ശ്രീമദ്ഭാഗവതമ് ൬.൧൯

ശ്രീരാജോവാച
വ്രതം പുംസവനം ബ്രഹ്മന് ഭവതാ യദുദീരിതമ് ।
തസ്യ വേദിതുമിച്ഛാമി യേന വിഷ്ണുഃ പ്രസീദതി ॥ ൧ ॥

ശ്രീശുക ഉവാച
ശുക്ലേ മാര്ഗശിരേ പക്ഷേ യോഷിദ്ഭര്തുരനുജ്ഞയാ ।
ആരഭേത വ്രതമിദം സാര്വകാമികമാദിതഃ ॥ ൨ ॥

നിശമ്യ മരുതാം ജന്മ ബ്രാഹ്മണാനനുമന്ത്ര്യ ച ।
സ്നാത്വാ ശുക്ലദതീ ശുക്ലേ വസീതാലങ്കൃതാമ്ബരേ ।
പൂജയേത്പ്രാതരാശാത്പ്രാഗ്ഭഗവന്തം ശ്രിയാ സഹ ॥ ൩ ॥

അലം തേ നിരപേക്ഷായ പൂര്ണകാമ നമോഽസ്തു തേ ।
മഹാവിഭൂതിപതയേ നമഃ സകലസിദ്ധയേ ॥ ൪ ॥

യഥാ ത്വം കൃപയാ ഭൂത്യാ തേജസാ മഹിമൌജസാ ।
ജുഷ്ട ഈശ ഗുണൈഃ സര്വൈസ്തതോഽസി ഭഗവാന് പ്രഭുഃ ॥ ൫ ॥

വിഷ്ണുപത്നി മഹാമായേ മഹാപുരുഷലക്ഷണേ ।
പ്രീയേഥാ മേ മഹാഭാഗേ ലോകമാതര്നമോഽസ്തു തേ ॥ ൬ ॥

ഓം നമോ ഭഗവതേ മഹാപുരുഷായ മഹാനുഭാവായ മഹാവിഭൂതിപതയേ സഹ മഹാവിഭൂതിഭിര്ബലിമുപഹരാമീതി । അനേനാഹരഹര്മന്ത്രേണ വിഷ്ണോരാവാഹനാര്ഘ്യപാദ്യോപസ്പര്ശനസ്നാനവാസഉപവീതവിഭൂഷണഗന്ധപുഷ്പധൂപ ദീപോപഹാരാദ്യുപചാരാന് സുസമാഹിതോപാഹരേത് ॥ ൭ ॥

ഹവിഃശേഷം ച ജുഹുയാദനലേ ദ്വാദശാഹുതീഃ ।
ഓം നമോ ഭഗവതേ മഹാപുരുഷായ മഹാവിഭൂതിപതയേ സ്വാഹേതി ॥ ൮ ॥

ശ്രിയം വിഷ്ണും ച വരദാവാശിഷാം പ്രഭവാവുഭൌ ।
ഭക്ത്യാ സമ്പൂജയേന്നിത്യം യദീച്ഛേത്സര്വസമ്പദഃ ॥ ൯ ॥

പ്രണമേദ്ദണ്ഡവദ്ഭൂമൌ ഭക്തിപ്രഹ്വേണ ചേതസാ ।
ദശവാരം ജപേന്മന്ത്രം തതഃ സ്തോത്രമുദീരയേത് ॥ ൧൦ ॥

യുവാം തു വിശ്വസ്യ വിഭൂ ജഗതഃ കാരണം പരമ് ।
ഇയം ഹി പ്രകൃതിഃ സൂക്ഷ്മാ മായാശക്തിര്ദുരത്യയാ ॥ ൧൧ ॥

തസ്യാ അധീശ്വരഃ സാക്ഷാത്ത്വമേവ പുരുഷഃ പരഃ ।
ത്വം സര്വയജ്ഞ ഇജ്യേയം ക്രിയേയം ഫലഭുഗ്ഭവാന് ॥ ൧൨ ॥

ഗുണവ്യക്തിരിയം ദേവീ വ്യഞ്ജകോ ഗുണഭുഗ്ഭവാന് ।
ത്വം ഹി സര്വശരീര്യാത്മാ ശ്രീഃ ശരീരേന്ദ്രിയാശയാഃ ।
നാമരൂപേ ഭഗവതീ പ്രത്യയസ്ത്വമപാശ്രയഃ ॥ ൧൩ ॥

യഥാ യുവാം ത്രിലോകസ്യ വരദൌ പരമേഷ്ഠിനൌ ।
തഥാ മ
ഉത്തമശ്ലോക സന്തു സത്യാ മഹാശിഷഃ ॥ ൧൪ ॥

ഇത്യഭിഷ്ടൂയ വരദം ശ്രീനിവാസം ശ്രിയാ സഹ ।
തന്നിഃസാര്യോപഹരണം
ദത്ത്വാചമനമര്ചയേത് ॥ ൧൫ ॥

തതഃ സ്തുവീത സ്തോത്രേണ ഭക്തിപ്രഹ്വേണ
ചേതസാ ।
യജ്ഞോച്ഛിഷ്ടമവഘ്രായ പുനരഭ്യര്ചയേദ്ധരിമ് ॥ ൧൬ ॥

പതിം ച പരയാ ഭക്ത്യാ മഹാപുരുഷചേതസാ ।
പ്രിയൈസ്തൈസ്തൈരുപനമേത് പ്രേമശീലഃ സ്വയം പതിഃ ।
ബിഭൃയാത് സര്വകര്മാണി പത്ന്യാ ഉച്ചാവചാനി ച ॥ ൧൭ ॥

കൃതമേകതരേണാപി ദമ്പത്യോരുഭയോരപി ।
പത്ന്യാം കുര്യാദനര്ഹായാം പതിരേതത് സമാഹിതഃ ॥ ൧൮ ॥

വിഷ്ണോര്വ്രതമിദം ബിഭ്രന്ന വിഹന്യാത്കഥഞ്ചന ।
വിപ്രാന് സ്ത്രിയോ വീരവതീഃ സ്രഗ്ഗന്ധബലിമണ്ഡനൈഃ ।
അര്ചേദഹരഹര്ഭക്ത്യാ ദേവം നിയമമാസ്ഥിതാ ॥ ൧൯ ॥

ഉദ്വാസ്യ ദേവം സ്വേ ധാമ്നി തന്നിവേദിതമഗ്രതഃ ।
അദ്യാദാത്മവിശുദ്ധ്യര്ഥം സര്വകാമസമൃദ്ധയേ ॥ ൨൦ ॥

ഏതേന പൂജാവിധിനാ മാസാന് ദ്വാദശ ഹായനമ് ।
നീത്വാഥോപരമേത്സാധ്വീ കാര്തികേ ചരമേഽഹനി ॥ ൨൧ ॥

ശ്വോഭൂതേഽപ ഉപസ്പൃശ്യ കൃഷ്ണമഭ്യര്ച്യ പൂര്വവത് ।
പയഃശൃതേന ജുഹുയാച്ചരുണാ സഹ സര്പിഷാ ।
പാകയജ്ഞവിധാനേന ദ്വാദശൈവാഹുതീഃ പതിഃ ॥ ൨൨ ॥

ആശിഷഃ ശിരസാദായ ദ്വിജൈഃ പ്രീതൈഃ സമീരിതാഃ ।
പ്രണമ്യ ശിരസാ ഭക്ത്യാ ഭുഞ്ജീത തദനുജ്ഞയാ ॥ ൨൩ ॥

ആചാര്യമഗ്രതഃ കൃത്വാ വാഗ്യതഃ സഹ ബന്ധുഭിഃ ।
ദദ്യാത്പത്ന്യൈ ചരോഃ ശേഷം സുപ്രജാസ്ത്വം സുസൌഭഗമ് ॥ ൨൪ ॥

ഏതച്ചരിത്വാ വിധിവദ്വ്രതം വിഭോ
രഭീപ്സിതാര്ഥം ലഭതേ പുമാനിഹ ।
സ്ത്രീ ചൈതദാസ്ഥായ ലഭേത സൌഭഗം
ശ്രിയം പ്രജാം ജീവപതിം യശോ ഗൃഹമ് ॥ ൨൫ ॥

കന്യാ ച വിന്ദേത സമഗ്രലക്ഷണം
പതിം ത്വവീരാ ഹതകില്ബിഷാം ഗതിമ് ।
മൃതപ്രജാ ജീവസുതാ ധനേശ്വരീ
സുദുര്ഭഗാ സുഭഗാ രൂപമഗ്ര്യമ് ॥ ൨൬ ॥

വിന്ദേദ്വിരൂപാ വിരുജാ വിമുച്യതേ
യ ആമയാവീന്ദ്രിയകല്യദേഹമ് ।
ഏതത്പഠന്നഭ്യുദയേ ച കര്മ-
ണ്യനന്തതൃപ്തിഃ പിതൃദേവതാനാമ് ॥ ൨൭ ॥

തുഷ്ടാഃ പ്രയച്ഛന്തി സമസ്തകാമാന്
ഹോമാവസാനേ ഹുതഭുക് ശ്രീഹരിശ്ച ।
രാജന് മഹന്മരുതാം ജന്മ പുണ്യം
ദിതേര്വ്രതം ചാഭിഹിതം മഹത്തേ ॥ ൨൮ ॥