শ্ৰীশুক উৱাচ
ইন্দ্ৰস্তদাত্মনঃ পূজাং ৱিজ্ঞায ৱিহতাং নৃপ । গোপেভ্যঃ কৃষ্ণনাথেভ্যো নন্দাদিভ্যশ্চুকোপ হ ॥ ১ ॥
ইন্দ্ৰস্তদাত্মনঃ পূজাং ৱিজ্ঞায ৱিহতাং নৃপ । গোপেভ্যঃ কৃষ্ণনাথেভ্যো নন্দাদিভ্যশ্চুকোপ হ ॥ ১ ॥
গণং সাংৱৰ্তকং নাম মেঘানাং চান্তকাৰীণাম্ । ইন্দ্ৰঃ প্ৰচোদযত্ ক্ৰুদ্ধো ৱাক্যং চাহেশমান্যুত ॥ ২ ॥
অহো শ্ৰীমদমাহাত্ম্যং গোপানাং কাননৌকসাম্ । কৃষ্ণং মৰ্ত্যমুপাশ্ৰিত্য যে চক্ৰুৰ্দেৱহেলনম্ ॥ ৩ ॥
যথাদৃঢৈঃ কৰ্মমযৈঃ ক্ৰতুভিৰ্নামনৌনিভৈঃ । ৱিদ্যামান্ৱীক্ষিকীং হিত্ৱা তিতীৰ্ষন্তি ভৱাৰ্ণৱম্ ॥ ৪ ॥
ৱাচালং বালিশং স্তব্ধমজ্ঞং পণ্ডিতমানিনম্ । কৃষ্ণং মৰ্ত্যমুপাশ্ৰিত্য গোপা মে চক্ৰুৰপ্ৰিযম্ ॥ ৫ ॥
এষাং শ্ৰিযাৱলিপ্তানাং কৃষ্ণেনাধ্মাপিতাত্মনাম্ । ধুনুত শ্ৰীমদস্তম্ভং পশূন্ নযত সঙ্ক্ষযম্ ॥ ৬ ॥
অহং চৈৰাৱতং নাগমাৰুহ্যানুৱ্ৰজে ৱ্ৰজম্ । মৰুদ্গণৈৰ্মহাৱেগৈৰ্নন্দগোষ্ঠজিঘাংসযা ॥ ৭ ॥
শ্ৰীশুক উৱাচ
ইত্থং মঘৱতাজ্ঞপ্তা মেঘা নিৰ্মুক্তবন্ধনাঃ । নন্দগোকুলমাসাৰৈঃ পীডযামাসুৰোজসা ॥ ৮ ॥
ইত্থং মঘৱতাজ্ঞপ্তা মেঘা নিৰ্মুক্তবন্ধনাঃ । নন্দগোকুলমাসাৰৈঃ পীডযামাসুৰোজসা ॥ ৮ ॥
ৱিদ্যোতমানা ৱিদ্যুদ্ভিঃ স্তনন্তঃ স্তনযিত্নুভিঃ । তীৱ্ৰৈৰ্মৰুদ্গণৈৰ্নুন্না ৱৱৃষুৰ্জলশৰ্কৰাঃ ॥ ৯ ॥
স্থূণাস্থূলা ৱৰ্ষধাৰা মুঞ্চত্স্ৱভ্ৰেষ্ৱভীক্ষ্ণশঃ । জলৌঘৈঃ প্লাৱ্যমানা ভূৰ্নাদৃশ্যত নতোন্নতম্ ॥ ১০ ॥
অত্যাসাৰাতিৱাতেন পশৱো জাতৱেপনাঃ । গোপা গোপ্যশ্চ শীতাৰ্তা গোৱিন্দং শৰণং যযুঃ ॥ ১১ ॥
শিৰঃ সুতাংশ্চ কাযেন প্ৰচ্ছাদ্যাসাৰপীডিতাঃ । ৱেপমানা ভগৱতঃ পাদমূলমুপাযযুঃ ॥ ১২ ॥
কৃষ্ণ কৃষ্ণ মহাভাগ ত্ৱন্নাথং গোকুলং প্ৰভো । ত্ৰাতুমৰ্হসি দেৱান্নঃ কুপিতাদ্ ভক্তৱত্সল ॥ ১৩ ॥
শিলাৱৰ্ষাতিৱাতেন হন্যমানমচেতনম্ । নিৰীক্ষ্য ভগৱান্ মেনে কুপিতেন্দ্ৰকৃতং হৰিঃ ॥ ১৪ ॥
অপৰ্ত্ৱত্যুল্বণং ৱৰ্ষমতিৱাতং শিলামযম্ । স্ৱযাগে ৱিহতেঽস্মাভিৰিন্দ্ৰো নাশায ৱৰ্ষতি ॥ ১৫ ॥
তত্ৰ প্ৰতিৱিধিং সম্যগাত্মযোগেন সাধযে । লোকেশমানিনাং মৌঢ্যাদ্ধনিষ্যে শ্ৰীমদং তমঃ ॥ ১৬ ॥
ন হি সদ্ভাৱযুক্তানাং সুৰাণামীশৱিস্মযঃ । মত্তোঽসতাং মানভঙ্গঃ প্ৰশমাযোপকল্পতে ॥ ১৭ ॥
তস্মান্মচ্ছৰণং গোষ্ঠং মন্নাথং মত্পৰিগ্ৰহম্ । গোপাযে স্ৱাত্মযোগেন সোঽযং মে ৱ্ৰত আহিতঃ ॥ ১৮ ॥
ইত্যুক্ত্ৱৈকেন হস্তেন কৃত্ৱা গোৱৰ্ধনাচলম্ । দধাৰ লীলযা ৱিষ্ণুশ্ছত্ৰাকমিৱ বালকঃ ॥ ১৯ ॥
অথাহ ভগৱান্ গোপান্হেঽম্ব তাত ৱ্ৰজৌকসঃ । যথোপজোষং ৱিশত গিৰিগৰ্তং সগোধনাঃ ॥ ২০ ॥
ন ত্ৰাস ইহ ৱঃ কাৰ্যো মদ্ধস্তাদ্ৰিনিপাতনাত্ । ৱাতৱৰ্ষভযেনালং তত্ত্ৰাণং ৱিহিতং হি ৱঃ ॥ ২১ ॥
তথা নিৰ্ৱিৱিশুৰ্গৰ্তং কৃষ্ণাশ্ৱাসিতমানসঃ । যথাৱকাশং সধনাঃ সৱ্ৰজাঃ সোপজীৱিনঃ ॥ ২২ ॥
ক্ষুত্তৃড্ৱ্যথাং সুখাপেক্ষাং হিত্ৱা তৈৰ্ৱ্ৰজৱাসিভিঃ । ৱীক্ষ্যমাণো দধাৰাদ্ৰিং সপ্তাহং নাচলত্ পদাত্ ॥ ২৩ ॥
কৃষ্ণযোগানুভাৱং তং নিশম্যেন্দ্ৰোঽতিৱিস্মিতঃ । নিস্তম্ভো ভ্ৰষ্টসঙ্কল্পঃ স্ৱান্মেঘান্ সন্ন্যৱাৰযত্ ॥ ২৪ ॥
খং ৱ্যভ্ৰমুদিতাদিত্যং ৱাতৱৰ্ষং চ দাৰুণম্ । নিশম্যোপৰতং গোপান্ গোৱৰ্ধনধৰোঽব্ৰৱীত্ ॥ ২৫ ॥
নিৰ্যাত ত্যজত ত্ৰাসং গোপাঃ সস্ত্ৰীধনাৰ্ভকাঃ । উপাৰতং ৱাতৱৰ্ষং ৱ্যুদপ্ৰাযাশ্চ নিম্নগাঃ ॥ ২৬ ॥
ততস্তে নিৰ্যযুৰ্গোপাঃ স্ৱং স্ৱমাদায গোধনম্ । শকটোঢোপকৰণং স্ত্ৰীবালস্থৱিৰাঃ শনৈঃ ॥ ২৭ ॥
ভগৱানপি তং শৈলং স্ৱস্থানে পূৰ্ৱৱত্ প্ৰভুঃ । পশ্যতাং সৰ্ৱভূতানাং স্থাপযামাস লীলযা ॥ ২৮ ॥
তং প্ৰেমৱেগান্নিৰ্ভৃতা ৱ্ৰজৌকসোযথা সমীযুঃ পৰিৰম্ভণাদিভিঃ । গোপ্যশ্চ সস্নেহমপূজযন্ মুদাদধ্যক্ষতাদ্ভিৰ্যুযুজুঃ সদাশিষঃ ॥ ২৯ ॥
যশোদা ৰোহিণী নন্দো ৰামশ্চ বলিনাং ৱৰঃ । কৃষ্ণমালিঙ্গ্য যুযুজুৰাশিষঃ স্নেহকাতৰাঃ ॥ ৩০ ॥
দিৱি দেৱগণাঃ সিদ্ধাঃ সাধ্যা গন্ধৰ্ৱচাৰণাঃ । তুষ্টুৱুৰ্মুমুচুস্তুষ্টাঃ পুষ্পৱৰ্ষাণি পাৰ্থিৱ ॥ ৩১ ॥
শঙ্খদুন্দুভযো নেদুৰ্দিৱি দেৱপ্ৰচোদিতাঃ । জগুৰ্গন্ধৰ্ৱপতযস্তুম্বুৰুপ্ৰমুখা নৃপ ॥ ৩২ ॥
ততোঽনুৰক্তৈঃ পশুপৈঃ পৰিশ্ৰিতোৰাজন্ স্ৱগোষ্ঠং সবলোঽৱ্ৰজদ্ধৰিঃ । তথাৱিধান্যস্য কৃতানি গোপিকাগাযন্ত্য ঈযুৰ্মুদিতা হৃদিস্পৃশঃ ॥ ৩৩ ॥