শ্রীমদ্ভাগবতম্ ১০.৬৯

শ্রীশুক উবাচ
নরকং নিহতং শ্রুত্বা তথোদ্বাহং চ যোষিতাম্ ।
কৃষ্ণেনৈকেন বহ্বীনাং তদ্ দিদৃক্ষুঃ স্ম নারদঃ ॥ ১ ॥

চিত্রং বতৈতদেকেন বপুষা যুগপত্পৃথক্ ।
গৃহেষু দ্বযষ্টসাহস্রং স্ত্রিয এক উদাবহত্ ॥ ২ ॥

ইত্যুত্সুকো দ্বারবতীং দেবর্ষির্দ্রষ্টুমাগমত্ ।
পুষ্পিতোপবনারামদ্বিজালিকুলনাদিতাম্ ॥ ৩ ॥

উত্ফুল্লেন্দীবরাম্ভোজকহ্লারকুমুদোত্পলৈঃ ।
ছুরিতেষু সরঃসূচ্চৈঃ কূজিতাং হংসসারসৈঃ ॥ ৪ ॥

প্রাসাদলক্ষৈর্নবভির্জুষ্টাং স্ফাটিকরাজতৈঃ ।
মহামরকতপ্রখ্যৈঃ স্বর্ণরত্নপরিচ্ছদৈঃ ॥ ৫ ॥

বিভক্তরথ্যাপথচত্বরাপণৈঃ
শালাসভাভী রুচিরাং সুরালযৈঃ ।
সংসিক্তমার্গাঙ্গনবীথিদেহলীং
পতত্পতাকধ্বজবারিতাতপাম্ ॥ ৬ ॥

তস্যামন্তঃপুরং শ্রীমদর্চিতং সর্বধিষ্ণ্যপৈঃ ।
হরেঃ স্বকৌশলং যত্র ত্বষ্ট্রা কার্ত্স্ন্যেন দর্শিতম্ ॥ ৭ ॥

তত্র ষোডশভিঃ সদ্মসহস্রৈঃ সমলঙ্কৃতম্ ।
বিবেশৈকতোমং শৌরেঃ পত্নীনাং ভবনং মহত্ ॥ ৮ ॥

বিষ্টব্ধং বিদ্রুমস্তম্ভৈর্বৈদূর্যফলকোত্তমৈঃ ।
ইন্দ্রনীলমযৈঃ কুড্যৈর্জগত্যা চাহতত্বিষা ॥ ৯ ॥

বিতানৈর্নির্মিতৈস্ত্বষ্ট্রা মুক্তাদামবিলম্বিভিঃ ।
দান্তৈরাসনপর্যঙ্কৈর্মণ্যুত্তমপরিষ্কৃতৈঃ ॥ ১০ ॥

দাসীভির্নিষ্ককণ্ঠীভিঃ সুবাসোভিরলঙ্কৃতম্ ।
পুম্ভিঃ সকঞ্চুকোষ্ণীষসুবস্ত্রমণিকুণ্ডলৈঃ ॥ ১১ ॥

রত্নপ্রদীপনিকরদ্যুতিভির্নিরস্ত-
ধ্বান্তং বিচিত্রবলভীষু শিখণ্ডিনোঽঙ্গ ।
নৃত্যন্তি যত্র বিহিতাগুরুধূপমক্ষৈ-
র্নির্যান্তমীক্ষ্য ঘনবুদ্ধয উন্নদন্তঃ ॥ ১২ ॥

তস্মিন্ সমানগুণরূপবযঃসুবেষ-
দাসীসহস্রযুতযানুসবং গৃহিণ্যা ।
বিপ্রো দদর্শ চমরব্যজনেন রুক্ম-
দণ্ডেন সাত্বতপতিং পরিবীজযন্ত্যা ॥ ১৩ ॥

তং সন্নিরীক্ষ্য ভগবান্ সহসোত্থিতশ্রী-
পর্যঙ্কতঃ সকলধর্মভৃতাং বরিষ্ঠঃ ।
আনম্য পাদযুগলং শিরসা কিরীট-
জুষ্টেন সাঞ্জলিরবীবিশদাসনে স্বে ॥ ১৪ ॥

তস্যাবনিজ্য চরণৌ তদপঃ স্বমূর্ধ্না
বিভ্রজ্জগদ্গুরুতমোঽপি সতাং পতির্হি ।
ব্রহ্মণ্যদেব ইতি যদ্গুণনাম যুক্তং
তস্যৈব যচ্চরণশৌচমশেষতীর্থম্ ॥ ১৫ ॥

সম্পূজ্য দেবঋষিবর্যমৃষিঃ পুরাণো
নারাযণো নরসখো বিধিনোদিতেন ।
বাণ্যাভিভাষ্য মিতযামৃতমিষ্টযা তং
প্রাহ প্রভো ভগবতে করবাম হে কিম্ ॥ ১৬ ॥

শ্রীনারদ উবাচ
নৈবাদ্ভুতং ত্বযি বিভোঽখিললোকনাথে
মৈত্রী জনেষু সকলেষু দমঃ খলানাম্ ।
নিঃশ্রেযসায হি জগত্স্থিতিরক্ষণাভ্যাং
স্বৈরাবতার উরুগায বিদাম সুষ্ঠু ॥ ১৭ ॥

দৃষ্টং তবাঙ্ঘ্রিযুগলং জনতাপবর্গং
ব্রহ্মাদিভির্হৃদি বিচিন্ত্যমগাধবোধৈঃ ।
সংসারকূপপতিতোত্তরণাবলম্বং
ধ্যাযংশ্চরাম্যনুগৃহাণ যথা স্মৃতিঃ স্যাত্ ॥ ১৮ ॥

ততোঽন্যদাবিশদ্ গেহং কৃষ্ণপত্ন্যাঃ স নারদঃ ।
যোগেশ্বরেশ্বরস্যাঙ্গ যোগমাযাবিবিত্সযা ॥ ১৯ ॥

দীব্যন্তমক্ষৈস্তত্রাপি প্রিযযা চোদ্ধবেন চ ।
পূজিতঃ পরযা ভক্ত্যা প্রত্যুত্থানাসনাদিভিঃ ॥ ২০ ॥

পৃষ্টশ্চাবিদুষেবাসৌ কদাযাতো ভবানিতি ।
ক্রিযতে কিং নু পূর্ণানামপূর্ণৈরস্মদাদিভিঃ ॥ ২১ ॥

অথাপি ব্রূহি নো ব্রহ্মন্ জন্মৈতচ্ছোভনং কুরু ।
স তু বিস্মিত উত্থায তূষ্ণীমন্যদগাদ্ গৃহম্ ॥ ২২ ॥

তত্রাপ্যচষ্ট গোবিন্দং লালযন্তং সুতান্ শিশূন্ ।
ততোঽন্যস্মিন্ গৃহেঽপশ্যন্মজ্জনায কৃতোদ্যমম্ ॥ ২৩ ॥

জুহ্বন্তং চ বিতানাগ্নীন্ যজন্তং পঞ্চভির্মখৈঃ ।
ভোজযন্তং দ্বিজান্ ক্বাপি ভুঞ্জানমবশেষিতম্ ॥ ২৪ ॥

ক্বাপি সন্ধ্যামুপাসীনং জপন্তং ব্রহ্ম বাগ্যতম্ ।
একত্র চাসিচর্মাভ্যাং চরন্তমসিবর্ত্মসু ॥ ২৫ ॥

অশ্বৈর্গজৈ রথৈঃ ক্বাপি বিচরন্তং গদাগ্রজম্ ।
ক্বচিচ্ছযানং পর্যঙ্কে স্তূযমানং চ বন্দিভিঃ ॥ ২৬ ॥

মন্ত্রযন্তং চ কস্মিংশ্চিন্মন্ত্রিভিশ্চোদ্ধবাদিভিঃ ।
জলক্রীডারতং ক্বাপি বারমুখ্যাবলাবৃতম্ ॥ ২৭ ॥

কুত্রচিদ্দ্বিজমুখ্যেভ্যো দদতং গাঃ স্বলঙ্কৃতাঃ ।
ইতিহাসপুরাণানি শৃণ্বন্তং মঙ্গলানি চ ॥ ২৮ ॥

হসন্তং হাসকথযা কদাচিত্ প্রিযযা গৃহে ।
ক্বাপি ধর্মং সেবমানমর্থকামৌ চ কুত্রচিত্ ॥ ২৯ ॥

ধ্যাযন্তমেকমাসীনং পুরুষং প্রকৃতেঃ পরম্ ।
শুশ্রূষন্তং গুরূন্ ক্বাপি কামৈর্ভোগৈঃ সপর্যযা ॥ ৩০ ॥

কুর্বন্তং বিগ্রহং কৈশ্চিত্ সন্ধিং চান্যত্র কেশবম্ ।
কুত্রাপি সহ রামেণ চিন্তযন্তং সতাং শিবম্ ॥ ৩১ ॥

পুত্রাণাং দুহিতৃণাং চ কালে বিধ্যুপযাপনম্ ।
দারৈর্বরৈস্তত্সদৃশৈঃ কল্পযন্তং বিভূতিভিঃ ॥ ৩২ ॥

প্রস্থাপনোপনযনৈরপত্যানাং মহোত্সবান্ ।
বীক্ষ্য যোগেশ্বরেশস্য যেষাং লোকা বিসিস্মিরে ॥ ৩৩ ॥

যজন্তং সকলান্ দেবান্ ক্বাপি ক্রতুভিরূর্জিতৈঃ ।
পূর্তযন্তং ক্বচিদ্ ধর্মং কূর্পারামমঠাদিভিঃ ॥ ৩৪ ॥

চরন্তং মৃগযাং ক্বাপি হযমারুহ্য সৈন্ধবম্ ।
ঘ্নন্তং তত্র পশূন্ মেধ্যান্ পরীতং যদুপুঙ্গবৈঃ ॥ ৩৫ ॥

অব্যক্তলিঙ্গং প্রকৃতিষ্বন্তঃপুরগৃহাদিষু ।
ক্বচিচ্চরন্তং যোগেশং তত্তদ্ভাববুভুত্সযা ॥ ৩৬ ॥

অথোবাচ হৃষীকেশং নারদঃ প্রহসন্নিব ।
যোগমাযোদযং বীক্ষ্য মানুষীমীযুষো গতিম্ ॥ ৩৭ ॥

বিদাম যোগমাযাস্তে দুর্দর্শা অপি মাযিনাম্ ।
যোগেশ্বরাত্মন্ নির্ভাতা ভবত্পাদনিষেবযা ॥ ৩৮ ॥

অনুজানীহি মাং দেব লোকাংস্তে যশসাপ্লুতান্ ।
পর্যটামি তবোদ্গাযন্ লীলা ভুবনপাবনীঃ ॥ ৩৯ ॥

শ্রীভগবানুবাচ
ব্রহ্মন্ ধর্মস্য বক্তাহং কর্তা তদনুমোদিতা ।
তচ্ছিক্ষযন্ লোকমিমমাস্থিতঃ পুত্র মা খিদঃ ॥ ৪০ ॥

শ্রীশুক উবাচ
ইত্যাচরন্তং সদ্ধর্মান্ পাবনান্ গৃহমেধিনাম্ ।
তমেব সর্বগেহেষু সন্তমেকং দদর্শ হ ॥ ৪১ ॥

কৃষ্ণস্যানন্তবীর্যস্য যোগমাযামহোদযম্ ।
মুহুর্দৃষ্ট্বা ঋষিরভূদ্ বিস্মিতো জাতকৌতুকঃ ॥ ৪২ ॥

ইত্যর্থকামধর্মেষু কৃষ্ণেন শ্রদ্ধিতাত্মনা ।
সম্যক্ সভাজিতঃ প্রীতস্তমেবানুস্মরন্ যযৌ ॥ ৪৩ ॥

এবং মনুষ্যপদবীমনুবর্তমানো
নারাযণোঽখিলভবায গৃহীতশক্তিঃ ।
রেমেঽঙ্গ ষোডশসহস্রবরাঙ্গনানাং
সব্রীডসৌহৃদনিরীক্ষণহাসজুষ্টঃ ॥ ৪৪ ॥

যানীহ বিশ্ববিলযোদ্ভববৃত্তিহেতুঃ
কর্মাণ্যনন্যবিষযাণি হরিশ্চকার ।
যস্ত্বঙ্গ গাযতি শৃণোত্যনুমোদতে বা
ভক্তির্ভবেদ্ ভগবতি হ্যপবর্গমার্গে ॥ ৪৫ ॥
যস্যাত্মবুদ্ধিঃ কুণপে ত্রিধাতুকে
স্বধীঃ কলত্রাদিষু ভৌম ইজ্যধীঃ ।
যত্তীর্থবুদ্ধিঃ সলিলে ন কর্হিচিজ্
জনেষ্বভিজ্ঞেষু স এব গোখরঃ ॥