શ્રી લક્ષ્મી નારાયણ સ્તોત્રમ્

ચક્રં વિદ્યા વર ઘટ ગદા દર્પણમ્ પદ્મયુગ્મં દોર્ભિર્બિભ્રત્સુરુચિરતનું મેઘવિદ્યુન્નિભાભમ્ ।
ગાઢોત્કણ્ઠં વિવશમનિશં પુણ્ડરીકાક્ષલક્ષ્મ્યોરેકીભૂતં વપુરવતુ વઃ પીતકૌશેયકાન્તમ્ ॥ ૧॥

શંખચક્રગદાપદ્મકુંભાઽઽદર્શાબ્જપુસ્તકમ્।
બિભ્રતં મેઘચપલવર્ણં લક્ષ્મીહરિં ભજે ॥ ૨॥

વિદ્યુત્પ્રભાશ્લિષ્ટઘનોપમાનૌ શુદ્ધાશયેબિંબિતસુપ્રકાશૌ।
ચિત્તે ચિદાભૌ કલયામિ લક્ષ્મી- નારાયણૌ સત્ત્વગુણપ્રધાનૌ ॥ ૩॥

લોકોદ્ભવસ્થેમલયેશ્વરાભ્યાં શોકોરુદીનસ્થિતિનાશકાભ્યામ્।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૪॥

સમ્પત્સુખાનન્દવિધાયકાભ્યાં ભક્તાવનાઽનારતદીક્ષિતાભ્યામ્ ।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૫॥

દૃષ્ટ્વોપકારે ગુરુતાં ચ પઞ્ચ-વિંશાવતારાન્ સરસં દધત્ભ્યામ્ ।
નિત્યં યુવાભ્યાં નતિરસ્તુ લક્ષ્મી નારાયણાભ્યાં જગતઃ પિતૃભ્યામ્ ॥ ૬॥

ક્ષીરાંબુરાશ્યાદિવિરાટ્ભવાભ્યાં નારં સદા પાલયિતું પરાભ્યામ્ ।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૭॥

દારિદ્ર્યદુઃખસ્થિતિદારકાભ્યાં દયૈવદૂરીકૃતદુર્ગતિભ્યામ્
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૮॥

ભક્તવ્રજાઘૌઘવિદારકાભ્યાં સ્વીયાશયોદ્ધૂતરજસ્તમોભ્યામ્।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૯॥

રક્તોત્પલાભ્રાભવપુર્ધરાભ્યાં પદ્મારિશંખાબ્જગદાધરાભ્યામ્।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૧૦॥

અઙ્ઘ્રિદ્વયાભ્યર્ચકકલ્પકાભ્યાં મોક્ષપ્રદપ્રાક્તનદંપતીભ્યામ્।
નિત્યં યુવાભ્યાં નતિરસ્તુ લક્ષ્મી-નારાયણાભ્યાં જગતઃ પિતૃભ્યામ્ ॥ ૧૧॥

ઇદં તુ યઃ પઠેત્ સ્તોત્રં લક્ષ્મીનારયણાષ્ટકમ્।
ઐહિકામુષ્મિકસુખં ભુક્ત્વા સ લભતેઽમૃતમ્ ॥ ૧૨॥

।। ઇતિ શ્રીકૃષ્ણકૃતં લક્ષ્મીનારયણ સ્તોત્રં સંપૂર્ણમ્ ।।