સપ્તમુખી હનુમત્કવચમ્ (અથર્વણ રહસ્ય)

॥ સપ્તમુખીહનુમત્કવચમ્ ॥

॥ વિનિયોગઃ ॥

ૐ અસ્ય શ્રીસપ્તમુખીવીરહનુમત્કવચસ્તોત્રમન્ત્રસ્ય, નારદઋષિઃ,
અનુષ્ટુપ્છન્દઃ,શ્રીસપ્તમુખીકપિઃ પરમાત્માદેવતા, હ્રાં બીજમ્,
હ્રીં શક્તિઃ, હ્રૂં કીલકમ્,મમ સર્વાભીષ્ટસિદ્ધ્યર્થે જપે વિનિયોગઃ ॥

॥ કરન્યાસઃ ॥

ૐ હ્રાં અઙ્ગુષ્ઠાભ્યાં નમઃ ।
ૐ હ્રીં તર્જનીભ્યાં નમઃ ।
ૐ હ્રૂં મધ્યમાભ્યાં નમઃ ।
ૐ હ્રૈં અનામિકાભ્યાં નમઃ ।
ૐ હ્રૌં કનિષ્ઠિકાભ્યાં નમઃ ।
ૐ હ્રઃ કરતલકરપૃષ્ઠાભ્યાં નમઃ ॥

॥ અઙ્ગન્યાસઃ ॥

ૐ હ્રાં હૃદયાય નમઃ ।
ૐ હ્રીં શિરસે સ્વાહા ।
ૐ હ્રૂં શિખાયૈ વષટ્ ।
ૐ હ્રૈં કવચાય હું ।
ૐ હ્રૌં નેત્રત્રયાય વૌષટ્ ।
ૐ હ્રઃ અસ્ત્રાય ફટ્ ॥

॥ ધ્યાનમ્ ॥

વન્દેવાનરસિંહસર્પરિપુવારાહાશ્વગોમાનુષૈર્યુક્તં
સપ્તમુખૈઃ કરૈર્દ્રુમગિરિં ચક્રં ગદાં ખેટકમ્ ।
ખટ્વાઙ્ગં હલમઙ્કુશં ફણિસુધાકુમ્ભૌ શરાબ્જાભયાન્
શૂલં સપ્તશિખં દધાનમમરૈઃ સેવ્યં કપિં કામદમ્ ॥

॥ કવચમ્ ॥

બ્રહ્મોવાચ ।
સપ્તશીર્ષ્ણઃ પ્રવક્ષ્યામિ કવચં સર્વસિદ્ધિદમ્ ।
જપ્ત્વા હનુમતો નિત્યં સર્વપાપૈઃ પ્રમુચ્યતે ॥ ૧॥

સપ્તસ્વર્ગપતિઃ પાયાચ્છિખાં મે મારુતાત્મજઃ ।
સપ્તમૂર્ધા શિરોઽવ્યાન્મે સપ્તાર્ચિર્ભાલદેશકમ્ ॥ ૨॥

ત્રિઃસપ્તનેત્રો નેત્રેઽવ્યાત્સપ્તસ્વરગતિઃ શ્રુતી ।
નાસાં સપ્તપદાર્થોઽવ્યાન્મુખં સપ્તમુખોઽવતુ ॥ ૩॥

સપ્તજિહ્વસ્તુ રસનાં રદાન્સપ્તહયોઽવતુ ।
સપ્તચ્છન્દો હરિઃ પાતુ કણ્ઠં બાહૂ ગિરિસ્થિતઃ ॥ ૪॥

કરૌ ચતુર્દશકરો ભૂધરોઽવ્યાન્મમાઙ્ગુલીઃ ।
સપ્તર્ષિધ્યાતો હૃદયમુદરં કુક્ષિસાગરઃ ॥ ૫॥

સપ્તદ્વીપપતિશ્ચિત્તં સપ્તવ્યાહૃતિરૂપવાન્ ।
કટિં મે સપ્તસંસ્થાર્થદાયકઃ સક્થિની મમ ॥ ૬॥

સપ્તગ્રહસ્વરૂપી મે જાનુની જઙ્ઘયોસ્તથા ।
સપ્તધાન્યપ્રિયઃ પાદૌ સપ્તપાતાલધારકઃ ॥ ૭॥

પશૂન્ધનં ચ ધાન્યં ચ લક્ષ્મીં લક્ષ્મીપ્રદોઽવતુ ।
દારાન્ પુત્રાંશ્ચ કન્યાશ્ચ કુટુમ્બં વિશ્વપાલકઃ ॥ ૮॥

અનુક્તસ્થાનમપિ મે પાયાદ્વાયુસુતઃ સદા ।
ચૌરેભ્યો વ્યાલદંષ્ટ્રિભ્યઃ શૃઙ્ગિભ્યો ભૂતરાક્ષસાત્ ॥ ૯॥

દૈત્યેભ્યોઽપ્યથ યક્ષેભ્યો બ્રહ્મરાક્ષસજાદ્ભયાત્ ।
દંષ્ટ્રાકરાલવદનો હનુમાન્ માં સદાઽવતુ ॥ ૧૦॥

પરશસ્ત્રમન્ત્રતન્ત્રયન્ત્રાગ્નિજલવિદ્યુતઃ ।
રુદ્રાંશઃ શત્રુસઙ્ગ્રામાત્સર્વાવસ્થાસુ સર્વભૃત્ ॥ ૧૧॥

ૐ નમો ભગવતે સપ્તવદનાય આદ્યકપિમુખાય વીરહનુમતે
સર્વશત્રુસંહારણાય ઠંઠંઠંઠંઠંઠંઠં ૐ નમઃ સ્વાહા ॥ ૧૨॥

ૐ નમો ભગવતે સપ્તવદનાય દ્વીતીયનારસિંહાસ્યાય અત્યુગ્રતેજોવપુષે
ભીષણાય ભયનાશનાય હંહંહંહંહંહંહં ૐ નમઃ સ્વાહા ॥ ૧૩॥

ૐ નમો ભગવતે સપ્તવદનાય તૃતીયગરુડવક્ત્રાય વજ્રદંષ્ટ્રાય
મહાબલાય સર્વરોગવિનાશાય મંમંમંમંમંમંમં ૐ નમઃ સ્વાહા ॥ ૧૪॥

ૐ નમો ભગવતે સપ્તવદનાય ચતુર્થક્રોડતુણ્ડાય સૌમિત્રિરક્ષકાય
પુત્રાદ્યભિવૃદ્ધિકરાય લંલંલંલંલંલંલં ૐ નમઃ સ્વાહા ॥ ૧૫॥

ૐ નમો ભગવતે સપ્તવદનાય પઞ્ચમાશ્વવદનાય રુદ્રમૂર્તયે સર્વ-
વશીકરણાય સર્વનિગમસ્વરૂપાય રુંરુંરુંરુંરુંરુંરું ૐ નમઃ સ્વાહા ॥ ૧૬॥

ૐ નમો ભગવતે સપ્તવદનાય ષષ્ઠગોમુખાય સૂર્યસ્વરૂપાય
સર્વરોગહરાય મુક્તિદાત્રે ૐૐૐૐૐૐૐ ૐ નમઃ સ્વાહા ॥ ૧૭॥

ૐ નમો ભગવતે સપ્તવદનાય સપ્તમમાનુષમુખાય
રુદ્રાવતારાય અઞ્જનાસુતાય સકલદિગ્યશોવિસ્તારકાય વજ્રદેહાય
સુગ્રીવસાહ્યકરાય ઉદધિલઙ્ઘનાય સીતાશુદ્ધિકરાય લઙ્કાદહનાય
અનેકરાક્ષસાન્તકાય રામાનન્દદાયકાય અનેકપર્વતોત્પાટકાય
સેતુબન્ધકાય કપિસૈન્યનાયકાય રાવણાન્તકાય બ્રહ્મચર્યાશ્રમિણે
કૌપીનબ્રહ્મસૂત્રધારકાય રામહૃદયાય સર્વદુષ્ટગ્રહનિવારણાય
શાકિનીડાકિનીવેતાલબ્રહ્મરાક્ષસભૈરવગ્રહ-
યક્ષગ્રહપિશાચગ્રહબ્રહ્મગ્રહક્ષત્રિયગ્રહવૈશ્યગ્રહ-
શૂદ્રગ્રહાન્ત્યજગ્રહમ્લેચ્છગ્રહસર્પગ્રહોચ્ચાટકાય
મમ સર્વ કાર્યસાધકાય સર્વશત્રુસંહારકાય
સિંહવ્યાઘ્રાદિદુષ્ટસત્વાકર્ષકાયૈ કાહિકાદિવિવિધજ્વરચ્છેદકાય
પરયન્ત્રમન્ત્રતન્ત્રનાશકાય સર્વવ્યાધિનિકૃન્તકાય
સર્પાદિસર્વસ્થાવરજઙ્ગમવિષસ્તમ્ભનકરાય
સર્વરાજભયચોરભયાઽગ્નિભયપ્રશમનાયાઽઽધ્યાત્મિકાઽઽધિ-
દૈવિકાધિભૌતિકતાપત્રયનિવારણાયસર્વવિદ્યાસર્વસમ્પત્સર્વપુરુષાર્થ-
દાયકાયાઽસાધ્યકાર્યસાધકાય સર્વવરપ્રદાયસર્વાઽભીષ્ટકરાય
ૐ હ્રાં હ્રીં હ્રૂં હ્રૈં હ્રૌં હ્રઃ ૐ નમઃ સ્વાહા ॥ ૧૮॥

॥ ફલશ્રુતિઃ ॥

ય ઇદં કવચં નિત્યં સપ્તાસ્યસ્ય હનુમતઃ ।
ત્રિસન્ધ્યં જપતે નિત્યં સર્વશત્રુવિનાશનમ્ ॥ ૧૯॥
પુત્રપૌત્રપ્રદં સર્વં સમ્પદ્રાજ્યપ્રદં પરમ્ ।
સર્વરોગહરં ચાઽઽયુઃકીર્ત્તિદં પુણ્યવર્ધનમ્ ॥ ૨૦॥
રાજાનં સ વશં નીત્વા ત્રૈલોક્યવિજયી ભવેત્ ।
ઇદં હિ પરમં ગોપ્યં દેયં ભક્તિયુતાય ચ ॥ ૨૧॥
ન દેયં ભક્તિહીનાય દત્વા સ નિરયં વ્રજેત્ ॥ ૨૨॥
નામાનિસર્વાણ્યપવર્ગદાનિ રૂપાણિ વિશ્વાનિ ચ યસ્ય સન્તિ ।
કર્માણિ દેવૈરપિ દુર્ઘટાનિ તં મારુતિં સપ્તમુખં પ્રપદ્યે॥ ૨૩॥