శ్రీమద్భాగవతమ్ ౧౨.౧౩

సూత ఉవాచ
యం బ్రహ్మా వరుణేన్ద్రరుద్రమరుతః స్తున్వన్తి దివ్యైః స్తవై-
ర్వేదైః సాఙ్గపదక్రమోపనిషదైర్గాయన్తి యం సామగాః ।
ధ్యానావస్థితతద్గతేన మనసా పశ్యన్తి యం యోగినో
యస్యాన్తం న విదుః సురాసురగణా దేవాయ తస్మై నమః ॥ ౧ ॥

పృష్ఠే భ్రామ్యదమన్దమన్దరగిరిగ్రావాగ్రకణ్డూయనా-
న్నిద్రాలోః కమఠాకృతేర్భగవతః శ్వాసానిలాః పాన్తు వః ।
యత్సంస్కారకలానువర్తనవశాద్ వేలానిభేనామ్భసాం
యాతాయాతమతన్ద్రితం జలనిధేర్నాద్యాపి విశ్రామ్యతి ॥ ౨ ॥

పురాణసఙ్ఖ్యాసమ్భూతిమస్య వాచ్యప్రయోజనే ।
దానం దానస్య మాహాత్మ్యం పాఠాదేశ్చ నిబోధత ॥ ౩ ॥

బ్రాహ్మం దశసహస్రాణి పాద్మం పఞ్చోనషష్టి చ ।
శ్రీవైష్ణవం త్రయోవింశచ్చతుర్వింశతి శైవకమ్ ॥ ౪ ॥

దశాష్టౌ శ్రీభాగవతం నారదం పఞ్చవింశతి ।
మార్కణ్డం నవ వాహ్నం చ దశపఞ్చ చతుఃశతమ్ ॥ ౫ ॥

చతుర్దశ భవిష్యం స్యాత్తథా పఞ్చశతాని చ ।
దశాష్టౌ బ్రహ్మవైవర్తం లైఙ్గమేకాదశైవ తు ॥ ౬ ॥

చతుర్వింశతి వారాహమేకాశీతిసహస్రకమ్ ।
స్కాన్దం శతం తథా చైకం వామనం దశ కీర్తితమ్ ॥ ౭ ॥

కౌర్మం సప్తదశాఖ్యాతం మాత్స్యం తత్తు చతుర్దశ ।
ఏకోనవింశత్సౌపర్ణం బ్రహ్మాణ్డం ద్వాదశైవ తు ॥ ౮ ॥

ఏవం పురాణసన్దోహశ్చతుర్లక్ష ఉదాహృతః ।
తత్రాష్టదశసాహస్రం శ్రీభాగవతమిష్యతే ॥ ౯ ॥

ఇదం భగవతా పూర్వం బ్రహ్మణే నాభిపఙ్కజే ।
స్థితాయ భవభీతాయ కారుణ్యాత్ సమ్ప్రకాశితమ్ ॥ ౧౦ ॥

ఆదిమధ్యావసానేషు వైరాగ్యాఖ్యానసంయుతమ్ ।
హరిలీలాకథావ్రాతామృతానన్దితసత్సురమ్ ॥ ౧౧ ॥

సర్వవేదాన్తసారం యద బ్రహ్మాత్మైకత్వలక్షణమ్ ।
వస్త్వద్వితీయం తన్నిష్ఠం కైవల్యైకప్రయోజనమ్ ॥ ౧౨ ॥

ప్రౌష్ఠపద్యాం పౌర్ణమాస్యాం హేమసింహసమన్వితమ్ ।
దదాతి యో భాగవతం స యాతి పరమాం గతిమ్ ॥ ౧౩ ॥

రాజన్తే తావదన్యాని పురాణాని సతాం గణే ।
యావద్భాగవతం నైవ శ్రూయతేఽమృతసాగరమ్ ॥ ౧౪ ॥

సర్వవేదాన్తసారం హి శ్రీభాగవతమిష్యతే ।
తద్రసామృతతృప్తస్య నాన్యత్ర స్యాద్రతిః క్వచిత్ ॥ ౧౫ ॥

నిమ్నగానాం యథా గఙ్గా దేవానామచ్యుతో యథా ।
వైష్ణవానాం యథా శమ్భుః పురాణానామిదం తథా ॥ ౧౬ ॥

క్షేత్రాణాం చైవ సర్వేషాం యథా కాశీ హ్యనుత్తమా ।
తథా పురాణవ్రాతానాం శ్రీమద్భాగవతం ద్విజాః ॥ ౧౭ ॥

శ్రీమద్భాగవతం పురాణమమలం యద్వైష్ణవానాం ప్రియం
యస్మిన్ పారమహంస్యమేకమమలం జ్ఞానం పరం గీయతే ।
తత్ర జ్ఞానవిరాగభక్తిసహితం నైష్కర్మ్యమావిష్కృతం
తచ్ఛృణ్వన్ సుపఠన్ విచారణపరో భక్త్యా విముచ్యేన్నరః ॥ ౧౮ ॥

కస్మై యేన విభాసితోఽయమతులో జ్ఞానప్రదీపః పురా
తద్రూపేణ చ నారదాయ మునయే కృష్ణాయ తద్రూపిణా ।
యోగీన్ద్రాయ తదాత్మనాథ భగవద్రాతాయ కారుణ్యత-
స్తచ్ఛుద్ధం విమలం విశోకమమృతం సత్యం పరం ధీమహి ॥ ౧౯ ॥

నమస్తస్మై భగవతే వాసుదేవాయ సాక్షిణే ।
య ఇదం కృపయా కస్మై వ్యాచచక్షే ముముక్షవే ॥ ౨౦ ॥

యోగీన్ద్రాయ నమస్తస్మై శుకాయ బ్రహ్మరూపిణే ।
సంసారసర్పదష్టం యో విష్ణురాతమమూముచత్ ॥ ౨౧ ॥

భవే భవే యథా భక్తిః పాదయోస్తవ జాయతే ।
తథా కురుష్వ దేవేశ నాథస్త్వం నో యతః ప్రభో ॥ ౨౨ ॥

నామసఙ్కీర్తనం యస్య సర్వపాపప్రణాశనమ్ ।
ప్రణామో దుఃఖశమనస్తం నమామి హరిం పరమ్ ॥ ౨౩ ॥