1.4 - somādibrāhmaṇaṃ - kṛṣṇa yajurveda taittirīya brāhmaṇa pāṭhaḥ - ubhaye vā

kṛṣṇa yajurvedīya taittirīya brāhmaṇe prathamāṣṭake caturthaḥ prapāṭhakaḥ - somādibrāhmaṇaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | hariḥ om ||
anuvākaṃ 1 - grahaṇā grahaṇam
ubhaye vā ete prajāpa̭teraddhya̭-sṛjyanta | devāścāsṷrāśca | tānna vya̭jānāt | ime-'nya ime-'nya iti̭ | sa devānagṃ śūna̭karot | tānabhya̭ṣuṇot | tā-npavitrḙṇā-punāt | tān-parastāt-pavitra̭sya-vya̭gṛhṇāt | te grahā̭ abhavann | tadgrahā̭ṇā-ṅgrahatvam || 1 ||

devatā vā etā yaja̭mānasya gṛhe gṛ̭hyante | ya-dgrahāḥ | vidurḙna-ndevāḥ | yasyaivaṃ-vi~duṣa̭ ete grahā̭ gṛhyante || eṣā vai somasyāhṷtiḥ | yadṷpāgṃśuḥ | somḙna devāg sta̭rpayāṇīti khalu vai somḙna yajate | yadṷpāgṃśu-ñjuhoti̭ | somḙnaiva ta-ddevāg sta̭rpayati || yadgrahāñjuhoti̭ || 2 ||

devā eva ta-ddevān-ga̭cchanti || yacca̭masāñjuhoti̭ | tenaivānṷrūpeṇa yaja̭māna-ssuvargaṃ-lo~kamḙti || ki-nnvḙtadagra̭ āsīdityā̭huḥ | ya-tpātrāṇīti̭ | iyaṃ-vā~ etadagra̭ āsīt | mṛnmayā̭ni vā etānyā̭sann | tairdevā na vyāvṛta̭-magacchann | ta etāni̭ dārumayā̭ṇi pātrāṇya-paśyann | tānya̭kurvata || 3 ||

tairvai te vyāvṛta̭-magacchann | ya-ddā̭rumayā̭ṇi pātrā̭ṇi bhava̭nti | vyāvṛta̭meva tai-ryaja̭māno gacchati || yāni̭ dārumayā̭ṇi pātrā̭ṇi bhava̭nti | amumeva tai-rloka-mabhija̭yati | yāni̭ mṛnmayā̭ni | imameva tai-rloka-mabhija̭yati || brahmavādino̭ vadanti | kāścata̭sra-ssthālīrvā̭yavyā-ssomagraha̭ṇīriti̭ | devā vai pṛśñi̭maduhrann || 4 ||

tasyā̭ ete stanā̭ āsann | iyaṃ-vai~ pṛśñiḥ̭ | tāmā̭dityā ā̭dityasthālyā catṷṣpadaḥ paśūna̭duhrann | yadā̭dityasthālī bhava̭ti | catṷṣpada eva tayā̭ paśūn. yaja̭māna imā-ndṷhe | tāmindra̭ ukthyasthālyendriya-ma̭duhat | yadṷkthyasthālī bhava̭ti | indriyameva tayā yaja̭māna imā-ndṷhe | tāṃ-vi~śvḙ devā āgrayaṇasthālyorja̭-maduhrann | yadāgrayaṇasthālī bhava̭ti || 5 ||

ūrja̭meva tayā yaja̭māna imā-ndṷhe | tā-mma̭nuṣyā dhruvasthālyā ''yṷraduhrann | yaddhrṷvasthālī bhava̭ti | āyṷreva tayā yaja̭māna imā-ndṷhe | sthālyā gṛhṇāti̭ | vāyavyḙna juhoti | tasmā̭danyena pātrḙṇa paśū-nduhanti̭ | anyena prati̭gṛhṇanti | atho vyāvṛta̭meva ta-dyaja̭māno gacchati || 6 ||

(grahatvaṃ - grahān juhotya̭-kurva-tāduhra-nnāgrayaṇasthālī bhava̭ti-+nava̭ ca) (a. 1)
anuvākaṃ 2 - sotrāmaṇīśeṣā mantrāḥ
yuvagṃ surāma̭maśvinā | namṷcāvā-'sure sacā | vipipānā śṷbhaspatī | indra-ṅkarma̭svāvatam || putrami̭va pitarā̭vaśvinobhā | indrāva̭ta-ṅkarma̭ṇā dagṃsanā̭bhiḥ | ya-thsurāmaṃ-vya~pi̭ba-śśacī̭bhiḥ | sara̭svatī tvā maghavannabhīṣṇāt || ahāvyagne havirāsyḙ te | srucīva̭ ghṛta-ñcamū i̭va somaḥ̭ || 7 ||

vājasanigṃ̭ rayimasme suvīram | praśasta-ndhḙhi yaśasa̭-mbṛhantam || yasminnaśvā̭sa ṛṣabhāsa̭ ukṣaṇaḥ̭ | vaśā meṣā a̭vasṛṣṭāsa āhṷtāḥ | kīlālape soma̭pṛṣṭhāya vedhase | hṛdāmati-ñja̭naya cārṷmagnaye || nānā hi vā-ndevahi̭tagṃ sado̭ mitam | mā sagṃsṛ̭kṣāthā-mparame vyo̭mann | surā tvamasi̭ śuṣmiṇī soma̭ eṣaḥ | mā mā̭ higṃsī-ssvāṃ-yo~ni̭māviśann || 8 ||

yadatra̭ śiṣṭagṃ rasinaḥ̭ sutasya̭ | yadindro api̭bacchacī̭bhiḥ | aha-ntada̭sya mana̭sā śivena̭ | somagṃ rājā̭namiha bha̭kṣayāmi || dve srutī a̭śṛṇava-mpitṛṇām | aha-ndevānā̭muta martyā̭nām | tābhyā̭midaṃ-vi~śva-mbhuva̭nagṃ samḙti | antarā pūrvamapa̭ra-ñca ketum || yastḙ deva varuṇa gāyatracha̭ndāḥ pāśaḥ̭ | ta-nta̭ etenāva̭yaje || 9 ||

yastḙ deva varuṇa triṣṭupcha̭ndāḥ pāśaḥ̭ | ta-nta̭ etenāva̭yaje | yastḙ deva varuṇa jaga̭tīchandāḥ pāśaḥ̭ | ta-nta̭ etenāva̭yaje || somo vā etasya̭ rājyamāda̭tte | yo rājā sa-nrājyo vā somḙna yaja̭te | devasuvāmetāni̭ havīgṃṣi̭ bhavanti | etāva̭nto vai devānāgṃ̭ savāḥ | ta evāsmai̭ savā-npraya̭cchanti | ta ḙna-mpunaḥ̭ suvante rājyāya̭ | devasū rājā̭ bhavati || 10 ||

(soma̭ - āviśan. - ya̭je - rājyāyaikaṃ̭ ca) (a. 2)
anuvākaṃ 3 - dohaprāyaścittam, agnihotre
uda̭sthā-ddevyadi̭ti-rviśvarūpī | āyṷryajñapa̭tāvadhāt | indrā̭ya kṛṇvatī bhāgam | mitrāya varṷṇāya ca || iyaṃ-vā~ a̭gnihotrī | iyaṃ-vā~ etasya niṣī̭dati | yasyāgnihotrī niṣīda̭ti | tāmutthā̭payet | uda̭sthā-ddevyadi̭tiriti̭ | iyaṃ-vai~ devyadi̭tiḥ || 11 ||

imāmevāsmā utthā̭payati || āyṷryajñapa̭tāvadhādityā̭ha | āyṷrevāsmi̭-ndadhāti || indrā̭ya kṛṇvatī bhāga-mmitrāya varṷṇāya cetyā̭ha | yathā yajurevaitat || ava̭rtiṃ-vā~ eṣaitasya̭ pāpmāna̭-mpratikhyāya niṣī̭dati | yasyā-gnihotryupa̭sṛṣṭā niṣīda̭ti | tā-ndugdhvā brāhmaṇāya̭ dadyāt | yasyānna-nnādyāt | ava̭rtimevāsmi̭-npāpmāna-mprati̭muñcati || 12 ||

dugdhvā da̭dāti | na hyadṛ̭ṣṭā dakṣi̭ṇā dīyate || pṛthivīṃ-vā~ etasya payaḥ pravi̭śati | yasyāgnihotra-nduhyamā̭nagg skanda̭ti || yadadya dugdha-mpṛ̭thivīmasa̭kta | yadoṣa̭dhī-rapyasa̭ra-dyadāpaḥ̭ | payo̭ gṛheṣu payo̭ aghniyāsṷ | payo̭ vathseṣu payo̭ astu tanmayītyā̭ha | paya̭ evātma-ngṛheṣṷ paśuṣṷ dhatte || apa upa̭sṛjati || 13 ||

adbhirevaina̭dāpnoti || yo vai yajñasyārtenānārtagṃ sagṃ sṛjati̭ | ubhe vai te tarhyārccha̭taḥ | ārccha̭ti khalu vā etada̭gnihotram | ya-dduhyamā̭nagg skanda̭ti | yada̭bhiduhyāt | ārtenānārtaṃ-ya~jñasya sagṃsṛ̭jet | tadeva yādṛkkīdṛkca̭ hotavyam | athānyā-ndugdhvā puna̭r-hotavyam | anārtenaivārtaṃ̭-ya~jñasya niṣka̭roti || 14 ||

ya-dyuddrṷtasya skandet | ya-ttato-'hṷtvā puna̭reyāt | yajñaṃ-vi~cchi̭ndyāt | yatra skandet | tanniṣadya puna̭rgṛhṇīyāt | yatraiva skanda̭ti | tata̭ evainat-puna̭rgṛhṇāti | tadeva yādṛk-kīdṛkca̭ hotavyam | athānyā-ndugdhvā puna̭r-hotavyam | anārtenaivārtaṃ̭-ya~jñasya niṣka̭roti || 15 ||

vi vā etasya̭ yajñaśchi̭dyate | yasyāgnihotrḙ-'dhiśri̭te śvā-'ntarā dhāva̭ti | rudraḥ khalu vā eṣaḥ | yadagniḥ | ya-dgāma̭nvatyāvartayet | rudrāya̭ paśū-napi̭daddhyāt | apaśu-ryaja̭māna-ssyāt | yadapo 'nvatiṣiñcet | anādya-magnerāpaḥ̭ | anādyamābhyā-mapi̭daddhyāt | gārha̭patyā-dbhasmādāya̭ | idaṃ-vi~ṣṇu-rvica̭krama iti̭ vaiṣṇavyarcā ''ha̭vanīyāddhvagṃ sayannudra̭vet | yajño vai viṣṇuḥ̭ | yajñenaiva yajñagṃ santa̭noti | bhasma̭nā padamapi̭vapati śāntyai || 16 ||

(vai devyadi̭ti--r muñcati - sṛjati - karoti - karotyā - bhyāmapi̭daddhyā-tpañca̭ ca) (a. 3)
anuvākaṃ 4 - agniprāyaścittaṃ agnihotre
ni vā etasyā̭havanīyo gārha̭patya-ṅkāmayate | ni gārha̭patya āhavanīyam | yasyāgnimanṷddhṛtagṃ sūryo-'bhinimroca̭ti | darbheṇa hira̭ṇya-mprabaddhya̭ purastāddharet | athāgnim | athāgnihotram | yaddhira̭ṇya-mpurastāddhara̭ti | jyotirvai hira̭ṇyam | jyoti̭revaina-mpaśya-nnuddha̭rati | yadagni-mpūrvagṃ haratyathā-gnihotram || 17 ||

bhāgadheyḙnaivaina-mpraṇa̭yati || brāhmaṇa ā̭rṣeya uddha̭ret | brāhmaṇo vai sarvā̭ devatāḥ | sarvā̭bhirevaina̭-ndevatā̭bhiruddha̭rati || agnihotra-mṷpasā-dyātami̭to-rāsīta | vratameva hatamanṷ mriyate || antaṃ-vā~ eṣa ātmano̭ gacchati | yastāmya̭ti | anta̭meṣa yajñasya̭ gacchati | yasyāgnimanṷddhṛtagṃ sūryo-'bhinimroca̭ti || 18 ||

punaḥ̭ samanya̭ juhoti | antḙnaivāntaṃ̭-ya~jñasya niṣka̭roti || varṷṇo vā etasya̭ yajña-ṅgṛ̭hṇāti | yasyāgni-manṷddhṛtagṃ sūryo-'bhinimroca̭ti | vāruṇa-ñcaru-nnirva̭pet | tenaiva yajña-nniṣkrī̭ṇīte || ni vā etasyā̭havanīyo gārha̭patya-ṅkāmayate | ni gārha̭patya āhavanīyam | yasyāgni-manṷddhṛtagṃ sūryo-'bhyṷdeti̭ | caturgṛhīta-mājya̭-mpurastāddharet || 19 ||

athāgnim | athāgnihotram | yadājya̭-mpurastāddhara̭ti | etadvā agneḥ priya-ndhāma̭ | yadājyam | priyeṇaivaina-ndhāmnā sama̭rdhayati | yadagni-mpūrvagṃ haratyathā-gnihotram | bhāgadheyḙnaivaina-mpraṇa̭yati | brāhmaṇa ā̭rṣeya uddha̭ret | brāhmaṇo vai sarvā̭ devatāḥ || 20 ||

sarvā̭bhirevaina̭-ndevatā̭bhiruddha̭rati || parā̭cī vā etasmai vyucchantī vyṷcchati | yasyāgni-manṷddhṛtagṃ sūryo-'bhyṷdeti̭ | uṣāḥ ketunā̭ juṣatām | yajña-ndevebhi̭rinvitam | devebhyo madhṷmattamagg svāheti̭ pratyaṃ-niṣadyājyḙna juhuyāt | pratīcī̭mevāsmai vivā̭sayati || agnihotra-mṷpasādyātami̭to-rāsīta | vratameva hatamanṷ mriyate | antaṃ-vā~ eṣa ātmano̭ gacchati || 21 ||

yastāmya̭ti | anta̭meṣa yajñasya̭ gacchati | yasyāgni-manṷddhṛtagṃ sūryo-'bhyṷdeti̭ | punaḥ̭ samanya̭ juhoti | antḙnaivāntaṃ̭-ya~jñasya niṣka̭roti | mitro vā etasya̭ yajña-ṅgṛ̭hṇāti | yasyāgni-manṷddhṛtagṃ sūryo-'bhyṷdeti̭ | maitra-ñcaru-nnirva̭pet | tenaiva yajña-nniṣkrī̭ṇīte || yasyā̭-havanīye-'nṷdvāte gārha̭patya udvāyet || 22 ||

yadā̭havanīya-manṷdvāpya gārha̭patya-mmanthet | vicchi̭ndyāt | bhrātṛ̭vyamasmai janayet | yadvai yajñasya̭ vāstavya̭-ṅkriyate | tadanṷ rudro-'va̭carati | ya-tpūrva̭-manvavasyet | vāstavya̭-magnimupā̭sīta | rudro-'sya paśū-nghātṷka-ssyāt | āhavanīya̭-mudvāpya̭ | gārha̭patya-mmanthet || 23 ||

itaḥ pra̭thama-ñja̭jñe agniḥ | svādyoneradhi̭ jātavḙdāḥ | sa gā̭yatriyā triṣṭubhā jaga̭tyā | devebhyo̭ havyaṃ-va~̭hatu prajānanniti̭ | chando̭bhirevainagg svādyoneḥ praja̭nayati || gārha̭patya-mmanthati | gārha̭patyaṃ-vā~ anvāhi̭tāgneḥ paśava upa̭ tiṣṭhante | sa yadudvāya̭ti | tadanṷ paśavo-'pa̭krāmanti | iṣe rayyai ra̭masva || 24 ||

saha̭se dyumnāya̭ | ūrje patyāyetyā̭ha | paśavo vai rayiḥ | paśūnevāsmai̭ ramayati || sārasvatau tvothsau sami̭ndhātāmityā̭ha | ṛ-khsāme vai sā̭rasvatāvuthsau | ṛkh-sāmābhyā̭mevainagṃ sami̭ndhe || samrāḍa̭si virāḍasītyā̭ha | rathantaraṃ-vai~ samrāṭ | bṛha-dvirāṭ || 25 ||

tābhyā̭mevainagṃ sami̭ndhe || vajro vai cakram | vajro vā etasya̭ yajñaṃ-vi~cchi̭natti | yasyāno̭ vā ratho̭ vā-'ntarā-'gnī yāti̭ | āhavanīya̭-mudvāpya̭ | gārha̭patyā-duddha̭ret | yada̭gne pūrva-mprabhṛ̭ta-mpadagṃ hi te | sūrya̭sya raśmīna-nvā̭tatāna̭ | tatra̭ rayiṣṭhāmanu sambha̭raitam | sa-nnaḥ̭ sṛja sumatyā vāja̭vatyeti̭ || 26 ||

pūrvḙṇaivāsya̭ yajñena̭ yajñamanu sa-nta̭noti || tvama̭gne saprathā̭ asītyā̭ha | agni-ssarvā̭ devatāḥ | devatā̭bhireva yajñagṃ sa-nta̭noti || agnayḙ pathikṛtḙ puroḍāśa̭maṣṭāka̭pāla-nnirva̭pet | agnimeva pa̭thikṛtagg svena̭ bhāgadheyenopa̭ dhāvati | sa evainaṃ̭-ya~jñiya-mpanthāmapi̭-nayati | anaḍvān-dakṣi̭ṇā | vahī hyḙṣa samṛ̭ddhyai || 27 ||

(haratyathāgnihotraṃ - nimroca̭ti - hare-d- devatā̭ - gaccha - tyudvāye-nmanthe-dramasva-bṛha-dvirāḍ-iti-nava̭ ca) (a. 4)
(ni vai pūrva-ntrīṇi̭ nimroca̭ti darbheṇa yaddhira̭ṇyamagnihotra-mpunarvarṷṇo
vāruṇa-nni vā etasyābhyṷdeti̭ caturgṛhītamājyaṃ yadājyaṃ parācyuṣāḥ puna̭rmitro metraṃ-ya~syā̭havanīye-'nṷdvāte gārha̭patyo yadvai ma̭ntheduddha̭ret)
anuvākaṃ 5 - somātirekaprāyaścittam
yasya̭ prātassavane somo̭-'tiricya̭te | māddhya̭ndinagṃ sava̭na-ṅkāmaya̭māno-'bhyati̭ricyate | gaurdha̭yati marutāmiti dhaya̭dvatīṣu kurvanti | hinasti vai sandhyadhī̭tam | sandhīva khalu vā etat | ya-thsava̭na syātiricya̭te | yaddhaya̭dvatīṣu kurvanti̭ | sandhe-śśāntyai || gāyatragṃ sāma̭ bhavati pañcadaśa-sstomaḥ̭ | tenaiva prā̭tassavanānnaya̭nti || 28 ||

marutva̭tīṣu kurvanti | tenaiva māddhya̭ndinā-thsava̭nānnaya̭nti || hotṷśca masamanūnna̭yante | hotā-'nṷśagṃsati | maddhyata eva yajñagṃ samāda̭dhāti || yasya māddhya̭ndine sava̭ne somo̭-'tiricya̭te | āditya-ntṛ̭tīyasavana-ṅkāmaya̭māno-'bhyati̭ricyate | gaurivītagṃ sāma̭ bhavati | ati̭riktaṃ-vai~ gaṷrivītam | ati̭riktaṃ-ya~-thsava̭nasyā-tiricya̭te || 29 ||

ati̭riktasya śāntyai || baṇmahāgṃ a̭si sūryeti̭ kurvanti | yasyaivādityasya sava̭nasya kāmḙnātiricya̭te | tenaivaina-ṅkāmḙna sama̭rdhayanti || gaurivītagṃ sāma̭ bhavati | tenaiva māddhya̭ndinā-thsava̭nānnaya̭nti || saptadaśa-sstomaḥ̭ | tenaiva tṛ̭tīyasavanānnaya̭nti || hotṷścamasamanūnna̭yante | hotā-'nṷśagṃ sati || 30 ||

maddhyata eva yajñagṃ samāda̭dhāti || yasya̭ tṛtīyasavane somo̭-'tiricyḙta | ukthya̭-ṅkurvīta | yasyokthyḙ-'tiricyḙta | atirātra-ṅkṷrvīta | yasyā̭-tirātrḙ-'tiricya̭te| tattvai dṷṣprajñānam | yaja̭mānaṃ-vā~ eta-tpaśava̭ āsāhya̭ yanti | bṛha-thsāma̭ bhavati | bṛhadvā imāṃ-lo~kā-ndā̭dhāra | bārha̭tāḥ paśavaḥ̭ | bṛhataivāsmai̭ paśū-ndā̭dhāra || śipiviṣṭava̭tīṣu kurvanti | śipiviṣṭo vai devānā-mpuṣṭam | puṣṭyaivainagṃ sama̭rdhayanti || hotṷścamasamanūnna̭yante | hotā-'nṷśagṃsati | maddhyata eva yajñagṃ samāda̭dhāti || 31 ||

(yanti - sava̭nasyātiricya̭te - śagṃsati - dādhārāṣṭau ca̭) (a. 5)
anuvākaṃ 6 - savananimitta-mprāyaścittam
ekai̭ko vai janatā̭yā-mindraḥ̭ | ekaṃ-vā~ etāvindra̭mabhi sagṃsṷnutaḥ | yau dvau sagṃ̭sunutaḥ | prajāpa̭tirvā eṣa vitā̭yate | ya-dyajñaḥ | tasya grāvā̭ṇo dantāḥ | anyataraṃ-vā~ ete sagṃ̭sunvato-rnirba̭phsati | pūrvḙṇopasṛtyā̭ devatā ityā̭huḥ | pūrvopasṛtasya vai śreyā-nbhavati | eti̭vantyājyā̭ni bhavantya-bhiji̭tyai || 32 ||

marutva̭tīḥ pratipadaḥ̭ | maruto vai devānā-mapa̭rājita-māyata̭nam | devānā̭-mevāpa̭rājita āyata̭ne yatate ||ubhe bṛ̭hadrathantare bha̭vataḥ | iyaṃ-vā~va ra̭thantaram | asau bṛhat | ābhyāmevaina̭-mantarḙti | vācaśca mana̭saśca | prāṇāccā̭-pānācca̭ | divaśca̭ pṛthivyāśca̭ || 33 ||

sarva̭smā-dvittā-dvedyāt || abhivarto bra̭hmasāma-mbha̭vati | suvargasya̭ lokasyā-bhivṛ̭ttyai || abhiji-dbha̭vati | suvargasya̭ lokasyā-bhiji̭tyai | viśvaji-dbha̭vati | viśva̭sya jityai || yasya bhūyāgṃ̭so yajñakratava ityā̭huḥ | sa devatā̭ vṛṅkta iti̭ | yadya̭gniṣṭoma-ssomaḥ̭ parastā-thsyāt || 34 ||

ukthya̭-ṅkurvīta | yadyukthyaḥ̭ syāt | atirātra-ṅkṷrvīta | yajñakratubhi̭-revāsya̭ devatā̭ vṛṅkte || yo vai chando̭bhi-rabhibhava̭ti | sa sagṃ̭ sunvato-rabhibha̭vati | saṃve~śāya̭ tvopaveśāya-tvetyā̭ha | chandāgṃ̭si vai saṃ̭ve~śa ṷpaveśaḥ | chando̭bhirevāsya chandāg̭sya-bhibha̭vati || iṣṭargo vā ṛtvijā̭-maddhvaryuḥ || 35 ||

iṣṭargaḥ khalu vai pūrvo-'rṣṭuḥ, kṣī̭yate | prāṇā̭pānau mṛtyormā̭ pātamityā̭ha | prāṇāpānayo̭reva śra̭yate | prāṇā̭pānau mā mā̭ hāsiṣṭamityā̭ha | naina̭-mpurā-''yṷṣaḥ prāṇāpānau ja̭hitaḥ || ārtiṃ-vā~ ete niya̭nti | yeṣā-ndīkṣitānā-mpramīya̭te | taṃ-ya~da̭vavarjḙyuḥ | krūrakṛtā̭mivaiṣāṃ-lo~ka-ssyāt | āha̭ra daheti̭ brūyāt || 36 ||

ta-nda̭kṣiṇato vedyai̭ nidhāya̭ | sarparājñiyā̭ ṛgbhi-sstṷyuḥ | iyaṃ-vai~ sarpa̭to rājñī | asyā evaina-mpari̭dadati || vyṛ̭ddha-ntadityā̭huḥ | ya-thstuta-mana̭nuśasta-miti̭ | hotā prathamaḥ prā̭cīnāvītī mārjālīya-mparī̭yāt | yāmīra̭nu-bruvann | sarparājñīnā-ṅkīrtayet | ubhayo̭revainaṃ̭-lo~kayoḥ pari̭dadati || 37 ||

atho̭ dhuvantyevainam | atho nyḙvāsmai hnuvate || triḥ pari̭yanti | traya̭ ime lokāḥ | ebhya evainaṃ̭-lo~kebhyo̭ dhuvate | triḥ punaḥ pari̭yanti | ṣaṭ-thsampa̭dyante | ṣaḍvā ṛtavaḥ̭ | ṛtubhi̭revaina̭-ndhuvate || agna āyūgṃ̭ṣi pavasa iti̭ pratipada̭-ṅkurvīrann | rathantarasā̭maiṣāgṃ somaḥ̭ syāt | āyṷrevātman-da̭dhate | atho̭ pāpmāna̭meva vijaha̭to yanti || 38 ||

(abhiji̭tyai - pṛthivyāśca - syā - da̭ddhvaryu--r brṷyāl - lokayoḥ pari̭dadati - kurvaragg strīṇi̭ ca) (a. 6)
anuvākaṃ 7 - yūpavirohaṇādiprāyaścittam
asuryaṃ̭-vā~ etasmā-dvarṇa̭-ṅkṛtvā | paśavo̭ vīrya̭-mapa̭krāmanti | yasya yūpo̭ viroha̭ti | tvāṣṭra-mba̭hurūpa-māla̭bheta | tvaṣṭā vai rūpāṇā̭mīśe | ya eva rūpāṇāmīśe | so-'smi-npaśūn. vīryaṃ̭-ya~cchati | nāsmāt-paśavo̭ vīrya̭-mapa̭krāmanti || ārtiṃ-vā~ ete niya̭nti | yeṣā-ndīkṣitānā̭-magni-rudvāya̭ti || 39 ||

yadā̭havanīya̭ udvāyet | yatta-mmanthet | vicchi̭ndyāt | bhrātṛ̭vyamasmai janayet | yadā̭havanīya̭ udvāyet | āgnīddhrā-duddha̭ret | yadāgnīddhra udvāyet | gārha̭patyā-duddha̭ret | ya-dgārha̭patya udvāyet | ata̭ eva puna̭-rmanthet || 40 ||

atra vāva sa nila̭yate | yatra khalu vai nilī̭na-muttama-mpaśya̭nti | tadḙna-micchanti || yasmā-ddāro̭rudvāyet | tasyāraṇī̭ kuryāt | krumukamapi̭ kuryāt | eṣā vā agneḥ priyā tanūḥ | yat-krṷmukaḥ | priyayaivaina̭-ntanuvā sama̭rdhayati || gārha̭patya-mmanthati || 41 ||

gārha̭patyo vā agneryoniḥ̭ | svādevainaṃ-yo~ne-rjanayati | nāsmai bhrātṛ̭vya-ñjanayati || yasya soma̭ upadasyet | suvarṇagṃ hira̭ṇya-ndvedhā vicchidya̭ | ṛjīṣe-'nyadā̭dhūnuyāt | juhuyādanyat | soma̭mevā-bhi̭ṣuṇoti̭ | soma̭-ñjuhoti || soma̭sya vā a̭bhiṣūyamā̭ṇasya priyā tanū-ruda̭krāmat || 42 ||

ta-thsuvarṇagṃ hira̭ṇya-mabhavat | ya-thsuvarṇagṃ hira̭ṇya-ṅkurvanti̭ | priyayaivaina̭-ntanuvā sama̭rdhayanti || yasyākrī̭tagṃ soma̭-mapaharḙyuḥ | krīṇīyādeva | saiva tataḥ prāya̭ścittiḥ || yasya̭ krītama̭paharḙyuḥ | ādārāgśca̭ phālgunāni̭ cābhiṣṷṇuyāt | gāyatrī yagṃ somamāha̭rat | tasya yo-'gṃ̭śuḥ parā-'pa̭tat || 43 ||

ta ā̭dārā a̭bhavann | indro̭ vṛtrama̭hann | tasya̭ valkaḥ parā̭-'patat | tāni̭ phālgunānya̭bhavann | paśavo vai phālgunāni̭ | paśava-ssomo rājā | yadā̭dārāgśca̭ phālgunāni̭ cābhiṣuṇoti̭ | soma̭meva rājā̭namabhiṣṷṇoti || śṛtena̭ prātassavane śrī̭ṇīyāt | daddhnā maddhyandi̭ne || 44 ||

nītamiśreṇa̭ tṛtīyasavane | agniṣṭoma-ssomaḥ̭ syā-drathantarasā̭mā | ya evartvijo̭ vṛtā-ssyuḥ | ta ḙnaṃ-yā~jayeyuḥ | ekā-ṅgā-ndakṣi̭ṇā-ndadyāttebhya̭ eva | puna-ssoma̭-ṅkrīṇīyāt | yajñenaiva ta-dyajña-mi̭cchati | saiva tataḥ prāya̭ścittiḥ || sarvābhyo vā eṣa devatābhya-ssarvebhyaḥ pṛṣṭhebhya̭ ātmāna-māgṷrate | ya-ssatrāyā̭gurate | etāvān-khalu vai purṷṣaḥ | yāva̭dasya vittam | sarvavedasena̭ yajeta | sarva̭pṛṣṭho-'sya somaḥ̭ syāt | sarvābhya eva devatābhya-ssarvebhyaḥ pṛṣṭhebhya̭ ātmāna-nniṣkrī̭ṇīte || 45 ||

(udvāya̭ti - manthen - mantha - tyakrāmat - parā-'pa̭tan - maddhyandi̭na - āgurate pañca̭ ca) (a. 7)
anuvākaṃ 8 - pāvamānīmantrāḥ (smārte śñānādau mārjanārthāśca)
pava̭māna-ssuvarjanaḥ̭ | pavitrḙṇa vica̭rṣaṇiḥ | yaḥ potā sa pṷnātu mā || punantṷ mā devajanāḥ | punantu mana̭ vo dhiyā | punantu viśva̭ āyavaḥ̭ || jāta̭vedaḥ pavitra̭vat | pavitrḙṇa punāhi mā | śukreṇa̭ deva dīdya̭t | agne kratvā kratūgṃ ranṷ || 46 ||

yattḙ pavitra̭-marciṣi̭ | agne vita̭tamantarā | brahma tena̭ punīmahe || ubhābhyā-ndeva savitaḥ |pavitrḙṇa savena̭ ca | ida-mbrahma̭ punīmahe || vaiśvadevī pṷnatī devyāgāt | yasyai̭ bahvī-stanuvo̭ vītapṛ̭ṣṭhāḥ | tayā mada̭nta-ssadhamādyḙṣu | vayagg syā̭ma pata̭yo rayīṇām || 47 ||

vaiśvānaro raśmibhi̭rmā punātu | vātaḥ̭ prāṇenḙṣiro ma̭yobhūḥ | dyāvā̭pṛthivī paya̭sā payo̭bhiḥ | ṛtāva̭rī yajñiyḙ mā punītām || bṛhadbhiḥ̭ savitastṛbhiḥ̭ | varṣi̭ṣṭhai-rdeva manma̭bhiḥ | agne dakṣaiḥ punāhi mā || yena̭ devā apṷnata | yenāpo̭ divya-ṅkaśaḥ̭ | tena̭ divyena brahma̭ṇā || 48 ||

ida-mbrahma̭ punīmahe || yaḥ pā̭vamānīraddhyeti̭ | ṛṣi̭bhi-ssambhṛ̭tagṃ rasam | sarvagṃ sa pūtama̭śñāti | svadita-mmā̭tariśva̭nā || pāvamānīryo addhyeti̭ | ṛṣi̭bhi-ssambhṛ̭tagṃ rasam | tasmai sara̭svatī duhe | kṣīragṃ sarpi-rmadhṷ̄dakam || pāvamānī-ssvastyaya̭nīḥ || 49 ||

sudughā hi paya̭svatīḥ | ṛṣi̭bhi-ssambhṛ̭to rasaḥ̭ | brāhmaṇeṣvamṛtagṃ̭ hitam || pāvamānī-rdi̭śantu naḥ | imaṃ-lo~kamatho̭ amum | kāmān-thsama̭rdhayantu naḥ | devī-rdevai-ssamābhṛ̭tāḥ || pāvamānī-ssvastyaya̭nīḥ | sudughāhi ghṛ̭taścutaḥ̭ | ṛṣi̭bhi-ssambhṛ̭to rasaḥ̭ || 50 ||

brāhmaṇeṣvamṛtagṃ̭ hitam || yena̭ devāḥ pavitrḙṇa | ātmāna̭-mpunate sadā | tena̭ sahasra̭dhāreṇa | pāvamānyaḥ pṷnantu mā || prājāpatya-mpavitram | śatodyā̭magṃ hiraṇmayam | tena̭ brahma vido̭ vayam | pūta-mbrahma̭ punīmahe || indraḥ̭ sunītī saha mā̭ punātu | somaḥ̭ svastyā varṷṇa-ssamīcyā | yamo rājā pramṛṇābhiḥ̭ punātu mā | jātavḙdā morjaya̭ntyā punātu || 51 ||

(anṷ - rayīṇāṃ - brahma̭ṇā - svastyaya̭nīḥ - sudughā hi ghṛ̭taścuta ṛṣi̭bhi-ssambhṛ̭to rasaḥ̭ - punātu trīṇi̭ ca ) (a. 8)
anuvākaṃ 9 - rājasūyagatacāturmāsyaśeṣaḥ
prajā vai satramā̭sata tapastapya̭mānā ajṷhvatīḥ | devā a̭paśya-ñcamasa-ṅghṛtasya̭ pūrṇagg svadhām | tamupoda̭tiṣṭhanta-ma̭juhavuḥ | tenārdhamāsa ūrjamavā̭rundhata | tasmā̭dardhamāse devā i̭jyante || pitaro̭-'paśya-ñcamasa-ṅghṛtasya̭ pūrṇagg svadhām | tamupoda̭tiṣṭhanta- ma̭juhavuḥ | tena̭ māsyūrjamavā̭rundhata | tasmā-nmāsi pitṛbhyaḥ̭ kriyate | manuṣyā̭ apaśya-ñcamasa-ṅghṛtasya̭ pūrṇagg svadhām || 52 ||

tamupoda̭tiṣṭhanta-ma̭juhavuḥ | tena̭-dvayīmūrjamavā̭rundhata | tasmā-ddvirahno̭-manuṣyebhya upa̭hriyate | prātaśca̭ sāya-ñca̭ | paśavo̭-'paśya-ñcamasa-ṅghṛtasya̭ pūrṇagg svadhām | tamupoda̭tiṣṭhanta-ma̭juhavuḥ | tena̭-trayīmūrjamavā̭-rundhata | tasmā-ttrirahnaḥ̭ paśavaḥ prera̭te | prātassa̭gaṃve sāyam | asṷrā apaśya-ñcamasa-ṅghṛtasya̭ pūrṇagg svadhām || 53 ||

tamupoda̭tiṣṭhanta-ma̭juhavuḥ | tena̭ saṃva~thsara ūrjamavā̭-rundhata || te devā a̭manyanta | amī vā idama̭bhūvann | yadvayaggsma iti̭ | ta etāni̭ cāturmāsyānya̭paśyann | tāni nira̭vapann | tairevaiṣā-ntāmūrja̭mavṛñjata | tato̭ devā abha̭vann | parā-'sṷrāḥ || 54 ||

ya-dyaja̭te | yāmeva devā ūrja̭mavārṷndhata | tā-ntenā-va̭rundhe | ya-tpitṛbhyaḥ̭ karoti̭ | yāmeva pitara ūrja̭mavā-rṷndhata | tā-ntenā-va̭rundhe | yadā̭vasathe-'nnagṃ hara̭nti | yāmeva ma̭nuṣyā̭ ūrja̭mavā-rṷndhata | tā-ntenā-va̭rundhe | ya-ddakṣi̭ṇā-ndadā̭ti || 55 ||

yāmeva paśava ūrja̭mavā-rṷndhata | tā-ntenā-va̭rundhe | yaccā̭tu-rmāsyai-ryaja̭te | yāmevāsṷrā ūrja̭ma-vārṷndhata | tā-ntenā-va̭rundhe | bhava̭tyātmanā | parā-'sya bhrātṛ̭vyo bhavati || virājo vā eṣā vikrāntiḥ | yaccā̭tu-rmāsyāni̭ | vaiśvadevenāsmi~lloke pratya̭tiṣṭhat | varuṇa praghāsai-rantari̭kṣe | sākamedhai-ramuṣmi̭~lloke | eṣa ha tvāvaita-thsarva̭-mbhavati | ya evaṃ-vi~dvāgścā̭turmāsyai-ryaja̭te || 56 ||

(manuṣyā̭ apaśyañcamasa-ṅghṛtasya̭ pūrṇagg svadhā-masṷrā apaśyañcamasa-ṅghṛtasya̭ pūrṇagg svadhā-masṷrā-dadā-tyatiṣṭha ccatvāri̭ ca) (a. 9)
anuvākaṃ 10 - cāturmāsyapraśaṃsanam
agnirvāva saṃ̭va~thsaraḥ | ādityaḥ pa̭rivathsaraḥ | candramā̭ idāvathsaraḥ | vāyu-ra̭nuvathsaraḥ || ya-dvaiśvadevena yaja̭te | agnimeva ta-thsaṃ̭va~thsara-māpnoti | tasmā-dvaiśvadevena yaja̭mānaḥ | saṃva~thsarīṇāg̭ svasti-māśāsta ityāśā̭sīta || ya-dva̭ruṇa praghāsai-ryaja̭te | ādityameva ta-tpa̭rivathsara-māpnoti || 57 ||

tasmā-dvaruṇa-praghāsai-ryaja̭mānaḥ | parivathsarīṇāg̭ svasti-māśāsta ityāśā̭sīta | ya-thsā̭kamedhai-ryaja̭te | candrama̭sameva tadi̭dāvathsara-māpnoti | tasmā-thsākamedhai-ryaja̭mānaḥ | idāvathsarīṇāg̭ svasti-māśāsta ityāśā̭sīta || ya-tpi̭tṛ yajñena yaja̭te | devāneva tadanvava̭syati || atha vā a̭sya vāyuścā̭-nuvathsaraścā prī̭tāvucchi̭ṣyete | yacchṷnāsīrīyḙṇa yaja̭te || 58 ||

vāyumeva tada̭nuvathsara-māpnoti | tasmā-cchunāsīrīyḙṇa yaja̭mānaḥ | anuvathsarīṇāg̭ svasti-māśāsta ityāśā̭sīta || saṃva~thsaraṃ-vā~ eṣa īphsatītyā̭huḥ | yaścā̭tu-rmāsyai-ryaja̭ta iti̭ | eṣa ha tvai sa̭vanthsara-māpnoti | ya evaṃ-vi~dvāg ścā̭turmāsyai-ryaja̭te || viśvḙ devā-ssama̭yajanta | te-'gnimevāya̭janta | ta etaṃ-lo~kama̭jayann || 59 ||

yasmi̭nnagniḥ | ya-dvaiśvadevena yaja̭te | etameva loka-ñja̭yati | yasmi̭nnagniḥ | agnereva sāyṷjyamupai̭ti || yadā vaiśvadevena yaja̭te | atha̭ saṃva~thsarasya̭ gṛhapa̭ti-māpnoti | yadā saṃ̭va~thsarasya̭ gṛhapa̭ti-māpnoti̭ | atha̭ sahasrayājina̭-māpnoti | yadā sa̭hasrayājina̭-māpnoti̭ || 60 ||

atha̭ gṛhamedhina̭-māpnoti | yadā gṛ̭hamedhina̭-māpnoti̭ | athāgni-rbha̭vati | yadā-'gni-rbhava̭ti | atha gaurbha̭vati | eṣā vai vaiśvadevasya mātrā | eta-dvā eteṣā̭mavamam | ato̭-'to vā utta̭rāṇi śreyāgṃ̭si bhavanti | ya-dviśvḙ devā-ssamaya̭janta | ta-dvaiśvadevasya̭ vaiśvadevatvam || 61 ||

athā̭dityo varṷṇagṃ rājā̭naṃ-va~ruṇa praghāsaira̭yajata | sa etaṃ-lo~kama̭jayat | yasmi̭nnādityaḥ | ya-dva̭ruṇa-praghāsai-ryaja̭te | etameva loka-ñja̭yati | yasmi̭nnādityaḥ | ādityasyaiva-sāyṷjya-mupai̭ti | yadā̭dityo varṷṇagṃ rājā̭naṃ-va~ruṇa praghāsairaya̭jata | ta-dva̭ruṇa praghāsānāṃ-va~ruṇa praghāsatvam || atha somo rājā chandāgṃ̭si sākamedhaira̭yajata || 62 ||

sa etaṃ-lo~kama̭jayat | yasmigg̭ ścandramā̭ vibhāti̭ | ya-thsā̭kamedhai-ryaja̭te | etameva loka-ñja̭yati | yasmigg̭ ścandramā̭ vibhāti̭ | candrama̭sa eva sāyṷjya-mupai̭ti | somo vai candramāḥ | eṣa ha tvai sākṣā-thsoma̭-mbhakṣayati | ya evaṃ-vi~dvān-thsā̭kamedhai-ryaja̭te | ya-thsoma̭śca rājā chandāgṃ̭si ca samaidha̭nta || 63 ||

ta-thsā̭kamedhānāgṃ̭ sākamedhatvam || athartavaḥ̭ pitaraḥ̭ prajāpa̭ti-mpitara̭-mpitṛyajñe-nā̭yajanta | ta etaṃ-lo~kama̭jayann | yasmi̭nnṛtavaḥ̭ | ya-tpi̭tṛyajñena yaja̭te | etameva loka-ñja̭yati | yasmi̭nnṛtavaḥ̭ | ṛtūnāmeva sāyṷjya-mupai̭ti | yad-ṛtavaḥ̭ pitaraḥ̭ prajāpa̭ti-mpitara̭-mpitṛyajñenāya̭janta | ta-tpi̭tṛyajñasya̭ pitṛyajñatvam || 64 ||

athauṣa̭dhaya ima-ndeva-ntrya̭mbakai-rayajanta prathḙmahīti̭ | tato vai tā a̭prathanta | ya evaṃ-vi~dvāg strya̭mbakai-ryaja̭te | pratha̭te prajayā̭ paśubhiḥ̭ || atha̭ vāyuḥ pa̭rameṣṭhinagṃ̭ śunāsīrīyḙṇāyajata | sa etaṃ-lo~kama̭jayat | yasmi̭n-vāyuḥ | yacchṷnāsīrīyḙṇa yaja̭te | etameva loka-ñja̭yati | yasmi̭n-vāyuḥ || 65 ||

vāyoreva sāyṷjya-mupai̭ti || brahmavādino̭ vadanti | pra cā̭turmāsyayājī-mī̭yatā(3) na pramī̭yatā(3) iti̭ | jīvanvā eṣa ṛtūnapyḙti | yadi̭ vasantā pramīya̭te | vasanto bha̭vati | yadi̭ grīṣme grīṣmaḥ | yadi̭ varṣāsṷ varṣāḥ | yadi̭ śaradi̭ śarat | yadi hema̭n. hemantaḥ | ṛturbhūtvā saṃ̭va~thsaramapyḙti | saṃva~thsaraḥ prajāpa̭tiḥ | prajāpa̭tirvā vaiṣaḥ || 66 ||
(parivathsaramāpnoti - śunāsīrīyḙṇa yaja̭te - 'jayanth - sahasrayājina̭māpnoti̭ - vaiśvadevatvagṃ - sā̭kamedhaira̭yajata - samaidha̭nta - pitṛyajñatvaṃ - ja̭yati yasmi̭n vāyu--r hḙmanta strīṇī̭ ca) (a. 10)
(ubhayḙ - yuvagṃ surāma - muda̭sthān - ni vai - yasya̭ prātassavana - ekai̭ko - 'suryam - pava̭mānaḥ - prajā vai satramā̭sa - tāgnirvāva saṃ̭va~thsaro daśa̭ )
(ubhaye vā - uda̭sthāth - sarvā̭bhi--r maddhyato - 'tra vāva - brāhmaṇeṣva - tha̭ gṛhamedhinagṃ ṣaṭ-thṣa̭ṣṭiḥ)
(ubhaye - vāvaiṣaḥ)
|| hariḥ̭ om ||
|| kṛṣṇa yajurvedīya taittirīya brāhmaṇe prathamāṣṭake caturthaḥ prapāṭhaka-ssamāptaḥ ||
1 kṛṣṇa yajurvedīya taittirīya brāhmaṇe prathamāṣṭakaṃ