শ্রীমদ্ভাগবতম্ ১০.৩

শ্রীশুক উবাচ
অথ সর্বগুণোপেতঃ কালঃ পরমশোভনঃ ।
যর্হ্যেবাজনজন্মক্ষন শান্তর্ক্ষগ্রহতারকম্ ॥ ১ ॥

দিশঃ প্রসেদুর্গগনং নির্মলোডুগণোদযম্ ।
মহী মঙ্গলভূযিষ্ঠপুরগ্রামব্রজাকরা ॥ ২ ॥

নদ্যঃ প্রসন্নসলিলা হ্রদা জলরুহশ্রিযঃ ।
দ্বিজালিকুলসন্নাদস্তবকা বনরাজযঃ ॥ ৩ ॥

ববৌ বাযুঃ সুখস্পর্শঃ পুণ্যগন্ধবহঃ শুচিঃ ।
অগ্নযশ্চ দ্বিজাতীনাং শান্তাস্তত্র সমিন্ধত ॥ ৪ ॥

মনাংস্যাসন্ প্রসন্নানি সাধূনামসুরদ্রুহাম্ ।
জাযমানেঽজনে তস্মিন্ নেদুর্দুন্দুভযঃ সমম্ ॥ ৫ ॥

জগুঃ কিন্নরগন্ধর্বাস্তুষ্টুবুঃ সিদ্ধচারণাঃ ।
বিদ্যাধর্যশ্চ ননৃতুরপ্সরোভিঃ সমং মুদা ॥ ৬ ॥

মুমুচুর্মুনযো দেবাঃ সুমনাংসি মুদান্বিতাঃ ।
মন্দং মন্দং জলধরা জগর্জুরনুসাগরম্ ॥ ৭ ॥

নিশীথে তমউদ্ভূতে জাযমানে জনার্দনে ।
দেবক্যাং দেবরূপিণ্যাং বিষ্ণুঃ সর্বগুহাশযঃ ।
আবিরাসীদ্ যথা প্রাচ্যাং দিশীন্দুরিব পুষ্কলঃ ॥ ৮ ॥

তমদ্ভুতং বালকমম্বুজেক্ষণং
চতুর্ভুজং শঙ্খগদাদ্যুদাযুধম্ ।
শ্রীবত্সলক্ষ্মং গলশোভিকৌস্তুভং
পীতাম্বরং সান্দ্রপযোদসৌভগম্ ॥ ৯ ॥

মহার্হবৈদূর্যকিরীটকুণ্ডল-
ত্বিষা পরিষ্বক্তসহস্রকুন্তলম্ ।
উদ্দামকাঞ্চ্যঙ্গদকঙ্কণাদিভি-
র্বিরোচমানং বসুদেব ঐক্ষত ॥ ১০ ॥

স বিস্মযোত্ফুল্লবিলোচনো হরিং
সুতং বিলোক্যানকদুন্দুভিস্তদা ।
কৃষ্ণাবতারোত্সবসম্ভ্রমোঽস্পৃশন্
মুদা দ্বিজেভ্যোঽযুতমাপ্লুতো গবাম্ ॥ ১১ ॥

অথৈনমস্তৌদবধার্য পূরুষং
পরং নতাঙ্গঃ কৃতধীঃ কৃতাঞ্জলিঃ ।
স্বরোচিষা ভারত সূতিকাগৃহং
বিরোচযন্তং গতভীঃ প্রভাববিত্ ॥ ১২ ॥

শ্রীবসুদেব উবাচ
বিদিতোঽসি ভবান্ সাক্ষাত্পুরুষঃ প্রকৃতেঃ পরঃ ।
কেবলানুভবানন্দস্বরূপঃ সর্ববুদ্ধিদৃক্ ॥ ১৩ ॥

স এব স্বপ্রকৃত্যেদং সৃষ্ট্বাগ্রে ত্রিগুণাত্মকম্ ।
তদনু ত্বং হ্যপ্রবিষ্টঃ প্রবিষ্ট ইব ভাব্যসে ॥ ১৪ ॥

যথেমেঽবিকৃতা ভাবাস্তথা তে বিকৃতৈঃ সহ ।
নানাবীর্যাঃ পৃথগ্ভূতা বিরাজং জনযন্তি হি ॥ ১৫ ॥

সন্নিপত্য সমুত্পাদ্য দৃশ্যন্তেঽনুগতা ইব ।
প্রাগেব বিদ্যমানত্বান্ন তেষামিহ সম্ভবঃ ॥ ১৬ ॥

এবং ভবান্ বুদ্ধ্যনুমেযলক্ষণৈ-
র্গ্রাহ্যৈর্গুণৈঃ সন্নপি তদ্গুণাগ্রহঃ ।
অনাবৃতত্বাদ্ বহিরন্তরং ন তে
সর্বস্য সর্বাত্মন আত্মবস্তুনঃ ॥ ১৭ ॥

য আত্মনো দৃশ্যগুণেষু সন্নিতি
ব্যবস্যতে স্বব্যতিরেকতোঽবুধঃ ।
বিনানুবাদং ন চ তন্মনীষিতং
সম্যগ্ যতস্ত্যক্তমুপাদদত্ পুমান্ ॥ ১৮ ॥

ত্বত্তোঽস্য জন্মস্থিতিসংযমান্ বিভো
বদন্ত্যনীহাদগুণাদবিক্রিযাত্ ।
ত্বযীশ্বরে ব্রহ্মণি নো বিরুধ্যতে
ত্বদাশ্রযত্বাদুপচর্যতে গুণৈঃ ॥ ১৯ ॥

স ত্বং ত্রিলোকস্থিতযে স্বমাযযা
বিভর্ষি শুক্লং খলু বর্ণমাত্মনঃ ।
সর্গায রক্তং রজসোপবৃংহিতং
কৃষ্ণং চ বণন তমসা জনাত্যযে ॥ ২০ ॥

ত্বমস্য লোকস্য বিভো রিরক্ষিষু-
র্গৃহেঽবতীর্ণোঽসি মমাখিলেশ্বর ।
রাজন্যসংজ্ঞাসুরকোটিযূথপৈ-
র্নির্ব্যূহ্যমানা নিহনিষ্যসে চমূঃ ॥ ২১ ॥

অযং ত্বসভ্যস্তব জন্ম নৌ গৃহে
শ্রুত্বাগ্রজাংস্তে ন্যবধীত্ সুরেশ্বর ।
স তেঽবতারং পুরুষৈঃ সমর্পিতং
শ্রুত্বাধুনৈবাভিসরত্যুদাযুধঃ ॥ ২২ ॥

শ্রীশুক উবাচ
অথৈনমাত্মজং বীক্ষ্য মহাপুরুষলক্ষণম্ ।
দেবকী তমুপাধাবত্ কংসাদ্ ভীতা সুবিস্মিতা ॥ ২৩ ॥

শ্রীদেবক্যুবাচ
রূপং যত্ তত্ প্রাহুরব্যক্তমাদ্যং
ব্রহ্ম জ্যোতির্নির্গুণং নির্বিকারম্ ।
সত্তামাত্রং নির্বিশেষং নিরীহং
স ত্বং সাক্ষাদ্ বিষ্ণুরধ্যাত্মদীপঃ ॥ ২৪ ॥

নষ্টে লোকে দ্বিপরার্ধাবসানে
মহাভূতেষ্বাদিভূতং গতেষু ।
ব্যক্তেঽব্যক্তং কালবেগেন যাতে
ভবানেকঃ শিষ্যতেঽশেষসংজ্ঞঃ ॥ ২৫ ॥

যোঽযং কালস্তস্য তেঽব্যক্তবন্ধো
চেষ্টামাহুশ্চেষ্টতে যেন বিশ্বম্ ।
নিমেষাদির্বত্সরান্তো মহীযাং-
স্তং ত্বেশানং ক্ষেমধাম প্রপদ্যে ॥ ২৬ ॥

মর্ত্যো মৃত্যুব্যালভীতঃ পলাযন্
লোকান্ সর্বান্নির্ভযং নাধ্যগচ্ছত্ ।
ত্বত্পাদাব্জং প্রাপ্য যদৃচ্ছযাদ্য
সুস্থঃ শেতে মৃত্যুরস্মাদপৈতি ॥ ২৭ ॥

স ত্বং ঘোরাদুগ্রসেনাত্মজান্ন-
স্ত্রাহি ত্রস্তান্ ভৃত্যবিত্রাসহাসি ।
রূপং চেদং পৌরুষং ধ্যানধিষ্ণ্যং
মা প্রত্যক্ষং মাংসদৃশাং কৃষীষ্ঠাঃ ॥ ২৮ ॥

জন্ম তে ময্যসৌ পাপো মা বিদ্যান্মধুসূদন ।
সমুদ্বিজে ভবদ্ধেতোঃ কংসাদহমধীরধীঃ ॥ ২৯ ॥

উপসংহর বিশ্বাত্মন্নদো রূপমলৌকিকম্ ।
শঙ্খচক্রগদাপদ্মশ্রিযা জুষ্টং চতুর্ভুজম্ ॥ ৩০ ॥

বিশ্বং যদেতত্ স্বতনৌ নিশান্তে
যথাবকাশং পুরুষঃ পরো ভবান্ ।
বিভর্তি সোঽযং মম গর্ভগোঽভূ-
দহো নৃলোকস্য বিডম্বনং হি তত্ ॥ ৩১ ॥

শ্রীভগবানুবাচ
ত্বমেব পূর্বসর্গেঽভূঃ পৃশ্নিঃ স্বাযম্ভুবে সতি ।
তদাযং সুতপা নাম প্রজাপতিরকল্মষঃ ॥ ৩২ ॥

যুবাং বৈ ব্রহ্মণাদিষ্টৌ প্রজাসর্গে যদা ততঃ
।
সন্নিযম্যেন্দ্রিযগ্রামং তেপাথে পরমং তপঃ ॥ ৩৩ ॥

বর্ষবাতাতপহিমঘর্মকালগুণাননু ।
সহমানৌ শ্বাসরোধবিনির্ধূতমনোমলৌ ॥ ৩৪ ॥

শীর্ণপর্ণানিলাহারাবুপশান্তেন চেতসা ।
মত্তঃ কামানভীপ্সন্তৌ মদারাধনমীহতুঃ ॥ ৩৫ ॥

এবং বাং তপ্যতোস্তীব্রং তপঃ পরমদুষ্করম্ ।
দিব্যবর্ষসহস্রাণি দ্বাদশেযুর্মদাত্মনোঃ ॥ ৩৬ ॥

তদা বাং পরিতুষ্টোঽহমমুনা বপুষানঘে ।
তপসা শ্রদ্ধযা নিত্যং ভক্ত্যা চ হৃদি ভাবিতঃ ॥ ৩৭ ॥

প্রাদুরাসং বরদরাড্ যুবযোঃ কামদিত্সযা ।
ব্রিযতাং বর ইত্যুক্তে মাদৃশো বাং বৃতঃ সুতঃ ॥ ৩৮ ॥

অজুষ্টগ্রাম্যবিষযাবনপত্যৌ চ দম্পতী ।
ন বব্রাথেঽপবগন মে মোহিতৌ দেবমাযযা ॥ ৩৯ ॥

গতে মযি যুবাং লব্ধ্বা বরং মত্সদৃশং সুতম্ ।
গ্রাম্যান্ ভোগানভুঞ্জাথাং যুবাং প্রাপ্তমনোরথৌ ॥ ৪০ ॥

অদৃষ্ট্বান্যতমং লোকে শীলৌদার্যগুণৈঃ সমম্ ।
অহং সুতো বামভবং পৃশ্নিগর্ভ ইতি শ্রুতঃ ॥ ৪১ ॥

তযোবান পুনরেবাহমদিত্যামাস কশ্যপাত্ ।
উপেন্দ্র ইতি বিখ্যাতো বামনত্বাচ্চ বামনঃ ॥ ৪২ ॥

তৃতীযেঽস্মিন্ ভবেঽহং বৈ তেনৈব বপুষাথ বাম্ ।
জাতো ভূযস্তযোরেব সত্যং মে ব্যাহৃতং সতি ॥ ৪৩ ॥

এতদ্ বাং দর্শিতং রূপং প্রাগ্জন্মস্মরণায মে ।
নান্যথা মদ্ভবং জ্ঞানং মর্ত্যলিঙ্গেন জাযতে ॥ ৪৪ ॥

যুবাং মাং পুত্রভাবেন ব্রহ্মভাবেন চাসকৃত্ ।
চিন্তযন্তৌ কৃতস্নেহৌ যাস্যেথে মদ্গতিং পরাম্ ॥ ৪৫ ॥

শ্রীশুক উবাচ
ইত্যুক্ত্বাসীদ্ধরিস্তূষ্ণীং ভগবানাত্মমাযযা ।
পিত্রোঃ সম্পশ্যতোঃ সদ্যো বভূব প্রাকৃতঃ শিশুঃ ॥ ৪৬ ॥

ততশ্চ শৌরির্ভগবত্প্রচোদিতঃ
সুতং সমাদায স সূতিকাগৃহাত্ ।
যদা বহির্গন্তুমিযেষ তর্হ্যজা
যা যোগমাযাজনি নন্দজাযযা ॥ ৪৭ ॥

তযা হৃতপ্রত্যযসর্ববৃত্তিষু
দ্বাঃস্থেষু পৌরেষ্বপি শাযিতেষ্বথ ।
দ্বারশ্চ সর্বাঃ পিহিতা দুরত্যযা
বৃহত্কপাটাযসকীলশৃঙ্খলৈঃ ॥ ৪৮ ॥

তাঃ কৃষ্ণবাহে বসুদেব আগতে
স্বযং ব্যবর্যন্ত যথা তমো রবেঃ ।
ববর্ষ পর্জন্য উপাংশুগর্জিতঃ
শেষোঽন্বগাদ্ বারি নিবারযন্ ফণৈঃ ॥ ৪৯ ॥

মঘোনি বর্ষত্যসকৃদ্ যমানুজা
গম্ভীরতোযৌঘজবোর্মিফেনিলা ।
ভযানকাবর্তশতাকুলা নদী
মাগন দদৌ সিন্ধুরিব শ্রিযঃ পতেঃ ॥ ৫০ ॥

নন্দব্রজং শৌরিরুপেত্য তত্র তান্
গোপান্ প্রসুপ্তানুপলভ্য নিদ্রযা ।
সুতং যশোদাশযনে নিধায ত-
ত্সুতামুপাদায পুনর্গৃহানগাত্ ॥ ৫১ ॥

দেবক্যাঃ শযনে ন্যস্য বসুদেবোঽথ দারিকাম্ ।
প্রতিমুচ্য পদোর্লোহমাস্তে পূর্ববদাবৃতঃ ॥ ৫২ ॥

যশোদা নন্দপত্নী চ জাতং পরমবুধ্যত ।
ন তল্লিঙ্গং পরিশ্রান্তা নিদ্রযাপগতস্মৃতিঃ ॥ ৫৩ ॥