ശ്രീമദ്ഭാഗവതമ് ൧൦.൨൬

ശ്രീശുക ഉവാച
ഏവംവിധാനി കര്മാണി ഗോപാഃ കൃഷ്ണസ്യ വീക്ഷ്യ തേ । അതദ്വീര്യവിദഃ പ്രോചുഃ സമഭ്യേത്യ സുവിസ്മിതാഃ ॥ ൧ ॥

ബാലകസ്യ യദേതാനി കര്മാണ്യത്യദ്ഭുതാനി വൈ । കഥമര്ഹത്യസൌ ജന്മ ഗ്രാമ്യേഷ്വാത്മജുഗുപ്സിതമ് ॥ ൨ ॥

യഃ സപ്തഹായനോ ബാലഃ കരേണൈകേന ലീലയാ । കഥം
ബിഭ്രദ് ഗിരിവരം പുഷ്കരം ഗജരാഡിവ ॥ ൩ ॥

തോകേനാമീലിതാക്ഷേണ പൂതനായാ മഹൌജസഃ
। പീതഃ സ്തനഃ സഹ പ്രാണൈഃ കാലേനേവ വയസ്തനോഃ ॥ ൪ ॥

ഹിന്വതോഽധഃ ശയാനസ്യ മാസ്യസ്യ ചരണാവുദക് । അനോഽപതദ് വിപര്യസ്തം രുദതഃ പ്രപദാഹതമ് ॥ ൫ ॥

ഏകഹായന ആസീനോ ഹ്രിയമാണോ വിഹായസാ । ദൈത്യേന യസ്തൃണാവര്തമഹന് കണ്ഠഗ്രഹാതുരമ് ॥ ൬ ॥

ക്വചിദ്ധൈയങ്ഗവസ്തൈന്യേ മാത്രാ ബദ്ധ ഉദൂഖലേ । ഗച്ഛന്നര്ജുനയോര്മധ്യേ ബാഹുഭ്യാം താവപാതയത് ॥ ൭ ॥

വനേ സഞ്ചാരയന് വത്സാന് സരാമോ ബാലകൈര്വൃതഃ । ഹന്തുകാമം ബകം ദോര്ഭ്യാം മുഖതോഽരിമപാടയത് ॥ ൮ ॥

വത്സേഷു വത്സരൂപേണ പ്രവിശന്തം ജിഘാംസയാ । ഹത്വാ ന്യപാതയത്തേന കപിത്ഥാനി ച ലീലയാ ॥ ൯ ॥

ഹത്വാ രാസഭദൈതേയം തദ്ബന്ധൂംശ്ച ബലാന്വിതഃ । ചക്രേ താലവനം ക്ഷേമം പരിപക്വഫലാന്വിതമ് ॥ ൧൦ ॥

പ്രലമ്ബം ഘാതയിത്വോഗ്രം ബലേന ബലശാലിനാ । അമോചയദ് വ്രജപശൂന്ഗോപാംശ്ചാരണ്യവഹ്നിതഃ ॥ ൧൧ ॥

ആശീവിഷതമാഹീന്ദ്രം ദമിത്വാ വിമദം ഹ്രദാത് । പ്രസഹ്യോദ്വാസ്യ യമുനാം ചക്രേഽസൌ നിര്വിഷോദകാമ് ॥ ൧൨ ॥

ദുസ്ത്യജശ്ചാനുരാഗോഽസ്മിന് സര്വേഷാം നോ വ്രജൌകസാമ് । നന്ദതേ തനയേഽസ്മാസു തസ്യാപ്യൌത്പത്തികഃ കഥമ് ॥ ൧൩ ॥

ക്വ സപ്തഹായനോ ബാലഃ ക്വ മഹാദ്രിവിധാരണമ് । തതോ നോ ജായതേ ശങ്കാ വ്രജനാഥ തവാത്മജേ ॥ ൧൪ ॥

ശ്രീനന്ദ ഉവാച
ശ്രൂയതാം മേ വചോ ഗോപാ വ്യേതു ശങ്കാ ച വോഽര്ഭകേ । ഏനം കുമാരമുദ്ദിശ്യ ഗര്ഗോ മേ യദുവാച ഹ ॥ ൧൫ ॥

വര്ണാസ്ത്രയഃ കിലാസ്യാസന് ഗൃഹ്ണതോഽനുയുഗം തനൂഃ । ശുക്ലോ രക്തസ്തഥാ പീത ഇദാനീം കൃഷ്ണതാം ഗതഃ ॥ ൧൬ ॥

പ്രാഗയം വസുദേവസ്യ ക്വചിജ്ജാതസ്തവാത്മജഃ । വാസുദേവ ഇതി ശ്രീമാനഭിജ്ഞാഃ സമ്പ്രചക്ഷതേ ॥ ൧൭ ॥

ബഹൂനി സന്തി നാമാനി രൂപാണി ച സുതസ്യ തേ । ഗുണകര്മാനുരൂപാണി താന്യഹം വേദ നോ ജനാഃ ॥ ൧൮ ॥

ഏഷ വഃ ശ്രേയ ആധാസ്യദ് ഗോപഗോകുലനന്ദനഃ । അനേന സര്വദുര്ഗാണി യൂയമഞ്ജസ്തരിഷ്യഥ ॥ ൧൯ ॥

പുരാനേന വ്രജപതേ സാധവോ ദസ്യുപീഡിതാഃ । അരാജകേ രക്ഷ്യമാണാ ജിഗ്യുര്ദസ്യൂന്സമേധിതാഃ ॥ ൨൦ ॥

യ ഏതസ്മിന് മഹാഭാഗേ പ്രീതിം കുര്വന്തി മാനവാഃ
। നാരയോഽഭിഭവന്ത്യേതാന് വിഷ്ണുപക്ഷാനിവാസുരാഃ ॥ ൨൧ ॥

തസ്മാന്നന്ദ കുമാരോഽയം നാരായണസമോ ഗുണൈഃ
। ശ്രിയാ കീര്ത്യാനുഭാവേന തത്കര്മസു ന വിസ്മയഃ ॥ ൨൨ ॥

ഇത്യദ്ധാ മാം സമാദിശ്യ ഗര്ഗേ ച സ്വഗൃഹം ഗതേ । മന്യേ നാരായണസ്യാംശം കൃഷ്ണമക്ലിഷ്ടകാരിണമ് ॥ ൨൩ ॥

ഇതി നന്ദവചഃ ശ്രുത്വാ ഗര്ഗഗീതം വ്രജൌകസഃ । മുദിതാ നന്ദമാനര്ചുഃ കൃഷ്ണം ച ഗതവിസ്മയാഃ ॥ ൨൪ ॥

ദേവേ വര്ഷതി യജ്ഞവിപ്ലവരുഷാ വജ്രാശ്മവര്ഷാനിലൈഃസീദത്പാലപശുസ്ത്രിയാത്മശരണം ദൃഷ്ട്വാനുകമ്പ്യുത്സ്മയന് । ഉത്പാട്യൈകകരേണ ശൈലമബലോ ലീലോച്ഛിലീന്ധ്രം യഥാബിഭ്രദ് ഗോഷ്ഠമപാന്മഹേന്ദ്രമദഭിത് പ്രീയാന്ന ഇന്ദ്രോ ഗവാമ് ॥ ൨൫ ॥