ପ୍ରକୃତିଂ ପରମାମଭଯାଂ ଵରଦାଂ ନରରୂପଧରାଂ ଜନତାପହରାମ୍ । ଶରଣାଗତ ସେଵକ ତୋଷକରୀଂ ପ୍ରଣମାମି ପରାଂ ଜନନୀଂ ଜଗତାମ୍ ॥୧॥
ଗୁଣହୀନସୁତାନପରାଧଯୁତାନ୍ କୃପଯାଽଦ୍ଯ ସମୁଦ୍ଧର ମୋହଗତାନ୍ । ତରଣୀଂ ଭଵସାଗରପାରକରୀଂ ପ୍ରଣମାମି ପରାଂ ଜନନୀଂ ଜଗତାମ୍ ॥୨॥
ଵିଷଯଂ କୁସୁମଂ ପରିହୃତ୍ଯ ସଦା ଚରଣାମ୍ବୁରୁହାମୃତଶାନ୍ତିସୁଧାମ୍ । ପିବ ଭୃଂଗମନୋ ଭଵରୋଗହରାଂ ପ୍ରଣମାମି ପରାଂ ଜନନୀଂ ଜଗତାମ୍ ॥୩॥
କୃପାଂ କୁରୁ ମହାଦେଵି ସୁତେଷୁ ପ୍ରଣତେଷୁ ଚ । ଚରଣାଶ୍ରଯଦାନେନ କୃପାମଯି ନମୋଽସ୍ତୁ ତେ ॥୪॥
ଲଜ୍ଜାପଟାଵୃତେ ନିତ୍ଯଂ ସାରଦେ ଜ୍ଞାନଦାଯିକେ । ପାପେଭ୍ଯୋ ନଃ ସଦା ରକ୍ଷ କୃପାମଯି ନମୋଽସ୍ତୁ ତେ ॥୫॥
ରାମକୃଷ୍ଣଗତପ୍ରାଣାଂ ତନ୍ନାମଶ୍ରଵଣପ୍ରିଯାମ୍ । ତଦ୍ଭାଵରଞ୍ଜିତାକାରାଂ ପ୍ରଣମାମି ମୁହୁର୍ମୁହୁଃ ॥୬॥
ପଵିତ୍ରଂ ଚରିତଂ ଯସ୍ଯାଃ ପଵିତ୍ରଂ ଜୀଵନଂ ତଥା । ପଵିତ୍ରତାସ୍ଵରୂପିଣ୍ଯୈ ତସ୍ଯୈ କୁର୍ମୋ ନମୋ ନମଃ ॥୭॥
ଦେଵୀଂ ପ୍ରସନ୍ନାଂ ପ୍ରଣତାର୍ତିହନ୍ତ୍ରୀଂ ଯୋଗୀନ୍ଦ୍ରପୂଜ୍ଯାଂ ଯୁଗଧର୍ମପାତ୍ରୀମ୍ । ତାଂ ସାରଦାଂ ଭକ୍ତିଵିଜ୍ଞାନଦାତ୍ରୀଂ ଦଯାସ୍ଵରୂପାଂ ପ୍ରଣମାମି ନିତ୍ଯମ୍ ॥୮॥
ସ୍ନେହେନ ବଧ୍ନାସି ମନୋଽସ୍ମଦୀଯଂ ଦୋଷାନଶେଷାନ୍ ସଗୁଣୀକରୋଷି । ଅହେତୁନା ନୋ ଦଯସେ ସଦୋଷାନ୍ ସ୍ଵାଙ୍କେ ଗୃହୀତ୍ଵା ଯଦିଦଂ ଵିଚିତ୍ରମ୍ ॥୯॥
ପ୍ରସୀଦ ମାତର୍ଵିନଯେନ ଯାଚେ ନିତ୍ଯଂ ଭଵ ସ୍ନେହଵତୀ ସୁତେଷୁ । ପ୍ରେମୈକବିନ୍ଦୁଂ ଚିରଦଗ୍ଧଚିତ୍ତେ ଵିଷିଞ୍ଚ ଚିତ୍ତଂ କୁରୁ ନଃ ସୁଶାନ୍ତମ୍ ॥୧୦॥
ଜନନୀଂ ସାରଦାଂ ଦେଵୀଂ ରାମକୃଷ୍ଣଂ ଜଗଦ୍ଗୁରୁମ୍ । ପାଦପଦ୍ମେ ତଯୋଃ ଶ୍ରିତ୍ଵା ପ୍ରଣମାମି ମୁହୁର୍ମୁହୁଃ ॥୧୧॥