শ্ৰীমদ্ভাগৱতম্ ১২.১৩

সূত উৱাচ
যং ব্ৰহ্মা ৱৰুণেন্দ্ৰৰুদ্ৰমৰুতঃ স্তুন্ৱন্তি দিৱ্যৈঃ স্তৱৈ-
ৰ্ৱেদৈঃ সাঙ্গপদক্ৰমোপনিষদৈৰ্গাযন্তি যং সামগাঃ ।
ধ্যানাৱস্থিততদ্গতেন মনসা পশ্যন্তি যং যোগিনো
যস্যান্তং ন ৱিদুঃ সুৰাসুৰগণা দেৱায তস্মৈ নমঃ ॥ ১ ॥

পৃষ্ঠে ভ্ৰাম্যদমন্দমন্দৰগিৰিগ্ৰাৱাগ্ৰকণ্ডূযনা-
ন্নিদ্ৰালোঃ কমঠাকৃতেৰ্ভগৱতঃ শ্ৱাসানিলাঃ পান্তু ৱঃ ।
যত্সংস্কাৰকলানুৱৰ্তনৱশাদ্ ৱেলানিভেনাম্ভসাং
যাতাযাতমতন্দ্ৰিতং জলনিধেৰ্নাদ্যাপি ৱিশ্ৰাম্যতি ॥ ২ ॥

পুৰাণসঙ্খ্যাসম্ভূতিমস্য ৱাচ্যপ্ৰযোজনে ।
দানং দানস্য মাহাত্ম্যং পাঠাদেশ্চ নিবোধত ॥ ৩ ॥

ব্ৰাহ্মং দশসহস্ৰাণি পাদ্মং পঞ্চোনষষ্টি চ ।
শ্ৰীৱৈষ্ণৱং ত্ৰযোৱিংশচ্চতুৰ্ৱিংশতি শৈৱকম্ ॥ ৪ ॥

দশাষ্টৌ শ্ৰীভাগৱতং নাৰদং পঞ্চৱিংশতি ।
মাৰ্কণ্ডং নৱ ৱাহ্নং চ দশপঞ্চ চতুঃশতম্ ॥ ৫ ॥

চতুৰ্দশ ভৱিষ্যং স্যাত্তথা পঞ্চশতানি চ ।
দশাষ্টৌ ব্ৰহ্মৱৈৱৰ্তং লৈঙ্গমেকাদশৈৱ তু ॥ ৬ ॥

চতুৰ্ৱিংশতি ৱাৰাহমেকাশীতিসহস্ৰকম্ ।
স্কান্দং শতং তথা চৈকং ৱামনং দশ কীৰ্তিতম্ ॥ ৭ ॥

কৌৰ্মং সপ্তদশাখ্যাতং মাত্স্যং তত্তু চতুৰ্দশ ।
একোনৱিংশত্সৌপৰ্ণং ব্ৰহ্মাণ্ডং দ্ৱাদশৈৱ তু ॥ ৮ ॥

এৱং পুৰাণসন্দোহশ্চতুৰ্লক্ষ উদাহৃতঃ ।
তত্ৰাষ্টদশসাহস্ৰং শ্ৰীভাগৱতমিষ্যতে ॥ ৯ ॥

ইদং ভগৱতা পূৰ্ৱং ব্ৰহ্মণে নাভিপঙ্কজে ।
স্থিতায ভৱভীতায কাৰুণ্যাত্ সম্প্ৰকাশিতম্ ॥ ১০ ॥

আদিমধ্যাৱসানেষু ৱৈৰাগ্যাখ্যানসংযুতম্ ।
হৰিলীলাকথাৱ্ৰাতামৃতানন্দিতসত্সুৰম্ ॥ ১১ ॥

সৰ্ৱৱেদান্তসাৰং যদ ব্ৰহ্মাত্মৈকত্ৱলক্ষণম্ ।
ৱস্ত্ৱদ্ৱিতীযং তন্নিষ্ঠং কৈৱল্যৈকপ্ৰযোজনম্ ॥ ১২ ॥

প্ৰৌষ্ঠপদ্যাং পৌৰ্ণমাস্যাং হেমসিংহসমন্ৱিতম্ ।
দদাতি যো ভাগৱতং স যাতি পৰমাং গতিম্ ॥ ১৩ ॥

ৰাজন্তে তাৱদন্যানি পুৰাণানি সতাং গণে ।
যাৱদ্ভাগৱতং নৈৱ শ্ৰূযতেঽমৃতসাগৰম্ ॥ ১৪ ॥

সৰ্ৱৱেদান্তসাৰং হি শ্ৰীভাগৱতমিষ্যতে ।
তদ্ৰসামৃততৃপ্তস্য নান্যত্ৰ স্যাদ্ৰতিঃ ক্ৱচিত্ ॥ ১৫ ॥

নিম্নগানাং যথা গঙ্গা দেৱানামচ্যুতো যথা ।
ৱৈষ্ণৱানাং যথা শম্ভুঃ পুৰাণানামিদং তথা ॥ ১৬ ॥

ক্ষেত্ৰাণাং চৈৱ সৰ্ৱেষাং যথা কাশী হ্যনুত্তমা ।
তথা পুৰাণৱ্ৰাতানাং শ্ৰীমদ্ভাগৱতং দ্ৱিজাঃ ॥ ১৭ ॥

শ্ৰীমদ্ভাগৱতং পুৰাণমমলং যদ্ৱৈষ্ণৱানাং প্ৰিযং
যস্মিন্ পাৰমহংস্যমেকমমলং জ্ঞানং পৰং গীযতে ।
তত্ৰ জ্ঞানৱিৰাগভক্তিসহিতং নৈষ্কৰ্ম্যমাৱিষ্কৃতং
তচ্ছৃণ্ৱন্ সুপঠন্ ৱিচাৰণপৰো ভক্ত্যা ৱিমুচ্যেন্নৰঃ ॥ ১৮ ॥

কস্মৈ যেন ৱিভাসিতোঽযমতুলো জ্ঞানপ্ৰদীপঃ পুৰা
তদ্ৰূপেণ চ নাৰদায মুনযে কৃষ্ণায তদ্ৰূপিণা ।
যোগীন্দ্ৰায তদাত্মনাথ ভগৱদ্ৰাতায কাৰুণ্যত-
স্তচ্ছুদ্ধং ৱিমলং ৱিশোকমমৃতং সত্যং পৰং ধীমহি ॥ ১৯ ॥

নমস্তস্মৈ ভগৱতে ৱাসুদেৱায সাক্ষিণে ।
য ইদং কৃপযা কস্মৈ ৱ্যাচচক্ষে মুমুক্ষৱে ॥ ২০ ॥

যোগীন্দ্ৰায নমস্তস্মৈ শুকায ব্ৰহ্মৰূপিণে ।
সংসাৰসৰ্পদষ্টং যো ৱিষ্ণুৰাতমমূমুচত্ ॥ ২১ ॥

ভৱে ভৱে যথা ভক্তিঃ পাদযোস্তৱ জাযতে ।
তথা কুৰুষ্ৱ দেৱেশ নাথস্ত্ৱং নো যতঃ প্ৰভো ॥ ২২ ॥

নামসঙ্কীৰ্তনং যস্য সৰ্ৱপাপপ্ৰণাশনম্ ।
প্ৰণামো দুঃখশমনস্তং নমামি হৰিং পৰম্ ॥ ২৩ ॥