ଶ୍ରୀମଦ୍ଭାଗଵତମ୍ ୧୦.୮୪

ଶ୍ରୀଶୁକ ଉଵାଚ
ଶ୍ରୁତ୍ଵା ପୃଥା ସୁବଲପୁତ୍ର୍ଯଥ ଯାଜ୍ଞସେନୀ
ମାଧଵ୍ଯଥ କ୍ଷିତିପପତ୍ନ୍ଯ ଉତ ସ୍ଵଗୋପ୍ଯଃ ।
କୃଷ୍ଣେଽଖିଲାତ୍ମନି ହରୌ ପ୍ରଣଯାନୁବନ୍ଧଂ
ସର୍ଵା ଵିସିସ୍ମ୍ଯୁରଲମଶ୍ରୁକଲାକୁଲାକ୍ଷ୍ଯଃ ॥ ୧ ॥

ଇତି ସମ୍ଭାଷମାଣାସୁ ସ୍ତ୍ରୀଭିଃ ସ୍ତ୍ରୀଷୁ ନୃଭିର୍ନୃଷୁ ।
ଆଯଯୁର୍ମୁନଯସ୍ତତ୍ର କୃଷ୍ଣରାମଦିଦୃକ୍ଷଯା ॥ ୨ ॥

ଦ୍ଵୈପାଯନୋ ନାରଦଶ୍ଚ ଚ୍ଯଵନୋ ଦେଵଲୋଽସିତଃ ।
ଵିଶ୍ଵାମିତ୍ରଃ ଶତାନନ୍ଦୋ ଭରଦ୍ଵାଜୋଽଥ ଗୌତମଃ ॥ ୩ ॥

ରାମଃ ସଶିଷ୍ଯୋ ଭଗଵାନ୍ ଵସିଷ୍ଠୋ ଗାଲଵୋ ଭୃଗୁଃ ।
ପୁଲସ୍ତ୍ଯଃ କଶ୍ଯପୋଽତ୍ରିଶ୍ଚ ମାର୍କଣ୍ଡେଯୋ ବୃହସ୍ପତିଃ ॥ ୪ ॥

ଦ୍ଵିତସ୍ତ୍ରିତଶ୍ଚୈକତଶ୍ଚ ବ୍ରହ୍ମପୁତ୍ରାସ୍ତଥାଙ୍ଗିରାଃ ।
ଅଗସ୍ତ୍ଯୋ ଯାଜ୍ଞଵଲ୍କ୍ଯଶ୍ଚ ଵାମଦେଵାଦଯୋଽପରେ ॥ ୫ ॥

ତାନ୍ ଦୃଷ୍ଟ୍ଵା ସହସୋତ୍ଥାଯ ପ୍ରାଗାସୀନା ନୃପାଦଯଃ ।
ପାଣ୍ଡଵାଃ କୃଷ୍ଣରାମୌ ଚ ପ୍ରଣେମୁର୍ଵିଶ୍ଵଵନ୍ଦିତାନ୍ ॥ ୬ ॥

ତାନାନର୍ଚୁର୍ଯଥା ସର୍ଵେ ସହରାମୋଽଚ୍ଯୁତୋଽର୍ଚଯତ୍ ।
ସ୍ଵାଗତାସନପାଦ୍ଯାର୍ଘ୍ଯମାଲ୍ଯଧୂପାନୁଲେପନୈଃ ॥ ୭ ॥

ଉଵାଚସୁଖମାସୀନାନ୍ ଭଗଵାନ୍ ଧର୍ମଗୁପ୍ତନୁଃ ।
ସଦସସ୍ତସ୍ଯ ମହତୋ ଯତଵାଚୋଽନୁଶୃଣ୍ଵତଃ ॥ ୮ ॥

ଶ୍ରୀଭଗଵାନୁଵାଚ
ଅହୋ ଵଯଂ ଜନ୍ମଭୃତୋ ଲବ୍ଧଂ କାର୍ତ୍ସ୍ନ୍ଯେନ ତତ୍ଫଲମ୍ ।
ଦେଵାନାମପି ଦୁଷ୍ପ୍ରାପଂ ଯଦ୍ ଯୋଗେଶ୍ଵରଦର୍ଶନମ୍ ॥ ୯ ॥

କିଂ ସ୍ଵଲ୍ପତପସାଂ ନୃଣାମର୍ଚାଯାଂ ଦେଵଚକ୍ଷୁଷାମ୍ ।
ଦର୍ଶନସ୍ପର୍ଶନପ୍ରଶ୍ନପ୍ରହ୍ଵପାଦାର୍ଚନାଦିକମ୍ ॥ ୧୦ ॥

ନ ହ୍ଯମ୍ମଯାନି ତୀର୍ଥାନି ନ ଦେଵା ମୃଚ୍ଛିଲାମଯାଃ ।
ତେ ପୁନନ୍ତ୍ଯୁରୁକାଲେନ ଦର୍ଶନାଦେଵ ସାଧଵଃ ॥ ୧୧ ॥

ନାଗ୍ନିର୍ନ ସୂର୍ଯୋ ନ ଚ ଚନ୍ଦ୍ରତାରକା
ନ ଭୂର୍ଜଲଂ ଖଂ ଶ୍ଵସନୋଽଥ ଵାଙ୍ମନଃ ।
ଉପାସିତା ଭେଦକୃତୋ ହରନ୍ତ୍ଯଘଂ
ଵିପଶ୍ଚିତୋ ଘ୍ନନ୍ତି ମୁହୂର୍ତସେଵଯା ॥ ୧୨ ॥

ଯସ୍ଯାତ୍ମବୁଦ୍ଧିଃ କୁଣପେ ତ୍ରିଧାତୁକେ
ସ୍ଵଧୀଃ କଲତ୍ରାଦିଷୁ ଭୌମ ଇଜ୍ଯଧୀଃ ।
ଯତ୍ତୀର୍ଥବୁଦ୍ଧିଃ ସଲିଲେ ନ କର୍ହିଚି-
ଜ୍ଜନେଷ୍ଵଭିଜ୍ଞେଷୁ ସ ଏଵ ଗୋଖରଃ ॥ ୧୩ ॥

ଶ୍ରୀଶୁକ ଉଵାଚ
ନିଶମ୍ଯେତ୍ଥଂ ଭଗଵତଃ କୃଷ୍ଣସ୍ଯାକୁଣ୍ଠମେଧସଃ ।
ଵଚୋ ଦୁରନ୍ଵଯଂ ଵିପ୍ରାସ୍ତୂଷ୍ଣୀମାସନ୍ ଭ୍ରମଦ୍ଧିଯଃ ॥ ୧୪ ॥

ଚିରଂ ଵିମୃଶ୍ଯ ମୁନଯ ଈଶ୍ଵରସ୍ଯେଶିତଵ୍ଯତାମ୍ ।
ଜନସଙ୍ଗ୍ରହ ଇତ୍ଯୂଚୁଃ ସ୍ମଯନ୍ତସ୍ତଂ ଜଗଦ୍ଗୁରୁମ୍ ॥ ୧୫ ॥

ଶ୍ରୀମୁନଯ ଊଚୁଃ
ଯନ୍ମାଯଯା ତତ୍ତ୍ଵଵିଦୁତ୍ତମା ଵଯଂ
ଵିମୋହିତା ଵିଶ୍ଵସୃଜାମଧୀଶ୍ଵରାଃ ।
ଯଦୀଶିତଵ୍ଯାଯତି ଗୂଢ ଈହଯା
ଅହୋ ଵିଚିତ୍ରଂ ଭଗଵଦ୍ଵିଚେଷ୍ଟିତମ୍ ॥ ୧୬ ॥

ଅନୀହ ଏତଦ୍ ବହୁଧୈକ ଆତ୍ମନା
ସୃଜତ୍ଯଵତ୍ଯତ୍ତି ନ ବଧ୍ଯତେ ଯଥା ।
ଭୌମୈର୍ହି ଭୂମିର୍ବହୁନାମରୂପିଣୀ
ଅହୋ ଵିଭୂମ୍ନଶ୍ଚରିତଂ ଵିଡମ୍ବନମ୍ ॥ ୧୭ ॥

ଅଥାପି କାଲେ ସ୍ଵଜନାଭିଗୁପ୍ତଯେ
ବିଭର୍ଷି ସତ୍ତ୍ଵଂ ଖଲନିଗ୍ରହାଯ ଚ ।
ସ୍ଵଲୀଲଯା ଵେଦପଥଂ ସନାତନଂ
ଵର୍ଣାଶ୍ରମାତ୍ମା ପୁରୁଷଃ ପରୋ ଭଵାନ୍ ॥ ୧୮ ॥

ବ୍ରହ୍ମ ତେ ହୃଦଯଂ ଶୁକ୍ଲଂ ତପଃସ୍ଵାଧ୍ଯାଯସଂଯମୈଃ ।
ଯତ୍ରୋପଲବ୍ଧଂ ସଦ୍ ଵ୍ଯକ୍ତମଵ୍ଯକ୍ତଂ ଚ ତତଃ ପରମ୍ ॥ ୧୯ ॥

ତସ୍ମାଦ୍ ବ୍ରହ୍ମକୁଲଂ ବ୍ରହ୍ମନ୍ ଶାସ୍ତ୍ରଯୋନେସ୍ତ୍ଵମାତ୍ମନଃ ।
ସଭାଜଯସି ସଦ୍ଧାମ ତଦ୍ ବ୍ରହ୍ମଣ୍ଯାଗ୍ରଣୀର୍ଭଵାନ୍ ॥ ୨୦ ॥

ଅଦ୍ଯ ନୋ ଜନ୍ମସାଫଲ୍ଯଂ ଵିଦ୍ଯାଯାସ୍ତପସୋ ଦୃଶଃ ।
ତ୍ଵଯା ସଙ୍ଗମ୍ଯ ସଦ୍ଗତ୍ଯା ଯଦନ୍ତଃ ଶ୍ରେଯସାଂ ପରଃ ॥ ୨୧ ॥

ନମସ୍ତସ୍ମୈ ଭଗଵତେ କୃଷ୍ଣାଯାକୁଣ୍ଠମେଧସେ ।
ସ୍ଵଯୋଗମାଯଯାଚ୍ଛନ୍ନମହିମ୍ନେ ପରମାତ୍ମନେ ॥ ୨୨ ॥

ନ ଯଂ ଵିଦନ୍ତ୍ଯମୀ ଭୂପା ଏକାରାମାଶ୍ଚ ଵୃଷ୍ଣଯଃ ।
ମାଯାଜଵନିକାଚ୍ଛନ୍ନମାତ୍ମାନଂ କାଲମୀଶ୍ଵରମ୍ ॥ ୨୩ ॥

ଯଥା ଶଯାନଃ ପୁରୁଷ ଆତ୍ମାନଂ ଗୁଣତତ୍ତ୍ଵଦୃକ୍ ।
ନାମମାତ୍ରେନ୍ଦ୍ରିଯାଭାତଂ ନ ଵେଦ ରହିତଂ ପରମ୍ ॥ ୨୪ ॥

ଏଵଂ ତ୍ଵା ନାମମାତ୍ରେଷୁ ଵିଷଯେଷ୍ଵିନ୍ଦ୍ରିଯେହଯା ।
ମାଯଯା ଵିଭ୍ରମଚ୍ଚିତ୍ତୋ ନ ଵେଦ ସ୍ମୃତ୍ଯୁପପ୍ଲଵାତ୍ ॥ ୨୫ ॥

ତସ୍ଯାଦ୍ଯ ତେ ଦଦୃଶିମାଙ୍ଘ୍ରିମଘୌଘମର୍ଷ-
ତୀର୍ଥାସ୍ପଦଂ ହୃଦି କୃତଂ ସୁଵିପକ୍ଵଯୋଗୈଃ ।
ଉତ୍ସିକ୍ତଭକ୍ତ୍ଯୁପହତାଶଯଜୀଵକୋଶା
ଆପୁର୍ଭଵଦ୍ଗତିମଥାନୁଗୃହାଣ ଭକ୍ତାନ୍ ॥ ୨୬ ॥

ଶ୍ରୀଶୁକ ଉଵାଚ
ଇତ୍ଯନୁଜ୍ଞାପ୍ଯ ଦାଶାର୍ହଂ ଧୃତରାଷ୍ଟ୍ରଂ ଯୁଧିଷ୍ଠିରମ୍ ।
ରାଜର୍ଷେ ସ୍ଵାଶ୍ରମାନ୍ ଗନ୍ତୁଂ ମୁନଯୋ ଦଧିରେ ମନଃ ॥ ୨୭ ॥

ତଦ୍ ଵୀକ୍ଷ୍ଯ ତାନୁପଵ୍ରଜ୍ଯ ଵସୁଦେଵୋ ମହାଯଶାଃ ।
ପ୍ରଣମ୍ଯ ଚୋପସଙ୍ଗୃହ୍ଯ ବଭାଷେଦଂ ସୁଯନ୍ତ୍ରିତଃ ॥ ୨୮ ॥

ଶ୍ରୀଵସୁଦେଵ ଉଵାଚ
ନମୋ ଵଃ ସର୍ଵଦେଵେଭ୍ଯ ଋଷଯଃ ଶ୍ରୋତୁମର୍ହଥ ।
କର୍ମଣା କର୍ମନିର୍ହାରୋ ଯଥା ସ୍ଯାନ୍ନସ୍ତଦୁଚ୍ଯତାମ୍ ॥ ୨୯ ॥

ଶ୍ରୀନାରଦ ଉଵାଚ
ନାତିଚିତ୍ରମିଦଂ ଵିପ୍ରା ଵସୁଦେଵୋ ବୁଭୁତ୍ସଯା ।
କୃଷ୍ଣଂ ମତ୍ଵାର୍ଭକଂ ଯନ୍ନଃ ପୃଚ୍ଛତି ଶ୍ରେଯ ଆତ୍ମନଃ ॥ ୩୦ ॥

ସନ୍ନିକର୍ଷୋଽତ୍ର ମର୍ତ୍ଯାନାମନାଦରଣକାରଣମ୍ ।
ଗାଙ୍ଗଂ ହିତ୍ଵା ଯଥାନ୍ଯାମ୍ଭସ୍ତତ୍ରତ୍ଯୋ ଯାତି ଶୁଦ୍ଧଯେ ॥ ୩୧ ॥

ଯସ୍ଯାନୁଭୂତିଃ କାଲେନ ଲଯୋତ୍ପତ୍ତ୍ଯାଦିନାସ୍ଯ ଵୈ ।
ସ୍ଵତୋଽନ୍ଯସ୍ମାଚ୍ଚ ଗୁଣତୋ ନ କୁତଶ୍ଚନ ରିଷ୍ଯତି ॥ ୩୨ ॥

ତଂ କ୍ଲେଶକର୍ମପରିପାକଗୁଣପ୍ରଵାହୈ-
ରଵ୍ଯାହତାନୁଭଵମୀଶ୍ଵରମଦ୍ଵିତୀଯମ୍ ।
ପ୍ରାଣାଦିଭିଃ ସ୍ଵଵିଭଵୈରୁପଗୂଢମନ୍ଯୋ
ମନ୍ଯେତ ସୂର୍ଯମିଵ ମେଘହିମୋପରାଗୈଃ ॥ ୩୩ ॥

ଅଥୋଚୁର୍ମୁନଯୋ ରାଜନ୍ନାଭାଷ୍ଯାନକଦୁନ୍ଦୁଭିମ୍ ।
ସର୍ଵେଷାଂ ଶୃଣ୍ଵତାଂ ରାଜ୍ଞାଂ ତଥୈଵାଚ୍ଯୁତରାମଯୋଃ ॥ ୩୪ ॥

କର୍ମଣା କର୍ମନିର୍ହାର ଏଷ ସାଧୁ ନିରୂପିତଃ ।
ଯଚ୍ଛ୍ରଦ୍ଧଯା ଯଜେଦ୍ ଵିଷ୍ଣୁଂ ସର୍ଵଯଜ୍ଞେଶ୍ଵରଂ ମଖୈଃ ॥ ୩୫ ॥

ଚିତ୍ତସ୍ଯୋପଶମୋଽଯଂ ଵୈ କଵିଭିଃ ଶାସ୍ତ୍ରଚକ୍ଷୁଷା ।
ଦର୍ଶିତଃ ସୁଗମୋ ଯୋଗୋ ଧର୍ମଶ୍ଚାତ୍ମମୁଦାଵହଃ ॥ ୩୬ ॥

ଅଯଂ ସ୍ଵସ୍ତ୍ଯଯନଃ ପନ୍ଥା ଦ୍ଵିଜାତେର୍ଗୃହମେଧିନଃ ।
ଯଚ୍ଛ୍ରଦ୍ଧଯାପ୍ତଵିତ୍ତେନ ଶୁକ୍ଲେନେଜ୍ଯେତ ପୂରୁଷଃ ॥ ୩୭ ॥

ଵିତ୍ତୈଷଣାଂ ଯଜ୍ଞଦାନୈର୍ଗୃହୈର୍ଦାରସୁତୈଷଣାମ୍ ।
ଆତ୍ମଲୋକୈଷଣାଂ ଦେଵ କାଲେନ ଵିସୃଜେଦ୍ବୁଧଃ ।
ଗ୍ରାମେ ତ୍ଯକ୍ତୈଷଣାଃ ସର୍ଵେ ଯଯୁର୍ଧୀରାସ୍ତପୋଵନମ୍ ॥ ୩୮ ॥

ଋଣୈସ୍ତ୍ରିଭିର୍ଦ୍ଵିଜୋ ଜାତୋ ଦେଵର୍ଷିପିତୃଣାଂ ପ୍ରଭୋ ।
ଯଜ୍ଞାଧ୍ଯଯନପୁତ୍ରୈସ୍ତାନ୍ଯନିସ୍ତୀର୍ଯ ତ୍ଯଜନ୍ ପତେତ୍ ॥ ୩୯ ॥

ତ୍ଵଂ ତ୍ଵଦ୍ଯ ମୁକ୍ତୋ ଦ୍ଵାଭ୍ଯାଂ ଵୈ ଋଷିପିତ୍ରୋର୍ମହାମତେ ।
ଯଜ୍ଞୈର୍ଦେଵର୍ଣମୁନ୍ମୁଚ୍ଯ ନିର୍ଋଣୋଽଶରଣୋ ଭଵ ॥ ୪୦ ॥

ଵସୁଦେଵ ଭଵାନ୍ ନୂନଂ ଭକ୍ତ୍ଯା ପରମଯା ହରିମ୍ ।
ଜଗତାମୀଶ୍ଵରଂ ପ୍ରାର୍ଚଃ ସ ଯଦ୍ ଵାଂ ପୁତ୍ରତାଂ ଗତଃ ॥ ୪୧ ॥

ଶ୍ରୀଶୁକ ଉଵାଚ
ଇତି ତଦ୍ଵଚନଂ ଶ୍ରୁତ୍ଵା ଵସୁଦେଵୋ ମହାମନାଃ ।
ତାନୃଷୀନୃତ୍ଵିଜୋ ଵଵ୍ରେ ମୂର୍ଧ୍ନାନମ୍ଯ ପ୍ରସାଦ୍ଯ ଚ ॥ ୪୨ ॥

ତ ଏନମୃଷଯୋ ରାଜନ୍ ଵୃତା ଧର୍ମେଣ ଧାର୍ମିକମ୍ ।
ତସ୍ମିନ୍ନଯାଜଯନ୍ କ୍ଷେତ୍ରେ ମଖୈରୁତ୍ତମକଲ୍ପକୈଃ ॥ ୪୩ ॥

ତଦ୍ଦୀକ୍ଷାଯାଂ ପ୍ରଵୃତ୍ତାଯାଂ ଵୃଷ୍ଣଯଃ ପୁଷ୍କରସ୍ରଜଃ ।
ସ୍ନାତାଃ ସୁଵାସସୋ ରାଜନ୍ ରାଜାନଃ ସୁଷ୍ଠ୍ଵଲଙ୍କୃତାଃ ॥ ୪୪ ॥

ତନ୍ମହିଷ୍ଯଶ୍ଚ ମୁଦିତା ନିଷ୍କକଣ୍ଠ୍ଯଃ ସୁଵାସସଃ ।
ଦୀକ୍ଷାଶାଲାମୁପାଜଗ୍ମୁରାଲିପ୍ତା ଵସ୍ତୁପାଣଯଃ ॥ ୪୫ ॥

ନେଦୁର୍ମୃଦଙ୍ଗପଟହଶଙ୍ଖଭେର୍ଯାନକାଦଯଃ ।
ନନୃତୁର୍ନଟନର୍ତକ୍ଯସ୍ତୁଷ୍ଟୁଵୁଃ ସୂତମାଗଧାଃ ।
ଜଗୁଃ ସୁକଣ୍ଠ୍ଯୋ ଗନ୍ଧର୍ଵ୍ଯଃ ସଙ୍ଗୀତଂ ସହଭର୍ତୃକାଃ ॥ ୪୬ ॥

ତମଭ୍ଯଷିଞ୍ଚନ୍ ଵିଧିଵଦକ୍ତମଭ୍ଯକ୍ତମୃତ୍ଵିଜଃ ।
ପତ୍ନୀଭିରଷ୍ଟାଦଶଭିଃ ସୋମରାଜମିଵୋଡୁଭିଃ ॥ ୪୭ ॥

ତାଭିର୍ଦୁକୂଲଵଲଯୈର୍ହାରନୂପୁରକୁଣ୍ଡଲୈଃ ।
ସ୍ଵଲଙ୍କୃତାଭିର୍ଵିବଭୌ ଦୀକ୍ଷିତୋଽଜିନସଂଵୃତଃ ॥ ୪୮ ॥

ତସ୍ଯର୍ତ୍ଵିଜୋ ମହାରାଜ ରତ୍ନକୌଶେଯଵାସସଃ ।
ସସଦସ୍ଯା ଵିରେଜୁସ୍ତେ ଯଥା ଵୃତ୍ରହଣୋଽଧ୍ଵରେ ॥ ୪୯ ॥

ତଦା ରାମଶ୍ଚ କୃଷ୍ଣଶ୍ଚ ସ୍ଵୈଃ ସ୍ଵୈର୍ବନ୍ଧୁଭିରନ୍ଵିତୌ ।
ରେଜତୁଃ ସ୍ଵସୁତୈର୍ଦାରୈର୍ଜୀଵେଶୌ ସ୍ଵଵିଭୂତିଭିଃ ॥ ୫୦ ॥

ଈଜେଽନୁଯଜ୍ଞଂ ଵିଧିନା ଅଗ୍ନିହୋତ୍ରାଦିଲକ୍ଷଣୈଃ ।
ପ୍ରାକୃତୈର୍ଵୈକୃତୈର୍ଯଜ୍ଞୈର୍ଦ୍ରଵ୍ଯଜ୍ଞାନକ୍ରିଯେଶ୍ଵରମ୍ ॥ ୫୧ ॥

ଅଥର୍ତ୍ଵିଗ୍ଭ୍ଯୋଽଦଦାତ୍ କାଲେ ଯଥାମ୍ନାତଂ ସ ଦକ୍ଷିଣାଃ ।
ସ୍ଵଲଙ୍କୃତେଭ୍ଯୋଽଲଙ୍କୃତ୍ଯ ଗୋଭୂକନ୍ଯା ମହାଧନାଃ ॥ ୫୨ ॥

ପତ୍ନୀସଂଯାଜାଵଭୃଥ୍ଯୈଶ୍ଚରିତ୍ଵା ତେ ମହର୍ଷଯଃ ।
ସସ୍ନୂ ରାମହ୍ରଦେ ଵିପ୍ରା ଯଜମାନପୁରଃସରାଃ ॥ ୫୩ ॥

ସ୍ନାତୋଽଲଙ୍କାରଵାସାଂସି ଵନ୍ଦିଭ୍ଯୋଽଦାତ୍ତଥା ସ୍ତ୍ରିଯଃ ।
ତତଃ ସ୍ଵଲଙ୍କୃତୋ ଵର୍ଣାନାଶ୍ଵଭ୍ଯୋଽନ୍ନେନ ପୂଜଯତ୍ ॥ ୫୪ ॥

ବନ୍ଧୂନ୍ ସଦାରାନ୍ ସସୁତାନ୍ ପାରିବର୍ହେଣ ଭୂଯସା ।
ଵିଦର୍ଭକୋଶଲକୁରୂନ୍ କାଶିକେକଯସୃଞ୍ଜଯାନ୍ ॥ ୫୫ ॥

ସଦସ୍ଯର୍ତ୍ଵିକ୍ସୁରଗଣାନ୍ ନୃଭୂତପିତୃଚାରଣାନ୍ ।
ଶ୍ରୀନିକେତମନୁଜ୍ଞାପ୍ଯ ଶଂସନ୍ତଃ ପ୍ରଯଯୁଃ କ୍ରତୁମ୍ ॥ ୫୬ ॥

ଧୃତରାଷ୍ଟ୍ରୋଽନୁଜଃ ପାର୍ଥା ଭୀଷ୍ମୋ ଦ୍ରୋଣଃ ପୃଥା ଯମୌ ।
ନାରଦୋ ଭଗଵାନ୍ ଵ୍ଯାସଃ ସୁହୃତ୍ସମ୍ବନ୍ଧିବାନ୍ଧଵାଃ ॥ ୫୭ ॥

ବନ୍ଧୂନ୍ ପରିଷ୍ଵଜ୍ଯ ଯଦୂନ୍ ସୌହୃଦାକ୍ଲିନ୍ନଚେତସଃ ।
ଯଯୁର୍ଵିରହକୃଚ୍ଛ୍ରେଣ ସ୍ଵଦେଶାଂଶ୍ଚାପରେ ଜନାଃ ॥ ୫୮ ॥

ନନ୍ଦସ୍ତୁ ସହ ଗୋପାଲୈର୍ବୃହତ୍ଯା ପୂଜଯାର୍ଚିତଃ ।
କୃଷ୍ଣରାମୋଗ୍ରସେନାଦ୍ଯୈର୍ନ୍ଯଵାତ୍ସୀଦ୍ ବନ୍ଧୁଵତ୍ସଲଃ ॥ ୫୯ ॥

ଵସୁଦେଵୋଽଞ୍ଜସୋତ୍ତୀର୍ଯ ମନୋରଥମହାର୍ଣଵମ୍ ।
ସୁହୃଦ୍ ଵୃତଃ ପ୍ରୀତମନା ନନ୍ଦମାହ କରେ ସ୍ପୃଶନ୍ ॥ ୬୦ ॥

ଶ୍ରୀଵସୁଦେଵ ଉଵାଚ
ଭ୍ରାତରୀଶକୃତଃ ପାଶୋ ନୃଣାଂ ଯଃ ସ୍ନେହସଂଜ୍ଞିତଃ ।
ତଂ ଦୁସ୍ତ୍ଯଜମହଂ ମନ୍ଯେ ଶୂରାଣାମପି ଯୋଗିନାମ୍ ॥ ୬୧ ॥

ଅସ୍ମାସ୍ଵପ୍ରତିକଲ୍ପେଯଂ ଯତ୍ କୃତାଜ୍ଞେଷୁ ସତ୍ତମୈଃ ।
ମୈତ୍ର୍ଯର୍ପିତାଫଲା ଚାପି ନ ନିଵର୍ତେତ କର୍ହିଚିତ୍ ॥ ୬୨ ॥

ପ୍ରାଗକଲ୍ପାଚ୍ଚ କୁଶଲଂ ଭ୍ରାତର୍ଵୋ ନାଚରାମ ହି ।
ଅଧୁନା ଶ୍ରୀମଦାନ୍ଧାକ୍ଷା ନ ପଶ୍ଯାମଃ ପୁରଃ ସତଃ ॥ ୬୩ ॥

ମା ରାଜ୍ଯଶ୍ରୀରଭୂତ୍ ପୁଂସଃ ଶ୍ରେଯସ୍କାମସ୍ଯ ମାନଦ ।
ସ୍ଵଜନାନୁତ ବନ୍ଧୂନ୍ ଵା ନ ପଶ୍ଯତି ଯଯାନ୍ଧଦୃକ୍ ॥ ୬୪ ॥

ଶ୍ରୀଶୁକ ଉଵାଚ
ଏଵଂ ସୌହୃଦଶୈଥିଲ୍ଯଚିତ୍ତ ଆନକଦୁନ୍ଦୁଭିଃ ।
ରୁରୋଦ ତତ୍କୃତାଂ ମୈତ୍ରୀଂ ସ୍ମରନ୍ନଶ୍ରୁଵିଲୋଚନଃ ॥ ୬୫ ॥

ନନ୍ଦସ୍ତୁ ସଖ୍ଯୁଃ ପ୍ରିଯକୃତ୍ ପ୍ରେମ୍ଣା ଗୋଵିନ୍ଦରାମଯୋଃ ।
ଅଦ୍ଯ ଶ୍ଵ ଇତି ମାସାଂସ୍ତ୍ରୀନ୍ ଯଦୁଭିର୍ମାନିତୋଽଵସତ୍ ॥ ୬୬ ॥

ତତଃ କାମୈଃ ପୂର୍ଯମାଣଃ ସଵ୍ରଜଃ ସହବାନ୍ଧଵଃ ।
ପରାର୍ଧ୍ଯାଭରଣକ୍ଷୌମନାନାନର୍ଘ୍ଯପରିଚ୍ଛଦୈଃ ॥ ୬୭ ॥

ଵସୁଦେଵୋଗ୍ରସେନାଭ୍ଯାଂ କୃଷ୍ଣୋଦ୍ଧଵବଲାଦିଭିଃ ।
ଦତ୍ତମାଦାଯ ପାରିବର୍ହଂ ଯାପିତୋ ଯଦୁଭିର୍ଯଯୌ ॥ ୬୮ ॥

ନନ୍ଦୋ ଗୋପାଶ୍ଚ ଗୋପ୍ଯଶ୍ଚ ଗୋଵିନ୍ଦଚରଣାମ୍ବୁଜେ ।
ମନଃ କ୍ଷିପ୍ତଂ ପୁନର୍ହର୍ତୁମନୀଶା ମଥୁରାଂ ଯଯୁଃ ॥ ୬୯ ॥

ବନ୍ଧୁଷୁ ପ୍ରତିଯାତେଷୁ ଵୃଷ୍ଣଯଃ କୃଷ୍ଣଦେଵତାଃ ।
ଵୀକ୍ଷ୍ଯ ପ୍ରାଵୃଷମାସନ୍ନାଦ୍ ଯଯୁର୍ଦ୍ଵାରଵତୀଂ ପୁନଃ ॥ ୭୦ ॥

ଜନେଭ୍ଯଃ କଥଯାଂ ଚକ୍ରୁର୍ଯଦୁଦେଵମହୋତ୍ସଵମ୍ ।
ଯଦାସୀତ୍ତୀର୍ଥଯାତ୍ରାଯାଂ ସୁହୃତ୍ସନ୍ଦର୍ଶନାଦିକମ୍ ॥ ୭୧ ॥