શ્રીમદ્ભાગવતમ્ ૬.૧૯

શ્રીરાજોવાચ
વ્રતં પુંસવનં બ્રહ્મન્ ભવતા યદુદીરિતમ્ ।
તસ્ય વેદિતુમિચ્છામિ યેન વિષ્ણુઃ પ્રસીદતિ ॥ ૧ ॥

શ્રીશુક ઉવાચ
શુક્લે માર્ગશિરે પક્ષે યોષિદ્ભર્તુરનુજ્ઞયા ।
આરભેત વ્રતમિદં સાર્વકામિકમાદિતઃ ॥ ૨ ॥

નિશમ્ય મરુતાં જન્મ બ્રાહ્મણાનનુમન્ત્ર્ય ચ ।
સ્નાત્વા શુક્લદતી શુક્લે વસીતાલઙ્કૃતામ્બરે ।
પૂજયેત્પ્રાતરાશાત્પ્રાગ્ભગવન્તં શ્રિયા સહ ॥ ૩ ॥

અલં તે નિરપેક્ષાય પૂર્ણકામ નમોઽસ્તુ તે ।
મહાવિભૂતિપતયે નમઃ સકલસિદ્ધયે ॥ ૪ ॥

યથા ત્વં કૃપયા ભૂત્યા તેજસા મહિમૌજસા ।
જુષ્ટ ઈશ ગુણૈઃ સર્વૈસ્તતોઽસિ ભગવાન્ પ્રભુઃ ॥ ૫ ॥

વિષ્ણુપત્નિ મહામાયે મહાપુરુષલક્ષણે ।
પ્રીયેથા મે મહાભાગે લોકમાતર્નમોઽસ્તુ તે ॥ ૬ ॥

ૐ નમો ભગવતે મહાપુરુષાય મહાનુભાવાય મહાવિભૂતિપતયે સહ મહાવિભૂતિભિર્બલિમુપહરામીતિ । અનેનાહરહર્મન્ત્રેણ વિષ્ણોરાવાહનાર્ઘ્યપાદ્યોપસ્પર્શનસ્નાનવાસઉપવીતવિભૂષણગન્ધપુષ્પધૂપ દીપોપહારાદ્યુપચારાન્ સુસમાહિતોપાહરેત્ ॥ ૭ ॥

હવિઃશેષં ચ જુહુયાદનલે દ્વાદશાહુતીઃ ।
ૐ નમો ભગવતે મહાપુરુષાય મહાવિભૂતિપતયે સ્વાહેતિ ॥ ૮ ॥

શ્રિયં વિષ્ણું ચ વરદાવાશિષાં પ્રભવાવુભૌ ।
ભક્ત્યા સમ્પૂજયેન્નિત્યં યદીચ્છેત્સર્વસમ્પદઃ ॥ ૯ ॥

પ્રણમેદ્દણ્ડવદ્ભૂમૌ ભક્તિપ્રહ્વેણ ચેતસા ।
દશવારં જપેન્મન્ત્રં તતઃ સ્તોત્રમુદીરયેત્ ॥ ૧૦ ॥

યુવાં તુ વિશ્વસ્ય વિભૂ જગતઃ કારણં પરમ્ ।
ઇયં હિ પ્રકૃતિઃ સૂક્ષ્મા માયાશક્તિર્દુરત્યયા ॥ ૧૧ ॥

તસ્યા અધીશ્વરઃ સાક્ષાત્ત્વમેવ પુરુષઃ પરઃ ।
ત્વં સર્વયજ્ઞ ઇજ્યેયં ક્રિયેયં ફલભુગ્ભવાન્ ॥ ૧૨ ॥

ગુણવ્યક્તિરિયં દેવી વ્યઞ્જકો ગુણભુગ્ભવાન્ ।
ત્વં હિ સર્વશરીર્યાત્મા શ્રીઃ શરીરેન્દ્રિયાશયાઃ ।
નામરૂપે ભગવતી પ્રત્યયસ્ત્વમપાશ્રયઃ ॥ ૧૩ ॥

યથા યુવાં ત્રિલોકસ્ય વરદૌ પરમેષ્ઠિનૌ ।
તથા મ
ઉત્તમશ્લોક સન્તુ સત્યા મહાશિષઃ ॥ ૧૪ ॥

ઇત્યભિષ્ટૂય વરદં શ્રીનિવાસં શ્રિયા સહ ।
તન્નિઃસાર્યોપહરણં
દત્ત્વાચમનમર્ચયેત્ ॥ ૧૫ ॥

તતઃ સ્તુવીત સ્તોત્રેણ ભક્તિપ્રહ્વેણ
ચેતસા ।
યજ્ઞોચ્છિષ્ટમવઘ્રાય પુનરભ્યર્ચયેદ્ધરિમ્ ॥ ૧૬ ॥

પતિં ચ પરયા ભક્ત્યા મહાપુરુષચેતસા ।
પ્રિયૈસ્તૈસ્તૈરુપનમેત્ પ્રેમશીલઃ સ્વયં પતિઃ ।
બિભૃયાત્ સર્વકર્માણિ પત્ન્યા ઉચ્ચાવચાનિ ચ ॥ ૧૭ ॥

કૃતમેકતરેણાપિ દમ્પત્યોરુભયોરપિ ।
પત્ન્યાં કુર્યાદનર્હાયાં પતિરેતત્ સમાહિતઃ ॥ ૧૮ ॥

વિષ્ણોર્વ્રતમિદં બિભ્રન્ન વિહન્યાત્કથઞ્ચન ।
વિપ્રાન્ સ્ત્રિયો વીરવતીઃ સ્રગ્ગન્ધબલિમણ્ડનૈઃ ।
અર્ચેદહરહર્ભક્ત્યા દેવં નિયમમાસ્થિતા ॥ ૧૯ ॥

ઉદ્વાસ્ય દેવં સ્વે ધામ્નિ તન્નિવેદિતમગ્રતઃ ।
અદ્યાદાત્મવિશુદ્ધ્યર્થં સર્વકામસમૃદ્ધયે ॥ ૨૦ ॥

એતેન પૂજાવિધિના માસાન્ દ્વાદશ હાયનમ્ ।
નીત્વાથોપરમેત્સાધ્વી કાર્તિકે ચરમેઽહનિ ॥ ૨૧ ॥

શ્વોભૂતેઽપ ઉપસ્પૃશ્ય કૃષ્ણમભ્યર્ચ્ય પૂર્વવત્ ।
પયઃશૃતેન જુહુયાચ્ચરુણા સહ સર્પિષા ।
પાકયજ્ઞવિધાનેન દ્વાદશૈવાહુતીઃ પતિઃ ॥ ૨૨ ॥

આશિષઃ શિરસાદાય દ્વિજૈઃ પ્રીતૈઃ સમીરિતાઃ ।
પ્રણમ્ય શિરસા ભક્ત્યા ભુઞ્જીત તદનુજ્ઞયા ॥ ૨૩ ॥

આચાર્યમગ્રતઃ કૃત્વા વાગ્યતઃ સહ બન્ધુભિઃ ।
દદ્યાત્પત્ન્યૈ ચરોઃ શેષં સુપ્રજાસ્ત્વં સુસૌભગમ્ ॥ ૨૪ ॥

એતચ્ચરિત્વા વિધિવદ્વ્રતં વિભો
રભીપ્સિતાર્થં લભતે પુમાનિહ ।
સ્ત્રી ચૈતદાસ્થાય લભેત સૌભગં
શ્રિયં પ્રજાં જીવપતિં યશો ગૃહમ્ ॥ ૨૫ ॥

કન્યા ચ વિન્દેત સમગ્રલક્ષણં
પતિં ત્વવીરા હતકિલ્બિષાં ગતિમ્ ।
મૃતપ્રજા જીવસુતા ધનેશ્વરી
સુદુર્ભગા સુભગા રૂપમગ્ર્યમ્ ॥ ૨૬ ॥

વિન્દેદ્વિરૂપા વિરુજા વિમુચ્યતે
ય આમયાવીન્દ્રિયકલ્યદેહમ્ ।
એતત્પઠન્નભ્યુદયે ચ કર્મ-
ણ્યનન્તતૃપ્તિઃ પિતૃદેવતાનામ્ ॥ ૨૭ ॥

તુષ્ટાઃ પ્રયચ્છન્તિ સમસ્તકામાન્
હોમાવસાને હુતભુક્ શ્રીહરિશ્ચ ।
રાજન્ મહન્મરુતાં જન્મ પુણ્યં
દિતેર્વ્રતં ચાભિહિતં મહત્તે ॥ ૨૮ ॥