శ్రీ లక్ష్మీ నారాయణ స్తోత్రమ్

చక్రం విద్యా వర ఘట గదా దర్పణమ్ పద్మయుగ్మం దోర్భిర్బిభ్రత్సురుచిరతనుం మేఘవిద్యున్నిభాభమ్ ।
గాఢోత్కణ్ఠం వివశమనిశం పుణ్డరీకాక్షలక్ష్మ్యోరేకీభూతం వపురవతు వః పీతకౌశేయకాన్తమ్ ॥ ౧॥

శంఖచక్రగదాపద్మకుంభాఽఽదర్శాబ్జపుస్తకమ్।
బిభ్రతం మేఘచపలవర్ణం లక్ష్మీహరిం భజే ॥ ౨॥

విద్యుత్ప్రభాశ్లిష్టఘనోపమానౌ శుద్ధాశయేబింబితసుప్రకాశౌ।
చిత్తే చిదాభౌ కలయామి లక్ష్మీ- నారాయణౌ సత్త్వగుణప్రధానౌ ॥ ౩॥

లోకోద్భవస్థేమలయేశ్వరాభ్యాం శోకోరుదీనస్థితినాశకాభ్యామ్।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౪॥

సమ్పత్సుఖానన్దవిధాయకాభ్యాం భక్తావనాఽనారతదీక్షితాభ్యామ్ ।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౫॥

దృష్ట్వోపకారే గురుతాం చ పఞ్చ-వింశావతారాన్ సరసం దధత్భ్యామ్ ।
నిత్యం యువాభ్యాం నతిరస్తు లక్ష్మీ నారాయణాభ్యాం జగతః పితృభ్యామ్ ॥ ౬॥

క్షీరాంబురాశ్యాదివిరాట్భవాభ్యాం నారం సదా పాలయితుం పరాభ్యామ్ ।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౭॥

దారిద్ర్యదుఃఖస్థితిదారకాభ్యాం దయైవదూరీకృతదుర్గతిభ్యామ్
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౮॥

భక్తవ్రజాఘౌఘవిదారకాభ్యాం స్వీయాశయోద్ధూతరజస్తమోభ్యామ్।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౯॥

రక్తోత్పలాభ్రాభవపుర్ధరాభ్యాం పద్మారిశంఖాబ్జగదాధరాభ్యామ్।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౧౦॥

అఙ్ఘ్రిద్వయాభ్యర్చకకల్పకాభ్యాం మోక్షప్రదప్రాక్తనదంపతీభ్యామ్।
నిత్యం యువాభ్యాం నతిరస్తు లక్ష్మీ-నారాయణాభ్యాం జగతః పితృభ్యామ్ ॥ ౧౧॥

ఇదం తు యః పఠేత్ స్తోత్రం లక్ష్మీనారయణాష్టకమ్।
ఐహికాముష్మికసుఖం భుక్త్వా స లభతేఽమృతమ్ ॥ ౧౨॥

।। ఇతి శ్రీకృష్ణకృతం లక్ష్మీనారయణ స్తోత్రం సంపూర్ణమ్ ।।