ଶ୍ରୀମଦ୍ଭାଗଵତମ୍ ୧୦.୬୦

ଶ୍ରୀବାଦରାଯଣିରୁଵାଚ
କର୍ହିଚିତ୍ ସୁଖମାସୀନଂ ସ୍ଵତଲ୍ପସ୍ଥଂ ଜଗଦ୍ଗୁରୁମ୍ ।
ପତିଂ ପର୍ଯଚରଦ୍ ଭୈଷ୍ମୀ ଵ୍ଯଜନେନ ସଖୀଜନୈଃ ॥ ୧ ॥

ଯସ୍ତ୍ଵେତଲ୍ଲୀଲଯା ଵିଶ୍ଵଂ ସୃଜତ୍ଯତ୍ତ୍ଯଵତୀଶ୍ଵରଃ ।
ସ ହି ଜାତଃ ସ୍ଵସେତୂନାଂ ଗୋପୀଥାଯ ଯଦୁଷ୍ଵଜଃ ॥ ୨ ॥

ତସ୍ମିନନ୍ତର୍ଗୃହେ ଭ୍ରାଜନ୍ମୁକ୍ତାଦାମଵିଲମ୍ବିନା ।
ଵିରାଜିତେ ଵିତାନେନ ଦୀପୈର୍ମଣିମଯୈରପି ॥ ୩ ॥

ମଲ୍ଲିକାଦାମଭିଃ ପୁଷ୍ପୈର୍ଦ୍ଵିରେଫକୁଲନାଦିତେ ।
ଜାଲରନ୍ଧ୍ରପ୍ରଵିଷ୍ଟୈଶ୍ଚ ଗୋଭିଶ୍ଚନ୍ଦ୍ରମସୋଽମଲୈଃ ॥ ୪ ॥

ପାରିଜାତଵନାମୋଦଵାଯୁନୋଦ୍ଯାନଶାଲିନା ।
ଧୂପୈରଗୁରୁଜୈ ରାଜନ୍ ଜାଲରନ୍ଧ୍ରଵିନିର୍ଗତୈଃ ॥ ୫ ॥

ପଯଃଫେନନିଭେ ଶୁଭ୍ରେ ପର୍ଯଙ୍କେ କଶିପୂତ୍ତମେ ।
ଉପତସ୍ଥେ ସୁଖାସୀନଂ ଜଗତାମୀଶ୍ଵରଂ ପତିମ୍ ॥ ୬ ॥

ଵାଲଵ୍ଯଜନମାଦାଯ ରତ୍ନଦଣ୍ଡଂ ସଖୀକରାତ୍ ।
ତେନ ଵୀଜଯତୀ ଦେଵୀ ଉପାସାଂ ଚକ୍ର ଈଶ୍ଵରମ୍ ॥ ୭ ॥

ସୋପାଚ୍ଯୁତଂ କ୍ଵଣଯତୀ ମଣିନୂପୁରାଭ୍ଯାଂ
ରେଜେଽଙ୍ଗୁଲୀଯଵଲଯଵ୍ଯଜନାଗ୍ରହସ୍ତା ।
ଵସ୍ତ୍ରାନ୍ତଗୂଢକୁଚକୁଙ୍କୁମଶୋଣହାର-
ଭାସା ନିତମ୍ବଧୃତଯା ଚ ପରାର୍ଧ୍ଯକାଞ୍ଚ୍ଯା ॥ ୮ ॥

ତାଂ ରୂପିଣୀଂ ଶ୍ରିଯମନନ୍ଯଗତିଂ ନିରୀକ୍ଷ୍ଯ
ଯା ଲୀଲଯା ଧୃତତନୋରନୁରୂପରୂପା ।
ପ୍ରୀତଃ ସ୍ମଯନ୍ନଲକକୁଣ୍ଡଲନିଷ୍କକଣ୍ଠ-
ଵକ୍ତ୍ରୋଲ୍ଲସତ୍ସ୍ମିତସୁଧାଂ ହରିରାବଭାଷେ ॥ ୯ ॥

ଶ୍ରୀଭଗଵାନୁଵାଚ
ରାଜପୁତ୍ରୀପ୍ସିତା ଭୂପୈର୍ଲୋକପାଲଵିଭୂତିଭିଃ ।
ମହାନୁଭାଵୈଃ ଶ୍ରୀମଦ୍ଭୀ ରୂପୌଦାର୍ଯବଲୋର୍ଜିତୈଃ ॥ ୧୦ ॥

ତାନ୍ପ୍ରାପ୍ତାନର୍ଥିନୋ ହିତ୍ଵା ଚୈଦ୍ଯାଦୀନ୍ ସ୍ମରଦୁର୍ମଦାନ୍ ।
ଦତ୍ତା ଭ୍ରାତ୍ରା ସ୍ଵପିତ୍ରା ଚ କସ୍ମାନ୍ନୋ ଵଵୃଷେଽସମାନ୍ ॥ ୧୧ ॥

ରାଜଭ୍ଯୋ ବିଭ୍ଯତଃ ସୁଭ୍ରୁ ସମୁଦ୍ରଂ ଶରଣଂ ଗତାନ୍ ।
ବଲଵଦ୍ଭିଃ କୃତଦ୍ଵେଷାନ୍ ପ୍ରାଯସ୍ତ୍ଯକ୍ତନୃପାସନାନ୍ ॥ ୧୨ ॥

ଅସ୍ପଷ୍ଟଵର୍ତ୍ମନାଂ ପୁଂସାମଲୋକପଥମୀଯୁଷାମ୍ ।
ଆସ୍ଥିତାଃ ପଦଵୀଂ ସୁଭ୍ରୁ ପ୍ରାଯଃ ସୀଦନ୍ତି ଯୋଷିତଃ ॥ ୧୩ ॥

ନିଷ୍କିଞ୍ଚନା ଵଯଂ ଶଶ୍ଵନ୍ନିଷ୍କିଞ୍ଚନଜନପ୍ରିଯାଃ ।
ତସ୍ମାତ୍ ପ୍ରାଯେଣ ନ ହ୍ଯାଢ୍ଯା ମାଂ ଭଜନ୍ତି ସୁମଧ୍ଯମେ ॥ ୧୪ ॥

ଯଯୋରାତ୍ମସମଂ ଵିତ୍ତଂ ଜନ୍ମୈଶ୍ଵର୍ଯାକୃତିର୍ଭଵଃ ।
ତଯୋର୍ଵିଵାହୋ ମୈତ୍ରୀ ଚ ନୋତ୍ତମାଧମଯୋଃ କ୍ଵଚିତ୍ ॥ ୧୫ ॥

ଵୈଦର୍ଭ୍ଯେତଦଵିଜ୍ଞାଯ ତ୍ଵଯାଦୀର୍ଘସମୀକ୍ଷଯା ।
ଵୃତା ଵଯଂ ଗୁଣୈର୍ହୀନା ଭିକ୍ଷୁଭିଃ ଶ୍ଲାଘିତା ମୁଧା ॥ ୧୬ ॥

ଅଥାତ୍ମନୋଽନୁରୂପଂ ଵୈ ଭଜସ୍ଵ କ୍ଷତ୍ରିଯର୍ଷଭମ୍ ।
ଯେନ ତ୍ଵମାଶିଷଃ ସତ୍ଯା ଇହାମୁତ୍ର ଚ ଲପ୍ସ୍ଯସେ ॥ ୧୭ ॥

ଚୈଦ୍ଯଶାଲ୍ଵଜରାସନ୍ଧଦନ୍ତଵକ୍ରାଦଯୋ ନୃପାଃ ।
ମମ ଦ୍ଵିଷନ୍ତି ଵାମୋରୁ ରୁକ୍ମୀ ଚାପି ତଵାଗ୍ରଜଃ ॥ ୧୮ ॥

ତେଷାଂ ଵୀର୍ଯମଦାନ୍ଧାନାଂ ଦୃପ୍ତାନାଂ ସ୍ମଯନୁତ୍ତଯେ ।
ଆନିତାସି ମଯା ଭଦ୍ରେ ତେଜୋପହରତାସତାମ୍ ॥ ୧୯ ॥

ଉଦାସୀନା ଵଯଂ ନୂନଂ ନ ସ୍ତ୍ର୍ଯପତ୍ଯାର୍ଥକାମୁକାଃ ।
ଆତ୍ମଲବ୍ଧ୍ଯାସ୍ମହେ ପୂର୍ଣା ଗେହଯୋର୍ଜ୍ଯୋତିରକ୍ରିଯାଃ ॥ ୨୦ ॥

ଶ୍ରୀଶୁକ ଉଵାଚ
ଏତାଵଦୁକ୍ତ୍ଵା ଭଗଵାନାତ୍ମାନଂ ଵଲ୍ଲଭାମିଵ ।
ମନ୍ଯମାନାମଵିଶ୍ଲେଷାତ୍ ତଦ୍ଦର୍ପଘ୍ନ ଉପାରମତ୍ ॥ ୨୧ ॥

ଇତି ତ୍ରିଲୋକେଶପତେସ୍ତଦାତ୍ମନଃ
ପ୍ରିଯସ୍ଯ ଦେଵ୍ଯଶ୍ରୁତପୂର୍ଵମପ୍ରିଯମ୍ ।
ଆଶ୍ରୁତ୍ଯ ଭୀତା ହୃଦି
ଜାତଵେପଥୁ-
ଶ୍ଚିନ୍ତାଂ ଦୁରନ୍ତାଂ ରୁଦତୀ ଜଗାମ ହ ॥ ୨୨ ॥

ପଦା ସୁଜାତେନ ନଖାରୁଣଶ୍ରିଯା
ଭୁଵଂ ଲିଖନ୍ତ୍ଯଶ୍ରୁଭିରଞ୍ଜନାସିତୈଃ ।
ଆସିଞ୍ଚତୀ କୁଙ୍କୁମରୂଷିତୌ ସ୍ତନୌ
ତସ୍ଥାଵଧୋମୁଖ୍ଯତିଦୁଃଖରୁଦ୍ଧଵାକ୍ ॥ ୨୩ ॥

ତସ୍ଯାଃ ସୁଦୁଃଖଭଯଶୋକଵିନଷ୍ଟବୁଦ୍ଧେ-
ର୍ହସ୍ତାଚ୍ଛ୍ଲଥଦ୍ଵଲଯତୋ ଵ୍ଯଜନଂ ପପାତ ।
ଦେହଶ୍ଚ ଵିକ୍ଲଵଧିଯଃ ସହସୈଵ ମୁହ୍ଯନ୍
ରମ୍ଭେଵ ଵାଯୁଵିହତୋ ପ୍ରଵିକୀର୍ଯ କେଶାନ୍ ॥ ୨୪ ॥

ତଦ୍ ଦୃଷ୍ଟ୍ଵା ଭଗଵାନ୍ କୃଷ୍ଣଃ ପ୍ରିଯାଯାଃ ପ୍ରେମବନ୍ଧନମ୍ ।
ହାସ୍ଯପ୍ରୌଢିମଜାନନ୍ତ୍ଯାଃ କରୁଣଃ ସୋଽନ୍ଵକମ୍ପତ ॥ ୨୫ ॥

ପର୍ଯଙ୍କାଦଵରୁହ୍ଯାଶୁ ତାମୁତ୍ଥାପ୍ଯ ଚତୁର୍ଭୁଜଃ ।
କେଶାନ୍ ସମୁହ୍ଯ ତଦ୍ଵକ୍ତ୍ରଂ ପ୍ରାମୃଜତ୍ ପଦ୍ମପାଣିନା ॥ ୨୬ ॥

ପ୍ରମୃଜ୍ଯାଶ୍ରୁକଲେ ନେତ୍ରେ ସ୍ତନୌ ଚୋପହତୌ ଶୁଚା ।
ଆଶ୍ଲିଷ୍ଯ ବାହୁନା ରାଜନନନ୍ଯଵିଷଯାଂ ସତୀମ୍ ॥ ୨୭ ॥

ସାନ୍ତ୍ଵଯାମାସ ସାନ୍ତ୍ଵଜ୍ଞଃ କୃପଯା କୃପଣାଂ ପ୍ରଭୁଃ ।
ହାସ୍ଯପ୍ରୌଢିଭ୍ରମଚ୍ଚିତ୍ତାମତଦର୍ହାଂ ସତାଂ ଗତିଃ ॥ ୨୮ ॥

ଶ୍ରୀଭଗଵାନୁଵାଚ
ମା ମା ଵୈଦର୍ଭ୍ଯସୂଯେଥା ଜାନେ ତ୍ଵାଂ ମତ୍ପରାଯଣାମ୍ ।
ତ୍ଵଦ୍ଵଚଃ ଶ୍ରୋତୁକାମେନ କ୍ଷ୍ଵେଲ୍ଯାଚରିତମଙ୍ଗନେ ॥ ୨୯ ॥

ମୁଖଂ ଚ ପ୍ରେମସଂରମ୍ଭସ୍ଫୁରିତାଧରମୀକ୍ଷିତୁମ୍ ।
କଟାକ୍ଷେପାରୁଣାପାଙ୍ଗଂ ସୁନ୍ଦରଭ୍ରୁକୁଟୀତଟମ୍ ॥ ୩୦ ॥

ଅଯଂ ହି ପରମୋ ଲାଭୋ ଗୃହେଷୁ ଗୃହମେଧିନାମ୍ ।
ଯନ୍ନର୍ମୈରୀଯତେ ଯାମଃ ପ୍ରିଯଯା ଭୀରୁ ଭାମିନି ॥ ୩୧ ॥

ଶ୍ରୀଶୁକ ଉଵାଚ
ସୈଵଂ ଭଗଵତା ରାଜନ୍ ଵୈଦର୍ଭୀ ପରିସାନ୍ତ୍ଵିତା ।
ଜ୍ଞାତ୍ଵା ତତ୍ପରିହାସୋକ୍ତିଂ ପ୍ରିଯତ୍ଯାଗଭଯଂ ଜହୌ ॥ ୩୨ ॥

ବଭାଷ ଋଷଭଂ ପୁଂସାଂ ଵୀକ୍ଷନ୍ତୀ ଭଗଵନ୍ମୁଖମ୍ ।
ସଵ୍ରୀଡହାସରୁଚିରସ୍ନିଗ୍ଧାପାଙ୍ଗେନ ଭାରତ ॥ ୩୩ ॥

ଶ୍ରୀରୁକ୍ମିଣ୍ଯୁଵାଚ
ନନ୍ଵେଵମେତଦରଵିନ୍ଦଵିଲୋଚନାହ
ଯଦ୍ଵୈ ଭଵାନ୍ ଭଗଵତୋଽସଦୃଶୀ ଵିଭୂମ୍ନଃ ।
କ୍ଵ ସ୍ଵେ ମହିମ୍ନ୍ଯଭିରତୋ ଭଗଵାଂସ୍ତ୍ର୍ଯଧୀଶଃ
କ୍ଵାହଂ ଗୁଣପ୍ରକୃତିରଜ୍ଞଗୃହୀତପାଦା ॥ ୩୪ ॥

ସତ୍ଯଂ ଭଯାଦିଵ ଗୁଣେଭ୍ଯ ଉରୁକ୍ରମାନ୍ତଃ
ଶେତେ ସମୁଦ୍ର ଉପଲମ୍ଭନମାତ୍ର ଆତ୍ମା ।
ନିତ୍ଯଂ କଦିନ୍ଦ୍ରିଯଗଣୈଃ କୃତଵିଗ୍ରହସ୍ତ୍ଵଂ
ତ୍ଵତ୍ସେଵକୈର୍ନୃପପଦଂ ଵିଧୁତଂ ତମୋଽନ୍ଧମ୍ ॥ ୩୫ ॥

ତ୍ଵତ୍ପାଦପଦ୍ମମକରନ୍ଦଜୁଷାଂ ମୁନୀନାଂ
ଵର୍ତ୍ମାସ୍ଫୁଟଂ ନୃପଶୁଭିର୍ନନୁ ଦୁର୍ଵିଭାଵ୍ଯମ୍ ।
ଯସ୍ମାଦଲୌକିକମିଵେହିତମୀଶ୍ଵରସ୍ଯ
ଭୂମଂସ୍ତଵେହିତମଥୋ ଅନୁ ଯେ ଭଵନ୍ତମ୍ ॥ ୩୬ ॥

ନିଷ୍କିଞ୍ଚନୋ ନନୁ ଭଵାନ୍ ନ ଯତୋଽସ୍ତି କିଞ୍ଚିଦ୍
ଯସ୍ମୈ ବଲିଂ ବଲିଭୁଜୋଽପି ହରନ୍ତ୍ଯଜାଦ୍ଯାଃ ।
ନ ତ୍ଵା ଵିଦନ୍ତ୍ଯସୁତୃପୋଽନ୍ତକମାଢ୍ଯତାନ୍ଧାଃ
ପ୍ରେଷ୍ଠୋ ଭଵାନ୍ ବଲିଭୁଜାମପି ତେଽପି ତୁଭ୍ଯମ୍ ॥ ୩୭ ॥

ତ୍ଵଂ ଵୈ ସମସ୍ତପୁରୁଷାର୍ଥମଯଃ ଫଲାତ୍ମା
ଯଦ୍ଵାଞ୍ଛଯା ସୁମତଯୋ ଵିସୃଜନ୍ତି କୃତ୍ସ୍ନମ୍ ।
ତେଷାଂ ଵିଭୋ ସମୁଚିତୋ ଭଵତଃ ସମାଜଃ
ପୁଂସଃ ସ୍ତ୍ରିଯାଶ୍ଚ ରତଯୋଃ ସୁଖଦୁଃଖିନୋର୍ନ ॥ ୩୮ ॥

ତ୍ଵଂ ନ୍ଯସ୍ତଦଣ୍ଡମୁନିଭିର୍ଗଦିତାନୁଭାଵ
ଆତ୍ମାତ୍ମଦଶ୍ଚ ଜଗତାମିତି ମେ ଵୃତୋଽସି ।
ହିତ୍ଵା ଭଵଦ୍ଭ୍ରୁଵ ଉଦୀରିତକାଲଵେଗ
ଧ୍ଵସ୍ତାଶିଷୋଽବ୍ଜଭଵନାକପତୀନ୍ କୁତୋଽନ୍ଯେ ॥ ୩୯ ॥

ଜାଡ୍ଯଂ ଵଚସ୍ତଵ ଗଦାଗ୍ରଜ ଯସ୍ତୁ ଭୂପାନ୍
ଵିଦ୍ରାଵ୍ଯ ଶାର୍ଙ୍ଗନିନଦେନ ଜହର୍ଥ ମାଂ ତ୍ଵମ୍ ।
ସିଂହୋ ଯଥା ସ୍ଵବଲିମୀଶ ପଶୂନ୍ ସ୍ଵଭାଗଂ
ତେଭ୍ଯୋ ଭଯାଦ୍ ଯଦୁଦଧିଂ ଶରଣଂ ପ୍ରପନ୍ନଃ ॥ ୪୦ ॥

ଯଦ୍ଵାଞ୍ଛଯା ନୃପଶିଖାମଣଯୋଽଙ୍ଗଵୈନ୍ଯ-
ଜାଯନ୍ତନାହୁଷଗଯାଦଯ ଐକ୍ଯପତ୍ଯମ୍ ।
ରାଜ୍ଯଂ ଵିସୃଜ୍ଯ ଵିଵିଶୁର୍ଵନମମ୍ବୁଜାକ୍ଷ
ସୀଦନ୍ତି ତେଽନୁପଦଵୀଂ ତ ଇହାସ୍ଥିତାଃ କିମ୍ ॥ ୪୧ ॥

କାନ୍ଯଂ ଶ୍ରଯେତ ତଵ ପାଦସରୋଜଗନ୍ଧ-
ମାଘ୍ରାଯ ସନ୍ମୁଖରିତଂ ଜନତାପଵର୍ଗମ୍ ।
ଲକ୍ଷ୍ମ୍ଯାଲଯଂ ତ୍ଵଵିଗଣଯ୍ଯ ଗୁଣାଲଯସ୍ଯ
ମର୍ତ୍ଯା ସଦୋରୁଭଯମର୍ଥଵିଵିକ୍ତଦୃଷ୍ଟିଃ ॥ ୪୨ ॥

ତଂ ତ୍ଵାନୁରୂପମଭଜଂ ଜଗତାମଧୀଶ-
ମାତ୍ମାନମତ୍ର ଚ ପରତ୍ର ଚ କାମପୂରମ୍ ।
ସ୍ଯାନ୍ମେ ତଵାଙ୍ଘ୍ରିରରଣଂ ସୃତିଭିର୍ଭ୍ରମନ୍ତ୍ଯା
ଯୋ ଵୈ ଭଜନ୍ତମୁପଯାତ୍ଯନୃତାପଵର୍ଗଃ ॥ ୪୩ ॥

ତସ୍ଯାଃ ସ୍ଯୁରଚ୍ଯୁତ ନୃପା ଭଵତୋପଦିଷ୍ଟାଃ
ସ୍ତ୍ରୀଣାଂ ଗୃହେଷୁ ଖରଗୋଶ୍ଵଵିଡାଲଭୃତ୍ଯାଃ ।
ଯତ୍କର୍ଣମୂଲମରିକର୍ଷଣ ନୋପଯାଯାଦ୍
ଯୁଷ୍ମତ୍କଥା ମୃଡଵିରିଞ୍ଚସଭାସୁ ଗୀତା ॥ ୪୪ ॥

ତ୍ଵକ୍ଶ୍ମଶ୍ରୁରୋମନଖକେଶପିନଦ୍ଧମନ୍ତ-
ର୍ମାଂସାସ୍ଥିରକ୍ତକୃମିଵିଟ୍କଫପିତ୍ତଵାତମ୍ ।
ଜୀଵଚ୍ଛଵଂ ଭଜତି କାନ୍ତମତିର୍ଵିମୂଢା
ଯା ତେ ପଦାବ୍ଜମକରନ୍ଦମଜିଘ୍ରତୀ ସ୍ତ୍ରୀ ॥ ୪୫ ॥

ଅସ୍ତ୍ଵମ୍ବୁଜାକ୍ଷ ମମ ତେ ଚରଣାନୁରାଗ
ଆତ୍ମନ୍ ରତସ୍ଯ ମଯି ଚାନତିରିକ୍ତଦୃଷ୍ଟେଃ ।
ଯର୍ହ୍ଯସ୍ଯ ଵୃଦ୍ଧଯ ଉପାତ୍ତରଜୋଽତିମାତ୍ରୋ
ମାମୀକ୍ଷସେ ତଦୁ ହ ନଃ ପରମାନୁକମ୍ପା ॥ ୪୬ ॥

ନୈଵାଲୀକମହଂ ମନ୍ଯେ ଵଚସ୍ତେ ମଧୁସୂଦନ ।
ଅମ୍ବାଯା ଏଵ ହି ପ୍ରାଯଃ କନ୍ଯାଯାଃ ସ୍ଯାଦ୍ ରତିଃ କ୍ଵଚିତ୍ ॥ ୪୭ ॥

ଵ୍ଯୂଢାଯାଶ୍ଚାପି ପୁଂଶ୍ଚଲ୍ଯା ମନୋଽଭ୍ଯେତି ନଵଂ ନଵମ୍ ।
ବୁଧୋଽସତୀଂ ନ ବିଭୃଯାତ୍ ତାଂ ବିଭ୍ରଦୁଭଯଚ୍ଯୁତଃ ॥ ୪୮ ॥

ଶ୍ରୀଭଗଵାନୁଵାଚ
ସାଧ୍ଵ୍ଯେତଚ୍ଛ୍ରୋତୁକାମୈସ୍ତ୍ଵଂ ରାଜପୁତ୍ରୀ ପ୍ରଲମ୍ଭିତା ।
ମଯୋଦିତଂ ଯଦନ୍ଵାତ୍ଥ ସର୍ଵଂ ତତ୍ ସତ୍ଯମେଵ ହି ॥ ୪୯ ॥

ଯାନ୍ ଯାନ୍ କାମଯସେ କାମାନ୍ ମଯ୍ଯକାମାଯ ଭାମିନି ।
ସନ୍ତି ହ୍ଯେକାନ୍ତଭକ୍ତାଯାସ୍ତଵ କଲ୍ଯାଣି ନିତ୍ଯଦ ॥ ୫୦ ॥

ଉପଲବ୍ଧଂ ପତିପ୍ରେମ ପାତିଵ୍ରତ୍ଯଂ ଚ ତେଽନଘେ ।
ଯଦ୍ଵାକ୍ଯୈଶ୍ଚାଲ୍ଯମାନାଯା ନ ଧୀର୍ମଯ୍ଯପକର୍ଷିତା ॥ ୫୧ ॥

ଯେ ମାଂ ଭଜନ୍ତି ଦାମ୍ପତ୍ଯେ ତପସା ଵ୍ରତଚର୍ଯଯା ।
କାମାତ୍ମାନୋଽପଵର୍ଗେଶଂ ମୋହିତା ମମ ମାଯଯା ॥ ୫୨ ॥

ମାଂ ପ୍ରାପ୍ଯ ମାନିନ୍ଯପଵର୍ଗସମ୍ପଦଂ
ଵାଞ୍ଛନ୍ତି ଯେ ସମ୍ପଦ ଏଵ ତତ୍ପତିମ୍ ।
ତେ ମନ୍ଦଭାଗା ନିରଯେଽପି ଯେ ନୃଣାଂ
ମାତ୍ରାତ୍ମକତ୍ଵାତ୍ନିରଯଃ ସୁସଙ୍ଗମଃ ॥ ୫୩ ॥

ଦିଷ୍ଟ୍ଯା ଗୃହେଶ୍ଵର୍ଯସକୃନ୍ମଯି ତ୍ଵଯା
କୃତାନୁଵୃତ୍ତିର୍ଭଵମୋଚନୀ ଖଲୈଃ ।
ସୁଦୁଷ୍କରାସୌ ସୁତରାଂ ଦୁରାଶିଷୋ
ହ୍ଯସୁଂଭରାଯା ନିକୃତିଂ ଜୁଷଃ ସ୍ତ୍ରିଯାଃ ॥ ୫୪ ॥

ନ ତ୍ଵାଦୃଶୀଂ ପ୍ରଣଯିନୀଂ ଗୃହିଣୀଂ ଗୃହେଷୁ
ପଶ୍ଯାମି ମାନିନି ଯଯା ସ୍ଵଵିଵାହକାଲେ ।
ପ୍ରାପ୍ତାନ୍ ନୃପାନ୍ନ ଵିଗଣଯ୍ଯ ରହୋହରୋ ମେ
ପ୍ରସ୍ଥାପିତୋ ଦ୍ଵିଜ ଉପଶ୍ରୁତସତ୍କଥସ୍ଯ ॥ ୫୫ ॥

ଭ୍ରାତୁର୍ଵିରୂପକରଣଂ ଯୁଧି ନିର୍ଜିତସ୍ଯ
ପ୍ରୋଦ୍ଵାହପର୍ଵଣି ଚ ତଦ୍ଵଧମକ୍ଷଗୋଷ୍ଠ୍ଯାମ୍ ।
ଦୁଃଖଂ ସମୁତ୍ଥମସହୋଽସ୍ମଦଯୋଗଭୀତ୍ଯା
ନୈଵାବ୍ରଵୀଃ କିମପି ତେନ ଵଯଂ ଜିତାସ୍ତେ ॥ ୫୬ ॥

ଦୂତସ୍ତ୍ଵଯାତ୍ମଲଭନେ ସୁଵିଵିକ୍ତମନ୍ତ୍ରଃ
ପ୍ରସ୍ଥାପିତୋ ମଯି ଚିରାଯତି ଶୂନ୍ଯମେତତ୍ ।
ମତ୍ଵା ଜିହାସ ଇଦମଙ୍ଗମନନ୍ଯଯୋଗ୍ଯଂ
ତିଷ୍ଠେତ ତତ୍ତ୍ଵଯି ଵଯଂ ପ୍ରତିନନ୍ଦଯାମଃ ॥ ୫୭ ॥

ଶ୍ରୀଶୁକ ଉଵାଚ
ଏଵଂ ସୌରତସଂଲାପୈର୍ଭଗଵାନ୍ ଜଗଦୀଶ୍ଵରଃ ।
ସ୍ଵରତୋ ରମଯା ରେମେ ନରଲୋକଂ ଵିଡମ୍ବଯନ୍ ॥ ୫୮ ॥

ତଥାନ୍ଯାସାମପି ଵିଭୁର୍ଗୃହେଷୁ ଗୃହଵାନିଵ ।
ଆସ୍ଥିତୋ ଗୃହମେଧୀଯାନ୍ ଧର୍ମାନ୍ ଲୋକଗୁରୁର୍ହରିଃ ॥ ୫୯ ॥