শ্রীমদ্ভাগবতম্ ১০.৮৪

শ্রীশুক উবাচ
শ্রুত্বা পৃথা সুবলপুত্র্যথ যাজ্ঞসেনী
মাধব্যথ ক্ষিতিপপত্ন্য উত স্বগোপ্যঃ ।
কৃষ্ণেঽখিলাত্মনি হরৌ প্রণযানুবন্ধং
সর্বা বিসিস্ম্যুরলমশ্রুকলাকুলাক্ষ্যঃ ॥ ১ ॥

ইতি সম্ভাষমাণাসু স্ত্রীভিঃ স্ত্রীষু নৃভির্নৃষু ।
আযযুর্মুনযস্তত্র কৃষ্ণরামদিদৃক্ষযা ॥ ২ ॥

দ্বৈপাযনো নারদশ্চ চ্যবনো দেবলোঽসিতঃ ।
বিশ্বামিত্রঃ শতানন্দো ভরদ্বাজোঽথ গৌতমঃ ॥ ৩ ॥

রামঃ সশিষ্যো ভগবান্ বসিষ্ঠো গালবো ভৃগুঃ ।
পুলস্ত্যঃ কশ্যপোঽত্রিশ্চ মার্কণ্ডেযো বৃহস্পতিঃ ॥ ৪ ॥

দ্বিতস্ত্রিতশ্চৈকতশ্চ ব্রহ্মপুত্রাস্তথাঙ্গিরাঃ ।
অগস্ত্যো যাজ্ঞবল্ক্যশ্চ বামদেবাদযোঽপরে ॥ ৫ ॥

তান্ দৃষ্ট্বা সহসোত্থায প্রাগাসীনা নৃপাদযঃ ।
পাণ্ডবাঃ কৃষ্ণরামৌ চ প্রণেমুর্বিশ্ববন্দিতান্ ॥ ৬ ॥

তানানর্চুর্যথা সর্বে সহরামোঽচ্যুতোঽর্চযত্ ।
স্বাগতাসনপাদ্যার্ঘ্যমাল্যধূপানুলেপনৈঃ ॥ ৭ ॥

উবাচসুখমাসীনান্ ভগবান্ ধর্মগুপ্তনুঃ ।
সদসস্তস্য মহতো যতবাচোঽনুশৃণ্বতঃ ॥ ৮ ॥

শ্রীভগবানুবাচ
অহো বযং জন্মভৃতো লব্ধং কার্ত্স্ন্যেন তত্ফলম্ ।
দেবানামপি দুষ্প্রাপং যদ্ যোগেশ্বরদর্শনম্ ॥ ৯ ॥

কিং স্বল্পতপসাং নৃণামর্চাযাং দেবচক্ষুষাম্ ।
দর্শনস্পর্শনপ্রশ্নপ্রহ্বপাদার্চনাদিকম্ ॥ ১০ ॥

ন হ্যম্মযানি তীর্থানি ন দেবা মৃচ্ছিলামযাঃ ।
তে পুনন্ত্যুরুকালেন দর্শনাদেব সাধবঃ ॥ ১১ ॥

নাগ্নির্ন সূর্যো ন চ চন্দ্রতারকা
ন ভূর্জলং খং শ্বসনোঽথ বাঙ্মনঃ ।
উপাসিতা ভেদকৃতো হরন্ত্যঘং
বিপশ্চিতো ঘ্নন্তি মুহূর্তসেবযা ॥ ১২ ॥

যস্যাত্মবুদ্ধিঃ কুণপে ত্রিধাতুকে
স্বধীঃ কলত্রাদিষু ভৌম ইজ্যধীঃ ।
যত্তীর্থবুদ্ধিঃ সলিলে ন কর্হিচি-
জ্জনেষ্বভিজ্ঞেষু স এব গোখরঃ ॥ ১৩ ॥

শ্রীশুক উবাচ
নিশম্যেত্থং ভগবতঃ কৃষ্ণস্যাকুণ্ঠমেধসঃ ।
বচো দুরন্বযং বিপ্রাস্তূষ্ণীমাসন্ ভ্রমদ্ধিযঃ ॥ ১৪ ॥

চিরং বিমৃশ্য মুনয ঈশ্বরস্যেশিতব্যতাম্ ।
জনসঙ্গ্রহ ইত্যূচুঃ স্মযন্তস্তং জগদ্গুরুম্ ॥ ১৫ ॥

শ্রীমুনয ঊচুঃ
যন্মাযযা তত্ত্ববিদুত্তমা বযং
বিমোহিতা বিশ্বসৃজামধীশ্বরাঃ ।
যদীশিতব্যাযতি গূঢ ঈহযা
অহো বিচিত্রং ভগবদ্বিচেষ্টিতম্ ॥ ১৬ ॥

অনীহ এতদ্ বহুধৈক আত্মনা
সৃজত্যবত্যত্তি ন বধ্যতে যথা ।
ভৌমৈর্হি ভূমির্বহুনামরূপিণী
অহো বিভূম্নশ্চরিতং বিডম্বনম্ ॥ ১৭ ॥

অথাপি কালে স্বজনাভিগুপ্তযে
বিভর্ষি সত্ত্বং খলনিগ্রহায চ ।
স্বলীলযা বেদপথং সনাতনং
বর্ণাশ্রমাত্মা পুরুষঃ পরো ভবান্ ॥ ১৮ ॥

ব্রহ্ম তে হৃদযং শুক্লং তপঃস্বাধ্যাযসংযমৈঃ ।
যত্রোপলব্ধং সদ্ ব্যক্তমব্যক্তং চ ততঃ পরম্ ॥ ১৯ ॥

তস্মাদ্ ব্রহ্মকুলং ব্রহ্মন্ শাস্ত্রযোনেস্ত্বমাত্মনঃ ।
সভাজযসি সদ্ধাম তদ্ ব্রহ্মণ্যাগ্রণীর্ভবান্ ॥ ২০ ॥

অদ্য নো জন্মসাফল্যং বিদ্যাযাস্তপসো দৃশঃ ।
ত্বযা সঙ্গম্য সদ্গত্যা যদন্তঃ শ্রেযসাং পরঃ ॥ ২১ ॥

নমস্তস্মৈ ভগবতে কৃষ্ণাযাকুণ্ঠমেধসে ।
স্বযোগমাযযাচ্ছন্নমহিম্নে পরমাত্মনে ॥ ২২ ॥

ন যং বিদন্ত্যমী ভূপা একারামাশ্চ বৃষ্ণযঃ ।
মাযাজবনিকাচ্ছন্নমাত্মানং কালমীশ্বরম্ ॥ ২৩ ॥

যথা শযানঃ পুরুষ আত্মানং গুণতত্ত্বদৃক্ ।
নামমাত্রেন্দ্রিযাভাতং ন বেদ রহিতং পরম্ ॥ ২৪ ॥

এবং ত্বা নামমাত্রেষু বিষযেষ্বিন্দ্রিযেহযা ।
মাযযা বিভ্রমচ্চিত্তো ন বেদ স্মৃত্যুপপ্লবাত্ ॥ ২৫ ॥

তস্যাদ্য তে দদৃশিমাঙ্ঘ্রিমঘৌঘমর্ষ-
তীর্থাস্পদং হৃদি কৃতং সুবিপক্বযোগৈঃ ।
উত্সিক্তভক্ত্যুপহতাশযজীবকোশা
আপুর্ভবদ্গতিমথানুগৃহাণ ভক্তান্ ॥ ২৬ ॥

শ্রীশুক উবাচ
ইত্যনুজ্ঞাপ্য দাশার্হং ধৃতরাষ্ট্রং যুধিষ্ঠিরম্ ।
রাজর্ষে স্বাশ্রমান্ গন্তুং মুনযো দধিরে মনঃ ॥ ২৭ ॥

তদ্ বীক্ষ্য তানুপব্রজ্য বসুদেবো মহাযশাঃ ।
প্রণম্য চোপসঙ্গৃহ্য বভাষেদং সুযন্ত্রিতঃ ॥ ২৮ ॥

শ্রীবসুদেব উবাচ
নমো বঃ সর্বদেবেভ্য ঋষযঃ শ্রোতুমর্হথ ।
কর্মণা কর্মনির্হারো যথা স্যান্নস্তদুচ্যতাম্ ॥ ২৯ ॥

শ্রীনারদ উবাচ
নাতিচিত্রমিদং বিপ্রা বসুদেবো বুভুত্সযা ।
কৃষ্ণং মত্বার্ভকং যন্নঃ পৃচ্ছতি শ্রেয আত্মনঃ ॥ ৩০ ॥

সন্নিকর্ষোঽত্র মর্ত্যানামনাদরণকারণম্ ।
গাঙ্গং হিত্বা যথান্যাম্ভস্তত্রত্যো যাতি শুদ্ধযে ॥ ৩১ ॥

যস্যানুভূতিঃ কালেন লযোত্পত্ত্যাদিনাস্য বৈ ।
স্বতোঽন্যস্মাচ্চ গুণতো ন কুতশ্চন রিষ্যতি ॥ ৩২ ॥

তং ক্লেশকর্মপরিপাকগুণপ্রবাহৈ-
রব্যাহতানুভবমীশ্বরমদ্বিতীযম্ ।
প্রাণাদিভিঃ স্ববিভবৈরুপগূঢমন্যো
মন্যেত সূর্যমিব মেঘহিমোপরাগৈঃ ॥ ৩৩ ॥

অথোচুর্মুনযো রাজন্নাভাষ্যানকদুন্দুভিম্ ।
সর্বেষাং শৃণ্বতাং রাজ্ঞাং তথৈবাচ্যুতরামযোঃ ॥ ৩৪ ॥

কর্মণা কর্মনির্হার এষ সাধু নিরূপিতঃ ।
যচ্ছ্রদ্ধযা যজেদ্ বিষ্ণুং সর্বযজ্ঞেশ্বরং মখৈঃ ॥ ৩৫ ॥

চিত্তস্যোপশমোঽযং বৈ কবিভিঃ শাস্ত্রচক্ষুষা ।
দর্শিতঃ সুগমো যোগো ধর্মশ্চাত্মমুদাবহঃ ॥ ৩৬ ॥

অযং স্বস্ত্যযনঃ পন্থা দ্বিজাতের্গৃহমেধিনঃ ।
যচ্ছ্রদ্ধযাপ্তবিত্তেন শুক্লেনেজ্যেত পূরুষঃ ॥ ৩৭ ॥

বিত্তৈষণাং যজ্ঞদানৈর্গৃহৈর্দারসুতৈষণাম্ ।
আত্মলোকৈষণাং দেব কালেন বিসৃজেদ্বুধঃ ।
গ্রামে ত্যক্তৈষণাঃ সর্বে যযুর্ধীরাস্তপোবনম্ ॥ ৩৮ ॥

ঋণৈস্ত্রিভির্দ্বিজো জাতো দেবর্ষিপিতৃণাং প্রভো ।
যজ্ঞাধ্যযনপুত্রৈস্তান্যনিস্তীর্য ত্যজন্ পতেত্ ॥ ৩৯ ॥

ত্বং ত্বদ্য মুক্তো দ্বাভ্যাং বৈ ঋষিপিত্রোর্মহামতে ।
যজ্ঞৈর্দেবর্ণমুন্মুচ্য নির্ঋণোঽশরণো ভব ॥ ৪০ ॥

বসুদেব ভবান্ নূনং ভক্ত্যা পরমযা হরিম্ ।
জগতামীশ্বরং প্রার্চঃ স যদ্ বাং পুত্রতাং গতঃ ॥ ৪১ ॥

শ্রীশুক উবাচ
ইতি তদ্বচনং শ্রুত্বা বসুদেবো মহামনাঃ ।
তানৃষীনৃত্বিজো বব্রে মূর্ধ্নানম্য প্রসাদ্য চ ॥ ৪২ ॥

ত এনমৃষযো রাজন্ বৃতা ধর্মেণ ধার্মিকম্ ।
তস্মিন্নযাজযন্ ক্ষেত্রে মখৈরুত্তমকল্পকৈঃ ॥ ৪৩ ॥

তদ্দীক্ষাযাং প্রবৃত্তাযাং বৃষ্ণযঃ পুষ্করস্রজঃ ।
স্নাতাঃ সুবাসসো রাজন্ রাজানঃ সুষ্ঠ্বলঙ্কৃতাঃ ॥ ৪৪ ॥

তন্মহিষ্যশ্চ মুদিতা নিষ্ককণ্ঠ্যঃ সুবাসসঃ ।
দীক্ষাশালামুপাজগ্মুরালিপ্তা বস্তুপাণযঃ ॥ ৪৫ ॥

নেদুর্মৃদঙ্গপটহশঙ্খভের্যানকাদযঃ ।
ননৃতুর্নটনর্তক্যস্তুষ্টুবুঃ সূতমাগধাঃ ।
জগুঃ সুকণ্ঠ্যো গন্ধর্ব্যঃ সঙ্গীতং সহভর্তৃকাঃ ॥ ৪৬ ॥

তমভ্যষিঞ্চন্ বিধিবদক্তমভ্যক্তমৃত্বিজঃ ।
পত্নীভিরষ্টাদশভিঃ সোমরাজমিবোডুভিঃ ॥ ৪৭ ॥

তাভির্দুকূলবলযৈর্হারনূপুরকুণ্ডলৈঃ ।
স্বলঙ্কৃতাভির্বিবভৌ দীক্ষিতোঽজিনসংবৃতঃ ॥ ৪৮ ॥

তস্যর্ত্বিজো মহারাজ রত্নকৌশেযবাসসঃ ।
সসদস্যা বিরেজুস্তে যথা বৃত্রহণোঽধ্বরে ॥ ৪৯ ॥

তদা রামশ্চ কৃষ্ণশ্চ স্বৈঃ স্বৈর্বন্ধুভিরন্বিতৌ ।
রেজতুঃ স্বসুতৈর্দারৈর্জীবেশৌ স্ববিভূতিভিঃ ॥ ৫০ ॥

ঈজেঽনুযজ্ঞং বিধিনা অগ্নিহোত্রাদিলক্ষণৈঃ ।
প্রাকৃতৈর্বৈকৃতৈর্যজ্ঞৈর্দ্রব্যজ্ঞানক্রিযেশ্বরম্ ॥ ৫১ ॥

অথর্ত্বিগ্ভ্যোঽদদাত্ কালে যথাম্নাতং স দক্ষিণাঃ ।
স্বলঙ্কৃতেভ্যোঽলঙ্কৃত্য গোভূকন্যা মহাধনাঃ ॥ ৫২ ॥

পত্নীসংযাজাবভৃথ্যৈশ্চরিত্বা তে মহর্ষযঃ ।
সস্নূ রামহ্রদে বিপ্রা যজমানপুরঃসরাঃ ॥ ৫৩ ॥

স্নাতোঽলঙ্কারবাসাংসি বন্দিভ্যোঽদাত্তথা স্ত্রিযঃ ।
ততঃ স্বলঙ্কৃতো বর্ণানাশ্বভ্যোঽন্নেন পূজযত্ ॥ ৫৪ ॥

বন্ধূন্ সদারান্ সসুতান্ পারিবর্হেণ ভূযসা ।
বিদর্ভকোশলকুরূন্ কাশিকেকযসৃঞ্জযান্ ॥ ৫৫ ॥

সদস্যর্ত্বিক্সুরগণান্ নৃভূতপিতৃচারণান্ ।
শ্রীনিকেতমনুজ্ঞাপ্য শংসন্তঃ প্রযযুঃ ক্রতুম্ ॥ ৫৬ ॥

ধৃতরাষ্ট্রোঽনুজঃ পার্থা ভীষ্মো দ্রোণঃ পৃথা যমৌ ।
নারদো ভগবান্ ব্যাসঃ সুহৃত্সম্বন্ধিবান্ধবাঃ ॥ ৫৭ ॥

বন্ধূন্ পরিষ্বজ্য যদূন্ সৌহৃদাক্লিন্নচেতসঃ ।
যযুর্বিরহকৃচ্ছ্রেণ স্বদেশাংশ্চাপরে জনাঃ ॥ ৫৮ ॥

নন্দস্তু সহ গোপালৈর্বৃহত্যা পূজযার্চিতঃ ।
কৃষ্ণরামোগ্রসেনাদ্যৈর্ন্যবাত্সীদ্ বন্ধুবত্সলঃ ॥ ৫৯ ॥

বসুদেবোঽঞ্জসোত্তীর্য মনোরথমহার্ণবম্ ।
সুহৃদ্ বৃতঃ প্রীতমনা নন্দমাহ করে স্পৃশন্ ॥ ৬০ ॥

শ্রীবসুদেব উবাচ
ভ্রাতরীশকৃতঃ পাশো নৃণাং যঃ স্নেহসংজ্ঞিতঃ ।
তং দুস্ত্যজমহং মন্যে শূরাণামপি যোগিনাম্ ॥ ৬১ ॥

অস্মাস্বপ্রতিকল্পেযং যত্ কৃতাজ্ঞেষু সত্তমৈঃ ।
মৈত্র্যর্পিতাফলা চাপি ন নিবর্তেত কর্হিচিত্ ॥ ৬২ ॥

প্রাগকল্পাচ্চ কুশলং ভ্রাতর্বো নাচরাম হি ।
অধুনা শ্রীমদান্ধাক্ষা ন পশ্যামঃ পুরঃ সতঃ ॥ ৬৩ ॥

মা রাজ্যশ্রীরভূত্ পুংসঃ শ্রেযস্কামস্য মানদ ।
স্বজনানুত বন্ধূন্ বা ন পশ্যতি যযান্ধদৃক্ ॥ ৬৪ ॥

শ্রীশুক উবাচ
এবং সৌহৃদশৈথিল্যচিত্ত আনকদুন্দুভিঃ ।
রুরোদ তত্কৃতাং মৈত্রীং স্মরন্নশ্রুবিলোচনঃ ॥ ৬৫ ॥

নন্দস্তু সখ্যুঃ প্রিযকৃত্ প্রেম্ণা গোবিন্দরামযোঃ ।
অদ্য শ্ব ইতি মাসাংস্ত্রীন্ যদুভির্মানিতোঽবসত্ ॥ ৬৬ ॥

ততঃ কামৈঃ পূর্যমাণঃ সব্রজঃ সহবান্ধবঃ ।
পরার্ধ্যাভরণক্ষৌমনানানর্ঘ্যপরিচ্ছদৈঃ ॥ ৬৭ ॥

বসুদেবোগ্রসেনাভ্যাং কৃষ্ণোদ্ধববলাদিভিঃ ।
দত্তমাদায পারিবর্হং যাপিতো যদুভির্যযৌ ॥ ৬৮ ॥

নন্দো গোপাশ্চ গোপ্যশ্চ গোবিন্দচরণাম্বুজে ।
মনঃ ক্ষিপ্তং পুনর্হর্তুমনীশা মথুরাং যযুঃ ॥ ৬৯ ॥

বন্ধুষু প্রতিযাতেষু বৃষ্ণযঃ কৃষ্ণদেবতাঃ ।
বীক্ষ্য প্রাবৃষমাসন্নাদ্ যযুর্দ্বারবতীং পুনঃ ॥ ৭০ ॥

জনেভ্যঃ কথযাং চক্রুর্যদুদেবমহোত্সবম্ ।
যদাসীত্তীর্থযাত্রাযাং সুহৃত্সন্দর্শনাদিকম্ ॥ ৭১ ॥