স্ৱসঙ্কল্পকলাকল্পৈৰাযুধৈৰাযুধেশ্ৱৰঃ ।
জুষ্টঃ ষোডশভিৰ্দিৱ্যৈৰ্জুষতাং ৱঃ পৰঃ পুমান্ ॥ ১ ॥
জুষ্টঃ ষোডশভিৰ্দিৱ্যৈৰ্জুষতাং ৱঃ পৰঃ পুমান্ ॥ ১ ॥
যদাযত্তং জগচ্চক্ৰং কালচক্ৰং চ শাশ্ৱতম্ ।
পাতু ৱস্তত্ পৰং চক্ৰং চক্ৰৰূপস্য চক্ৰিণঃ ॥ ২ ॥
পাতু ৱস্তত্ পৰং চক্ৰং চক্ৰৰূপস্য চক্ৰিণঃ ॥ ২ ॥
যত্প্ৰসূতি শতৈৰাসন্ ৰুদ্ৰাঃ পৰশুলাঞ্ছনাঃ ।
স দিৱ্যো হেতিৰাজস্য পৰশুঃ পৰিপাতু ৱঃ ॥ ৩ ॥
স দিৱ্যো হেতিৰাজস্য পৰশুঃ পৰিপাতু ৱঃ ॥ ৩ ॥
হেলযা হেতিৰাজেন যস্মিন্ দৈত্যাঃ সমুদ্ধৃতে ।
শকুন্তা ইৱ ধাৱন্তি স কুন্তঃ পালযেত ৱঃ ॥ ৪ ॥
শকুন্তা ইৱ ধাৱন্তি স কুন্তঃ পালযেত ৱঃ ॥ ৪ ॥
দৈত্যদানৱমুখ্যানাং দণ্ড্যানাং যেন দণ্ডনম্ ।
হেতিদণ্ডেশদণ্ডোঽসৌ ভৱতাং দণ্ডযেদ্দ্ৱিষঃ ॥ ৫ ॥
হেতিদণ্ডেশদণ্ডোঽসৌ ভৱতাং দণ্ডযেদ্দ্ৱিষঃ ॥ ৫ ॥
অনন্যান্ৱযভক্তানাং ৰুন্ধন্নাশামতঙ্গজান্ ।
অনঙ্কুশৱিহাৰো ৱঃ পাতু হেতীশ্ৱৰাঙ্কুশঃ ॥ ৬ ॥
অনঙ্কুশৱিহাৰো ৱঃ পাতু হেতীশ্ৱৰাঙ্কুশঃ ॥ ৬ ॥
সম্ভূয শলভাযন্তে যত্ৰ পাপানি দেহিনাম্ ।
স পাতু শতৱক্ত্ৰাগ্নিহেতিৰ্হেতীশ্ৱৰস্য ৱঃ ॥ ৭ ॥
স পাতু শতৱক্ত্ৰাগ্নিহেতিৰ্হেতীশ্ৱৰস্য ৱঃ ॥ ৭ ॥
অৱিদ্যাং স্ৱপ্ৰকাশেন ৱিদ্যাৰূপশ্ছিনত্তি যঃ ।
স সুদৰ্শননিস্ত্ৰিংশঃ সৌতু ৱস্তত্ত্ৱদৰ্শনম্ ॥ ৮ ॥
স সুদৰ্শননিস্ত্ৰিংশঃ সৌতু ৱস্তত্ত্ৱদৰ্শনম্ ॥ ৮ ॥
ক্ৰিযাশক্তিগুণো ৱিষ্ণোৰ্যো ভৱত্যতিশক্তিমান্ ।
অকুণ্ঠশক্তিঃ সা শক্তিৰশক্তিং ৱাৰযেত ৱঃ ॥ ৯ ॥
অকুণ্ঠশক্তিঃ সা শক্তিৰশক্তিং ৱাৰযেত ৱঃ ॥ ৯ ॥
তাৰত্ৱং যস্য সংস্থানে শব্দে চ পৰিদৃশ্যতে ।
প্ৰভোঃ প্ৰহৰণেন্দ্ৰস্য পাঞ্চজন্যঃ স পাতু ৱঃ ॥ ১০ ॥
প্ৰভোঃ প্ৰহৰণেন্দ্ৰস্য পাঞ্চজন্যঃ স পাতু ৱঃ ॥ ১০ ॥
যং সাত্ত্ৱিকমহঙ্কাৰমামনন্ত্যক্ষসাযকম্ ।
অৱ্যাদ্ৱশ্চক্ৰৰূপস্য তদ্ধনুঃ শাৰ্ঙ্গধন্ৱনঃ ॥ ১১ ॥
অৱ্যাদ্ৱশ্চক্ৰৰূপস্য তদ্ধনুঃ শাৰ্ঙ্গধন্ৱনঃ ॥ ১১ ॥
আযুধেন্দ্ৰেণ যেনৈৱ ৱিশ্ৱসৰ্গো ৱিৰচ্যতে ।
স ৱঃ সৌদৰ্শনঃ কুৰ্যাত্ পাশঃ পাশৱিমোচনম্ ॥ ১২ ॥
স ৱঃ সৌদৰ্শনঃ কুৰ্যাত্ পাশঃ পাশৱিমোচনম্ ॥ ১২ ॥
ৱিহাৰো যেন দেৱস্য ৱিশ্ৱক্ষেত্ৰকৃষীৱলঃ ।
ৱ্যজ্যতে তেন সীৰেণ নাসীৰৱিজযোঽস্তু ৱঃ ॥ ১৩ ॥
ৱ্যজ্যতে তেন সীৰেণ নাসীৰৱিজযোঽস্তু ৱঃ ॥ ১৩ ॥
আযুধানামহং ৱজ্ৰং ইত্যগীযত যঃ স ৱঃ ।
অৱ্যাদ্ধেতীশৱজ্ৰোঽসাৱদধীচ্যস্থিসম্ভৱঃ ॥ ১৪ ॥
অৱ্যাদ্ধেতীশৱজ্ৰোঽসাৱদধীচ্যস্থিসম্ভৱঃ ॥ ১৪ ॥
ৱিশ্ৱসংহৃতিশক্তিৰ্যা ৱিশ্ৰুতা বুদ্ধিৰূপিণী ।
সা ৱঃ সৌদৰ্শনী ভূযাদ্গদপ্ৰশমনী গদা ॥ ১৫ ॥
সা ৱঃ সৌদৰ্শনী ভূযাদ্গদপ্ৰশমনী গদা ॥ ১৫ ॥
যাত্যতিক্ষোদশালিত্ৱং মুসলো যেন তেন ৱঃ ।
হেতীশমুসলেনাশু ভিদ্যতাং মোহমৌসলম্ ॥ ১৬ ॥
হেতীশমুসলেনাশু ভিদ্যতাং মোহমৌসলম্ ॥ ১৬ ॥
শূলিদৃষ্টমনোৰ্ৱাচ্যো যেন শূলযতি দ্ৱিষঃ ।
ভৱতাং তেন ভৱতাত্ ত্ৰিশূলেন ৱিশূলতা ॥ ১৭ ॥
ভৱতাং তেন ভৱতাত্ ত্ৰিশূলেন ৱিশূলতা ॥ ১৭ ॥
অস্ত্ৰগ্ৰামস্য কৃত্স্নস্য প্ৰসূতিং যং প্ৰচক্ষতে ।
সোঽৱ্যাত্ সুদৰ্শনো ৱিশ্ৱং আযুধৈঃ ষোডশাযুধঃ ॥ ১৮ ॥
সোঽৱ্যাত্ সুদৰ্শনো ৱিশ্ৱং আযুধৈঃ ষোডশাযুধঃ ॥ ১৮ ॥
শ্ৰীমদ্ৱেঙ্কটনাথেন শ্ৰেযসে ভূযসে সতাম্ ।
কৃতেযমাযুধেন্দ্ৰস্য ষোডশাযুধসংস্তুতিঃ ॥ ১৯ ॥
কৃতেযমাযুধেন্দ্ৰস্য ষোডশাযুধসংস্তুতিঃ ॥ ১৯ ॥
॥ ইতি শ্ৰীৱেদান্তদেশিক ৱিৰচিতং ষোডশাযুধ স্তোত্ৰম্ সম্পূৰ্ণম্ ॥