3.10 - ಸಾವಿತ್ರಚಯನಮ್ - ಕೃಷ್ಣ ಯಜುರ್ವೇದ ತೈತ್ತಿರೀಯ ಬ್ರಾಹ್ಮಣ ಕಾಠ ಪ್ರಶ್ನಃ ಪಾಠಃ - ಸಞ್ಜ್ಞಾನಂ ವಿಜ್ಞಾನಂ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಕಾಠಕೇ ಪ್ರಥಮಃ ಪ್ರಶ್ನಃ - ಸಾವಿತ್ರಚಯನಮ್
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ಅನುವಾಕಂ 1 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಸಞ್ಜ್ಞಾನಂ-ವಿಁಜ್ಞಾನ-ಮ್ಪ್ರಜ್ಞಾನ-ಞ್ಜಾನದಭಿಜಾನತ್ । ಸಕಂಲ್ಪಁಮಾನ-ಮ್ಪ್ರಕಲ್ಪಮಾನ-ಮುಪಕಲ್ಪಮಾನ-ಮುಪಕ್ಲೃಪ್ತ-ಙ್ಕ್ಲೃಪ್ತಮ್ ।
ಶ್ರೇಯೋ ವಸೀಯ ಆಯಥ್ಸಮ್ಭೂತ-ಮ್ಭೂತಮ್ ॥
ಚಿತ್ರಃ ಕೇತುಃ ಪ್ರಭಾನಾಭಾನ್-ಥ್ಸಭಾನ್ನ್ ।
ಜ್ಯೋತಿಷ್ಮಾಗ್-ಸ್ತೇಜಸ್ವಾನಾತಪಗ್ಗ್-ಸ್ತಪನ್ನಭಿತಪನ್ನ್ ।
ರೋಚನೋ ರೋಚಮಾನಃ-ಶೋಭನಃ-ಶೋಭಮಾನಃ ಕಲ್ಯಾಣಃ ॥ ದರ್ಶಾ ದೃಷ್ಟಾ ದರ್ಶತಾ ವಿಶ್ವರೂಪಾ ಸುದರ್ಶನಾ । ಆಪ್ಯಾಯಮಾನಾ ಪ್ಯಾಯಮಾನಾ-ಪ್ಯಾಯಾ ಸೂನೃತೇರಾ ।
ಆಪೂರ್ಯಮಾಣಾ ಪೂರ್ಯಮಾಣಾ ಪೂರಯನ್ತೀ ಪೂರ್ಣಾ ಪೌರ್ಣಮಾಸೀ ॥ ದಾತಾ ಪ್ರದಾತಾ-ಽಽನನ್ದೋ ಮೋದಃ ಪ್ರಮೋದಃ ॥ 1 ॥

ಆವೇಶಯ-ನ್ನಿವೇಶಯನ್ಥ್ಸಂವೇಁಶನ-ಸ್ಸಗ್ಗ್ಶಾನ್ತ-ಶ್ಶಾನ್ತಃ । ಆಭವ-ನ್ಪ್ರಭವನ್-ಥ್ಸಭಂವಁನ್-ಥ್ಸಮ್ಭೂತೋ ಭೂತಃ ॥
ಪ್ರಸ್ತುತಂ-ವಿಁಷ್ಟುತಗ್ಂ ಸಗ್ಗ್ಸ್ತುತ-ಙ್ಕಲ್ಯಾಣಂ-ವಿಁಶ್ವರೂಪಮ್ । ಶುಕ್ರಮಮೃತ-ನ್ತೇಜಸ್ವಿ ತೇಜ-ಸ್ಸಮಿದ್ಧಮ್ । ಅರುಣ-ಮ್ಭಾನುಮ-ನ್ಮರೀಚಿಮದಭಿತಪ-ತ್ತಪಸ್ವತ್ ॥ ಸವಿತಾ ಪ್ರಸವಿತಾ ದೀಪ್ತೋ ದೀಪಯ-ನ್ದೀಪ್ಯಮಾನಃ । ಜ್ವಲ-ಞ್ಜ್ವಲಿತಾ ತಪನ್ ವಿತಪನ್-ಥ್ಸನ್ತಪನ್ನ್ । ರೋಚನೋ ರೋಚಮಾನ-ಶ್ಶುಭೂಂ-ಶ್ಶುಮ್ಭಮಾನೋ ವಾಮಃ ॥
ಸುತಾ ಸುನ್ವತೀ ಪ್ರಸುತಾ ಸೂಯಮಾನಾ ಽಭಿಷೂಯಮಾಣಾ । ಪೀತೀ ಪ್ರಪಾ ಸಪಾ-ನ್ತೃಪ್ತಿ-ಸ್ತರ್ಪಯನ್ತೀ ॥ 2 ॥

ಕಾನ್ತಾ ಕಾಮ್ಯಾ ಕಾಮಜಾತಾ ಽಽಯುಷ್ಮತೀ ಕಾಮದುಘಾ ॥ ಅಭಿಶಾಸ್ತಾ ಽನುಮನ್ತಾ-ಽಽನನ್ದೋ ಮೋದಃ ಪ್ರಮೋದಃ । ಆಸಾದಯ-ನ್ನಿಷಾದಯನ್-ಥ್ಸಗ್ಂಸಾದನ-ಸ್ಸಗ್ಂಸನ್ನ-ಸ್ಸನ್ನಃ ।
ಆಭೂ ರ್ವಿಭೂಃ ಪ್ರಭೂ-ಶ್ಶಭೂಂ ರ್ಭುವಃ ॥
ಪವಿತ್ರ-ಮ್ಪವಯಿಷ್ಯ-ನ್ಪೂತೋ ಮೇದ್ಧ್ಯಃ ।
ಯಶೋ ಯಶಸ್ವಾ-ನಾಯುರಮೃತಃ । ಜೀವೋ ಜೀವಿಷ್ಯ-ನ್ಥ್ಸ್ವರ್ಗೋ ಲೋಕಃ ॥ ಸಹಸ್ವಾ-ನ್ಥ್ಸಹೀಯಾ-ನೋಜಸ್ವಾ-ನ್ಥ್ಸಹಮಾನಃ । ಜಯನ್ನ-ಭಿಜಯನ್-ಥ್ಸುದ್ರವಿಣೋ ದ್ರವಿಣೋದಾಃ । ಆರ್ದ್ರಪವಿತ್ರೋ ಹರಿಕೇಶೋ ಮೋದಃ ಪ್ರಮೋದಃ ॥ 3 ॥

ಅರುಣೋ ಽರುಣರಜಾಃ ಪುಣ್ಡರೀಕೋ ವಿಶ್ವಜಿದ-ಭಿಜಿತ್ । ಆರ್ದ್ರಃ ಪಿನ್ವಮಾನೋ ಽನ್ನವಾನ್-ರಸವಾ-ನಿರಾವಾನ್ ।
ಸರ್ವೌಷಧ-ಸ್ಸಭಂರೋ ಮಹಸ್ವಾನ್ ॥ ಏಜತ್ಕಾ ಜೋವತ್ಕಾಃ । ಕ್ಷುಲ್ಲಕಾ-ಶ್ಶಿಪಿವಿಷ್ಟಕಾಃ ।
ಸರಿಸ್ತ್ರರಾ-ಸ್ಸುಶೇರವಃ । ಅಜಿರಾಸೋ ಗಮಿಷ್ಣವಃ ॥ ಇದಾನೀ-ನ್ತದಾನೀ-ಮೇತರ್ಹಿ ಕ್ಷಿಪ್ರಮಜಿರಮ್ । ಆಶು ರ್ನಿಮೇಷಃ ಫಣೋ ದ್ರವನ್ನತಿ-ದ್ರವನ್ನ್ । ತ್ವರಗ್ಗ್ ಸ್ತ್ವರಮಾಣ ಆಶುರಾಶೀಯಾಞ್ಜವಃ {ಆಶುರಾಶೀಯಾನ್ ಜವಃ} ॥
ಅಗ್ನಿಷ್ಟೋಮ ಉಕ್ಥ್ಯೋ ಽತಿರಾತ್ರೋ ದ್ವಿರಾತ್ರ-ಸ್ತ್ರಿರಾತ್ರ-ಶ್ಚತೂರಾತ್ರಃ । ಅಗ್ನಿರ್-ಋತು-ಸ್ಸೂರ್ಯ ಋತುಶ್ಚನ್ದ್ರಮಾ ಋತುಃ ॥ ಪ್ರಜಾಪತಿ-ಸ್ಸಂವಁಥ್ಸರೋ ಮಹಾನ್ಕಃ ॥ 4 ॥

(ಪ್ರಮೋದ - ಸ್ತರ್ಪಯನ್ತೀ - ಪ್ರಮೋದೋ - ಜವಸ್ತ್ರೀಣಿ ಚ) (ಅ. 1)
ಅನುವಾಕಂ 2 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಭೂರಗ್ನಿ-ಞ್ಚ ಪೃಥಿವೀ-ಞ್ಚ ಮಾ-ಞ್ಚ ।
ತ್ರೀಗ್ಶ್ಚ ಲೋಕಾ-ನ್ಥ್ಸಂವಁಥ್ಸರ-ಞ್ಚ ।
ಪ್ರಜಾಪತಿಸ್ತ್ವಾ ಸಾದಯತು । ತಯಾ ದೇವತಯಾ ಽಙ್ಗಿರಸ್ವ-ದ್ಧ್ರುವಾ ಸೀದ ॥
ಭುವೋ ವಾಯು-ಞ್ಚಾನ್ತರಿಕ್ಷ-ಞ್ಚ ಮಾ-ಞ್ಚ । ತ್ರೀಗ್ಶ್ಚ ಲೋಕಾ-ನ್ಥ್ಸಂವಁಥ್ಸರ-ಞ್ಚ ।
ಪ್ರಜಾಪತಿಸ್ತ್ವಾ ಸಾದಯತು । ತಯಾ ದೇವತಯಾ-ಽ ಙ್ಗಿಂರಸ್ವ-ದ್ಧ್ರುವಾ ಸೀದ । ಸ್ವರಾದಿತ್ಯ-ಞ್ಚ ದಿವ-ಞ್ಚ ಮಾ-ಞ್ಚ । ತ್ರೀಗ್ಶ್ಚ ಲೋಕಾ-ನ್ಥ್ಸಂವಁಥ್ಸರ-ಞ್ಚ । ಪ್ರಜಾಪತಿಸ್ತ್ವಾ ಸಾದಯತು । ತಯಾ ದೇವತಯಾ ಽಙ್ಗಿಂರಸ್ವ-ದ್ಧ್ರುವಾ ಸೀದ । ಭೂರ್ಭುವ-ಸ್ಸ್ವ-ಶ್ಚನ್ದ್ರಮಸ-ಞ್ಚ ದಿಶಶ್ಚ ಮಾ-ಞ್ಚ ।
ತ್ರೀಗ್ಶ್ಚ ಲೋಕಾ-ನ್ಥ್ಸವನ್ಥ್ಸರ-ಞ್ಚ । ಪ್ರಜಾಪತಿಸ್ತ್ವಾ ಸಾದಯತು । ತಯಾ ದೇವತಯಾ ಽಙ್ಗಿರಸ್ವ-ದ್ಧ್ರುವಾ ಸೀದ ॥ 5 ॥

(ಸಂವಁಥ್ಸರ-ಞ್ಚ ಷಟ್ ಚ)(ಆ2)
ಅನುವಾಕಂ 3 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ತ್ವಮೇವ ತ್ವಾಂ-ವೇಁತ್ಥ ಯೋ-ಽಸಿ ಸೋ-ಽಸಿ । ತ್ವಮೇವ ತ್ವಾಮಚೈಷೀಃ । ಚಿತಶ್ಚಾಸಿ ಸಞ್ಚಿತ-ಶ್ಚಾಸ್ಯಗ್ನೇ । ಏತಾವಾಗ್ಶ್ಚಾಸಿ ಭೂಯಾಗ್ಶ್ಚಾಸ್ಯಗ್ನೇ ।
ಯತ್ತೇ ಅಗ್ನೇ ನ್ಯೂನಂ-ಯಁದು ತೇ-ಽತಿರಿಕ್ತಮ್ । ಆದಿತ್ಯಾ-ಸ್ತದಂಙ್ಗಿರಸ-ಶ್ಚಿನ್ವನ್ತು ।
ವಿಶ್ವೇ ತೇ ದೇವಾಶ್ಚಿತಿ-ಮಾಪೂರಯನ್ತು । ಚಿತಶ್ಚಾಸಿ ಸಞ್ಚಿತ-ಶ್ಚಾಸ್ಯಗ್ನೇ । ಏತಾವಾಗ್ಶ್ಚಾಸಿ ಭೂಯಾಗ್ಶ್ಚಾಸ್ಯಗ್ನೇ । ಮಾ ತೇ ಅಗ್ನೇ ಽಚಯೇನ ಮಾ-ಽತಿ ಚ ಯೇನಾಯುರಾವೃಕ್ಷಿ । ಸವರ್ಷಾ-ಞ್ಜ್ಯೋತಿಷಾ-ಞ್ಜ್ಯೋತಿ ರ್ಯದದಾವುದೇತಿ । ತಪಸೋ ಜಾತಮನಿ-ಭೃಷ್ಟಮೋಜಃ । ತತ್ತೇ ಜ್ಯೋತಿರಿಷ್ಟಕೇ । ತೇನ ಮೇ ತಪ । ತೇನ ಮೇ ಜ್ವಲ । ತೇನ ಮೇ ದೀದಿಹಿ ।
ಯಾವದ್ದೇವಾಃ । ಯಾವದಸಾತಿ ಸೂರ್ಯಃ । ಯಾವದುತಾಪಿ ಬ್ರಹ್ಮ ॥ 6 ॥

(ಆವೃಕ್ಷಿ ನವ ಚ) (ಅ. 3)
ಅನುವಾಕಂ 4 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಸಂವಁಥ್ಸರೋ-ಽಸಿ ಪರಿವಥ್ಸರೋ-ಽಸಿ । ಇದಾವಥ್ಸರೋ-ಽಸೀ-ದುವಥ್ಸರೋ-ಽಸಿ ।
ಇದ್ವಥ್ಸರೋ-ಽಸಿ ವಥ್ಸರೋ-ಽಸಿ । ತಸ್ಯ ತೇ ವಸನ್ತ-ಶ್ಶಿರಃ । ಗ್ರೀಷ್ಮೋ ದಕ್ಷಿಣಃ ಪಕ್ಷಃ । ವರ.ಷಾಃ ಪುಚ್ಛಮ್ । ಶರದುತ್ತರಃ ಪಕ್ಷಃ ।
ಹೇಮನ್ತೋ ಮದ್ಧ್ಯಮ್ । ಪೂರ್ವಪಕ್ಷಾಶ್ಚಿತಯಃ । ಅಪರಪಕ್ಷಾಃ ಪುರೀಷಮ್ ॥ 7 ॥

ಅಹೋರಾತ್ರಾ-ಣೀಷ್ಟಕಾಃ । ಋಷಭೋ-ಽಸಿ ಸ್ವರ್ಗೋ ಲೋಕಃ । ಯಸ್ಯಾ-ನ್ದಿಶಿ ಮಹೀಯಸೇ । ತತೋ ನೋ ಮಹ ಆವಹ । ವಾಯು ರ್ಭೂತ್ವಾ ಸರ್ವಾ ದಿಶ ಆವಾಹಿ । ಸರ್ವಾ ದಿಶೋ-ಽನು ವಿವಾಹಿ । ಸರ್ವಾ ದಿಶೋ-ಽನು ಸಂವಾಁಹಿ । ಚಿತ್ತ್ಯಾ ಚಿತಿ-ಮಾಪೃಣ । ಅಚಿತ್ತ್ಯಾ ಚಿತಿ-ಮಾಪೃಣ । ಚಿದಸಿ ಸಮುದ್ರಯೋನಿಃ ॥ 8 ॥

ಇನ್ದು ರ್ದಕ್ಷಃ ಶ್ಯೇನ ಋತಾವಾ । ಹಿರಣ್ಯಪಕ್ಷ-ಶ್ಶಕುನೋ ಭುರಣ್ಯುಃ । ಮಹಾ-ನ್ಥ್ಸಧಸ್ಥೇ ಧ್ರುವ ಆನಿಷತ್ತಃ । ನಮಸ್ತೇ ಅಸ್ತು ಮಾ ಮಾ ಹಿಗ್ಂಸೀಃ । ಏತಿ ಪ್ರೇತಿ ವೀತಿ ಸಮಿತ್ಯುದಿತಿ । ದಿವ-ಮ್ಮೇ ಯಚ್ಛ । ಅನ್ತರಿಕ್ಷ-ಮ್ಮೇ ಯಚ್ಛ । ಪೃಥಿವೀ-ಮ್ಮೇ ಯಚ್ಛ ।
ಪೃಥಿವೀ-ಮ್ಮೇ ಯಚ್ಛ । ಅನ್ತರಿಕ್ಷ-ಮ್ಮೇ ಯಚ್ಛ । ದಿವ-ಮ್ಮೇ ಯಚ್ಛ । ಅಹ್ನಾ ಪ್ರಸಾರಯ । ರಾತ್ರ್ಯಾ ಸಮಚ । ರಾತ್ರ್ಯಾ ಪ್ರಸಾರಯ । ಅಹ್ನಾ ಸಮಚ ।
ಕಾಮ-ಮ್ಪ್ರಸಾರಯ । ಕಾಮಗ್ಂ ಸಮಚ ॥ 9 ॥

(ಪುರೀಷಗ್ಂ - ಸಮುದ್ರಯೋನಿಃ - ಪೃಥಿವೀ-ಮ್ಮೇ ಯಚ್ಛಾನ್ತರಿಕ್ಷ-ಮ್ಮೇ ಯಚ್ಛ ಸಪ್ತ ಚ) (ಅ. 4)
ಅನುವಾಕಂ 5 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಭೂರ್ಭುವ-ಸ್ಸ್ವಃ । ಓಜೋ ಬಲಮ್ । ಬ್ರಹ್ಮ ಕ್ಷತ್ರಮ್ । ಯಶೋ ಮಹತ್ । ಸತ್ಯ-ನ್ತಪೋ ನಾಮ । ರೂಪ-ಮಮೃತಮ್ । ಚಕ್ಷು-ಶ್ಶ್ರೋತ್ರಮ್ । ಮನ ಆಯುಃ ।
ವಿಶ್ವಂ-ಯಁಶೋ ಮಹಃ । ಸಮ-ನ್ತಪೋ ಹರೋ ಭಾಃ । ಜಾತವೇದಾ ಯದಿ ವಾ ಪಾವಕೋ-ಽಸಿ । ವೈಶ್ವಾನರೋ ಯದಿ ವಾ ವೈದ್ಯುತೋ-ಽಸಿ । ಶ-ಮ್ಪ್ರಜಾಭ್ಯೋ ಯಜಮಾನಾಯ ಲೋಕಮ್ । ಊರ್ಜ-ಮ್ಪುಷ್ಟಿ-ನ್ದದ-ದಭ್ಯಾವವೃಥ್ಸ್ವ ॥ 10 ॥

(ಭಾಶ್ಚತ್ವಾರಿ ಚ) (ಅ. 5)
ಅನುವಾಕಂ 6 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ
ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ರಾಜ್ಞೀ ವಿರಾಜ್ಞೀ । ಸಮ್ರಾಜ್ಞೀ ಸ್ವರಾಜ್ಞೀ । ಅರ್ಚಿ-ಶ್ಶೋಚಿಃ । ತಪೋ ಹರೋ ಭಾಃ । ಅಗ್ನಿ-ರಿನ್ದ್ರೋ ಬೃಹಸ್ಪತಿಃ । ವಿಶ್ವೇ ದೇವಾ ಭುವನಸ್ಯ ಗೋಪಾಃ ।
ತೇ ಮಾ ಸರ್ವೇ ಯಶಸಾ ಸಗ್ಂಸೃಜನ್ತು ॥ 11 ॥

(ರಾಜ್ಞೀನ್ದ್ರೋ ಮಾ ಸಪ್ತ (ಅ. 6)
ಅನುವಾಕಂ 7 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಅಸವೇ ಸ್ವಾಹಾ ವಸವೇ ಸ್ವಾಹಾ । ವಿಭುವೇ ಸ್ವಾಹಾ ವಿವಸ್ವತೇ ಸ್ವಾಹಾ । ಅಭಿಭುವೇ ಸ್ವಾಹಾ-ಽಧಿಪತಯೇ ಸ್ವಾಹಾ । ದಿವಾಮ್ಪತಯೇ ಸ್ವಾಹಾ ಽಗ್ಂಹಸ್ಪತ್ಯಾಯ ಸ್ವಾಹಾ । ಚಾಕ್ಷುಷ್ಮತ್ಯಾಯ ಸ್ವಾಹಾ ಜ್ಯೋತಿಷ್ಮತ್ಯಾಯ ಸ್ವಾಹಾ । ರಾಜ್ಞೇ ಸ್ವಾಹಾ ವಿರಾಜ್ಞೇ ಸ್ವಾಹಾ । ಸಮ್ರಾಜ್ಞೇ ಸ್ವಾಹಾ ಸ್ವರಾಜ್ಞೇ ಸ್ವಾಹಾ ।
ಶೂಷಾಯ ಸ್ವಾಹಾ ಸೂರ್ಯಾಯ ಸ್ವಾಹಾ । ಚನ್ದ್ರಮಸೇ ಸ್ವಾಹಾ ಜ್ಯೋತಿಷೇ ಸ್ವಾಹಾ ।
ಸಗ್ಂಸರ್ಪಾಯ ಸ್ವಾಹಾ ಕಲ್ಯಾಣಾಯ ಸ್ವಾಹಾ ।
ಅರ್ಜುನಾಯ ಸ್ವಾಹಾ ॥ 12 ॥

(ಕಲ್ಯಾಣಾಯ ಸ್ವಾಹೈಕ-ಞ್ಚ) (ಅ. 7)
ಅನುವಾಕಂ 8 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ವಿಪಶ್ಚಿತೇ ಪವಮಾನಾಯ ಗಾಯತ । ಮಹೀ ನ ಧಾರಾ ಽತ್ಯನ್ಧೋ ಅರ್ಷತಿ । ಅಹಿರ್ಹ ಜೀರ್ಣಾಮತಿಸರ್ಪತಿ ತ್ವಚಮ್ । ಅತ್ಯೋ ನ ಕ್ರೀಡನ್ನ ಸರದ್ವೃಷಾ ಹರಿಃ ।
ಉಪಯಾಮಗೃಹೀತೋ-ಽಸಿ ಮೃತ್ಯವೇ ತ್ವಾ ಜುಷ್ಟ-ಙ್ಗೃಹ್ಣಾಮಿ । ಏಷ ತೇ ಯೋನಿರ್ಮೃತ್ಯವೇ ತ್ವಾ ॥ ಅಪ ಮೃತ್ಯು-ಮಪಕ್ಷುಧಮ್ । ಅಪೇತ-ಶ್ಶಪಥ-ಞ್ಜಹಿ ।
ಅಧಾ ನೋ ಅಗ್ನ ಆವಹ । ರಾಯಸ್ಪೋಷಗ್ಂ ಸಹಸ್ರಿಣಮ್ ॥ 13 ॥

ಯೇ ತೇ ಸಹಸ್ರಮಯುತ-ಮ್ಪಾಶಾಃ । ಮೃತ್ಯೋ ಮರ್ತ್ಯಾಯ ಹನ್ತವೇ । ತಾನ್. ಯಜ್ಞಸ್ಯ ಮಾಯಯಾ । ಸರ್ವಾನವ ಯಜಾಮಹೇ ॥ ಭಕ್ಷೋ ಽಸ್ಯಮೃತ ಭಕ್ಷಃ । ತಸ್ಯ ತೇ ಮೃತ್ಯು-ಪೀತಸ್ಯಾ-ಮೃತವತಃ ।
ಸ್ವಗಾ-ಕೃತಸ್ಯ ಮಧುಮತಃ ।
ಉಪಹೂತಸ್ಯೋ-ಪಹೂತೋ ಭಕ್ಷಯಾಮಿ ॥
ಮನ್ದ್ರಾ ಽಭಿಭೂತಿಃ ಕೇತು ರ್ಯಜ್ಞಾನಾಂ-ವಾಁಕ್ । ಅಸಾವೇಹಿ ॥ 14 ॥

ಅನ್ಧೋ ಜಾಗೃವಿಃ ಪ್ರಾಣ । ಅಸಾವೇಹಿ । ಬಧಿರ ಆಕ್ರನ್ದಯಿತ-ರಪಾನ । ಅಸಾವೇಹಿ । ಅಹಸ್ತೋಸ್ತ್ವಾ ಚಕ್ಷುಃ । ಅಸಾವೇಹಿ । ಅಪಾದಾಶೋ ಮನಃ ।
ಅಸಾವೇಹಿ । ಕವೇ ವಿಪ್ರಚಿತ್ತೇ ಶ್ರೋತ್ರ । ಅಸಾವೇಹಿ ॥ 15 ॥

ಸುಹಸ್ತ-ಸ್ಸುವಾಸಾಃ । ಶೂಷೋ ನಾಮಾಸ್ಯ-ಮೃತೋ ಮರ್ತ್ಯೇಷು । ತನ್ತ್ವಾ-ಽಹ-ನ್ತಥಾ ವೇದ । ಅಸಾವೇಹಿ । ಅಗ್ನಿರ್ಮೇ ವಾಚಿ ಶ್ರಿತಃ । ವಾಘೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ । ವಾಯುರ್ಮೇ ಪ್ರಾಣೇ ಶ್ರಿತಃ ॥ 16 ॥

ಪ್ರಾಣೋ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಸೂರ್ಯೋ ಮೇ ಚಕ್ಷುಷಿ ಶ್ರಿತಃ ।
ಚಕ್ಷುರ್ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಚನ್ದ್ರಮಾ ಮೇ ಮನಸಿ ಶ್ರಿತಃ ॥ 17 ॥

ಮನೋ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ದಿಶೋ ಮೇ ಶ್ರೋತ್ರೇ ಶ್ರಿತಾಃ । ಶ್ರೋತ್ರಗ್ಂ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ ।
ಅಮೃತ-ಮ್ಬ್ರಹ್ಮಣಿ । ಆಪೋ ಮೇ ರೇತಸಿ ಶ್ರಿತಾಃ ॥ 18 ॥

ರೇತೋ ಹೃದಯೇ । ಹೃದಯ-ಮ್ಮಯಿ ।
ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಪೃಥಿವೀ ಮೇ ಶರೀರೇ ಶ್ರಿತಾ ।
ಶರೀರಗ್ಂ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ । ಓಷಧಿವನಸ್ಪತಯೋ ಮೇ ಲೋಮಸು ಶ್ರಿತಾಃ ॥ 19 ॥

ಲೋಮಾನಿ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಇನ್ದ್ರೋ ಮೇ ಬಲೇ ಶ್ರಿತಃ । ಬಲಗ್ಂ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ ।
ಅಮೃತ-ಮ್ಬ್ರಹ್ಮಣಿ । ಪರ್ಜನ್ಯೋ ಮೇ ಮೂರ್ಧ್ನಿ ಶ್ರಿತಃ ॥ 20 ॥

ಮೂದ್ರ್ಧಾ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಈಶಾನೋ ಮೇ ಮನ್ಯೌ ಶ್ರಿತಃ । ಮನ್ಯುರ್-ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ ।
ಅಮೃತ-ಮ್ಬ್ರಹ್ಮಣಿ ।
ಆತ್ಮಾ ಮ ಆತ್ಮನಿ ಶ್ರಿತಃ( ) ॥ 21 ॥

ಆತ್ಮಾ ಹೃದಯೇ । ಹೃದಯ-ಮ್ಮಯಿ । ಅಹಮಮೃತೇ । ಅಮೃತ-ಮ್ಬ್ರಹ್ಮಣಿ ।
ಪುನರ್ಮ ಆತ್ಮಾ ಪುನರಾಯುರಾಗಾತ್ । ಪುನಃ ಪ್ರಾಣಃ ಪುನರಾಕೂತ-ಮಾಗಾತ್ ।
ವೈಶ್ವಾನರೋ ರಶ್ಮಿಭಿ ರ್ವಾವೃಧಾನಃ । ಅನ್ತಸ್ತಿಷ್ಠತ್ವಮೃತಸ್ಯ ಗೋಪಾಃ ॥ 22 ॥

(ಸಹಸ್ರಿಣ - ಮಿಹಿ - ಶ್ರೋತ್ರಾಸಾವೇಹಿ - ಪ್ರಾಣೇ ಶ್ರಿತೋ - ಮನಸಿ ಶ್ರಿತೋ - ರೇತಸಿ ಶ್ರಿತಾ - ಲೋಮಸು ಶ್ರಿತಾ - ಮೂರ್ಧ್ನಿ ಶ್ರಿತ - ಆತ್ಮನಿ ಶ್ರಿತೋ - +-ಽಷ್ಟೌ ಚ) (ಅ. 8)
(ಅಗ್ನಿ-ರ್ವಾಯು-ಸ್ಸೂರ್ಯ ಶ್ಚನ್ದ್ರಮಾ ದಿಶ ಆಪಃ ಪೃಥಿ ವ್ಯೋಷಧಿವನಸ್ಪತಯ ಇನ್ದ್ರಃ ಪರ್ಜನ್ಯ ಈಶಾನ ಆತ್ಮಾ ಪುನರ್ಮೇ ತ್ರಯೋದಶ)
ಅನುವಾಕಂ 9 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಪ್ರಜಾಪತಿ ರ್ದೇವಾನಸೃಜತ । ತೇ ಪಾಪ್ಮನಾ ಸನ್ದಿತಾ ಅಜಾಯನ್ತ । ತಾನ್ ವ್ಯದ್ಯತ್ । ಯ-ದ್ವ್ಯದ್ಯತ್ । ತಸ್ಮಾ-ದ್ವಿದ್ಯುತ್ । ತಮವೃಶ್ಚತ್ । ಯದವೃಶ್ಚತ್ । ತಸ್ಮಾ-ದ್ವೃಷ್ಟಿಃ । ತಸ್ಮಾ-ದ್ಯತ್ರೈತೇ ದೇವತೇ ಅಭಿಪ್ರಾಪ್ನುತಃ ।
ವಿಚ ಹೈವಾಸ್ಯ ತತ್ರ ಪಾಪ್ಮಾನನ್ದ್ಯತಃ ॥ 23 ॥

ವೃಶ್ಚತಶ್ಚ ॥ ಸೈಷಾ ಮೀಮಾಗ್ಂಸಾ-ಽಗ್ನಿಹೋತ್ರ ಏವ ಸಪನ್ನ್ನಾ । ಅಥೋ ಆಹುಃ ।
ಸರ್ವೇಷು ಯಜ್ಞಕ್ರತುಷ್ವಿತಿ ॥
ಹೋಷ್ಯನ್ನಪ ಉಪಸ್ಪೃಶೇತ್ ।
ವಿದ್ಯುದಸಿ ವಿದ್ಯಮೇ ಪಾಪ್ಮಾನಮಿತಿ ।
ಅಥ ಹುತ್ವೋಪಸ್ಪೃಶೇತ್ ।
ವೃಷ್ಟಿರಸಿ ವೃಶ್ಚ ಮೇ ಪಾಪ್ಮಾನಮಿತಿ ।
ಯಕ್ಷ್ಯಮಾಣೋ ವೇಷ್ಟ್ವಾ ವಾ । ವಿ ಚ ಹೈವಾಸ್ಯೈತೇ ದೇವತೇ ಪಾಪ್ಮಾನ-ನ್ದ್ಯತಃ ॥ 24 ॥

ವೃಶ್ಚತಶ್ಚ ॥ ಅತ್ಯಗ್ಂಹೋ ಹಾರುಣಿಃ । ಬ್ರಹ್ಮಚಾರಿಣೇ ಪ್ರಶ್ನಾ-ನ್ಪ್ರೋಚ್ಯ ಪ್ರಜಿಘಾಯ ।
ಪರೇಹಿ । ಪ್ಲಕ್ಷ-ನ್ದೈಯಾಂ (ದೈಯ್ಯಾಂ) ಪಾತಿ-ಮ್ಪೃಚ್ಛ । ವೇತ್ಥ ಸಾವಿತ್ರಾಂ(3) ನ ವೇತ್ಥಾ(3) ಇತಿ ।
ತಮಾಗತ್ಯ ಪಪ್ರಚ್ಛ । ಆಚಾರ್ಯೋ ಮಾ ಪ್ರಾಹೈಷೀತ್ ।
ವೇತ್ಥ ಸಾವಿತ್ರಾಂ(3) ನ ವೇತ್ಥಾ(3) ಇತಿ । ಸಹೋವಾಚ ವೇದೇತಿ ॥ 25 ॥

ಸ ಕಸ್ಮಿ-ನ್ಪ್ರತಿಷ್ಠಿತ ಇತಿ । ಪರೋರಜಸೀತಿ ।
ಕಸ್ತದ್ಯ-ತ್ಪರೋರಜಾ ಇತಿ । ಏಷ ವಾವ ಸ ಪರೋರಜಾ ಇತಿ ಹೋವಾಚ । ಯ ಏಷ ತಪತಿ ।
ಏಷೋ ಽರ್ವಾಗ್ರಜಾ ಇತಿ । ಸ ಕಸ್ಮಿ-ನ್ತ್ವೇಷ ಇತಿ । ಸತ್ಯ ಇತಿ । ಕಿ-ನ್ತಥ್ಸತ್ಯಮಿತಿ । ತಪ ಇತಿ ॥ 26 ॥

ಕಸ್ಮಿನ್ನು ತಪ ಇತಿ । ಬಲ ಇತಿ ।
ಕಿ-ನ್ತ-ದ್ಬಲಮಿತಿ । ಪ್ರಾಣ ಇತಿ ।
ಮಾಸ್ಮ ಪ್ರಾಣಮತಿ ಪೃಚ್ಛ ಇತಿ ಮಾ-ಽಽಚಾರ್ಯೋ ಽಬ್ರವೀದಿತಿ ಹೋವಾಚ ಬ್ರಹ್ಮಚಾರೀ ॥
ಸಹೋವಾಚ ಪ್ಲಕ್ಷೋ ದೈಯಾಂ (ದೈಯ್ಯಾಂ) ಪಾತಿಃ ।
ಯದ್ವೈ ಬ್ರಹ್ಮಚಾರಿ-ನ್ಪ್ರಾಣಮತ್ಯಪ್ರಕ್ಷ್ಯಃ । ಮೂದ್ರ್ಧಾ ತೇ ವ್ಯಪತಿಷ್ಯತ್ ।
ಅಹಮುತ ಆಚಾರ್ಯಾ-ಚ್ಛ್ರೇಯಾ-ನ್ಭವಿಷ್ಯಾಮಿ ।
ಯೋ ಮಾ ಸಾವಿತ್ರೇ ಸಮವಾದಿಷ್ಟೇತಿ ॥ 27 ॥

ತಸ್ಮಾ-ಥ್ಸಾವಿತ್ರೇ ನ ಸಂವಁದೇತ ॥
ಸ ಯೋ ಹವೈ ಸಾವಿತ್ರಂ-ವಿಁದುಷಾ ಸಾವಿತ್ರೇ ಸಂವಁದತೇ । ಸಹಾಸ್ಮಿ-ಞ್ಛ್ರಿಯ-ನ್ದಧಾತಿ ।
ಅನು ಹವಾ ಅಸ್ಮಾ ಅಸೌ ತಪಞ್ಛ್ರಿಯ-ಮ್ಮನ್ಯತೇ ।
ಅನ್ವಸ್ಮೈ ಶ್ರೀಸ್ತಪೋ ಮನ್ಯತೇ । ಅನ್ವಸ್ಮೈ ತಪೋ ಬಲ-ಮ್ಮನ್ಯತೇ । ಅನ್ವಸ್ಮೈ ಬಲ-ಮ್ಪ್ರಾಣ-ಮ್ಮನ್ಯತೇ ॥ ಸ ಯದಾಹ ।
ಸಜ್ಞಾನ್ನಂ-ವಿಁಜ್ಞಾನ-ನ್ದರ್ಶಾ ದೃಷ್ಟೇತಿ । ಏಷ ಏವ ತತ್ ॥ 28 ॥

ಅಥ ಯದಾಹ । ಪ್ರಸ್ತುತಂ-ವಿಁಷ್ಟುತಗ್ಂ ಸುತಾ ಸುನ್ವತೀತಿ । ಏಷ ಏವ ತತ್ ॥ ಏಷ ಹ್ಯೇವ ತಾನ್ಯಹಾನಿ । ಏಷ ರಾತ್ರಯಃ ॥ ಅಥ ಯದಾಹ ।
ಚಿತ್ರಃ ಕೇತು ರ್ದಾತಾ ಪ್ರದಾತಾ ಸವಿತಾ ಪ್ರಸವಿತಾ ಽಭಿಶಾಸ್ತಾ ಽನುಮನ್ತೇತಿ । ಏಷ ಏವ ತತ್ । ಏಷ ಹ್ಯೇವ ತೇ-ಽಹ್ನೋ ಮುಹೂರ್ತಾಃ । ಏಷ ರಾತ್ರೇಃ ॥ 29 ॥

ಅಥ ಯದಾಹ । ಪವಿತ್ರ-ಮ್ಪವಯಿಷ್ಯನ್-ಥ್ಸಹಸ್ವಾನ್-ಥ್ಸಹೀಯಾನರುಣೋ
-ಽರುಣರಜಾ ಇತಿ । ಏಷ ಏವ ತತ್ । ಏಷ ಹ್ಯೇವ ತೇ ಽದ್ರ್ಧಮಾಸಾಃ । ಏಷ ಮಾಸಾಃ ॥ ಅಥ ಯದಾಹ ।
ಅಗ್ನಿಷ್ಟೋಮ ಉಕ್ಥ್ಯೋ-ಽಗ್ನಿರ್-ಋತುಃ ಪ್ರಜಾಪತಿ-ಸ್ಸಂವಁಥ್ಸರ ಇತಿ । ಏಷ ಏವ ತತ್ । ಏಷ ಹ್ಯೇವ ತೇ ಯಜ್ಞಕ್ರತವಃ । ಏಷ ಋತವಃ ॥ 30 ॥

ಏಷ ಸಂವಁಥ್ಸರಃ ॥ ಅಥ ಯದಾಹ । ಇದಾನೀ-ನ್ತದಾನೀಮಿತಿ । ಏಷ ಏವ ತತ್ । ಏಷ ಹ್ಯೇವ ತೇ ಮುಹೂರ್ತಾನಾ-ಮ್ಮುಹೂರ್ತಾಃ ॥ ಜನಕೋ ಹ ವೈ ದೇಹಃ । ಅಹೋರಾತ್ರೈ-ಸ್ಸಮಾಜಗಾಮ । ತಗ್ಂ ಹೋಚುಃ । ಯೋ ವಾ ಅಸ್ಮಾನ್. ವೇದ । ವಿಜಹತ್-ಪಾಪ್ಮಾನಮೇತಿ ॥ 31 ॥

ಸರ್ವ-ಮಾಯುರೇತಿ । ಅಭಿ ಸ್ವರ್ಗಂ-ಲೋಁಕ-ಞ್ಜಯತಿ ।
ನಾಸ್ಯಾ-ಮುಷ್ಮಿನ್ ಁಲೋಕೇ-ಽನ್ನ-ಙ್ಕ್ಷೀಯತ ಇತಿ ॥ ವಿಜಹದ್ಧ ವೈ ಪಾಪ್ಮಾನಮೇತಿ ।
ಸರ್ವಮಾಯುರೇತಿ । ಅಭಿ ಸ್ವರ್ಗಂ-ಲೋಁಕ-ಞ್ಜಯತಿ ।
ನಾಸ್ಯಾ-ಮುಷ್ಮಿನ್ ಁಲೋಕೇ ಽನ್ನ-ಙ್ಕ್ಷೀಯತೇ ।
ಯ ಏವಂ-ವೇಁದ ॥ ಅಹೀನಾ ಹಾಶ್ವತ್ಥ್ಯಃ । ಸಾವಿತ್ರಂ-ವಿಁದಾ-ಞ್ಚಕಾರ ॥ 32 ॥

ಸ ಹ ಹಗ್ಂಸೋ ಹಿರಣ್ಮಯೋ ಭೂತ್ವಾ । ಸ್ವರ್ಗಂ-ಲೋಁಕಮಿಯಾಯ । ಆದಿತ್ಯಸ್ಯ ಸಾಯುಜ್ಯಮ್ ॥ ಹಗ್ಂಸೋ ಹವೈ ಹಿರಣ್ಮಯೋ ಭೂತ್ವಾ ।
ಸ್ವರ್ಗಂ-ಲೋಁಕಮೇತಿ । ಆದಿತ್ಯಸ್ಯ ಸಾಯುಜ್ಯಮ್ । ಯ ಏವಂ-ವೇಁದ ॥ ದೇವಭಾಗೋ ಹ ಶ್ರೌತರ್ಷಃ । ಸಾವಿತ್ರಂ-ವಿಁದಾ-ಞ್ಚಕಾರ ।
ತಗ್ಂ ಹ ವಾಗದೃಶ್ಯಮಾನಾ ಽಭ್ಯುವಾಚ ॥ 33 ॥

ಸರ್ವಮ್ಬತ ಗೌತಮೋ ವೇದ । ಯ-ಸ್ಸಾವಿತ್ರಂ-ವೇಁದೇತಿ । ಸ ಹೋವಾಚ । ಕೈಷಾ ವಾಗಸೀತಿ । ಅಯಮಹಗ್ಂ ಸಾವಿತ್ರಃ । ದೇವಾನಾ-ಮುತ್ತಮೋ ಲೋಕಃ । ಗುಹ್ಯ-ಮ್ಮಹೋ ಬಿಭ್ರದಿತಿ । ಏತಾವತಿ ಹ ಗೌತಮಃ ।
ಯಜ್ಞೋಪವೀತ-ಙ್ಕೃತ್ವಾ-ಽಧೋ ನಿಪಪಾತ ।
ನಮೋ ನಮ ಇತಿ ॥ 34 ॥

ಸ ಹೋವಾಚ । ಮಾ ಭೈಷೀ ರ್ಗೌತಮ । ಜಿತೋ ವೈ ತೇ ಲೋಕ ಇತಿ ॥ ತಸ್ಮಾದ್ಯೇ ಕೇ ಚ ಸಾವಿತ್ರಂ-ವಿಁದುಃ । ಸರ್ವೇ ತೇ ಜಿತಲೋಕಾಃ ॥ ಸ ಯೋ ಹವೈ ಸಾವಿತ್ರ-ಸ್ಯಾಷ್ಟಾಕ್ಷರ-ಮ್ಪದಗ್ಗ್ ಶ್ರಿಯಾ ಽಭಿಷಿಕ್ತಂ-ವೇಁದ । ಶ್ರಿಯಾ ಹೈವಾಭಿಷಿಚ್ಯತೇ । ಘೃಣಿರಿತಿ ದ್ವೇ ಅಕ್ಷರೇ । ಸೂರ್ಯ ಇತಿ ತ್ರೀಣಿ । ಆದಿತ್ಯ ಇತಿ ತ್ರೀಣಿ ॥ 35 ॥

ಏತದ್ವೈ ಸಾವಿತ್ರ-ಸ್ಯಾಷ್ಟಾಕ್ಷರ-ಮ್ಪದಗ್ಗ್ ಶ್ರಿಯಾಭಿಷಿಕ್ತಮ್ । ಯ ಏವಂ-ವೇಁದ ।
ಶ್ರಿಯಾ ಹೈವಾಭಿಷಿಚ್ಯತೇ ॥ ತದೇ-ತದೃಚಾ-ಽಭ್ಯುಕ್ತಮ್ । ಋಚೋ ಅಕ್ಷರೇ ಪರಮೇ ವ್ಯೋಮನ್ನ್ ।
ಯಸ್ಮಿ-ನ್ದೇವಾ ಅಧಿ ವಿಶ್ವೇ ನಿಷೇದುಃ ।
ಯಸ್ತನ್ನ ವೇದ ಕಿಮೃಚಾ ಕರಿಷ್ಯತಿ । ಯ ಇ-ತ್ತದ್ವಿದುಸ್ತ ಇಮೇ ಸಮಾಸತ ಇತಿ ॥ ನ ಹವಾ ಏತಸ್ಯರ್ಚಾ ನ ಯಜುಷಾ ನ ಸಾಮ್ನಾ-ಽರ್ಥೋ-ಽಸ್ತಿ ।
ಯ-ಸ್ಸಾವಿತ್ರಂ-ವೇಁದ ॥ 36 ॥

ತದೇತ-ತ್ಪರಿ ಯದ್ದೇವಚಕ್ರಮ್ ।
ಆರ್ದ್ರ-ಮ್ಪಿನ್ವಮಾನಗ್ಗ್ ಸ್ವರ್ಗೇ ಲೋಕ ಏತಿ ।
ವಿಜಹ-ದ್ವಿಶ್ವಾ ಭೂತಾನಿ ಸಪಂಶ್ಯತ್ ॥
ಆರ್ದ್ರೋ ಹ ವೈ ಪಿನ್ವಮಾನ-ಸ್ಸ್ವರ್ಗೇ ಲೋಕ ಏತಿ ।
ವಿಜಹನ್ ವಿಶ್ವಾ ಭೂತಾನಿ ಸಪಂಶ್ಯನ್ನ್ । ಯ ಏವಂ-ವೇಁದ ॥ ಶೂಷೋ ಹವೈ ವಾರ್ಷ್ಣೇಯಃ । ಆದಿತ್ಯೇನ ಸಮಾಜಗಾಮ । ತಗ್ಂ ಹೋವಾಚ ।
ಏಹಿ ಸಾವಿತ್ರಂ-ವಿಁದ್ಧಿ । ಅಯಂ-ವೈಁ ಸ್ವರ್ಗ್ಯೋ-ಽಗ್ನಿಃ ಪಾರಯಿಷ್ಣು-ರಮೃತಾ-ಥ್ಸಮ್ಭೂತ ಇತಿ । ಏಷ ವಾವ ಸ ಸಾವಿತ್ರಃ ।
ಯ ಏಷ ತಪತಿ । ಏಹಿ ಮಾಂ-ವಿಁದ್ಧಿ । ಇತಿ ಹೈವೈನ-ನ್ತದುವಾಚ ॥ 37 ॥

(ದ್ಯತೋ - ದ್ಯತೋ - ವೇದೇತಿ - ತಪ ಇತಿ - ಸಮವಾದಿಷ್ಟೇತಿ - ತ-ದ್- ರಾತ್ರೇರ್. - ಋತವಃ - ಏತಿ - ಚಕಾರೋ - ವಾಚ - ನಮ ಇತ್ಯಾ - ದಿತ್ಯ ಇತಿ ತ್ರೀಣಿ - ಸಾವಿತ್ರಂ-ವೇಁದ - ವಿದ್ಧಿ ಪಞ್ಚ ಚ) (ಅ. 9)
(ಪ್ರಜಾಪತಿರ್ದೇವಾನ್ ಸಜ್ಞಾನ್ನ-ಮ್ಪ್ರಸ್ತುತ-ನ್ತಾನ್ಯಹಾನ್ಯೇಷ ರಾತ್ರಯಾಸ್ಚಿತ್ರ ಕೇತುಸ್ತೇ-ಽಹ್ನೋ ಮುಹೂರ್ತೋ ರಾತ್ರೇಃ ಪವಿತ್ರ-ನ್ತೇ-ಽರ್ಧ ಮಾಸಾ ಅಗ್ನಿಷ್ಟೋಮೋ ಯಜ್ಞಕ್ರತವ ಇದಾನೀ-ಮ್ಮುಹೂರ್ತಾನಾ-ಞ್ಜನಕೋ-ಽಹೀನಾ ದೇವಭಾಗಃ ಕೈಷಾ ವಾಮ್ಮ ಶೂಷೋ ಹ ವೈ ಷೋಡಶ)
ಅನುವಾಕಂ 10 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಇಯಂ-ವಾಁವ ಸರಘಾ । ತಸ್ಯಾ ಅಗ್ನಿರೇವ ಸಾರಘ-ಮ್ಮಧು । ಯಾ ಏತಾಃ ಪೂರ್ವಪಕ್ಷಾ-ಪರಪಕ್ಷಯೋ ರಾತ್ರಯಃ । ತಾ ಮಧುಕೃತಃ ।
ಯಾನ್ಯಹಾನಿ । ತೇ ಮಧುವೃಷಾಃ ।
ಸ ಯೋ ಹ ವಾ ಏತಾ ಮಧುಕೃತಶ್ಚ ಮಧುವೃಷಾಗ್ಶ್ಚ ವೇದ ।
ಕುರ್ವನ್ತಿ ಹಾಸ್ಯೈತಾ ಅಗ್ನೌ ಮಧು । ನಾಸ್ಯೇಷ್ಟಾಪೂರ್ತ-ನ್ಧಯನ್ತಿ ॥
ಅಥ ಯೋ ನ ವೇದ ॥ 38 ॥

ನ ಹಾಸ್ಯೈತಾ ಅಗ್ನೌ ಮಧು ಕುರ್ವನ್ತಿ । ಧಯನ್ತ್ಯಸ್ಯೇಷ್ಟಾಪೂರ್ತಮ್ ॥
ಯೋ ಹ ವಾ ಅಹೋರಾತ್ರಾಣಾ-ನ್ನಾಮಧೇಯಾನಿ ವೇದ ।
ನಾಹೋರಾತ್ರೇಷ್ವಾ-ರ್ತಿಮಾರ್ಚ್ಛತಿ । ಸಜ್ಞಾನ್ನಂ-ವಿಁಜ್ಞಾನ-ನ್ದರ್ಶಾ ದೃಷ್ಟೇತಿ ।
ಏತಾ-ವನುವಾಕೌ ಪೂರ್ವಪಕ್ಷಸ್ಯಾ-ಹೋರಾತ್ರಾಣಾ-ನ್ನಾಮಧೇಯಾನಿ । ಪ್ರಸ್ತುತಂ-ವಿಁಷ್ಟುತಗ್ಂ ಸುತಾ ಸುನ್ವತೀತಿ । ಏತಾವನು-ವಾಕಾವ-ಪರಪಕ್ಷಸ್ಯಾ-ಹೋರಾತ್ರಾಣಾ-ನ್ನಾಮಧೇಯಾನಿ ।
ನಾಹೋರಾತ್ರೇಷ್ವಾ-ರ್ತಿಮಾರ್ಚ್ಛತಿ । ಯ ಏವಂ-ವೇಁದ ॥ 39 ॥

ಯೋ ಹ ವೈ ಮುಹೂರ್ತಾನಾ-ನ್ನಾಮಧೇಯಾನಿ ವೇದ । ನ ಮುಹೂರ್ತೇಷ್ವಾ-ರ್ತಿಮಾರ್ಚ್ಛತಿ । ಚಿತ್ರಃ ಕೇತು ರ್ದಾತಾ ಪ್ರದಾತಾ ಸವಿತಾ ಪ್ರಸವಿತಾ ಽಭಿಶಾಸ್ತಾ ಽನುಮನ್ತೇತಿ । ಏತೇ-ಽನುವಾಕಾ ಮುಹೂರ್ತಾನಾ-ನ್ನಾಮಧೇಯಾನಿ । ನ ಮುಹೂರ್ತೇಷ್ವಾ-ರ್ತಿಮಾರ್ಚ್ಛತಿ । ಯ ಏವಂ-ವೇಁದ ॥ ಯೋ ಹ ವಾ ಅದ್ರ್ಧಮಾಸಾ-ನಾಞ್ಚ ಮಾಸಾನಾಞ್ಚ ನಾಮಧೇಯಾನಿ ವೇದ ।
ನಾದ್ರ್ಧಮಾಸೇಷು ನ ಮಾಸೇಷ್ವಾ-ರ್ತಿಮಾರ್ಚ್ಛತಿ ।
ಪವಿತ್ರ-ಮ್ಪವಯಿಷ್ಯನ್-ಥ್ಸಹಸ್ವಾನ್-ಥ್ಸಹೀಯಾನರುಣೋ ಽರುಣರಜಾ ಇತಿ ।
ಏತೇ-ಽನುವಾಕಾ ಅದ್ರ್ಧಮಾಸಾನಾಞ್ಚ ಮಾಸಾನಾಞ್ಚ ನಾಮಧೇಯಾನಿ ॥ 40 ॥

ನಾದ್ರ್ಧಮಸೇಷು ನ ಮಾಸೇಷ್ವಾ-ರ್ತಿಮಾರ್ಚ್ಛತಿ । ಯ ಏವಂ-ವೇಁದ ॥
ಯೋ ಹ ವೈ ಯಜ್ಞಕ್ರತೂನಾ-ಞ್ಚರ್ತೂನಾ-ಞ್ಚ ಸಂವಁಥ್ಸರಸ್ಯ ಚ ನಾಮಧೇಯಾನಿ ವೇದ ।
ನ ಯಜ್ಞಕ್ರತುಷು ನರ್ತುಷು ನ ಸಂವಁಥ್ಸರ ಆರ್ತಿಮಾರ್ಚ್ಛತಿ । ಅಗ್ನಿಷ್ಟೋಮ ಉಕ್ಥ್ಯೋ-ಽಗ್ನಿರ್-ಋತುಃ ಪ್ರಜಾಪತಿ-ಸ್ಸಂವಁಥ್ಸರ ಇತಿ ।
ಏತೇ ಽನುವಾಕಾ ಯಜ್ಞಕ್ರತೂನಾ-ಞ್ಚರ್ತೂನಾ-ಞ್ಚ ಸಂವಁಥ್ಸರಸ್ಯ ಚ ನಾಮಧೇಯಾನಿ ।
ನ ಯಜ್ಞಕ್ರತುಷು ನರ್ತುಷು ನ ಸಂವಁಥ್ಸರ ಆರ್ತಿಮಾರ್ಚ್ಛತಿ । ಯ ಏವಂ-ವೇಁದ ॥
ಯೋ ಹ ವೈ ಮುಹೂರ್ತಾನಾ-ಮ್ಮುಹೂರ್ತಾನ್. ವೇದ ।
ನ ಮುಹೂರ್ತಾನಾ-ಮ್ಮುಹೂರ್ತೇಷ್ವಾರ್ತಿ ಮಾರ್ಚ್ಛತಿ ॥ 41 ॥

ಇದಾನೀ-ನ್ತದಾನೀಮಿತಿ । ಏತೇ ವೈ ಮುಹೂರ್ತಾನಾ-ಮ್ಮುಹೂರ್ತಾಃ । ನ ಮುಹೂರ್ತಾನಾ-ಮ್ಮುಹೂರ್ತೇಷ್ವಾರ್ತಿ-ಮಾರ್ಚ್ಛತಿ । ಯ ಏವಂ-ವೇಁದ ॥
ಅಥೋ ಯಥಾ ಕ್ಷೇತ್ರಜ್ಞೋ ಭೂತ್ವಾ ಽನು ಪ್ರವಿಶ್ಯಾನ್ನ-ಮತ್ತಿ । ಏವಮೇವೈತಾನ್ ಕ್ಷೇತ್ರಜ್ಞೋ ಭೂತ್ವಾ ಽನು ಪ್ರವಿಶ್ಯಾ-ನ್ನಮತ್ತಿ । ಸ ಏತೇಷಾಮೇವ ಸಲೋಕತಾಗ್ಂ ಸಾಯುಜ್ಯ-ಮಶ್ನುತೇ ।
ಅಪ ಪುನರ್ಮೃತ್ಯು-ಞ್ಜಯತಿ । ಯ ಏವಂ-ವೇಁದ ॥ 42 ॥

(ನ ವೇದೈ - ವಂ-ವೇಁದಾ - ನುವಾಕಾ ಅದ್ರ್ಧಮಾಸಾನಾ-ಞ್ಚ ಮಸಾನಾ-ಞ್ಚ ನಾಮಧೇಯಾನಿ - ಮುಹೂರ್ತೇಷ್ವಾರ್ತಿಮಾರ್ಚ್ಛತಿ - +ನವ ಚ) (ಅ. 10)
(ಇಯಮಹೋರಾತ್ರಾಣಾಗ್ಂ ಸಜ್ಞಾನ್ನ-ಮ್ಪೂರ್ವಪಕ್ಷಸ್ಯ ಪ್ರಸ್ತುತಮಪರಪಕ್ಷಸ್ಯ ಮುಹೂರ್ತಾನಾ-ಞ್ಚಿತ್ರಃ ಕೇತುರದ್ರ್ಧಮಾಸಾನಾ-ಮ್ಪವಿತ್ರಂ-ಯಁಜ್ಞಕ್ರತೂನಾಮಗ್ನಿಷ್ಟೋಮೋ ಯಜ್ಞಕ್ರತೂನಾಮಿದಾನೀ-ಮ್ಮುಹೂರ್ತಾನಾ-ಮ್ಮುಹೂರ್ತಾನ್. ವೇದೇದಾನೀಮಥೋ ದ್ವಾದಶ)
ಅನುವಾಕಂ 11 - ಅನುವಾಕೇಷು ನವಸು ಲೇಖಾಸು ನಾಭ್ಯಾ-ಞ್ಚೇಷ್ಟಕೋಪಧಾನಂ ಸ್ವಯಮಾತೃಣ್ಣೋಪಧಾನ-ಞ್ಚೋಚ್ಯತೇ
ಕಶ್ಚಿದ್ಧವಾ ಅಸ್ಮಾ-ಲ್ಲೋಕಾ-ತ್ಪ್ರೇತ್ಯ । ಆತ್ಮಾನಂ-ವೇಁದ । ಅಯ-ಮಹ-ಮಸ್ಮೀತಿ । ಕಶ್ಚಿಥ್ಸ್ವಂ-ಲೋಁಕ-ನ್ನ ಪ್ರತಿ ಪ್ರಜಾನಾತಿ ॥ ಅಗ್ನಿಮುಗ್ಧೋ ಹೈವ ಧುಮತಾನ್ತಃ । ಸ್ವಂ-ಲೋಁಕ-ನ್ನ ಪ್ರತಿ ಪ್ರಜಾನಾತಿ ।
ಅಥ ಯೋ ಹೈವೈತ-ಮಗ್ನಿಗ್ಂ ಸಾವಿತ್ರಂ-ವೇಁದ ।
ಸ ಏವಾಸ್ಮಾ ಲ್ಲೋಕಾ-ತ್ಪ್ರೇತ್ಯ । ಆತ್ಮಾನಂ-ವೇಁದ ।
ಅಯ-ಮಹ-ಮಸ್ಮೀತಿ ॥ 43 ॥

ಸ ಸ್ವಂ-ಲೋಁಕ-ಮ್ಪ್ರತಿ ಪ್ರಜಾನಾತಿ ॥ ಏಷ ಉ ವೇವೈನ-ನ್ತಥ್ಸಾವಿತ್ರಃ । ಸ್ವರ್ಗಂ-ಲೋಁಕ-ಮಭಿವಹತಿ ॥ ಅಹೋರಾತ್ರೈ ರ್ವಾ ಇದಗ್ಂ ಸಯುಗ್ಭಿಃ ಕ್ರಿಯತೇ । ಇತಿ ರಾತ್ರಾಯಾ ದೀಕ್ಷಿಷತ । ಇತಿ ರಾತ್ರಾಯ ವ್ರತ-ಮುಪಾಗುರಿತಿ । ತಾನಿ ಹಾನೇವಂ-ವಿಁದುಷಃ । ಅಮುಷ್ಮಿನ್ ಁಲೋಕೇ ಶೇವಧಿ-ನ್ಧಯನ್ತಿ ।
ಧೀತಗ್ಂ ಹೈವ ಸ ಶೇವಧಿ-ಮನುಪರೈತಿ ॥
ಅಥ ಯೋ ಹೈವೈತಮಗ್ನಿಗ್ಂ ಸಾವಿತ್ರಂ-ವೇಁದ ॥ 44 ॥

ತಸ್ಯ ಹೈವಾ-ಹೋರಾತ್ರಾಣಿ । ಅಮುಷ್ಮಿನ್ ಁಲೋಕೇ ಶೇವಧಿ-ನ್ನ ಧಯನ್ತಿ ।
ಅಧೀತಗ್ಂ ಹೈವ ಸ ಶೇವಧಿ-ಮನುಪರೈತಿ ॥
ಭರದ್ವಾಜೋ ಹ ತ್ರಿಭಿರಾಯುರ್ಭಿ ರ್ಬ್ರಹ್ಮಚರ್ಯಮುವಾಸ ।
ತಗ್ಂ ಹ ಜೀರ್ಣಿಗ್ಗ್ ಸ್ಥವಿರಗ್ಂ ಶಯಾನಮ್ ।
ಇನ್ದ್ರ ಉಪವ್ರಜ್ಯೋ ವಾಚ । ಭರದ್ವಾಜ । ಯತ್ತೇ ಚತುರ್ಥಮಾಯುರ್ದದ್ಯಾಮ್ । ಕಿಮೇನೇನ ಕುರ್ಯಾ ಇತಿ । ಬ್ರಹ್ಮಚರ್ಯಮೇವೈನೇನ ಚರೇಯಮಿತಿ ಹೋವಾಚ ॥ 45 ॥

ತಗ್ಂ ಹ ತ್ರೀ-ನ್ಗಿರಿ-ರೂಪಾನ ವಿಜ್ಞಾತಾನಿವ ದರ್ಶಯಾ-ಞ್ಚಕಾರ । ತೇಷಾಗ್ಂ ಹೈಕೈಕಸ್ಮಾ-ನ್ಮುಷ್ಟಿನಾ-ಽಽದದೇ । ಸ ಹೋವಾಚ ।
ಭರದ್ವಾಜೇತ್ಯಾಮನ್ತ್ರ್ಯ । ವೇದಾ ವಾ ಏತೇ । ಅನನ್ತಾ ವೈ ವೇದಾಃ । ಏತದ್ವಾ ಏತೈ ಸ್ತ್ರಿಭಿ-ರಾಯುರ್ಭಿ-ರನ್ವವೋಚಥಾಃ । ಅಥ ತ ಇತರ-ದನನೂಕ್ತಮೇವ । ಏಹೀಮಂ-ವಿಁದ್ಧಿ । ಅಯಂ-ವೈಁ ಸರ್ವ ವಿದ್ಯೇತಿ ॥ 46 ॥

ತಸ್ಮೈ ಹೈತಮಗ್ನಿಗ್ಂ ಸಾವಿತ್ರಮುವಾಚ । ತಗ್ಂ ಸ ವಿದಿತ್ವಾ । ಅಮೃತೋ ಭೂತ್ವಾ । ಸ್ವರ್ಗಂ-ಲೋಁಕಮಿಯಾಯ । ಆದಿತ್ಯಸ್ಯ ಸಾಯುಜ್ಯಮ್ ॥
ಅಮೃತೋ ಹೈವ ಭೂತ್ವಾ । ಸ್ವರ್ಗಂ-ಲೋಁಕಮೇತಿ । ಆದಿತ್ಯಸ್ಯ ಸಾಯುಜ್ಯಮ್ । ಯ ಏವಂ-ವೇಁದ ॥ ಏಷೋ ಏವ ತ್ರಯೀ ವಿದ್ಯಾ ॥ 47 ॥

ಯಾವನ್ತಗ್ಂ ಹ ವೈ ತ್ರಯ್ಯಾ ವಿದ್ಯಯಾ ಲೋಕ-ಞ್ಜಯತಿ । ತಾವನ್ತಂ-ಲೋಁಕ-ಞ್ಜಯತಿ । ಯ ಏವಂ-ವೇಁದ ॥ ಅಗ್ನೇ ರ್ವಾ ಏತಾನಿ ನಾಮಧೇಯಾನಿ ।
ಅಗ್ನೇರೇವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ ।
ಯ ಏವಂ-ವೇಁದ । ವಾಯೋ ರ್ವಾ ಏತಾನಿ ನಾಮಧೇಯಾನಿ । ವಾಯೋರೇವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ । ಯ ಏವಂ-ವೇಁದ । ಇನ್ದ್ರಸ್ಯ ವಾ ಏತಾನಿ ನಾಮಧೇಯಾನಿ ॥ 48 ॥

ಇನ್ದ್ರಸ್ಯೈವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ । ಯ ಏವಂ-ವೇಁದ ।
ಬೃಹಸ್ಪತೇ ರ್ವಾ ಏತಾನಿ ನಾಮಧೇಯಾನಿ ।
ಬೃಹಸ್ಪತೇರೇವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ ।
ಯ ಏವಂ-ವೇಁದ । ಪ್ರಜಾಪತೇ ರ್ವಾ ಏತಾನಿ ನಾಮಧೇಯಾನಿ । ಪ್ರಜಾಪತೇರೇವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ । ಯ ಏವಂ-ವೇಁದ ।
ಬ್ರಹ್ಮಣೋ ವಾ ಏತಾನಿ ನಾಮಧೇಯಾನಿ ।
ಬ್ರಹ್ಮಣ ಏವ ಸಾಯುಜ್ಯಗ್ಂ ಸಲೋಕತಾ-ಮಾಪ್ನೋತಿ ।
ಯ ಏವಂ-ವೇಁದ ॥ ಸ ವಾ ಏಷೋ-ಽಗ್ನಿ-ರಪಕ್ಷಪುಚ್ಛೋ ವಾಯುರೇವ ।
ತಸ್ಯಾಗ್ನಿ ರ್ಮುಖಮ್ । ಅಸಾವಾದಿತ್ಯ-ಶ್ಶಿರಃ ।
ಸ ಯದೇತೇ ದೇವತೇ ಅನ್ತರೇಣ ।
ತಥ್ಸರ್ವಗ್ಂ ಸೀವ್ಯತಿ । ತಸ್ಮಾ-ಥ್ಸಾವಿತ್ರಃ ॥ 49 ॥
(ಅಯಮಹಮಸ್ಮೀತಿ - ವೇದ - ಹೋವಾಚ - ಸರ್ವವಿದ್ಯೇತಿ - ವಿದ್ಯೇ - ನ್ದ್ರಸ್ಯ ವಾ ಏತಾನಿ ನಾಮಧೇಯಾನಿ - ಬ್ರಹ್ಮಣ ಏವ ಸಾಯುಜ್ಯಗ್ಂ ಸಲೋಕತಾಮಾಪ್ನೋತಿ ಸಪ್ತ ಚ) । (ಅ. 11)
(ಅಗ್ನೇರ್ವಾಯೋರಿನ್ದ್ರಸ್ಯ ಬೃಹಸ್ಪತೇಃ ಪ್ರಜಾಪತೇ-ರ್ಬ್ರಹ್ಮಣ-ಸ್ಸ ವೈ ಸಪ್ತ)
(ಸಞ್ಜ್ಞಾನಂ - ಭೂ - ಸ್ತ್ವಮೇವ - ಸಂವಁಥ್ಸರೋ-ಽಸಿ - ಭೂ - ರಾಜ್ಞ್ಯ - ಸವ-ವಿಪಶ್ಚಿತೇ - ಪ್ರಜಾಪತಿ-ರ್ದೇವಾ - ನಿಯಂ-ವಾಁವ ಸರಘಾ - ಕಶ್ಚಿದ್ಧೈಕಾದಶ)
(ಸಞ್ಜ್ಞಾನಗ್ಂ - ರಾಜ್ಞೀ - ಮೂದ್ರ್ಧಾ ಹೃದಯ - ಏಷ ಸಂವಁಥ್ಸರೋ - ನಾದ್ರ್ಧಮಾಸೇಷು ನವಚತ್ವಾರಿಗ್ಂಶತ್)
(ಸಞ್ಜ್ಞಾನಗ್ಂ - ಸಾವಿತ್ರಃ)
॥ ಹರಿಃ ಓಮ್ ॥