ci॒taścāsi॒ sañci̭ta-ścāsyagne | e॒tāvā॒g॒ścāsi॒ bhūyāg̭ścāsyagne | mā tḙ agne 'ca॒yena॒ mā-'ti̭ ca॒ yenāyu॒rāvṛ̭kṣi | sava̭r​ṣā॒-ñjyoti̭ṣā॒-ñjyoti॒ ryada॒dāvu॒deti̭ | tapa̭so jā॒tamani̭-bhṛṣṭa॒mojaḥ̭ | tatte॒ jyoti̭riṣṭake | tena̭ me tapa | tena̭ me jvala | tena̭ me dīdihi |
yāva̭dde॒vāḥ | yāva॒dasā̭ti॒ sūryaḥ̭ | yāva̭du॒tāpi॒ brahma̭ || 6 ||

(āvṛ̭kṣi॒ nava̭ ca) (a. 3)
anuvākaṃ 4 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
saṃ॒​va~॒thsa॒ro̭-'si parivathsa॒ro̭-'si | i॒dā॒va॒thsa॒ro̭-'sī-duvathsa॒ro̭-'si |
i॒dva॒thsa॒ro̭-'si vathsa॒ro̭-'si | tasya̭ te vasa॒nta-śśiraḥ̭ | grī॒ṣmo dakṣi̭ṇaḥ pa॒kṣaḥ | va॒ra॒.ṣāḥ puccha᳚m | śa॒radutta̭raḥ pa॒kṣaḥ |
he॒ma॒nto maddhya᳚m | pū॒rva॒pa॒kṣāścita̭yaḥ | a॒pa॒ra॒pa॒kṣāḥ purī̭ṣam || 7 ||

a॒ho॒rā॒trā-ṇīṣṭa̭kāḥ | ṛ॒ṣa॒bho̭-'si sva॒rgo lo॒kaḥ | yasyā᳚-ndi॒śi ma॒hīya̭se | tato̭ no॒ maha॒ āva̭ha | vā॒yu rbhū॒tvā sarvā॒ diśa॒ āvā̭hi | sarvā॒ diśo-'nu॒ vivā̭hi | sarvā॒ diśo-'nu॒ saṃ​vā~̭hi | cittyā॒ citi॒-māpṛ̭ṇa | aci̭ttyā॒ citi॒-māpṛ̭ṇa | cida̭si samu॒drayo̭niḥ || 8 ||

indu॒ rdakṣaḥ̭ śye॒na ṛ॒tāvā᳚ | hira̭ṇyapakṣa-śśaku॒no bhṷra॒ṇyuḥ | ma॒hā-nthsa॒dhasthe᳚ dhru॒va āniṣa̭ttaḥ | nama̭ste astu॒ mā mā̭ higṃsīḥ | eti॒ preti॒ vīti॒ samityuditi̭ | diva̭-mme yaccha | a॒ntari̭kṣa-mme yaccha | pṛ॒thi॒vī-mmḙ yaccha |
pṛ॒thi॒vī-mmḙ yaccha | a॒ntari̭kṣa-mme yaccha | diva̭-mme yaccha | ahnā॒ prasā̭raya | rātryā॒ sama̭ca | rātryā॒ prasā̭raya | ahnā॒ sama̭ca |
kāma॒-mprasā̭raya | kāma॒gṃ॒ sama̭ca || 9 ||

(purī̭ṣagṃ - samu॒drayo̭niḥ - pṛthi॒vī-mmḙ yacchā॒ntari̭kṣa-mme yaccha sa॒pta ca̭) (a. 4)
anuvākaṃ 5 - anuvākeṣu navasu lekhāsu nābhyā-ñceṣṭakopadhānaṃ
svayamātṛṇṇopadhāna-ñcocyate
bhūrbhuva॒-ssvaḥ̭ | ojo॒ bala᳚m | brahma̭ kṣa॒tram | yaśo̭ ma॒hat | sa॒tya-ntapo॒ nāma̭ | rū॒pa-ma॒mṛta᳚m | cakṣu॒-śśrotra᳚m | mana॒ āyuḥ̭ |
viśvaṃ॒-ya~śo̭ ma॒haḥ | sa॒ma-ntapo॒ haro॒ bhāḥ | jā॒tavḙdā॒ yadi̭ vā pāva॒ko-'si̭ | vai॒śvā॒na॒ro yadi̭ vā vaidyu॒to-'si̭ | śa-mpra॒jābhyo॒ yaja̭mānāya lo॒kam | ūrja॒-mpuṣṭi॒-ndada̭-da॒bhyāva̭vṛthsva || 10 ||

(bhāśca॒tvāri̭ ca) (a. 5)
anuvākaṃ 6 - anuvākeṣu navasu lekhāsu nābhyā-ñceṣṭakopadhānaṃ
svayamātṛṇṇopadhāna-ñcocyate
rājñī̭ virājñī᳚ | sa॒mrājñī᳚ sva॒rājñī᳚ | a॒rci-śśo॒ciḥ | tapo॒ haro॒ bhāḥ | a॒gni-rindro॒ bṛha॒spatiḥ̭ | viśvḙ de॒vā bhuva̭nasya go॒pāḥ |
te mā॒ sarve॒ yaśa̭sā॒ sagṃsṛ̭jantu || 11 ||

(rājñīndro̭ mā sa॒pta (a. 6)
anuvākaṃ 7 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
asa̭ve॒ svāhā॒ vasa̭ve॒ svāhā᳚ | vibhṷve॒ svāhā॒ viva̭svate॒ svāhā᳚ | a॒bhi॒bhuve॒ svāhā-'dhi̭pataye॒ svāhā᳚ | di॒vāmpata̭ye॒ svāhā 'gṃ̭haspa॒tyāya॒ svāhā᳚ | cā॒kṣu॒ṣma॒tyāya॒ svāhā᳚ jyotiṣma॒tyāya॒ svāhā᳚ | rājñe॒ svāhā̭ vi॒rājñe॒ svāhā᳚ | sa॒mrājñe॒ svāhā᳚ sva॒rājñe॒ svāhā᳚ |
śūṣā̭ya॒ svāhā॒ sūryā̭ya॒ svāhā᳚ | ca॒ndrama̭se॒ svāhā॒ jyoti̭ṣe॒ svāhā᳚ |
sa॒gṃ॒sarpā̭ya॒ svāhā̭ ka॒lyāṇā̭ya॒ svāhā᳚ |
arjṷnāya॒ svāhā᳚ || 12 ||

(ka॒lyāṇā̭ya॒ svāhaika̭-ñca) (a. 7)
anuvākaṃ 8 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
vi॒pa॒ścite॒ pava̭mānāya gāyata | ma॒hī na dhārā 'tyandho̭ ar​ṣati | ahi̭r​ha jī॒rṇāmati̭sarpati॒ tvaca᳚m | atyo॒ na krīḍa̭nna sara॒dvṛṣā॒ hariḥ̭ |
u॒pa॒yā॒magṛ̭hīto-'si mṛ॒tyave᳚ tvā॒ juṣṭa̭-ṅgṛhṇāmi | e॒ṣa te॒ yoni̭rmṛ॒tyave᳚ tvā || apa̭ mṛ॒tyu-mapa॒kṣudha᳚m | ape॒ta-śśa॒patha̭-ñjahi |
adhā̭ no agna॒ āva̭ha | rā॒yaspoṣagṃ̭ saha॒sriṇa᳚m || 13 ||

ye tḙ sa॒hasra̭ma॒yuta॒-mpāśāḥ᳚ | mṛtyo॒ martyā̭ya॒ hanta̭ve | tān. ya॒jñasya̭ mā॒yayā᳚ | sarvā॒nava̭ yajāmahe || bha॒kṣo᳚ 'syamṛta bha॒kṣaḥ | tasya̭ te mṛ॒tyu-pī̭tasyā॒-mṛta̭vataḥ |
sva॒gā-kṛ̭tasya॒ madhṷmataḥ |
upa̭hūta॒syo-pa̭hūto bhakṣayāmi ||
ma॒ndrā 'bhibhṷ̄tiḥ ke॒tu rya॒jñānāṃ॒-vā~k | asā॒vehi̭ || 14 ||

a॒ndho jāgṛ̭viḥ prāṇa | asā॒vehi̭ | ba॒dhi॒ra ā᳚krandayita-rapāna | asā॒vehi̭ | a॒ha॒stostvā॒ cakṣuḥ̭ | asā॒vehi̭ | a॒pā॒dāśo॒ manaḥ̭ |
asā॒vehi̭ | kave॒ vipra̭citte॒ śrotra̭ | asā॒vehi̭ || 15 ||

su॒ha॒sta-ssṷvā॒sāḥ | śū॒ṣo nāmā᳚sya॒-mṛto॒ martyḙṣu | tantvā॒-'ha-ntathā॒ veda̭ | asā॒vehi̭ | a॒gnirmḙ vā॒ci śri॒taḥ | vāghṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi | vā॒yurme᳚ prā॒ṇe śri॒taḥ || 16 ||

prā॒ṇo hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
sūryo̭ me॒ cakṣṷṣi śri॒taḥ |
cakṣu॒r॒ hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
ca॒ndramā̭ me॒ mana̭si śri॒taḥ || 17 ||

mano॒ hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
diśo̭ me॒ śrotre᳚ śri॒tāḥ | śrotra॒gṃ॒ hṛda̭ye | hṛda̭ya॒-mmayi̭ | a॒hama॒mṛte᳚ |
a॒mṛta॒-mbrahma̭ṇi | āpo̭ me॒ reta̭si śri॒tāḥ || 18 ||

reto॒ hṛda̭ye | hṛda̭ya॒-mmayi̭ |
a॒hama॒mṛte᳚ | a॒mṛta॒-mbrahma̭ṇi |
pṛ॒thi॒vī me॒ śarī̭re śri॒tā |
śarī̭ra॒gṃ॒ hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi | o॒ṣa॒dhi॒va॒na॒spa॒tayo̭ me॒ loma̭su śri॒tāḥ || 19 ||

lomā̭ni॒ hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
indro̭ me॒ bale᳚ śri॒taḥ | bala॒gṃ॒ hṛda̭ye | hṛda̭ya॒-mmayi̭ | a॒hama॒mṛte᳚ |
a॒mṛta॒-mbrahma̭ṇi | pa॒rjanyo̭ me mū॒rdhni śri॒taḥ || 20 ||

mū॒drdhā hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
īśā̭no me ma॒nyau śri॒taḥ | ma॒nyur-hṛda̭ye | hṛda̭ya॒-mmayi̭ | a॒hama॒mṛte᳚ |
a॒mṛta॒-mbrahma̭ṇi |
ā॒tmā ma̭ ā॒tmani̭ śri॒taḥ( ) || 21 ||

ā॒tmā hṛda̭ye | hṛda̭ya॒-mmayi̭ | a॒hama॒mṛte᳚ | a॒mṛta॒-mbrahma̭ṇi |
puna̭rma ā॒tmā puna॒rāyu॒rāgā᳚t | punaḥ̭ prā॒ṇaḥ puna॒rākṷ̄ta॒-māgā᳚t |
vai॒śvā॒na॒ro ra॒śmibhi̭ rvāvṛdhā॒naḥ | a॒ntasti̭ṣṭhatva॒mṛta̭sya go॒pāḥ || 22 ||

(sa॒ha॒sriṇa̭ - mihi॒ - śrotrāsā॒vehi̭ - prā॒ṇe śri॒to - mana̭si śri॒to - reta̭si śri॒tā - loma̭su śri॒tā - mū॒rdhni śri॒ta - ā॒tmani̭ śri॒to᳚ - +-'ṣṭau ca̭) (a. 8)
(a॒gni-rvā॒yu-ssūrya̭ śca॒ndramā॒ diśa॒ āpaḥ̭ pṛthi॒ vyo̭ṣadhivanaspa॒taya॒ indraḥ̭ pa॒rjanya॒ īśā̭na ā॒tmā puna̭rme॒ trayo̭daśa)
anuvākaṃ 9 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
pra॒jāpa̭ti rde॒vāna̭sṛjata | te pā॒pmanā॒ sandi̭tā ajāyanta | tān vya̭dyat | ya-dvya॒dyat | tasmā᳚-dvi॒dyut | tama̭vṛścat | yadavṛ̭ścat | tasmā॒-dvṛṣṭiḥ̭ | tasmā॒-dyatrai॒te de॒vatḙ abhi॒prāpnṷtaḥ |
vica̭ hai॒vāsya॒ tatra̭ pā॒pmāna॒ndyataḥ̭ || 23 ||

vṛ॒ścata̭śca || saiṣā mī̭mā॒gṃ॒sā-'gni̭ho॒tra e॒va sa̭pannnā | atho̭ āhuḥ |
sarvḙṣu yajñakra॒tuṣviti̭ ||
hoṣya̭nna॒pa upa̭spṛśet |
vidyṷdasi॒ vidya̭me pā॒pmāna॒miti̭ |
atha̭ hu॒tvopa̭spṛśet |
vṛṣṭi̭rasi॒ vṛśca̭ me pā॒pmāna॒miti̭ |
ya॒kṣyamā̭ṇo ve॒ṣṭvā vā᳚ | vi ca̭ hai॒vāsyai॒te de॒vatḙ pā॒pmāna॒-ndyataḥ̭ || 24 ||

vṛ॒ścata̭śca || a॒tya॒gṃ॒ho hārṷṇiḥ | bra॒hma॒cā॒riṇe᳚ pra॒śnā-nprocya॒ praji̭ghāya |
parḙhi | pla॒kṣa-ndaiyāṃ᳚ (daiyyāṃ᳚) pāti-mpṛccha | vettha̭ sāvi॒trāṃ(3) na ve॒tthā(3) iti̭ |
tamā॒gatya̭ papraccha | ā॒cāryo̭ mā॒ prāhai̭ṣīt |
vettha̭ sāvi॒trāṃ(3) na ve॒tthā(3) iti̭ | saho̭vāca॒ vedeti̭ || 25 ||

sa kasmi॒-nprati̭ṣṭhita॒ iti̭ | pa॒rora̭ja॒sīti̭ |
kastadya-tpa॒rora̭jā॒ iti̭ | e॒ṣa vāva sa pa॒rora̭jā॒ iti̭ hovāca | ya e॒ṣa tapa̭ti |
e॒ṣo᳚ 'rvāgra̭jā॒ iti̭ | sa kasmi̭-ntve॒ṣa iti̭ | sa॒tya iti̭ | ki-ntathsa॒tyamiti̭ | tapa॒ iti̭ || 26 ||

kasmi॒nnu tapa॒ iti̭ | bala॒ iti̭ |
ki-nta-dba॒lamiti̭ | prā॒ṇa iti̭ |
māsma̭ prā॒ṇamati̭ pṛccha॒ iti̭ mā-''cā॒ryo᳚ 'bravī॒diti̭ hovāca brahmacā॒rī ||
saho̭vāca pla॒kṣo daiyāṃ᳚ (daiyyāṃ᳚) pātiḥ |
yadvai bra̭hmacāri-nprā॒ṇamatya̭prakṣyaḥ | mū॒drdhā te॒ vyapa̭tiṣyat |
a॒hamṷta ācā॒ryā-cchreyā᳚-nbhaviṣyāmi |
yo mā̭ sāvi॒tre sa॒mavā̭di॒ṣṭeti̭ || 27 ||

tasmā᳚-thsāvi॒tre na saṃ​va~̭deta ||
sa yo ha॒vai sā̭vi॒traṃ-vi~॒duṣā̭ sāvi॒tre saṃ॒​va~da̭te | sahā᳚smi॒-ñchriya̭-ndadhāti |
anṷ ha॒vā a̭smā a॒sau tapa॒ñchriya̭-mmanyate |
anva̭smai॒ śrīstapo̭ manyate | anva̭smai॒ tapo॒ bala̭-mmanyate | anva̭smai॒ bala̭-mprā॒ṇa-mma̭nyate || sa yadāha̭ |
sa॒jñānnaṃ̭-vi~॒jñāna॒-ndar​śā̭ dṛ॒ṣṭeti̭ | e॒ṣa e॒va tat || 28 ||

atha॒ yadāha̭ | prastṷtaṃ॒-vi~ṣṭṷtagṃ su॒tā sṷnva॒tīti̭ | e॒ṣa e॒va tat || e॒ṣa hyḙva tānyahā̭ni | e॒ṣa rātra̭yaḥ || atha॒ yadāha̭ |
ci॒traḥ ke॒tu rdā॒tā pra̭dā॒tā sa̭vi॒tā pra̭savi॒tā 'bhi̭śā॒stā 'nṷma॒nteti̭ | e॒ṣa e॒va tat | e॒ṣa hyḙva te-'hno̭ muhū॒rtāḥ | e॒ṣa rātreḥ᳚ || 29 ||

atha॒ yadāha̭ | pa॒vitra̭-mpavayi॒ṣyan-thsaha̭svā॒n-thsahī̭yānaru॒ṇo̭
-'ru॒ṇara̭jā॒ iti̭ | e॒ṣa e॒va tat | e॒ṣa hyḙva te᳚ 'drdhamā॒sāḥ | e॒ṣa māsāḥ᳚ || atha॒ yadāha̭ |
a॒gni॒ṣṭo॒ma u॒kthyo᳚-'gnir-ṛ॒tuḥ pra॒jāpa̭ti-ssaṃ​va~thsa॒ra iti̭ | e॒ṣa e॒va tat | e॒ṣa hyḙva te ya̭jñakra॒tavaḥ̭ | e॒ṣa ṛ॒tavaḥ̭ || 30 ||

e॒ṣa saṃ̭​va~thsa॒raḥ || atha॒ yadāha̭ | i॒dānī᳚-nta॒dānī॒miti̭ | e॒ṣa e॒va tat | e॒ṣa hyḙva te mṷhū॒rtānā᳚-mmuhū॒rtāḥ || ja॒na॒ko ha॒ vai dḙhaḥ | a॒ho॒rā॒trai-ssa॒māja̭gāma | tagṃ ho̭cuḥ | yo vā a॒smān. veda̭ | vi॒jaha̭t-pā॒pmāna̭meti || 31 ||

sarva॒-māyṷreti | a॒bhi sva॒rgaṃ-lo~॒ka-ñja̭yati |
nāsyā॒-muṣmi̭n ~lo॒ke-'nna̭-ṅkṣīyata॒ iti̭ || vi॒jaha̭ddha॒ vai pā॒pmāna̭meti |
sarva॒māyṷreti | a॒bhi sva॒rgaṃ-lo~॒ka-ñja̭yati |
nāsyā॒-muṣmi̭n ~lo॒ke 'nna̭-ṅkṣīyate |
ya e॒vaṃ-ve~da̭ || ahī̭nā॒ hāśva̭tthyaḥ | sā॒vi॒traṃ-vi~॒dā-ñca̭kāra || 32 ||

sa ha̭ ha॒gṃ॒so hi̭ra॒ṇmayo̭ bhū॒tvā | sva॒rgaṃ-lo~॒kami̭yāya | ā॒di॒tyasya॒ sāyṷjyam || ha॒gṃ॒so ha॒vai hi̭ra॒ṇmayo̭ bhū॒tvā |
sva॒rgaṃ-lo~॒kamḙti | ā॒di॒tyasya॒ sāyṷjyam | ya e॒vaṃ-ve~da̭ || de॒va॒bhā॒go ha̭ śrauta॒r॒ṣaḥ | sā॒vi॒traṃ-vi~॒dā-ñca̭kāra |
tagṃ ha॒ vāgadṛ̭śyamā॒nā 'bhyṷvāca || 33 ||

sarva̭mbata gauta॒mo vḙda | ya-ssā̭vi॒traṃ-ve~deti̭ | sa ho̭vāca | kaiṣā vāga॒sīti̭ | a॒yama॒hagṃ sā̭vi॒traḥ | de॒vānā̭-mutta॒mo lo॒kaḥ | guhya॒-mmaho॒ bibhra॒diti̭ | e॒tāva̭ti ha gauta॒maḥ |
ya॒jño॒pa॒vī॒ta-ṅkṛ॒tvā-'dho nipa̭pāta |
namo॒ nama॒ iti̭ || 34 ||

sa ho̭vāca | mā bhai̭ṣī rgautama | ji॒to vai tḙ lo॒ka iti̭ || tasmā॒dye ke ca̭ sāvi॒traṃ-vi~॒duḥ | sarve॒ te ji॒talo̭kāḥ || sa yo ha॒vai sā̭vi॒tra-syā॒ṣṭākṣa̭ra-mpa॒dagg​ śri॒yā 'bhiṣi̭ktaṃ॒-ve~da̭ | śri॒yā hai॒vābhiṣi̭cyate | ghṛṇi॒riti॒ dve a॒kṣare᳚ | sūrya॒ iti॒ trīṇi̭ | ā॒di॒tya iti॒ trīṇi̭ || 35 ||

e॒tadvai sā̭vi॒tra-syā॒ṣṭākṣa̭ra-mpa॒dagg​ śri॒yābhiṣi̭ktam | ya e॒vaṃ-ve~da̭ |
śri॒yā hai॒vābhiṣi̭cyate || tade॒-tadṛ॒cā-'bhyṷktam | ṛ॒co a॒kṣarḙ para॒me vyo̭mann |
yasmi̭-nde॒vā adhi॒ viśvḙ niṣe॒duḥ |
yastanna veda॒ kimṛ॒cā ka̭riṣyati | ya i-ttadvi॒dusta i॒me samā̭sata॒ iti̭ || na ha॒vā e॒tasya॒rcā na yajṷṣā॒ na sāmnā-'rtho᳚-'sti |
ya-ssā̭vi॒traṃ-ve~da̭ || 36 ||

tade॒ta-tpa̭ri॒ yaddḙvaca॒kram |
ā॒rdra-mpinva̭mānagg​ sva॒rge lo॒ka ḙti |
vi॒jaha॒-dviśvā̭ bhū॒tāni̭ sa॒paṃśya̭t ||
ā॒rdro ha॒ vai pinva̭māna-ssva॒rge lo॒ka ḙti |
vi॒jaha॒n viśvā̭ bhū॒tāni̭ sa॒paṃśyanṋ | ya e॒vaṃ-ve~da̭ || śū॒ṣo ha॒vai vā᳚r​ṣṇe॒yaḥ | ā॒di॒tyena̭ sa॒māja̭gāma | tagṃ ho̭vāca |
ehi̭ sāvi॒traṃ-vi~̭ddhi | a॒yaṃ-vai~ sva॒rgyo᳚-'gniḥ pā̭rayi॒ṣṇu-ra॒mṛtā॒-thsambhṷ̄ta॒ iti̭ | e॒ṣa vāva sa sā̭vi॒traḥ |
ya e॒ṣa tapa̭ti | ehi॒ māṃ-vi~̭ddhi | iti̭ hai॒vaina॒-ntadṷvāca || 37 ||

(dyato॒ - dyato॒ - vedeti॒ - tapa॒ iti̭ - sa॒mavā̭di॒ṣṭeti॒ - ta-d- rātrer̭. - ṛ॒tavaḥ̭ - eti - cakāro - vāca॒ - nama॒ ityā̭ - di॒tya iti॒ trīṇi̭ - sāvi॒traṃ-ve~da̭ - viddhi॒ pañca̭ ca) (a. 9)
(pra॒jāpa̭tirde॒vān sa॒jñānna॒-mprastṷta॒-ntānyahā᳚nye॒ṣa rātra̭yāsci॒tra ke॒tuste-'hno̭ muhū॒rto rātreḥ᳚ pa॒vitra॒-nte᳚-'rdha mā॒sā a̭gniṣṭo॒mo ya̭jñakra॒tava̭ i॒dānī᳚-mmuhū॒rtānā᳚-ñjana॒ko-'hī̭nā devabhā॒gaḥ kaiṣā vāmma śū॒ṣo ha॒ vai ṣoḍa̭śa)
anuvākaṃ 10 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
i॒yaṃ-vā~va sa॒raghā᳚ | tasyā̭ a॒gnire॒va sā̭ra॒gha-mmadhṷ | yā e॒tāḥ pū᳚rvapakṣā-parapa॒kṣayo॒ rātra̭yaḥ | tā ma̭dhu॒kṛtaḥ̭ |
yānyahā̭ni | te ma̭dhuvṛ॒ṣāḥ |
sa yo ha॒ vā e॒tā ma̭dhu॒kṛta̭śca madhuvṛ॒ṣāg​śca॒ veda̭ |
ku॒rvanti̭ hāsyai॒tā a॒gnau madhṷ | nāsye᳚ṣṭāpū॒rta-ndha̭yanti ||
atha॒ yo na veda̭ || 38 ||

na hā᳚syai॒tā a॒gnau madhṷ kurvanti | dhaya̭ntyasyeṣṭāpū॒rtam ||
yo ha॒ vā a̭horā॒trāṇā᳚-nnāma॒dheyā̭ni॒ veda̭ |
nāho̭rā॒treṣvā-rti॒mārccha̭ti | sa॒jñānnaṃ̭-vi~॒jñāna॒-ndar​śā̭ dṛ॒ṣṭeti̭ |
e॒tā-va̭nuvā॒kau pū᳚rvapa॒kṣasyā̭-horā॒trāṇā᳚-nnāma॒dheyā̭ni | prastṷtaṃ॒-vi~ṣṭṷtagṃ su॒tā sṷnva॒tīti̭ | e॒tāva̭nu-vā॒kāva̭-parapa॒kṣasyā̭-horā॒trāṇā᳚-nnāma॒dheyā̭ni |
nāho̭rā॒treṣvā-rti॒mārccha̭ti | ya e॒vaṃ-ve~da̭ || 39 ||

yo ha॒ vai mṷhū॒rtānā᳚-nnāma॒dheyā̭ni॒ veda̭ | na mṷhū॒rteṣvā-rti॒mārccha̭ti | ci॒traḥ ke॒tu rdā॒tā pra̭dā॒tā sa̭vi॒tā pra̭savi॒tā 'bhi̭śā॒stā 'nṷma॒nteti̭ | e॒tḙ-'nuvā॒kā mṷhū॒rtānā᳚-nnāma॒dheyā̭ni | na mṷhū॒rteṣvā-rti॒mārccha̭ti | ya e॒vaṃ-ve~da̭ || yo ha॒ vā a̭drdhamā॒sā-nā᳚ñca॒ māsā̭nāñca nāma॒dheyā̭ni॒ veda̭ |
nādrdha̭mā॒seṣu॒ na māse॒ṣvā-rti॒mārccha̭ti |
pa॒vitra̭-mpavayi॒ṣyan-thsaha̭svā॒n-thsahī̭yānaru॒ṇo̭ 'ru॒ṇara̭jā॒ iti̭ |
e॒tḙ-'nuvā॒kā a̭drdhamā॒sānā᳚ñca॒ māsā̭nāñca nāma॒dheyā̭ni || 40 ||

nādrdha̭ma॒seṣu॒ na māse॒ṣvā-rti॒mārccha̭ti | ya e॒vaṃ-ve~da̭ ||
yo ha॒ vai ya̭jñakratū॒nā-ñca̭rtū॒nā-ñca̭ saṃ​va~thsa॒rasya̭ ca nāma॒dheyā̭ni॒ veda̭ |
na ya̭jñakra॒tuṣu॒ nartuṣu॒ na saṃ̭​va~thsa॒ra ārti॒mārccha̭ti | a॒gni॒ṣṭo॒ma u॒kthyo᳚-'gnir-ṛ॒tuḥ pra॒jāpa̭ti-ssaṃ​va~thsa॒ra iti̭ |
e॒tḙ 'nuvā॒kā ya̭jñakratū॒nā-ñca̭rtū॒nā-ñca̭ saṃ​va~thsa॒rasya̭ ca nāma॒dheyā̭ni |
na ya̭jñakra॒tuṣu॒ nartuṣu॒ na saṃ̭​va~thsa॒ra ārti॒mārccha̭ti | ya e॒vaṃ-ve~da̭ ||
yo ha॒ vai mṷhū॒rtānā᳚-mmuhū॒rtān. veda̭ |
na mṷhū॒rtānā᳚-mmuhū॒rteṣvārti॒ mārccha̭ti || 41 ||

i॒dānī᳚-nta॒dānī॒miti̭ | e॒te vai mṷhū॒rtānā᳚-mmuhū॒rtāḥ | na mṷhū॒rtānā᳚-mmuhū॒rteṣvārti॒-mārccha̭ti | ya e॒vaṃ-ve~da̭ ||
atho॒ yathā᳚ kṣetra॒jño bhū॒tvā 'nṷ pra॒viśyānna॒-matti̭ | e॒vame॒vaitān kṣe᳚tra॒jño bhū॒tvā 'nṷ pra॒viśyā-nna̭matti | sa e॒teṣā̭me॒va sa̭lo॒katā॒gṃ॒ sāyṷjya-maśnute |
apa̭ punarmṛ॒tyu-ñja̭yati | ya e॒vaṃ-ve~da̭ || 42 ||

(na vedai॒ - vaṃ-ve~dā̭ - nuvā॒kā a̭drdhamā॒sānā᳚-ñca॒ masā̭nā-ñca nāma॒dheyā̭ni - muhū॒rteṣvārti॒mārccha̭ti॒ - +nava̭ ca) (a. 10)
(i॒yama̭horā॒trāṇāgṃ̭ sa॒jñānna̭-mpūrvapa॒kṣasya॒ prastṷtamaparapa॒kṣasya̭ muhū॒rtānā᳚-ñci॒traḥ ke॒tura̭drdhamā॒sānā᳚-mpa॒vitraṃ̭-ya~jñakratū॒nāma̭gniṣṭo॒mo ya̭jñakratū॒nāmi॒dānī᳚-mmuhū॒rtānā᳚-mmuhū॒rtān. ve॒dedānī॒matho॒ dvāda̭śa)
anuvākaṃ 11 - anuvākeṣu navasu lekhāsu nābhyā-ñceṣṭakopadhānaṃ svayamātṛṇṇopadhāna-ñcocyate
kaści̭ddha॒vā a॒smā-llo॒kā-tpretya̭ | ā॒tmānaṃ̭-ve~da | a॒ya-ma॒ha-ma॒smīti̭ | kaści॒thsvaṃ-lo~॒ka-nna prati॒ prajā̭nāti || a॒gnimṷgdho hai॒va dhu॒matā᳚ntaḥ | svaṃ-lo~॒ka-nna prati॒ prajā̭nāti |
atha॒ yo hai॒vaita-ma॒gnigṃ sā̭vi॒traṃ-ve~da̭ |
sa e॒vāsmā llo॒kā-tpretya̭ | ā॒tmānaṃ̭-ve~da |
a॒ya-ma॒ha-ma॒smīti̭ || 43 ||

sa svaṃ-lo~॒ka-mprati॒ prajā̭nāti || e॒ṣa ṷ ve॒vaina॒-ntathsā̭vi॒traḥ | sva॒rgaṃ-lo~॒ka-ma॒bhiva̭hati || a॒ho॒rā॒trai rvā idagṃ sa॒yugbhiḥ̭ kriyate | i॒ti॒ rā॒trāyā̭ dīkṣiṣata | i॒ti॒ rā॒trāya̭ vra॒ta-mupā̭gu॒riti̭ | tāni॒ hānḙvaṃ-vi~॒duṣaḥ̭ | a॒muṣmi̭n ~lo॒ke śḙva॒dhi-ndha̭yanti |
dhī॒tagṃ hai॒va sa śḙva॒dhi-manu॒parai̭ti ||
atha॒ yo hai॒vaitama॒gnigṃ sā̭vi॒traṃ-ve~da̭ || 44 ||

tasya̭ hai॒vā-ho̭rā॒trāṇi̭ | a॒muṣmi̭n ~lo॒ke śḙva॒dhi-nna dha̭yanti |
adhī̭tagṃ hai॒va sa śḙva॒dhi-manu॒parai̭ti ||
bha॒radvā̭jo ha tri॒bhirāyṷrbhi rbrahma॒carya̭muvāsa |
tagṃ ha॒ jīrṇi॒gg॒ sthavi̭ra॒gṃ॒ śayā̭nam |
indra̭ upa॒vrajyo̭ vāca | bhara̭dvāja | yattḙ catu॒rthamāyṷrda॒dyām | kimḙnena kuryā॒ iti̭ | bra॒hma॒carya̭me॒vainḙna careya॒miti̭ hovāca || 45 ||

tagṃ ha॒ trī-ngi॒ri-rṷ̄pā॒na vi̭jñātāniva dar​śa॒yā-ñca̭kāra | teṣā॒gṃ॒ haikai̭kasmā-nmu॒ṣṭinā-''da̭de | sa ho̭vāca |
bhara̭dvā॒jetyā॒mantrya̭ | vedā॒ vā e॒te | a॒na॒ntā vai vedāḥ᳚ | e॒tadvā e॒tai stri॒bhi-rāyṷrbhi॒-ranva̭vocathāḥ | atha̭ ta॒ ita̭ra॒-dana̭nūktame॒va | ehī॒maṃ-vi~̭ddhi | a॒yaṃ-vai~ sa̭rva vi॒dyeti̭ || 46 ||

tasmai̭ hai॒tama॒gnigṃ sā̭vi॒tramṷvāca | tagṃ sa vi̭di॒tvā | a॒mṛto̭ bhū॒tvā | sva॒rgaṃ-lo~॒kami̭yāya | ā॒di॒tyasya॒ sāyṷjyam ||
a॒mṛto̭ hai॒va bhū॒tvā | sva॒rgaṃ-lo~॒kamḙti | ā॒di॒tyasya॒ sāyṷjyam | ya e॒vaṃ-ve~da̭ || e॒ṣo e॒va trayī̭ vi॒dyā || 47 ||

yāva̭ntagṃ ha॒ vai tra॒yyā vi॒dyayā̭ lo॒ka-ñja̭yati | tāva̭ntaṃ-lo~॒ka-ñja̭yati | ya e॒vaṃ-ve~da̭ || a॒gne rvā e॒tāni̭ nāma॒dheyā̭ni |
a॒gnere॒va sāyṷjyagṃ salo॒katā̭-māpnoti |
ya e॒vaṃ-ve~da̭ | vā॒yo rvā e॒tāni̭ nāma॒dheyā̭ni | vā॒yore॒va sāyṷjyagṃ salo॒katā̭-māpnoti | ya e॒vaṃ-ve~da̭ | indra̭sya॒ vā e॒tāni̭ nāma॒dheyā̭ni || 48 ||

indra̭syai॒va sāyṷjyagṃ salo॒katā̭-māpnoti | ya e॒vaṃ-ve~da̭ |
bṛha॒spate॒ rvā e॒tāni̭ nāma॒dheyā̭ni |
bṛha॒spatḙre॒va sāyṷjyagṃ salo॒katā̭-māpnoti |
ya e॒vaṃ-ve~da̭ | pra॒jāpa̭te॒ rvā e॒tāni̭ nāma॒dheyā̭ni | pra॒jāpa̭tere॒va sāyṷjyagṃ salo॒katā̭-māpnoti | ya e॒vaṃ-ve~da̭ |
brahma̭ṇo॒ vā e॒tāni̭ nāma॒dheyā̭ni |
brahma̭ṇa e॒va sāyṷjyagṃ salo॒katā̭-māpnoti |
ya e॒vaṃ-ve~da̭ || sa vā e॒ṣo᳚-'gni-ra̭pakṣapu॒ccho vā॒yure॒va |
tasyā॒gni rmukha᳚m | a॒sāvā̭di॒tya-śśiraḥ̭ |
sa yade॒te de॒vate॒ anta̭reṇa |
tathsarvagṃ̭ sīvyati | tasmā᳚-thsāvi॒traḥ || 49 ||
(a॒yama॒hama॒smīti॒ - veda̭ - hovāca - sarvavi॒dyeti̭ - vi॒dye - ndra̭sya॒ vā e॒tāni̭ nāma॒dheyā̭ni॒ - brahma̭ṇa e॒va sāyṷjyagṃ salo॒katā̭māpnoti sa॒pta ca̭) | (a. 11)
(a॒gnervā॒yorindra̭sya॒ bṛha॒spateḥ᳚ pra॒jāpa̭te॒-rbrahma̭ṇa॒-ssa vai sa॒pta)
(sa॒ñjñānaṃ॒ - bhū - stvame॒va - saṃ̭​va~thsa॒ro̭-'si॒ - bhū - rājñya - sa̭va-vipa॒ścite᳚ - pra॒jāpa̭ti-rde॒vā - ni॒yaṃ-vā~va sa॒raghā॒ - kaści॒ddhaikā̭daśa)
(sa॒ñjñāna॒gṃ॒ - rājñī̭ - mū॒drdhā hṛda̭ya - e॒ṣa saṃ̭​va~thsa॒ro - nādrdha̭mā॒seṣu॒ nava̭catvārigṃśat)
(sa॒ñjñānagṃ̭ - sāvi॒traḥ)
|| hariḥ̭ om ||