শ্ৰীমদ্ভাগৱতম্ ৬.১৯

শ্ৰীৰাজোৱাচ
ৱ্ৰতং পুংসৱনং ব্ৰহ্মন্ ভৱতা যদুদীৰিতম্ ।
তস্য ৱেদিতুমিচ্ছামি যেন ৱিষ্ণুঃ প্ৰসীদতি ॥ ১ ॥

শ্ৰীশুক উৱাচ
শুক্লে মাৰ্গশিৰে পক্ষে যোষিদ্ভৰ্তুৰনুজ্ঞযা ।
আৰভেত ৱ্ৰতমিদং সাৰ্ৱকামিকমাদিতঃ ॥ ২ ॥

নিশম্য মৰুতাং জন্ম ব্ৰাহ্মণাননুমন্ত্ৰ্য চ ।
স্নাত্ৱা শুক্লদতী শুক্লে ৱসীতালঙ্কৃতাম্বৰে ।
পূজযেত্প্ৰাতৰাশাত্প্ৰাগ্ভগৱন্তং শ্ৰিযা সহ ॥ ৩ ॥

অলং তে নিৰপেক্ষায পূৰ্ণকাম নমোঽস্তু তে ।
মহাৱিভূতিপতযে নমঃ সকলসিদ্ধযে ॥ ৪ ॥

যথা ত্ৱং কৃপযা ভূত্যা তেজসা মহিমৌজসা ।
জুষ্ট ঈশ গুণৈঃ সৰ্ৱৈস্ততোঽসি ভগৱান্ প্ৰভুঃ ॥ ৫ ॥

ৱিষ্ণুপত্নি মহামাযে মহাপুৰুষলক্ষণে ।
প্ৰীযেথা মে মহাভাগে লোকমাতৰ্নমোঽস্তু তে ॥ ৬ ॥

ওঁ নমো ভগৱতে মহাপুৰুষায মহানুভাৱায মহাৱিভূতিপতযে সহ মহাৱিভূতিভিৰ্বলিমুপহৰামীতি । অনেনাহৰহৰ্মন্ত্ৰেণ ৱিষ্ণোৰাৱাহনাৰ্ঘ্যপাদ্যোপস্পৰ্শনস্নানৱাসউপৱীতৱিভূষণগন্ধপুষ্পধূপ দীপোপহাৰাদ্যুপচাৰান্ সুসমাহিতোপাহৰেত্ ॥ ৭ ॥

হৱিঃশেষং চ জুহুযাদনলে দ্ৱাদশাহুতীঃ ।
ওঁ নমো ভগৱতে মহাপুৰুষায মহাৱিভূতিপতযে স্ৱাহেতি ॥ ৮ ॥

শ্ৰিযং ৱিষ্ণুং চ ৱৰদাৱাশিষাং প্ৰভৱাৱুভৌ ।
ভক্ত্যা সম্পূজযেন্নিত্যং যদীচ্ছেত্সৰ্ৱসম্পদঃ ॥ ৯ ॥

প্ৰণমেদ্দণ্ডৱদ্ভূমৌ ভক্তিপ্ৰহ্ৱেণ চেতসা ।
দশৱাৰং জপেন্মন্ত্ৰং ততঃ স্তোত্ৰমুদীৰযেত্ ॥ ১০ ॥

যুৱাং তু ৱিশ্ৱস্য ৱিভূ জগতঃ কাৰণং পৰম্ ।
ইযং হি প্ৰকৃতিঃ সূক্ষ্মা মাযাশক্তিৰ্দুৰত্যযা ॥ ১১ ॥

তস্যা অধীশ্ৱৰঃ সাক্ষাত্ত্ৱমেৱ পুৰুষঃ পৰঃ ।
ত্ৱং সৰ্ৱযজ্ঞ ইজ্যেযং ক্ৰিযেযং ফলভুগ্ভৱান্ ॥ ১২ ॥

গুণৱ্যক্তিৰিযং দেৱী ৱ্যঞ্জকো গুণভুগ্ভৱান্ ।
ত্ৱং হি সৰ্ৱশৰীৰ্যাত্মা শ্ৰীঃ শৰীৰেন্দ্ৰিযাশযাঃ ।
নামৰূপে ভগৱতী প্ৰত্যযস্ত্ৱমপাশ্ৰযঃ ॥ ১৩ ॥

যথা যুৱাং ত্ৰিলোকস্য ৱৰদৌ পৰমেষ্ঠিনৌ ।
তথা ম
উত্তমশ্লোক সন্তু সত্যা মহাশিষঃ ॥ ১৪ ॥

ইত্যভিষ্টূয ৱৰদং শ্ৰীনিৱাসং শ্ৰিযা সহ ।
তন্নিঃসাৰ্যোপহৰণং
দত্ত্ৱাচমনমৰ্চযেত্ ॥ ১৫ ॥

ততঃ স্তুৱীত স্তোত্ৰেণ ভক্তিপ্ৰহ্ৱেণ
চেতসা ।
যজ্ঞোচ্ছিষ্টমৱঘ্ৰায পুনৰভ্যৰ্চযেদ্ধৰিম্ ॥ ১৬ ॥

পতিং চ পৰযা ভক্ত্যা মহাপুৰুষচেতসা ।
প্ৰিযৈস্তৈস্তৈৰুপনমেত্ প্ৰেমশীলঃ স্ৱযং পতিঃ ।
বিভৃযাত্ সৰ্ৱকৰ্মাণি পত্ন্যা উচ্চাৱচানি চ ॥ ১৭ ॥

কৃতমেকতৰেণাপি দম্পত্যোৰুভযোৰপি ।
পত্ন্যাং কুৰ্যাদনৰ্হাযাং পতিৰেতত্ সমাহিতঃ ॥ ১৮ ॥

ৱিষ্ণোৰ্ৱ্ৰতমিদং বিভ্ৰন্ন ৱিহন্যাত্কথঞ্চন ।
ৱিপ্ৰান্ স্ত্ৰিযো ৱীৰৱতীঃ স্ৰগ্গন্ধবলিমণ্ডনৈঃ ।
অৰ্চেদহৰহৰ্ভক্ত্যা দেৱং নিযমমাস্থিতা ॥ ১৯ ॥

উদ্ৱাস্য দেৱং স্ৱে ধাম্নি তন্নিৱেদিতমগ্ৰতঃ ।
অদ্যাদাত্মৱিশুদ্ধ্যৰ্থং সৰ্ৱকামসমৃদ্ধযে ॥ ২০ ॥

এতেন পূজাৱিধিনা মাসান্ দ্ৱাদশ হাযনম্ ।
নীত্ৱাথোপৰমেত্সাধ্ৱী কাৰ্তিকে চৰমেঽহনি ॥ ২১ ॥

শ্ৱোভূতেঽপ উপস্পৃশ্য কৃষ্ণমভ্যৰ্চ্য পূৰ্ৱৱত্ ।
পযঃশৃতেন জুহুযাচ্চৰুণা সহ সৰ্পিষা ।
পাকযজ্ঞৱিধানেন দ্ৱাদশৈৱাহুতীঃ পতিঃ ॥ ২২ ॥

আশিষঃ শিৰসাদায দ্ৱিজৈঃ প্ৰীতৈঃ সমীৰিতাঃ ।
প্ৰণম্য শিৰসা ভক্ত্যা ভুঞ্জীত তদনুজ্ঞযা ॥ ২৩ ॥

আচাৰ্যমগ্ৰতঃ কৃত্ৱা ৱাগ্যতঃ সহ বন্ধুভিঃ ।
দদ্যাত্পত্ন্যৈ চৰোঃ শেষং সুপ্ৰজাস্ত্ৱং সুসৌভগম্ ॥ ২৪ ॥

এতচ্চৰিত্ৱা ৱিধিৱদ্ৱ্ৰতং ৱিভো
ৰভীপ্সিতাৰ্থং লভতে পুমানিহ ।
স্ত্ৰী চৈতদাস্থায লভেত সৌভগং
শ্ৰিযং প্ৰজাং জীৱপতিং যশো গৃহম্ ॥ ২৫ ॥

কন্যা চ ৱিন্দেত সমগ্ৰলক্ষণং
পতিং ত্ৱৱীৰা হতকিল্বিষাং গতিম্ ।
মৃতপ্ৰজা জীৱসুতা ধনেশ্ৱৰী
সুদুৰ্ভগা সুভগা ৰূপমগ্ৰ্যম্ ॥ ২৬ ॥

ৱিন্দেদ্ৱিৰূপা ৱিৰুজা ৱিমুচ্যতে
য আমযাৱীন্দ্ৰিযকল্যদেহম্ ।
এতত্পঠন্নভ্যুদযে চ কৰ্ম-
ণ্যনন্ততৃপ্তিঃ পিতৃদেৱতানাম্ ॥ ২৭ ॥

তুষ্টাঃ প্ৰযচ্ছন্তি সমস্তকামান্
হোমাৱসানে হুতভুক্ শ্ৰীহৰিশ্চ ।
ৰাজন্ মহন্মৰুতাং জন্ম পুণ্যং
দিতেৰ্ৱ্ৰতং চাভিহিতং মহত্তে ॥ ২৮ ॥