শ্রীমদ্ভাগবতম্ ১২.১৩

সূত উবাচ
যং ব্রহ্মা বরুণেন্দ্ররুদ্রমরুতঃ স্তুন্বন্তি দিব্যৈঃ স্তবৈ-
র্বেদৈঃ সাঙ্গপদক্রমোপনিষদৈর্গাযন্তি যং সামগাঃ ।
ধ্যানাবস্থিততদ্গতেন মনসা পশ্যন্তি যং যোগিনো
যস্যান্তং ন বিদুঃ সুরাসুরগণা দেবায তস্মৈ নমঃ ॥ ১ ॥

পৃষ্ঠে ভ্রাম্যদমন্দমন্দরগিরিগ্রাবাগ্রকণ্ডূযনা-
ন্নিদ্রালোঃ কমঠাকৃতের্ভগবতঃ শ্বাসানিলাঃ পান্তু বঃ ।
যত্সংস্কারকলানুবর্তনবশাদ্ বেলানিভেনাম্ভসাং
যাতাযাতমতন্দ্রিতং জলনিধের্নাদ্যাপি বিশ্রাম্যতি ॥ ২ ॥

পুরাণসঙ্খ্যাসম্ভূতিমস্য বাচ্যপ্রযোজনে ।
দানং দানস্য মাহাত্ম্যং পাঠাদেশ্চ নিবোধত ॥ ৩ ॥

ব্রাহ্মং দশসহস্রাণি পাদ্মং পঞ্চোনষষ্টি চ ।
শ্রীবৈষ্ণবং ত্রযোবিংশচ্চতুর্বিংশতি শৈবকম্ ॥ ৪ ॥

দশাষ্টৌ শ্রীভাগবতং নারদং পঞ্চবিংশতি ।
মার্কণ্ডং নব বাহ্নং চ দশপঞ্চ চতুঃশতম্ ॥ ৫ ॥

চতুর্দশ ভবিষ্যং স্যাত্তথা পঞ্চশতানি চ ।
দশাষ্টৌ ব্রহ্মবৈবর্তং লৈঙ্গমেকাদশৈব তু ॥ ৬ ॥

চতুর্বিংশতি বারাহমেকাশীতিসহস্রকম্ ।
স্কান্দং শতং তথা চৈকং বামনং দশ কীর্তিতম্ ॥ ৭ ॥

কৌর্মং সপ্তদশাখ্যাতং মাত্স্যং তত্তু চতুর্দশ ।
একোনবিংশত্সৌপর্ণং ব্রহ্মাণ্ডং দ্বাদশৈব তু ॥ ৮ ॥

এবং পুরাণসন্দোহশ্চতুর্লক্ষ উদাহৃতঃ ।
তত্রাষ্টদশসাহস্রং শ্রীভাগবতমিষ্যতে ॥ ৯ ॥

ইদং ভগবতা পূর্বং ব্রহ্মণে নাভিপঙ্কজে ।
স্থিতায ভবভীতায কারুণ্যাত্ সম্প্রকাশিতম্ ॥ ১০ ॥

আদিমধ্যাবসানেষু বৈরাগ্যাখ্যানসংযুতম্ ।
হরিলীলাকথাব্রাতামৃতানন্দিতসত্সুরম্ ॥ ১১ ॥

সর্ববেদান্তসারং যদ ব্রহ্মাত্মৈকত্বলক্ষণম্ ।
বস্ত্বদ্বিতীযং তন্নিষ্ঠং কৈবল্যৈকপ্রযোজনম্ ॥ ১২ ॥

প্রৌষ্ঠপদ্যাং পৌর্ণমাস্যাং হেমসিংহসমন্বিতম্ ।
দদাতি যো ভাগবতং স যাতি পরমাং গতিম্ ॥ ১৩ ॥

রাজন্তে তাবদন্যানি পুরাণানি সতাং গণে ।
যাবদ্ভাগবতং নৈব শ্রূযতেঽমৃতসাগরম্ ॥ ১৪ ॥

সর্ববেদান্তসারং হি শ্রীভাগবতমিষ্যতে ।
তদ্রসামৃততৃপ্তস্য নান্যত্র স্যাদ্রতিঃ ক্বচিত্ ॥ ১৫ ॥

নিম্নগানাং যথা গঙ্গা দেবানামচ্যুতো যথা ।
বৈষ্ণবানাং যথা শম্ভুঃ পুরাণানামিদং তথা ॥ ১৬ ॥

ক্ষেত্রাণাং চৈব সর্বেষাং যথা কাশী হ্যনুত্তমা ।
তথা পুরাণব্রাতানাং শ্রীমদ্ভাগবতং দ্বিজাঃ ॥ ১৭ ॥

শ্রীমদ্ভাগবতং পুরাণমমলং যদ্বৈষ্ণবানাং প্রিযং
যস্মিন্ পারমহংস্যমেকমমলং জ্ঞানং পরং গীযতে ।
তত্র জ্ঞানবিরাগভক্তিসহিতং নৈষ্কর্ম্যমাবিষ্কৃতং
তচ্ছৃণ্বন্ সুপঠন্ বিচারণপরো ভক্ত্যা বিমুচ্যেন্নরঃ ॥ ১৮ ॥

কস্মৈ যেন বিভাসিতোঽযমতুলো জ্ঞানপ্রদীপঃ পুরা
তদ্রূপেণ চ নারদায মুনযে কৃষ্ণায তদ্রূপিণা ।
যোগীন্দ্রায তদাত্মনাথ ভগবদ্রাতায কারুণ্যত-
স্তচ্ছুদ্ধং বিমলং বিশোকমমৃতং সত্যং পরং ধীমহি ॥ ১৯ ॥

নমস্তস্মৈ ভগবতে বাসুদেবায সাক্ষিণে ।
য ইদং কৃপযা কস্মৈ ব্যাচচক্ষে মুমুক্ষবে ॥ ২০ ॥

যোগীন্দ্রায নমস্তস্মৈ শুকায ব্রহ্মরূপিণে ।
সংসারসর্পদষ্টং যো বিষ্ণুরাতমমূমুচত্ ॥ ২১ ॥

ভবে ভবে যথা ভক্তিঃ পাদযোস্তব জাযতে ।
তথা কুরুষ্ব দেবেশ নাথস্ত্বং নো যতঃ প্রভো ॥ ২২ ॥

নামসঙ্কীর্তনং যস্য সর্বপাপপ্রণাশনম্ ।
প্রণামো দুঃখশমনস্তং নমামি হরিং পরম্ ॥ ২৩ ॥