മനീഷാ പഞ്ചകമ്

സത്യാചാര്യസ്യ ഗമനേ കദാചിന്മുക്തി ദായകമ് ।
കാശീക്ശേത്രം പ്രതി സഹ ഗൌര്യാ മാര്ഗേ തു ശ്ങ്കരമ് ॥ (അനുഷ്ടുപ്)
അന്ത്യവേഷധരം ദൃഷ്ട്വാ ഗച്ഛ ഗച്ഛേതി ചാബ്രവീത് ।
ശങ്കരഃസോഽപി ചാണ്ഡലസ്തം പുനഃ പ്രാഹ ശ്ങ്കരമ് ॥ (അനുഷ്ടുപ്)
അന്നമയാദന്നമയമഥവാ ചൈതന്യമേവ ചൈതന്യാത് ।
യതിവര ദൂരീകര്തും വാഞ്ഛസി കിം ബ്രൂഹി ഗച്ഛ ഗച്ഛേതി ॥ (ആര്യാ വൃത്ത)
പ്രത്യഗ്വസ്തുനി നിസ്തരങ്ഗസഹജാനന്ദാവബോധാമ്ബുധൌ
വിപ്രോഽയം ശ്വപചോഽയമിത്യപി മഹാന്കോഽയം വിഭേദഭ്രമഃ ।
കിം ഗങ്ഗാമ്ബുനി ബിമ്ബിതേഽമ്ബരമണൌ ചാണ്ഡാലവീഥീപയഃ
പൂരേ വാഽന്തരമസ്തി കാഞ്ചനഘടീമൃത്കുമ്ഭയോര്വാഽമ്ബരേ ॥ (ശാര്ദൂല വിക്രീഡിത)
ജാഗ്രത്സ്വപ്നസുഷുപ്തിഷു സ്ഫുടതരാ യാ സംവിദുജ്ജൃമ്ഭതേ
യാ ബ്രഹ്മാദിപിപീലികാന്തതനുഷു പ്രോതാ ജഗത്സാക്ഷിണീ ।
സൈവാഹം ന ച ദൃശ്യവസ്ത്വിതി ദൃഢപ്രജ്ഞാപി യസ്യാസ്തി ചേ-
ച്ചാണ്ഡാലോഽസ്തു സ തു ദ്വിജോഽസ്തു ഗുരുരിത്യേഷാ മനീഷാ മമ ॥ 1॥

ബ്രഹ്മൈവാഹമിദം ജഗച്ച സകലം ചിന്മാത്രവിസ്താരിതം
സര്വം ചൈതദവിദ്യയാ ത്രിഗുണയാഽശേഷം മയാ കല്പിതമ് ।
ഇത്ഥം യസ്യ ദൃഢാ മതിഃ സുഖതരേ നിത്യേ പരേ നിര്മലേ
ചാണ്ഡാലോഽസ്തു സ തു ദ്വിജോഽസ്തു ഗുരുരിത്യേഷാ മനീഷാ മമ ॥ 2॥

ശശ്വന്നശ്വരമേവ വിശ്വമഖിലം നിശ്ചിത്യ വാചാ ഗുരോ-
ര്നിത്യം ബ്രഹ്മ നിരന്തരം വിമൃശതാ നിര്വ്യാജശാന്താത്മനാ ।
ഭൂതം ഭാവി ച ദുഷ്കൃതം പ്രദഹതാ സംവിന്മയേ പാവകേ
പ്രാരബ്ധായ സമര്പിതം സ്വവപുരിത്യേഷാ മനീഷാ മമ ॥ 3॥

യാ തിര്യങ്നരദേവതാഭിരഹമിത്യന്തഃ സ്ഫുടാ ഗൃഹ്യതേ
യദ്ഭാസാ ഹൃദയാക്ഷദേഹവിഷയാ ഭാന്തി സ്വതോഽചേതനാഃ ।
താം ഭാസ്യൈഃ പിഹിതാര്കമണ്ഡലനിഭാം സ്ഫൂര്തിം സദാ ഭാവയ-
ന്യോഗീ നിര്വൃതമാനസോ ഹി ഗുരുരിത്യേഷാ മനീഷാ മമ ॥ 4॥

യത്സൌഖ്യാമ്ബുധിലേശലേശത ഇമേ ശക്രാദയോ നിര്വൃതാ
യച്ചിത്തേ നിതരാം പ്രശാന്തകലനേ ലബ്ധ്വാ മുനിര്നിര്വൃതഃ ।
യസ്മിന്നിത്യസുഖാമ്ബുധൌ ഗലിതധീര്ബ്രഹ്മൈവ ന ബ്രഹ്മവിദ്
യഃ കശ്ചിത്സ സുരേന്ദ്രവന്ദിതപദോ നൂനം മനീഷാ മമ ॥ 5॥
ദാസസ്തേഽഹം ദേഹദൃഷ്ട്യാഽസ്മി ശമ്ഭോ
ജാതസ്തേംഽശോ ജീവദൃഷ്ട്യാ ത്രിദൃഷ്ടേ ।
സര്വസ്യാഽഽത്മന്നാത്മദൃഷ്ട്യാ ത്വമേവേ-
ത്യേവം മേ ധീര്നിശ്ചിതാ സര്വശാസ്ത്രൈഃ ॥