1.5 - ದೇವಾಸುರಾಃ ಸಂಯತ್ತಾ ಆಸನ್ನ್ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ಪಞ್ಚಮಃ ಪ್ರಶ್ನಃ - ಪುನರಾಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ದೇವಾಸುರಾ-ಸ್ಸಂಯಁತ್ತಾ ಆಸನ್ತೇ ದೇವಾ ವಿಜಯಮುಪಯನ್ತೋ ಽಗ್ನೌ ವಾಮಂ-ವಁಸು ಸ-ನ್ನ್ಯದಧತೇದಮು ನೋ ಭವಿಷ್ಯತಿ ಯದಿ ನೋ ಜೇಷ್ಯನ್ತೀತಿ ತದಗ್ನಿರ್ನ್ಯಕಾಮಯತ ತೇನಾಪಾಕ್ರಾಮ-ತ್ತದ್ದೇವಾ ವಿಜಿತ್ಯಾವರುರುಥ್ಸಮಾನಾ ಅನ್ವಾಯ-ನ್ತದಸ್ಯ ಸಹಸಾ-ಽಽದಿಥ್ಸನ್ತ ಸೋ ಽರೋದೀದ್ಯದರೋದೀ-ತ್ತ-ದ್ರುದ್ರಸ್ಯ ರುದ್ರತ್ವಂ-ಯಁದಶ್ರ್ವಶೀಯತ ತ- [ತತ್, ರಜತಗ್ಂ] 1
ದ್ರಜತಗ್ಂ ಹಿರಣ್ಯಮಭವ-ತ್ತಸ್ಮಾ-ದ್ರಜತಗ್ಂ ಹಿರಣ್ಯ-ಮದಕ್ಷಿಣ್ಯ-ಮಶ್ರುಜಗ್ಂ ಹಿ ಯೋ ಬರ್ಹಿಷಿ ದದಾತಿ ಪುರಾ-ಽಸ್ಯ ಸಂವಁಥ್ಸರಾ-ದ್ಗೃಹೇ ರುದನ್ತಿ ತಸ್ಮಾ-ದ್ಬರ್ಹಿಷಿ ನ ದೇಯಗ್ಂ ಸೋ-ಽಗ್ನಿರಬ್ರವೀ-ದ್ಭಾಗ್ಯಸಾನ್ಯಥ ವ ಇದಮಿತಿ ಪುನರಾಧೇಯ-ನ್ತೇ ಕೇವಲಮಿತ್ಯಬ್ರುವ-ನ್ನೃದ್ಧ್ನವ-ತ್ಖಲು ಸ ಇತ್ಯಬ್ರವೀದ್ಯೋ ಮದ್ದೇವತ್ಯ-ಮಗ್ನಿ-ಮಾದಧಾತಾ ಇತಿ ತ-ಮ್ಪೂಷಾ-ಽಽಧತ್ತ ತೇನ [ ] 2
ಪೂಷಾ-ಽಽರ್ಧ್ನೋ-ತ್ತಸ್ಮಾ-ತ್ಪೌಷ್ಣಾಃ ಪಶವ ಉಚ್ಯನ್ತೇ ತ-ನ್ತ್ವಷ್ಟಾ-ಽಽಧತ್ತ ತೇನ ತ್ವಷ್ಟಾ-ಽಽರ್ಧ್ನೋ-ತ್ತಸ್ಮಾ-ತ್ತ್ವಾಷ್ಟ್ರಾಃ ಪಶವ ಉಚ್ಯನ್ತೇ ತ-ಮ್ಮನುರಾ-ಽಧತ್ತ ತೇನ ಮನುರಾರ್ಧ್ನೋ-ತ್ತಸ್ಮಾನ್ಮಾನವ್ಯಃ ಪ್ರಜಾ ಉಚ್ಯನ್ತೇ ತ-ನ್ಧಾತಾ-ಽಽಧತ್ತ ತೇನ ಧಾತಾ-ಽಽರ್ಧ್ನೋ-ಥ್ಸಂವಁಥ್ಸರೋ ವೈ ಧಾತಾ ತಸ್ಮಾ-ಥ್ಸಂವಁಥ್ಸರ-ಮ್ಪ್ರಜಾಃ ಪಶವೋ-ಽನು ಪ್ರ ಜಾಯನ್ತೇ ಯ ಏವ-ಮ್ಪುನರಾಧೇಯಸ್ಯರ್ಧಿಂ-ವೇಁದ- [ಏವ-ಮ್ಪುನರಾಧೇಯಸ್ಯರ್ಧಿಂ-ವೇಁದ, ಋಧ್ನೋತ್ಯೇವ] 3
-ರ್ಧ್ನೋತ್ಯೇವ ಯೋ-ಽಸ್ಯೈವ-ಮ್ಬನ್ಧುತಾಂ-ವೇಁದ ಬನ್ಧುಮಾ-ನ್ಭವತಿ ಭಾಗಧೇಯಂ-ವಾಁ ಅಗ್ನಿರಾಹಿತ ಇಚ್ಛಮಾನಃ ಪ್ರಜಾ-ಮ್ಪಶೂನ್ ಯಜಮಾನಸ್ಯೋಪ ದೋದ್ರಾವೋದ್ವಾಸ್ಯ ಪುನರಾ ದಧೀತ ಭಾಗಧೇಯೇನೈವೈನಗ್ಂ ಸಮರ್ಧಯತ್ಯಥೋ ಶಾನ್ತಿರೇವಾಸ್ಯೈಷಾ ಪುನರ್ವಸ್ವೋರಾ ದಧೀತೈತದ್ವೈ ಪುನರಾಧೇಯಸ್ಯ ನಕ್ಷತ್ರಂ-ಯಁ-ತ್ಪುನರ್ವಸೂ ಸ್ವಾಯಾಮೇವೈನ-ನ್ದೇವತಾಯಾಮಾಧಾಯ ಬ್ರಹ್ಮವರ್ಚಸೀ ಭವತಿ ದರ್ಭೈ ರಾ ದಧಾತ್ಯಯಾತಯಾಮತ್ವಾಯ ದರ್ಭೈರಾ ದಧಾತ್ಯದ್ಭ್ಯ ಏವೈನಮೋಷಧೀಭ್ಯೋ ಽವರುದ್ಧ್ಯಾ ಽಽಧತ್ತೇ ಪಞ್ಚಕಪಾಲಃ ಪುರೋಡಾಶೋ ಭವತಿ ಪಞ್ಚ ವಾ ಋತವ ಋತುಭ್ಯ ಏವೈನಮವರುದ್ಧ್ಯಾ ಽಽಧತ್ತೇ ॥ 4 ॥

(ಅಶೀಯತ ತತ್- ತೇನ-ವೇದ- ದರ್ಭೈಃ ಪಞ್ಚವಿಗ್ಂಶತಿಶ್ಚ) (ಅ. 1)
ಪರಾ ವಾ ಏಷ ಯಜ್ಞ-ಮ್ಪಶೂನ್ ವಪತಿ ಯೋ-ಽಗ್ನಿಮುದ್ವಾಸಯತೇ ಪಞ್ಚಕಪಾಲಃ ಪುರೋಡಾಶೋ ಭವತಿ ಪಾಙ್ಕ್ತೋ ಯಜ್ಞಃ ಪಾಙ್ಕ್ತಾಃ ಪಶವೋ ಯಜ್ಞಮೇವ ಪಶೂನವ ರುನ್ಧೇ ವೀರಹಾ ವಾ ಏಷ ದೇವಾನಾಂ-ಯೋಁ-ಽಗ್ನಿಮುದ್ವಾಸಯತೇ ನ ವಾ ಏತಸ್ಯ ಬ್ರಾಹ್ಮಣಾ ಋತಾಯವಃ ಪುರಾ-ಽನ್ನಮಕ್ಷ-ನ್ಪಙ್ಕ್ತ್ಯೋ ಯಾಜ್ಯಾನುವಾಕ್ಯಾ ಭವನ್ತಿ ಪಾಙ್ಕ್ತೋ ಯಜ್ಞಃ ಪಾಙ್ಕ್ತಃ ಪುರುಷೋ ದೇವಾನೇವ ವೀರ-ನ್ನಿರವದಾಯಾಗ್ನಿ-ಮ್ಪುನರಾ [ಪುನರಾ, ಧತ್ತೇ ಶತಾಕ್ಷರಾ ಭವನ್ತಿ] 5
ಧತ್ತೇ ಶತಾಕ್ಷರಾ ಭವನ್ತಿ ಶತಾಯುಃ ಪುರುಷ-ಶ್ಶತೇನ್ದ್ರಿಯ ಆಯುಷ್ಯೇವೇನ್ದ್ರಿಯೇ ಪ್ರತಿ ತಿಷ್ಠತಿ ಯದ್ವಾ ಅಗ್ನಿರಾಹಿತೋ ನರ್ಧ್ಯತೇ ಜ್ಯಾಯೋ ಭಾಗಧೇಯ-ನ್ನಿಕಾಮಯಮಾನೋ ಯದಾಗ್ನೇಯಗ್ಂ ಸರ್ವ-ಮ್ಭವತಿ ಸೈವಾಸ್ಯರ್ಧಿ-ಸ್ಸಂ-ವಾಁ ಏತಸ್ಯ ಗೃಹೇ ವಾಕ್ ಸೃಜ್ಯತೇ ಯೋ-ಽಗ್ನಿಮುದ್ವಾಸಯತೇ ಸ ವಾಚಗ್ಂ ಸಗ್ಂಸೃಷ್ಟಾಂ-ಯಁಜಮಾನ ಈಶ್ವರೋ-ಽನು ಪರಾಭವಿತೋ-ರ್ವಿಭಕ್ತಯೋ ಭವನ್ತಿ ವಾಚೋ ವಿಧೃತ್ಯೈ ಯಜಮಾನಸ್ಯಾ-ಽಪರಾಭಾವಾಯ [-ಽಪರಾಭಾವಾಯ, ವಿಭಕ್ತಿ-ಙ್ಕರೋತಿ] 6
ವಿಭಕ್ತಿ-ಙ್ಕರೋತಿ ಬ್ರಹ್ಮೈವ ತದಕರುಪಾಗ್ಂಶು ಯಜತಿ ಯಥಾ ವಾಮಂ-ವಁಸು ವಿವಿದಾನೋ ಗೂಹತಿ ತಾದೃಗೇವ ತದಗ್ನಿ-ಮ್ಪ್ರತಿ ಸ್ವಿಷ್ಟಕೃತ-ನ್ನಿರಾಹ ಯಥಾ ವಾಮಂ-ವಁಸು ವಿವಿದಾನಃ ಪ್ರಕಾಶ-ಞ್ಜಿಗಮಿಷತಿ ತಾದೃಗೇವ ತದ್ವಿಭಕ್ತಿಮುಕ್ತ್ವಾ ಪ್ರಯಾಜೇನ ವಷಟ್ಕರೋತ್ಯಾಯತನಾದೇವ ನೈತಿ ಯಜಮಾನೋ ವೈ ಪುರೋಡಾಶಃ ಪಶವ ಏತೇ ಆಹುತೀ ಯದಭಿತಃ ಪುರೋಡಾಶಮೇತೇ ಆಹುತೀ [ ] 7
ಜುಹೋತಿ ಯಜಮಾನಮೇವೋಭಯತಃ ಪಶುಭಿಃ ಪರಿ ಗೃಹ್ಣಾತಿ ಕೃತಯಜು-ಸ್ಸಮ್ಭೃತಸಮ್ಭಾರ ಇತ್ಯಾಹುರ್ನ ಸಮ್ಭೃತ್ಯಾ-ಸ್ಸಮ್ಭಾರಾ ನ ಯಜುಃ ಕರ್ತವ್ಯಮಿತ್ಯಥೋ ಖಲು ಸಮ್ಭೃತ್ಯಾ ಏವ ಸಮ್ಭಾರಾಃ ಕರ್ತವ್ಯಂ-ಯಁಜು-ರ್ಯಜ್ಞಸ್ಯ ಸಮೃದ್ಧ್ಯೈ ಪುನರ್ನಿಷ್ಕೃತೋ ರಥೋ ದಕ್ಷಿಣಾ ಪುನರುಥ್ಸ್ಯೂತಂ-ವಾಁಸಃ ಪುನರುಥ್ಸೃಷ್ಟೋ-ಽನಡ್ವಾ-ನ್ಪುನರಾಧೇಯಸ್ಯ ಸಮೃದ್ಧ್ಯೈ ಸಪ್ತ ತೇ ಅಗ್ನೇ ಸಮಿಧಃ ಸಪ್ತ ಜಿಹ್ವಾ ಇತ್ಯಗ್ನಿಹೋತ್ರ-ಞ್ಜುಹೋತಿ ಯತ್ರಯತ್ರೈವಾಸ್ಯ ನ್ಯಕ್ತ-ನ್ತತ [ನ್ಯಕ್ತ-ನ್ತತಃ, ಏವೈನಮವ ರುನ್ಧೇ] 8
ಏವೈನಮವ ರುನ್ಧೇ ವೀರಹಾ ವಾ ಏಷ ದೇವಾನಾಂ-ಯೋಁ-ಽಗ್ನಿಮುದ್ವಾಸಯತೇ ತಸ್ಯ ವರುಣ ಏವರ್ಣಯಾದಾಗ್ನಿವಾರುಣ-ಮೇಕಾದಶಕಪಾಲಮನು ನಿರ್ವಪೇದ್ಯ-ಞ್ಚೈವ ಹನ್ತಿ ಯಶ್ಚಾಸ್ಯರ್ಣಯಾತ್ತೌ ಭಾಗಧೇಯೇನ ಪ್ರೀಣಾತಿ ನಾ-ಽಽರ್ತಿಮಾರ್ಚ್ಛತಿ ಯಜಮಾನಃ ॥ 9 ॥

(ಆ-ಽಪರಾಭಾವಾಯ-ಪುರೋಡಾಶಮೇತೇ-ಆಹುತೀ-ತತಃ -ಷಟತ್ರಿಗ್ಂಶಚ್ಚ) (ಅ. 2)
ಭೂಮಿ-ರ್ಭೂಮ್ನಾ ದ್ಯೌ-ರ್ವರಿಣಾ-ಽನ್ತರಿಕ್ಷ-ಮ್ಮಹಿತ್ವಾ । ಉಪಸ್ಥೇ ತೇ ದೇವ್ಯದಿತೇ ಽಗ್ನಿಮನ್ನಾದಮನ್ನಾದ್ಯಾಯಾ-ಽಽದಧೇ ॥ ಆ-ಽಯ-ಙ್ಗೌಃ ಪೃಶ್ಞಿರಕ್ರಮೀದಸನ-ನ್ಮಾತರ-ಮ್ಪುನಃ । ಪಿತರ-ಞ್ಚ ಪ್ರಯನ್-ಥ್ಸುವಃ ॥ ತ್ರಿಗ್ಂಶದ್ಧಾಮ ವಿ ರಾಜತಿ ವಾ-ಕ್ಪತಙ್ಗಾಯ ಶಿಶ್ರಿಯೇ । ಪ್ರತ್ಯಸ್ಯ ವಹ ದ್ಯುಭಿಃ ॥ ಅಸ್ಯ ಪ್ರಾಣಾದಪಾನತ್ಯನ್ತಶ್ಚರತಿ ರೋಚನಾ । ವ್ಯಖ್ಯ-ನ್ಮಹಿಷ-ಸ್ಸುವಃ ॥ ಯತ್ತ್ವಾ [ ] 10
ಕ್ರುದ್ಧಃ ಪರೋವಪ ಮನ್ಯುನಾ ಯದವರ್ತ್ಯಾ । ಸುಕಲ್ಪಮಗ್ನೇ ತತ್ತವ ಪುನಸ್ತ್ವೋದ್ದೀಪಯಾಮಸಿ ॥ಯತ್ತೇ ಮನ್ಯುಪರೋಪ್ತಸ್ಯ ಪೃಥಿವೀಮನು ದದ್ಧ್ವಸೇ । ಆದಿತ್ಯಾ ವಿಶ್ವೇ ತದ್ದೇವಾ ವಸವಶ್ಚ ಸಮಾಭರನ್ನ್ ॥ ಮನೋ ಜ್ಯೋತಿ-ರ್ಜುಷತಾಮಾಜ್ಯಂ-ವಿಁಚ್ಛಿನ್ನಂ-ಯಁಜ್ಞಗ್ಂ ಸಮಿಮ-ನ್ದಧಾತು । ಬೃಹಸ್ಪತಿಸ್ತನುತಾಮಿಮ-ನ್ನೋ ವಿಶ್ವೇ ದೇವಾ ಇಹ ಮಾದಯನ್ತಾಮ್ ॥ ಸಪ್ತ ತೇ ಅಗ್ನೇ ಸಮಿಧಃ ಸಪ್ತ ಜಿಹ್ವಾ-ಸ್ಸಪ್ತ- [ಜಿಹ್ವಾ-ಸ್ಸಪ್ತ, ಋಷಯ-ಸ್ಸಪ್ತ ಧಾಮ] 11
-ರ್ಷಯ-ಸ್ಸಪ್ತ ಧಾಮ ಪ್ರಿಯಾಣಿ । ಸಪ್ತ ಹೋತ್ರಾ-ಸ್ಸಪ್ತಧಾ ತ್ವಾ ಯಜನ್ತಿ ಸಪ್ತ ಯೋನೀರಾ ಪೃಣಸ್ವಾ ಘೃತೇನ ॥ ಪುನರೂರ್ಜಾ ನಿ ವರ್ತಸ್ವ ಪುನರಗ್ನ ಇಷಾ-ಽಽಯುಷಾ । ಪುನರ್ನಃ ಪಾಹಿ ವಿಶ್ವತಃ ॥ ಸಹ ರಯ್ಯಾ ನಿ ವರ್ತಸ್ವಾಗ್ನೇ ಪಿನ್ವಸ್ವ ಧಾರಯಾ । ವಿಶ್ವಫ್ಸ್ನಿಯಾ ವಿಶ್ವತಸ್ಪರಿ ॥ ಲೇಕ-ಸ್ಸಲೇಕ-ಸ್ಸುಲೇಕಸ್ತೇ ನ ಆದಿತ್ಯಾ ಆಜ್ಯ-ಞ್ಜುಷಾಣಾ ವಿಯನ್ತು ಕೇತ-ಸ್ಸಕೇತ-ಸ್ಸುಕೇತಸ್ತೇ ನ ಆದಿತ್ಯಾ ಆಜ್ಯ-ಞ್ಜುಷಾಣಾ ವಿಯನ್ತು ವಿವಸ್ವಾಗ್ಂ ಅದಿತಿ-ರ್ದೇವಜೂತಿಸ್ತೇ ನ ಆದಿತ್ಯಾ ಆಜ್ಯ-ಞ್ಜುಷಾಣಾ ವಿಯನ್ತು ॥ 12 ॥

(ತ್ವಾ-ಜಿಹ್ವಾ-ಸ್ಸಪ್ತ-ಸುಕೇತಸ್ತೇ ನ-ಸ್ತ್ರಯೋದಶ ಚ ) (ಅ. 3)
ಭೂಮಿ-ರ್ಭೂಮ್ನಾ ದ್ಯೌ-ರ್ವರಿಣೇತ್ಯಾಹಾ-ಽಽಶಿಷೈವೈನಮಾ ಧತ್ತೇ ಸರ್ಪಾ ವೈ ಜೀರ್ಯನ್ತೋ ಽಮನ್ಯನ್ತ ಸ ಏತ-ಙ್ಕಸರ್ಣೀರಃ ಕಾದ್ರವೇಯೋ ಮನ್ತ್ರಮಪಶ್ಯ-ತ್ತತೋ ವೈ ತೇ ಜೀರ್ಣಾಸ್ತನೂರಪಾಘ್ನತ ಸರ್ಪರಾಜ್ಞಿಯಾ ಋಗ್ಭಿ-ರ್ಗಾರ್ಹಪತ್ಯಮಾ ದಧಾತಿ ಪುನರ್ನವಮೇವೈನಮಜರ-ಙ್ಕೃತ್ವಾ ಽಽಧತ್ತೇ-ಽಥೋ ಪೂತಮೇವ ಪೃಥಿವೀಮನ್ನಾದ್ಯ-ನ್ನೋಪಾ-ಽನಮಥ್ಸೈತ- [ನೋಪಾ-ಽನಮಥ್ಸೈತಮ್, ಮನ್ತ್ರಮಪಶ್ಯ-ತ್ತತೋ ವೈ] 13
-ಮ್ಮನ್ತ್ರಮಪಶ್ಯ-ತ್ತತೋ ವೈ ತಾಮನ್ನಾದ್ಯ-ಮುಪಾನಮದ್ಯಥ್ -ಸರ್ಪರಾಜ್ಞಿಯಾ ಋಗ್ಭಿ-ರ್ಗಾರ್ಹಪತ್ಯ-ಮಾದಧಾತ್ಯನ್ನಾದ್ಯಸ್ಯಾವರುದ್ಧ್ಯಾ ಅಥೋ ಅಸ್ಯಾಮೇವೈನ-ಮ್ಪ್ರತಿಷ್ಠಿತಮಾ ಧತ್ತೇ ಯತ್ತ್ವಾ ಕ್ರುದ್ಧಃ ಪರೋವಪೇತ್ಯಾಹಾಪಹ್ನುತ ಏವಾಸ್ಮೈ ತ-ತ್ಪುನಸ್ತ್ವೋದ್ದೀಪಯಾಮಸೀತ್ಯಾಹ ಸಮಿನ್ಧ ಏವೈನಂ-ಯಁತ್ತೇ ಮನ್ಯುಪರೋಪ್ತಸ್ಯೇತ್ಯಾಹ ದೇವತಾಭಿರೇವೈ- [ದೇವತಾಭಿರೇವ, ಏನಗ್ಂ ಸ-ಮ್ಭರತಿ ವಿ ವಾ] 14
-ನಗ್ಂ ಸ-ಮ್ಭರತಿ ವಿ ವಾ ಏತಸ್ಯ ಯಜ್ಞಶ್ಛಿದ್ಯತೇ ಯೋ-ಽಗ್ನಿಮುದ್ವಾಸಯತೇ ಬೃಹಸ್ಪತಿವತ್ಯರ್ಚೋಪ ತಿಷ್ಠತೇ ಬ್ರಹ್ಮ ವೈ ದೇವಾನಾ-ಮ್ಬೃಹಸ್ಪತಿ-ರ್ಬ್ರಹ್ಮಣೈವ ಯಜ್ಞಗ್ಂ ಸ-ನ್ದಧಾತಿ ವಿಚ್ಛಿನ್ನಂ-ಯಁಜ್ಞಗ್ಂ ಸಮಿಮ-ನ್ದಧಾತ್ವಿತ್ಯಾಹ ಸನ್ತತ್ಯೈ ವಿಶ್ವೇ ದೇವಾ ಇಹ ಮಾದಯನ್ತಾಮಿತ್ಯಾಹ ಸನ್ತತ್ಯೈವ ಯಜ್ಞ-ನ್ದೇವೇಭ್ಯೋ-ಽನು ದಿಶತಿ ಸಪ್ತ ತೇ ಅಗ್ನೇ ಸಮಿಧಃ ಸಪ್ತ ಜಿಹ್ವಾ [ಜಿಹ್ವಾಃ, ಇತ್ಯಾಹ] 15
ಇತ್ಯಾಹ ಸಪ್ತಸಪ್ತ ವೈ ಸಪ್ತಧಾ-ಽಗ್ನೇಃ ಪ್ರಿಯಾಸ್ತನುವಸ್ತಾ ಏವಾವ ರುನ್ಧೇ ಪುನರೂರ್ಜಾ ಸಹ ರಯ್ಯೇತ್ಯಭಿತಃ ಪುರೋಡಾಶಮಾಹುತೀ ಜುಹೋತಿ ಯಜಮಾನಮೇವೋರ್ಜಾ ಚ ರಯ್ಯಾ ಚೋಭಯತಃ ಪರಿ ಗೃಹ್ಣಾತ್ಯಾದಿತ್ಯಾ ವಾ ಅಸ್ಮಾಲ್ಲೋಕಾದಮುಂ-ಲೋಁಕಮಾಯ-ನ್ತೇ-ಽಮುಷ್ಮಿನ್ ಁಲೋಕೇ ವ್ಯತೃಷ್ಯ-ನ್ತ ಇಮಂ-ಲೋಁಕ-ಮ್ಪುನರಭ್ಯವೇತ್ಯಾ ಽಗ್ನಿಮಾಧಾಯೈ-ತಾನ್. ಹೋಮಾನಜುಹವುಸ್ತ ಆರ್ಧ್ನುವ-ನ್ತೇ ಸುವರ್ಗಂ-ಲೋಁಕಮಾಯನ್. ಯಃ ಪರಾಚೀನ-ಮ್ಪುನರಾಧೇಯಾದಗ್ನಿಮಾದಧೀತ ಸ ಏತಾನ್. ಹೋಮಾನ್ ಜುಹುಯಾದ್ಯಾಮೇವಾ-ಽಽದಿತ್ಯಾ ಋದ್ಧಿಮಾರ್ಧ್ನುವ-ನ್ತಾಮೇವರ್ಧ್ನೋತಿ ॥ 16 ॥

(ಸೈತಂ-ದೇವತಾಭಿರೇವ-ಜಿಹ್ವಾ-ಏತಾನ್-ಪಞ್ಚವಿಗ್ಂಶತಿಶ್ಚ ) (ಅ. 4)
ಉಪಪ್ರಯನ್ತೋ ಅದ್ಧ್ವರ-ಮ್ಮನ್ತ್ರಂ-ವೋಁಚೇಮಾಗ್ನಯೇ । ಆರೇ ಅಸ್ಮೇ ಚ ಶೃಣ್ವತೇ ॥ ಅಸ್ಯ ಪ್ರತ್ನಾಮನು ದ್ಯುತಗ್ಂ ಶುಕ್ರ-ನ್ದುದುಹ್ರೇ ಅಹ್ರಯಃ । ಪಯಃ ಸಹಸ್ರಸಾಮೃಷಿಮ್ ॥ ಅಗ್ನಿ-ರ್ಮೂರ್ಧಾ ದಿವಃ ಕಕುತ್ಪತಿಃ ಪೃಥಿವ್ಯಾ ಅಯಮ್ । ಅಪಾಗ್ಂ ರೇತಾಗ್ಂಸಿ ಜಿನ್ವತಿ ॥ ಅಯಮಿಹ ಪ್ರಥಮೋ ಧಾಯಿ ಧಾತೃಭಿರ್ ಹೋತಾ ಯಜಿಷ್ಠೋ ಅಧ್ವರೇಷ್ವೀಡ್ಯಃ ॥ ಯಮಪ್ನವಾನೋ ಭೃಗವೋ ವಿರುರುಚುರ್ವನೇಷು ಚಿತ್ರಂ-ವಿಁಭುವಂ-ವಿಁಶೇವಿಶೇ ॥ ಉಭಾ ವಾಮಿನ್ದ್ರಾಗ್ನೀ ಆಹುವದ್ಧ್ಯಾ [ಆಹುವದ್ಧ್ಯೈ, ಉಭಾ] 17
ಉಭಾ ರಾಧಸ-ಸ್ಸಹ ಮಾದಯದ್ಧ್ಯೈ । ಉಭಾ ದಾತಾರಾವಿಷಾಗ್ಂ ರಯೀಣಾಮುಭಾ ವಾಜಸ್ಯ ಸಾತಯೇ ಹುವೇ ವಾಮ್ ॥ ಅಯ-ನ್ತೇ ಯೋನಿರ್-ಋತ್ವಿಯೋ ಯತೋ ಜಾತೋ ಅರೋಚಥಾಃ । ತ-ಞ್ಜಾನನ್ನಗ್ನ ಆ ರೋಹಾಥಾ ನೋ ವರ್ಧಯಾ ರಯಿಮ್ ॥ ಅಗ್ನ ಆಯೂಗ್ಂಷಿ ಪವಸ ಆ ಸುವೋರ್ಜಮಿಷ-ಞ್ಚ ನಃ । ಆರೇ ಬಾಧಸ್ವ ದುಚ್ಛುನಾಮ್ ॥ ಅಗ್ನೇ ಪವಸ್ವ ಸ್ವಪಾ ಅಸ್ಮೇ ವರ್ಚಃ ಸುವೀರ್ಯಮ್ । ದಧತ್ಪೋಷಗ್ಂ ರಯಿ- [ರಯಿಮ್, ಮ್ಮಯಿ ।] 18
-ಮ್ಮಯಿ ॥ ಅಗ್ನೇ ಪಾವಕ ರೋಚಿಷಾ ಮನ್ದ್ರಯಾ ದೇವ ಜಿಹ್ವಯಾ । ಆ ದೇವಾನ್. ವಕ್ಷಿ ಯಕ್ಷಿ ಚ ॥ ಸ ನಃ ಪಾವಕ ದೀದಿವೋ-ಽಗ್ನೇ ದೇವಾಗ್ಂ ಇಹಾ ಽಽವಹ । ಉಪ ಯಜ್ಞಗ್ಂ ಹವಿಶ್ಚ ನಃ ॥ ಅಗ್ನಿ-ಶ್ಶುಚಿವ್ರತತಮ-ಶ್ಶುಚಿ-ರ್ವಿಪ್ರ-ಶ್ಶುಚಿಃ ಕವಿಃ । ಶುಚೀ ರೋಚತ ಆಹುತಃ ॥ ಉದಗ್ನೇ ಶುಚಯಸ್ತವ ಶುಕ್ರಾ ಭ್ರಾಜನ್ತ ಈರತೇ । ತವ ಜ್ಯೋತೀಗ್ಷ್ಯರ್ಚಯಃ ॥ ಆಯುರ್ದಾ ಅಗ್ನೇ-ಽಸ್ಯಾಯುರ್ಮೇ [ಅಗ್ನೇ-ಽಸ್ಯಾಯುರ್ಮೇ, ದೇಹಿ ವರ್ಚೋದಾ] 19
ದೇಹಿ ವರ್ಚೋದಾ ಅಗ್ನೇ-ಽಸಿ ವರ್ಚೋ ಮೇ ದೇಹಿ ತನೂಪಾ ಅಗ್ನೇ-ಽಸಿ ತನುವ-ಮ್ಮೇ ಪಾಹ್ಯಗ್ನೇ ಯನ್ಮೇ ತನುವಾ ಊನ-ನ್ತನ್ಮ ಆ ಪೃಣ ಚಿತ್ರಾವಸೋ ಸ್ವಸ್ತಿ ತೇ ಪಾರಮಶೀಯೇನ್ಧಾನಾಸ್ತ್ವಾ ಶತಗ್ಂ ಹಿಮಾ ದ್ಯುಮನ್ತ-ಸ್ಸಮಿಧೀಮಹಿ ವಯಸ್ವನ್ತೋ ವಯಸ್ಕೃತಂ-ಯಁಶಸ್ವನ್ತೋ ಯಶಸ್ಕೃತಗ್ಂ ಸುವೀರಾಸೋ ಅದಾಭ್ಯಮ್ । ಅಗ್ನೇ ಸಪತ್ನದಮ್ಭನಂ-ವಁರ್ಷಿಷ್ಠೇ ಅಧಿ ನಾಕೇ ॥ ಸ-ನ್ತ್ವಮಗ್ನೇ ಸೂರ್ಯಸ್ಯ ವರ್ಚಸಾ ಽಗಥಾ-ಸ್ಸಮೃಷೀಣಾಗ್ ಸ್ತುತೇನ ಸ-ಮ್ಪ್ರಿಯೇಣ ಧಾಮ್ನಾ । ತ್ವಮಗ್ನೇ ಸೂರ್ಯವರ್ಚಾ ಅಸಿ ಸ-ಮ್ಮಾಮಾಯುಷಾ ವರ್ಚಸಾ ಪ್ರಜಯಾ ಸೃಜ ॥ 20 ॥

(ಆಹುವದ್ಧ್ಯೈ-ಪೋಷಗ್ಂ ರಯಿಂ-ಮೇ-ವರ್ಚಸಾ-ಸಪ್ತದಶ ಚ ) (ಅ. 5)
ಸ-ಮ್ಪಶ್ಯಾಮಿ ಪ್ರಜಾ ಅಹ-ಮಿಡಪ್ರಜಸೋ ಮಾನವೀಃ । ಸರ್ವಾ ಭವನ್ತು ನೋ ಗೃಹೇ । ಅಮ್ಭ-ಸ್ಸ್ಥಾಮ್ಭೋ ವೋ ಭಕ್ಷೀಯ ಮಹಃ ಸ್ಥ ಮಹೋ ವೋ ಭಕ್ಷೀಯ ಸಹಃ ಸ್ಥ ಸಹೋ ವೋ ಭಕ್ಷೀಯೋರ್ಜ-ಸ್ಸ್ಥೋರ್ಜಂ-ವೋಁ ಭಕ್ಷೀಯ ರೇವತೀ ರಮದ್ಧ್ವ-ಮಸ್ಮಿನ್ ಁಲೋಕೇ-ಽಸ್ಮಿ-ನ್ಗೋಷ್ಠೇ-ಽಸ್ಮಿನ್ ಕ್ಷಯೇ-ಽಸ್ಮಿನ್ ಯೋನಾವಿಹೈವ ಸ್ತೇತೋ ಮಾ-ಽಪ ಗಾತ ಬಹ್ವೀರ್ಮೇ ಭೂಯಾಸ್ತ [ಭೂಯಾಸ್ತ, ಸಗ್ಂಹಿತಾ-ಽಸಿ] 21
ಸಗ್ಂಹಿತಾ-ಽಸಿ ವಿಶ್ವರೂಪೀರಾ ಮೋರ್ಜಾ ವಿಶಾ ಽಽಗೌಪತ್ಯೇನಾ ಽಽರಾಯಸ್ಪೋಷೇಣ ಸಹಸ್ರಪೋಷಂ-ವಃ ಁಪುಷ್ಯಾಸ-ಮ್ಮಯಿ ವೋ ರಾಯಃ ಶ್ರಯನ್ತಾಮ್ ॥ ಉಪ ತ್ವಾ-ಽಗ್ನೇ ದಿವೇದಿವೇ ದೋಷಾವಸ್ತರ್ಧಿಯಾ ವಯಮ್ । ನಮೋ ಭರನ್ತ ಏಮಸಿ ॥ ರಾಜನ್ತಮದ್ಧ್ವರಾಣಾ-ಙ್ಗೋಪಾಮೃತಸ್ಯ ದೀದಿವಿಮ್ । ವರ್ಧಮಾನಗ್ಗ್ ಸ್ವೇ ದಮೇ ॥ ಸ ನಃ ಪಿತೇವ ಸೂನವೇ-ಽಗ್ನೇ ಸೂಪಾಯನೋ ಭವ । ಸಚಸ್ವಾ ನ-ಸ್ಸ್ವಸ್ತಯೇ ॥ ಅಗ್ನೇ [ಅಗ್ನೇ, ತ್ವ-ನ್ನೋ ಅನ್ತಮಃ ।] 22
ತ್ವ-ನ್ನೋ ಅನ್ತಮಃ । ಉತ ತ್ರಾತಾ ಶಿವೋ ಭವ ವರೂತ್ಥ್ಯಃ ॥ ತ-ನ್ತ್ವಾ ಶೋಚಿಷ್ಠ ದೀದಿವಃ । ಸುಮ್ನಾಯ ನೂನಮೀಮಹೇ ಸಖಿಭ್ಯಃ ॥ ವಸುರಗ್ನಿ-ರ್ವಸುಶ್ರವಾಃ । ಅಚ್ಛಾ ನಕ್ಷಿ ದ್ಯುಮತ್ತಮೋ ರಯಿ-ನ್ದಾಃ ॥ ಊರ್ಜಾ ವಃ ಪಶ್ಯಾಮ್ಯೂರ್ಜಾ ಮಾ ಪಶ್ಯತ ರಾಯಸ್ಪೋಷೇಣ ವಃ ಪಶ್ಯಾಮಿ ರಾಯಸ್ಪೋಷೇಣ ಮಾ ಪಶ್ಯತೇಡಾ-ಸ್ಸ್ಥ ಮಧುಕೃತಃ ಸ್ಯೋನಾ ಮಾ ಽಽವಿಶತೇರಾ ಮದಃ । ಸಹಸ್ರಪೋಷಂ-ವಃ ಁಪುಷ್ಯಾಸ- [ಪುಷ್ಯಾಸಮ್, ಮಯಿ] 23
ಮ್ಮಯಿ ವೋ ರಾಯಃ ಶ್ರಯನ್ತಾಮ್ ॥ ತಥ್ಸವಿತು-ರ್ವರೇಣ್ಯ-ಮ್ಭರ್ಗೋ ದೇವಸ್ಯ ಧೀಮಹಿ । ಧಿಯೋ ಯೋನಃ ಪ್ರಚೋದಯಾತ್ ॥ ಸೋಮಾನಗ್ಗ್ ಸ್ವರಣ-ಙ್ಕೃಣುಹಿ ಬ್ರಹ್ಮಣಸ್ಪತೇ । ಕಕ್ಷೀವನ್ತಂ-ಯಁ ಔಶಿಜಮ್ ॥ ಕದಾ ಚನ ಸ್ತರೀರಸಿ ನೇನ್ದ್ರ ಸಶ್ಚಸಿ ದಾಶುಷೇ ॥ ಉಪೋಪೇನ್ನು ಮಘವ-ನ್ಭುಯ ಇನ್ನು ತೇ ದಾನ-ನ್ದೇವಸ್ಯ ಪೃಚ್ಯತೇ ॥ ಪರಿ ತ್ವಾ-ಽಗ್ನೇ ಪುರಂ-ವಁಯಂ-ವಿಁಪ್ರಗ್ಂ ಸಹಸ್ಯ ಧೀಮಹಿ ॥ ಧೃಷದ್ವರ್ಣ-ನ್ದಿವೇದಿವೇ ಭೇತ್ತಾರ-ಮ್ಭಙ್ಗುರಾವತಃ ॥ ಅಗ್ನೇ ಗೃಹಪತೇ ಸುಗೃಹಪತಿರಹ-ನ್ತ್ವಯಾ ಗೃಹಪತಿನಾ ಭೂಯಾಸಗ್ಂ ಸುಗೃಹಪತಿರ್ಮಯಾ ತ್ವ-ಙ್ಗೃಹಪತಿನಾ ಭೂಯಾ-ಶ್ಶತಗ್ಂ ಹಿಮಾಸ್ತಾಮಾಶಿಷಮಾ ಶಾಸೇ ತನ್ತವೇ ಜ್ಯೋತಿಷ್ಮತೀ-ನ್ತಾಮಾಶಿಷಮಾ ಶಾಸೇ-ಽಮುಷ್ಮೈ ಜ್ಯೋತಿಷ್ಮತೀಮ್ ॥ 24 ॥

(ಭೂಯಾಸ್ತ-ಸ್ವಸ್ತಯೇ-ಽಗ್ನೇ-ಪುಷ್ಯಾಸಂ-ಧೃಷದ್ವರ್ಣ-ಮೇಕಾನ್ನತ್ರಿಗ್ಂಶಚ್ಚ ) (ಅ. 6)
ಅಯಜ್ಞೋ ವಾ ಏಷ ಯೋ-ಽಸಾಮೋಪಪ್ರಯನ್ತೋ ಅದ್ಧ್ವರಮಿತ್ಯಾಹ ಸ್ತೋಮಮೇವಾಸ್ಮೈ ಯುನಕ್ತ್ಯುಪೇತ್ಯಾಹ ಪ್ರಜಾ ವೈ ಪಶವ ಉಪೇಮಂ-ಲೋಁಕ-ಮ್ಪ್ರಜಾಮೇವ ಪಶೂನಿಮಂ-ಲೋಁಕಮುಪೈತ್ಯಸ್ಯ ಪ್ರತ್ನಾಮನು ದ್ಯುತಮಿತ್ಯಾಹ ಸುವರ್ಗೋ ವೈ ಲೋಕಃ ಪ್ರತ್ನ-ಸ್ಸುವರ್ಗಮೇವ ಲೋಕಗ್ಂ ಸಮಾರೋಹತ್ಯಗ್ನಿ-ರ್ಮೂರ್ಧಾ ದಿವಃ ಕಕುದಿತ್ಯಾಹ ಮೂರ್ಧಾನ- [ಮೂರ್ಧಾನಮ್, ಏವೈನಗ್ಂ] 25
ಮೇವೈನಗ್ಂ ಸಮಾನಾನಾ-ಙ್ಕರೋತ್ಯಥೋ ದೇವಲೋಕಾದೇವ ಮನುಷ್ಯಲೋಕೇ ಪ್ರತಿ ತಿಷ್ಠತ್ಯಯಮಿಹ ಪ್ರಥಮೋ ಧಾಯಿ ಧಾತೃಭಿರಿತ್ಯಾಹ ಮುಖ್ಯಮೇವೈನ-ಙ್ಕರೋತ್ಯುಭಾ ವಾಮಿನ್ದ್ರಾಗ್ನೀ ಆಹುವದ್ಧ್ಯಾ ಇತ್ಯಾಹೌಜೋ ಬಲಮೇವಾವ ರುನ್ಧೇ ಽಯ-ನ್ತೇ ಯೋನಿರ್-ಋತ್ವಿಯ ಇತ್ಯಾಹ ಪಶವೋ ವೈ ರಯಿಃ ಪಶೂನೇವಾವ ರುನ್ಧೇ ಷಡ್ಭಿರುಪ ತಿಷ್ಠತೇ ಷಡ್ವಾ [ಷಡ್ವೈ, ಋತವ ಋತುಷ್ವೇವ] 26
ಋತವ ಋತುಷ್ವೇವ ಪ್ರತಿ ತಿಷ್ಠತಿ ಷಡ್ಭಿರುತ್ತರಾಭಿರುಪ ತಿಷ್ಠತೇ ದ್ವಾದಶ ಸ-ಮ್ಪದ್ಯನ್ತೇ ದ್ವಾದಶ ಮಾಸಾ-ಸ್ಸಂವಁಥ್ಸರ-ಸ್ಸಂಁವಥ್ಸರ ಏವ ಪ್ರತಿ ತಿಷ್ಠತಿ ಯಥಾ ವೈ ಪುರುಷೋ-ಽಶ್ವೋ ಗೌ-ರ್ಜೀರ್ಯತ್ಯೇವ-ಮಗ್ನಿರಾಹಿತೋ ಜೀರ್ಯತಿ ಸಂವಁಥ್ಸರಸ್ಯ ಪರಸ್ತಾದಾಗ್ನಿಪಾವಮಾನೀಭಿ-ರುಪ ತಿಷ್ಠತೇ ಪುನರ್ನವ-ಮೇವೈನ-ಮಜರ-ಙ್ಕರೋತ್ಯಥೋ ಪುನಾತ್ಯೇವೋಪ ತಿಷ್ಠತೇ ಯೋಗ ಏವಾಸ್ಯೈಷ ಉಪ ತಿಷ್ಠತೇ [ಉಪ ತಿಷ್ಠತೇ, ದಮ ಏವಾಸ್ಯೈಷ] 27
ದಮ ಏವಾಸ್ಯೈಷ ಉಪ ತಿಷ್ಠತೇ ಯಾಚ್ಞೈವಾ-ಽಸ್ಯೈಷೋಪ ತಿಷ್ಠತೇ ಯಥಾ ಪಾಪೀಯಾಞ್ಛ್ರೇಯಸ ಆಹೃತ್ಯ ನಮಸ್ಯತಿ ತಾದೃಗೇವ ತದಾಯುರ್ದಾ ಅಗ್ನೇ-ಽಸ್ಯಾಯುರ್ಮೇ ದೇಹೀತ್ಯಾಹಾ-ಽಽಯುರ್ದಾ ಹ್ಯೇಷ ವರ್ಚೋದಾ ಅಗ್ನೇ-ಽಸಿ ವರ್ಚೋ ಮೇ ದೇಹೀತ್ಯಾಹ ವರ್ಚೋದಾ ಹ್ಯೇಷ ತನೂಪಾ ಅಗ್ನೇ-ಽಸಿ ತನುವ-ಮ್ಮೇ ಪಾಹೀತ್ಯಾಹ [ಪಾಹೀತ್ಯಾಹ, ತನೂಪಾ] 28
ತನೂಪಾ ಹ್ಯೇಷೋ-ಽಗ್ನೇ ಯನ್ಮೇ ತನುವಾ ಊನ-ನ್ತನ್ಮ ಆ ಪೃಣೇತ್ಯಾಹ ಯನ್ಮೇ ಪ್ರಜಾಯೈ ಪಶೂನಾಮೂನ-ನ್ತನ್ಮ ಆ ಪೂರಯೇತಿ ವಾವೈತದಾಹ ಚಿತ್ರಾವಸೋ ಸ್ವಸ್ತಿ ತೇ ಪಾರಮಶೀಯೇತ್ಯಾಹ ರಾತ್ರಿ-ರ್ವೈ ಚಿತ್ರಾವಸುರವ್ಯುಷ್ಟ್ಯೈ ವಾ ಏತಸ್ಯೈ ಪುರಾ ಬ್ರಾಹ್ಮಣಾ ಅಭೈಷು-ರ್ವ್ಯುಷ್ಟಿಮೇವಾವ ರುನ್ಧ ಇನ್ಧಾನಾಸ್ತ್ವಾ ಶತಗ್ಂ [ಶತಮ್, ಹಿಮಾ ಇತ್ಯಾಹ] 29
ಹಿಮಾ ಇತ್ಯಾಹ ಶತಾಯುಃ ಪುರುಷ-ಶ್ಶತೇನ್ದ್ರಿಯ ಆಯುಷ್ಯೇವೇನ್ದ್ರಿಯೇ ಪ್ರತಿ ತಿಷ್ಠತ್ಯೇಷಾ ವೈ ಸೂರ್ಮೀ ಕರ್ಣಕಾವತ್ಯೇತಯಾ ಹ ಸ್ಮ ವೈ ದೇವಾ ಅಸುರಾಣಾಗ್ಂ ಶತತರ್ಹಾಗ್ ಸ್ತೃಗ್ಂಹನ್ತಿ ಯದೇತಯಾ ಸಮಿಧಮಾದಧಾತಿ ವಜ್ರಮೇವೈತಚ್ಛತಘ್ನೀಂ-ಯಁಜಮಾನೋ ಭ್ರಾತೃವ್ಯಾಯ ಪ್ರ ಹರತಿ ಸ್ತೃತ್ಯಾ ಅಛಮ್ಬಟ್ಕಾರಗ್ಂ ಸ-ನ್ತ್ವಮಗ್ನೇ ಸೂರ್ಯಸ್ಯ ವರ್ಚಸಾ-ಽಗಥಾ ಇತ್ಯಾಹೈತತ್ತ್ವಮಸೀದಮಹ-ಮ್ಭೂಯಾಸಮಿತಿ ವಾವೈತದಾಹ ತ್ವಮಗ್ನೇ ಸೂರ್ಯವರ್ಚಾ ಅಸೀತ್ಯಾಹಾ-ಽಽಶಿಷಮೇವೈತಾಮಾ ಶಾಸ್ತೇ ॥ 30 ॥

(ಮೂರ್ಧಾನಗ್ಂ-ಷಡ್ವಾ-ಏಷ ಉಪ ತಿಷ್ಠತೇ-ಪಾಹೀತ್ಯಾಹ-ಶತ-ಮಹಗ್ಂ ಷೋಡಶ ಚ) (ಅ. 7)
ಸ-ಮ್ಪಶ್ಯಾಮಿ ಪ್ರಜಾ ಅಹಮಿತ್ಯಾಹ ಯಾವನ್ತ ಏವ ಗ್ರಾಮ್ಯಾಃ ಪಶವಸ್ತಾನೇವಾವ ರುನ್ಧೇ-ಽಮ್ಭ-ಸ್ಸ್ಥಾಮ್ಭೋ ವೋ ಭಕ್ಷೀಯೇತ್ಯಾಹಾಮ್ಭೋ ಹ್ಯೇತಾ ಮಹಃ ಸ್ಥ ಮಹೋ ವೋ ಭಕ್ಷೀಯೇತ್ಯಾಹ ಮಹೋ ಹ್ಯೇತಾ-ಸ್ಸಹಃ ಸ್ಥ ಸಹೋ ವೋ ಭಕ್ಷೀಯೇತ್ಯಾಹ ಸಹೋ ಹ್ಯೇತಾ ಊರ್ಜ-ಸ್ಸ್ಥೋರ್ಜಂ-ವೋಁ ಭಕ್ಷೀಯೇ- [ಭಕ್ಷೀಯೇತಿ, ಆಹೋರ್ಜೋ ಹ್ಯೇತಾ] 31
-ತ್ಯಾಹೋರ್ಜೋ ಹ್ಯೇತಾ ರೇವತೀ ರಮದ್ಧ್ವಮಿತ್ಯಾಹ ಪಶವೋ ವೈ ರೇವತೀಃ ಪಶೂನೇವಾತ್ಮ-ನ್ರಮಯತ ಇಹೈವ ಸ್ತೇತೋ ಮಾ-ಽಪ ಗಾತೇತ್ಯಾಹ ಧ್ರುವಾ ಏವೈನಾ ಅನಪಗಾಃ ಕುರುತ ಇಷ್ಟಕಚಿದ್ವಾ ಅನ್ಯೋ-ಽಗ್ನಿಃ ಪಶುಚಿದನ್ಯ-ಸ್ಸಗ್ಂಹಿತಾಸಿ ವಿಶ್ವರೂಪೀರಿತಿ ವಥ್ಸಮಭಿ ಮೃಶತ್ಯುಪೈವೈನ-ನ್ಧತ್ತೇ ಪಶುಚಿತಮೇನ-ಙ್ಕುರುತೇ ಪ್ರ [ ] 32
ವಾ ಏಷೋ-ಽಸ್ಮಾಲ್ಲೋಕಾಚ್ಚ್ಯವತೇ ಯ ಆಹವನೀಯ-ಮುಪತಿಷ್ಠತೇ ಗಾರ್ಹಪತ್ಯಮುಪ ತಿಷ್ಠತೇ ಽಸ್ಮಿನ್ನೇವ ಲೋಕೇ ಪ್ರತಿ ತಿಷ್ಠತ್ಯಥೋ ಗಾರ್ಹಪತ್ಯಾಯೈವ ನಿ ಹ್ನುತೇ ಗಾಯತ್ರೀಭಿರುಪ ತಿಷ್ಠತೇ ತೇಜೋ ವೈ ಗಾಯತ್ರೀ ತೇಜ ಏವಾತ್ಮ-ನ್ಧತ್ತೇ-ಽಥೋ ಯದೇತ-ನ್ತೃಚಮನ್ವಾಹ ಸನ್ತತ್ಯೈ ಗಾರ್ಹಪತ್ಯಂ-ವಾಁ ಅನು ದ್ವಿಪಾದೋ ವೀರಾಃ ಪ್ರ ಜಾಯನ್ತೇ ಯ ಏವಂ-ವಿಁದ್ವಾ-ನ್ದ್ವಿಪದಾಭಿ-ರ್ಗಾರ್ಹಪತ್ಯ-ಮುಪತಿಷ್ಠತ [ಮುಪತಿಷ್ಠತೇ, ಆ-ಽಸ್ಯ] 33
ಆ-ಽಸ್ಯ ವೀರೋ ಜಾಯತ ಊರ್ಜಾ ವಃ ಪಶ್ಯಾಮ್ಯೂರ್ಜಾ ಮಾ ಪಶ್ಯತೇತ್ಯಾಹಾ ಽಽಶಿಷಮೇವೈತಾಮಾ ಶಾಸ್ತೇ ತಥ್ಸವಿತು-ರ್ವರೇಣ್ಯಮಿತ್ಯಾಹ ಪ್ರಸೂತ್ಯೈ ಸೋಮಾನಗ್ಗ್ ಸ್ವರಣಮಿತ್ಯಾಹ ಸೋಮಪೀಥಮೇವಾವ ರುನ್ಧೇ ಕೃಣುಹಿ ಬ್ರಹ್ಮಣಸ್ಪತ ಇತ್ಯಾಹ ಬ್ರಹ್ಮವರ್ಚಸಮೇವಾವ ರುನ್ಧೇ ಕದಾ ಚನ ಸ್ತರೀರಸೀತ್ಯಾಹ ನ ಸ್ತರೀಗ್ಂ ರಾತ್ರಿಂ-ವಁಸತಿ [ರಾತ್ರಿಂ-ವಁಸತಿ, ಯ ಏವಂ] 34
ಯ ಏವಂ-ವಿಁದ್ವಾನಗ್ನಿ-ಮುಪತಿಷ್ಠತೇ ಪರಿ ತ್ವಾ-ಽಗ್ನೇ ಪುರಂ-ವಁಯಮಿತ್ಯಾಹ ಪರಿಧಿಮೇವೈತ-ಮ್ಪರಿ ದಧಾತ್ಯಸ್ಕನ್ದಾಯಾಗ್ನೇ ಗೃಹಪತ ಇತ್ಯಾಹ ಯಥಾಯಜುರೇವೈತಚ್ಛತಗ್ಂ ಹಿಮಾ ಇತ್ಯಾಹ ಶತ-ನ್ತ್ವಾ ಹೇಮನ್ತಾನಿನ್ಧಿಷೀಯೇತಿ ವಾವೈತದಾಹ ಪುತ್ರಸ್ಯ ನಾಮ ಗೃಹ್ಣಾತ್ಯನ್ನಾದಮೇವೈನ-ಙ್ಕರೋತಿ ತಾಮಾಶಿಷಮಾ ಶಾಸೇ ತನ್ತವೇ ಜ್ಯೋತಿಷ್ಮತೀಮಿತಿ ಬ್ರೂಯಾದ್ಯಸ್ಯ ಪುತ್ರೋ-ಽಜಾತ-ಸ್ಸ್ಯಾ-ತ್ತೇಜಸ್ವ್ಯೇವಾಸ್ಯ ಬ್ರಹ್ಮವರ್ಚಸೀ ಪುತ್ರೋ ಜಾಯತೇ ತಾಮಾಶಿಷಮಾ ಶಾಸೇ ಽಮುಷ್ಮೈ ಜ್ಯೋತಿಷ್ಮತೀ ಮಿತಿ ಬ್ರೂಯಾದ್ಯಸ್ಯ ಪುತ್ರೋ ಜಾತ-ಸ್ಸ್ಯಾ-ತ್ತೇಜ ಏವಾಸ್ಮಿ-ನ್ಬ್ರಹ್ಮವರ್ಚಸ-ನ್ದಧಾತಿ ॥ 35 ॥

(ಊರ್ಜಂ-ವೋಁ ಭಕ್ಷೀಯೇತಿ - ಪ್ರ -ಗಾರ್ಹಪತ್ಯಮುಪತಿಷ್ಠತೇ -ವಸತಿ-ಜ್ಯೋತಿಷ್ಮತೀ - ಮೇಕಾನ್ನತ್ರಿಗ್ಂಶಚ್ಚ) (ಅ. 8)
ಅಗ್ನಿಹೋತ್ರ-ಞ್ಜುಹೋತಿ ಯದೇವ ಕಿ-ಞ್ಚ ಯಜಮಾನಸ್ಯ ಸ್ವ-ನ್ತಸ್ಯೈವ ತದ್ರೇತಃ ಸಿಞ್ಚತಿ ಪ್ರಜನನೇ ಪ್ರಜನನಗ್ಂ ಹಿ ವಾ ಅಗ್ನಿರಥೌಷಧೀರನ್ತಗತಾ ದಹತಿ ತಾಸ್ತತೋ ಭೂಯಸೀಃ ಪ್ರ ಜಾಯನ್ತೇ ಯಥ್ಸಾಯ-ಞ್ಜುಹೋತಿ ರೇತ ಏವ ತಥ್ಸಿಞ್ಚತಿ ಪ್ರೈವ ಪ್ರಾತಸ್ತನೇನ ಜನಯತಿ ತದ್ರೇತಃ ಸಿಕ್ತ-ನ್ನ ತ್ವಷ್ಟ್ರಾ-ಽವಿಕೃತ-ಮ್ಪ್ರಜಾಯತೇ ಯಾವಚ್ಛೋ ವೈ ರೇತಸ-ಸ್ಸಿಕ್ತಸ್ಯ [ರೇತಸ-ಸ್ಸಿಕ್ತಸ್ಯ, ತ್ವಷ್ಟಾ ರೂಪಾಣಿ] 36
ತ್ವಷ್ಟಾ ರೂಪಾಣಿ ವಿಕರೋತಿ ತಾವಚ್ಛೋ ವೈ ತತ್ಪ್ರ ಜಾಯತ ಏಷ ವೈ ದೈವ್ಯಸ್ತ್ವಷ್ಟಾ ಯೋ ಯಜತೇ ಬಹ್ವೀಭಿರುಪ ತಿಷ್ಠತೇ ರೇತಸ ಏವ ಸಿಕ್ತಸ್ಯ ಬಹುಶೋ ರೂಪಾಣಿ ವಿ ಕರೋತಿ ಸ ಪ್ರೈವ ಜಾಯತೇ ಶ್ವಸ್ಶ್ವೋ ಭೂಯಾ-ನ್ಭವತಿ ಯ ಏವಂ ಁವಿದ್ವಾನಗ್ನಿಮುಪತಿಷ್ಠತೇ ಽಹರ್ದೇವಾನಾಮಾಸೀ-ದ್- ರಾತ್ರಿರಸುರಾಣಾ-ನ್ತೇ-ಽಸುರಾ ಯದ್ದೇವಾನಾಂ-ವಿಁತ್ತಂ ಁವೇದ್ಯಮಾಸೀತ್ತೇನ ಸಹ [ ] 37
ರಾತ್ರಿ-ಮ್ಪ್ರಾ-ಽವಿಶನ್ತೇ ದೇವಾ ಹೀನಾ ಅಮನ್ಯನ್ತ ತೇ-ಽಪಶ್ಯನ್ನಾಗ್ನೇಯೀ ರಾತ್ರಿರಾಗ್ನೇಯಾಃ ಪಶವ ಇಮಮೇವಾಗ್ನಿಗ್ಗ್ ಸ್ತವಾಮ ಸ ನಃ ಸ್ತುತಃ ಪಶೂ-ನ್ಪುನರ್ದಾಸ್ಯತೀತಿ ತೇ-ಽಗ್ನಿಮಸ್ತುವನ್-ಥ್ಸ ಏಭ್ಯ-ಸ್ಸ್ತುತೋ ರಾತ್ರಿಯಾ ಅದ್ಧ್ಯಹರಭಿ ಪಶೂನ್ನಿರಾರ್ಜತ್ತೇ ದೇವಾಃ ಪಶೂನ್ ವಿತ್ತ್ವಾ ಕಾಮಾಗ್ಂ ಅಕುರ್ವತ ಯ ಏವಂ-ವಿಁದ್ವಾನಗ್ನಿಮುಪತಿಷ್ಠತೇ ಪಶುಮಾ-ನ್ಭವ- [ಪಶುಮಾ-ನ್ಭವತಿ, ಆದಿತ್ಯೋ] 38
-ತ್ಯಾದಿತ್ಯೋ ವಾ ಅಸ್ಮಾಲ್ಲೋಕಾದಮುಂ-ಲೋಁಕಮೈಥ್ಸೋ-ಽಮುಂ-ಲೋಁಕ-ಙ್ಗತ್ವಾ ಪುನರಿಮಂ-ಲೋಁಕಮಭ್ಯದ್ಧ್ಯಾಯ-ಥ್ಸ ಇಮಂ-ಲೋಁಕಮಾಗತ್ಯ ಮೃತ್ಯೋರಬಿಭೇನ್ಮೃತ್ಯುಸಂಯುಁತ ಇವ ಹ್ಯಯಂ-ಲೋಁಕ-ಸ್ಸೋ-ಽಮನ್ಯತೇಮ-ಮೇವಾಗ್ನಿಗ್ಗ್ ಸ್ತವಾನಿ ಸ ಮಾ ಸ್ತುತ-ಸ್ಸುವರ್ಗಂ-ಲೋಁಕ-ಙ್ಗಮಯಿಷ್ಯತೀತಿ ಸೋ-ಽಗ್ನಿಮಸ್ತೌ-ಥ್ಸ ಏನಗ್ಗ್ ಸ್ತುತ-ಸ್ಸುವರ್ಗಂ-ಲೋಁಕಮಗಮಯದ್ಯ [ಲೋಕಮಗಮಯದ್ಯಃ, ಏವಂ-ವಿಁದ್ವಾನಗ್ನಿ-] 39
ಏವಂ-ವಿಁದ್ವಾನಗ್ನಿಮುಪತಿಷ್ಠತೇ ಸುವರ್ಗಮೇವ ಲೋಕಮೇತಿ ಸರ್ವಮಾಯುರೇತ್ಯಭಿ ವಾ ಏಷೋ-ಽಗ್ನೀ ಆ ರೋಹತಿ ಯ ಏನಾವುಪತಿಷ್ಠತೇ ಯಥಾ ಖಲು ವೈ ಶ್ರೇಯಾನಭ್ಯಾರೂಢಃ ಕಾಮಯತೇ ತಥಾ ಕರೋತಿ ನಕ್ತಮುಪ ತಿಷ್ಠತೇ ನ ಪ್ರಾತ-ಸ್ಸಗ್ಂ ಹಿ ನಕ್ತಂ-ವ್ರಁತಾನಿ ಸೃಜ್ಯನ್ತೇ ಸಹ ಶ್ರೇಯಾಗ್ಶ್ಚ ಪಾಪೀಯಾಗ್ಶ್ಚಾಸಾತೇ ಜ್ಯೋತಿರ್ವಾ ಅಗ್ನಿಸ್ತಮೋ ರಾತ್ರಿರ್ಯ- [ರಾತ್ರಿರ್ಯತ್, ನಕ್ತಮುಪತಿಷ್ಠತೇ] 40
-ನ್ನಕ್ತಮುಪತಿಷ್ಠತೇ ಜ್ಯೋತಿಷೈವ ತಮಸ್ತರತ್ಯುಪಸ್ಥೇಯೋ ಽಗ್ನೀ(3)-ರ್ನೋಪಸ್ಥೇಯಾ(3) ಇತ್ಯಾಹು-ರ್ಮನುಷ್ಯಾಯೇನ್ನ್ವೈ ಯೋ-ಽಹರಹರಾಹೃತ್ಯಾ-ಽಥೈನಂ-ಯಾಁಚತಿ ಸ ಇನ್ನ್ವೈ ತಮುಪಾರ್ಚ್ಛತ್ಯಥ ಕೋ ದೇವಾನಹರಹರ್ಯಾಚಿಷ್ಯತೀತಿ ತಸ್ಮಾನ್ನೋಪಸ್ಥೇಯೋ ಽಥೋ ಖಲ್ವಾಹುರಾಶಿಷೇ ವೈ ಕಂ-ಯಁಜಮಾನೋ ಯಜತ ಇತ್ಯೇಷಾ ಖಲು ವಾ [ಖಲು ವೈ, ಆಹಿತಾಗ್ನೇ-] 41
ಆಹಿತಾಗ್ನೇ ರಾಶೀ-ರ್ಯದಗ್ನಿಮುಪತಿಷ್ಠತೇ ತಸ್ಮಾದುಪಸ್ಥೇಯಃ ಪ್ರಜಾಪತಿಃ ಪಶೂನಸೃಜತ ತೇ ಸೃಷ್ಟಾ ಅಹೋರಾತ್ರೇ ಪ್ರಾ-ಽವಿಶ-ನ್ತಾಞ್ಛನ್ದೋಭಿ-ರನ್ವವಿನ್ದ-ದ್ಯಚ್ಛನ್ದೋಭಿ-ರುಪತಿಷ್ಠತೇ ಸ್ವಮೇವ ತದನ್ವಿಚ್ಛತಿ ನ ತತ್ರ ಜಾಮ್ಯಸ್ತೀತ್ಯಾಹುರ್ಯೋ-ಽಹರಹರುಪ ತಿಷ್ಠತ ಇತಿ ಯೋ ವಾ ಅಗ್ನಿ-ಮ್ಪ್ರತ್ಯಙ್ಙುಪ ತಿಷ್ಠತೇ ಪ್ರತ್ಯೇನಮೋಷತಿ ಯಃ ಪರಾಂ-ವಿಁಷ್ವ-ಮ್ಪ್ರಜಯಾ ಪಶುಭಿ ರೇತಿ ಕವಾತಿರ್ಯಙ್ಙಿವೋಪ ತಿಷ್ಠೇತ ನೈನ-ಮ್ಪ್ರತ್ಯೋಷತಿ ನ ವಿಷ್ವ-ಮ್ಪ್ರಜಯಾ ಪಶುಭಿರೇತಿ ॥ 42 ॥

(ಸಿಕ್ತಸ್ಯ-ಸಹ-ಭವತಿ-ಯೋ-ಯತ್-ಖಲು ವೈ-ಪಶುಭಿ-ಸ್ತ್ರಯೋದಶ ಚ) (ಅ. 9)
ಮಮ ನಾಮ ಪ್ರಥಮ-ಞ್ಜಾತವೇದಃ ಪಿತಾ ಮಾತಾ ಚ ದಧತುರ್ಯದಗ್ರೇ । ತತ್ತ್ವ-ಮ್ಬಿಭೃಹಿ ಪುನರಾ ಮದೈತೋಸ್ತವಾಹ-ನ್ನಾಮ ಬಿಭರಾಣ್ಯಗ್ನೇ ॥ ಮಮ ನಾಮ ತವ ಚ ಜಾತವೇದೋ ವಾಸಸೀ ಇವ ವಿವಸಾನೌ ಯೇ ಚರಾವಃ । ಆಯುಷೇ ತ್ವ-ಞ್ಜೀವಸೇ ವಯಂ-ಯಁಥಾಯಥಂ-ವಿಁ ಪರಿ ದಧಾವಹೈ ಪುನಸ್ತೇ ॥ ನಮೋ-ಽಗ್ನಯೇ ಽಪ್ರತಿವಿದ್ಧಾಯ ನಮೋ-ಽನಾಧೃಷ್ಟಾಯ ನಮಃ ಸಮ್ರಾಜೇ । ಅಷಾಢೋ [ಅಷಾಢಃ, ಅಗ್ನಿರ್ಬೃಹದ್ವಯಾ] 43
ಅಗ್ನಿರ್ಬೃಹದ್ವಯಾ ವಿಶ್ವಜಿ-ಥ್ಸಹನ್ತ್ಯ-ಶ್ಶ್ರೇಷ್ಠೋ ಗನ್ಧರ್ವಃ । ತ್ವತ್ಪಿತಾರೋ ಅಗ್ನೇ ದೇವಾ-ಸ್ತ್ವಾಮಾಹುತಯ-ಸ್ತ್ವದ್ವಿವಾಚನಾಃ । ಸ-ಮ್ಮಾಮಾಯುಷಾ ಸ-ಙ್ಗೌಪತ್ಯೇನ ಸುಹಿತೇ ಮಾ ಧಾಃ ॥ ಅಯಮಗ್ನಿ-ಶ್ಶ್ರೇಷ್ಠತಮೋ ಽಯ-ಮ್ಭಗವತ್ತಮೋ ಽಯಗ್ಂ ಸಹಸ್ರಸಾತಮಃ । ಅಸ್ಮಾ ಅಸ್ತು ಸುವೀರ್ಯಮ್ ॥ ಮನೋ ಜ್ಯೋತಿ-ರ್ಜುಷತಾಮಾಜ್ಯಂ ಁವಿಚ್ಛಿನ್ನಂ-ಯಁಜ್ಞಗ್ಂ ಸಮಿಮ-ನ್ದಧಾತು । ಯಾ ಇಷ್ಟಾ ಉಷಸೋ ನಿಮ್ರುಚಶ್ಚ ತಾ-ಸ್ಸ-ನ್ದಧಾಮಿ ಹವಿಷಾ ಘೃತೇನ ॥ ಪಯಸ್ವತೀರೋಷಧಯಃ- [ಪಯಸ್ವತೀರೋಷಧಯಃ, ಪಯಸ್ವ-] 44
ಪಯಸ್ವದ್ವೀರುಧಾ-ಮ್ಪಯಃ । ಅಪಾ-ಮ್ಪಯಸೋ ಯತ್ಪಯಸ್ತೇನ ಮಾಮಿನ್ದ್ರ ಸಗ್ಂ ಸೃಜ ॥ ಅಗ್ನೇ ವ್ರತಪತೇ ವ್ರತ-ಞ್ಚರಿಷ್ಯಾಮಿ ತಚ್ಛಕೇಯ-ನ್ತನ್ಮೇ ರಾದ್ಧ್ಯತಾಮ್ ॥ ಅಗ್ನಿಗ್ಂ ಹೋತಾರಮಿಹ ತಗ್ಂ ಹುವೇ ದೇವಾನ್. ಯಜ್ಞಿಯಾನಿಹ ಯಾನ್. ಹವಾಮಹೇ ॥ ಆ ಯನ್ತು ದೇವಾ-ಸ್ಸುಮನಸ್ಯಮಾನಾ ವಿಯನ್ತು ದೇವಾ ಹವಿಷೋ ಮೇ ಅಸ್ಯ ॥ ಕಸ್ತ್ವಾ ಯುನಕ್ತಿ ಸ ತ್ವಾ ಯುನಕ್ತು ಯಾನಿ ಘರ್ಮೇ ಕಪಾಲಾನ್ಯುಪಚಿನ್ವನ್ತಿ [ ] 45
ವೇಧಸಃ । ಪೂಷ್ಣಸ್ತಾನ್ಯಪಿ ವ್ರತ ಇನ್ದ್ರವಾಯೂ ವಿ ಮುಞ್ಚತಾಮ್ ॥ಅಭಿನ್ನೋ ಘರ್ಮೋ ಜೀರದಾನುರ್ಯತ ಆತ್ತಸ್ತದಗ-ನ್ಪುನಃ । ಇದ್ಧ್ಮೋ ವೇದಿಃ ಪರಿಧಯಶ್ಚ ಸರ್ವೇ ಯಜ್ಞಸ್ಯಾ-ಽಽಯುರನು ಸ-ಞ್ಚರನ್ತಿ ॥ ತ್ರಯಸ್ತ್ರಿಗ್ಂಶ-ತ್ತನ್ತವೋ ಯೇ ವಿತತ್ನಿರೇ ಯ ಇಮಂ-ಯಁಜ್ಞಗ್ಗ್ ಸ್ವಧಯಾ ದದನ್ತೇ ತೇಷಾ-ಞ್ಛಿನ್ನ-ಮ್ಪ್ರತ್ಯೇತ-ದ್ದಧಾಮಿ ಸ್ವಾಹಾ ಘರ್ಮೋ ದೇವಾಗ್ಂ ಅಪ್ಯೇತು ॥ 46 ॥

(ಅಷಾಢ-ಓಷಧಯ-ಉಪಚಿನ್ವನ್ತಿ-ಪಞ್ಚಚತ್ವಾರಿಗ್ಂಶಚ್ಚ) (ಅ. 10)
ವೈಶ್ವಾನರೋ ನ ಊತ್ಯಾ-ಽಽ ಪ್ರ ಯಾತು ಪರಾವತಃ । ಅಗ್ನಿರುಕ್ಥೇನ ವಾಹಸಾ ॥ ಋತಾವಾನಂ-ವೈಁಶ್ವಾನರಮೃತಸ್ಯ ಜ್ಯೋತಿಷಸ್ಪತಿಮ್ । ಅಜಸ್ರ-ಙ್ಘರ್ಮಮೀಮಹೇ ॥ ವೈಶ್ವಾನರಸ್ಯ ದಗ್ಂಸನಾಭ್ಯೋ ಬೃಹದರಿಣಾದೇಕಃ ಸ್ವಪಸ್ಯಯಾ ಕವಿಃ । ಉಭಾ ಪಿತರಾ ಮಹಯನ್ನಜಾಯತಾಗ್ನಿ-ರ್ದ್ಯಾವಾಪೃಥಿವೀ ಭೂರಿರೇತಸಾ ॥ ಪೃಷ್ಟೋ ದಿವಿ ಪೃಷ್ಟೋ ಅಗ್ನಿಃ ಪೃಥಿವ್ಯಾ-ಮ್ಪೃಷ್ಟೋ ವಿಶ್ವಾ ಓಷಧೀರಾ ವಿವೇಶ । ವೈಶ್ವಾನರ-ಸ್ಸಹಸಾ ಪೃಷ್ಟೋ ಅಗ್ನಿ-ಸ್ಸನೋ ದಿವಾ ಸ- [ದಿವಾ ಸಃ, ರಿಷಃ ಪಾತು ನಕ್ತಮ್ ।] 47
ರಿಷಃ ಪಾತು ನಕ್ತಮ್ ॥ ಜಾತೋ ಯದಗ್ನೇ ಭುವನಾ ವ್ಯಖ್ಯಃ ಪಶು-ನ್ನ ಗೋಪಾ ಇರ್ಯಃ ಪರಿಜ್ಮಾ । ವೈಶ್ವಾನರ ಬ್ರಹ್ಮಣೇ ವಿನ್ದ ಗಾತುಂ-ಯೂಁಯ-ಮ್ಪಾತ ಸ್ವಸ್ತಿಭಿ-ಸ್ಸದಾ ನಃ ॥ ತ್ವಮಗ್ನೇ ಶೋಚಿಷಾ ಶೋಶುಚಾನ ಆ ರೋದಸೀ ಅಪೃಣಾ ಜಾಯಮಾನಃ । ತ್ವ-ನ್ದೇವಾಗ್ಂ ಅಭಿಶಸ್ತೇರಮುಞ್ಚೋ ವೈಶ್ವಾನರ ಜಾತವೇದೋ ಮಹಿತ್ವಾ ॥ ಅಸ್ಮಾಕಮಗ್ನೇ ಮಘವಥ್ಸು ಧಾರಯಾನಾಮಿ ಕ್ಷತ್ರಮಜರಗ್ಂ ಸುವೀರ್ಯಮ್ । ವಯ-ಞ್ಜಯೇಮ ಶತಿನಗ್ಂ ಸಹಸ್ರಿಣಂ-ವೈಁಶ್ವಾನರ [ವೈಶ್ವಾನರ, ವಾಜಮಗ್ನೇ] 48
ವಾಜಮಗ್ನೇ ತವೋತಿಭಿಃ ॥ ವೈಶ್ವಾನರಸ್ಯ ಸುಮತೌ ಸ್ಯಾಮ ರಾಜಾ ಹಿಕ-ಮ್ಭುವನಾನಾ-ಮಭಿಶ್ರೀಃ । ಇತೋ ಜಾತೋ ವಿಶ್ವಮಿದಂ-ವಿಁ ಚಷ್ಟೇ ವೈಶ್ವಾನರೋ ಯತತೇ ಸೂರ್ಯೇಣ ॥ ಅವ ತೇ ಹೇಡೋ ವರುಣ ನಮೋಭಿರವ ಯಜ್ಞೇಭಿರೀಮಹೇ ಹವಿರ್ಭಿಃ । ಕ್ಷಯನ್ನಸ್ಮಭ್ಯಮಸುರ ಪ್ರಚೇತೋ ರಾಜನ್ನೇನಾಗ್ಂಸಿ ಶಿಶ್ರಥಃ ಕೃತಾನಿ ॥ ಉದುತ್ತಮಂ-ವಁರುಣ ಪಾಶಮಸ್ಮದವಾ-ಽಧಮಂ-ವಿಁಮದ್ಧ್ಯಮಗ್ಗ್ ಶ್ರಥಾಯ । ಅಥಾ ವಯಮಾದಿತ್ಯ [ ] 49
ವ್ರತೇ ತವಾ-ಽನಾಗಸೋ ಅದಿತಯೇ ಸ್ಯಾಮ ॥ ದಧಿಕ್ರಾವ್.ಣ್ಣೋ ಅಕಾರಿಷ-ಞ್ಜಿಷ್ಣೋರಶ್ವಸ್ಯ ವಾಜಿನಃ ॥ ಸುರಭಿನೋ ಮುಖಾ ಕರ-ತ್ಪ್ರಣ ಆಯೂಗ್ಂಷಿ ತಾರಿಷತ್ ॥ ಆ ದಧಿಕ್ರಾ-ಶ್ಶವಸ ಪಞ್ಚ ಕೃಷ್ಟೀ-ಸ್ಸೂರ್ಯ ಇವ ಜ್ಯೋತಿಷಾ-ಽಪಸ್ತತಾನ । ಸಹಸ್ರಸಾ-ಶ್ಶತಸಾ ವಾಜ್ಯರ್ವಾ ಪೃಣಕ್ತು ಮದ್ಧ್ವಾ ಸಮಿಮಾ ವಚಾಗ್ಂಸಿ । ಅಗ್ನಿ-ರ್ಮೂರ್ಧಾ, ಭುವಃ । ಮರುತೋ ಯದ್ಧವೋ ದಿವ-ಸ್ಸುಮ್ನಾಯನ್ತೋ ಹವಾಮಹೇ । ಆ ತೂ ನ [ಆ ತೂ ನಃ, ಉಪ ಗನ್ತನ ।] 50
ಉಪ ಗನ್ತನ ॥ ಯಾ ವ-ಶ್ಶರ್ಮ ಶಶಮಾನಾಯ ಸನ್ತಿ ತ್ರಿಧಾತೂನಿ ದಾಶುಷೇ ಯಚ್ಛತಾಧಿ । ಅಸ್ಮಭ್ಯ-ನ್ತಾನಿ ಮರುತೋ ವಿ ಯನ್ತ ರಯಿ-ನ್ನೋ ಧತ್ತ ವೃಷಣ-ಸ್ಸುವೀರಮ್ ॥ ಅದಿತಿ-ರ್ನ ಉರುಷ್ಯತ್ವದಿತಿ-ಶ್ಶರ್ಮ ಯಚ್ಛತು । ಅದಿತಿಃ ಪಾತ್ವಗ್ಂಹಸಃ ॥ ಮಹೀಮೂಷು ಮಾತರಗ್ಂ ಸುವ್ರತಾನಾಮೃತಸ್ಯ ಪತ್ನೀಮವಸೇ ಹುವೇಮ । ತುವಿಕ್ಷತ್ರಾ-ಮಜರನ್ತೀ-ಮುರೂಚೀಗ್ಂ ಸುಶರ್ಮಾಣಮದಿತಿಗ್ಂ ಸುಪ್ರಣೀತಿಮ್ ॥ ಸುತ್ರಾಮಾಣ-ಮ್ಪೃಥಿವೀ-ನ್ದ್ಯಾಮನೇಹಸಗ್ಂ ಸುಶರ್ಮಾಣ ಮದಿತಿಗ್ಂ ಸುಪ್ರಣೀತಿಮ್ । ದೈವೀ-ನ್ನಾವಗ್ಗ್ ಸ್ವರಿತ್ರಾ-ಮನಾಗಸ-ಮಸ್ರವನ್ತೀಮಾ ರುಹೇಮಾ ಸ್ವಸ್ತಯೇ ॥ ಇಮಾಗ್ಂ ಸು ನಾವಮಾ-ಽರುಹಗ್ಂ ಶತಾರಿತ್ರಾಗ್ಂ ಶತಸ್ಫ್ಯಾಮ್ । ಅಚ್ಛಿದ್ರಾ-ಮ್ಪಾರಯಿಷ್ಣುಮ್ ॥ 51 ॥