5.4 - ದೇವಾಸುರಾ ಸಂಯತ್ತಾ ಆಸನ್ನ್ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಚತುರ್ಥಃ ಪ್ರಶ್ನಃ - ಇಷ್ಟಕಾತ್ರಯಾಭಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ದೇವಾಸುರಾ-ಸ್ಸಂಯಁತ್ತಾ ಆಸ-ನ್ತೇ ನ ವ್ಯಜಯನ್ತ ಸ ಏತಾ ಇನ್ದ್ರಸ್ತನೂರಪಶ್ಯ-ತ್ತಾ ಉಪಾಧತ್ತ ತಾಭಿರ್ವೈ ಸ ತನುವಮಿನ್ದ್ರಿಯಂ-ವೀಁರ್ಯಮಾತ್ಮನ್ನಧತ್ತ ತತೋ ದೇವಾ ಅಭವ-ನ್ಪರಾ-ಽಸುರಾ ಯದಿನ್ದ್ರತನೂರುಪದಧಾತಿ ತನುವಮೇವ ತಾಭಿರಿನ್ದ್ರಿಯಂ-ವೀಁರ್ಯಂ-ಯಁಜಮಾನ ಆತ್ಮ-ನ್ಧತ್ತೇ-ಽಥೋ ಸೇನ್ದ್ರಮೇವಾಗ್ನಿಗ್ಂ ಸತನು-ಞ್ಚಿನುತೇ ಭವತ್ಯಾತ್ಮನಾ ಪರಾ-ಽಸ್ಯ ಭ್ರಾತೃವ್ಯೋ [ಭ್ರಾತೃವ್ಯಃ, ಭವತಿ ಯಜ್ಞೋ] 1
ಭವತಿ ಯಜ್ಞೋ ದೇವೇಭ್ಯೋ-ಽಪಾಕ್ರಾಮ-ತ್ತಮವರುಧ-ನ್ನಾಶಕ್ನುವನ್ತ ಏತಾ ಯಜ್ಞತನೂರಪಶ್ಯ-ನ್ತಾ ಉಪಾದಧತ ತಾಭಿರ್ವೈ ತೇ ಯಜ್ಞಮವಾರುನ್ಧತ ಯ-ದ್ಯಜ್ಞತನೂರುಪದಧಾತಿ ಯಜ್ಞಮೇವ ತಾಭಿರ್ಯಜಮಾನೋ-ಽವ ರುನ್ಧೇ ತ್ರಯಸ್ತ್ರಿಗ್ಂ ಶತಮುಪ ದಧಾತಿ ತ್ರಯಸ್ತ್ರಿಗ್ಂಶದ್ವೈ ದೇವತಾ ದೇವತಾ ಏವಾವ ರುನ್ಧೇ ಽಥೋ ಸಾತ್ಮಾನಮೇವಾಗ್ನಿಗ್ಂ ಸತನು-ಞ್ಚಿನುತೇ ಸಾತ್ಮಾ-ಽಮುಷ್ಮಿ-ಲ್ಲೋಁಕೇ [-ಽಮುಷ್ಮಿ-ಲ್ಲೋಁಕೇ, ಭವತಿ ಯ] 2
ಭವತಿ ಯ ಏವಂ-ವೇಁದ ಜ್ಯೋತಿಷ್ಮತೀರುಪ ದಧಾತಿ ಜ್ಯೋತಿರೇವಾಸ್ಮಿ-ನ್ದಧಾತ್ಯೇತಾಭಿರ್ವಾ ಅಗ್ನಿಶ್ಚಿತೋ ಜ್ವಲತಿ ತಾಭಿರೇವೈನಗ್ಂ ಸಮಿನ್ಧ ಉಭಯೋರಸ್ಮೈ ಲೋಕಯೋರ್ಜ್ಯೋತಿರ್ಭವತಿ ನಕ್ಷತ್ರೇಷ್ಟಕಾ ಉಪ ದಧಾತ್ಯೇತಾನಿ ವೈ ದಿವೋ ಜ್ಯೋತೀಗ್ಂಷಿ ತಾನ್ಯೇವಾವ ರುನ್ಧೇ ಸುಕೃತಾಂ-ವಾಁ ಏತಾನಿ ಜ್ಯೋತೀಗ್ಂಷಿ ಯನ್ನಕ್ಷತ್ರಾಣಿ ತಾನ್ಯೇವಾ-ಽಽಪ್ನೋತ್ಯಥೋ ಅನೂಕಾಶ-ಮೇವೈತಾನಿ [-ಮೇವೈತಾನಿ, ಜ್ಯೋತೀಗ್ಂಷಿ ಕುರುತೇ] 3
ಜ್ಯೋತೀಗ್ಂಷಿ ಕುರುತೇ ಸುವರ್ಗಸ್ಯ ಲೋಕಸ್ಯಾನುಖ್ಯಾತ್ಯೈ ಯ-ಥ್ಸಗ್ಗ್ಸ್ಪೃಷ್ಟಾ ಉಪದದ್ಧ್ಯಾ-ದ್ವೃಷ್ಟ್ಯೈ ಲೋಕಮಪಿ ದದ್ಧ್ಯಾದವರ್ಷುಕಃ ಪರ್ಜನ್ಯಃ ಸ್ಯಾದಸಗ್ಗ್ಸ್ಪೃಷ್ಟಾ ಉಪ ದಧಾತಿ ವೃಷ್ಟ್ಯಾ ಏವ ಲೋಕ-ಙ್ಕರೋತಿ ವರ್ಷುಕಃ ಪರ್ಜನ್ಯೋ ಭವತಿ ಪುರಸ್ತಾದನ್ಯಾಃ ಪ್ರತೀಚೀರುಪ ದಧಾತಿ ಪಶ್ಚಾದನ್ಯಾಃ ಪ್ರಾಚೀಸ್ತಸ್ಮಾ-ತ್ಪ್ರಾಚೀನಾನಿ ಚ ಪ್ರತೀಚೀನಾನಿ ಚ ನಕ್ಷತ್ರಾಣ್ಯಾ ವರ್ತನ್ತೇ ॥ 4 ॥

(ಭ್ರಾತೃವ್ಯೋ - ಲೋಕ - ಏವೈತಾನ್ಯೇ - ಕಚತ್ವಾರಿಗ್ಂಶಚ್ಚ) (ಅ. 1)
ಋತವ್ಯಾ ಉಪ ದಧಾತ್ಯೃತೂನಾ-ಙ್ಕೢಪ್ತ್ಯೈ ದ್ವದ್ವಮ್ಮುಪ ದಧಾತಿ ತಸ್ಮಾ-ದ್ದ್ವನ್ದ್ವಮೃತವೋ ಽಧೃತೇವ ವಾ ಏಷಾ ಯನ್ಮದ್ಧ್ಯಮಾ ಚಿತಿರನ್ತರಿಕ್ಷಮಿವ ವಾ ಏಷಾ ದ್ವದ್ವಮ್ಮನ್ಯಾಸು ಚಿತೀಷೂಪ ದಧಾತಿ ಚತಸ್ರೋ ಮದ್ಧ್ಯೇ ಧೃತ್ಯಾ ಅನ್ತಶ್ಶ್ಲೇಷಣಂ-ವಾಁ ಏತಾಶ್ಚಿತೀನಾಂ-ಯಁದೃತವ್ಯಾ ಯದೃತವ್ಯಾ ಉಪದಧಾತಿ ಚಿತೀನಾಂ-ವಿಁಧೃತ್ಯಾ ಅವಕಾಮನೂಪ ದಧಾತ್ಯೇಷಾ ವಾ ಅಗ್ನೇರ್ಯೋನಿ-ಸ್ಸಯೋನಿ- [ಅಗ್ನೇರ್ಯೋನಿ-ಸ್ಸಯೋನಿಮ್, ಏವಾಗ್ನಿ-] 5
-ಮೇವಾಗ್ನಿ-ಞ್ಚಿನುತ ಉವಾಚ ಹ ವಿಶ್ವಾಮಿತ್ರೋ ಽದದಿ-ಥ್ಸ ಬ್ರಹ್ಮಣಾ-ಽನ್ನಂ-ಯಁಸ್ಯೈತಾ ಉಪಧೀಯಾನ್ತೈ ಯ ಉ ಚೈನಾ ಏವಂ-ವೇಁದದಿತಿ ಸಂವಁಥ್ಸರೋ ವಾ ಏತ-ಮ್ಪ್ರತಿಷ್ಠಾಯೈ ನುದತೇ ಯೋ-ಽಗ್ನಿ-ಞ್ಚಿತ್ವಾ ನ ಪ್ರತಿತಿಷ್ಠತಿ ಪಞ್ಚ ಪೂರ್ವಾಶ್ಚಿತಯೋ ಭವನ್ತ್ಯಥ ಷಷ್ಠೀ-ಞ್ಚಿತಿ-ಞ್ಚಿನುತೇ ಷಡ್ವಾ ಋತವಃ ಸಂವಁಥ್ಸರ ಋತುಷ್ವೇವ ಸಂವಁಥ್ಸರೇ ಪ್ರತಿತಿಷ್ಠತ್ಯೇ ತಾ ವಾ [ಪ್ರತಿತಿಷ್ಠತ್ಯೇ ತಾ ವಾ, ಅಧಿಪತ್ನೀರ್ನಾಮೇಷ್ಟಕಾ] 6
ಅಧಿಪತ್ನೀರ್ನಾಮೇಷ್ಟಕಾ ಯಸ್ಯೈತಾ ಉಪಧೀಯನ್ತೇ-ಽಧಿಪತಿರೇವ ಸಮಾನಾನಾ-ಮ್ಭವತಿ ಯ-ನ್ದ್ವಿಷ್ಯಾ-ತ್ತಮುಪದಧ-ದ್ಧ್ಯಾಯೇದೇತಾಭ್ಯ ಏವೈನ-ನ್ದೇವತಾಭ್ಯ ಆ ವೃಶ್ಚತಿ ತಾಜಗಾರ್ತಿಮಾರ್ಚ್ಛತ್ಯಙ್ಗಿರಸ-ಸ್ಸುವರ್ಗಂ-ಲೋಁಕಂ-ಯಁನ್ತೋ ಯಾ ಯಜ್ಞಸ್ಯ ನಿಷ್ಕೃತಿರಾಸೀ-ತ್ತಾಮೃಷಿಭ್ಯಃ ಪ್ರತ್ಯೌಹ-ನ್ತದ್ಧಿರಣ್ಯಮಭವದ್ಯ-ದ್ಧಿರಣ್ಯಶಲ್ಕೈಃ ಪ್ರೋಕ್ಷತಿ ಯಜ್ಞಸ್ಯ ನಿಷ್ಕೃತ್ಯಾ ಅಥೋ ಭೇಷಜಮೇವಾ-ಽಸ್ಮೈ ಕರೋ- [-ಽಸ್ಮೈ ಕರೋತಿ, ಅಥೋ ರೂಪೇಣೈವೈನಗ್ಂ] 7
-ತ್ಯಥೋ ರೂಪೇಣೈವೈನಗ್ಂ ಸಮರ್ಧಯತ್ಯಥೋ ಹಿರಣ್ಯಜ್ಯೋತಿಷೈವ ಸುವರ್ಗಂ-ಲೋಁಕಮೇತಿ ಸಾಹಸ್ರವತಾ ಪ್ರೋಕ್ಷತಿ ಸಾಹಸ್ರಃ ಪ್ರಜಾಪತಿಃ ಪ್ರಜಾಪತೇರಾಪ್ತ್ಯಾ ಇಮಾ ಮೇ ಅಗ್ನ ಇಷ್ಟಕಾ ಧೇನವಃ ಸನ್ತ್ವಿತ್ಯಾಹ ಧೇನೂರೇವೈನಾಃ ಕುರುತೇ ತಾ ಏನ-ಙ್ಕಾಮದುಘಾ ಅಮುತ್ರಾಮುಷ್ಮಿನ್ ಁಲೋಕ ಉಪ ತಿಷ್ಠನ್ತೇ ॥ 8 ॥

(ಸಯೋನಿ - ಮೇತಾ ವೈ - ಕರೋತ್ಯೇ - ಕಾನ್ನಚತ್ವಾರಿಗ್ಂಶಚ್ಚ) (ಅ. 2)
ರುದ್ರೋ ವಾ ಏಷ ಯದಗ್ನಿ-ಸ್ಸ ಏತರ್ಹಿ ಜಾತೋ ಯರ್ಹಿ ಸರ್ವಶ್ಚಿತ-ಸ್ಸ ಯಥಾ ವಥ್ಸೋ ಜಾತ-ಸ್ಸ್ತನ-ಮ್ಪ್ರೇಫ್ಸತ್ಯೇವಂ-ವಾಁ ಏಷ ಏತರ್ಹಿ ಭಾಗಧೇಯ-ಮ್ಪ್ರೇಫ್ಸತಿ ತಸ್ಮೈ ಯದಾಹುತಿ-ನ್ನ ಜುಹುಯಾದದ್ಧ್ವರ್ಯು-ಞ್ಚ ಯಜಮಾನ-ಞ್ಚ ಧ್ಯಾಯೇಚ್ಛತರುದ್ರೀಯ-ಞ್ಜುಹೋತಿ ಭಾಗಧೇಯೇನೈವೈನಗ್ಂ ಶಮಯತಿ ನಾ-ಽಽರ್ತಿಮಾರ್ಚ್ಛತ್ಯದ್ಧ್ವರ್ಯುರ್ನ ಯಜಮಾನೋ ಯ-ದ್ಗ್ರಾಮ್ಯಾಣಾ-ಮ್ಪಶೂನಾ- [ಯ-ದ್ಗ್ರಾಮ್ಯಾಣಾ-ಮ್ಪಶೂನಾಮ್, ಪಯಸಾ ಜುಹುಯಾ-] 9
-ಮ್ಪಯಸಾ ಜುಹುಯಾ-ದ್ಗ್ರಾಮ್ಯಾ-ನ್ಪಶೂಞ್ಛುಚಾ ಽರ್ಪಯೇ-ದ್ಯದಾರಣ್ಯಾನಾ-ಮಾರಣ್ಯಾನ್ ಜರ್ತಿಲಯವಾಗ್ವಾ ವಾ ಜುಹುಯಾ-ದ್ಗವೀಧುಕಯವಾಗ್ವಾ ವಾ ನ ಗ್ರಾಮ್ಯಾ-ನ್ಪಶೂನ್. ಹಿನಸ್ತಿ ನಾ-ಽಽರಣ್ಯಾನಥೋ ಖಲ್ವಾಹುರನಾಹುತಿರ್ವೈ ಜರ್ತಿಲಾಶ್ಚ ಗವೀಧುಕಾಶ್ಚೇತ್ಯ ಜಕ್ಷೀರೇಣ ಜುಹೋತ್ಯಾಗ್ನೇಯೀ ವಾ ಏಷಾ ಯದಜಾ-ಽಽಹುತ್ಯೈವ ಜುಹೋತಿ ನ ಗ್ರಾಮ್ಯಾ-ನ್ಪಶೂನ್. ಹಿನಸ್ತಿ ನಾ-ಽಽರಣ್ಯಾನಙ್ಗಿರಸ-ಸ್ಸುವರ್ಗಂ-ಲೋಁಕಂ-ಯಁನ್ತೋ- [-ಁಲೋಕಂ-ಯಁನ್ತಃ, ಅಜಾಯಾ-ಙ್ಘರ್ಮ-] 10
-ಽಜಾಯಾ-ಙ್ಘರ್ಮ-ಮ್ಪ್ರಾಸಿಞ್ಚನ್ಥ್ಸಾ ಶೋಚನ್ತೀ ಪರ್ಣ-ಮ್ಪರಾ-ಽಜಿಹೀತ ಸೋ(1)-ಽರ್ಕೋ-ಽಭವ-ತ್ತದರ್ಕಸ್ಯಾ-ರ್ಕತ್ವಮರ್ಕಪರ್ಣೇನ ಜುಹೋತಿ ಸಯೋನಿತ್ವಾಯೋದ-ನ್ತಿಷ್ಠನ್ ಜುಹೋತ್ಯೇಷಾ ವೈ ರುದ್ರಸ್ಯ ದಿ-ಖ್ಸ್ವಾಯಾಮೇವ ದಿಶಿ ರುದ್ರ-ನ್ನಿರವದಯತೇ ಚರಮಾಯಾಮಿಷ್ಟಕಾಯಾ-ಞ್ಜುಹೋತ್ಯನ್ತತ ಏವ ರುದ್ರ-ನ್ನಿರವದಯತೇ ತ್ರೇಧಾವಿಭಕ್ತ-ಞ್ಜುಹೋತಿ ತ್ರಯ ಇಮೇ ಲೋಕಾ ಇಮಾನೇವ ಲೋಕಾನ್-ಥ್ಸಮಾವದ್ವೀರ್ಯಾನ್ ಕರೋತೀಯತ್ಯಗ್ರೇ ಜುಹೋ- [ಜುಹೋತಿ, ಅಥೇಯತ್ಯಥೇಯತಿ] 11
-ತ್ಯಥೇಯತ್ಯಥೇಯತಿ ತ್ರಯ ಇಮೇ ಲೋಕಾ ಏಭ್ಯ ಏವೈನಂ-ಲೋಁಕೇಭ್ಯಃ ಶಮಯತಿ ತಿಸ್ರ ಉತ್ತರಾ ಆಹುತೀರ್ಜುಹೋತಿ ಷ-ಟ್ಥ್ಸ-ಮ್ಪದ್ಯನ್ತೇ ಷ-ಡ್ವಾ ಋತವ ಋತುಭಿರೇವೈನಗ್ಂ ಶಮಯತಿ ಯದನುಪರಿಕ್ರಾಮ-ಞ್ಜುಹುಯಾದನ್ತರವಚಾರಿಣಗ್ಂ ರುದ್ರ-ಙ್ಕುರ್ಯಾದಥೋ ಖಲ್ವಾಹುಃ ಕಸ್ಯಾಂ-ವಾಁ-ಽಹ ದಿಶಿ ರುದ್ರಃ ಕಸ್ಯಾಂ-ವೇಁತ್ಯನುಪರಿಕ್ರಾಮಮೇವ ಹೋತವ್ಯ-ಮಪರಿವರ್ಗಮೇವೈನಗ್ಂ ಶಮಯ- [ಶಮಯತಿ, ಏತಾವೈ] 12
-ತ್ಯೇತಾವೈ ದೇವತಾ-ಸ್ಸುವರ್ಗ್ಯಾಯಾ ಉತ್ತಮಾಸ್ತಾ ಯಜಮಾನಂ-ವಾಁಚಯತಿ ತಾಭಿರೇವೈನಗ್ಂ ಸುವರ್ಗಂ-ಲೋಁಕ-ಙ್ಗಮಯತಿ ಯ-ನ್ದ್ವಿಷ್ಯಾ-ತ್ತಸ್ಯ ಸಞ್ಚರೇ ಪಶೂನಾ-ನ್ನ್ಯಸ್ಯೇ-ದ್ಯಃ ಪ್ರಥಮಃ ಪಶುರಭಿತಿಷ್ಠತಿ ಸ ಆರ್ತಿಮಾರ್ಚ್ಛತಿ ॥ 13 ॥

(ಪಶೂನಾಂ - ಁಯನ್ತೋ - ಽಗ್ನೇ ಜುಹೋತ್ಯ - ಪರಿವರ್ಗಮೇವೈನಗ್ಂ ಶಮಯತಿ - ತ್ರಿಗ್ಂಶಚ್ಚ) (ಅ. 3)
ಅಶ್ಮನ್ನೂರ್ಜಮಿತಿ ಪರಿ ಷಿಞ್ಚತಿ ಮಾರ್ಜಯತ್ಯೇವೈನಮಥೋ ತರ್ಪಯತ್ಯೇವ ಸ ಏನ-ನ್ತೃಪ್ತೋ ಽಕ್ಷುದ್ಧ್ಯ-ನ್ನಶೋಚ-ನ್ನಮುಷ್ಮಿನ್ ಁಲೋಕ ಉಪ ತಿಷ್ಠತೇ ತೃಪ್ಯತಿ ಪ್ರಜಯಾ ಪಶುಭಿರ್ಯ ಏವಂ-ವೇಁದ ತಾ-ನ್ನ ಇಷಮೂರ್ಜ-ನ್ಧತ್ತ ಮರುತ-ಸ್ಸಗ್ಂರರಾಣಾ ಇತ್ಯಾಹಾನ್ನಂ-ವಾಁ ಊರ್ಗನ್ನ-ಮ್ಮರುತೋ-ಽನ್ನಮೇವಾವ ರುನ್ಧೇ ಽಶ್ಮಗ್ಗ್ಸ್ತೇ ಕ್ಷುದಮು-ನ್ತೇ ಶು- [ಕ್ಷುದಮು-ನ್ತೇ ಶುಕ್, ಋಚ್ಛತು ಯ-ನ್ದ್ವಿಷ್ಮ] 14
-ಗೃಚ್ಛತು ಯ-ನ್ದ್ವಿಷ್ಮ ಇತ್ಯಾಹ ಯಮೇವ ದ್ವೇಷ್ಟಿ ತಮಸ್ಯ ಕ್ಷುಧಾ ಚ ಶುಚಾ ಚಾರ್ಪಯತಿ ತ್ರಿಃ ಪರಿಷಿಞ್ಚ-ನ್ಪರ್ಯೇತಿ ತ್ರಿವೃದ್ವಾ ಅಗ್ನಿರ್ಯಾವಾನೇವಾ-ಗ್ನಿಸ್ತಸ್ಯ ಶುಚಗ್ಂ ಶಮಯತಿ ತ್ರಿಃ ಪುನಃ ಪರ್ಯೇತಿ ಷ-ಟ್ಥ್ಸ-ಮ್ಪದ್ಯನ್ತೇ ಷ-ಡ್ವಾ ಋತವ ಋತುಭಿರೇವಾಸ್ಯ ಶುಚಗ್ಂ ಶಮಯತ್ಯಪಾಂ-ವಾಁ ಏತ-ತ್ಪುಷ್ಪಂ-ಯಁದ್ವೇತಸೋ-ಽಪಾಗ್ಂ - [ಯದ್ವೇತಸೋ-ಽಪಾಮ್, ಶರೋ-ಽವಕಾ] 15
ಶರೋ-ಽವಕಾ ವೇತಸಶಾಖಯಾ ಚಾವಕಾಭಿಶ್ಚ ವಿ ಕರ್ಷತ್ಯಾಪೋ ವೈ ಶಾನ್ತಾ-ಶ್ಶಾನ್ತಾಭಿರೇವಾಸ್ಯ ಶುಚಗ್ಂ ಶಮಯತಿ ಯೋ ವಾ ಅಗ್ನಿ-ಞ್ಚಿತ-ಮ್ಪ್ರಥಮಃ ಪಶುರಧಿಕ್ರಾಮತೀಶ್ವರೋ ವೈ ತಗ್ಂ ಶುಚಾ ಪ್ರದಹೋ ಮಣ್ಡೂಕೇನ ವಿಕರ್ಷತ್ಯೇಷ ವೈ ಪಶೂನಾ-ಮನುಪಜೀವನೀಯೋ ನ ವಾ ಏಷ ಗ್ರಾಮ್ಯೇಷು ಪಶುಷು ಹಿತೋ ನಾ-ಽಽರಣ್ಯೇಷು ತಮೇವ ಶುಚಾ-ಽರ್ಪಯತ್ಯಷ್ಟಾಭಿ-ರ್ವಿ ಕರ್ಷ- [-ರ್ವಿ ಕರ್ಷತಿ, ಅಷ್ಟಾಕ್ಷರಾ] 16
-ತ್ಯಷ್ಟಾಕ್ಷರಾ ಗಾಯತ್ರೀ ಗಾಯತ್ರೋ-ಽಗ್ನಿರ್ಯಾವಾ-ನೇವಾ-ಽಗ್ನಿಸ್ತಸ್ಯ ಶುಚಗ್ಂ ಶಮಯತಿ ಪಾವಕವತೀಭಿರನ್ನಂ-ವೈಁ ಪಾವಕೋ-ಽನ್ನೇನೈವಾಸ್ಯ ಶುಚಗ್ಂ ಶಮಯತಿ ಮೃತ್ಯುರ್ವಾ ಏಷ ಯದಗ್ನಿರ್ಬ್ರಹ್ಮಣ ಏತದ್ರೂಪಂ-ಯಁ-ತ್ಕೃಷ್ಣಾಜಿನ-ಙ್ಕಾರ್ಷ್ಣೀ ಉಪಾನಹಾವುಪ ಮುಞ್ಚತೇ ಬ್ರಹ್ಮಣೈವ ಮೃತ್ಯೋರನ್ತರ್ಧತ್ತೇ ಽನ್ತರ್ಮೃತ್ಯೋರ್ಧತ್ತೇ ಽನ್ತರನ್ನಾದ್ಯಾ-ದಿತ್ಯಾಹುರನ್ಯಾ-ಮುಪಮುಞ್ಚತೇ-ಽನ್ಯಾ-ನ್ನಾನ್ತ- [-ಽನ್ಯಾ-ನ್ನಾನ್ತಃ, ಏವ ಮೃತ್ಯೋರ್ಧತ್ತೇ] 17
-ರೇವ ಮೃತ್ಯೋರ್ಧತ್ತೇ ಽವಾ-ಽನ್ನಾದ್ಯಗ್ಂ ರುನ್ಧೇ ನಮಸ್ತೇ ಹರಸೇ ಶೋಚಿಷ ಇತ್ಯಾಹ ನಮಸ್ಕೃತ್ಯ ಹಿ ವಸೀಯಾಗ್ಂ ಸಮುಪಚರನ್ತ್ಯನ್ಯ-ನ್ತೇ ಅಸ್ಮ-ತ್ತಪನ್ತು ಹೇತಯ ಇತ್ಯಾಹ ಯಮೇವ ದ್ವೇಷ್ಟಿ ತಮಸ್ಯ ಶುಚಾ-ಽರ್ಪಯತಿ ಪಾವಕೋ ಅಸ್ಮಭ್ಯಗ್ಂ ಶಿವೋ ಭವೇತ್ಯಾಹಾನ್ನಂ-ವೈಁ ಪಾವಕೋ-ಽನ್ನಮೇವಾವ ರುನ್ಧೇ ದ್ವಾಭ್ಯಾಮಧಿ ಕ್ರಾಮತಿ ಪ್ರತಿಷ್ಠಿತ್ಯಾ ಅಪಸ್ಯವತೀಭ್ಯಾಗ್ಂ ಶಾನ್ತ್ಯೈ ॥ 18 ॥

(ಶು - ಗ್ವೇತಸೋ-ಽಪಾ - ಮಷ್ಟಾಭಿರ್ವಿ ಕರ್ಷತಿ - ನಾನ್ತ - ರೇಕಾನ್ನ ಪಞ್ಚಾಶಚ್ಚ) (ಅ. 4)
ನೃಷದೇ ವಡಿತಿ ವ್ಯಾಘಾರಯತಿ ಪಙ್ಕ್ತ್ಯಾ-ಽಽಹುತ್ಯಾ ಯಜ್ಞಮುಖಮಾ ರಭತೇ ಽಕ್ಷ್ಣಯಾ ವ್ಯಾಘಾರಯತಿ ತಸ್ಮಾದಕ್ಷ್ಣಯಾ ಪಶವೋ-ಽಙ್ಗಾನಿ ಪ್ರಹರನ್ತಿ ಪ್ರತಿಷ್ಠಿತ್ಯೈ ಯದ್ವಷಟ್ಕುರ್ಯಾ-ದ್ಯಾತಯಾಮಾ-ಽಸ್ಯ ವಷಟ್ಕಾರ-ಸ್ಸ್ಯಾದ್ಯನ್ನ ವಷಟ್ಕುರ್ಯಾ-ದ್ರಕ್ಷಾಗ್ಂಸಿ ಯಜ್ಞಗ್ಂ ಹನ್ಯುರ್ವಡಿತ್ಯಾಹ ಪರೋಕ್ಷಮೇವ ವಷ-ಟ್ಕರೋತಿ ನಾಸ್ಯ ಯಾತಯಾಮಾ ವಷಟ್ಕಾರೋ ಭವತಿ ನ ಯಜ್ಞಗ್ಂ ರಕ್ಷಾಗ್ಂಸಿ ಘ್ನನ್ತಿ ಹುತಾದೋ ವಾ ಅನ್ಯೇ ದೇವಾ [ಅನ್ಯೇ ದೇವಾಃ, ಅಹುತಾದೋ-ಽನ್ಯೇ] 19
ಅಹುತಾದೋ-ಽನ್ಯೇ ತಾನಗ್ನಿಚಿದೇವೋಭಯಾ-ನ್ಪ್ರೀಣಾತಿ ಯೇ ದೇವಾ ದೇವಾನಾಮಿತಿ ದದ್ಧ್ನಾ ಮಧುಮಿಶ್ರೇಣಾವೋಕ್ಷತಿ ಹುತಾದಶ್ಚೈವ ದೇವಾನಹುತಾದಶ್ಚ ಯಜಮಾನಃ ಪ್ರೀಣಾತಿ ತೇ ಯಜಮಾನ-ಮ್ಪ್ರೀಣನ್ತಿ ದದ್ಧ್ನೈವ ಹುತಾದಃ ಪ್ರೀಣಾತಿ ಮಧುಷಾ ಽಹುತಾದೋ ಗ್ರಾಮ್ಯಂ-ವಾಁ ಏತದನ್ನಂ-ಯಁದ್ದದ್ಧ್ಯಾರಣ್ಯ-ಮ್ಮಧು ಯದ್ದಧ್ನಾ ಮಧುಮಿಶ್ರೇಣಾ-ವೋಕ್ಷತ್ಯುಭಯಸ್ಯಾ-ಽವರುದ್ಧ್ಯೈ ಗ್ರುಮುಷ್ಟಿನಾ-ಽವೋಕ್ಷತಿ ಪ್ರಾಜಾಪತ್ಯೋ [ಪ್ರಾಜಾಪತ್ಯಃ, ವೈ ಗ್ರುಮುಷ್ಟಿ-] 20
ವೈ ಗ್ರುಮುಷ್ಟಿ-ಸ್ಸಯೋನಿತ್ವಾಯ ದ್ವಾಭ್ಯಾ-ಮ್ಪ್ರತಿಷ್ಠಿತ್ಯಾ ಅನುಪರಿಚಾರ-ಮವೋಕ್ಷತ್ಯ-ಪರಿವರ್ಗಮೇವೈನಾ-ನ್ಪ್ರೀಣಾತಿ ವಿ ವಾ ಏಷ ಪ್ರಾಣೈಃ ಪ್ರಜಯಾ ಪಶುಭಿರ್-ಋದ್ಧ್ಯತೇ ಯೋ-ಽಗ್ನಿ-ಞ್ಚಿನ್ವನ್ನಧಿಕ್ರಾಮತಿ ಪ್ರಾಣದಾ ಅಪಾನದಾ ಇತ್ಯಾಹ ಪ್ರಾಣಾನೇವಾ-ಽಽತ್ಮ-ನ್ಧತ್ತೇ ವರ್ಚೋದಾ ವರಿವೋದಾ ಇತ್ಯಾಹ ಪ್ರಜಾ ವೈ ವರ್ಚಃ ಪಶವೋ ವರಿವಃ ಪ್ರಜಾಮೇವ ಪಶೂನಾತ್ಮ-ನ್ಧತ್ತ ಇನ್ದ್ರೋ ವೃತ್ರಮಹನ್ತಂ-ವೃಁತ್ರೋ [ವೃತ್ರಮಹನ್ತಂ-ವೃಁತ್ರಃ, ಹತ-ಷ್ಷೋಡಶಭಿ-] 21
ಹತ-ಷ್ಷೋಡಶಭಿ-ರ್ಭೋಗೈರಸಿನಾ-ಥ್ಸ ಏತಾಮಗ್ನಯೇ-ಽನೀಕವತ ಆಹುತಿಮಪಶ್ಯ-ತ್ತಾಮಜುಹೋ-ತ್ತಸ್ಯಾಗ್ನಿರನೀ ಕವಾನ್ಥ್ಸ್ವೇನ ಭಾಗಧೇಯೇನ ಪ್ರೀತ-ಷ್ಷೋಡಶಧಾ ವೃತ್ರಸ್ಯ ಭೋಗಾನಪ್ಯದಹ-ದ್ವೈಶ್ವಕರ್ಮಣೇನ ಪಾಪ್ಮನೋ ನಿರಮುಚ್ಯತ ಯದಗ್ನಯೇ-ಽನೀಕವತ ಆಹುತಿ-ಞ್ಜುಹೋತ್ಯಗ್ನಿರೇವಾ-ಽಸ್ಯಾನೀಕವಾನ್ಥ್ಸ್ವೇನ ಭಾಗಧೇಯೇನ ಪ್ರೀತಃ ಪಾಪ್ಮಾನಮಪಿ ದಹತಿ ವೈಶ್ವಕರ್ಮಣೇನ ಪಾಪ್ಮನೋ ನಿರ್ಮುಚ್ಯತೇ ಯ-ಙ್ಕಾಮಯೇತ ಚಿರ-ಮ್ಪಾಪ್ಮನೋ [ಚಿರ-ಮ್ಪಾಪ್ಮನಃ, ನಿರ್ಮುಚ್ಯೇತೇತ್ಯೇಕೈಕ-] 22
ನಿರ್ಮುಚ್ಯೇತೇತ್ಯೇಕೈಕ-ನ್ತಸ್ಯ ಜುಹುಯಾಚ್ಚಿರಮೇವ ಪಾಪ್ಮನೋ ನಿರ್ಮುಚ್ಯತೇ ಯ-ಙ್ಕಾಮಯೇತ ತಾಜ-ಕ್ಪಾಪ್ಮನೋ ನಿರ್ಮುಚ್ಯೇತೇತಿ ಸರ್ವಾಣಿ ತಸ್ಯಾನುದ್ರುತ್ಯ ಜುಹುಯಾ-ತ್ತಾಜಗೇವ ಪಾಪ್ಮನೋ ನಿರ್ಮುಚ್ಯತೇ-ಽಥೋ ಖಲು ನಾನೈವ ಸೂಕ್ತಾಭ್ಯಾ-ಞ್ಜುಹೋತಿ ನಾನೈವ ಸೂಕ್ತಯೋರ್ವೀರ್ಯ-ನ್ದಧಾತ್ಯಥೋ ಪ್ರತಿಷ್ಠಿತ್ಯೈ ॥ 23 ॥

(ದೇವಾಃ - ಪ್ರಾಜಾಪತ್ಯೋ-ವೃತ್ರ - ಶ್ಚಿರ-ಮ್ಪಾಪ್ಮನ - ಶ್ಚತ್ವಾರಿಗ್ಂಶಚ್ಚ) (ಅ. 5)
ಉದೇನಮುತ್ತರಾ-ನ್ನಯೇತಿ ಸಮಿಧ ಆ ದಧಾತಿ ಯಥಾ ಜನಂ-ಯಁತೇ-ಽವಸ-ಙ್ಕರೋತಿ ತಾದೃಗೇವ ತ-ತ್ತಿಸ್ರ ಆ ದಧಾತಿ ತ್ರಿವೃದ್ವಾ ಅಗ್ನಿರ್ಯಾವಾನೇ-ವಾಗ್ನಿಸ್ತಸ್ಮೈ ಭಾಗಧೇಯ-ಙ್ಕರೋತ್ಯೌದುಮ್ಬರೀ-ರ್ಭವನ್ತ್ಯೂರ್ಗ್ವಾ ಉದುಮ್ಬರ ಊರ್ಜಮೇವಾಸ್ಮಾ ಅಪಿ ದಧಾತ್ಯುದು ತ್ವಾ ವಿಶ್ವೇ ದೇವಾ ಇತ್ಯಾಹ ಪ್ರಾಣಾ ವೈ ವಿಶ್ವೇ ದೇವಾಃ ಪ್ರಾಣೈ- [ಪ್ರಾಣೈಃ, ಏವೈನ-] 24
-ರೇವೈನ-ಮುದ್ಯಚ್ಛತೇ ಽಗ್ನೇ ಭರನ್ತು ಚಿತ್ತಿಭಿರಿತ್ಯಾಹ ಯಸ್ಮಾ ಏವೈನ-ಞ್ಚಿತ್ತಾಯೋದ್ಯಚ್ಛತೇ ತೇನೈವೈನಗ್ಂ ಸಮರ್ಧಯತಿ ಪಞ್ಚ ದಿಶೋ ದೈವೀರ್ಯಜ್ಞಮವನ್ತು ದೇವೀರಿತ್ಯಾಹ ದಿಶೋ ಹ್ಯೇಷೋ-ಽನು ಪ್ರಚ್ಯವತೇ ಽಪಾಮತಿ-ನ್ದುರ್ಮತಿ-ಮ್ಬಾಧಮಾನಾ ಇತ್ಯಾಹ ರಕ್ಷಸಾಮಪಹತ್ಯೈ ರಾಯಸ್ಪೋಷೇ ಯಜ್ಞಪತಿ-ಮಾಭಜನ್ತೀರಿತ್ಯಾಹ ಪಶವೋ ವೈ ರಾಯಸ್ಪೋಷಃ [ರಾಯಸ್ಪೋಷಃ, ಪಶೂನೇವಾವ] 25
ಪಶೂನೇವಾವ ರುನ್ಧೇ ಷಡ್ಭಿರ್ಹರತಿ ಷ-ಡ್ವಾ ಋತವ ಋತುಭಿರೇವೈನಗ್ಂ ಹರತಿ ದ್ವೇ ಪರಿಗೃಹ್ಯವತೀ ಭವತೋ ರಕ್ಷಸಾಮಪಹತ್ಯೈ ಸೂರ್ಯರಶ್ಮಿರ್ಹರಿಕೇಶಃ ಪುರಸ್ತಾದಿತ್ಯಾಹ ಪ್ರಸೂತ್ಯೈ ತತಃ ಪಾವಕಾ ಆಶಿಷೋ ನೋ ಜುಷನ್ತಾಮಿತ್ಯಾಹಾನ್ನಂ-ವೈಁ ಪಾವಕೋ-ಽನ್ನಮೇವಾವ ರುನ್ಧೇ ದೇವಾಸುರಾ-ಸ್ಸಂಯಁತ್ತಾ ಆಸ-ನ್ತೇ ದೇವಾ ಏತ-ದಪ್ರತಿರಥ-ಮಪಶ್ಯ-ನ್ತೇನ ವೈ ತೇ ಪ್ರ- [ವೈ ತೇ ಪ್ರತಿ, ಅಸುರಾನಜಯ-ನ್ತ-] 26
-ತ್ಯಸುರಾನಜಯ-ನ್ತ-ದಪ್ರತಿರಥಸ್ಯಾ-ಪ್ರತಿರಥತ್ವಂ-ಯಁದಪ್ರತಿರಥ-ನ್ದ್ವಿತೀಯೋ ಹೋತಾ-ಽನ್ವಾಹಾಪ್ರತ್ಯೇವ ತೇನ ಯಜಮಾನೋ ಭ್ರಾತೃವ್ಯಾನ್ ಜಯತ್ಯಥೋ ಅನಭಿಜಿತಮೇವಾಭಿ ಜಯತಿ ದಶರ್ಚ-ಮ್ಭವತಿ ದಶಾಕ್ಷರಾ ವಿರಾ-ಡ್ವಿರಾಜೇಮೌ ಲೋಕೌ ವಿಧೃತಾ ವನಯೋರ್ಲೋಕಯೋರ್ವಿಧೃತ್ಯಾ ಅಥೋ ದಶಾಕ್ಷರಾ ವಿರಾಡನ್ನಂ-ವಿಁರಾ-ಡ್ವಿರಾಜ್ಯೇವಾನ್ನಾದ್ಯೇ ಪ್ರತಿತಿಷ್ಠತ್ಯಸದಿವ ವಾ ಅನ್ತರಿಕ್ಷಮನ್ತರಿಕ್ಷಮಿವಾ ಽಽಗ್ನೀದ್ಧ್ರ-ಮಾಗ್ನೀದ್ಧ್ರೇ- [-ಮಾಗ್ನೀದ್ಧ್ರೇ, ಅಶ್ಮಾನ-ನ್ನಿ ದಧಾತಿ] 27
-ಽಶ್ಮಾನ-ನ್ನಿ ದಧಾತಿ ಸತ್ತ್ವಾಯ ದ್ವಾಭ್ಯಾ-ಮ್ಪ್ರತಿಷ್ಠಿತ್ಯೈ ವಿಮಾನ ಏಷ ದಿವೋ ಮದ್ಧ್ಯ ಆಸ್ತ ಇತ್ಯಾಹ ವ್ಯೇವೈತಯಾ ಮಿಮೀತೇ ಮದ್ಧ್ಯೇ ದಿವೋ ನಿಹಿತಃ ಪೃಶ್ಞಿರಶ್ಮೇತ್ಯಾಹಾನ್ನಂ-ವೈಁ ಪೃಶ್ಞ್ಯನ್ನಮೇವಾವ ರುನ್ಧೇ ಚತಸೃಭಿರಾ ಪುಚ್ಛಾದೇತಿ ಚತ್ವಾರಿ ಛನ್ದಾಗ್ಂಸಿ ಛನ್ದೋಭಿರೇವೇನ್ದ್ರಂ-ವಿಁಶ್ವಾ ಅವೀವೃಧನ್ನಿತ್ಯಾಹ ವೃದ್ಧಿಮೇವೋಪಾವರ್ತತೇ ವಾಜಾನಾಗ್ಂ ಸತ್ಪತಿ-ಮ್ಪತಿ- [ಸತ್ಪತಿ-ಮ್ಪತಿಮ್, ಇತ್ಯಾಹಾ-ಽನ್ನಂ-ವೈಁ] 28
-ಮಿತ್ಯಾಹಾ-ಽನ್ನಂ-ವೈಁ ವಾಜೋ-ಽನ್ನಮೇವಾವ ರುನ್ಧೇ ಸುಮ್ನಹೂರ್ಯಜ್ಞೋ ದೇವಾಗ್ಂ ಆ ಚ ವಕ್ಷದಿತ್ಯಾಹ ಪ್ರಜಾ ವೈ ಪಶವಃ ಸುಮ್ನ-ಮ್ಪ್ರಜಾಮೇವ ಪಶೂನಾತ್ಮ-ನ್ಧತ್ತೇ ಯಕ್ಷದಗ್ನಿರ್ದೇವೋ ದೇವಾಗ್ಂ ಆ ಚ ವಕ್ಷದಿತ್ಯಾಹ ಸ್ವಗಾಕೃತ್ಯೈ ವಾಜಸ್ಯ ಮಾ ಪ್ರಸವೇನೋ-ದ್ಗ್ರಾಭೇಣೋದಗ್ರಭೀದಿತ್ಯಾಹಾಸೌ ವಾ ಆದಿತ್ಯ ಉದ್ಯನ್ನುದ್ಗ್ರಾಭ ಏಷ ನಿಮ್ರೋಚ-ನ್ನಿಗ್ರಾಭೋ ಬ್ರಹ್ಮಣೈವಾ-ಽಽತ್ಮಾನಮು-ದ್ಗೃಹ್ಣಾತಿ ಬ್ರಹ್ಮಣಾ ಭ್ರಾತೃವ್ಯ-ನ್ನಿ ಗೃಹ್ಣಾತಿ ॥ 29 ॥

(ಪ್ರಾಣೈಃ - ಪೋಷೋ - ಪ್ರತ್ಯಾ - ಗ್ನೀದ್ಧೇ - ಪತಿ - ಮೇಷ - ದಶ ಚ) (ಅ. 6)
ಪ್ರಾಚೀಮನು ಪ್ರದಿಶ-ಮ್ಪ್ರೇಹಿ ವಿದ್ವಾನಿತ್ಯಾಹ ದೇವಲೋಕ-ಮೇವೈತಯೋಪಾವರ್ತತೇ ಕ್ರಮದ್ಧ್ವಮಗ್ನಿನಾ ನಾಕ-ಮಿತ್ಯಾಹೇಮಾನೇವೈತಯಾ ಲೋಕಾನ್ ಕ್ರಮತೇ ಪೃಥಿವ್ಯಾ ಅಹಮುದನ್ತರಿಕ್ಷಮಾ ಽರುಹಮಿತ್ಯಾಹೇಮಾನೇವೈತಯಾ ಲೋಕಾನ್-ಥ್ಸಮಾರೋಹತಿ ಸುವರ್ಯನ್ತೋ ನಾಪೇಕ್ಷನ್ತ ಇತ್ಯಾಹ ಸುವರ್ಗಮೇವೈತಯಾ ಲೋಕಮೇತ್ಯಗ್ನೇ ಪ್ರೇಹಿ [ಪ್ರೇಹಿ, ಪ್ರಥಮೋ] 30
ಪ್ರಥಮೋ ದೇವಯತಾ-ಮಿತ್ಯಾಹೋಭಯೇಷ್ವೇವೈತಯಾ ದೇವಮನುಷ್ಯೇಷು ಚಕ್ಷುರ್ದಧಾತಿ ಪಞ್ಚಭಿರಧಿ ಕ್ರಾಮತಿ ಪಾಙ್ಕ್ತೋ ಯಜ್ಞೋ ಯಾವಾನೇವ ಯಜ್ಞಸ್ತೇನ ಸಹ ಸುವರ್ಗಂ-ಲೋಁಕಮೇತಿ ನಕ್ತೋಷಾಸೇತಿ ಪುರೋ-ಽನುವಾಕ್ಯಾಮನ್ವಾಹ ಪ್ರತ್ಯಾ ಅಗ್ನೇ ಸಹಸ್ರಾಕ್ಷೇತ್ಯಾಹ ಸಾಹಸ್ರಃ ಪ್ರಜಾಪತಿಃ ಪ್ರಜಾಪತೇರಾಪ್ತ್ಯೈ ತಸ್ಮೈ ತೇ ವಿಧೇಮ ವಾಜಾಯ ಸ್ವಾಹೇತ್ಯಾಹಾನ್ನಂ-ವೈಁ ವಾಜೋ-ಽನ್ನ-ಮೇವಾವ [ವಾಜೋ-ಽನ್ನ-ಮೇವಾವ, ರುನ್ಧೇ ದದ್ಧ್ನಃ] 31
ರುನ್ಧೇ ದದ್ಧ್ನಃ ಪೂರ್ಣಾಮೌದುಮ್ಬರೀಗ್ ಸ್ವಯಮಾತೃಣ್ಣಾಯಾ-ಞ್ಜುಹೋತ್ಯೂರ್ಗ್ವೈ ದದ್ಧ್ಯೂರ್ಗುದುಮ್ಬರೋ-ಽಸೌ ಸ್ವಯಮಾತೃಣ್ಣಾ ಽಮುಷ್ಯಾಮೇವೋರ್ಜ-ನ್ದಧಾತಿ ತಸ್ಮಾದಮುತೋ-ಽರ್ವಾಚೀಮೂರ್ಜಮುಪ ಜೀವಾಮಸ್ತಿಸೃಭಿಃ ಸಾದಯತಿ ತ್ರಿವೃದ್ವಾ ಅಗ್ನಿರ್ಯಾವಾನೇವಾಗ್ನಿಸ್ತ-ಮ್ಪ್ರತಿಷ್ಠಾ-ಙ್ಗಮಯತಿ ಪ್ರೇದ್ಧೋ ಅಗ್ನೇ ದೀದಿಹಿ ಪುರೋ ನ ಇತ್ಯೌದುಮ್ಬರೀಮಾ ದಧಾತ್ಯೇಷಾ ವೈ ಸೂರ್ಮೀ ಕರ್ಣಕಾವತ್ಯೇತಯಾ ಹ ಸ್ಮ [ಹ ಸ್ಮ, ವೈ] 32
ವೈ ದೇವಾ ಅಸುರಾಣಾಗ್ಂ ಶತತರ್ಹಾಗ್ ಸ್ತೃಗ್ಂಹನ್ತಿ ಯದೇತಯಾ ಸಮಿಧಮಾದಧಾತಿ ವಜ್ರಮೇವೈತಚ್ಛತಘ್ನೀಂ-ಯಁಜಮಾನೋ ಭ್ರಾತೃವ್ಯಾಯ ಪ್ರಹರತಿ ಸ್ತೃತ್ಯಾ ಅಛಮ್ಬಟ್ಕಾರಂ-ವಿಁಧೇಮ ತೇ ಪರಮೇ ಜನ್ಮನ್ನಗ್ನ ಇತಿ ವೈಕಙ್ಕತೀಮಾ ದಧಾತಿ ಭಾ ಏವಾವ ರುನ್ಧೇ ತಾಗ್ಂ ಸವಿತುರ್ವರೇಣ್ಯಸ್ಯ ಚಿತ್ರಾಮಿತಿ ಶಮೀಮಯೀಗ್ಂ ಶಾನ್ತ್ಯಾ ಅಗ್ನಿರ್ವಾ ಹ ವಾ ಅಗ್ನಿಚಿತ-ನ್ದುಹೇ-ಽಗ್ನಿಚಿದ್ವಾ-ಽಗ್ನಿ-ನ್ದುಹೇ ತಾಗ್ಂ [ತಾಮ್, ಸವಿತು-] 33
ಸವಿತು-ರ್ವರೇಣ್ಯಸ್ಯ ಚಿತ್ರಾಮಿತ್ಯಾಹೈಷ ವಾ ಅಗ್ನೇರ್ದೋಹಸ್ತಮಸ್ಯ ಕಣ್ವ ಏವ ಶ್ರಾಯಸೋ-ಽವೇ-ತ್ತೇನ ಹ ಸ್ಮೈನಗ್ಂ ಸ ದುಹೇ ಯದೇತಯಾ ಸಮಿಧ-ಮಾದಧಾತ್ಯಗ್ನಿಚಿದೇವ ತದಗ್ನಿ-ನ್ದುಹೇ ಸಪ್ತ ತೇ ಅಗ್ನೇ ಸಮಿಧಃ ಸಪ್ತಜಿಹ್ವಾ ಇತ್ಯಾಹ ಸಪ್ತೈವಾಸ್ಯ ಸಾಪ್ತಾನಿ ಪ್ರೀಣಾತಿ ಪೂರ್ಣಯಾ ಜುಹೋತಿ ಪೂರ್ಣ ಇವ ಹಿ ಪ್ರಜಾಪತಿಃ ಪ್ರಜಾಪತೇ- [ಪ್ರಜಾಪತೇಃ, ಆಪ್ತ್ಯೈ] 34
-ರಾಪ್ತ್ಯೈ ನ್ಯೂನಯಾ ಜುಹೋತಿ ನ್ಯೂನಾದ್ಧಿ ಪ್ರಜಾಪತಿಃ ಪ್ರಜಾ ಅಸೃಜತ ಪ್ರಜಾನಾಗ್ಂ ಸೃಷ್ಟ್ಯಾ ಅಗ್ನಿರ್ದೇವೇಭ್ಯೋ ನಿಲಾಯತ ಸ ದಿಶೋ-ಽನು ಪ್ರಾ-ಽವಿಶಜ್ಜುಹ್ವನ್ಮನಸಾ ದಿಶೋ ದ್ಧ್ಯಾಯೇ ದ್ದಿಗ್ಭ್ಯ ಏವೈನಮವ ರುನ್ಧೇ ದದ್ಧ್ನಾ ಪುರಸ್ತಾಜ್ಜುಹೋತ್ಯಾ-ಜ್ಯೇನೋಪರಿಷ್ಟಾ-ತ್ತೇಜಶ್ಚೈವಾಸ್ಮಾ ಇನ್ದ್ರಿಯ-ಞ್ಚ ಸಮೀಚೀ ದಧಾತಿ ದ್ವಾದಶಕಪಾಲೋ ವೈಶ್ವಾನರೋ ಭವತಿ ದ್ವಾದಶ ಮಾಸಾ-ಸ್ಸಂವಁಥ್ಸರ-ಸ್ಸಂವಁಥ್ಸರೋ-ಽಗ್ನಿರ್ವೈಶ್ವಾನರ-ಸ್ಸಾಕ್ಷಾ- [-ಽಗ್ನಿರ್ವೈಶ್ವಾನರ-ಸ್ಸಾಕ್ಷಾತ್, ಏವ ವೈಶ್ವಾನರಮವ] 35
-ದೇವ ವೈಶ್ವಾನರಮವ ರುನ್ಧೇ ಯ-ತ್ಪ್ರಯಾಜಾನೂಯಾಜಾನ್ ಕುರ್ಯಾದ್ವಿಕಸ್ತಿ-ಸ್ಸಾ ಯಜ್ಞಸ್ಯ ದರ್ವಿಹೋಮ-ಙ್ಕರೋತಿ ಯಜ್ಞಸ್ಯ ಪ್ರತಿಷ್ಠಿತ್ಯೈ ರಾಷ್ಟ್ರಂ-ವೈಁ ವೈಶ್ವಾನರೋ ವಿಣ್ಮರುತೋ ವೈಶ್ವಾನರಗ್ಂ ಹುತ್ವಾ ಮಾರುತಾನ್ ಜುಹೋತಿ ರಾಷ್ಟ್ರ ಏವ ವಿಶಮನು ಬದ್ಧ್ನಾತ್ಯುಚ್ಚೈ-ರ್ವೈಶ್ವಾನರಸ್ಯಾ-ಽಽ ಶ್ರಾವಯತ್ಯುಪಾಗ್ಂಶು ಮಾರುತಾನ್ ಜುಹೋತಿ ತಸ್ಮಾ-ದ್ರಾಷ್ಟ್ರಂ-ವಿಁಶಮತಿ ವದತಿ ಮಾರುತಾ ಭವನ್ತಿ ಮರುತೋ ವೈ ದೇವಾನಾಂ-ವಿಁಶೋ ದೇವವಿಶೇನೈವಾಸ್ಮೈ ಮನುಷ್ಯವಿಶ -ಮವ ರುನ್ಧೇ ಸಪ್ತ ಭವನ್ತಿ ಸಪ್ತಗಣಾ ವೈ ಮರುತೋ ಗಣಶ ಏವ ವಿಶಮವ ರುನ್ಧೇ ಗಣೇನ ಗಣಮನುದ್ರುತ್ಯ ಜುಹೋತಿ ವಿಶಮೇವಾಸ್ಮಾ ಅನುವರ್ತ್ಮಾನ-ಙ್ಕರೋತಿ ॥ 36 ॥

(ಅಗ್ನೇ ಪ್ರೇಹ್ಯ - ವ - ಸ್ಮ - ದುಹೇ ತಾಂ - ಪ್ರಜಾಪತೇಃ - ಸಾಕ್ಷಾನ್ - ಮನುಷ್ಯವಿಶ - ಮೇಕವಿಗ್ಂಶತಿಶ್ಚ) (ಅ. 7)
ವಸೋರ್ಧಾರಾ-ಞ್ಜುಹೋತಿ ವಸೋರ್ಮೇ ಧಾರಾ-ಽಸದಿತಿ ವಾ ಏಷಾ ಹೂಯತೇ ಘೃತಸ್ಯ ವಾ ಏನಮೇಷಾ ಧಾರಾ-ಽಮುಷ್ಮಿನ್ ಁಲೋಕೇ ಪಿನ್ವಮಾನೋಪ ತಿಷ್ಠತ ಆಜ್ಯೇನ ಜುಹೋತಿ ತೇಜೋ ವಾ ಆಜ್ಯ-ನ್ತೇಜೋ ವಸೋರ್ಧಾರಾ ತೇಜಸೈವಾಸ್ಮೈ ತೇಜೋ-ಽವ ರುನ್ಧೇ-ಽಥೋ ಕಾಮಾ ವೈ ವಸೋರ್ಧಾರಾ ಕಾಮಾನೇವಾವ ರುನ್ಧೇ ಯ-ಙ್ಕಾಮಯೇತ ಪ್ರಾಣಾನಸ್ಯಾ-ಽನ್ನಾದ್ಯಂ-ವಿಁ- [-ಽನ್ನಾದ್ಯಂ-ವಿಁ, ಛಿನ್ದ್ಯಾಮಿತಿ] 37
-ಚ್ಛಿನ್ದ್ಯಾಮಿತಿ ವಿಗ್ರಾಹ-ನ್ತಸ್ಯ ಜುಹುಯಾ-ತ್ಪ್ರಾಣಾನೇವಾಸ್ಯಾನ್ನಾದ್ಯಂ-ವಿಁಚ್ಛಿನತ್ತಿ ಯ-ಙ್ಕಾಮಯೇತ ಪ್ರಾಣಾನಸ್ಯಾನ್ನಾದ್ಯಗ್ಂ ಸ-ನ್ತನುಯಾಮಿತಿ ಸ-ನ್ತತಾ-ನ್ತಸ್ಯ ಜುಹುಯಾ-ತ್ಪ್ರಾಣಾನೇವಾಸ್ಯಾನ್ನಾದ್ಯಗ್ಂ ಸ-ನ್ತನೋತಿ ದ್ವಾದಶ ದ್ವಾದಶಾನಿ ಜುಹೋತಿ ದ್ವಾದಶ ಮಾಸಾ-ಸ್ಸಂವಁಥ್ಸರ-ಸ್ಸಂವಁಥ್ಸರೇಣೈ ವಾಸ್ಮಾ ಅನ್ನಮವ ರುನ್ಧೇ ಽನ್ನ-ಞ್ಚ ಮೇ-ಽಕ್ಷುಚ್ಚ ಮ ಇತ್ಯಾಹೈ ತ-ದ್ವಾ [ಇತ್ಯಾಹೈ ತ-ದ್ವೈ, ಅನ್ನಸ್ಯ ರೂಪಗ್ಂ] 38
ಅನ್ನಸ್ಯ ರೂಪಗ್ಂ ರೂಪೇಣೈವಾನ್ನಮವ ರುನ್ಧೇ ಽಗ್ನಿಶ್ಚ ಮ ಆಪಶ್ಚ ಮ ಇತ್ಯಾಹೈಷಾ ವಾ ಅನ್ನಸ್ಯ ಯೋನಿ-ಸ್ಸಯೋನ್ಯೇವಾನ್ನಮವ ರುನ್ಧೇ-ಽರ್ಧೇನ್ದ್ರಾಣಿ ಜುಹೋತಿ ದೇವತಾ ಏವಾವ ರುನ್ಧೇ ಯ-ಥ್ಸರ್ವೇಷಾ-ಮರ್ಧಮಿನ್ದ್ರಃ ಪ್ರತಿ ತಸ್ಮಾದಿನ್ದ್ರೋ ದೇವತಾನಾ-ಮ್ಭೂಯಿಷ್ಠಭಾಕ್ತಮ ಇನ್ದ್ರಮುತ್ತರಮಾಹೇ-ನ್ದ್ರಿಯಮೇವಾಸ್ಮಿ-ನ್ನುಪರಿಷ್ಟಾ-ದ್ದಧಾತಿ ಯಜ್ಞಾಯುಧಾನಿ ಜುಹೋತಿ ಯಜ್ಞೋ [ಯಜ್ಞಃ, ವೈ ಯಜ್ಞಾಯುಧಾನಿ] 39
ವೈ ಯಜ್ಞಾಯುಧಾನಿ ಯಜ್ಞಮೇವಾವ ರುನ್ಧೇ-ಽಥೋ ಏತದ್ವೈ ಯಜ್ಞಸ್ಯ ರೂಪಗ್ಂ ರೂಪೇಣೈವ ಯಜ್ಞಮವ ರುನ್ಧೇ ಽವಭೃಥಶ್ಚ ಮೇ ಸ್ವಗಾಕಾರಶ್ಚ ಮ ಇತ್ಯಾಹ ಸ್ವಗಾಕೃತ್ಯಾ ಅಗ್ನಿಶ್ಚ ಮೇ ಘರ್ಮಶ್ಚ ಮ ಇತ್ಯಾಹೈತ-ದ್ವೈ ಬ್ರಹ್ಮವರ್ಚಸಸ್ಯ ರೂಪಗ್ಂ ರೂಪೇಣೈವ ಬ್ರಹ್ಮವರ್ಚಸಮವ ರುನ್ಧ ಋಕ್ಚ ಮೇ ಸಾಮ ಚ ಮ ಇತ್ಯಾಹೈ- [ಮ ಇತ್ಯಾಹ, ಏತದ್ವೈ ಛನ್ದಸಾಗ್ಂ] 40
-ತದ್ವೈ ಛನ್ದಸಾಗ್ಂ ರೂಪಗ್ಂ ರೂಪೇಣೈವ ಛನ್ದಾಗ್ಸ್ಯವ ರುನ್ಧೇ ಗರ್ಭಾಶ್ಚ ಮೇ ವಥ್ಸಾಶ್ಚ ಮ ಇತ್ಯಾಹೈತ-ದ್ವೈ ಪಶೂನಾಗ್ಂ ರೂಪಗ್ಂ ರೂಪೇಣೈವ ಪಶೂನವ ರುನ್ಧೇ ಕಲ್ಪಾನ್ ಜುಹೋತ್ಯ ಕೢಪ್ತಸ್ಯ ಕೢಪ್ತ್ಯೈ ಯುಗ್ಮದಯುಜೇ ಜುಹೋತಿ ಮಿಥುನತ್ವಾಯೋ-ತ್ತರಾವತೀ ಭವತೋ-ಽಭಿಕ್ರಾನ್ತ್ಯಾ ಏಕಾ ಚ ಮೇ ತಿಸ್ರಶ್ಚ ಮ ಇತ್ಯಾಹ ದೇವಛನ್ದಸಂ-ವಾಁ ಏಕಾ ಚ ತಿಸ್ರಶ್ಚ [ತಿಸ್ರಶ್ಚ, ಮನುಷ್ಯಛನ್ದಸ-ಞ್ಚತಸ್ರಶ್ಚಾ-ಽಷ್ಟೌ] 41
ಮನುಷ್ಯಛನ್ದಸ-ಞ್ಚತಸ್ರಶ್ಚಾ-ಽಷ್ಟೌ ಚ ದೇವಛನ್ದಸ-ಞ್ಚೈವ ಮನುಷ್ಯ ಛನ್ದಸಞ್ಚಾ-ಽವ ರುನ್ಧ ಆ ತ್ರಯಸ್ತ್ರಿಗ್ಂ ಶತೋ ಜುಹೋತಿ ತ್ರಯಸ್ತ್ರಿಗ್ಂಶದ್ವೈ ದೇವತಾ ದೇವತಾ ಏವಾವ ರುನ್ಧ ಆ-ಽಷ್ಟಾಚತ್ವಾರಿಗ್ಂಶತೋ ಜುಹೋತ್ಯಷ್ಟಾಚತ್ವಾರಿಗ್ಂ-ಶದಕ್ಷರಾ ಜಗತೀ ಜಾಗತಾಃ ಪಶವೋ ಜಗತ್ಯೈವಾಸ್ಮೈ ಪಶೂನವ ರುನ್ಧೇ ವಾಜಶ್ಚ ಪ್ರಸವಶ್ಚೇತಿ ದ್ವಾದಶ-ಞ್ಜುಹೋತಿ ದ್ವಾದಶ ಮಾಸಾ-ಸ್ಸಂವಁಥ್ಸರ-ಸ್ಸಂವಁಥ್ಸರ ಏವ ಪ್ರತಿ ತಿಷ್ಠತಿ ॥ 42 ॥

(ವಿ - ವೈ - ಯಜ್ಞಃ-ಸಾಮ ಚ ಮ ಇತ್ಯಾಹ - ಚ ತಿಸ್ರ - ಶ್ಚೈಕಾನ್ನ ಪಞ್ಚಾಶಚ್ಚ) (ಅ. 8)
ಅಗ್ನಿರ್ದೇವೇಭ್ಯೋ ಽಪಾಕ್ರಾಮ-ದ್ಭಾಗಧೇಯಮಿಚ್ಛಮಾನಸ್ತ-ನ್ದೇವಾ ಅಬ್ರುವನ್ನುಪ ನ ಆ ವರ್ತಸ್ವ ಹವ್ಯ-ನ್ನೋ ವಹೇತಿ ಸೋ-ಽಬ್ರವೀ-ದ್ವರಂ-ವೃಁಣೈ ಮಹ್ಯಮೇವ ವಾಜಪ್ರಸವೀಯ-ಞ್ಜುಹವನ್ನಿತಿ ತಸ್ಮಾದಗ್ನಯೇ ವಾಜಪ್ರಸವೀಯ-ಞ್ಜುಹ್ವತಿ ಯ-ದ್ವಾಜಪ್ರಸವೀಯ-ಞ್ಜುಹೋತ್ಯಗ್ನಿಮೇವ ತ-ದ್ಭಾಗಧೇಯೇನ ಸಮರ್ಧಯತ್ಯಥೋ ಅಭಿಷೇಕ ಏವಾಸ್ಯ ಸ ಚತುರ್ದಶಭಿರ್ಜುಹೋತಿ ಸಪ್ತ ಗ್ರಾಮ್ಯಾ ಓಷಧಯ-ಸ್ಸಪ್ತಾ- [ಓಷಧಯ-ಸ್ಸಪ್ತ, ಅರಣ್ಯಾ ಉಭಯೀಷಾ-] 43
-ಽಽರಣ್ಯಾ ಉಭಯೀಷಾ-ಮವರುದ್ಧ್ಯಾ ಅನ್ನಸ್ಯಾನ್ನಸ್ಯ ಜುಹೋತ್ಯನ್ನಸ್ಯಾನ್ನಸ್ಯಾ-ವರುದ್ಧ್ಯಾ ಔದುಮ್ಬರೇಣ ಸ್ರುವೇಣ ಜುಹೋತ್ಯೂರ್ಗ್ವಾ ಉದುಮ್ಬರ ಊರ್ಗನ್ನಮೂರ್ಜೈವಾಸ್ಮಾ ಊರ್ಜಮನ್ನಮವ ರುನ್ಧೇ ಽಗ್ನಿರ್ವೈ ದೇವಾನಾ-ಮಭಿಷಿಕ್ತೋ-ಽಗ್ನಿಚಿ-ನ್ಮನುಷ್ಯಾಣಾ-ನ್ತಸ್ಮಾದಗ್ನಿಚಿ-ದ್ವರ್ಷತಿ ನ ಧಾವೇದವರುದ್ಧಗ್ಗ್ ಹ್ಯಸ್ಯಾ-ನ್ನಮನ್ನಮಿವ ಖಲು ವೈ ವರ್ಷಂ-ಯಁದ್ಧಾವೇ-ದನ್ನಾದ್ಯಾದ್ಧಾವೇ-ದುಪಾವರ್ತೇತಾ-ಽನ್ನಾದ್ಯ-ಮೇವಾ-ಽಭ್ಯು- [-ಽನ್ನಾದ್ಯ-ಮೇವಾ-ಽಭಿ, ಉಪಾವರ್ತತೇ] 44
-ಪಾವರ್ತತೇ ನಕ್ತೋಷಾಸೇತಿ ಕೃಷ್ಣಾಯೈ ಶ್ವೇತವಥ್ಸಾಯೈ ಪಯಸಾ ಜುಹೋತ್ಯಹ್ನೈವಾಸ್ಮೈ ರಾತ್ರಿ-ಮ್ಪ್ರದಾಪಯತಿ ರಾತ್ರಿಯಾ-ಽಹರಹೋರಾತ್ರೇ ಏವಾಸ್ಮೈ ಪ್ರತ್ತೇ ಕಾಮಮನ್ನಾದ್ಯ-ನ್ದುಹಾತೇ ರಾಷ್ಟ್ರಭೃತೋ ಜುಹೋತಿ ರಾಷ್ಟ್ರಮೇವಾವ ರುನ್ಧೇ ಷಡ್ಭಿರ್ಜುಹೋತಿ ಷಡ್ವಾ ಋತವ ಋತುಷ್ವೇವ ಪ್ರತಿತಿಷ್ಠತಿ ಭುವನಸ್ಯ ಪತ ಇತಿ ರಥಮುಖೇ ಪಞ್ಚಾ-ಽಽಹುತೀರ್ಜುಹೋತಿ ವಜ್ರೋ ವೈ ರಥೋ ವಜ್ರೇಣೈವ ದಿಶೋ- [ವಜ್ರೇಣೈವ ದಿಶಃ, ಅಭಿ ಜಯತ್ಯಗ್ನಿಚಿತಗ್ಂ] 45
-ಽಭಿ ಜಯತ್ಯಗ್ನಿಚಿತಗ್ಂ ಹ ವಾ ಅಮುಷ್ಮಿನ್ ಁಲೋಕೇ ವಾತೋ-ಽಭಿ ಪವತೇ ವಾತನಾಮಾನಿ ಜುಹೋತ್ಯಭ್ಯೇವೈನ-ಮಮುಷ್ಮಿನ್ ಁಲೋಕೇ ವಾತಃ ಪವತೇ ತ್ರೀಣಿ ಜುಹೋತಿ ತ್ರಯ ಇಮೇ ಲೋಕಾ ಏಭ್ಯ ಏವ ಲೋಕೇಭ್ಯೋ ವಾತಮವ ರುನ್ಧೇ ಸಮುದ್ರೋ-ಽಸಿ ನಭಸ್ವಾನಿತ್ಯಾಹೈತದ್ವೈ ವಾತಸ್ಯ ರೂಪಗ್ಂ ರೂಪೇಣೈವ ವಾತಮವ ರುನ್ಧೇ ಽಞ್ಜಲಿನಾ ಜುಹೋತಿ ನ ಹ್ಯೇತೇಷಾಮನ್ಯಥಾ ಽಽಹುತಿರವಕಲ್ಪತೇ ॥ 46 ॥

(ಓಷಧಯ-ಸ್ಸಪ್ತಾ - ಭಿ - ದಿಶೋ - ಽನ್ಯಥಾ - ದ್ವೇ ಚ) (ಅ. 9)
ಸುವರ್ಗಾಯ ವೈ ಲೋಕಾಯ ದೇವರಥೋ ಯುಜ್ಯತೇ ಯತ್ರಾಕೂತಾಯ ಮನುಷ್ಯರಥ ಏಷ ಖಲು ವೈ ದೇವರಥೋ ಯದಗ್ನಿರಗ್ನಿಂ-ಯುಁನಜ್ಮಿ ಶವಸಾ ಘೃತೇನೇತ್ಯಾಹ ಯುನಕ್ತ್ಯೇವೈನಗ್ಂ ಸ ಏನಂ-ಯುಁಕ್ತ-ಸ್ಸುವರ್ಗಂ-ಲೋಁಕಮಭಿ ವಹತಿ ಯ-ಥ್ಸರ್ವಾಭಿಃ ಪಞ್ಚಭಿ-ರ್ಯುಞ್ಜ್ಯಾ-ದ್ಯುಕ್ತೋ-ಽಸ್ಯಾ-ಽಗ್ನಿಃ ಪ್ರಚ್ಯುತ-ಸ್ಸ್ಯಾದಪ್ರತಿಷ್ಠಿತಾ ಆಹುತಯ-ಸ್ಸ್ಯುರಪ್ರತಿಷ್ಠಿತಾ-ಸ್ಸ್ತೋಮಾ ಅಪ್ರತಿಷ್ಠಿತಾನ್ಯುಕ್ಥಾನಿ ತಿಸೃಭಿಃ ಪ್ರಾತಸ್ಸವನೇ-ಽಭಿ ಮೃಶತಿ ತ್ರಿವೃ- [ತ್ರಿವೃತ್, ವಾ ಅಗ್ನಿರ್ಯಾವಾನೇವಾ-] 47
-ದ್ವಾ ಅಗ್ನಿರ್ಯಾವಾನೇವಾ-ಗ್ನಿಸ್ತಂ-ಯುಁನಕ್ತಿ ಯಥಾ-ಽನಸಿ ಯುಕ್ತ ಆಧೀಯತ ಏವಮೇವ ತ-ತ್ಪ್ರತ್ಯಾಹುತಯಸ್ತಿಷ್ಠನ್ತಿ ಪ್ರತಿ ಸ್ತೋಮಾಃ ಪ್ರತ್ಯುಕ್ಥಾನಿ ಯಜ್ಞಾಯಜ್ಞಿಯಸ್ಯ ಸ್ತೋತ್ರೇ ದ್ವಾಭ್ಯಾಮಭಿ ಮೃಶತ್ಯೇತಾವಾನ್ ವೈ ಯಜ್ಞೋ ಯಾವಾನಗ್ನಿಷ್ಟೋಮೋ ಭೂಮಾ ತ್ವಾ ಅಸ್ಯಾತ ಊರ್ಧ್ವಃ ಕ್ರಿಯತೇ ಯಾವಾನೇವ ಯಜ್ಞಸ್ತಮನ್ತತೋ ಽನ್ವಾರೋಹತಿ ದ್ವಾಭ್ಯಾ-ಮ್ಪ್ರತಿಷ್ಠಿತ್ಯಾ ಏಕಯಾ-ಽಪ್ರಸ್ತುತ-ಮ್ಭವತ್ಯಥಾ- [-ಽಪ್ರಸ್ತುತ-ಮ್ಭವತ್ಯಥ, ಅಭಿ ಮೃಶತ್ಯುಪೈನ-] 48
-ಽಭಿ ಮೃಶತ್ಯುಪೈನ-ಮುತ್ತರೋ ಯಜ್ಞೋ ನಮತ್ಯಥೋ ಸನ್ತತ್ಯೈ ಪ್ರ ವಾ ಏಷೋ-ಽಸ್ಮಾಲ್ಲೋಕಾ-ಚ್ಚ್ಯವತೇ ಯೋ-ಽಗ್ನಿ-ಞ್ಚಿನುತೇ ನ ವಾ ಏತಸ್ಯಾನಿಷ್ಟಕ ಆಹುತಿರವ ಕಲ್ಪತೇ ಯಾಂ-ವಾಁ ಏಷೋ-ಽನಿಷ್ಟಕ ಆಹುತಿ-ಞ್ಜುಹೋತಿ ಸ್ರವತಿ ವೈ ಸಾ ತಾಗ್ ಸ್ರವನ್ತೀಂ-ಯಁಜ್ಞೋ-ಽನು ಪರಾ ಭವತಿ ಯಜ್ಞಂ-ಯಁಜಮಾನೋ ಯ-ತ್ಪುನಶ್ಚಿತಿ-ಞ್ಚಿನುತ ಆಹುತೀನಾ-ಮ್ಪ್ರತಿಷ್ಠಿತ್ಯೈ ಪ್ರತ್ಯಾಹುತಯಸ್ತಿಷ್ಠನ್ತಿ [ಪ್ರತ್ಯಾಹುತಯಸ್ತಿಷ್ಠನ್ತಿ, ನ ಯಜ್ಞಃ] 49
ನ ಯಜ್ಞಃ ಪರಾಭವತಿ ನ ಯಜಮಾನೋ ಽಷ್ಟಾವುಪ ದಧಾತ್ಯಷ್ಟಾಕ್ಷರಾ ಗಾಯತ್ರೀ ಗಾಯತ್ರೇಣೈವೈನ-ಞ್ಛನ್ದಸಾ ಚಿನುತೇ ಯದೇಕಾದಶ ತ್ರೈಷ್ಟುಭೇನ ಯ-ದ್ದ್ವಾದಶ ಜಾಗತೇನ ಛನ್ದೋಭಿರೇವೈನ-ಞ್ಚಿನುತೇ ನಪಾತ್ಕೋ ವೈನಾಮೈಷೋ-ಽಗ್ನಿರ್ಯ-ತ್ಪುನಶ್ಚಿತಿರ್ಯ ಏವಂ-ವಿಁದ್ವಾ-ನ್ಪುನಶ್ಚಿತಿ-ಞ್ಚಿನುತ ಆ ತೃತೀಯಾ-ತ್ಪುರುಷಾದನ್ನಮತ್ತಿ ಯಥಾ ವೈ ಪುನರಾಧೇಯ ಏವ-ಮ್ಪುನಶ್ಚಿತಿರ್ಯೋ-ಽ-ಗ್ನ್ಯಾಧೇಯೇನ ನ- [-ಗ್ನ್ಯಾಧೇಯೇನ ನ, ಋಧ್ನೋತಿ ಸ] 50
-ರ್ಧ್ನೋತಿ ಸ ಪುನರಾಧೇಯಮಾ ಧತ್ತೇ ಯೋ-ಽಗ್ನಿ-ಞ್ಚಿತ್ವಾ ನರ್ಧ್ನೋತಿ ಸ ಪುನಶ್ಚಿತಿ-ಞ್ಚಿನುತೇ ಯ-ತ್ಪುನಶ್ಚಿತಿ-ಞ್ಚಿನುತ ಋದ್ಧ್ಯಾ ಅಥೋ ಖಲ್ವಾಹುರ್ನ ಚೇತವ್ಯೇತಿ ರುದ್ರೋ ವಾ ಏಷ ಯದಗ್ನಿರ್ಯಥಾ ವ್ಯಾಘ್ರಗ್ಂ ಸುಪ್ತ-ಮ್ಬೋಧಯತಿ ತಾದೃಗೇವ ತದಥೋ ಖಲ್ವಾಹುಶ್ಚೇತವ್ಯೇತಿ ಯಥಾ ವಸೀಯಾಗ್ಂಸ-ಮ್ಭಾಗಧೇಯೇನ ಬೋಧಯತಿ ತಾದೃಗೇವ ತನ್ಮನುರಗ್ನಿಮಚಿನುತ ತೇನ ನಾ-ಽಽರ್ಧ್ನೋಥ್ಸ ಏತಾ-ಮ್ಪುನಶ್ಚಿತಿಮಪಶ್ಯ-ತ್ತಾಮಚಿನುತ ತಯಾ ವೈ ಸ ಆರ್ಧ್ನೋದ್ಯ-ತ್ಪುನಶ್ಚಿತಿ-ಞ್ಚಿನುತ ಋದ್ಧ್ಯೈ ॥ 51 ॥

(ತ್ರಿವೃ-ದಥ-ತಿಷ್ಠ-ನ್ತ್ಯಗ್ನ್ಯಾಧೇಯೇನ ನಾ-ಚಿನುತ-ಸಪ್ತದಶ- ಚ) (ಅ. 10)
ಛನ್ದಶ್ಚಿತ-ಞ್ಚಿನ್ವೀತ ಪಶುಕಾಮಃ ಪಶವೋ ವೈ ಛನ್ದಾಗ್ಂಸಿ ಪಶುಮಾನೇವ ಭವತಿ ಶ್ಯೇನಚಿತ-ಞ್ಚಿನ್ವೀತ ಸುವರ್ಗಕಾಮ-ಶ್ಶ್ಯೇನೋ ವೈ ವಯಸಾ-ಮ್ಪತಿಷ್ಠ-ಶ್ಶ್ಯೇನ ಏವ ಭೂತ್ವಾ ಸುವರ್ಗಂ-ಲೋಁಕ-ಮ್ಪತತಿ ಕಙ್ಕಚಿತ-ಞ್ಚಿನ್ವೀತ ಯಃ ಕಾಮಯೇತ ಶೀರ್ಷಣ್ವಾನಮುಷ್ಮಿನ್ ಁಲೋಕೇ ಸ್ಯಾಮಿತಿ ಶೀರ್ಷಣ್ವಾನೇವಾ-ಽಮುಷ್ಮಿನ್ ಁಲೋಕೇ ಭವತ್ಯಲಜಚಿತ-ಞ್ಚಿನ್ವೀತ ಚತುಸ್ಸೀತ-ಮ್ಪ್ರತಿಷ್ಠಾಕಾಮಶ್ಚತಸ್ರೋ ದಿಶೋ ದಿಕ್ಷ್ವೇವ ಪ್ರತಿ ತಿಷ್ಠತಿ ಪ್ರೌಗಚಿತ-ಞ್ಚಿನ್ವೀತ ಭ್ರಾತೃವ್ಯವಾ-ನ್ಪ್ರೈ- [ಭ್ರಾತೃವ್ಯವಾ-ನ್ಪ್ರ, ಏವ ಭ್ರಾತೃವ್ಯಾ-ನ್ನುದತ] 52
-ವ ಭ್ರಾತೃವ್ಯಾ-ನ್ನುದತ ಉಭಯತಃ ಪ್ರೌಗ-ಞ್ಚಿನ್ವೀತಯಃ ಕಾಮಯೇತ ಪ್ರಜಾತಾ-ನ್ಭ್ರಾತೃವ್ಯಾ-ನ್ನುದೇಯ ಪ್ರತಿ ಜನಿಷ್ಯಮಾಣಾನಿತಿ ಪ್ರೈವ ಜಾತಾ-ನ್ಭ್ರಾತೃವ್ಯಾ-ನ್ನುದತೇ ಪ್ರತಿ ಜನಿಷ್ಯಮಾಣಾ-ನ್ರಥಚಕ್ರಚಿತ-ಞ್ಚಿನ್ವೀತ ಭ್ರಾತೃವ್ಯವಾನ್ ವಜ್ರೋ ವೈ ರಥೋ ವಜ್ರಮೇವ ಭ್ರಾತೃವ್ಯೇಭ್ಯಃ ಪ್ರಹರತಿ ದ್ರೋಣಚಿತ-ಞ್ಚಿನ್ವೀತಾನ್ನಕಾಮೋ ದ್ರೋಣೇ ವಾ ಅನ್ನ-ಮ್ಭ್ರಿಯತೇ ಸಯೋನ್ಯೇವಾನ್ನಮವ ರುನ್ಧೇ ಸಮೂಹ್ಯ-ಞ್ಚಿನ್ವೀತ ಪಶುಕಾಮಃ ಪಶುಮಾನೇವ ಭವತಿ [ಪಶುಮಾನೇವ ಭವತಿ, ಪರಿಚಾಯ್ಯ-ಞ್ಚಿನ್ವೀತ] 53
ಪರಿಚಾಯ್ಯ-ಞ್ಚಿನ್ವೀತ ಗ್ರಾಮಕಾಮೋ ಗ್ರಾಮ್ಯೇವ ಭವತಿ ಶ್ಮಶಾನಚಿತ-ಞ್ಚಿನ್ವೀತ ಯಃ ಕಾಮಯೇತ ಪಿತೃಲೋಕ ಋದ್ಧ್ನುಯಾಮಿತಿ ಪಿತೃಲೋಕ ಏವರ್ಧ್ನೋತಿ ವಿಶ್ವಾಮಿತ್ರಜಮದಗ್ನೀ ವಸಿಷ್ಠೇನಾ-ಽಸ್ಪರ್ಧೇತಾಗ್ಂ ಸ ಏತಾ ಜಮದಗ್ನಿರ್ವಿಹವ್ಯಾ ಅಪಶ್ಯ-ತ್ತಾ ಉಪಾಧತ್ತ ತಾಭಿರ್ವೈ ಸ ವಸಿಷ್ಠಸ್ಯೇನ್ದ್ರಿಯಂ-ವೀಁರ್ಯಮವೃಙ್ಕ್ತ ಯ-ದ್ವಿಹವ್ಯಾ ಉಪದಧಾತೀನ್ದ್ರಿಯಮೇವ ತಾಭಿರ್ವೀರ್ಯಂ-ಯಁಜಮಾನೋ ಭ್ರಾತೃವ್ಯಸ್ಯ ವೃಙ್ಕ್ತೇ ಹೋತುರ್ಧಿಷ್ಣಿಯ ಉಪ ದಧಾತಿ ಯಜಮಾನಾಯತನಂ-ವೈಁ [ ] 54
ಹೋತಾ ಸ್ವ ಏವಾಸ್ಮಾ ಆಯತನ ಇನ್ದ್ರಿಯಂ-ವೀಁರ್ಯಮವ ರುನ್ಧೇ ದ್ವಾದಶೋಪ ದಧಾತಿ ದ್ವಾದಶಾಕ್ಷರಾ ಜಗತೀ ಜಾಗತಾಃ ಪಶವೋ ಜಗತ್ಯೈವಾಸ್ಮೈ ಪಶೂನವ ರುನ್ಧೇ ಽಷ್ಟಾವಷ್ಟಾವನ್ಯೇಷು ಧಿಷ್ಣಿಯೇಷೂಪ ದಧಾತ್ಯಷ್ಟಾಶಫಾಃ ಪಶವಃ ಪಶೂನೇವಾವ ರುನ್ಧೇ ಷಣ್ಮಾರ್ಜಾಲೀಯೇ ಷ-ಡ್ವಾ ಋತವ ಋತವಃ ಖಲು ವೈ ದೇವಾಃ ಪಿತರ ಋತೂನೇವ ದೇವಾ-ನ್ಪಿತೄ-ನ್ಪ್ರೀಣಾತಿ ॥ 55 ॥

(ಪ್ರ - ಭವತಿ - ಯಜಮಾನಾಯತನಂ-ವಾಁ - ಅಷ್ಟಾಚತ್ವಾರಿಗ್ಂಶಚ್ಚ) (ಅ. 11)
ಪವಸ್ವ ವಾಜಸಾತಯ ಇತ್ಯನುಷ್ಟು-ಕ್ಪ್ರತಿಪದ್ಭವತಿ ತಿರ್ಸೋ-ಽನುಷ್ಟುಭಶ್ಚತಸ್ರೋ ಗಾಯತ್ರಿಯೋ ಯ-ತ್ತಿಸ್ರೋ-ಽನುಷ್ಟುಭ-ಸ್ತಸ್ಮಾ-ದಶ್ವಸ್ತ್ರಿಭಿಸ್ತಿಷ್ಠಗ್ಗ್ ಸ್ತಿಷ್ಠತಿ ಯಚ್ಚತಸ್ರೋ ಗಾಯತ್ರಿಯಸ್ತಸ್ಮಾ-ಥ್ಸರ್ವಾಗ್ ಶ್ಚತುರಃ ಪದಃ ಪ್ರತಿದಧ-ತ್ಪಲಾಯತೇ ಪರಮಾ ವಾ ಏಷಾ ಛನ್ದಸಾಂ-ಯಁದನುಷ್ಟು-ಕ್ಪರಮಶ್ಚತುಷ್ಟೋಮ-ಸ್ಸ್ತೋಮಾನಾ-ಮ್ಪರಮಸ್ತ್ರಿರಾತ್ರೋ ಯಜ್ಞಾನಾ-ಮ್ಪರಮೋ-ಽಶ್ವಃ ಪಶೂನಾ-ಮ್ಪರಮೇಣೈವೈನ-ಮ್ಪರಮತಾ-ಙ್ಗಮಯತ್ಯೇಕವಿಗ್ಂಶ-ಮಹರ್ಭವತಿ [-ಮಹರ್ಭವತಿ, ಯಸ್ಮಿನ್ನಶ್ವ] 56
ಯಸ್ಮಿನ್ನಶ್ವ ಆಲಭ್ಯತೇ ದ್ವಾದಶ ಮಾಸಾಃ ಪಞ್ಚರ್ತವಸ್ತ್ರಯ ಇಮೇ ಲೋಕಾ ಅಸಾವಾದಿತ್ಯ ಏಕವಿಗ್ಂಶ ಏಷ ಪ್ರಜಾಪತಿಃ ಪ್ರಾಜಾಪತ್ಯೋ-ಽಶ್ವಸ್ತಮೇವ ಸಾಕ್ಷಾದೃದ್ಧ್ನೋತಿ ಶಕ್ವರಯಃ ಪೃಷ್ಠ-ಮ್ಭವನ್ತ್ಯನ್-ಯದನ್ಯ-ಚ್ಛನ್ದೋ-ಽನ್ಯೇನ್ಯೇ ವಾ ಏತೇ ಪಶವ ಆ ಲಭ್ಯನ್ತ ಉತೇವ ಗ್ರಾಮ್ಯಾ ಉತೇವಾ-ಽಽರಣ್ಯಾ ಯಚ್ಛಕ್ವರಯಃ ಪೃಷ್ಠ-ಮ್ಭವನ್ತ್ಯಶ್ವಸ್ಯ ಸರ್ವತ್ವಾಯ ಪಾರ್ಥುರಶ್ಮ-ಮ್ಬ್ರಹ್ಮಸಾಮ-ಮ್ಭವತಿ ರಶ್ಮಿನಾ ವಾ ಅಶ್ವೋ [ರಶ್ಮಿನಾ ವಾ ಅಶ್ವಃ, ಯತ ಈಶ್ವರೋ] 57
ಯತ ಈಶ್ವರೋ ವಾ ಅಶ್ವೋ-ಽಯತೋ-ಽಪ್ರತಿಷ್ಠಿತಃ ಪರಾ-ಮ್ಪರಾವತ-ಙ್ಗನ್ತೋರ್ಯ-ತ್ಪಾರ್ಥುರಶ್ಮ-ಮ್ಬ್ರಹ್ಮಸಾಮ-ಮ್ಭವತ್ಯಶ್ವಸ್ಯ ಯತ್ಯೈ ಧೃತ್ಯೈ ಸಙ್ಕೃತ್ಯಚ್ಛಾವಾಕಸಾಮ-ಮ್ಭವತ್ಯುಥ್ಸನ್ನಯಜ್ಞೋ ವಾ ಏಷ ಯದಶ್ವಮೇಧಃ ಕಸ್ತದ್ವೇದೇತ್ಯಾಹುರ್ಯದಿ ಸರ್ವೋ ವಾ ಕ್ರಿಯತೇ ನ ವಾ ಸರ್ವ ಇತಿ ಯ-ಥ್ಸಙ್ಕೃತ್ಯಚ್ಛಾವಾಕಸಾಮ-ಮ್ಭವತ್ಯಶ್ವಸ್ಯ ಸರ್ವತ್ವಾಯ ಪರ್ಯಾಪ್ತ್ಯಾ ಅನನ್ತರಾಯಾಯ ಸರ್ವಸ್ತೋಮೋ-ಽತಿರಾತ್ರ ಉತ್ತಮಮಹರ್ಭವತಿ ಸರ್ವಸ್ಯಾ-ಽಽಪ್ತ್ಯೈ ಸರ್ವಸ್ಯ ಜಿತ್ಯೈ ಸರ್ವಮೇವ ತೇನಾ-ಽಽಪ್ನೋತಿ ಸರ್ವ-ಞ್ಜಯತಿ ॥ 58 ॥

(ಅಹರ್ಭವತಿ - ವಾ ಅಶ್ವೋ - ಽಹರ್ಭವತಿ - ದಶ ಚ) (ಅ. 12)
(ದೇವಾಸುರಾಸ್ತೇನ - ರ್ತವ್ಯಾ - ರುದ್ರೋ - ಽಶ್ಮ - ನ್ನೃಷದೇ ವ - ಡುದೇನಂ - ಪ್ರಾಚೀಮಿತಿ - ವಸೋರ್ಧಾರಾ - ಮಗ್ನಿರ್ದೇವೇಭ್ಯಃ - ಸುವರ್ಗಾಯ ಯತ್ರಾಕೂತಾಯ - ಛನ್ದಶ್ಚಿತಂ - ಪವಸ್ವ - ದ್ವಾದಶ )
(ದೇವಾಸುರಾ - ಅಜಾಯಾಂ - ಁವೈ ಗ್ರುಮುಷ್ಟಿಃ - ಪ್ರಥಮೋ ದೇವಯತಾಮೇ - ತದ್ವೈ ಛನ್ದಸಾ - ಮೃಧ್ನೋ - ತ್ಯಷ್ಟೌ ಪಞ್ಚಾಶತ್)
(ದೇವಾಸುರಾ, ಸ್ಸರ್ವ-ಞ್ಜಯತಿ)
॥ ಹರಿಃ ಓಮ್ ॥