শ্রীমদ্ভাগবতম্ ১০.৪৪

শ্রীশুক উবাচ
এবং চর্চিতসঙ্কল্পো ভগবান্ মধুসূদনঃ । আসসাদাথ চাণূরং মুষ্টিকং রোহিণীসুতঃ ॥ ১ ॥

হস্তাভ্যাং হস্তযোর্বদ্ধ্বা পদ্ভ্যামেব চ পাদযোঃ । বিচকর্ষতুরন্যোন্যং প্রসহ্য বিজিগীষযা ॥ ২ ॥

অরত্নী দ্বে অরত্নিভ্যাং জানুভ্যাং চৈব জানুনী । শিরঃ শীর্ষ্ণোরসোরস্তাবন্যোন্যমভিজঘ্নতুঃ ॥ ৩ ॥

পরিভ্রামণবিক্ষেপপরিরম্ভাবপাতনৈঃ । উত্সর্পণাপসর্পণৈশ্চান্যোন্যং প্রত্যরুন্ধতাম্ ॥ ৪ ॥

উত্থাপনৈরুন্নযনৈশ্চালনৈঃ স্থাপনৈরপি । পরস্পরং জিগীষন্তাবপচক্রতুরাত্মনঃ ॥ ৫ ॥

তদ্ বলাবলবদ্যুদ্ধং সমেতাঃ সর্বযোষিতঃ । ঊচুঃ পরস্পরং রাজন্ সানুকম্পা বরূথশঃ ॥ ৬ ॥

মহানযং বতাধর্ম এষাং রাজসভাসদাম্ । যে বলাবলবদ্যুদ্ধং রাজ্ঞোঽন্বিচ্ছন্তি পশ্যতঃ ॥ ৭ ॥

ক্ব বজ্রসারসর্বাঙ্গৌ মল্লৌ শৈলেন্দ্রসন্নিভৌ । ক্ব চাতিসুকুমারাঙ্গৌ কিশোরৌ নাপ্তযৌবনৌ ॥ ৮ ॥

ধর্মব্যতিক্রমো হ্যস্য সমাজস্য ধ্রুবং ভবেত্ । যত্রাধর্মঃ সমুত্তিষ্ঠেন্ন স্থেযং তত্র কর্হিচিত্ ॥ ৯ ॥

ন সভাং প্রবিশেত্ প্রাজ্ঞঃ সভ্যদোষাননুস্মরন্ । অব্রুবন্ বিব্রুবন্নজ্ঞো নরঃ কিল্বিষমশ্নুতে ॥ ১০ ॥

বল্গতঃ শত্রুমভিতঃ কৃষ্ণস্য বদনাম্বুজম্ । বীক্ষ্যতাং শ্রমবার্যুপ্তং পদ্মকোশমিবাম্বুভিঃ ॥ ১১ ॥

কিং ন পশ্যত রামস্য মুখমাতাম্রলোচনম্ । মুষ্টিকং প্রতি সামর্ষং হাসসংরম্ভশোভিতম্ ॥ ১২ ॥

পুণ্যা বত ব্রজভুবো যদযং নৃলিঙ্গ-গূঢঃ পুরাণপুরুষো বনচিত্রমাল্যঃ । গাঃ পালযন্ সহবলঃ ক্বণযংশ্চ বেণুংবিক্রীডযাঞ্চতি গিরিত্ররমার্চিতাঙ্ঘ্রিঃ ॥ ১৩ ॥

গোপ্যস্তপঃ কিমচরন্ যদমুষ্য রূপংলাবণ্যসারমসমোর্ধ্বমনন্যসিদ্ধম্ । দৃগ্ভিঃ পিবন্ত্যনুসবাভিনবং দুরাপ-মেকান্তধাম যশসঃ শ্রিয ঐশ্বরস্য ॥ ১৪ ॥

যা দোহনেঽবহননে মথনোপলেপ-প্রেঙ্খেঙ্খনার্ভরুদিতোক্ষণমার্জনাদৌ । গাযন্তি চৈনমনুরক্তধিযোঽশ্রুকণ্ঠ্যোধন্যা ব্রজস্ত্রিয উরুক্রমচিত্তযানাঃ ॥ ১৫ ॥

প্রাতর্ব্রজাদ্ ব্রজত আবিশতশ্চ সাযংগোভিঃ সমং ক্বণযতোঽস্য নিশম্য বেণুম্ । নির্গম্য তূর্ণমবলাঃ পথি ভূরিপুণ্যাঃপশ্যন্তি সস্মিতমুখং সদযাবলোকম্ ॥ ১৬ ॥

এবং প্রভাষমাণাসু স্ত্রীষু যোগেশ্বরো হরিঃ । শত্রুং হন্তুং মনশ্চক্রে ভগবান্ ভরতর্ষভ ॥ ১৭ ॥

সভযাঃ স্ত্রীগিরঃ শ্রুত্বা পুত্রস্নেহশুচাতুরৌ । পিতরাবন্বতপ্যেতাং পুত্রযোরবুধৌ বলম্ ॥ ১৮ ॥

তৈস্তৈর্নিযুদ্ধবিধিভির্বিবিধৈরচ্যুতেতরৌ । যুযুধাতে যথান্যোন্যং তথৈব বলমুষ্টিকৌ ॥ ১৯ ॥

ভগবদ্গাত্রনিষ্পাতৈর্বজ্রনীষ্পেষনিষ্ঠুরৈঃ । চাণূরো ভজ্যমানাঙ্গো মুহুর্গ্লানিমবাপ হ ॥ ২০ ॥

স শ্যেনবেগ উত্পত্য মুষ্টীকৃত্য করাবুভৌ । ভগবন্তং বাসুদেবং ক্রুদ্ধো বক্ষস্যবাধত ॥ ২১ ॥

নাচলত্তত্প্রহারেণ মালাহত ইব দ্বিপঃ । বাহ্বোর্নিগৃহ্য চাণূরং বহুশো ভ্রামযন্ হরিঃ ॥ ২২ ॥

ভূপৃষ্ঠে পোথযামাস তরসা ক্ষীণজীবিতম্ । বিস্রস্তাকল্পকেশস্রগিন্দ্রধ্বজ ইবাপতত্ ॥ ২৩ ॥

তথৈব মুষ্টিকঃ পূর্বং স্বমুষ্ট্যাভিহতেন বৈ । বলভদ্রেণ বলিনা তলেনাভিহতো ভৃশম্ ॥ ২৪ ॥

প্রবেপিতঃ স রুধিরমুদ্বমন্ মুখতোঽর্দিতঃ । ব্যসুঃ পপাতোর্ব্যুপস্থে বাতাহত ইবাঙ্ঘ্রিপঃ ॥ ২৫ ॥

ততঃ কূটমনুপ্রাপ্তং রামঃ প্রহরতাং বরঃ । অবধীল্লীলযা রাজন্সাবজ্ঞং বামমুষ্টিনা ॥ ২৬ ॥

তর্হ্যেব হি শলঃ কৃষ্ণপ্রপদাহতশীর্ষকঃ । দ্বিধা বিদীর্ণস্তোশলক উভাবপি নিপেততুঃ ॥ ২৭ ॥

চাণূরে মুষ্টিকে কূটে শলে তোশলকে হতে । শেষাঃ প্রদুদ্রুবুর্মল্লাঃ সর্বে প্রাণপরীপ্সবঃ ॥ ২৮ ॥

গোপান্বযস্যানাকৃষ্য তৈঃ সংসৃজ্য বিজহ্রতুঃ । বাদ্যমানেষু তূর্যেষু বল্গন্তৌ রুতনূপুরৌ ॥ ২৯ ॥

জনাঃ প্রজহৃষুঃ সর্বে কর্মণা রামকৃষ্ণযোঃ । ঋতে কংসং বিপ্রমুখ্যাঃ সাধবঃ সাধু সাধ্বিতি ॥ ৩০ ॥

হতেষু মল্লবর্যেষু বিদ্রুতেষু চ ভোজরাট্ । ন্যবারযত্ স্বতূর্যাণি বাক্যং চেদমুবাচ হ ॥ ৩১ ॥

নিঃসারযত দুর্বৃত্তৌ বসুদেবাত্মজৌ পুরাত্ । ধনং হরত গোপানাং নন্দং বধ্নীত দুর্মতিম্ ॥ ৩২ ॥

বসুদেবস্তু দুর্মেধা হন্যতামাশ্বসত্তমঃ । উগ্রসেনঃ পিতা চাপি সানুগঃ পরপক্ষগঃ ॥ ৩৩ ॥

এবং বিকত্থমানে বৈ কংসে প্রকুপিতোঽব্যযঃ । লঘিম্নোত্পত্য তরসা মঞ্চমুত্তুঙ্গমারুহত্ ॥ ৩৪ ॥

তমাবিশন্তমালোক্য মৃত্যুমাত্মন আসনাত্ । মনস্বী সহসোত্থায জগৃহে সোঽসিচর্মণী ॥ ৩৫ ॥

তং খড্গপাণিং বিচরন্তমাশুশ্যেনং যথা দক্ষিণসব্যমম্বরে । সমগ্রহীদ্ দুর্বিষহোগ্রতেজাযথোরগং তার্ক্ষ্যসুতঃ প্রসহ্য ॥ ৩৬ ॥

প্রগৃহ্য কেশেষু চলত্কিরীটংনিপাত্য রঙ্গোপরি তুঙ্গমঞ্চাত্ । তস্যোপরিষ্টাত্ স্বযমব্জনাভঃপপাত বিশ্বাশ্রয আত্মতন্ত্রঃ ॥ ৩৭ ॥

তং সম্পরেতং বিচকর্ষ ভূমৌহরির্যথেভং জগতো বিপশ্যতঃ । হাহেতি শব্দঃ সুমহাংস্তদাভূ-দুদীরিতঃ সর্বজনৈর্নরেন্দ্র ॥ ৩৮ ॥

স নিত্যদোদ্বিগ্নধিযা তমীশ্বরংপিবন্নদন্বা বিচরন্ স্বপন্ শ্বসন্ । দদর্শ চক্রাযুধমগ্রতো যত-স্তদেব রূপং দুরবাপমাপ ॥ ৩৯ ॥

তস্যানুজা ভ্রাতরোঽষ্টৌ কঙ্কন্যগ্রোধকাদযঃ । অভ্যধাবন্নতিক্রুদ্ধা ভ্রাতুর্নির্বেশকারিণঃ ॥ ৪০ ॥

তথাতিরভসাংস্তাংস্তু সংযত্তান্রোহিণীসুতঃ । অহন্ পরিঘমুদ্যম্য পশূনিব মৃগাধিপঃ ॥ ৪১ ॥

নেদুর্দুন্দুভযো ব্যোম্নি ব্রহ্মেশাদ্যা বিভূতযঃ । পুষ্পৈঃ কিরন্তস্তং প্রীতাঃ শশংসুর্ননৃতুঃ স্ত্রিযঃ ॥ ৪২ ॥

তেষাং স্ত্রিযো মহারাজ সুহৃন্মরণদুঃখিতাঃ । তত্রাভীযুর্বিনিঘ্নন্ত্যঃ শীর্ষাণ্যশ্রুবিলোচনাঃ ॥ ৪৩ ॥

শযানান্বীরশযাযাং পতীনালিঙ্গ্য শোচতীঃ । বিলেপুঃ সুস্বরং নার্যো বিসৃজন্ত্যো মুহুঃ শুচঃ ॥ ৪৪ ॥

হা নাথ প্রিয ধর্মজ্ঞ করুণানাথবত্সল । ত্বযা হতেন নিহতা বযং তে সগৃহপ্রজাঃ ॥ ৪৫ ॥

ত্বযা বিরহিতা পত্যা পুরীযং পুরুষর্ষভ । ন শোভতে বযমিব নিবৃত্তোত্সবমঙ্গলা ॥ ৪৬ ॥

অনাগসাং ত্বং ভূতানাং কৃতবান্দ্রোহমুল্বণম্ । তেনেমাং ভো দশাং নীতো ভূতধ্রুক্কো লভেত শম্ ॥ ৪৭ ॥

সর্বেষামিহ ভূতানামেষ হি প্রভবাপ্যযঃ । গোপ্তা চ তদবধ্যাযী ন ক্বচিত্সুখমেধতে ॥ ৪৮ ॥

শ্রীশুক উবাচ
রাজযোষিত আশ্বাস্য ভগবাঁল্লোকভাবনঃ । যামাহুর্লৌকিকীং সংস্থাং হতানাং সমকারযত্ ॥ ৪৯ ॥

মাতরং পিতরং চৈব মোচযিত্বাথ বন্ধনাত্ । কৃষ্ণরামৌ ববন্দাতে শিরসা স্পৃশ্য পাদযোঃ ॥ ৫০ ॥

দেবকী বসুদেবশ্চ বিজ্ঞায জগদীশ্বরৌ । কৃতসংবন্দনৌ পুত্রৌ সস্বজাতে ন শঙ্কিতৌ ॥ ৫১ ॥
নাযং শ্রিযোঽঙ্গ উ নিতান্তরতেঃ প্রসাদঃ
স্বর্যোষিতাং নলিনগন্ধরুচাং কুতোঽন্যাঃ ।
রাসোত্সবেঽস্য ভুজদণ্ডগৃহীতকণ্ঠ-
লব্ধাশিষাং য উদগাদ্ব্রজবল্লভীনাম্ ॥