শ্রীশুক উবাচ
ইন্দ্রস্তদাত্মনঃ পূজাং বিজ্ঞায বিহতাং নৃপ । গোপেভ্যঃ কৃষ্ণনাথেভ্যো নন্দাদিভ্যশ্চুকোপ হ ॥ ১ ॥
ইন্দ্রস্তদাত্মনঃ পূজাং বিজ্ঞায বিহতাং নৃপ । গোপেভ্যঃ কৃষ্ণনাথেভ্যো নন্দাদিভ্যশ্চুকোপ হ ॥ ১ ॥
গণং সাংবর্তকং নাম মেঘানাং চান্তকারীণাম্ । ইন্দ্রঃ প্রচোদযত্ ক্রুদ্ধো বাক্যং চাহেশমান্যুত ॥ ২ ॥
অহো শ্রীমদমাহাত্ম্যং গোপানাং কাননৌকসাম্ । কৃষ্ণং মর্ত্যমুপাশ্রিত্য যে চক্রুর্দেবহেলনম্ ॥ ৩ ॥
যথাদৃঢৈঃ কর্মমযৈঃ ক্রতুভির্নামনৌনিভৈঃ । বিদ্যামান্বীক্ষিকীং হিত্বা তিতীর্ষন্তি ভবার্ণবম্ ॥ ৪ ॥
বাচালং বালিশং স্তব্ধমজ্ঞং পণ্ডিতমানিনম্ । কৃষ্ণং মর্ত্যমুপাশ্রিত্য গোপা মে চক্রুরপ্রিযম্ ॥ ৫ ॥
এষাং শ্রিযাবলিপ্তানাং কৃষ্ণেনাধ্মাপিতাত্মনাম্ । ধুনুত শ্রীমদস্তম্ভং পশূন্ নযত সঙ্ক্ষযম্ ॥ ৬ ॥
অহং চৈরাবতং নাগমারুহ্যানুব্রজে ব্রজম্ । মরুদ্গণৈর্মহাবেগৈর্নন্দগোষ্ঠজিঘাংসযা ॥ ৭ ॥
শ্রীশুক উবাচ
ইত্থং মঘবতাজ্ঞপ্তা মেঘা নির্মুক্তবন্ধনাঃ । নন্দগোকুলমাসারৈঃ পীডযামাসুরোজসা ॥ ৮ ॥
ইত্থং মঘবতাজ্ঞপ্তা মেঘা নির্মুক্তবন্ধনাঃ । নন্দগোকুলমাসারৈঃ পীডযামাসুরোজসা ॥ ৮ ॥
বিদ্যোতমানা বিদ্যুদ্ভিঃ স্তনন্তঃ স্তনযিত্নুভিঃ । তীব্রৈর্মরুদ্গণৈর্নুন্না ববৃষুর্জলশর্করাঃ ॥ ৯ ॥
স্থূণাস্থূলা বর্ষধারা মুঞ্চত্স্বভ্রেষ্বভীক্ষ্ণশঃ । জলৌঘৈঃ প্লাব্যমানা ভূর্নাদৃশ্যত নতোন্নতম্ ॥ ১০ ॥
অত্যাসারাতিবাতেন পশবো জাতবেপনাঃ । গোপা গোপ্যশ্চ শীতার্তা গোবিন্দং শরণং যযুঃ ॥ ১১ ॥
শিরঃ সুতাংশ্চ কাযেন প্রচ্ছাদ্যাসারপীডিতাঃ । বেপমানা ভগবতঃ পাদমূলমুপাযযুঃ ॥ ১২ ॥
কৃষ্ণ কৃষ্ণ মহাভাগ ত্বন্নাথং গোকুলং প্রভো । ত্রাতুমর্হসি দেবান্নঃ কুপিতাদ্ ভক্তবত্সল ॥ ১৩ ॥
শিলাবর্ষাতিবাতেন হন্যমানমচেতনম্ । নিরীক্ষ্য ভগবান্ মেনে কুপিতেন্দ্রকৃতং হরিঃ ॥ ১৪ ॥
অপর্ত্বত্যুল্বণং বর্ষমতিবাতং শিলামযম্ । স্বযাগে বিহতেঽস্মাভিরিন্দ্রো নাশায বর্ষতি ॥ ১৫ ॥
তত্র প্রতিবিধিং সম্যগাত্মযোগেন সাধযে । লোকেশমানিনাং মৌঢ্যাদ্ধনিষ্যে শ্রীমদং তমঃ ॥ ১৬ ॥
ন হি সদ্ভাবযুক্তানাং সুরাণামীশবিস্মযঃ । মত্তোঽসতাং মানভঙ্গঃ প্রশমাযোপকল্পতে ॥ ১৭ ॥
তস্মান্মচ্ছরণং গোষ্ঠং মন্নাথং মত্পরিগ্রহম্ । গোপাযে স্বাত্মযোগেন সোঽযং মে ব্রত আহিতঃ ॥ ১৮ ॥
ইত্যুক্ত্বৈকেন হস্তেন কৃত্বা গোবর্ধনাচলম্ । দধার লীলযা বিষ্ণুশ্ছত্রাকমিব বালকঃ ॥ ১৯ ॥
অথাহ ভগবান্ গোপান্হেঽম্ব তাত ব্রজৌকসঃ । যথোপজোষং বিশত গিরিগর্তং সগোধনাঃ ॥ ২০ ॥
ন ত্রাস ইহ বঃ কার্যো মদ্ধস্তাদ্রিনিপাতনাত্ । বাতবর্ষভযেনালং তত্ত্রাণং বিহিতং হি বঃ ॥ ২১ ॥
তথা নির্বিবিশুর্গর্তং কৃষ্ণাশ্বাসিতমানসঃ । যথাবকাশং সধনাঃ সব্রজাঃ সোপজীবিনঃ ॥ ২২ ॥
ক্ষুত্তৃড্ব্যথাং সুখাপেক্ষাং হিত্বা তৈর্ব্রজবাসিভিঃ । বীক্ষ্যমাণো দধারাদ্রিং সপ্তাহং নাচলত্ পদাত্ ॥ ২৩ ॥
কৃষ্ণযোগানুভাবং তং নিশম্যেন্দ্রোঽতিবিস্মিতঃ । নিস্তম্ভো ভ্রষ্টসঙ্কল্পঃ স্বান্মেঘান্ সন্ন্যবারযত্ ॥ ২৪ ॥
খং ব্যভ্রমুদিতাদিত্যং বাতবর্ষং চ দারুণম্ । নিশম্যোপরতং গোপান্ গোবর্ধনধরোঽব্রবীত্ ॥ ২৫ ॥
নির্যাত ত্যজত ত্রাসং গোপাঃ সস্ত্রীধনার্ভকাঃ । উপারতং বাতবর্ষং ব্যুদপ্রাযাশ্চ নিম্নগাঃ ॥ ২৬ ॥
ততস্তে নির্যযুর্গোপাঃ স্বং স্বমাদায গোধনম্ । শকটোঢোপকরণং স্ত্রীবালস্থবিরাঃ শনৈঃ ॥ ২৭ ॥
ভগবানপি তং শৈলং স্বস্থানে পূর্ববত্ প্রভুঃ । পশ্যতাং সর্বভূতানাং স্থাপযামাস লীলযা ॥ ২৮ ॥
তং প্রেমবেগান্নির্ভৃতা ব্রজৌকসোযথা সমীযুঃ পরিরম্ভণাদিভিঃ । গোপ্যশ্চ সস্নেহমপূজযন্ মুদাদধ্যক্ষতাদ্ভির্যুযুজুঃ সদাশিষঃ ॥ ২৯ ॥
যশোদা রোহিণী নন্দো রামশ্চ বলিনাং বরঃ । কৃষ্ণমালিঙ্গ্য যুযুজুরাশিষঃ স্নেহকাতরাঃ ॥ ৩০ ॥
দিবি দেবগণাঃ সিদ্ধাঃ সাধ্যা গন্ধর্বচারণাঃ । তুষ্টুবুর্মুমুচুস্তুষ্টাঃ পুষ্পবর্ষাণি পার্থিব ॥ ৩১ ॥
শঙ্খদুন্দুভযো নেদুর্দিবি দেবপ্রচোদিতাঃ । জগুর্গন্ধর্বপতযস্তুম্বুরুপ্রমুখা নৃপ ॥ ৩২ ॥
ততোঽনুরক্তৈঃ পশুপৈঃ পরিশ্রিতোরাজন্ স্বগোষ্ঠং সবলোঽব্রজদ্ধরিঃ । তথাবিধান্যস্য কৃতানি গোপিকাগাযন্ত্য ঈযুর্মুদিতা হৃদিস্পৃশঃ ॥ ৩৩ ॥