ଶ୍ରୀମଦ୍ଭାଗଵତମ୍ ୬.୧୯

ଶ୍ରୀରାଜୋଵାଚ
ଵ୍ରତଂ ପୁଂସଵନଂ ବ୍ରହ୍ମନ୍ ଭଵତା ଯଦୁଦୀରିତମ୍ ।
ତସ୍ଯ ଵେଦିତୁମିଚ୍ଛାମି ଯେନ ଵିଷ୍ଣୁଃ ପ୍ରସୀଦତି ॥ ୧ ॥

ଶ୍ରୀଶୁକ ଉଵାଚ
ଶୁକ୍ଲେ ମାର୍ଗଶିରେ ପକ୍ଷେ ଯୋଷିଦ୍ଭର୍ତୁରନୁଜ୍ଞଯା ।
ଆରଭେତ ଵ୍ରତମିଦଂ ସାର୍ଵକାମିକମାଦିତଃ ॥ ୨ ॥

ନିଶମ୍ଯ ମରୁତାଂ ଜନ୍ମ ବ୍ରାହ୍ମଣାନନୁମନ୍ତ୍ର୍ଯ ଚ ।
ସ୍ନାତ୍ଵା ଶୁକ୍ଲଦତୀ ଶୁକ୍ଲେ ଵସୀତାଲଙ୍କୃତାମ୍ବରେ ।
ପୂଜଯେତ୍ପ୍ରାତରାଶାତ୍ପ୍ରାଗ୍ଭଗଵନ୍ତଂ ଶ୍ରିଯା ସହ ॥ ୩ ॥

ଅଲଂ ତେ ନିରପେକ୍ଷାଯ ପୂର୍ଣକାମ ନମୋଽସ୍ତୁ ତେ ।
ମହାଵିଭୂତିପତଯେ ନମଃ ସକଲସିଦ୍ଧଯେ ॥ ୪ ॥

ଯଥା ତ୍ଵଂ କୃପଯା ଭୂତ୍ଯା ତେଜସା ମହିମୌଜସା ।
ଜୁଷ୍ଟ ଈଶ ଗୁଣୈଃ ସର୍ଵୈସ୍ତତୋଽସି ଭଗଵାନ୍ ପ୍ରଭୁଃ ॥ ୫ ॥

ଵିଷ୍ଣୁପତ୍ନି ମହାମାଯେ ମହାପୁରୁଷଲକ୍ଷଣେ ।
ପ୍ରୀଯେଥା ମେ ମହାଭାଗେ ଲୋକମାତର୍ନମୋଽସ୍ତୁ ତେ ॥ ୬ ॥

ଓଁ ନମୋ ଭଗଵତେ ମହାପୁରୁଷାଯ ମହାନୁଭାଵାଯ ମହାଵିଭୂତିପତଯେ ସହ ମହାଵିଭୂତିଭିର୍ବଲିମୁପହରାମୀତି । ଅନେନାହରହର୍ମନ୍ତ୍ରେଣ ଵିଷ୍ଣୋରାଵାହନାର୍ଘ୍ଯପାଦ୍ଯୋପସ୍ପର୍ଶନସ୍ନାନଵାସଉପଵୀତଵିଭୂଷଣଗନ୍ଧପୁଷ୍ପଧୂପ ଦୀପୋପହାରାଦ୍ଯୁପଚାରାନ୍ ସୁସମାହିତୋପାହରେତ୍ ॥ ୭ ॥

ହଵିଃଶେଷଂ ଚ ଜୁହୁଯାଦନଲେ ଦ୍ଵାଦଶାହୁତୀଃ ।
ଓଁ ନମୋ ଭଗଵତେ ମହାପୁରୁଷାଯ ମହାଵିଭୂତିପତଯେ ସ୍ଵାହେତି ॥ ୮ ॥

ଶ୍ରିଯଂ ଵିଷ୍ଣୁଂ ଚ ଵରଦାଵାଶିଷାଂ ପ୍ରଭଵାଵୁଭୌ ।
ଭକ୍ତ୍ଯା ସମ୍ପୂଜଯେନ୍ନିତ୍ଯଂ ଯଦୀଚ୍ଛେତ୍ସର୍ଵସମ୍ପଦଃ ॥ ୯ ॥

ପ୍ରଣମେଦ୍ଦଣ୍ଡଵଦ୍ଭୂମୌ ଭକ୍ତିପ୍ରହ୍ଵେଣ ଚେତସା ।
ଦଶଵାରଂ ଜପେନ୍ମନ୍ତ୍ରଂ ତତଃ ସ୍ତୋତ୍ରମୁଦୀରଯେତ୍ ॥ ୧୦ ॥

ଯୁଵାଂ ତୁ ଵିଶ୍ଵସ୍ଯ ଵିଭୂ ଜଗତଃ କାରଣଂ ପରମ୍ ।
ଇଯଂ ହି ପ୍ରକୃତିଃ ସୂକ୍ଷ୍ମା ମାଯାଶକ୍ତିର୍ଦୁରତ୍ଯଯା ॥ ୧୧ ॥

ତସ୍ଯା ଅଧୀଶ୍ଵରଃ ସାକ୍ଷାତ୍ତ୍ଵମେଵ ପୁରୁଷଃ ପରଃ ।
ତ୍ଵଂ ସର୍ଵଯଜ୍ଞ ଇଜ୍ଯେଯଂ କ୍ରିଯେଯଂ ଫଲଭୁଗ୍ଭଵାନ୍ ॥ ୧୨ ॥

ଗୁଣଵ୍ଯକ୍ତିରିଯଂ ଦେଵୀ ଵ୍ଯଞ୍ଜକୋ ଗୁଣଭୁଗ୍ଭଵାନ୍ ।
ତ୍ଵଂ ହି ସର୍ଵଶରୀର୍ଯାତ୍ମା ଶ୍ରୀଃ ଶରୀରେନ୍ଦ୍ରିଯାଶଯାଃ ।
ନାମରୂପେ ଭଗଵତୀ ପ୍ରତ୍ଯଯସ୍ତ୍ଵମପାଶ୍ରଯଃ ॥ ୧୩ ॥

ଯଥା ଯୁଵାଂ ତ୍ରିଲୋକସ୍ଯ ଵରଦୌ ପରମେଷ୍ଠିନୌ ।
ତଥା ମ
ଉତ୍ତମଶ୍ଲୋକ ସନ୍ତୁ ସତ୍ଯା ମହାଶିଷଃ ॥ ୧୪ ॥

ଇତ୍ଯଭିଷ୍ଟୂଯ ଵରଦଂ ଶ୍ରୀନିଵାସଂ ଶ୍ରିଯା ସହ ।
ତନ୍ନିଃସାର୍ଯୋପହରଣଂ
ଦତ୍ତ୍ଵାଚମନମର୍ଚଯେତ୍ ॥ ୧୫ ॥

ତତଃ ସ୍ତୁଵୀତ ସ୍ତୋତ୍ରେଣ ଭକ୍ତିପ୍ରହ୍ଵେଣ
ଚେତସା ।
ଯଜ୍ଞୋଚ୍ଛିଷ୍ଟମଵଘ୍ରାଯ ପୁନରଭ୍ଯର୍ଚଯେଦ୍ଧରିମ୍ ॥ ୧୬ ॥

ପତିଂ ଚ ପରଯା ଭକ୍ତ୍ଯା ମହାପୁରୁଷଚେତସା ।
ପ୍ରିଯୈସ୍ତୈସ୍ତୈରୁପନମେତ୍ ପ୍ରେମଶୀଲଃ ସ୍ଵଯଂ ପତିଃ ।
ବିଭୃଯାତ୍ ସର୍ଵକର୍ମାଣି ପତ୍ନ୍ଯା ଉଚ୍ଚାଵଚାନି ଚ ॥ ୧୭ ॥

କୃତମେକତରେଣାପି ଦମ୍ପତ୍ଯୋରୁଭଯୋରପି ।
ପତ୍ନ୍ଯାଂ କୁର୍ଯାଦନର୍ହାଯାଂ ପତିରେତତ୍ ସମାହିତଃ ॥ ୧୮ ॥

ଵିଷ୍ଣୋର୍ଵ୍ରତମିଦଂ ବିଭ୍ରନ୍ନ ଵିହନ୍ଯାତ୍କଥଞ୍ଚନ ।
ଵିପ୍ରାନ୍ ସ୍ତ୍ରିଯୋ ଵୀରଵତୀଃ ସ୍ରଗ୍ଗନ୍ଧବଲିମଣ୍ଡନୈଃ ।
ଅର୍ଚେଦହରହର୍ଭକ୍ତ୍ଯା ଦେଵଂ ନିଯମମାସ୍ଥିତା ॥ ୧୯ ॥

ଉଦ୍ଵାସ୍ଯ ଦେଵଂ ସ୍ଵେ ଧାମ୍ନି ତନ୍ନିଵେଦିତମଗ୍ରତଃ ।
ଅଦ୍ଯାଦାତ୍ମଵିଶୁଦ୍ଧ୍ଯର୍ଥଂ ସର୍ଵକାମସମୃଦ୍ଧଯେ ॥ ୨୦ ॥

ଏତେନ ପୂଜାଵିଧିନା ମାସାନ୍ ଦ୍ଵାଦଶ ହାଯନମ୍ ।
ନୀତ୍ଵାଥୋପରମେତ୍ସାଧ୍ଵୀ କାର୍ତିକେ ଚରମେଽହନି ॥ ୨୧ ॥

ଶ୍ଵୋଭୂତେଽପ ଉପସ୍ପୃଶ୍ଯ କୃଷ୍ଣମଭ୍ଯର୍ଚ୍ଯ ପୂର୍ଵଵତ୍ ।
ପଯଃଶୃତେନ ଜୁହୁଯାଚ୍ଚରୁଣା ସହ ସର୍ପିଷା ।
ପାକଯଜ୍ଞଵିଧାନେନ ଦ୍ଵାଦଶୈଵାହୁତୀଃ ପତିଃ ॥ ୨୨ ॥

ଆଶିଷଃ ଶିରସାଦାଯ ଦ୍ଵିଜୈଃ ପ୍ରୀତୈଃ ସମୀରିତାଃ ।
ପ୍ରଣମ୍ଯ ଶିରସା ଭକ୍ତ୍ଯା ଭୁଞ୍ଜୀତ ତଦନୁଜ୍ଞଯା ॥ ୨୩ ॥

ଆଚାର୍ଯମଗ୍ରତଃ କୃତ୍ଵା ଵାଗ୍ଯତଃ ସହ ବନ୍ଧୁଭିଃ ।
ଦଦ୍ଯାତ୍ପତ୍ନ୍ଯୈ ଚରୋଃ ଶେଷଂ ସୁପ୍ରଜାସ୍ତ୍ଵଂ ସୁସୌଭଗମ୍ ॥ ୨୪ ॥

ଏତଚ୍ଚରିତ୍ଵା ଵିଧିଵଦ୍ଵ୍ରତଂ ଵିଭୋ
ରଭୀପ୍ସିତାର୍ଥଂ ଲଭତେ ପୁମାନିହ ।
ସ୍ତ୍ରୀ ଚୈତଦାସ୍ଥାଯ ଲଭେତ ସୌଭଗଂ
ଶ୍ରିଯଂ ପ୍ରଜାଂ ଜୀଵପତିଂ ଯଶୋ ଗୃହମ୍ ॥ ୨୫ ॥

କନ୍ଯା ଚ ଵିନ୍ଦେତ ସମଗ୍ରଲକ୍ଷଣଂ
ପତିଂ ତ୍ଵଵୀରା ହତକିଲ୍ବିଷାଂ ଗତିମ୍ ।
ମୃତପ୍ରଜା ଜୀଵସୁତା ଧନେଶ୍ଵରୀ
ସୁଦୁର୍ଭଗା ସୁଭଗା ରୂପମଗ୍ର୍ଯମ୍ ॥ ୨୬ ॥

ଵିନ୍ଦେଦ୍ଵିରୂପା ଵିରୁଜା ଵିମୁଚ୍ଯତେ
ଯ ଆମଯାଵୀନ୍ଦ୍ରିଯକଲ୍ଯଦେହମ୍ ।
ଏତତ୍ପଠନ୍ନଭ୍ଯୁଦଯେ ଚ କର୍ମ-
ଣ୍ଯନନ୍ତତୃପ୍ତିଃ ପିତୃଦେଵତାନାମ୍ ॥ ୨୭ ॥

ତୁଷ୍ଟାଃ ପ୍ରଯଚ୍ଛନ୍ତି ସମସ୍ତକାମାନ୍
ହୋମାଵସାନେ ହୁତଭୁକ୍ ଶ୍ରୀହରିଶ୍ଚ ।
ରାଜନ୍ ମହନ୍ମରୁତାଂ ଜନ୍ମ ପୁଣ୍ଯଂ
ଦିତେର୍ଵ୍ରତଂ ଚାଭିହିତଂ ମହତ୍ତେ ॥ ୨୮ ॥