শ্রীমদ্ভাগবতম্ ১০.১৫

শ্রীশুক উবাচ
ততশ্চ পৌগণ্ডবযঃশ্রীতৌ ব্রজে
বভূবতুস্তৌ পশুপালসম্মতৌ ।
গাশ্চারযন্তৌ সখিভিঃ সমং পদৈ-
র্বৃন্দাবনং পুণ্যমতীব চক্রতুঃ ॥ ১ ॥

তন্মাধবো বেণুমুদীরযন্ বৃতো
গোপৈর্গৃণদ্ভিঃ স্বযশো বলান্বিতঃ ।
পশূন্ পুরস্কৃত্য পশব্যমাবিশদ্
বিহর্তুকামঃ কুসুমাকরং বনম্ ॥ ২ ॥

তন্মঞ্জুঘোষালিমৃগদ্বিজাকুলং
মহন্মনঃপ্রখ্যপযঃসরস্বতা ।
বাতেন জুষ্টং শতপত্রগন্ধিনা
নিরীক্ষ্য রন্তুং ভগবান্ মনো দধে ॥ ৩ ॥

স তত্র তত্রারুণপল্লবশ্রিযা
ফলপ্রসূনোরুভরেণ পাদযোঃ ।
স্পৃশচ্ছিখান্ বীক্ষ্য বনস্পতীন্ মুদা
স্মযন্নিবাহাগ্রজমাদিপূরুষঃ ॥ ৪ ॥

শ্রীভগবানুবাচ
অহো অমী দেববরামরার্চিতং
পাদাম্বুজং তে সুমনঃফলার্হণম্ ।
নমন্ত্যুপাদায শিখাভিরাত্মন-
স্তমোঽপহত্যৈ তরুজন্ম যত্কৃতম্ ॥ ৫ ॥

এতেঽলিনস্তব যশোঽখিললোকতীর্থং
গাযন্ত আদিপুরুষানুপথং ভজন্তে ।
প্রাযো অমী মুনিগণা ভবদীযমুখ্যা
গূঢং বনেঽপি ন জহত্যনঘাত্মদৈবম্ ॥ ৬ ॥

নৃত্যন্ত্যমী শিখিন ঈড্য মুদা হরিণ্যঃ
কুর্বন্তি গোপ্য ইব তে প্রিযমীক্ষণেন ।
সূক্তৈশ্চ কোকিলগণা গৃহমাগতায
ধন্যা বনৌকস ইযান্ হি সতাং নিসর্গঃ ॥ ৭ ॥

ধন্যেযমদ্য ধরণী তৃণবীরুধস্ত্বত্-
পাদস্পৃশো দ্রুমলতাঃ করজাভিমৃষ্টাঃ ।
নদ্যোঽদ্রযঃ খগমৃগাঃ সদযাবলোকৈ-
র্গোপ্যোঽন্তরেণ ভুজযোরপি যত্স্পৃহা শ্রীঃ ॥ ৮ ॥

শ্রীশুক উবাচ
এবং বৃন্দাবনং শ্রীমত্ কৃষ্ণঃ প্রীতমনাঃ পশূন্ ।
রেমে সঞ্চারযন্নদ্রেঃ সরিদ্রোধঃসু সানুগঃ ॥ ৯ ॥

ক্বচিদ্ গাযতি গাযত্সু মদান্ধালিষ্বনুব্রতৈঃ ।
উপগীযমানচরিতঃ পথি সঙ্কর্ষণান্বিতঃ ॥ ১০ ॥

অনুজল্পতি জল্পন্তং কলবাক্যৈঃ শুকং ক্বচিত্ ।
ক্বচিত্সবল্গু কূজন্তমনুকূজতি কোকিলম্ ।
ক্বচিচ্চ কালহংসানামনুকূজতি কূজিতম্ ।
অভিনৃত্যতি নৃত্যন্তং বর্হিণং হাসযন্ ক্বচিত্ ॥ ১১ ॥

মেঘগম্ভীরযা বাচা নামভির্দূরগান্ পশূন্ ।
ক্বচিদাহ্বযতি প্রীত্যা গোগোপালমনোজ্ঞযা ॥ ১২ ॥

চকোরক্রৌঞ্চচক্রাহ্বভারদ্বাজাংশ্চ বর্হিণঃ ।
অনুরৌতি স্ম সত্ত্বানাং ভীতবদ্ ব্যাঘ্রসিংহযোঃ ॥ ১৩ ॥

ক্বচিত্ ক্রীডাপরিশ্রান্তং গোপোত্সঙ্গোপবর্হণম্ ।
স্বযং বিশ্রমযত্যার্যং পাদসংবাহনাদিভিঃ ॥ ১৪ ॥

নৃত্যতো গাযতঃ ক্বাপি বল্গতো যুধ্যতো মিথঃ ।
গৃহীতহস্তৌ গোপালান্ হসন্তৌ প্রশশংসতুঃ ॥ ১৫ ॥

ক্বচিত্ পল্লবতল্পেষু নিযুদ্ধশ্রমকর্শিতঃ ।
বৃক্ষমূলাশ্রযঃ শেতে গোপোত্সঙ্গোপবর্হণঃ ॥ ১৬ ॥

পাদসংবাহনং চক্রুঃ কেচিত্তস্য মহাত্মনঃ ।
অপরে হতপাপ্মানো ব্যজনৈঃ সমবীজযন্ ॥ ১৭ ॥

অন্যে তদনুরূপাণি মনোজ্ঞানি মহাত্মনঃ ।
গাযন্তি স্ম মহারাজ স্নেহক্লিন্নধিযঃ শনৈঃ ॥ ১৮ ॥

এবং নিগূঢাত্মগতিঃ স্বমাযযা
গোপাত্মজত্বং চরিতৈর্বিডম্বযন্ ।
রেমে রমালালিতপাদপল্লবো
গ্রাম্যৈঃ সমং গ্রাম্যবদীশচেষ্টিতঃ ॥ ১৯ ॥

শ্রীদামা নাম গোপালো রামকেশবযোঃ সখা ।
সুবলস্তোককৃষ্ণাদ্যা গোপাঃ প্রেম্ণেদমব্রুবন্ ॥ ২০ ॥

রাম রাম মহাবাহো কৃষ্ণ দুষ্টনিবর্হণ ।
ইতোঽবিদূরে সুমহদ্ বনং তালালিসঙ্কুলম্ ॥ ২১ ॥

ফলানি তত্র ভূরীণি পতন্তি পতিতানি চ ।
সন্তি কিন্ত্ববরুদ্ধানি ধেনুকেন দুরাত্মনা ॥ ২২ ॥

সোঽতিবীর্যোঽসুরো রাম হে কৃষ্ণ খররূপধৃক্ ।
আত্মতুল্যবলৈরন্যৈর্জ্ঞাতিভির্বহুভির্বৃতঃ ॥ ২৩ ॥

তস্মাত্ কৃতনরাহারাদ্ ভীতৈর্নৃভিরমিত্রহন্ ।
ন সেব্যতে পশুগণৈঃ পক্ষিসঙ্ঘৈর্বিবর্জিতম্ ॥ ২৪ ॥

বিদ্যন্তেঽভুক্তপূর্বাণি ফলানি সুরভীণি চ ।
এষ বৈ সুরভির্গন্ধো বিষূচীনোঽবগৃহ্যতে ॥ ২৫ ॥

প্রযচ্ছ তানি নঃ কৃষ্ণ গন্ধলোভিতচেতসাম্ ।
বাঞ্ছাস্তি মহতী রাম গম্যতাং যদি রোচতে ॥ ২৬ ॥

এবং সুহৃদ্বচঃ শ্রুত্বা সুহৃত্প্রিযচিকীর্ষযা ।
প্রহস্য জগ্মতুর্গোপৈর্বৃতৌ তালবনং প্রভূ ॥ ২৭ ॥

বলঃ প্রবিশ্য বাহুভ্যাং তালান্ সম্পরিকম্পযন্ ।
ফলানি পাতযামাস মতঙ্গজ ইবৌজসা ॥ ২৮ ॥

ফলানাং পততাং শব্দং নিশম্যাসুররাসভঃ ।
অভ্যধাবত্ ক্ষিতিতলং সনগং পরিকম্পযন্ ॥ ২৯ ॥

সমেত্য তরসা প্রত্যগ্ দ্বাভ্যাং পদ্ভ্যাং বলং বলী ।
নিহত্যোরসি কাশব্দং মুঞ্চন্ পর্যসরত্ খলঃ ॥ ৩০ ॥

পুনরাসাদ্য সংরব্ধ উপক্রোষ্টা পরাক্ স্থিতঃ ।
চরণাবপরৌ রাজন্ বলায প্রাক্ষিপদ্ রুষা ॥ ৩১ ॥

স তং গৃহীত্বা প্রপদোর্ভ্রামযিত্বৈকপাণিনা ।
চিক্ষেপ তৃণরাজাগ্রে ভ্রামণত্যক্তজীবিতম্ ॥ ৩২ ॥

তেনাহতো মহাতালো বেপমানো বৃহচ্ছিরাঃ ।
পার্শ্বস্থং কম্পযন্ ভগ্নঃ স চান্যং সোঽপি চাপরম্ ॥ ৩৩ ॥

বলস্য লীলযোত্সৃষ্টখরদেহহতাহতাঃ ।
তালাশ্চকম্পিরে সর্বে মহাবাতেরিতা ইব ॥ ৩৪ ॥

নৈতচ্চিত্রং ভগবতি হ্যনন্তে জগদীশ্বরে ।
ওতপ্রোতমিদং যস্মিংস্তন্তুষ্বঙ্গ যথা পটঃ ॥ ৩৫ ॥

ততঃ কৃষ্ণং চ রামং চ জ্ঞাতযো ধেনুকস্য যে ।
ক্রোষ্টারোঽভ্যদ্রবন্ সর্বে সংরব্ধা হতবান্ধবাঃ ॥ ৩৬ ॥

তাংস্তানাপততঃ কৃষ্ণো রামশ্চ নৃপ লীলযা ।
গৃহীতপশ্চাচ্চরণান্ প্রাহিণোত্তৃণরাজসু ॥ ৩৭ ॥

ফলপ্রকরসঙ্কীর্ণং দৈত্যদেহৈর্গতাসুভিঃ ।
ররাজ ভূঃ সতালাগ্রৈর্ঘনৈরিব নভস্তলম্ ॥ ৩৮ ॥

তযোস্তত্ সুমহত্ কর্ম নিশম্য বিবুধাদযঃ ।
মুমুচুঃ পুষ্পবর্ষাণি চক্রুর্বাদ্যানি তুষ্টুবুঃ ॥ ৩৯ ॥

অথ তালফলান্যাদন্মনুষ্যা গতসাধ্বসাঃ ।
তৃণং চ পশবশ্চেরুর্হতধেনুককাননে ॥ ৪০ ॥

কৃষ্ণঃ কমলপত্রাক্ষঃ পুণ্যশ্রবণকীর্তনঃ ।
স্তূযমানোঽনুগৈর্গোপৈঃ সাগ্রজো ব্রজমাব্রজত্ ॥ ৪১ ॥

তং গোরজশ্ছুরিতকুন্তলবদ্ধবর্হ-
বন্যপ্রসূনরুচিরেক্ষণচারুহাসম্ ।
বেণুম্ক্বণন্তমনুগৈরুপগীতকীর্তিং
গোপ্যো দিদৃক্ষিতদৃশোঽভ্যগমন্ সমেতাঃ ॥ ৪২ ॥

পীত্বা মুকুন্দমুখসারঘমক্ষিভৃঙ্গৈ-
স্তাপং জহুর্বিরহজং ব্রজযোষিতোঽহ্নি ।
তত্সত্কৃতিং সমধিগম্য বিবেশ গোষ্ঠং
সব্রীডহাসবিনযং যদপাঙ্গমোক্ষম্ ॥ ৪৩ ॥

তযোর্যশোদারোহিণ্যৌ পুত্রযোঃ পুত্রবত্সলে ।
যথাকামং যথাকালং ব্যধত্তাং পরমাশিষঃ ॥ ৪৪ ॥

গতাধ্বানশ্রমৌ তত্র মজ্জনোন্মর্দনাদিভিঃ ।
নীবীং বসিত্বা রুচিরাং দিব্যস্রগ্গন্ধমণ্ডিতৌ ॥ ৪৫ ॥

জনন্যুপহৃতং প্রাশ্য স্বাদ্বন্নমুপলালিতৌ ।
সংবিশ্য বরশয্যাযাং সুখং সুষুপতুর্ব্রজে ॥ ৪৬ ॥

এবং স ভগবান্ কৃষ্ণো বৃন্দাবনচরঃ ক্বচিত্ ।
যযৌ রামমৃতে রাজন্ কালিন্দীং সখিভির্বৃতঃ ॥ ৪৭ ॥

অথ গাবশ্চ গোপাশ্চ নিদাঘাতপপীডিতাঃ ।
দুষ্টং জলং পপুস্তস্যাস্তৃষ্ণার্তা বিষদূষিতম্ ॥ ৪৮ ॥

বিষাম্ভস্তদুপস্পৃশ্য দৈবোপহতচেতসঃ ।
নিপেতুর্ব্যসবঃ সর্বে সলিলান্তে কুরূদ্বহ ॥ ৪৯ ॥

বীক্ষ্য তান্ বৈ তথাভূতান্ কৃষ্ণো যোগেশ্বরেশ্বরঃ ।
ঈক্ষযামৃতবর্ষিণ্যা স্বনাথান্ সমজীবযত্ ॥ ৫০ ॥

তে সম্প্রতীতস্মৃতযঃ সমুত্থায জলান্তিকাত্ ।
আসন্ সুবিস্মিতাঃ সর্বে বীক্ষমাণাঃ পরস্পরম্ ॥ ৫১ ॥

অন্বমংসত তদ্ রাজন্ গোবিন্দানুগ্রহেক্ষিতম্ ।
পীত্বা বিষং পরেতস্য পুনরুত্থানমাত্মনঃ ॥ ৫২ ॥