શ્રી કામકલાકાલી સઞ્જીવન ગદ્ય સ્તોત્રમ્

॥ શ્રી ગણેશાય નમઃ ॥
॥ શ્રી કામકલાકાલી સઞ્જીવન ગદ્ય સ્તોત્રમ્ ॥
॥ શ્રીમહાકાલસંહિતાયાં દ્વાદશપટલે ॥

॥ મહાકાલ ઉવાચ॥

અથ વક્ષ્યે મહેશાનિ મહાપાતકનાશનમ્ ।
ગદ્યં સહસ્રનામ્નસ્તુ સઞ્જીવનતયા સ્થિતમ્ ॥ ૧ ॥

પઠન્ યત્સફલં કુર્યાત્ પ્રાક્તનં સકલં પ્રિયે ।
અપઠન્ વિફલં તત્તત્તદ્વસ્તુ કથયામિ તે ॥ ૨ ॥

॥ અથ ગદ્ય સ્તોત્રમ્ ॥

ઓં ફ્રેં જય જય કામકલાકાલિ કપાલિનિ સિદ્ધિકરાલિ સિદ્ધિવિકરાલિ મહાવલિનિ ત્રિશુલિનિ નરમુણ્ડમાલિનિ શવવાહિનિ કાત્યાયનિ મહાટ્ટહાસિનિ સૃષ્ટિસ્થિતિપ્રલયકારિણિ દિતિદનુજમારિણિ શ્મશાનચારિણિ । મહાઘોરરાવે અધ્યાસિતદાવે અપરિમિતબલપ્રભાવે । ભૈરવીયોગિનીડાકિનીસહવાસિનિ જગદ્ધાસિનિ સ્વપદપ્રકાશિનિ । પાપૌઘહારિણિ આપદુદ્ધારિણિ અપમૃત્યુવારિણિ । બૃહન્મદ્યમાનોદરિ સકલસિદ્ધિકરિ ચતુર્દશભુવનેશ્વરિ । ગુણાતીતપરમસદાશિવમોહિનિ અપવર્ગરસદોહિનિ રક્તાર્ણવલોહિનિ । અષ્ટનાગરાજભૂષિતભુજદણ્ડે આકૃષ્ટકોદણ્ડે પરમપ્રચણ્ડે । મનોવાગગોચરે મખકોટિમન્ત્રમયકલેવરે મહાભીષણતરે પ્રચલજટાભારભાસ્વરે સજલજલદમેદુરે જન્મમૃત્યુપાશભિદુરે સકલદૈવતમયસિંહાસનાધિરૂઢે ગુહ્યાતિગુહ્ય પરાપરશક્તિતત્ત્વરૂઢે વાઙ્મયીકૃતમૂઢે । પ્રકૃત્યપરશિવનિર્વાણસાક્ષિણિ ત્રિલોકીરક્ષણિ દૈત્યદાનવભક્ષિણિ । વિકટદીર્ઘદંષ્ટ્ર સઞ્ચૂર્ણિતકોટિબ્રહ્મકપાલે ચન્દ્રખણ્ડાઙ્કિતભાલે દેહપ્રભાજિતમેઘજાલે । નવપઞ્ચચક્રનયિનિ મહાભીમષોડશશયિનિ સકલકુલાકુલચક્રપ્રવર્તિનિ નિખિલરિપુદલકર્તિનિ મહામારીભયનિવર્તિનિ લેલિહાનરસનાકરાલિનિ ત્રિલોકીપાલિનિ ત્રયસ્ત્રિંશત્કોટિશસ્ત્રાસ્ત્રશાલિનિ । પ્રજ્વલપ્રજ્વલનલોચને ભવભયમોચને નિખિલાગમાદેશિતષ્ઠુસુરોચને । પ્રપઞ્ચાતીતનિષ્કલતુરીયાકારે અખણ્ડાનન્દાધારે નિગમાગમસારે । મહાખેચરીસિદ્ધિવિધાયિનિ નિજપદપ્રદાયિનિ મહામાયિનિ ઘોરાટ્ટહાસસન્ત્રાસિતત્રિભુવને ચરણકમલદ્વયવિન્યાસખર્વીકૃતાવને વિહિતભક્તાવને ।

ઓં ક્લીં ક્રોં સ્ફ્રોં હૂં હ્રીં છ્રીં સ્ત્રીં ફ્રેં ભગવતિ પ્રસીદ પ્રસીદ જય જય જીવ જીવ જ્વલ જ્વલ પ્રજ્વલ પ્રજ્વલ હસ હસ નૃત્ય નૃત્ય ક છ ભગમાલિનિ ભગપ્રિયે ભગાતુરે ભગાઙ્કિતે ભગરૂપિણિ ભગપ્રદે ભગલિઙ્ગદ્રાવિણિ । સંહારભૈરવસુરતરસલોલુપે વ્યોમકેશિ પિઙ્ગકેશિ મહાશઙ્ખસમાકુલે ખર્પરવિહસ્તહસ્તે રક્તાર્ણવદ્વીપપ્રિયે મદનોન્માદિનિ । શુષ્કનરકપાલમાલાભરણે વિદ્યુત્કોટિસમપ્રભે નરમાંસખણ્ડકવલિનિ । વમદગ્નિમુખિ ફેરુકોટિપરિવૃતે કરતાલિકાત્રાસિતત્રિવિષ્ટપે । નૃત્ય પ્રસારિતપાદાઘાતપરિવર્તિતભૂવલયે । પદભારાવનમ્રીકૃતકમઠશેષાભોગે । કુરુકુલ્લે કુઞ્ચતુણ્ડિ રક્તમુખિ યમઘણ્ટે ચર્ચિકે । દૈત્યાસુર દૈત્યરાક્ષસ દાનવ કુષ્માણ્ડ પ્રેત ભૂત ડાકિની વિનાયક સ્કન્દ ઘોણક ક્ષેત્રપાલ પિશાચ બ્રહ્મરાક્ષસ વેતાલ ગુહ્યક સર્પનાગ ગ્રહનક્ષત્રોત્પાત ચૌરાગ્નિ સ્વાપદયુદ્ધવજ્રોપલાશનિ વર્ષવિદ્યુન્મેઘવિષોપવિષ કપટકૃત્યાભિચાર દ્વેષવશીકરણોચ્ચાટનોન્માદાપસ્માર ભૂતપ્રેતપિશાચાવેશ નદનદી સમુદ્રાવર્તકાન્તાર ઘોરાન્ધકાર મહામારી બાલગ્રહ હિંસ્ર સર્વસ્વાપહારિ માયાવિદ્યુદ્દસ્યુવઞ્ચક દિવાચર રાત્રિઞ્ચર સન્ધ્યાચર શૃઙ્ગિનખિ દંષ્ટ્રિ વિદ્યુદુલ્કારણ્યદરપ્રાન્તરાદિ નાનાવિધમહોપદ્રવભઞ્જનિ । સર્વમન્ત્રતન્ત્રયન્ત્ર કુપ્રયોગપ્રમર્દિનિ । ષડામ્નાય સમય વિદ્યાપ્રકાશિનિ શ્મશાનાધ્યાસિનિ । નિજબલ પ્રભાવ પરાક્રમ ગુણવશીકૃત કોટિબ્રહ્માણ્ડવર્તિ ભૂતસઙ્ઘે । વિરાડ્રૂપિણિ સર્વદેવમહેશ્વરિ સર્વજનમનોરઞ્જનિ સર્વપાપપ્રણાશિનિ અધ્યાત્મિકાધિદૈવિકાધિભૌતિકાદિ વિવિધહૃદયાધિનિર્દલિનિ કૈવલ્યનિર્વાણવલિનિ દક્ષિણકાલિ ભદ્રકાલિ ચણ્ડકાલિ કામકલાકાલિ કૌલાચારવ્રતિનિ કૌલાચારકૂજિનિ કુલધર્મસાધનિ જગત્કારણકારિણિ મહારૌદ્રિ રૌદ્રાવતારે અબીજે નાનાબીજે જગદ્બીજે કાલેશ્વરિ કાલાતીતે ત્રિકાલસ્થાયિનિ મહાભૈરવે ભૈરવગૃહિણિ જનનિ જનજનનનિવર્તિનિ પ્રલયાનલજ્વાલાજાલજિહ્વે વિખર્વોરુ ફેરુપોતલાલિનિ મૃત્યુઞ્જયહૃદયાનન્દકરિ વિલોલવ્યાલકુણ્ડલ ઉલૂકપક્ષચ્છત્રમહાડામરિ નિયુતવક્ત્રબાહુચરણે સર્વભૂતદમનિ નીલાઞ્જનસમપ્રભે યોગીન્દ્ર હૃદયામ્બુજાસનસ્થિત નીલકણ્ઠ દેહાર્ધહારિણિ ષોડશ કલાન્તવાસિનિ હકારાર્ધચારિણિ કાલસઙ્કર્ષિણિ કપાલહસ્તે મદઘૂર્ણિતલોચને નિર્વાણદીક્ષાપ્રસાદપ્રદે નિન્દાનન્દાધિકારિણિ માતૃગણમધ્યચારિણિ ત્રયસ્ત્રિંશત્કોટિત્રિદશ તેજોમયવિગ્રહે પ્રલયાગ્નિરોચિનિ વિશ્વકર્ત્રિ વિશ્વારાધ્યે વિશ્વજનનિ વિશ્વસંહારિણિ વિશ્વવ્યાપિકે વિશ્વેશ્વરિ નિરુપમે નિર્વિકારે નિરઞ્જને નિરીહે નિસ્તરઙ્ગે નિરાકારે પરમેશ્વરિ પરમાનન્દે પરાપરે પ્રકૃતિપુરુષાત્મિકે પ્રત્યયગોચરે પ્રમાણભૂતે પ્રણવસ્વરૂપે સંસારસારે સચ્ચિદાનન્દે સનાતનિ સકલે સકલકલાતીતે સામરસ્યસમયિનિ કેવલે કૈવલ્યરૂપે કલ્પનાતિગે કાલલોપિનિ કામરહિતે કામકલાકાલિ ભગવતિ ॥

ઓં ખ્ફ્રેં હ્સૌઃ સૌઃ શ્રીં ઐં હ્રૌં ક્રોં સ્ફ્રોં સર્વસિદ્ધિં દેહિ દેહિ મનોરથાન્ પૂરય પૂરય મુક્તિં નિયોજય નિયોજય ભવપાશં સમુન્મૂલય સમુન્મૂલય જન્મમૃત્યૂ તારય તારય પરવિદ્યાં પ્રકાશય પ્રકાશય અપવર્ગં નિર્માહિ નિર્માહિ સંસારદુઃખં યાતનાં વિચ્છેદય વિચ્છેદય પાપાનિ સંશમય સંશમય ચતુર્વર્ગં સાધય સાધય હ્રાં હ્રીં હ્રૂં હ્રૈં હ્રૌં યાન્ વયં દ્વિષ્મો યે ચાસ્માન્ વિદ્વિષન્તિ તાન્ સર્વાન્ વિનાશય વિનાશય મારય મારય શોષય શોષય ક્ષોભય ક્ષોભય મયિ કૃપાં નિવેશય નિવેશય ફ્રેં ખ્ફ્રેં હસ્ફ્રેં હ્સ્ખ્ફ્રેં હૂં સ્ફ્રોં ક્લીં હ્રીં જય જય ચરાચરાત્મક બ્રહ્માણ્ડોદરવર્તિ ભૂતસઙ્ઘારાધિતે પ્રસીદ પ્રસીદ તુભ્યં દેવિ નમસ્તે નમસ્તે નમસ્તે ॥

॥ ફલશ્રુતિ ॥

ઇતીદં ગદ્યમુદિતં મન્ત્રરૂપં વરાનને ।
સહસ્રનામસ્તોત્રસ્ય આદાવન્તે ચ યોજયેત્ ॥ ૩ ॥

અશક્નુવાનૌ દ્વૌ વારૌ પઠેચ્છેષ ઇમં સ્તવમ્ ।
સહસ્રનામસ્તોત્રસ્ય તદૈવ પ્રાપ્યતે ફલમ્ ॥ ૪ ॥

અપઠન્ ગદ્યમેતત્તુ તત્ફલં ન સમાપ્નુયાત્ ।
યત્ફલં સ્તોત્રરાજસ્ય પાઠેનાપ્નોતિ સાધકઃ ।
તત્ફલં ગદ્યપાઠેન લભતે નાત્ર સંશયઃ ॥ ૫ ॥