শ্রীমদ্ভাগবতম্ ৬.১৯

শ্রীরাজোবাচ
ব্রতং পুংসবনং ব্রহ্মন্ ভবতা যদুদীরিতম্ ।
তস্য বেদিতুমিচ্ছামি যেন বিষ্ণুঃ প্রসীদতি ॥ ১ ॥

শ্রীশুক উবাচ
শুক্লে মার্গশিরে পক্ষে যোষিদ্ভর্তুরনুজ্ঞযা ।
আরভেত ব্রতমিদং সার্বকামিকমাদিতঃ ॥ ২ ॥

নিশম্য মরুতাং জন্ম ব্রাহ্মণাননুমন্ত্র্য চ ।
স্নাত্বা শুক্লদতী শুক্লে বসীতালঙ্কৃতাম্বরে ।
পূজযেত্প্রাতরাশাত্প্রাগ্ভগবন্তং শ্রিযা সহ ॥ ৩ ॥

অলং তে নিরপেক্ষায পূর্ণকাম নমোঽস্তু তে ।
মহাবিভূতিপতযে নমঃ সকলসিদ্ধযে ॥ ৪ ॥

যথা ত্বং কৃপযা ভূত্যা তেজসা মহিমৌজসা ।
জুষ্ট ঈশ গুণৈঃ সর্বৈস্ততোঽসি ভগবান্ প্রভুঃ ॥ ৫ ॥

বিষ্ণুপত্নি মহামাযে মহাপুরুষলক্ষণে ।
প্রীযেথা মে মহাভাগে লোকমাতর্নমোঽস্তু তে ॥ ৬ ॥

ওঁ নমো ভগবতে মহাপুরুষায মহানুভাবায মহাবিভূতিপতযে সহ মহাবিভূতিভির্বলিমুপহরামীতি । অনেনাহরহর্মন্ত্রেণ বিষ্ণোরাবাহনার্ঘ্যপাদ্যোপস্পর্শনস্নানবাসউপবীতবিভূষণগন্ধপুষ্পধূপ দীপোপহারাদ্যুপচারান্ সুসমাহিতোপাহরেত্ ॥ ৭ ॥

হবিঃশেষং চ জুহুযাদনলে দ্বাদশাহুতীঃ ।
ওঁ নমো ভগবতে মহাপুরুষায মহাবিভূতিপতযে স্বাহেতি ॥ ৮ ॥

শ্রিযং বিষ্ণুং চ বরদাবাশিষাং প্রভবাবুভৌ ।
ভক্ত্যা সম্পূজযেন্নিত্যং যদীচ্ছেত্সর্বসম্পদঃ ॥ ৯ ॥

প্রণমেদ্দণ্ডবদ্ভূমৌ ভক্তিপ্রহ্বেণ চেতসা ।
দশবারং জপেন্মন্ত্রং ততঃ স্তোত্রমুদীরযেত্ ॥ ১০ ॥

যুবাং তু বিশ্বস্য বিভূ জগতঃ কারণং পরম্ ।
ইযং হি প্রকৃতিঃ সূক্ষ্মা মাযাশক্তির্দুরত্যযা ॥ ১১ ॥

তস্যা অধীশ্বরঃ সাক্ষাত্ত্বমেব পুরুষঃ পরঃ ।
ত্বং সর্বযজ্ঞ ইজ্যেযং ক্রিযেযং ফলভুগ্ভবান্ ॥ ১২ ॥

গুণব্যক্তিরিযং দেবী ব্যঞ্জকো গুণভুগ্ভবান্ ।
ত্বং হি সর্বশরীর্যাত্মা শ্রীঃ শরীরেন্দ্রিযাশযাঃ ।
নামরূপে ভগবতী প্রত্যযস্ত্বমপাশ্রযঃ ॥ ১৩ ॥

যথা যুবাং ত্রিলোকস্য বরদৌ পরমেষ্ঠিনৌ ।
তথা ম
উত্তমশ্লোক সন্তু সত্যা মহাশিষঃ ॥ ১৪ ॥

ইত্যভিষ্টূয বরদং শ্রীনিবাসং শ্রিযা সহ ।
তন্নিঃসার্যোপহরণং
দত্ত্বাচমনমর্চযেত্ ॥ ১৫ ॥

ততঃ স্তুবীত স্তোত্রেণ ভক্তিপ্রহ্বেণ
চেতসা ।
যজ্ঞোচ্ছিষ্টমবঘ্রায পুনরভ্যর্চযেদ্ধরিম্ ॥ ১৬ ॥

পতিং চ পরযা ভক্ত্যা মহাপুরুষচেতসা ।
প্রিযৈস্তৈস্তৈরুপনমেত্ প্রেমশীলঃ স্বযং পতিঃ ।
বিভৃযাত্ সর্বকর্মাণি পত্ন্যা উচ্চাবচানি চ ॥ ১৭ ॥

কৃতমেকতরেণাপি দম্পত্যোরুভযোরপি ।
পত্ন্যাং কুর্যাদনর্হাযাং পতিরেতত্ সমাহিতঃ ॥ ১৮ ॥

বিষ্ণোর্ব্রতমিদং বিভ্রন্ন বিহন্যাত্কথঞ্চন ।
বিপ্রান্ স্ত্রিযো বীরবতীঃ স্রগ্গন্ধবলিমণ্ডনৈঃ ।
অর্চেদহরহর্ভক্ত্যা দেবং নিযমমাস্থিতা ॥ ১৯ ॥

উদ্বাস্য দেবং স্বে ধাম্নি তন্নিবেদিতমগ্রতঃ ।
অদ্যাদাত্মবিশুদ্ধ্যর্থং সর্বকামসমৃদ্ধযে ॥ ২০ ॥

এতেন পূজাবিধিনা মাসান্ দ্বাদশ হাযনম্ ।
নীত্বাথোপরমেত্সাধ্বী কার্তিকে চরমেঽহনি ॥ ২১ ॥

শ্বোভূতেঽপ উপস্পৃশ্য কৃষ্ণমভ্যর্চ্য পূর্ববত্ ।
পযঃশৃতেন জুহুযাচ্চরুণা সহ সর্পিষা ।
পাকযজ্ঞবিধানেন দ্বাদশৈবাহুতীঃ পতিঃ ॥ ২২ ॥

আশিষঃ শিরসাদায দ্বিজৈঃ প্রীতৈঃ সমীরিতাঃ ।
প্রণম্য শিরসা ভক্ত্যা ভুঞ্জীত তদনুজ্ঞযা ॥ ২৩ ॥

আচার্যমগ্রতঃ কৃত্বা বাগ্যতঃ সহ বন্ধুভিঃ ।
দদ্যাত্পত্ন্যৈ চরোঃ শেষং সুপ্রজাস্ত্বং সুসৌভগম্ ॥ ২৪ ॥

এতচ্চরিত্বা বিধিবদ্ব্রতং বিভো
রভীপ্সিতার্থং লভতে পুমানিহ ।
স্ত্রী চৈতদাস্থায লভেত সৌভগং
শ্রিযং প্রজাং জীবপতিং যশো গৃহম্ ॥ ২৫ ॥

কন্যা চ বিন্দেত সমগ্রলক্ষণং
পতিং ত্ববীরা হতকিল্বিষাং গতিম্ ।
মৃতপ্রজা জীবসুতা ধনেশ্বরী
সুদুর্ভগা সুভগা রূপমগ্র্যম্ ॥ ২৬ ॥

বিন্দেদ্বিরূপা বিরুজা বিমুচ্যতে
য আমযাবীন্দ্রিযকল্যদেহম্ ।
এতত্পঠন্নভ্যুদযে চ কর্ম-
ণ্যনন্ততৃপ্তিঃ পিতৃদেবতানাম্ ॥ ২৭ ॥

তুষ্টাঃ প্রযচ্ছন্তি সমস্তকামান্
হোমাবসানে হুতভুক্ শ্রীহরিশ্চ ।
রাজন্ মহন্মরুতাং জন্ম পুণ্যং
দিতের্ব্রতং চাভিহিতং মহত্তে ॥ ২৮ ॥