ଶ୍ରୀମଦ୍ଭାଗଵତମ୍ ୧୦.୮୫

ଶ୍ରୀବାଦରାଯଣିରୁଵାଚ
ଅଥୈକଦାତ୍ମଜୌ ପ୍ରାପ୍ତୌ କୃତପାଦାଭିଵନ୍ଦନୌ ।
ଵସୁଦେଵୋଽଭିନନ୍ଦ୍ଯାହ ପ୍ରୀତ୍ଯା ସଙ୍କର୍ଷଣାଚ୍ଯୁତୌ ॥ ୧ ॥

ମୁନୀନାଂ ସ ଵଚଃ ଶ୍ରୁତ୍ଵା ପୁତ୍ରଯୋର୍ଧାମସୂଚକମ୍ ।
ତଦ୍ଵୀର୍ଯୈର୍ଜାତଵିଶ୍ରମ୍ଭଃ ପରିଭାଷ୍ଯାଭ୍ଯଭାଷତ ॥ ୨ ॥

କୃଷ୍ଣ କୃଷ୍ଣ ମହାଯୋଗିନ୍ ସଙ୍କର୍ଷଣ ସନାତନ ।
ଜାନେ ଵାମସ୍ଯ ଯତ୍ ସାକ୍ଷାତ୍ ପ୍ରଧାନପୁରୁଷୌ ପରୌ ॥ ୩ ॥

ଯତ୍ର ଯେନ ଯତୋ ଯସ୍ଯ ଯସ୍ମୈ ଯଦ୍ ଯଦ୍ ଯଥା ଯଦା ।
ସ୍ଯାଦିଦଂ ଭଗଵାନ୍ ସାକ୍ଷାତ୍ ପ୍ରଧାନପୁରୁଷେଶ୍ଵରଃ ॥ ୪ ॥

ଏତନ୍ନାନାଵିଧଂ ଵିଶ୍ଵମାତ୍ମସୃଷ୍ଟମଧୋକ୍ଷଜ ।
ଆତ୍ମନାନୁପ୍ରଵିଶ୍ଯାତ୍ମନ୍ ପ୍ରାଣୋ ଜୀଵୋ ବିଭର୍ଷ୍ଯଜ ॥ ୫ ॥

ପ୍ରାଣାଦୀନାଂ ଵିଶ୍ଵସୃଜାଂ ଶକ୍ତଯୋ ଯାଃ ପରସ୍ଯ ତାଃ ।
ପାରତନ୍ତ୍ର୍ଯାଦ୍ ଵୈସାଦୃଶ୍ଯାଦ୍ ଦ୍ଵଯୋଶ୍ଚେଷ୍ଟୈଵ ଚେଷ୍ଟତାମ୍ ॥ ୬ ॥

କାନ୍ତିସ୍ତେଜଃ ପ୍ରଭା ସତ୍ତା ଚନ୍ଦ୍ରାଗ୍ନ୍ଯର୍କର୍କ୍ଷଵିଦ୍ଯୁତାମ୍ ।
ଯତ୍ ସ୍ଥୈର୍ଯଂ ଭୂଭୃତାଂ ଭୂମେର୍ଵୃତ୍ତିର୍ଗନ୍ଧୋଽର୍ଥତୋ ଭଵାନ୍ ॥ ୭ ॥

ତର୍ପଣଂ ପ୍ରାଣନମପାଂ ଦେଵତ୍ଵଂ ତାଶ୍ଚ ତଦ୍ରସଃ ।
ଓଜଃ ସହୋ ବଲଂ ଚେଷ୍ଟା ଗତିର୍ଵାଯୋସ୍ତଵେଶ୍ଵର ॥ ୮ ॥

ଦିଶାଂ ତ୍ଵମଵକାଶୋଽସି ଦିଶଃ ଖଂ ସ୍ଫୋଟ ଆଶ୍ରଯଃ ।
ନାଦୋ ଵର୍ଣସ୍ତ୍ଵମ୍ ଓଁକାର ଆକୃତୀନାଂ ପୃଥକ୍କୃତିଃ ॥ ୯ ॥

ଇନ୍ଦ୍ରିଯଂ ତ୍ଵିନ୍ଦ୍ରିଯାଣାଂ ତ୍ଵଂ ଦେଵାଶ୍ଚ ତଦନୁଗ୍ରହଃ ।
ଅଵବୋଧୋ ଭଵାନ୍ ବୁଦ୍ଧେର୍ଜୀଵସ୍ଯାନୁସ୍ମୃତିଃ ସତୀ ॥ ୧୦ ॥

ଭୂତାନାମସି ଭୂତାଦିରିନ୍ଦ୍ରିଯାଣାଂ ଚ ତୈଜସଃ ।
ଵୈକାରିକୋ ଵିକଲ୍ପାନାଂ ପ୍ରଧାନମନୁଶାଯିନମ୍ ॥ ୧୧ ॥

ନଶ୍ଵରେଷ୍ଵିହ ଭାଵେଷୁ ତଦସି ତ୍ଵମନଶ୍ଵରମ୍ ।
ଯଥା ଦ୍ରଵ୍ଯଵିକାରେଷୁ ଦ୍ରଵ୍ଯମାତ୍ରଂ ନିରୂପିତମ୍ ॥ ୧୨ ॥

ସତ୍ତ୍ଵଂ ରଜସ୍ତମ ଇତି ଗୁଣାସ୍ତଦ୍ଵୃତ୍ତଯଶ୍ଚ ଯାଃ ।
ତ୍ଵଯ୍ଯଦ୍ଧା ବ୍ରହ୍ମଣି ପରେ କଲ୍ପିତା ଯୋଗମାଯଯା ॥ ୧୩ ॥

ତସ୍ମାନ୍ନ ସନ୍ତ୍ଯମୀ ଭାଵା ଯର୍ହି ତ୍ଵଯି ଵିକଲ୍ପିତାଃ ।
ତ୍ଵଂ ଚାମୀଷୁ ଵିକାରେଷୁ ହ୍ଯନ୍ଯଦାଵ୍ଯାଵହାରିକଃ ॥ ୧୪ ॥

ଗୁଣପ୍ରଵାହ ଏତସ୍ମିନ୍ନବୁଧାସ୍ତ୍ଵଖିଲାତ୍ମନଃ ।
ଗତିଂ ସୂକ୍ଷ୍ମାମବୋଧେନ ସଂସରନ୍ତୀହ କର୍ମଭିଃ ॥ ୧୫ ॥

ଯଦୃଚ୍ଛଯା ନୃତାଂ ପ୍ରାପ୍ଯ ସୁକଲ୍ପାମିହ ଦୁର୍ଲଭାମ୍ ।
ସ୍ଵାର୍ଥେ ପ୍ରମତ୍ତସ୍ଯ ଵଯୋ ଗତଂ ତ୍ଵନ୍ମାଯଯେଶ୍ଵର ॥ ୧୬ ॥

ଅସାଵହଂ ମମୈଵୈତେ ଦେହେ ଚାସ୍ଯାନ୍ଵଯାଦିଷୁ ।
ସ୍ନେହପାଶୈର୍ନିବଧ୍ନାତି ଭଵାନ୍ ସର୍ଵମିଦଂ ଜଗତ୍ ॥ ୧୭ ॥

ଯୁଵାଂ ନ ନଃ ସୁତୌ ସାକ୍ଷାତ୍ ପ୍ରଧାନପୁରୁଷେଶ୍ଵରୌ ।
ଭୂଭାରକ୍ଷତ୍ରକ୍ଷପଣ ଅଵତୀର୍ଣୌ ତଥାତ୍ଥ ହ ॥ ୧୮ ॥

ତତ୍ତେ ଗତୋଽସ୍ମ୍ଯରଣମଦ୍ଯ ପଦାରଵିନ୍ଦ-
ମାପନ୍ନସଂସୃତିଭଯାପହମାର୍ତବନ୍ଧୋ ।
ଏତାଵତାଲମଲମିନ୍ଦ୍ରିଯଲାଲସେନ
ମର୍ତ୍ଯାତ୍ମଦୃକ୍ ତ୍ଵଯି ପରେ ଯଦପତ୍ଯବୁଦ୍ଧିଃ ॥ ୧୯ ॥

ସୂତୀଗୃହେ ନନୁ ଜଗାଦ ଭଵାନଜୋ ନୌ
ସଞ୍ଜଜ୍ଞ ଇତ୍ଯନୁଯୁଗଂ ନିଜଧର୍ମଗୁପ୍ତ୍ଯୈ ।
ନାନାତନୂର୍ଗଗନଵଦ୍ ଵିଦଧଜ୍ଜହାସି
କୋ ଵେଦ ଭୂମ୍ନ ଉରୁଗାଯ ଵିଭୂତିମାଯାମ୍ ॥ ୨୦ ॥

ଶ୍ରୀଶୁକ ଉଵାଚ
ଆକର୍ଣ୍ଯେତ୍ଥଂ ପିତୁର୍ଵାକ୍ଯଂ ଭଗଵାନ୍ ସାତ୍ଵତର୍ଷଭଃ ।
ପ୍ରତ୍ଯାହ ପ୍ରଶ୍ରଯାନମ୍ରଃ ପ୍ରହସନ୍ ଶ୍ଲକ୍ଷ୍ଣଯା ଗିରା ॥ ୨୧ ॥

ଶ୍ରୀଭଗଵାନୁଵାଚ
ଵଚୋ ଵଃ ସମଵେତାର୍ଥଂ ତାତୈତଦୁପମନ୍ମହେ ।
ଯନ୍ନଃ ପୁତ୍ରାନ୍ ସମୁଦ୍ଦିଶ୍ଯ ତତ୍ତ୍ଵଗ୍ରାମ ଉଦାହୃତଃ ॥ ୨୨ ॥

ଅହଂ ଯୂଯମସାଵାର୍ଯ ଇମେ ଚ ଦ୍ଵାରକୌକସଃ ।
ସର୍ଵେଽପ୍ଯେଵଂ ଯଦୁଶ୍ରେଷ୍ଠ ଵିମୃଗ୍ଯାଃ ସଚରାଚରମ୍ ॥ ୨୩ ॥

ଆତ୍ମା ହ୍ଯେକଃ ସ୍ଵଯଂଜ୍ଯୋତିର୍ନିତ୍ଯୋଽନ୍ଯୋ ନିର୍ଗୁଣୋ ଗୁଣୈଃ ।
ଆତ୍ମସୃଷ୍ଟୈସ୍ତତ୍କୃତେଷୁ ଭୂତେଷୁ ବହୁଧେଯତେ ॥ ୨୪ ॥

ଖଂ ଵାଯୁର୍ଜ୍ଯୋତିରାପୋ ଭୂସ୍ତତ୍କୃତେଷୁ ଯଥାଶଯମ୍ ।
ଆଵିସ୍ତିରୋଽଲ୍ପଭୂର୍ଯେକୋ ନାନାତ୍ଵଂ ଯାତ୍ଯସାଵପି ॥ ୨୫ ॥

ଶ୍ରୀଶୁକ ଉଵାଚ
ଏଵଂ ଭଗଵତା ରାଜନ୍ ଵସୁଦେଵ ଉଦାହୃତଃ ।
ଶ୍ରୁତ୍ଵା ଵିନଷ୍ଟନାନାଧୀସ୍ତୂଷ୍ଣୀଂ ପ୍ରୀତମନା ଅଭୂତ୍ ॥ ୨୬ ॥

ଅଥ ତତ୍ର କୁରୁଶ୍ରେଷ୍ଠ ଦେଵକୀ ସର୍ଵଦେଵତା ।
ଶ୍ରୁତ୍ଵାନୀତଂ ଗୁରୋଃ ପୁତ୍ରମାତ୍ମଜାଭ୍ଯାଂ ସୁଵିସ୍ମିତା ॥ ୨୭ ॥

କୃଷ୍ଣରାମୌ ସମାଶ୍ରାଵ୍ଯ ପୁତ୍ରାନ୍ କଂସଵିହିଂସିତାନ୍ ।
ସ୍ମରନ୍ତୀ କୃପଣଂ ପ୍ରାହ ଵୈକ୍ଲଵ୍ଯାଦଶ୍ରୁଲୋଚନା ॥ ୨୮ ॥

ଶ୍ରୀଦେଵକ୍ଯୁଵାଚ
ରାମ ରାମାପ୍ରମେଯାତ୍ମନ୍ କୃଷ୍ଣ ଯୋଗେଶ୍ଵରେଶ୍ଵର ।
ଵେଦାହଂ ଵାଂ ଵିଶ୍ଵସୃଜାମୀଶ୍ଵରାଵାଦିପୂରୁଷୌ ॥ ୨୯ ॥

କାଲଵିଧ୍ଵସ୍ତସତ୍ତ୍ଵାନାଂ ରାଜ୍ଞାମୁଚ୍ଛାସ୍ତ୍ରଵର୍ତିନାମ୍ ।
ଭୂମେର୍ଭାରାଯମାଣାନାମଵତୀର୍ଣୌ କିଲାଦ୍ଯ ମେ ॥ ୩୦ ॥

ଯସ୍ଯାଂଶାଂଶାଂଶଭାଗେନ ଵିଶ୍ଵୋତ୍ପତ୍ତିଲଯୋଦଯାଃ ।
ଭଵନ୍ତି କିଲ ଵିଶ୍ଵାତ୍ମଂସ୍ତଂ ତ୍ଵାଦ୍ଯାହଂ ଗତିଂ ଗତା ॥ ୩୧ ॥

ଚିରାନ୍ମୃତସୁତାଦାନେ ଗୁରୁଣା କିଲ ଚୋଦିତୌ ।
ଆନିନ୍ଯଥୁଃ ପିତୃସ୍ଥାନାଦ୍ ଗୁରଵେ ଗୁରୁଦକ୍ଷିଣାମ୍ ॥ ୩୨ ॥

ତଥା ମେ କୁରୁତଂ କାମଂ ଯୁଵାଂ ଯୋଗେଶ୍ଵରେଶ୍ଵରୌ ।
ଭୋଜରାଜହତାନ୍ ପୁତ୍ରାନ୍ କାମଯେ ଦ୍ରଷ୍ଟୁମାହୃତାନ୍ ॥ ୩୩ ॥

ଋଷିରୁଵାଚ
ଏଵଂ ସଞ୍ଚୋଦିତୌ ମାତ୍ରା ରାମଃ କୃଷ୍ଣଶ୍ଚ ଭାରତ ।
ସୁତଲଂ ସଂଵିଵିଶତୁର୍ଯୋଗମାଯାମୁପାଶ୍ରିତୌ ॥ ୩୪ ॥

ତସ୍ମିନ୍ ପ୍ରଵିଷ୍ଟାଵୁପଲଭ୍ଯ ଦୈତ୍ଯରାଡ୍
ଵିଶ୍ଵାତ୍ମଦୈଵଂ ସୁତରାଂ ତଥାତ୍ମନଃ ।
ତଦ୍ଦର୍ଶନାହ୍ଲାଦପରିପ୍ଲୁତାଶଯଃ
ସଦ୍ଯଃ ସମୁତ୍ଥାଯ ନନାମ ସାନ୍ଵଯଃ ॥ ୩୫ ॥

ତଯୋଃ ସମାନୀଯ ଵରାସନଂ ମୁଦା
ନିଵିଷ୍ଟଯୋସ୍ତତ୍ର ମହାତ୍ମନୋସ୍ତଯୋଃ ।
ଦଧାର ପାଦାଵଵନିଜ୍ଯ ତଜ୍ଜଲଂ
ସଵୃନ୍ଦ ଆବ୍ରହ୍ମ ପୁନଦ୍ ଯଦମ୍ବୁ ହ ॥ ୩୬ ॥

ସମର୍ହଯାମାସ ସ ତୌ ଵିଭୂତିଭି-
ର୍ମହାର୍ହଵସ୍ତ୍ରାଭରଣାନୁଲେପନୈଃ ।
ତାମ୍ବୂଲଦୀପାମୃତଭକ୍ଷଣାଦିଭିଃ
ସ୍ଵଗୋତ୍ରଵିତ୍ତାତ୍ମସମର୍ପଣେନ ଚ ॥ ୩୭ ॥

ସ ଇନ୍ଦ୍ରସେନୋ ଭଗଵତ୍ପଦାମ୍ବୁଜଂ
ବିଭ୍ରନ୍ମୁହୁଃ ପ୍ରେମଵିଭିନ୍ନଯା ଧିଯା ।
ଉଵାଚହାନନ୍ଦଜଲାକୁଲେକ୍ଷଣଃ
ପ୍ରହୃଷ୍ଟରୋମା ନୃପ ଗଦ୍ଗଦାକ୍ଷରମ୍ ॥ ୩୮ ॥

ବଲିରୁଵାଚ
ନମୋଽନନ୍ତାଯ ବୃହତେ ନମଃ କୃଷ୍ଣାଯ ଵେଧସେ ।
ସାଙ୍ଖ୍ଯଯୋଗଵିତାନାଯ ବ୍ରହ୍ମଣେ ପରମାତ୍ମନେ ॥ ୩୯ ॥

ଦର୍ଶନଂ ଵାଂ ହି ଭୂତାନାଂ ଦୁଷ୍ପ୍ରାପଂ ଚାପ୍ଯଦୁର୍ଲଭମ୍ ।
ରଜସ୍ତମଃସ୍ଵଭାଵାନାଂ ଯନ୍ନଃ ପ୍ରାପ୍ତୌ ଯଦୃଚ୍ଛଯା ॥ ୪୦ ॥

ଦୈତ୍ଯଦାନଵଗନ୍ଧର୍ଵାଃ ସିଦ୍ଧଵିଦ୍ଯାଧ୍ରଚାରଣାଃ ।
ଯକ୍ଷରକ୍ଷଃପିଶାଚାଶ୍ଚ ଭୂତପ୍ରମଥନାଯକାଃ ॥ ୪୧ ॥

ଵିଶୁଦ୍ଧସତ୍ତ୍ଵଧାମ୍ନ୍ଯଦ୍ଧା ତ୍ଵଯି ଶାସ୍ତ୍ରଶରୀରିଣି ।
ନିତ୍ଯଂ ନିବଦ୍ଧଵୈରାସ୍ତେ ଵଯଂ ଚାନ୍ଯେ ଚ ତାଦୃଶାଃ ॥ ୪୨ ॥

କେଚନୋଦ୍ବଦ୍ଧଵୈରେଣ ଭକ୍ତ୍ଯା କେଚନ କାମତଃ ।
ନ ତଥା ସତ୍ତ୍ଵସଂରବ୍ଧାଃ ସନ୍ନିକୃଷ୍ଟାଃ ସୁରାଦଯଃ ॥ ୪୩ ॥

ଇଦମିତ୍ଥମିତି ପ୍ରାଯସ୍ତଵ ଯୋଗେଶ୍ଵରେଶ୍ଵର ।
ନ ଵିଦନ୍ତ୍ଯପି ଯୋଗେଶା ଯୋଗମାଯାଂ କୁତୋ ଵଯମ୍ ॥ ୪୪ ॥

ତନ୍ନଃ ପ୍ରସୀଦ ନିରପେକ୍ଷଵିମୃଗ୍ଯଯୁଷ୍ମତ୍-
ପାଦାରଵିନ୍ଦଧିଷଣାନ୍ଯଗୃହାନ୍ଧକୂପାତ୍ ।
ନିଷ୍କ୍ରମ୍ଯ ଵିଶ୍ଵଶରଣାଙ୍ଘ୍ରଯୁପଲବ୍ଧଵୃତ୍ତିଃ
ଶାନ୍ତୋ ଯଥୈକ ଉତ ସର୍ଵସଖୈଶ୍ଚରାମି ॥ ୪୫ ॥

ଶାଧ୍ଯସ୍ମାନୀଶିତଵ୍ଯେଶ ନିଷ୍ପାପାନ୍ କୁରୁ ନଃ ପ୍ରଭୋ ।
ପୁମାନ୍ ଯଚ୍ଛ୍ରଦ୍ଧଯାତିଷ୍ଠଂଶ୍ଚୋଦନାଯା ଵିମୁଚ୍ଯତେ ॥ ୪୬ ॥

ଶ୍ରୀଭଗଵାନୁଵାଚ
ଆସନ୍ମରୀଚେଃ ଷଟ୍ ପୁତ୍ରା ଊର୍ଣାଯାଂ ପ୍ରଥମେଽନ୍ତରେ ।
ଦେଵାଃ କଂ ଜହସୁର୍ଵୀକ୍ଷ୍ଯ ସୁତଂ ଯଭିତୁମୁଦ୍ଯତମ୍ ॥ ୪୭ ॥

ତେନାସୁରୀମଗନ୍ ଯୋନିମଧୁନାଵଦ୍ଯକର୍ମଣା ।
ହିରଣ୍ଯକଶିପୋର୍ଜାତା ନୀତାସ୍ତେ ଯୋଗମାଯଯା ॥ ୪୮ ॥

ଦେଵକ୍ଯା ଉଦରେ ଜାତା ରାଜନ୍ କଂସଵିହିଂସିତାଃ ।
ସା ତାନ୍ ଶୋଚତ୍ଯାତ୍ମଜାନ୍ ସ୍ଵାଂସ୍ତ ଇମେଽଧ୍ଯାସତେଽନ୍ତିକେ ॥ ୪୯ ॥

ଇତ ଏତାନ୍ ପ୍ରଣେଷ୍ଯାମୋ ମାତୃଶୋକାପନୁତ୍ତଯେ ।
ତତଃ ଶାପାଦ୍ ଵିନିର୍ମୁକ୍ତା ଲୋକଂ ଯାସ୍ଯନ୍ତି ଵିଜ୍ଵରାଃ ॥ ୫୦ ॥

ସ୍ମରୋଦ୍ଗୀଥଃ ପରିଷ୍ଵଙ୍ଗଃ ପତଙ୍ଗଃ କ୍ଷୁଦ୍ରଭୃଦ୍ ଘୃଣୀ ।
ଷଡିମେ ମତ୍ପ୍ରସାଦେନ ପୁନର୍ଯାସ୍ଯନ୍ତି ସଦ୍ଗତିମ୍ ॥ ୫୧ ॥

ଇତ୍ଯୁକ୍ତ୍ଵା ତାନ୍ ସମାଦାଯ ଇନ୍ଦ୍ରସେନେନ ପୂଜିତୌ ।
ପୁନର୍ଦ୍ଵାରଵତୀମେତ୍ଯ ମାତୁଃ ପୁତ୍ରାନଯଚ୍ଛତାମ୍ ॥ ୫୨ ॥

ତାନ୍ ଦୃଷ୍ଟ୍ଵା ବାଲକାନ୍ ଦେଵୀ ପୁତ୍ରସ୍ନେହସ୍ନୁତସ୍ତନୀ ।
ପରିଷ୍ଵଜ୍ଯାଙ୍କମାରୋପ୍ଯ ମୂର୍ଧ୍ନ୍ଯଜିଘ୍ରଦଭୀକ୍ଷ୍ଣଶଃ ॥ ୫୩ ॥

ଅପାଯଯତ୍ ସ୍ତନଂ ପ୍ରୀତା ସୁତସ୍ପର୍ଶପରିସ୍ନୁତମ୍ ।
ମୋହିତା ମାଯଯା ଵିଷ୍ଣୋର୍ଯଯା ସୃଷ୍ଟିଃ ପ୍ରଵର୍ତତେ ॥ ୫୪ ॥

ପୀତ୍ଵାମୃତଂ ପଯସ୍ତସ୍ଯାଃ ପୀତଶେଷଂ ଗଦାଭୃତଃ ।
ନାରାଯଣାଙ୍ଗସଂସ୍ପର୍ଶପ୍ରତିଲବ୍ଧାତ୍ମଦର୍ଶନାଃ ॥ ୫୫ ॥

ତେ ନମସ୍କୃତ୍ଯ ଗୋଵିନ୍ଦଂ ଦେଵକୀଂ ପିତରଂ ବଲମ୍ ।
ମିଷତାଂ ସର୍ଵଭୂତାନାଂ ଯଯୁର୍ଧାମ ଦିଵୌକସାମ୍ ॥ ୫୬ ॥

ତଂ ଦୃଷ୍ଟ୍ଵା ଦେଵକୀ ଦେଵୀ ମୃତାଗମନନିର୍ଗମମ୍ ।
ମେନେ ସୁଵିସ୍ମିତା ମାଯାଂ କୃଷ୍ଣସ୍ଯ ରଚିତାଂ ନୃପ ॥ ୫୭ ॥

ଏଵଂଵିଧାନ୍ଯଦ୍ଭୁତାନି କୃଷ୍ଣସ୍ଯ ପରମାତ୍ମନଃ ।
ଵୀର୍ଯାଣ୍ଯନନ୍ତଵୀର୍ଯସ୍ଯ ସନ୍ତ୍ଯନନ୍ତାନି ଭାରତ ॥ ୫୮ ॥

ଶ୍ରୀସୂତ ଉଵାଚ
ଯ ଇଦମନୁଶୃଣୋତି ଶ୍ରାଵଯେଦ୍ ଵା ମୁରାରେ-
ଶ୍ଚରିତମମୃତକୀର୍ତେର୍ଵର୍ଣିତଂ ଵ୍ଯାସପୁତ୍ରୈଃ ।
ଜଗଦଘଭିଦଲଂ ତଦ୍ଭକ୍ତସତ୍କର୍ଣପୂରଂ
ଭଗଵତି କୃତଚିତ୍ତୋ ଯାତି ତତ୍କ୍ଷେମଧାମ ॥ ୫୯ ॥