ప్రకృతిం పరమామభయాం వరదాం నరరూపధరాం జనతాపహరామ్ । శరణాగత సేవక తోషకరీం ప్రణమామి పరాం జననీం జగతామ్ ॥౧॥
గుణహీనసుతానపరాధయుతాన్ కృపయాఽద్య సముద్ధర మోహగతాన్ । తరణీం భవసాగరపారకరీం ప్రణమామి పరాం జననీం జగతామ్ ॥౨॥
విషయం కుసుమం పరిహృత్య సదా చరణామ్బురుహామృతశాన్తిసుధామ్ । పిబ భృంగమనో భవరోగహరాం ప్రణమామి పరాం జననీం జగతామ్ ॥౩॥
కృపాం కురు మహాదేవి సుతేషు ప్రణతేషు చ । చరణాశ్రయదానేన కృపామయి నమోఽస్తు తే ॥౪॥
లజ్జాపటావృతే నిత్యం సారదే జ్ఞానదాయికే । పాపేభ్యో నః సదా రక్ష కృపామయి నమోఽస్తు తే ॥౫॥
రామకృష్ణగతప్రాణాం తన్నామశ్రవణప్రియామ్ । తద్భావరఞ్జితాకారాం ప్రణమామి ముహుర్ముహుః ॥౬॥
పవిత్రం చరితం యస్యాః పవిత్రం జీవనం తథా । పవిత్రతాస్వరూపిణ్యై తస్యై కుర్మో నమో నమః ॥౭॥
దేవీం ప్రసన్నాం ప్రణతార్తిహన్త్రీం యోగీన్ద్రపూజ్యాం యుగధర్మపాత్రీమ్ । తాం సారదాం భక్తివిజ్ఞానదాత్రీం దయాస్వరూపాం ప్రణమామి నిత్యమ్ ॥౮॥
స్నేహేన బధ్నాసి మనోఽస్మదీయం దోషానశేషాన్ సగుణీకరోషి । అహేతునా నో దయసే సదోషాన్ స్వాఙ్కే గృహీత్వా యదిదం విచిత్రమ్ ॥౯॥
ప్రసీద మాతర్వినయేన యాచే నిత్యం భవ స్నేహవతీ సుతేషు । ప్రేమైకబిన్దుం చిరదగ్ధచిత్తే విషిఞ్చ చిత్తం కురు నః సుశాన్తమ్ ॥౧౦॥
జననీం సారదాం దేవీం రామకృష్ణం జగద్గురుమ్ । పాదపద్మే తయోః శ్రిత్వా ప్రణమామి ముహుర్ముహుః ॥౧౧॥