শ্রীমদ্ভাগবতম্ ১২.৬

সূত উবাচ
এতন্নিশম্য মুনিনাভিহিতং পরীক্ষিদ্
ব্যাসাত্মজেন নিখিলাত্মদৃশা সমেন ।
তত্পাদমূলমুপসৃত্য নতেন মূর্ধ্না
বদ্ধাঞ্জলিস্তমিদমাহ স বিষ্ণুরাতঃ ॥ ১ ॥

রাজোবাচ
সিদ্ধোঽস্ম্যনুগৃহীতোঽস্মি ভবতা করুণাত্মনা ।
শ্রাবিতো যচ্চ মে সাক্ষাদনাদিনিধনো হরিঃ ॥ ২ ॥

নাত্যদ্ভুতমহং মন্যে মহতামচ্যুতাত্মনাম্ ।
অজ্ঞেষু তাপতপ্তেষু ভূতেষু যদনুগ্রহঃ ॥ ৩ ॥

পুরাণসংহিতামেতামশ্রৌষ্ম ভবতো বযম্ ।
যস্যাং খলূত্তমঃশ্লোকো ভগবাননুবর্ণ্যতে ॥ ৪ ॥

ভগবংস্তক্ষকাদিভ্যো মৃত্যুভ্যো ন বিভেম্যহম্ ।
প্রবিষ্টো ব্রহ্ম নির্বাণমভযং দর্শিতং ত্বযা ॥ ৫ ॥

অনুজানীহি মাং ব্রহ্মন্ বাচং যচ্ছাম্যধোক্ষজে ।
মুক্তকামাশযং চেতঃ প্রবেশ্য বিসৃজাম্যসূন্ ॥ ৬ ॥

অজ্ঞানং চ নিরস্তং মে জ্ঞানবিজ্ঞাননিষ্ঠযা ।
ভবতা দর্শিতং ক্ষেমং পরং ভগবতঃ পদম্ ॥ ৭ ॥

সূত উবাচ
ইত্যুক্তস্তমনুজ্ঞাপ্য ভগবান্ বাদরাযণিঃ ।
জগাম ভিক্ষুভিঃ সাকং নরদেবেন পূজিতঃ ॥ ৮ ॥

পরীক্ষিদপি রাজর্ষিরাত্মন্যাত্মানমাত্মনা ।
সমাধায পরং দধ্যাবস্পন্দাসুর্যথা তরুঃ ॥ ৯ ॥

প্রাক্কূলে বর্হিষ্যাসীনো গঙ্গাকূল উদঙ্মুখঃ ।
ব্রহ্মভূতো মহাযোগী নিঃসঙ্গশ্ছিন্নসংশযঃ ॥ ১০ ॥

তক্ষকঃ প্রহিতো বিপ্রাঃ ক্রুদ্ধেন দ্বিজসূনুনা ।
হন্তুকামো নৃপং গচ্ছন্ দদর্শ পথি কশ্যপম্ ॥ ১১ ॥

তং তর্পযিত্বা দ্রবিণৈর্নিবর্ত্য বিষহারিণম্ ।
দ্বিজরূপপ্রতিচ্ছন্নঃ কামরূপোঽদশন্নৃপম্ ॥ ১২ ॥

ব্রহ্মভূতস্য রাজর্ষের্দেহোঽহিগরলাগ্নিনা ।
বভূব ভস্মসাত্ সদ্যঃ পশ্যতাং সর্বদেহিনাম্ ॥ ১৩ ॥

হাহাকারো মহানাসীদ্ ভুবি খে দিক্ষু সর্বতঃ ।
বিস্মিতা হ্যভবন্ সর্বে দেবাসুরনরাদযঃ ॥ ১৪ ॥

দেবদুন্দুভযো নেদুর্গন্ধর্বাপ্সরসো জগুঃ ।
ববৃষুঃ পুষ্পবর্ষাণি বিবুধাঃ সাধুবাদিনঃ ॥ ১৫ ॥

জন্মেজযঃ স্বপিতরং শ্রুত্বা তক্ষকভক্ষিতম্ ।
যথা জুহাব সঙ্ক্রুদ্ধো নাগান্ সত্রে সহ দ্বিজৈঃ ॥ ১৬ ॥

সর্পসত্রে সমিদ্ধাগ্নৌ দহ্যমানান্ মহোরগান্ ।
দৃষ্ট্বেন্দ্রং ভযসংবিগ্নস্তক্ষকঃ শরণং যযৌ ॥ ১৭ ॥

অপশ্যংস্তক্ষকং তত্র রাজা পারীক্ষিতো দ্বিজান্ ।
উবাচতক্ষকঃ কস্মান্ন দহ্যেতোরগাধমঃ ॥ ১৮ ॥

তং গোপাযতি রাজেন্দ্র শক্রঃ শরণমাগতম্ ।
তেন সংস্তম্ভিতঃ সর্পস্তস্মান্নাগ্নৌ পতত্যসৌ ॥ ১৯ ॥

পারীক্ষিত ইতি শ্রুত্বা প্রাহর্ত্বিজ উদারধীঃ ।
সহেন্দ্রস্তক্ষকো বিপ্রা নাগ্নৌ কিমিতি পাত্যতে ॥ ২০ ॥

তচ্ছ্রুত্বাজুহুবুর্বিপ্রাঃ সহেন্দ্রং তক্ষকং মখে ।
তক্ষকাশু পতস্বেহ সহেন্দ্রেণ মরুত্বতা ॥ ২১ ॥

ইতি ব্রহ্মোদিতাক্ষেপৈঃ স্থানাদিন্দ্রঃ প্রচালিতঃ ।
বভূব সম্ভ্রান্তমতিঃ সবিমানঃ সতক্ষকঃ ॥ ২২ ॥

তং পতন্তং বিমানেন সহতক্ষকমম্বরাত্ ।
বিলোক্যাঙ্গিরসঃ প্রাহ রাজানং তং বৃহস্পতিঃ ॥ ২৩ ॥

নৈষ ত্বযা মনুষ্যেন্দ্র বধমর্হতি সর্পরাট্ ।
অনেন পীতমমৃতমথ বা অজরামরঃ ॥ ২৪ ॥

জীবিতং মরণং জন্তোর্গতিঃ স্বেনৈব কর্মণা ।
রাজংস্ততোঽন্যো নাস্ত্যস্য প্রদাতা সুখদুঃখযোঃ ॥ ২৫ ॥

সর্পচৌরাগ্নিবিদ্যুদ্ভ্যঃ ক্ষুত্তৃড্ব্যাধ্যাদিভির্নৃপ ।
পঞ্চত্বমৃচ্ছতে জন্তুর্ভুঙ্ক্ত আরব্ধকর্ম তত্ ॥ ২৬ ॥

তস্মাত্ সত্রমিদং রাজন্ সংস্থীযেতাভিচারিকম্ ।
সর্পা অনাগসো দগ্ধা জনৈর্দিষ্টং হি ভুজ্যতে ॥ ২৭ ॥

সূত উবাচ
ইত্যুক্তঃ স তথেত্যাহ মহর্ষের্মানযন্ বচঃ ।
সর্পসত্রাদুপরতঃ পূজযামাস বাক্পতিম্ ॥ ২৮ ॥

সৈষা বিষ্ণোর্মহামাযাবাধ্যযালক্ষণা যযা ।
মুহ্যন্ত্যস্যৈবাত্মভূতা ভূতেষু গুণবৃত্তিভিঃ ॥ ২৯ ॥

ন যত্র দম্ভীত্যভযা বিরাজিতা
মাযাত্মবাদেঽসকৃদাত্মবাদিভিঃ ।
ন যদ্বিবাদো বিবিধস্তদাশ্রযো
মনশ্চ সঙ্কল্পবিকল্পবৃত্তি যত্ ॥ ৩০ ॥

ন যত্র সৃজ্যং সৃজতোভযোঃ পরং
শ্রেযশ্চ জীবস্ত্রিভিরন্বিতস্ত্বহম্ ।
তদেতদুত্সাদিতবাধ্যবাধকং
নিষিধ্য চোর্মীন্ বিরমেত তন্মুনিঃ ॥ ৩১ ॥

পরং পদং বৈষ্ণবমামনন্তি তদ্
যন্নেতি নেতীত্যতদুত্সিসৃক্ষবঃ ।
বিসৃজ্য দৌরাত্ম্যমনন্যসৌহৃদা
হৃদোপগুহ্যাবসিতং সমাহিতৈঃ ॥ ৩২ ॥

ত এতদধিগচ্ছন্তি বিষ্ণোর্যত্ পরমং পদম্ ।
অহং মমেতি দৌর্জন্যং ন যেষাং দেহগেহজম্ ॥ ৩৩ ॥

অতিবাদাংস্তিতিক্ষেত নাবমন্যেত কঞ্চন ।
ন চেমং দেহমাশ্রিত্য বৈরং কুর্বীত কেনচিত্ ॥ ৩৪ ॥

নমো ভগবতে তস্মৈ কৃষ্ণাযাকুণ্ঠমেধসে ।
যত্পাদাম্বুরুহধ্যানাত্ সংহিতামধ্যগামিমাম্ ॥ ৩৫ ॥

শ্রীশৌনক উবাচ
পৈলাদিভির্ব্যাসশিষ্যৈর্বেদাচার্যৈর্মহাত্মভিঃ ।
বেদাশ্চ কথিতা ব্যস্তা এতত্ সৌম্যাভিধেহি নঃ ॥ ৩৬ ॥

সূত উবাচ
সমাহিতাত্মনো ব্রহ্মন্ ব্রহ্মণঃ পরমেষ্ঠিনঃ ।
হৃদ্যাকাশাদভূন্নাদো বৃত্তিরোধাদ্ বিভাব্যতে ॥ ৩৭ ॥

যদুপাসনযা ব্রহ্মন্ যোগিনো মলমাত্মনঃ ।
দ্রব্যক্রিযাকারকাখ্যং ধূত্বা যান্ত্যপুনর্ভবম্ ॥ ৩৮ ॥

ততোঽভূত্ত্রিবৃদোংকারো যোঽব্যক্তপ্রভবঃ স্বরাট্ ।
যত্তল্লিঙ্গং ভগবতো ব্রহ্মণঃ পরমাত্মনঃ ॥ ৩৯ ॥

শৃণোতি য ইমং স্ফোটং সুপ্তশ্রোত্রে চ শূন্যদৃক্ ।
যেন বাগ্ ব্যজ্যতে যস্য ব্যক্তিরাকাশ আত্মনঃ ॥ ৪০ ॥

স্বধাম্নো ব্রাহ্মণঃ সাক্ষাদ্ বাচকঃ পরমাত্মনঃ ।
স সর্বমন্ত্রোপনিষদ্বেদবীজং সনাতনম্ ॥ ৪১ ॥

তস্য হ্যাসংস্ত্রযো বর্ণা অকারাদ্যা ভৃগূদ্বহ ।
ধার্যন্তে যৈস্ত্রযো ভাবা গুণনামার্থবৃত্তযঃ ॥ ৪২ ॥

ততোঽক্ষরসমাম্নাযমসৃজদ্ ভগবানজঃ ।
অন্তস্থোষ্মস্বরস্পর্শহ্রস্বদীর্ঘাদিলক্ষণম্ ॥ ৪৩ ॥

তেনাসৌ চতুরো বেদাংশ্চতুর্ভির্বদনৈর্বিভুঃ ।
সব্যাহৃতিকান্ সোংকারাংশ্চাতুর্হোত্রবিবক্ষযা ॥ ৪৪ ॥

পুত্রানধ্যাপযত্তাংস্তু ব্রহ্মর্ষীন্ ব্রহ্মকোবিদান্ ।
তে তু ধর্মোপদেষ্টারঃ স্বপুত্রেভ্যঃ সমাদিশন্ ॥ ৪৫ ॥

তে পরম্পরযা প্রাপ্তাস্তত্তচ্ছিষ্যৈর্ধৃতব্রতৈঃ ।
চতুর্যুগেষ্বথ ব্যস্তা দ্বাপরাদৌ মহর্ষিভিঃ ॥ ৪৬ ॥

ক্ষীণাযুষঃ ক্ষীণসত্ত্বান্ দুর্মেধান্ বীক্ষ্য কালতঃ ।
বেদান্ব্রহ্মর্ষযো ব্যস্যন্ হৃদিস্থাচ্যুতচোদিতাঃ ॥ ৪৭ ॥

অস্মিন্নপ্যন্তরে ব্রহ্মন্ ভগবান্লোকভাবনঃ ।
ব্রহ্মেশাদ্যৈর্লোকপালৈর্যাচিতো ধর্মগুপ্তযে ॥ ৪৮ ॥

পরাশরাত্ সত্যবত্যামংশাংশকলযা বিভুঃ ।
অবতীর্ণো মহাভাগ বেদং চক্রে চতুর্বিধম্ ॥ ৪৯ ॥

ঋগথর্বযজুঃসাম্নাং রাশীরুদ্ধৃত্য বর্গশঃ ।
চতস্রঃ সংহিতাশ্চক্রে মন্ত্রৈর্মণিগণা ইব ॥ ৫০ ॥

তাসাং স চতুরঃ শিষ্যানুপাহূয মহামতিঃ ।
একৈকাং সংহিতাং ব্রহ্মন্নেকৈকস্মৈ দদৌ বিভুঃ ॥ ৫১ ॥

পৈলায সংহিতামাদ্যাং বহ্বৃচাখ্যাং উবাচহ ।
বৈশম্পাযনসংজ্ঞায নিগদাখ্যং যজুর্গণম্ ॥ ৫২ ॥

সাম্নাং জৈমিনযে প্রাহ তথা ছন্দোগসংহিতাম্ ।
অথর্বাঙ্গিরসীং নাম স্বশিষ্যায সুমন্তবে ॥ ৫৩ ॥

পৈলঃ স্বসংহিতামূচে ইন্দ্রপ্রমিতযে মুনিঃ ।
বাষ্কলায চ সোঽপ্যাহ শিষ্যেভ্যঃ সংহিতাং স্বকাম্ ॥ ৫৪ ॥

চতুর্ধা ব্যস্য বোধ্যায যাজ্ঞবল্ক্যায ভার্গব ।
পরাশরাযাগ্নিমিত্র ইন্দ্রপ্রমিতিরাত্মবান্ ॥ ৫৫ ॥

অধ্যাপযত্ সংহিতাং স্বাং মাণ্ডূকেযমৃষিং কবিম্ ।
তস্য শিষ্যো দেবমিত্রঃ সৌভর্যাদিভ্য ঊচিবান্ ॥ ৫৬ ॥

শাকল্যস্তত্সুতঃ স্বাং তু পঞ্চধা ব্যস্য সংহিতাম্ ।
বাত্স্যমুদ্গলশালীযগোখল্যশিশিরেষ্বধাত্ ॥ ৫৭ ॥

জাতূকর্ণ্যশ্চ তচ্ছিষ্যঃ সনিরুক্তাং স্বসংহিতাম্ ।
বলাকপৈলজাবালবিরজেভ্যো দদৌ মুনিঃ ॥ ৫৮ ॥

বাষ্কলিঃ প্রতিশাখাভ্যো বালখিল্যাখ্যসংহিতাম্ ।
চক্রে বালাযনির্ভজ্যঃ কাশারশ্চৈব তাং দধুঃ ॥ ৫৯ ॥

বহ্বৃচাঃ সংহিতা হ্যেতা এভির্ব্রহ্মর্ষিভির্ধৃতাঃ ।
শ্রুত্বৈতচ্ছন্দসাং ব্যাসং সর্বপাপৈঃ প্রমুচ্যতে ॥ ৬০ ॥

বৈশম্পাযনশিষ্যা বৈ চরকাধ্বর্যবোঽভবন্ ।
যচ্চেরুর্ব্রহ্মহত্যাংহঃ ক্ষপণং স্বগুরোর্ব্রতম্ ॥ ৬১ ॥

যাজ্ঞবল্ক্যশ্চ তচ্ছিষ্য আহাহো ভগবন্ কিযত্ ।
চরিতেনাল্পসারাণাং চরিষ্যেঽহং সুদুশ্চরম্ ॥ ৬২ ॥

ইত্যুক্তো গুরুরপ্যাহ কুপিতো যাহ্যলং ত্বযা ।
বিপ্রাবমন্ত্রা শিষ্যেণ মদধীতং ত্যজাশ্বিতি ॥ ৬৩ ॥

দেবরাতসুতঃ সোঽপি ছর্দিত্বা যজুষাং গণম্ ।
ততো গতোঽথ মুনযো দদৃশুস্তান্ যজুর্গণান্ ॥ ৬৪ ॥

যজূংষি তিত্তিরা ভূত্বা তল্লোলুপতযাদদুঃ ।
তৈত্তিরীযা ইতি যজুঃশাখা আসন্ সুপেশলাঃ ॥ ৬৫ ॥

যাজ্ঞবল্ক্যস্ততো ব্রহ্মংশ্ছন্দাংস্যধিগবেষযন্ ।
গুরোরবিদ্যমানানি সূপতস্থেঽর্কমীশ্বরম্ ॥ ৬৬ ॥

শ্রীযাজ্ঞবল্ক্য উবাচ
ওঁ নমো ভগবতে আদিত্যাযাখিলজগতামাত্মস্বরূপেণ কালস্বরূপেণ চতুর্বিধভূতনিকাযানাং ব্রহ্মাদিস্তম্বপর্যন্তানামন্তর্হৃদযেষু বহিরপি চাকাশ ইবোপাধিনাব্যবধীযমানো ভবানেক এব ক্ষণলবনিমেষাবযবোপচিতসংবত্সরগণেনাপামাদান বিসর্গাভ্যামিমাং লোকযাত্রামনুবহতি ॥ ৬৭ ॥

যদু হ বাব বিবুধর্ষভ সবিতরদস্তপত্যনুসবনমহর অহরাম্নাযবিধিনোপতিষ্ঠমানানামখিলদুরিতবৃজিন বীজাবভর্জন ভগবতঃ সমভিধীমহি তপন মণ্ডলম্ ॥ ৬৮ ॥

য ইহ বাব স্থিরচরনিকরাণাং নিজনিকেতনানাং মনইন্দ্রিযাসু গণাননাত্মনঃ স্বযমাত্মান্তর্যামী প্রচোদযতি ॥ ৬৯ ॥

য এবেমং লোকমতিকরালবদনান্ধকারসংজ্ঞাজগরগ্রহ গিলিতং মৃতকমিব বিচেতনমবলোক্যানুকম্পযা পরমকারুণিক ঈক্ষযৈবোত্থাপ্যাহরহরনুসবনং শ্রেযসি স্বধর্মাখ্যাত্মাবস্থানে প্রবর্তযতি ॥ ৭০ ॥

অবনিপতিরিবাসাধূনাং ভযমুদীরযন্নটতি পরিত আশাপালৈস্তত্র তত্র কমলকোশাঞ্জলিভিরুপহৃতার্হণঃ ॥ ৭১ ॥

অথ হ ভগবংস্তব চরণনলিনযুগলং ত্রিভুবনগুরুভিরভিবন্দিতমহমযাতযামযজুষ্কাম উপসরামীতি ॥ ৭২ ॥

সূত উবাচ
এবং স্তুতঃ স ভগবান্ বাজিরূপধরো রবিঃ ।
যজূংষ্যযাতযামানি মুনযেঽদাত্ প্রসাদিতঃ ॥ ৭৩ ॥

যজুর্ভিরকরোচ্ছাখা দশপঞ্চ শতৈর্বিভুঃ ।
জগৃহুর্বাজসন্যস্তাঃ কাণ্বমাধ্যন্দিনাদযঃ ॥ ৭৪ ॥

জৈমিনেঃ সামগস্যাসীত্ সুমন্তুস্তনযো মুনিঃ ।
সুত্বাংস্তু তত্সুতস্তাভ্যামেকৈকাং প্রাহ সংহিতাম্ ॥ ৭৫ ॥

সুকর্মা চাপি তচ্ছিষ্যঃ সামবেদতরোর্মহান্ ।
সহস্রসংহিতাভেদং চক্রে সাম্নাং ততো দ্বিজ ॥ ৭৬ ॥

হিরণ্যনাভঃ কৌশল্যঃ পৌষ্যঞ্জিশ্চ সুকর্মণঃ ।
শিষ্যৌ জগৃহতুশ্চান্য আবন্ত্যো ব্রহ্মবিত্তমঃ ॥ ৭৭ ॥

উদীচ্যাঃ সামগাঃ শিষ্যা আসন্ পঞ্চশতানি বৈ ।
পৌষ্যঞ্জ্যাবন্ত্যযোশ্চাপি তাংশ্চ প্রাচ্যান্ প্রচক্ষতে ॥ ৭৮ ॥

লৌগাক্ষির্মাঙ্গলিঃ কুল্যঃ কুশীদঃ কুক্ষিরেব চ ।
পৌষ্যঞ্জিশিষ্যা জগৃহুঃ সংহিতাস্তে শতং শতম্ ॥ ৭৯ ॥

কৃতো হিরণ্যনাভস্য চতুর্বিংশতিসংহিতাঃ ।
শিষ্য ঊচে স্বশিষ্যেভ্যঃ শেষা আবন্ত্য আত্মবান্ ॥ ৮০ ॥