saptamukhī hanumatkavacam (atharvaṇa rahasya)

|| saptamukhīhanumatkavacam ||

|| viniyogaḥ ||

oṃ asya śrīsaptamukhīvīrahanumatkavacastotramantrasya, nāradaṛṣiḥ,
anuṣṭupchandaḥ,śrīsaptamukhīkapiḥ paramātmādevatā, hrāṃ bījam,
hrīṃ śaktiḥ, hrūṃ kīlakam,mama sarvābhīṣṭasiddhyarthe jape viniyogaḥ ||

|| karanyāsaḥ ||

oṃ hrāṃ aṅguṣṭhābhyāṃ namaḥ |
oṃ hrīṃ tarjanībhyāṃ namaḥ |
oṃ hrūṃ madhyamābhyāṃ namaḥ |
oṃ hraiṃ anāmikābhyāṃ namaḥ |
oṃ hrauṃ kaniṣṭhikābhyāṃ namaḥ |
oṃ hraḥ karatalakarapṛṣṭhābhyāṃ namaḥ ||

|| aṅganyāsaḥ ||

oṃ hrāṃ hṛdayāya namaḥ |
oṃ hrīṃ śirase svāhā |
oṃ hrūṃ śikhāyai vaṣaṭ |
oṃ hraiṃ kavacāya huṃ |
oṃ hrauṃ netratrayāya vauṣaṭ |
oṃ hraḥ astrāya phaṭ ||

|| dhyānam ||

vandevānarasiṃhasarparipuvārāhāśvagomānuṣairyuktaṃ
saptamukhaiḥ karairdrumagiriṃ cakraṃ gadāṃ kheṭakam |
khaṭvāṅgaṃ halamaṅkuśaṃ phaṇisudhākumbhau śarābjābhayān
śūlaṃ saptaśikhaṃ dadhānamamaraiḥ sevyaṃ kapiṃ kāmadam ||

|| kavacam ||

brahmovāca |
saptaśīrṣṇaḥ pravakṣyāmi kavacaṃ sarvasiddhidam |
japtvā hanumato nityaṃ sarvapāpaiḥ pramucyate || 1||

saptasvargapatiḥ pāyācchikhāṃ me mārutātmajaḥ |
saptamūrdhā śiro'vyānme saptārcirbhāladeśakam || 2||

triḥsaptanetro netre'vyātsaptasvaragatiḥ śrutī |
nāsāṃ saptapadārtho'vyānmukhaṃ saptamukho'vatu || 3||

saptajihvastu rasanāṃ radānsaptahayo'vatu |
saptacchando hariḥ pātu kaṇṭhaṃ bāhū giristhitaḥ || 4||

karau caturdaśakaro bhūdharo'vyānmamāṅgulīḥ |
saptarṣidhyāto hṛdayamudaraṃ kukṣisāgaraḥ || 5||

saptadvīpapatiścittaṃ saptavyāhṛtirūpavān |
kaṭiṃ me saptasaṃsthārthadāyakaḥ sakthinī mama || 6||

saptagrahasvarūpī me jānunī jaṅghayostathā |
saptadhānyapriyaḥ pādau saptapātāladhārakaḥ || 7||

paśūndhanaṃ ca dhānyaṃ ca lakṣmīṃ lakṣmīprado'vatu |
dārān putrāṃśca kanyāśca kuṭumbaṃ viśvapālakaḥ || 8||

anuktasthānamapi me pāyādvāyusutaḥ sadā |
caurebhyo vyāladaṃṣṭribhyaḥ śaṛṅgibhyo bhūtarākṣasāt || 9||

daityebhyo'pyatha yakṣebhyo brahmarākṣasajādbhayāt |
daṃṣṭrākarālavadano hanumān māṃ sadā'vatu || 10||

paraśastramantratantrayantrāgnijalavidyutaḥ |
rudrāṃśaḥ śatrusaṅgrāmātsarvāvasthāsu sarvabhṛt || 11||

oṃ namo bhagavate saptavadanāya ādyakapimukhāya vīrahanumate
sarvaśatrusaṃhāraṇāya ṭhaṃṭhaṃṭhaṃṭhaṃṭhaṃṭhaṃṭhaṃ oṃ namaḥ svāhā || 12||

oṃ namo bhagavate saptavadanāya dvītīyanārasiṃhāsyāya atyugratejovapuṣe
bhīṣaṇāya bhayanāśanāya haṃhaṃhaṃhaṃhaṃhaṃhaṃ oṃ namaḥ svāhā || 13||

oṃ namo bhagavate saptavadanāya tṛtīyagaruḍavaktrāya vajradaṃṣṭrāya
mahābalāya sarvarogavināśāya maṃmaṃmaṃmaṃmaṃmaṃmaṃ oṃ namaḥ svāhā || 14||

oṃ namo bhagavate saptavadanāya caturthakroḍatuṇḍāya saumitrirakṣakāya
putrādyabhivṛddhikarāya laṃlaṃlaṃlaṃlaṃlaṃlaṃ oṃ namaḥ svāhā || 15||

oṃ namo bhagavate saptavadanāya pañcamāśvavadanāya rudramūrtaye sarva-
vaśīkaraṇāya sarvanigamasvarūpāya ruṃruṃruṃruṃruṃruṃruṃ oṃ namaḥ svāhā || 16||

oṃ namo bhagavate saptavadanāya ṣaṣṭhagomukhāya sūryasvarūpāya
sarvarogaharāya muktidātre oṃoṃoṃoṃoṃoṃoṃ oṃ namaḥ svāhā || 17||

oṃ namo bhagavate saptavadanāya saptamamānuṣamukhāya
rudrāvatārāya añjanāsutāya sakaladigyaśovistārakāya vajradehāya
sugrīvasāhyakarāya udadhilaṅghanāya sītāśuddhikarāya laṅkādahanāya
anekarākṣasāntakāya rāmānandadāyakāya anekaparvatotpāṭakāya
setubandhakāya kapisainyanāyakāya rāvaṇāntakāya brahmacaryāśramiṇe
kaupīnabrahmasūtradhārakāya rāmahṛdayāya sarvaduṣṭagrahanivāraṇāya
śākinīḍākinīvetālabrahmarākṣasabhairavagraha-
yakṣagrahapiśācagrahabrahmagrahakṣatriyagrahavaiśyagraha-
śūdragrahāntyajagrahamlecchagrahasarpagrahoccāṭakāya
mama sarva kāryasādhakāya sarvaśatrusaṃhārakāya
siṃhavyāghrādiduṣṭasatvākarṣakāyai kāhikādivividhajvaracchedakāya
parayantramantratantranāśakāya sarvavyādhinikṛntakāya
sarpādisarvasthāvarajaṅgamaviṣastambhanakarāya
sarvarājabhayacorabhayā'gnibhayapraśamanāyā''dhyātmikā''dhi-
daivikādhibhautikatāpatrayanivāraṇāyasarvavidyāsarvasampatsarvapuruṣārtha-
dāyakāyā'sādhyakāryasādhakāya sarvavarapradāyasarvā'bhīṣṭakarāya
oṃ hrāṃ hrīṃ hrūṃ hraiṃ hrauṃ hraḥ oṃ namaḥ svāhā || 18||

|| phalaśrutiḥ ||

ya idaṃ kavacaṃ nityaṃ saptāsyasya hanumataḥ |
trisandhyaṃ japate nityaṃ sarvaśatruvināśanam || 19||
putrapautrapradaṃ sarvaṃ sampadrājyapradaṃ param |
sarvarogaharaṃ cā''yuḥkīrttidaṃ puṇyavardhanam || 20||
rājānaṃ sa vaśaṃ nītvā trailokyavijayī bhavet |
idaṃ hi paramaṃ gopyaṃ deyaṃ bhaktiyutāya ca || 21||
na deyaṃ bhaktihīnāya datvā sa nirayaṃ vrajet || 22||
nāmānisarvāṇyapavargadāni rūpāṇi viśvāni ca yasya santi |
karmāṇi devairapi durghaṭāni taṃ mārutiṃ saptamukhaṃ prapadye|| 23||