ଶ୍ରୀମଦ୍ଭାଗଵତମ୍ ୧୨.୧୩

ସୂତ ଉଵାଚ
ଯଂ ବ୍ରହ୍ମା ଵରୁଣେନ୍ଦ୍ରରୁଦ୍ରମରୁତଃ ସ୍ତୁନ୍ଵନ୍ତି ଦିଵ୍ଯୈଃ ସ୍ତଵୈ-
ର୍ଵେଦୈଃ ସାଙ୍ଗପଦକ୍ରମୋପନିଷଦୈର୍ଗାଯନ୍ତି ଯଂ ସାମଗାଃ ।
ଧ୍ଯାନାଵସ୍ଥିତତଦ୍ଗତେନ ମନସା ପଶ୍ଯନ୍ତି ଯଂ ଯୋଗିନୋ
ଯସ୍ଯାନ୍ତଂ ନ ଵିଦୁଃ ସୁରାସୁରଗଣା ଦେଵାଯ ତସ୍ମୈ ନମଃ ॥ ୧ ॥

ପୃଷ୍ଠେ ଭ୍ରାମ୍ଯଦମନ୍ଦମନ୍ଦରଗିରିଗ୍ରାଵାଗ୍ରକଣ୍ଡୂଯନା-
ନ୍ନିଦ୍ରାଲୋଃ କମଠାକୃତେର୍ଭଗଵତଃ ଶ୍ଵାସାନିଲାଃ ପାନ୍ତୁ ଵଃ ।
ଯତ୍ସଂସ୍କାରକଲାନୁଵର୍ତନଵଶାଦ୍ ଵେଲାନିଭେନାମ୍ଭସାଂ
ଯାତାଯାତମତନ୍ଦ୍ରିତଂ ଜଲନିଧେର୍ନାଦ୍ଯାପି ଵିଶ୍ରାମ୍ଯତି ॥ ୨ ॥

ପୁରାଣସଙ୍ଖ୍ଯାସମ୍ଭୂତିମସ୍ଯ ଵାଚ୍ଯପ୍ରଯୋଜନେ ।
ଦାନଂ ଦାନସ୍ଯ ମାହାତ୍ମ୍ଯଂ ପାଠାଦେଶ୍ଚ ନିବୋଧତ ॥ ୩ ॥

ବ୍ରାହ୍ମଂ ଦଶସହସ୍ରାଣି ପାଦ୍ମଂ ପଞ୍ଚୋନଷଷ୍ଟି ଚ ।
ଶ୍ରୀଵୈଷ୍ଣଵଂ ତ୍ରଯୋଵିଂଶଚ୍ଚତୁର୍ଵିଂଶତି ଶୈଵକମ୍ ॥ ୪ ॥

ଦଶାଷ୍ଟୌ ଶ୍ରୀଭାଗଵତଂ ନାରଦଂ ପଞ୍ଚଵିଂଶତି ।
ମାର୍କଣ୍ଡଂ ନଵ ଵାହ୍ନଂ ଚ ଦଶପଞ୍ଚ ଚତୁଃଶତମ୍ ॥ ୫ ॥

ଚତୁର୍ଦଶ ଭଵିଷ୍ଯଂ ସ୍ଯାତ୍ତଥା ପଞ୍ଚଶତାନି ଚ ।
ଦଶାଷ୍ଟୌ ବ୍ରହ୍ମଵୈଵର୍ତଂ ଲୈଙ୍ଗମେକାଦଶୈଵ ତୁ ॥ ୬ ॥

ଚତୁର୍ଵିଂଶତି ଵାରାହମେକାଶୀତିସହସ୍ରକମ୍ ।
ସ୍କାନ୍ଦଂ ଶତଂ ତଥା ଚୈକଂ ଵାମନଂ ଦଶ କୀର୍ତିତମ୍ ॥ ୭ ॥

କୌର୍ମଂ ସପ୍ତଦଶାଖ୍ଯାତଂ ମାତ୍ସ୍ଯଂ ତତ୍ତୁ ଚତୁର୍ଦଶ ।
ଏକୋନଵିଂଶତ୍ସୌପର୍ଣଂ ବ୍ରହ୍ମାଣ୍ଡଂ ଦ୍ଵାଦଶୈଵ ତୁ ॥ ୮ ॥

ଏଵଂ ପୁରାଣସନ୍ଦୋହଶ୍ଚତୁର୍ଲକ୍ଷ ଉଦାହୃତଃ ।
ତତ୍ରାଷ୍ଟଦଶସାହସ୍ରଂ ଶ୍ରୀଭାଗଵତମିଷ୍ଯତେ ॥ ୯ ॥

ଇଦଂ ଭଗଵତା ପୂର୍ଵଂ ବ୍ରହ୍ମଣେ ନାଭିପଙ୍କଜେ ।
ସ୍ଥିତାଯ ଭଵଭୀତାଯ କାରୁଣ୍ଯାତ୍ ସମ୍ପ୍ରକାଶିତମ୍ ॥ ୧୦ ॥

ଆଦିମଧ୍ଯାଵସାନେଷୁ ଵୈରାଗ୍ଯାଖ୍ଯାନସଂଯୁତମ୍ ।
ହରିଲୀଲାକଥାଵ୍ରାତାମୃତାନନ୍ଦିତସତ୍ସୁରମ୍ ॥ ୧୧ ॥

ସର୍ଵଵେଦାନ୍ତସାରଂ ଯଦ ବ୍ରହ୍ମାତ୍ମୈକତ୍ଵଲକ୍ଷଣମ୍ ।
ଵସ୍ତ୍ଵଦ୍ଵିତୀଯଂ ତନ୍ନିଷ୍ଠଂ କୈଵଲ୍ଯୈକପ୍ରଯୋଜନମ୍ ॥ ୧୨ ॥

ପ୍ରୌଷ୍ଠପଦ୍ଯାଂ ପୌର୍ଣମାସ୍ଯାଂ ହେମସିଂହସମନ୍ଵିତମ୍ ।
ଦଦାତି ଯୋ ଭାଗଵତଂ ସ ଯାତି ପରମାଂ ଗତିମ୍ ॥ ୧୩ ॥

ରାଜନ୍ତେ ତାଵଦନ୍ଯାନି ପୁରାଣାନି ସତାଂ ଗଣେ ।
ଯାଵଦ୍ଭାଗଵତଂ ନୈଵ ଶ୍ରୂଯତେଽମୃତସାଗରମ୍ ॥ ୧୪ ॥

ସର୍ଵଵେଦାନ୍ତସାରଂ ହି ଶ୍ରୀଭାଗଵତମିଷ୍ଯତେ ।
ତଦ୍ରସାମୃତତୃପ୍ତସ୍ଯ ନାନ୍ଯତ୍ର ସ୍ଯାଦ୍ରତିଃ କ୍ଵଚିତ୍ ॥ ୧୫ ॥

ନିମ୍ନଗାନାଂ ଯଥା ଗଙ୍ଗା ଦେଵାନାମଚ୍ଯୁତୋ ଯଥା ।
ଵୈଷ୍ଣଵାନାଂ ଯଥା ଶମ୍ଭୁଃ ପୁରାଣାନାମିଦଂ ତଥା ॥ ୧୬ ॥

କ୍ଷେତ୍ରାଣାଂ ଚୈଵ ସର୍ଵେଷାଂ ଯଥା କାଶୀ ହ୍ଯନୁତ୍ତମା ।
ତଥା ପୁରାଣଵ୍ରାତାନାଂ ଶ୍ରୀମଦ୍ଭାଗଵତଂ ଦ୍ଵିଜାଃ ॥ ୧୭ ॥

ଶ୍ରୀମଦ୍ଭାଗଵତଂ ପୁରାଣମମଲଂ ଯଦ୍ଵୈଷ୍ଣଵାନାଂ ପ୍ରିଯଂ
ଯସ୍ମିନ୍ ପାରମହଂସ୍ଯମେକମମଲଂ ଜ୍ଞାନଂ ପରଂ ଗୀଯତେ ।
ତତ୍ର ଜ୍ଞାନଵିରାଗଭକ୍ତିସହିତଂ ନୈଷ୍କର୍ମ୍ଯମାଵିଷ୍କୃତଂ
ତଚ୍ଛୃଣ୍ଵନ୍ ସୁପଠନ୍ ଵିଚାରଣପରୋ ଭକ୍ତ୍ଯା ଵିମୁଚ୍ଯେନ୍ନରଃ ॥ ୧୮ ॥

କସ୍ମୈ ଯେନ ଵିଭାସିତୋଽଯମତୁଲୋ ଜ୍ଞାନପ୍ରଦୀପଃ ପୁରା
ତଦ୍ରୂପେଣ ଚ ନାରଦାଯ ମୁନଯେ କୃଷ୍ଣାଯ ତଦ୍ରୂପିଣା ।
ଯୋଗୀନ୍ଦ୍ରାଯ ତଦାତ୍ମନାଥ ଭଗଵଦ୍ରାତାଯ କାରୁଣ୍ଯତ-
ସ୍ତଚ୍ଛୁଦ୍ଧଂ ଵିମଲଂ ଵିଶୋକମମୃତଂ ସତ୍ଯଂ ପରଂ ଧୀମହି ॥ ୧୯ ॥

ନମସ୍ତସ୍ମୈ ଭଗଵତେ ଵାସୁଦେଵାଯ ସାକ୍ଷିଣେ ।
ଯ ଇଦଂ କୃପଯା କସ୍ମୈ ଵ୍ଯାଚଚକ୍ଷେ ମୁମୁକ୍ଷଵେ ॥ ୨୦ ॥

ଯୋଗୀନ୍ଦ୍ରାଯ ନମସ୍ତସ୍ମୈ ଶୁକାଯ ବ୍ରହ୍ମରୂପିଣେ ।
ସଂସାରସର୍ପଦଷ୍ଟଂ ଯୋ ଵିଷ୍ଣୁରାତମମୂମୁଚତ୍ ॥ ୨୧ ॥

ଭଵେ ଭଵେ ଯଥା ଭକ୍ତିଃ ପାଦଯୋସ୍ତଵ ଜାଯତେ ।
ତଥା କୁରୁଷ୍ଵ ଦେଵେଶ ନାଥସ୍ତ୍ଵଂ ନୋ ଯତଃ ପ୍ରଭୋ ॥ ୨୨ ॥

ନାମସଙ୍କୀର୍ତନଂ ଯସ୍ଯ ସର୍ଵପାପପ୍ରଣାଶନମ୍ ।
ପ୍ରଣାମୋ ଦୁଃଖଶମନସ୍ତଂ ନମାମି ହରିଂ ପରମ୍ ॥ ୨୩ ॥