శ్రీశుక ఉవాచ
ఇన్ద్రస్తదాత్మనః పూజాం విజ్ఞాయ విహతాం నృప । గోపేభ్యః కృష్ణనాథేభ్యో నన్దాదిభ్యశ్చుకోప హ ॥ ౧ ॥
ఇన్ద్రస్తదాత్మనః పూజాం విజ్ఞాయ విహతాం నృప । గోపేభ్యః కృష్ణనాథేభ్యో నన్దాదిభ్యశ్చుకోప హ ॥ ౧ ॥
గణం సాంవర్తకం నామ మేఘానాం చాన్తకారీణామ్ । ఇన్ద్రః ప్రచోదయత్ క్రుద్ధో వాక్యం చాహేశమాన్యుత ॥ ౨ ॥
అహో శ్రీమదమాహాత్మ్యం గోపానాం కాననౌకసామ్ । కృష్ణం మర్త్యముపాశ్రిత్య యే చక్రుర్దేవహేలనమ్ ॥ ౩ ॥
యథాదృఢైః కర్మమయైః క్రతుభిర్నామనౌనిభైః । విద్యామాన్వీక్షికీం హిత్వా తితీర్షన్తి భవార్ణవమ్ ॥ ౪ ॥
వాచాలం బాలిశం స్తబ్ధమజ్ఞం పణ్డితమానినమ్ । కృష్ణం మర్త్యముపాశ్రిత్య గోపా మే చక్రురప్రియమ్ ॥ ౫ ॥
ఏషాం శ్రియావలిప్తానాం కృష్ణేనాధ్మాపితాత్మనామ్ । ధునుత శ్రీమదస్తమ్భం పశూన్ నయత సఙ్క్షయమ్ ॥ ౬ ॥
అహం చైరావతం నాగమారుహ్యానువ్రజే వ్రజమ్ । మరుద్గణైర్మహావేగైర్నన్దగోష్ఠజిఘాంసయా ॥ ౭ ॥
శ్రీశుక ఉవాచ
ఇత్థం మఘవతాజ్ఞప్తా మేఘా నిర్ముక్తబన్ధనాః । నన్దగోకులమాసారైః పీడయామాసురోజసా ॥ ౮ ॥
ఇత్థం మఘవతాజ్ఞప్తా మేఘా నిర్ముక్తబన్ధనాః । నన్దగోకులమాసారైః పీడయామాసురోజసా ॥ ౮ ॥
విద్యోతమానా విద్యుద్భిః స్తనన్తః స్తనయిత్నుభిః । తీవ్రైర్మరుద్గణైర్నున్నా వవృషుర్జలశర్కరాః ॥ ౯ ॥
స్థూణాస్థూలా వర్షధారా ముఞ్చత్స్వభ్రేష్వభీక్ష్ణశః । జలౌఘైః ప్లావ్యమానా భూర్నాదృశ్యత నతోన్నతమ్ ॥ ౧౦ ॥
అత్యాసారాతివాతేన పశవో జాతవేపనాః । గోపా గోప్యశ్చ శీతార్తా గోవిన్దం శరణం యయుః ॥ ౧౧ ॥
శిరః సుతాంశ్చ కాయేన ప్రచ్ఛాద్యాసారపీడితాః । వేపమానా భగవతః పాదమూలముపాయయుః ॥ ౧౨ ॥
కృష్ణ కృష్ణ మహాభాగ త్వన్నాథం గోకులం ప్రభో । త్రాతుమర్హసి దేవాన్నః కుపితాద్ భక్తవత్సల ॥ ౧౩ ॥
శిలావర్షాతివాతేన హన్యమానమచేతనమ్ । నిరీక్ష్య భగవాన్ మేనే కుపితేన్ద్రకృతం హరిః ॥ ౧౪ ॥
అపర్త్వత్యుల్బణం వర్షమతివాతం శిలామయమ్ । స్వయాగే విహతేఽస్మాభిరిన్ద్రో నాశాయ వర్షతి ॥ ౧౫ ॥
తత్ర ప్రతివిధిం సమ్యగాత్మయోగేన సాధయే । లోకేశమానినాం మౌఢ్యాద్ధనిష్యే శ్రీమదం తమః ॥ ౧౬ ॥
న హి సద్భావయుక్తానాం సురాణామీశవిస్మయః । మత్తోఽసతాం మానభఙ్గః ప్రశమాయోపకల్పతే ॥ ౧౭ ॥
తస్మాన్మచ్ఛరణం గోష్ఠం మన్నాథం మత్పరిగ్రహమ్ । గోపాయే స్వాత్మయోగేన సోఽయం మే వ్రత ఆహితః ॥ ౧౮ ॥
ఇత్యుక్త్వైకేన హస్తేన కృత్వా గోవర్ధనాచలమ్ । దధార లీలయా విష్ణుశ్ఛత్రాకమివ బాలకః ॥ ౧౯ ॥
అథాహ భగవాన్ గోపాన్హేఽమ్బ తాత వ్రజౌకసః । యథోపజోషం విశత గిరిగర్తం సగోధనాః ॥ ౨౦ ॥
న త్రాస ఇహ వః కార్యో మద్ధస్తాద్రినిపాతనాత్ । వాతవర్షభయేనాలం తత్త్రాణం విహితం హి వః ॥ ౨౧ ॥
తథా నిర్వివిశుర్గర్తం కృష్ణాశ్వాసితమానసః । యథావకాశం సధనాః సవ్రజాః సోపజీవినః ॥ ౨౨ ॥
క్షుత్తృడ్వ్యథాం సుఖాపేక్షాం హిత్వా తైర్వ్రజవాసిభిః । వీక్ష్యమాణో దధారాద్రిం సప్తాహం నాచలత్ పదాత్ ॥ ౨౩ ॥
కృష్ణయోగానుభావం తం నిశమ్యేన్ద్రోఽతివిస్మితః । నిస్తమ్భో భ్రష్టసఙ్కల్పః స్వాన్మేఘాన్ సన్న్యవారయత్ ॥ ౨౪ ॥
ఖం వ్యభ్రముదితాదిత్యం వాతవర్షం చ దారుణమ్ । నిశమ్యోపరతం గోపాన్ గోవర్ధనధరోఽబ్రవీత్ ॥ ౨౫ ॥
నిర్యాత త్యజత త్రాసం గోపాః సస్త్రీధనార్భకాః । ఉపారతం వాతవర్షం వ్యుదప్రాయాశ్చ నిమ్నగాః ॥ ౨౬ ॥
తతస్తే నిర్యయుర్గోపాః స్వం స్వమాదాయ గోధనమ్ । శకటోఢోపకరణం స్త్రీబాలస్థవిరాః శనైః ॥ ౨౭ ॥
భగవానపి తం శైలం స్వస్థానే పూర్వవత్ ప్రభుః । పశ్యతాం సర్వభూతానాం స్థాపయామాస లీలయా ॥ ౨౮ ॥
తం ప్రేమవేగాన్నిర్భృతా వ్రజౌకసోయథా సమీయుః పరిరమ్భణాదిభిః । గోప్యశ్చ సస్నేహమపూజయన్ ముదాదధ్యక్షతాద్భిర్యుయుజుః సదాశిషః ॥ ౨౯ ॥
యశోదా రోహిణీ నన్దో రామశ్చ బలినాం వరః । కృష్ణమాలిఙ్గ్య యుయుజురాశిషః స్నేహకాతరాః ॥ ౩౦ ॥
దివి దేవగణాః సిద్ధాః సాధ్యా గన్ధర్వచారణాః । తుష్టువుర్ముముచుస్తుష్టాః పుష్పవర్షాణి పార్థివ ॥ ౩౧ ॥
శఙ్ఖదున్దుభయో నేదుర్దివి దేవప్రచోదితాః । జగుర్గన్ధర్వపతయస్తుమ్బురుప్రముఖా నృప ॥ ౩౨ ॥
తతోఽనురక్తైః పశుపైః పరిశ్రితోరాజన్ స్వగోష్ఠం సబలోఽవ్రజద్ధరిః । తథావిధాన్యస్య కృతాని గోపికాగాయన్త్య ఈయుర్ముదితా హృదిస్పృశః ॥ ౩౩ ॥