শ্রীমদ্ভাগবতম্ ১০.৬০

শ্রীবাদরাযণিরুবাচ
কর্হিচিত্ সুখমাসীনং স্বতল্পস্থং জগদ্গুরুম্ ।
পতিং পর্যচরদ্ ভৈষ্মী ব্যজনেন সখীজনৈঃ ॥ ১ ॥

যস্ত্বেতল্লীলযা বিশ্বং সৃজত্যত্ত্যবতীশ্বরঃ ।
স হি জাতঃ স্বসেতূনাং গোপীথায যদুষ্বজঃ ॥ ২ ॥

তস্মিনন্তর্গৃহে ভ্রাজন্মুক্তাদামবিলম্বিনা ।
বিরাজিতে বিতানেন দীপৈর্মণিমযৈরপি ॥ ৩ ॥

মল্লিকাদামভিঃ পুষ্পৈর্দ্বিরেফকুলনাদিতে ।
জালরন্ধ্রপ্রবিষ্টৈশ্চ গোভিশ্চন্দ্রমসোঽমলৈঃ ॥ ৪ ॥

পারিজাতবনামোদবাযুনোদ্যানশালিনা ।
ধূপৈরগুরুজৈ রাজন্ জালরন্ধ্রবিনির্গতৈঃ ॥ ৫ ॥

পযঃফেননিভে শুভ্রে পর্যঙ্কে কশিপূত্তমে ।
উপতস্থে সুখাসীনং জগতামীশ্বরং পতিম্ ॥ ৬ ॥

বালব্যজনমাদায রত্নদণ্ডং সখীকরাত্ ।
তেন বীজযতী দেবী উপাসাং চক্র ঈশ্বরম্ ॥ ৭ ॥

সোপাচ্যুতং ক্বণযতী মণিনূপুরাভ্যাং
রেজেঽঙ্গুলীযবলযব্যজনাগ্রহস্তা ।
বস্ত্রান্তগূঢকুচকুঙ্কুমশোণহার-
ভাসা নিতম্বধৃতযা চ পরার্ধ্যকাঞ্চ্যা ॥ ৮ ॥

তাং রূপিণীং শ্রিযমনন্যগতিং নিরীক্ষ্য
যা লীলযা ধৃততনোরনুরূপরূপা ।
প্রীতঃ স্মযন্নলককুণ্ডলনিষ্ককণ্ঠ-
বক্ত্রোল্লসত্স্মিতসুধাং হরিরাবভাষে ॥ ৯ ॥

শ্রীভগবানুবাচ
রাজপুত্রীপ্সিতা ভূপৈর্লোকপালবিভূতিভিঃ ।
মহানুভাবৈঃ শ্রীমদ্ভী রূপৌদার্যবলোর্জিতৈঃ ॥ ১০ ॥

তান্প্রাপ্তানর্থিনো হিত্বা চৈদ্যাদীন্ স্মরদুর্মদান্ ।
দত্তা ভ্রাত্রা স্বপিত্রা চ কস্মান্নো ববৃষেঽসমান্ ॥ ১১ ॥

রাজভ্যো বিভ্যতঃ সুভ্রু সমুদ্রং শরণং গতান্ ।
বলবদ্ভিঃ কৃতদ্বেষান্ প্রাযস্ত্যক্তনৃপাসনান্ ॥ ১২ ॥

অস্পষ্টবর্ত্মনাং পুংসামলোকপথমীযুষাম্ ।
আস্থিতাঃ পদবীং সুভ্রু প্রাযঃ সীদন্তি যোষিতঃ ॥ ১৩ ॥

নিষ্কিঞ্চনা বযং শশ্বন্নিষ্কিঞ্চনজনপ্রিযাঃ ।
তস্মাত্ প্রাযেণ ন হ্যাঢ্যা মাং ভজন্তি সুমধ্যমে ॥ ১৪ ॥

যযোরাত্মসমং বিত্তং জন্মৈশ্বর্যাকৃতির্ভবঃ ।
তযোর্বিবাহো মৈত্রী চ নোত্তমাধমযোঃ ক্বচিত্ ॥ ১৫ ॥

বৈদর্ভ্যেতদবিজ্ঞায ত্বযাদীর্ঘসমীক্ষযা ।
বৃতা বযং গুণৈর্হীনা ভিক্ষুভিঃ শ্লাঘিতা মুধা ॥ ১৬ ॥

অথাত্মনোঽনুরূপং বৈ ভজস্ব ক্ষত্রিযর্ষভম্ ।
যেন ত্বমাশিষঃ সত্যা ইহামুত্র চ লপ্স্যসে ॥ ১৭ ॥

চৈদ্যশাল্বজরাসন্ধদন্তবক্রাদযো নৃপাঃ ।
মম দ্বিষন্তি বামোরু রুক্মী চাপি তবাগ্রজঃ ॥ ১৮ ॥

তেষাং বীর্যমদান্ধানাং দৃপ্তানাং স্মযনুত্তযে ।
আনিতাসি মযা ভদ্রে তেজোপহরতাসতাম্ ॥ ১৯ ॥

উদাসীনা বযং নূনং ন স্ত্র্যপত্যার্থকামুকাঃ ।
আত্মলব্ধ্যাস্মহে পূর্ণা গেহযোর্জ্যোতিরক্রিযাঃ ॥ ২০ ॥

শ্রীশুক উবাচ
এতাবদুক্ত্বা ভগবানাত্মানং বল্লভামিব ।
মন্যমানামবিশ্লেষাত্ তদ্দর্পঘ্ন উপারমত্ ॥ ২১ ॥

ইতি ত্রিলোকেশপতেস্তদাত্মনঃ
প্রিযস্য দেব্যশ্রুতপূর্বমপ্রিযম্ ।
আশ্রুত্য ভীতা হৃদি
জাতবেপথু-
শ্চিন্তাং দুরন্তাং রুদতী জগাম হ ॥ ২২ ॥

পদা সুজাতেন নখারুণশ্রিযা
ভুবং লিখন্ত্যশ্রুভিরঞ্জনাসিতৈঃ ।
আসিঞ্চতী কুঙ্কুমরূষিতৌ স্তনৌ
তস্থাবধোমুখ্যতিদুঃখরুদ্ধবাক্ ॥ ২৩ ॥

তস্যাঃ সুদুঃখভযশোকবিনষ্টবুদ্ধে-
র্হস্তাচ্ছ্লথদ্বলযতো ব্যজনং পপাত ।
দেহশ্চ বিক্লবধিযঃ সহসৈব মুহ্যন্
রম্ভেব বাযুবিহতো প্রবিকীর্য কেশান্ ॥ ২৪ ॥

তদ্ দৃষ্ট্বা ভগবান্ কৃষ্ণঃ প্রিযাযাঃ প্রেমবন্ধনম্ ।
হাস্যপ্রৌঢিমজানন্ত্যাঃ করুণঃ সোঽন্বকম্পত ॥ ২৫ ॥

পর্যঙ্কাদবরুহ্যাশু তামুত্থাপ্য চতুর্ভুজঃ ।
কেশান্ সমুহ্য তদ্বক্ত্রং প্রামৃজত্ পদ্মপাণিনা ॥ ২৬ ॥

প্রমৃজ্যাশ্রুকলে নেত্রে স্তনৌ চোপহতৌ শুচা ।
আশ্লিষ্য বাহুনা রাজননন্যবিষযাং সতীম্ ॥ ২৭ ॥

সান্ত্বযামাস সান্ত্বজ্ঞঃ কৃপযা কৃপণাং প্রভুঃ ।
হাস্যপ্রৌঢিভ্রমচ্চিত্তামতদর্হাং সতাং গতিঃ ॥ ২৮ ॥

শ্রীভগবানুবাচ
মা মা বৈদর্ভ্যসূযেথা জানে ত্বাং মত্পরাযণাম্ ।
ত্বদ্বচঃ শ্রোতুকামেন ক্ষ্বেল্যাচরিতমঙ্গনে ॥ ২৯ ॥

মুখং চ প্রেমসংরম্ভস্ফুরিতাধরমীক্ষিতুম্ ।
কটাক্ষেপারুণাপাঙ্গং সুন্দরভ্রুকুটীতটম্ ॥ ৩০ ॥

অযং হি পরমো লাভো গৃহেষু গৃহমেধিনাম্ ।
যন্নর্মৈরীযতে যামঃ প্রিযযা ভীরু ভামিনি ॥ ৩১ ॥

শ্রীশুক উবাচ
সৈবং ভগবতা রাজন্ বৈদর্ভী পরিসান্ত্বিতা ।
জ্ঞাত্বা তত্পরিহাসোক্তিং প্রিযত্যাগভযং জহৌ ॥ ৩২ ॥

বভাষ ঋষভং পুংসাং বীক্ষন্তী ভগবন্মুখম্ ।
সব্রীডহাসরুচিরস্নিগ্ধাপাঙ্গেন ভারত ॥ ৩৩ ॥

শ্রীরুক্মিণ্যুবাচ
নন্বেবমেতদরবিন্দবিলোচনাহ
যদ্বৈ ভবান্ ভগবতোঽসদৃশী বিভূম্নঃ ।
ক্ব স্বে মহিম্ন্যভিরতো ভগবাংস্ত্র্যধীশঃ
ক্বাহং গুণপ্রকৃতিরজ্ঞগৃহীতপাদা ॥ ৩৪ ॥

সত্যং ভযাদিব গুণেভ্য উরুক্রমান্তঃ
শেতে সমুদ্র উপলম্ভনমাত্র আত্মা ।
নিত্যং কদিন্দ্রিযগণৈঃ কৃতবিগ্রহস্ত্বং
ত্বত্সেবকৈর্নৃপপদং বিধুতং তমোঽন্ধম্ ॥ ৩৫ ॥

ত্বত্পাদপদ্মমকরন্দজুষাং মুনীনাং
বর্ত্মাস্ফুটং নৃপশুভির্ননু দুর্বিভাব্যম্ ।
যস্মাদলৌকিকমিবেহিতমীশ্বরস্য
ভূমংস্তবেহিতমথো অনু যে ভবন্তম্ ॥ ৩৬ ॥

নিষ্কিঞ্চনো ননু ভবান্ ন যতোঽস্তি কিঞ্চিদ্
যস্মৈ বলিং বলিভুজোঽপি হরন্ত্যজাদ্যাঃ ।
ন ত্বা বিদন্ত্যসুতৃপোঽন্তকমাঢ্যতান্ধাঃ
প্রেষ্ঠো ভবান্ বলিভুজামপি তেঽপি তুভ্যম্ ॥ ৩৭ ॥

ত্বং বৈ সমস্তপুরুষার্থমযঃ ফলাত্মা
যদ্বাঞ্ছযা সুমতযো বিসৃজন্তি কৃত্স্নম্ ।
তেষাং বিভো সমুচিতো ভবতঃ সমাজঃ
পুংসঃ স্ত্রিযাশ্চ রতযোঃ সুখদুঃখিনোর্ন ॥ ৩৮ ॥

ত্বং ন্যস্তদণ্ডমুনিভির্গদিতানুভাব
আত্মাত্মদশ্চ জগতামিতি মে বৃতোঽসি ।
হিত্বা ভবদ্ভ্রুব উদীরিতকালবেগ
ধ্বস্তাশিষোঽব্জভবনাকপতীন্ কুতোঽন্যে ॥ ৩৯ ॥

জাড্যং বচস্তব গদাগ্রজ যস্তু ভূপান্
বিদ্রাব্য শার্ঙ্গনিনদেন জহর্থ মাং ত্বম্ ।
সিংহো যথা স্ববলিমীশ পশূন্ স্বভাগং
তেভ্যো ভযাদ্ যদুদধিং শরণং প্রপন্নঃ ॥ ৪০ ॥

যদ্বাঞ্ছযা নৃপশিখামণযোঽঙ্গবৈন্য-
জাযন্তনাহুষগযাদয ঐক্যপত্যম্ ।
রাজ্যং বিসৃজ্য বিবিশুর্বনমম্বুজাক্ষ
সীদন্তি তেঽনুপদবীং ত ইহাস্থিতাঃ কিম্ ॥ ৪১ ॥

কান্যং শ্রযেত তব পাদসরোজগন্ধ-
মাঘ্রায সন্মুখরিতং জনতাপবর্গম্ ।
লক্ষ্ম্যালযং ত্ববিগণয্য গুণালযস্য
মর্ত্যা সদোরুভযমর্থবিবিক্তদৃষ্টিঃ ॥ ৪২ ॥

তং ত্বানুরূপমভজং জগতামধীশ-
মাত্মানমত্র চ পরত্র চ কামপূরম্ ।
স্যান্মে তবাঙ্ঘ্রিররণং সৃতিভির্ভ্রমন্ত্যা
যো বৈ ভজন্তমুপযাত্যনৃতাপবর্গঃ ॥ ৪৩ ॥

তস্যাঃ স্যুরচ্যুত নৃপা ভবতোপদিষ্টাঃ
স্ত্রীণাং গৃহেষু খরগোশ্ববিডালভৃত্যাঃ ।
যত্কর্ণমূলমরিকর্ষণ নোপযাযাদ্
যুষ্মত্কথা মৃডবিরিঞ্চসভাসু গীতা ॥ ৪৪ ॥

ত্বক্শ্মশ্রুরোমনখকেশপিনদ্ধমন্ত-
র্মাংসাস্থিরক্তকৃমিবিট্কফপিত্তবাতম্ ।
জীবচ্ছবং ভজতি কান্তমতির্বিমূঢা
যা তে পদাব্জমকরন্দমজিঘ্রতী স্ত্রী ॥ ৪৫ ॥

অস্ত্বম্বুজাক্ষ মম তে চরণানুরাগ
আত্মন্ রতস্য মযি চানতিরিক্তদৃষ্টেঃ ।
যর্হ্যস্য বৃদ্ধয উপাত্তরজোঽতিমাত্রো
মামীক্ষসে তদু হ নঃ পরমানুকম্পা ॥ ৪৬ ॥

নৈবালীকমহং মন্যে বচস্তে মধুসূদন ।
অম্বাযা এব হি প্রাযঃ কন্যাযাঃ স্যাদ্ রতিঃ ক্বচিত্ ॥ ৪৭ ॥

ব্যূঢাযাশ্চাপি পুংশ্চল্যা মনোঽভ্যেতি নবং নবম্ ।
বুধোঽসতীং ন বিভৃযাত্ তাং বিভ্রদুভযচ্যুতঃ ॥ ৪৮ ॥

শ্রীভগবানুবাচ
সাধ্ব্যেতচ্ছ্রোতুকামৈস্ত্বং রাজপুত্রী প্রলম্ভিতা ।
মযোদিতং যদন্বাত্থ সর্বং তত্ সত্যমেব হি ॥ ৪৯ ॥

যান্ যান্ কামযসে কামান্ ময্যকামায ভামিনি ।
সন্তি হ্যেকান্তভক্তাযাস্তব কল্যাণি নিত্যদ ॥ ৫০ ॥

উপলব্ধং পতিপ্রেম পাতিব্রত্যং চ তেঽনঘে ।
যদ্বাক্যৈশ্চাল্যমানাযা ন ধীর্ময্যপকর্ষিতা ॥ ৫১ ॥

যে মাং ভজন্তি দাম্পত্যে তপসা ব্রতচর্যযা ।
কামাত্মানোঽপবর্গেশং মোহিতা মম মাযযা ॥ ৫২ ॥

মাং প্রাপ্য মানিন্যপবর্গসম্পদং
বাঞ্ছন্তি যে সম্পদ এব তত্পতিম্ ।
তে মন্দভাগা নিরযেঽপি যে নৃণাং
মাত্রাত্মকত্বাত্নিরযঃ সুসঙ্গমঃ ॥ ৫৩ ॥

দিষ্ট্যা গৃহেশ্বর্যসকৃন্মযি ত্বযা
কৃতানুবৃত্তির্ভবমোচনী খলৈঃ ।
সুদুষ্করাসৌ সুতরাং দুরাশিষো
হ্যসুংভরাযা নিকৃতিং জুষঃ স্ত্রিযাঃ ॥ ৫৪ ॥

ন ত্বাদৃশীং প্রণযিনীং গৃহিণীং গৃহেষু
পশ্যামি মানিনি যযা স্ববিবাহকালে ।
প্রাপ্তান্ নৃপান্ন বিগণয্য রহোহরো মে
প্রস্থাপিতো দ্বিজ উপশ্রুতসত্কথস্য ॥ ৫৫ ॥

ভ্রাতুর্বিরূপকরণং যুধি নির্জিতস্য
প্রোদ্বাহপর্বণি চ তদ্বধমক্ষগোষ্ঠ্যাম্ ।
দুঃখং সমুত্থমসহোঽস্মদযোগভীত্যা
নৈবাব্রবীঃ কিমপি তেন বযং জিতাস্তে ॥ ৫৬ ॥

দূতস্ত্বযাত্মলভনে সুবিবিক্তমন্ত্রঃ
প্রস্থাপিতো মযি চিরাযতি শূন্যমেতত্ ।
মত্বা জিহাস ইদমঙ্গমনন্যযোগ্যং
তিষ্ঠেত তত্ত্বযি বযং প্রতিনন্দযামঃ ॥ ৫৭ ॥

শ্রীশুক উবাচ
এবং সৌরতসংলাপৈর্ভগবান্ জগদীশ্বরঃ ।
স্বরতো রমযা রেমে নরলোকং বিডম্বযন্ ॥ ৫৮ ॥

তথান্যাসামপি বিভুর্গৃহেষু গৃহবানিব ।
আস্থিতো গৃহমেধীযান্ ধর্মান্ লোকগুরুর্হরিঃ ॥ ৫৯ ॥