ശ്രീമദ്ഭാഗവതമ് ൧൨.൧൩

സൂത ഉവാച
യം ബ്രഹ്മാ വരുണേന്ദ്രരുദ്രമരുതഃ സ്തുന്വന്തി ദിവ്യൈഃ സ്തവൈ-
ര്വേദൈഃ സാങ്ഗപദക്രമോപനിഷദൈര്ഗായന്തി യം സാമഗാഃ ।
ധ്യാനാവസ്ഥിതതദ്ഗതേന മനസാ പശ്യന്തി യം യോഗിനോ
യസ്യാന്തം ന വിദുഃ സുരാസുരഗണാ ദേവായ തസ്മൈ നമഃ ॥ ൧ ॥

പൃഷ്ഠേ ഭ്രാമ്യദമന്ദമന്ദരഗിരിഗ്രാവാഗ്രകണ്ഡൂയനാ-
ന്നിദ്രാലോഃ കമഠാകൃതേര്ഭഗവതഃ ശ്വാസാനിലാഃ പാന്തു വഃ ।
യത്സംസ്കാരകലാനുവര്തനവശാദ് വേലാനിഭേനാമ്ഭസാം
യാതായാതമതന്ദ്രിതം ജലനിധേര്നാദ്യാപി വിശ്രാമ്യതി ॥ ൨ ॥

പുരാണസങ്ഖ്യാസമ്ഭൂതിമസ്യ വാച്യപ്രയോജനേ ।
ദാനം ദാനസ്യ മാഹാത്മ്യം പാഠാദേശ്ച നിബോധത ॥ ൩ ॥

ബ്രാഹ്മം ദശസഹസ്രാണി പാദ്മം പഞ്ചോനഷഷ്ടി ച ।
ശ്രീവൈഷ്ണവം ത്രയോവിംശച്ചതുര്വിംശതി ശൈവകമ് ॥ ൪ ॥

ദശാഷ്ടൌ ശ്രീഭാഗവതം നാരദം പഞ്ചവിംശതി ।
മാര്കണ്ഡം നവ വാഹ്നം ച ദശപഞ്ച ചതുഃശതമ് ॥ ൫ ॥

ചതുര്ദശ ഭവിഷ്യം സ്യാത്തഥാ പഞ്ചശതാനി ച ।
ദശാഷ്ടൌ ബ്രഹ്മവൈവര്തം ലൈങ്ഗമേകാദശൈവ തു ॥ ൬ ॥

ചതുര്വിംശതി വാരാഹമേകാശീതിസഹസ്രകമ് ।
സ്കാന്ദം ശതം തഥാ ചൈകം വാമനം ദശ കീര്തിതമ് ॥ ൭ ॥

കൌര്മം സപ്തദശാഖ്യാതം മാത്സ്യം തത്തു ചതുര്ദശ ।
ഏകോനവിംശത്സൌപര്ണം ബ്രഹ്മാണ്ഡം ദ്വാദശൈവ തു ॥ ൮ ॥

ഏവം പുരാണസന്ദോഹശ്ചതുര്ലക്ഷ ഉദാഹൃതഃ ।
തത്രാഷ്ടദശസാഹസ്രം ശ്രീഭാഗവതമിഷ്യതേ ॥ ൯ ॥

ഇദം ഭഗവതാ പൂര്വം ബ്രഹ്മണേ നാഭിപങ്കജേ ।
സ്ഥിതായ ഭവഭീതായ കാരുണ്യാത് സമ്പ്രകാശിതമ് ॥ ൧൦ ॥

ആദിമധ്യാവസാനേഷു വൈരാഗ്യാഖ്യാനസംയുതമ് ।
ഹരിലീലാകഥാവ്രാതാമൃതാനന്ദിതസത്സുരമ് ॥ ൧൧ ॥

സര്വവേദാന്തസാരം യദ ബ്രഹ്മാത്മൈകത്വലക്ഷണമ് ।
വസ്ത്വദ്വിതീയം തന്നിഷ്ഠം കൈവല്യൈകപ്രയോജനമ് ॥ ൧൨ ॥

പ്രൌഷ്ഠപദ്യാം പൌര്ണമാസ്യാം ഹേമസിംഹസമന്വിതമ് ।
ദദാതി യോ ഭാഗവതം സ യാതി പരമാം ഗതിമ് ॥ ൧൩ ॥

രാജന്തേ താവദന്യാനി പുരാണാനി സതാം ഗണേ ।
യാവദ്ഭാഗവതം നൈവ ശ്രൂയതേഽമൃതസാഗരമ് ॥ ൧൪ ॥

സര്വവേദാന്തസാരം ഹി ശ്രീഭാഗവതമിഷ്യതേ ।
തദ്രസാമൃതതൃപ്തസ്യ നാന്യത്ര സ്യാദ്രതിഃ ക്വചിത് ॥ ൧൫ ॥

നിമ്നഗാനാം യഥാ ഗങ്ഗാ ദേവാനാമച്യുതോ യഥാ ।
വൈഷ്ണവാനാം യഥാ ശമ്ഭുഃ പുരാണാനാമിദം തഥാ ॥ ൧൬ ॥

ക്ഷേത്രാണാം ചൈവ സര്വേഷാം യഥാ കാശീ ഹ്യനുത്തമാ ।
തഥാ പുരാണവ്രാതാനാം ശ്രീമദ്ഭാഗവതം ദ്വിജാഃ ॥ ൧൭ ॥

ശ്രീമദ്ഭാഗവതം പുരാണമമലം യദ്വൈഷ്ണവാനാം പ്രിയം
യസ്മിന് പാരമഹംസ്യമേകമമലം ജ്ഞാനം പരം ഗീയതേ ।
തത്ര ജ്ഞാനവിരാഗഭക്തിസഹിതം നൈഷ്കര്മ്യമാവിഷ്കൃതം
തച്ഛൃണ്വന് സുപഠന് വിചാരണപരോ ഭക്ത്യാ വിമുച്യേന്നരഃ ॥ ൧൮ ॥

കസ്മൈ യേന വിഭാസിതോഽയമതുലോ ജ്ഞാനപ്രദീപഃ പുരാ
തദ്രൂപേണ ച നാരദായ മുനയേ കൃഷ്ണായ തദ്രൂപിണാ ।
യോഗീന്ദ്രായ തദാത്മനാഥ ഭഗവദ്രാതായ കാരുണ്യത-
സ്തച്ഛുദ്ധം വിമലം വിശോകമമൃതം സത്യം പരം ധീമഹി ॥ ൧൯ ॥

നമസ്തസ്മൈ ഭഗവതേ വാസുദേവായ സാക്ഷിണേ ।
യ ഇദം കൃപയാ കസ്മൈ വ്യാചചക്ഷേ മുമുക്ഷവേ ॥ ൨൦ ॥

യോഗീന്ദ്രായ നമസ്തസ്മൈ ശുകായ ബ്രഹ്മരൂപിണേ ।
സംസാരസര്പദഷ്ടം യോ വിഷ്ണുരാതമമൂമുചത് ॥ ൨൧ ॥

ഭവേ ഭവേ യഥാ ഭക്തിഃ പാദയോസ്തവ ജായതേ ।
തഥാ കുരുഷ്വ ദേവേശ നാഥസ്ത്വം നോ യതഃ പ്രഭോ ॥ ൨൨ ॥

നാമസങ്കീര്തനം യസ്യ സര്വപാപപ്രണാശനമ് ।
പ്രണാമോ ദുഃഖശമനസ്തം നമാമി ഹരിം പരമ് ॥ ൨൩ ॥