শ্রীমদ্ভাগবতম্ ১০.৮৫

শ্রীবাদরাযণিরুবাচ
অথৈকদাত্মজৌ প্রাপ্তৌ কৃতপাদাভিবন্দনৌ ।
বসুদেবোঽভিনন্দ্যাহ প্রীত্যা সঙ্কর্ষণাচ্যুতৌ ॥ ১ ॥

মুনীনাং স বচঃ শ্রুত্বা পুত্রযোর্ধামসূচকম্ ।
তদ্বীর্যৈর্জাতবিশ্রম্ভঃ পরিভাষ্যাভ্যভাষত ॥ ২ ॥

কৃষ্ণ কৃষ্ণ মহাযোগিন্ সঙ্কর্ষণ সনাতন ।
জানে বামস্য যত্ সাক্ষাত্ প্রধানপুরুষৌ পরৌ ॥ ৩ ॥

যত্র যেন যতো যস্য যস্মৈ যদ্ যদ্ যথা যদা ।
স্যাদিদং ভগবান্ সাক্ষাত্ প্রধানপুরুষেশ্বরঃ ॥ ৪ ॥

এতন্নানাবিধং বিশ্বমাত্মসৃষ্টমধোক্ষজ ।
আত্মনানুপ্রবিশ্যাত্মন্ প্রাণো জীবো বিভর্ষ্যজ ॥ ৫ ॥

প্রাণাদীনাং বিশ্বসৃজাং শক্তযো যাঃ পরস্য তাঃ ।
পারতন্ত্র্যাদ্ বৈসাদৃশ্যাদ্ দ্বযোশ্চেষ্টৈব চেষ্টতাম্ ॥ ৬ ॥

কান্তিস্তেজঃ প্রভা সত্তা চন্দ্রাগ্ন্যর্কর্ক্ষবিদ্যুতাম্ ।
যত্ স্থৈর্যং ভূভৃতাং ভূমের্বৃত্তির্গন্ধোঽর্থতো ভবান্ ॥ ৭ ॥

তর্পণং প্রাণনমপাং দেবত্বং তাশ্চ তদ্রসঃ ।
ওজঃ সহো বলং চেষ্টা গতির্বাযোস্তবেশ্বর ॥ ৮ ॥

দিশাং ত্বমবকাশোঽসি দিশঃ খং স্ফোট আশ্রযঃ ।
নাদো বর্ণস্ত্বম্ ওঁকার আকৃতীনাং পৃথক্কৃতিঃ ॥ ৯ ॥

ইন্দ্রিযং ত্বিন্দ্রিযাণাং ত্বং দেবাশ্চ তদনুগ্রহঃ ।
অববোধো ভবান্ বুদ্ধের্জীবস্যানুস্মৃতিঃ সতী ॥ ১০ ॥

ভূতানামসি ভূতাদিরিন্দ্রিযাণাং চ তৈজসঃ ।
বৈকারিকো বিকল্পানাং প্রধানমনুশাযিনম্ ॥ ১১ ॥

নশ্বরেষ্বিহ ভাবেষু তদসি ত্বমনশ্বরম্ ।
যথা দ্রব্যবিকারেষু দ্রব্যমাত্রং নিরূপিতম্ ॥ ১২ ॥

সত্ত্বং রজস্তম ইতি গুণাস্তদ্বৃত্তযশ্চ যাঃ ।
ত্বয্যদ্ধা ব্রহ্মণি পরে কল্পিতা যোগমাযযা ॥ ১৩ ॥

তস্মান্ন সন্ত্যমী ভাবা যর্হি ত্বযি বিকল্পিতাঃ ।
ত্বং চামীষু বিকারেষু হ্যন্যদাব্যাবহারিকঃ ॥ ১৪ ॥

গুণপ্রবাহ এতস্মিন্নবুধাস্ত্বখিলাত্মনঃ ।
গতিং সূক্ষ্মামবোধেন সংসরন্তীহ কর্মভিঃ ॥ ১৫ ॥

যদৃচ্ছযা নৃতাং প্রাপ্য সুকল্পামিহ দুর্লভাম্ ।
স্বার্থে প্রমত্তস্য বযো গতং ত্বন্মাযযেশ্বর ॥ ১৬ ॥

অসাবহং মমৈবৈতে দেহে চাস্যান্বযাদিষু ।
স্নেহপাশৈর্নিবধ্নাতি ভবান্ সর্বমিদং জগত্ ॥ ১৭ ॥

যুবাং ন নঃ সুতৌ সাক্ষাত্ প্রধানপুরুষেশ্বরৌ ।
ভূভারক্ষত্রক্ষপণ অবতীর্ণৌ তথাত্থ হ ॥ ১৮ ॥

তত্তে গতোঽস্ম্যরণমদ্য পদারবিন্দ-
মাপন্নসংসৃতিভযাপহমার্তবন্ধো ।
এতাবতালমলমিন্দ্রিযলালসেন
মর্ত্যাত্মদৃক্ ত্বযি পরে যদপত্যবুদ্ধিঃ ॥ ১৯ ॥

সূতীগৃহে ননু জগাদ ভবানজো নৌ
সঞ্জজ্ঞ ইত্যনুযুগং নিজধর্মগুপ্ত্যৈ ।
নানাতনূর্গগনবদ্ বিদধজ্জহাসি
কো বেদ ভূম্ন উরুগায বিভূতিমাযাম্ ॥ ২০ ॥

শ্রীশুক উবাচ
আকর্ণ্যেত্থং পিতুর্বাক্যং ভগবান্ সাত্বতর্ষভঃ ।
প্রত্যাহ প্রশ্রযানম্রঃ প্রহসন্ শ্লক্ষ্ণযা গিরা ॥ ২১ ॥

শ্রীভগবানুবাচ
বচো বঃ সমবেতার্থং তাতৈতদুপমন্মহে ।
যন্নঃ পুত্রান্ সমুদ্দিশ্য তত্ত্বগ্রাম উদাহৃতঃ ॥ ২২ ॥

অহং যূযমসাবার্য ইমে চ দ্বারকৌকসঃ ।
সর্বেঽপ্যেবং যদুশ্রেষ্ঠ বিমৃগ্যাঃ সচরাচরম্ ॥ ২৩ ॥

আত্মা হ্যেকঃ স্বযংজ্যোতির্নিত্যোঽন্যো নির্গুণো গুণৈঃ ।
আত্মসৃষ্টৈস্তত্কৃতেষু ভূতেষু বহুধেযতে ॥ ২৪ ॥

খং বাযুর্জ্যোতিরাপো ভূস্তত্কৃতেষু যথাশযম্ ।
আবিস্তিরোঽল্পভূর্যেকো নানাত্বং যাত্যসাবপি ॥ ২৫ ॥

শ্রীশুক উবাচ
এবং ভগবতা রাজন্ বসুদেব উদাহৃতঃ ।
শ্রুত্বা বিনষ্টনানাধীস্তূষ্ণীং প্রীতমনা অভূত্ ॥ ২৬ ॥

অথ তত্র কুরুশ্রেষ্ঠ দেবকী সর্বদেবতা ।
শ্রুত্বানীতং গুরোঃ পুত্রমাত্মজাভ্যাং সুবিস্মিতা ॥ ২৭ ॥

কৃষ্ণরামৌ সমাশ্রাব্য পুত্রান্ কংসবিহিংসিতান্ ।
স্মরন্তী কৃপণং প্রাহ বৈক্লব্যাদশ্রুলোচনা ॥ ২৮ ॥

শ্রীদেবক্যুবাচ
রাম রামাপ্রমেযাত্মন্ কৃষ্ণ যোগেশ্বরেশ্বর ।
বেদাহং বাং বিশ্বসৃজামীশ্বরাবাদিপূরুষৌ ॥ ২৯ ॥

কালবিধ্বস্তসত্ত্বানাং রাজ্ঞামুচ্ছাস্ত্রবর্তিনাম্ ।
ভূমের্ভারাযমাণানামবতীর্ণৌ কিলাদ্য মে ॥ ৩০ ॥

যস্যাংশাংশাংশভাগেন বিশ্বোত্পত্তিলযোদযাঃ ।
ভবন্তি কিল বিশ্বাত্মংস্তং ত্বাদ্যাহং গতিং গতা ॥ ৩১ ॥

চিরান্মৃতসুতাদানে গুরুণা কিল চোদিতৌ ।
আনিন্যথুঃ পিতৃস্থানাদ্ গুরবে গুরুদক্ষিণাম্ ॥ ৩২ ॥

তথা মে কুরুতং কামং যুবাং যোগেশ্বরেশ্বরৌ ।
ভোজরাজহতান্ পুত্রান্ কামযে দ্রষ্টুমাহৃতান্ ॥ ৩৩ ॥

ঋষিরুবাচ
এবং সঞ্চোদিতৌ মাত্রা রামঃ কৃষ্ণশ্চ ভারত ।
সুতলং সংবিবিশতুর্যোগমাযামুপাশ্রিতৌ ॥ ৩৪ ॥

তস্মিন্ প্রবিষ্টাবুপলভ্য দৈত্যরাড্
বিশ্বাত্মদৈবং সুতরাং তথাত্মনঃ ।
তদ্দর্শনাহ্লাদপরিপ্লুতাশযঃ
সদ্যঃ সমুত্থায ননাম সান্বযঃ ॥ ৩৫ ॥

তযোঃ সমানীয বরাসনং মুদা
নিবিষ্টযোস্তত্র মহাত্মনোস্তযোঃ ।
দধার পাদাববনিজ্য তজ্জলং
সবৃন্দ আব্রহ্ম পুনদ্ যদম্বু হ ॥ ৩৬ ॥

সমর্হযামাস স তৌ বিভূতিভি-
র্মহার্হবস্ত্রাভরণানুলেপনৈঃ ।
তাম্বূলদীপামৃতভক্ষণাদিভিঃ
স্বগোত্রবিত্তাত্মসমর্পণেন চ ॥ ৩৭ ॥

স ইন্দ্রসেনো ভগবত্পদাম্বুজং
বিভ্রন্মুহুঃ প্রেমবিভিন্নযা ধিযা ।
উবাচহানন্দজলাকুলেক্ষণঃ
প্রহৃষ্টরোমা নৃপ গদ্গদাক্ষরম্ ॥ ৩৮ ॥

বলিরুবাচ
নমোঽনন্তায বৃহতে নমঃ কৃষ্ণায বেধসে ।
সাঙ্খ্যযোগবিতানায ব্রহ্মণে পরমাত্মনে ॥ ৩৯ ॥

দর্শনং বাং হি ভূতানাং দুষ্প্রাপং চাপ্যদুর্লভম্ ।
রজস্তমঃস্বভাবানাং যন্নঃ প্রাপ্তৌ যদৃচ্ছযা ॥ ৪০ ॥

দৈত্যদানবগন্ধর্বাঃ সিদ্ধবিদ্যাধ্রচারণাঃ ।
যক্ষরক্ষঃপিশাচাশ্চ ভূতপ্রমথনাযকাঃ ॥ ৪১ ॥

বিশুদ্ধসত্ত্বধাম্ন্যদ্ধা ত্বযি শাস্ত্রশরীরিণি ।
নিত্যং নিবদ্ধবৈরাস্তে বযং চান্যে চ তাদৃশাঃ ॥ ৪২ ॥

কেচনোদ্বদ্ধবৈরেণ ভক্ত্যা কেচন কামতঃ ।
ন তথা সত্ত্বসংরব্ধাঃ সন্নিকৃষ্টাঃ সুরাদযঃ ॥ ৪৩ ॥

ইদমিত্থমিতি প্রাযস্তব যোগেশ্বরেশ্বর ।
ন বিদন্ত্যপি যোগেশা যোগমাযাং কুতো বযম্ ॥ ৪৪ ॥

তন্নঃ প্রসীদ নিরপেক্ষবিমৃগ্যযুষ্মত্-
পাদারবিন্দধিষণান্যগৃহান্ধকূপাত্ ।
নিষ্ক্রম্য বিশ্বশরণাঙ্ঘ্রযুপলব্ধবৃত্তিঃ
শান্তো যথৈক উত সর্বসখৈশ্চরামি ॥ ৪৫ ॥

শাধ্যস্মানীশিতব্যেশ নিষ্পাপান্ কুরু নঃ প্রভো ।
পুমান্ যচ্ছ্রদ্ধযাতিষ্ঠংশ্চোদনাযা বিমুচ্যতে ॥ ৪৬ ॥

শ্রীভগবানুবাচ
আসন্মরীচেঃ ষট্ পুত্রা ঊর্ণাযাং প্রথমেঽন্তরে ।
দেবাঃ কং জহসুর্বীক্ষ্য সুতং যভিতুমুদ্যতম্ ॥ ৪৭ ॥

তেনাসুরীমগন্ যোনিমধুনাবদ্যকর্মণা ।
হিরণ্যকশিপোর্জাতা নীতাস্তে যোগমাযযা ॥ ৪৮ ॥

দেবক্যা উদরে জাতা রাজন্ কংসবিহিংসিতাঃ ।
সা তান্ শোচত্যাত্মজান্ স্বাংস্ত ইমেঽধ্যাসতেঽন্তিকে ॥ ৪৯ ॥

ইত এতান্ প্রণেষ্যামো মাতৃশোকাপনুত্তযে ।
ততঃ শাপাদ্ বিনির্মুক্তা লোকং যাস্যন্তি বিজ্বরাঃ ॥ ৫০ ॥

স্মরোদ্গীথঃ পরিষ্বঙ্গঃ পতঙ্গঃ ক্ষুদ্রভৃদ্ ঘৃণী ।
ষডিমে মত্প্রসাদেন পুনর্যাস্যন্তি সদ্গতিম্ ॥ ৫১ ॥

ইত্যুক্ত্বা তান্ সমাদায ইন্দ্রসেনেন পূজিতৌ ।
পুনর্দ্বারবতীমেত্য মাতুঃ পুত্রানযচ্ছতাম্ ॥ ৫২ ॥

তান্ দৃষ্ট্বা বালকান্ দেবী পুত্রস্নেহস্নুতস্তনী ।
পরিষ্বজ্যাঙ্কমারোপ্য মূর্ধ্ন্যজিঘ্রদভীক্ষ্ণশঃ ॥ ৫৩ ॥

অপাযযত্ স্তনং প্রীতা সুতস্পর্শপরিস্নুতম্ ।
মোহিতা মাযযা বিষ্ণোর্যযা সৃষ্টিঃ প্রবর্ততে ॥ ৫৪ ॥

পীত্বামৃতং পযস্তস্যাঃ পীতশেষং গদাভৃতঃ ।
নারাযণাঙ্গসংস্পর্শপ্রতিলব্ধাত্মদর্শনাঃ ॥ ৫৫ ॥

তে নমস্কৃত্য গোবিন্দং দেবকীং পিতরং বলম্ ।
মিষতাং সর্বভূতানাং যযুর্ধাম দিবৌকসাম্ ॥ ৫৬ ॥

তং দৃষ্ট্বা দেবকী দেবী মৃতাগমননির্গমম্ ।
মেনে সুবিস্মিতা মাযাং কৃষ্ণস্য রচিতাং নৃপ ॥ ৫৭ ॥

এবংবিধান্যদ্ভুতানি কৃষ্ণস্য পরমাত্মনঃ ।
বীর্যাণ্যনন্তবীর্যস্য সন্ত্যনন্তানি ভারত ॥ ৫৮ ॥

শ্রীসূত উবাচ
য ইদমনুশৃণোতি শ্রাবযেদ্ বা মুরারে-
শ্চরিতমমৃতকীর্তের্বর্ণিতং ব্যাসপুত্রৈঃ ।
জগদঘভিদলং তদ্ভক্তসত্কর্ণপূরং
ভগবতি কৃতচিত্তো যাতি তত্ক্ষেমধাম ॥ ৫৯ ॥