ಶ್ರೀ ಲಕ್ಷ್ಮೀ ನಾರಾಯಣ ಸ್ತೋತ್ರಮ್

ಚಕ್ರಂ ವಿದ್ಯಾ ವರ ಘಟ ಗದಾ ದರ್ಪಣಮ್ ಪದ್ಮಯುಗ್ಮಂ ದೋರ್ಭಿರ್ಬಿಭ್ರತ್ಸುರುಚಿರತನುಂ ಮೇಘವಿದ್ಯುನ್ನಿಭಾಭಮ್ ।
ಗಾಢೋತ್ಕಣ್ಠಂ ವಿವಶಮನಿಶಂ ಪುಣ್ಡರೀಕಾಕ್ಷಲಕ್ಷ್ಮ್ಯೋರೇಕೀಭೂತಂ ವಪುರವತು ವಃ ಪೀತಕೌಶೇಯಕಾನ್ತಮ್ ॥ ೧॥

ಶಂಖಚಕ್ರಗದಾಪದ್ಮಕುಂಭಾಽಽದರ್ಶಾಬ್ಜಪುಸ್ತಕಮ್।
ಬಿಭ್ರತಂ ಮೇಘಚಪಲವರ್ಣಂ ಲಕ್ಷ್ಮೀಹರಿಂ ಭಜೇ ॥ ೨॥

ವಿದ್ಯುತ್ಪ್ರಭಾಶ್ಲಿಷ್ಟಘನೋಪಮಾನೌ ಶುದ್ಧಾಶಯೇಬಿಂಬಿತಸುಪ್ರಕಾಶೌ।
ಚಿತ್ತೇ ಚಿದಾಭೌ ಕಲಯಾಮಿ ಲಕ್ಷ್ಮೀ- ನಾರಾಯಣೌ ಸತ್ತ್ವಗುಣಪ್ರಧಾನೌ ॥ ೩॥

ಲೋಕೋದ್ಭವಸ್ಥೇಮಲಯೇಶ್ವರಾಭ್ಯಾಂ ಶೋಕೋರುದೀನಸ್ಥಿತಿನಾಶಕಾಭ್ಯಾಮ್।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೪॥

ಸಮ್ಪತ್ಸುಖಾನನ್ದವಿಧಾಯಕಾಭ್ಯಾಂ ಭಕ್ತಾವನಾಽನಾರತದೀಕ್ಷಿತಾಭ್ಯಾಮ್ ।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೫॥

ದೃಷ್ಟ್ವೋಪಕಾರೇ ಗುರುತಾಂ ಚ ಪಞ್ಚ-ವಿಂಶಾವತಾರಾನ್ ಸರಸಂ ದಧತ್ಭ್ಯಾಮ್ ।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೬॥

ಕ್ಷೀರಾಂಬುರಾಶ್ಯಾದಿವಿರಾಟ್ಭವಾಭ್ಯಾಂ ನಾರಂ ಸದಾ ಪಾಲಯಿತುಂ ಪರಾಭ್ಯಾಮ್ ।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೭॥

ದಾರಿದ್ರ್ಯದುಃಖಸ್ಥಿತಿದಾರಕಾಭ್ಯಾಂ ದಯೈವದೂರೀಕೃತದುರ್ಗತಿಭ್ಯಾಮ್
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೮॥

ಭಕ್ತವ್ರಜಾಘೌಘವಿದಾರಕಾಭ್ಯಾಂ ಸ್ವೀಯಾಶಯೋದ್ಧೂತರಜಸ್ತಮೋಭ್ಯಾಮ್।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೯॥

ರಕ್ತೋತ್ಪಲಾಭ್ರಾಭವಪುರ್ಧರಾಭ್ಯಾಂ ಪದ್ಮಾರಿಶಂಖಾಬ್ಜಗದಾಧರಾಭ್ಯಾಮ್।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೧೦॥

ಅಙ್ಘ್ರಿದ್ವಯಾಭ್ಯರ್ಚಕಕಲ್ಪಕಾಭ್ಯಾಂ ಮೋಕ್ಷಪ್ರದಪ್ರಾಕ್ತನದಂಪತೀಭ್ಯಾಮ್।
ನಿತ್ಯಂ ಯುವಾಭ್ಯಾಂ ನತಿರಸ್ತು ಲಕ್ಷ್ಮೀ-ನಾರಾಯಣಾಭ್ಯಾಂ ಜಗತಃ ಪಿತೃಭ್ಯಾಮ್ ॥ ೧೧॥

ಇದಂ ತು ಯಃ ಪಠೇತ್ ಸ್ತೋತ್ರಂ ಲಕ್ಷ್ಮೀನಾರಯಣಾಷ್ಟಕಮ್।
ಐಹಿಕಾಮುಷ್ಮಿಕಸುಖಂ ಭುಕ್ತ್ವಾ ಸ ಲಭತೇಽಮೃತಮ್ ॥ ೧೨॥

।। ಇತಿ ಶ್ರೀಕೃಷ್ಣಕೃತಂ ಲಕ್ಷ್ಮೀನಾರಯಣ ಸ್ತೋತ್ರಂ ಸಂಪೂರ್ಣಮ್ ।।