શ્રીમદ્ભાગવતમ્ ૧૨.૧૩

સૂત ઉવાચ
યં બ્રહ્મા વરુણેન્દ્રરુદ્રમરુતઃ સ્તુન્વન્તિ દિવ્યૈઃ સ્તવૈ-
ર્વેદૈઃ સાઙ્ગપદક્રમોપનિષદૈર્ગાયન્તિ યં સામગાઃ ।
ધ્યાનાવસ્થિતતદ્ગતેન મનસા પશ્યન્તિ યં યોગિનો
યસ્યાન્તં ન વિદુઃ સુરાસુરગણા દેવાય તસ્મૈ નમઃ ॥ ૧ ॥

પૃષ્ઠે ભ્રામ્યદમન્દમન્દરગિરિગ્રાવાગ્રકણ્ડૂયના-
ન્નિદ્રાલોઃ કમઠાકૃતેર્ભગવતઃ શ્વાસાનિલાઃ પાન્તુ વઃ ।
યત્સંસ્કારકલાનુવર્તનવશાદ્ વેલાનિભેનામ્ભસાં
યાતાયાતમતન્દ્રિતં જલનિધેર્નાદ્યાપિ વિશ્રામ્યતિ ॥ ૨ ॥

પુરાણસઙ્ખ્યાસમ્ભૂતિમસ્ય વાચ્યપ્રયોજને ।
દાનં દાનસ્ય માહાત્મ્યં પાઠાદેશ્ચ નિબોધત ॥ ૩ ॥

બ્રાહ્મં દશસહસ્રાણિ પાદ્મં પઞ્ચોનષષ્ટિ ચ ।
શ્રીવૈષ્ણવં ત્રયોવિંશચ્ચતુર્વિંશતિ શૈવકમ્ ॥ ૪ ॥

દશાષ્ટૌ શ્રીભાગવતં નારદં પઞ્ચવિંશતિ ।
માર્કણ્ડં નવ વાહ્નં ચ દશપઞ્ચ ચતુઃશતમ્ ॥ ૫ ॥

ચતુર્દશ ભવિષ્યં સ્યાત્તથા પઞ્ચશતાનિ ચ ।
દશાષ્ટૌ બ્રહ્મવૈવર્તં લૈઙ્ગમેકાદશૈવ તુ ॥ ૬ ॥

ચતુર્વિંશતિ વારાહમેકાશીતિસહસ્રકમ્ ।
સ્કાન્દં શતં તથા ચૈકં વામનં દશ કીર્તિતમ્ ॥ ૭ ॥

કૌર્મં સપ્તદશાખ્યાતં માત્સ્યં તત્તુ ચતુર્દશ ।
એકોનવિંશત્સૌપર્ણં બ્રહ્માણ્ડં દ્વાદશૈવ તુ ॥ ૮ ॥

એવં પુરાણસન્દોહશ્ચતુર્લક્ષ ઉદાહૃતઃ ।
તત્રાષ્ટદશસાહસ્રં શ્રીભાગવતમિષ્યતે ॥ ૯ ॥

ઇદં ભગવતા પૂર્વં બ્રહ્મણે નાભિપઙ્કજે ।
સ્થિતાય ભવભીતાય કારુણ્યાત્ સમ્પ્રકાશિતમ્ ॥ ૧૦ ॥

આદિમધ્યાવસાનેષુ વૈરાગ્યાખ્યાનસંયુતમ્ ।
હરિલીલાકથાવ્રાતામૃતાનન્દિતસત્સુરમ્ ॥ ૧૧ ॥

સર્વવેદાન્તસારં યદ બ્રહ્માત્મૈકત્વલક્ષણમ્ ।
વસ્ત્વદ્વિતીયં તન્નિષ્ઠં કૈવલ્યૈકપ્રયોજનમ્ ॥ ૧૨ ॥

પ્રૌષ્ઠપદ્યાં પૌર્ણમાસ્યાં હેમસિંહસમન્વિતમ્ ।
દદાતિ યો ભાગવતં સ યાતિ પરમાં ગતિમ્ ॥ ૧૩ ॥

રાજન્તે તાવદન્યાનિ પુરાણાનિ સતાં ગણે ।
યાવદ્ભાગવતં નૈવ શ્રૂયતેઽમૃતસાગરમ્ ॥ ૧૪ ॥

સર્વવેદાન્તસારં હિ શ્રીભાગવતમિષ્યતે ।
તદ્રસામૃતતૃપ્તસ્ય નાન્યત્ર સ્યાદ્રતિઃ ક્વચિત્ ॥ ૧૫ ॥

નિમ્નગાનાં યથા ગઙ્ગા દેવાનામચ્યુતો યથા ।
વૈષ્ણવાનાં યથા શમ્ભુઃ પુરાણાનામિદં તથા ॥ ૧૬ ॥

ક્ષેત્રાણાં ચૈવ સર્વેષાં યથા કાશી હ્યનુત્તમા ।
તથા પુરાણવ્રાતાનાં શ્રીમદ્ભાગવતં દ્વિજાઃ ॥ ૧૭ ॥

શ્રીમદ્ભાગવતં પુરાણમમલં યદ્વૈષ્ણવાનાં પ્રિયં
યસ્મિન્ પારમહંસ્યમેકમમલં જ્ઞાનં પરં ગીયતે ।
તત્ર જ્ઞાનવિરાગભક્તિસહિતં નૈષ્કર્મ્યમાવિષ્કૃતં
તચ્છૃણ્વન્ સુપઠન્ વિચારણપરો ભક્ત્યા વિમુચ્યેન્નરઃ ॥ ૧૮ ॥

કસ્મૈ યેન વિભાસિતોઽયમતુલો જ્ઞાનપ્રદીપઃ પુરા
તદ્રૂપેણ ચ નારદાય મુનયે કૃષ્ણાય તદ્રૂપિણા ।
યોગીન્દ્રાય તદાત્મનાથ ભગવદ્રાતાય કારુણ્યત-
સ્તચ્છુદ્ધં વિમલં વિશોકમમૃતં સત્યં પરં ધીમહિ ॥ ૧૯ ॥

નમસ્તસ્મૈ ભગવતે વાસુદેવાય સાક્ષિણે ।
ય ઇદં કૃપયા કસ્મૈ વ્યાચચક્ષે મુમુક્ષવે ॥ ૨૦ ॥

યોગીન્દ્રાય નમસ્તસ્મૈ શુકાય બ્રહ્મરૂપિણે ।
સંસારસર્પદષ્ટં યો વિષ્ણુરાતમમૂમુચત્ ॥ ૨૧ ॥

ભવે ભવે યથા ભક્તિઃ પાદયોસ્તવ જાયતે ।
તથા કુરુષ્વ દેવેશ નાથસ્ત્વં નો યતઃ પ્રભો ॥ ૨૨ ॥

નામસઙ્કીર્તનં યસ્ય સર્વપાપપ્રણાશનમ્ ।
પ્રણામો દુઃખશમનસ્તં નમામિ હરિં પરમ્ ॥ ૨૩ ॥