prakṛtiṃ paramāmabhayāṃ varadāṃ nararūpadharāṃ janatāpaharām | śaraṇāgata sevaka toṣakarīṃ praṇamāmi parāṃ jananīṃ jagatām ||1||
guṇahīnasutānaparādhayutān kṛpayā'dya samuddhara mohagatān | taraṇīṃ bhavasāgarapārakarīṃ praṇamāmi parāṃ jananīṃ jagatām ||2||
viṣayaṃ kusumaṃ parihṛtya sadā caraṇāmburuhāmṛtaśāntisudhām | piba bhṛṃgamano bhavarogaharāṃ praṇamāmi parāṃ jananīṃ jagatām ||3||
kṛpāṃ kuru mahādevi suteṣu praṇateṣu ca | caraṇāśrayadānena kṛpāmayi namo'stu te ||4||
lajjāpaṭāvṛte nityaṃ sārade jñānadāyike | pāpebhyo naḥ sadā rakṣa kṛpāmayi namo'stu te ||5||
rāmakṛṣṇagataprāṇāṃ tannāmaśravaṇapriyām | tadbhāvarañjitākārāṃ praṇamāmi muhurmuhuḥ ||6||
pavitraṃ caritaṃ yasyāḥ pavitraṃ jīvanaṃ tathā | pavitratāsvarūpiṇyai tasyai kurmo namo namaḥ ||7||
devīṃ prasannāṃ praṇatārtihantrīṃ yogīndrapūjyāṃ yugadharmapātrīm | tāṃ sāradāṃ bhaktivijñānadātrīṃ dayāsvarūpāṃ praṇamāmi nityam ||8||
snehena badhnāsi mano'smadīyaṃ doṣānaśeṣān saguṇīkaroṣi | ahetunā no dayase sadoṣān svāṅke gṛhītvā yadidaṃ vicitram ||9||
prasīda mātarvinayena yāce nityaṃ bhava snehavatī suteṣu | premaikabinduṃ ciradagdhacitte viṣiñca cittaṃ kuru naḥ suśāntam ||10||
jananīṃ sāradāṃ devīṃ rāmakṛṣṇaṃ jagadgurum | pādapadme tayoḥ śritvā praṇamāmi muhurmuhuḥ ||11||