What is Sri Tripurasundari Manasa Pujana Stotram (Samaraja Dikshita)?

Read Sri Tripurasundari Manasa Pujana Stotram (Samaraja Dikshita) in English (IAST) script — full lyrics with English meaning and transliteration. A worship performed in the mind by Samaraja Dikshita, whose initiation name the colophon gives as Satyanandanatha and who calls the work a wick set in the lamp of worship. It differs from the longer mental worship in this corpus, the one attributed to Shankara, by staying close to the body and the ornament rather than walking the enclosures of the diagram: the argha offered in a lotus-hand with fruit and flowers and fresh sandal, toe-rings of red gems above feet dyed with lac, a leaf-design drawn in musk that the corner of Shiva's eye is caught upon. Partway through, the metre changes and a run of verses opens on jaya devi, jaya devi. Its dedication is to those who keep the samaya.

Which deity is Sri Tripurasundari Manasa Pujana Stotram (Samaraja Dikshita) dedicated to?

Sri Tripurasundari Manasa Pujana Stotram (Samaraja Dikshita) is a Sanskrit hymn dedicated to Goddess Lalita.

Who composed Sri Tripurasundari Manasa Pujana Stotram (Samaraja Dikshita)?

Sri Tripurasundari Manasa Pujana Stotram (Samaraja Dikshita) is traditionally attributed to Samaraja Dikshita.

Sri Tripurasundari Manasa Pujana… in English (IAST)

|| śrītripurasundarīmānasapūjanastotram ||

śrīgaṇeśāya namaḥ ||

amṛtajaladhimadhyollāsiratnāntarīpa-
prasṛmarakiraṇālīkalpitodyānaśobhe |
suratarunikurambaspṛṣṭavātāyanānta-
ścaladalipaṭalībhiḥ kḷptadhūpādikṛtye || 1||

maṇimayabhavane'ntaḥprauḍhamāṇikyaśālā-
madhivasati viśālā kāpi te ratnavedī |
taduparikṛtavāsaṃ dattabālārkahāsaṃ
diśatu śubhamanante devi siṃhāsanaṃ te || 2||

tadupari dhṛtanānāhetibhūṣāśmaraśmi-
vyatikarapunaruktībhūtaramyottarīyām |
galadamaladayāmbhaḥsiktabhaktaprarohāṃ
praṇavanalinabhṛṅgīṃ bhāvaye jñānabhaṅgīm || 3||

druhiṇahariharāṇāṃ maulisañcāraśīlaṃ
maṇighaṭitavibhūṣāraśminirṇejitaṃ ca |
nijamatidṛṣadāhaṃ bhaktigaṅgāpayobhiḥ
padayugamamalaṃ te devi nirṇejayāmi || 4||

garuḍamaṇimayūkhaspardhidūrvāsanāthaiḥ
kuśaśiśuparijuṣṭaiḥ sphītasiddhārthasārthaiḥ |
upahitasitagandhaiḥ sākṣatairvāribhiste
janani caraṇapadme pādyamādyaṃ dadāmi || 5||

phalakusumasanāthaṃ nūtnaratnaprarohaṃ
malayajarasadigdhaṃ snigdhamugdhākṣataṃ ca |
daraniyamitabhaktānīkavāñchāpradāne
karasarasiruhe'sminnardhyamarghye dadāmi || 6||

śiśirakiraṇajātīpatradevaprasūna-
sphuṭitadalanavailākrāntakakkolagandham |
śiśiramamalametadbaddhapīyūvasakhyaṃ
salilamakhilamātastvaṃ prasannā''camethāḥ || 7||

navamaṇihayapīṭhe pretapadmasthitāpi
prapadataralaśobhāspṛṣṭasadviṣṭaraśri |
dadhimadhughṛtamiśraṃ trirvirājopanītaṃ
śaśimukhi madhuparkaṃ tvaṃ mukhāntarnayethāḥ || 8||

punarācamanaṃ kāryaṃ jagajjanani suvrate |
tvacchikṣitena mārgeṇa yato lokaḥ pravartate || 9||

tvaritasahacarībhirdattahastāvalambaṃ
caraṇanalinametatpādukāsthaṃ vidhāya |
praviśa vividhaśālaṃ snānagehāntarālaṃ
paśupatisahitaivābhyaṅgamaṅgīkuruṣva || 10||

api rasikavigītaṃ bhaktacittānumatyai
sadayahṛdayabhāve snāhi pañcāmṛtena |
śaśimṛgamadamustāgārasiddhārthacūrṇaiḥ
kusumajalavimiścaiḥ svairamudvartayāṅgam || 11||

parijanaparimṛṣṭe tvaccharīre na yāva-
cchiśirasaliladhārāṃ kāpi cikṣapa tāvat |
udayini janamātaḥ sītkṛte baddhabhāvai-
stripuramathanahāsairvrīḍitaṃ krīḍitaṃ te || 12||

atha vimalitaratnasvarṇadurvarṇakumbhai-
stribhuvanagatatīrthānītapānīyapūrṇaiḥ |
snapayati suranārīvṛndametattathāpi
praṇayajalamidaṃ naḥ snānakṛtyaṃ karotu || 13||

vimaladhavalacīnapracchadaprāvṛtāṅgyā-
stava śirasiruhebhyo nirhare'mbāmbubindun |
agaruśakaladhūpairdhūpyatāṃ cāṅgamaṅgaṃ
saha paśupatinā tvaṃ yāhi vāsogṛhāntaḥ || 14||

navavimalavicitre vāsasī nūtnaratna-
dyutikṛtapunaruktāyāmasaṃśobhinī te |
atha kucapariṇāhācchādinīṃ śumbhanetra-
tritayabhavadasūyāṃ kañcukīmarpayāmi || 15||

nahanamapi kacanāṃ kaṅkatībhirvidhāya
grathitamaṇivibhūṣāṃ devi veṇīṃ karomi |
nihitanavakirīṭālambimuttabālatābhi-
statabahalamayūkhāṃ candralekhā vidadhyām || 16||

alikatalavilambisphītasīmantamuktā-
saraṇidhaṭitahīrāspaṣṭacandrāttatandre |
vividhamaṇigaṇāṅkottaṃsasaṃśliṣyadaśmā
śravaṇayugavibhūṣā devi toṣāya bhūyāt || 17||

vividhaviracanābhirbhinnabhinnā vibhūṣā
janayatu tava kaṇṭhe devi kāmapyabhikhyām |
guṇinamapi girīśaślepadattāntarāyaṃ
kaṭhinakucayugāgre hāramāropayāmi || 18||

darataralavilambisvarṇasūtrāntagucche
janani tava diśetāmaṅgade śarmakarma |
atha valayamaṇīnāṃ raśmisambhinnamudrāṃ
janayatu punaruktāṃ śaṛṅkhalāmantarīṇām || 19||

maṇimayaraśanādhaḥkṣudraghaṇṭāninādā
maṇitaguṇanikānāṃ smārakāḥ syuḥ śivasya |
marakatamaṇijātaṃ mañjumañjīrayugmaṃ
racayatu śaśimaule rañjanaṃ siñjitena || 20||

aruṇamaṇikṛtānāmaṅgulībhūṣaṇānāṃ
prabhavatu padamusrairlākṣayā rañjitaṃ te |
mṛgamadaracitāyāṃ patrabhaṅgīlatāyā-
manubhavatu dṛganto bandhanaṃ bhūtabhartuḥ || 21||

bhaja janani haridrāṃ dattahāridramudrāṃ
kusumasalilatailākrāntakāśmīrakośām |
atha nasi kuru muktāṃ dantavāso'nuṣaktāṃ
smitarucipunaruktāṃ nanditānekabhaktām || 22||

sahajanalinanīle khañjane khañjanānāṃ
bhavanigaḍagatānāṃ mocane locane te |
janani giriśacetorañjane mandamandaṃ
masṛṇimasṛṇitaistairañjanairañjaneyam || 23||

praṇatibhirupanītaṃ dīptalālāṭanetra-
pratibhaṭamiva śambhormṛtyubādhāvirodhi |
śaśina iva mukhendorbhedakaḥ ko'pi dharmo
janayatu mudamuccaiḥ kuṅkumaṃ raṅkunetre || 24||

yugapadupagatendropendrarudrādimauli-
sthalamukuṭavighaṭṭaccaṇḍadaṇḍābhighātaiḥ |
kṛtasaraṇirajasrakruddhadauvārikaiste
janani bhava vibhūṣā pretapadmāsanasya || 25||

ahamahamikayādhaḥ pātukānāṃ surāṇāṃ
prapadamapi śarīre devi saṃyojya śīghram |
karuṇarasamayīnāṃ locanāntaśchaṭānāṃ
katipayavalanābhirdehi pūjāvakāśam || 26||

agarughusṛṇacorīśīragorocanābhiḥ
malayajamṛganābhisphītakarpūrapūraiḥ |
kusumasalilaghṛṣṭaiḥ kalpayitvāṅgarāgaṃ
paṭutarapaṭavāsairvāsaye te'ṅgakāni || 27||

kamalakumudamallīmālatīkundajātī-
bakulakanakanīpāśokacāmpeyakādyaiḥ |
marubakatulasībhiḥ ketakībilvapatraiḥ
damanakaśatapatrairarcaye tvatpadābjam || 28||

hāraśekharavataṃsaśāṭikāpracchakātulitakañcukīmukhaiḥ |
maṇḍapairjavanikābhiruccakaiḥ kausumaistava mudaṃ kadambaye || 29||

kanakamayahasantīkoṭimadhyasthitānāṃ
mṛdupavanadhutānāṃ dīptavaiśvānarāṇām |
agarumupari hutvā gugguluṃ sarjakhaṇḍān
ghṛtajatuparimiśraṃ tvāṃ śive dhūpayāmi || 30||

dhūpavartitaramantarāntarā gandhatailaparipūrṇadīpikāḥ |
āvahantu tava pārśvayostarāmambike javanikāpaṭaśriyam || 31||

surasurabhijasarpiḥpūrite ratnapātre
himakiraṇarajobhirloḍitāṃ tūlavartīm |
taruṇadahanayuktāmamba kṛtvā dadeyaṃ
nirayanirasanāya prasphurantaṃ pradīpam || 32||

rajatakanakahīrādyaśmapātreṣu mātaḥ
vividharasasanāthaiścoṣyalehyaprapeyaiḥ |
upāhitabahubhakṣyairvyañjanaiścārukhādyaiḥ
jaṭharadahanatṛptiṃ nityatṛpte carethāḥ || 33||

parasparakutūhalaiḥ kavaladānarūpaiḥ śive
purāṇataruṇau yuvāṃ caratamatra līlāśitam |
sugandhi salilaṃ tathā pibatameṇanābhīrasaiḥ
sakesaraniśākarai racayataṃ karodvartanam || 34||

panasakadalajambūkarkaṭīhārahūrāmalaka-
badaranimbūdumbarairbījapūraiḥ |
amṛtalakucabilvairdāḍimīnālikerai
rucirucitaphalaiste vardhatāṃ baddharāgā || 35||

śaśikaradhavalānāṃ nāgavallīdalānāṃ
kramukakadarajātīcandrasaṃyogabhājām |
mṛgamadasurasūnusphītacūrṇāvṛtānāṃ
bhajatu janani rāgaṃ tvanmukhāmbhojametat || 36||

kanakabharitapṛthvīṃ mānuṣānandamāhu-
stadupari śatakoṭikrāmukānandamāhuḥ |
janani tava dadeyaṃ dakṣiṇāṃ kāṃ tathāpi
prathaya mayi dṛgantaṃ dakṣiṇāvīkṣaṇena || 37||

tribhuvanakuhare'sminpūrite veṇuvīṇā-
paṭupaṭahakajhillītālaghaṇṭāninādaiḥ |
uragasuravadhūbhirgīyamānaṃ samantāt
janayatu padamuccairdevi nīrājanaṃ te || 38||

prāṇeṣu pañcasu nidhāya ṣaḍātmavṛtti-
vartīścidagniparicumbitajātaśobhāḥ |
nīrājayāmi bhavatīṃ bhavatīvratāpa-
nirvāpahetumadhunā madhunā'lasākṣi || 39||

uragaturagahaṃsakekiśālūrabhṛṅgī-
madakalakalaviṅkīśyenapārāvatānām |
gatibhirupacito'yaṃ maulitaḥ pādamūlaṃ
haratu duritajātaṃ devi karpūradīpaḥ || 40||

jaya devi jaya devi jaya viśvādhāre
dīnānāthoddharaṇapravaṇe janasāre |
tvatpadapadme padme vidhṛtavyāpāre
mayi dīne kuru karuṇāṃ karuṇāmṛtapāre || 41||

amṛtodadhimadhyasthitanavaratnadvīpe
viṣvagvikasitasuratarunavacampakanīpe |
nānākusumāmodini vidhutāgarudhūpe
cintāmaṇibhavane'ṅganatiṣṭhatsurabhūpe || 42||

māṇikyojjvalacatvarasiṃhāsanaśobhe
śavapañcakamañce'ñcitajanalocanalobhe |
suśvetātapavāraṇacalacāmaradambhe
dhyāye bhavatīmaniśaṃ kṛtajagadārambhe || 43||

dalitajapākusumopamavasanacchannāṅgīṃ
taruṇāruṇakaruṇapradakiraṇāvalibhaṅgīm |
dadhatīṃ racanāṃ nayane yamunātāraṅgīṃ
kalayantīṃ kucakośe suṣamāṃ nāraṅgīm || 44||

śarapañcakabāṇāsanasṛṇipāśollasitāṃ
malayānilaparivādadamukhapadmaśvasitām |
bālāmṛtakaramaṇḍitacūḍātaṭamīhatāṃ
jyotistritayālaṅkṛtanayanatrayasahitām || 45||

paśupatiyantraṇapaṭutararomāvaliyūpāṃ
manmathataskaraguptikṣamanābhīkūpām |
prapadālambiśikhāmaṇivṛndārakabhūpāṃ
kamalāsanahariharamukhacintyāmitarūpām || 46||

kālī bagalā bālā tārā bhuvaneśī
vārāhī mātaṅgī kamalā vacaneśī |
chinnā durgā gaṅgā kāśī kāmeśī
tvatto nānyatkiñcittvaṃ cidrasapeśī || 47||

tvaṃ bhūmistvaṃ salilaṃ tvaṃ tejaḥ prabalaṃ
tvaṃ vāyustvaṃ vyoma tvaṃ cittaṃ vimalam |
tvaṃ jīvastvaṃ ceśastvaṃ brahmāsyamalaṃ
satyānṛtayoranyattvattaḥ kiṃ sakalam || 48||

kulakuṇḍe tvaṃ kuruṣe śayane prasvāpaṃ
svādhiṣṭhāne mihirāyutadīdhititāpam |
nīlā nābhau kaṇṭhe śaśibhā hṛtapāpaṃ
varṣasyamṛtaṃ bindāvānandāvāpam || 49||

tvatpadapadme cittaṃ tripure me ramatāṃ
tatraiva prativelaṃ maulirme namatām |
yātāyātakleśaḥ sadyaḥ saṃśamatāṃ
yāce bhūyo bhūyo bhavatā me bhavatām || 50||

nṛtyati gāyati surasaṃ suranārīvṛnde
karatālīdānotsukasuravitatānande |
nīrājanakāle tava munijananutavede
caraṇānatasamrājaḥ parihṛtabhavakhede || 51||

miladalipaṭalībhiḥ kevalaṃ ghrātapūrvaḥ
sphuṭitakusumagarbhaḥ svairasañcāriṇībhiḥ |
upahitapaṭavāsaḥ puṣpadhūlīkadambaiḥ
prabhavatu padapātī devi puṣpāñjaliste || 52||

sakṛdapi vinatāṅghristvāṃ parikramya mātaḥ
bhavati makhaphaleṣu kṣīṇalobhaṃ mano naḥ |
sarasijamakarandāsvādatṛpto milindaḥ
kvacidapi picumande cittavṛttiṃ tanoti || 53||

janani khalakapotanyāyataḥ pātukānā-
madhipadakamalaṃ te mandavṛndārakāṇām |
bhavatu nayanayoste gocaraḥ kvānatirme
na lasati punarucceḥ svairamudgrīvikā cet || 54||

vimalamukurabimbaṃ puṇḍarīkātapatraṃ
śiśirakarasamāne cāmare cāmareśi |
karituragakadambaṃ śaktibhirdiśyamānaṃ
janaya saphalamañcallocanālocanābhiḥ || 55||

atha kṛtaparivārābhyarcanaṃ te samarpya
stutibhiranupamābhiḥ pāvaye svāṃ rasajñām |
yadapi na raviraśmiḥ svopakāraṃ vidhatte
tadapi kamalamālāmlānahāniṃ tanoti || 56||

śravasi viśati yasya tvanmanorekavarṇaḥ
sakṛdapi vidhiyogādambike mānavasya |
laghutaraphalametadyattrivargāśrayatvaṃ
paricarati purastātpūruṣārthaścaturthaḥ || 57||

hṛdayakamalamadhye tvāṃ samānīya mātaḥ
pavanabharitanāḍīrandhramudrāvidhijñāḥ |
dadhati paramadhanyāḥ kuṇḍalīsparśahṛṣya-
cchaśigaladamṛtaughaplāvajanyapramodam || 58||

vadati vidhikalatraṃ tvāṃ śive ko'pi kaścit
tripuramathanapuṇyaṃ śrīpateḥ ko'pi bhāgyam |
prakṛtimiti pare'pi prauḍhavijñānameke
nikhilanigamamūlaṃ manmahe bodhameva || 59||

kadā tava padāmbujasmaraṇajātaromodgamaḥ
sadāśivamadālase janani mātarityudgiran |
nilīnakaraṇakriyastridaśagarvasarvaṅkaṣā-
makharvapadavīṃ bhaje hariharādibhirbhāvitām || 60||

tvadīyamukhacandire calitalocanendindire
prasādakulamandire sthagitapadmacandendire |
prabhāpaṭalatanture lalitahāvakelīpure
hṛtasmaraharāntare dhṛtamatirbhavaṃ santare || 61||

tvadīyaṃ yadrūpaṃ janajanani bindutrayayutaṃ
smarannantaryogāttridivapatitāmāpa surapaḥ |
idaṃ ko jānīte kṣaṇamapi harārdhaṃ prajapatāṃ
hasārdhaṃ vyālambya pratiphalati haṃsaḥ pariṇatiḥ || 62||

janani nibhṛtaṃ yatte rūpaṃ vadatyatiśāśvataṃ
lasatu hṛdi no dīpaprāyaḥ sa ko'pi hasātmakaḥ |
smaraṇaviṣaye yena svairaṃ svareṇa vijṛmbhatā
tripuramathanaḥ prāpeśatvaṃ tadātmakatāṃ gataḥ || 63||

ṛcāmācāryāsi stutiśatajuṣāṃ cāpi yajuṣāṃ
mahādhāmnāṃ sāmnāṃ prathitayaśaso'tharvaśirasaḥ |
haribrahmeśādyāḥ prapadakiraṇottaṃsamukuṭā-
stavātastvāṃ stotuṃ janajanani ko vā prabhavatu || 64||

trasyatkhañjanagañjanavyasaninīmunmāthinīṃ mādyato
jīvañjīvakulasya bhṛṅgapaṭalīnyakkārabaddhavratām |
raṅkūcchaṅkuvidhāyinīṃ ca nalinaśrīgarvasarvaṅkaṣāṃ
kāruṇyāmṛtavarṣiṇīṃ mayi śive dṛṣṭiṃ manāṅmoṭaya || 65||

riṅgadbhṛṅgakadambaḍambarapariṣvaṅgaprasaṅgākula-
pratyūṣasphuramāṇapaṅkajavanīsaubhāgyasarvaṅkaṣaḥ |
dṛkkoṇaḥ karuṇāṅkurāṅkṣitatanuḥ ko'pyadrije madvapuḥ-
pānthatve tarasā bhavetparikarī dhanyastadā syāṃ na kim || 66||

samudyanmārtaṇḍaprasṛmarakarālīmasṛṇayā
padadvandvānandapraṇayijanariṅgatkaruṇayā |
lalallīlābhājā paraśivapariṣvaṅgaparayā
dhiyā cetaḥ kālaṃ naya gatanaya tvaṃ kṣaṇamapi || 67||

vedairaṅghribhirujjvalopaniṣadāṃ vṛndairadhaḥkalpitaiḥ
śāstrādyairapi tiryagūrdhvakalitairoṅkāramārgeṇa ca |
viṣvaṅmātranibandhanaiḥ paricite'sminvāṅmaye pañjare
kīrī kācana cetanaikavibhavā citte cakāstācciram || 68||

taruṇāruṇapratimaramyaruciṃ kusumeṣucāpasṛṇipāśakarām |
triguṇātparāṃ triguṇarūpamayīṃ bhavatīmaharniśamahaṃ kalaye || 69||

iti nijamativaibhavānurūpāmakṛta kavirbhuvi sāmarājanāmā |
samayijanamude'mbikāsaparyāmamṛtasukhātmakatāvikāsaparyām || 70||

|| iti śrīsatyānandanāthāparanāmadheyasāmarājadīkṣitaviracite pūjāratnavarti tripurasundarīmānasapūjanastotraṃ sampūrṇam ||

More Lalita Stotras

Explore More