శ్రీ కామకలాకాలీ సఞ్జీవన గద్య స్తోత్రమ్

॥ శ్రీ గణేశాయ నమః ॥
॥ శ్రీ కామకలాకాలీ సఞ్జీవన గద్య స్తోత్రమ్ ॥
॥ శ్రీమహాకాలసంహితాయాం ద్వాదశపటలే ॥

॥ మహాకాల ఉవాచ॥

అథ వక్ష్యే మహేశాని మహాపాతకనాశనమ్ ।
గద్యం సహస్రనామ్నస్తు సఞ్జీవనతయా స్థితమ్ ॥ ౧ ॥

పఠన్ యత్సఫలం కుర్యాత్ ప్రాక్తనం సకలం ప్రియే ।
అపఠన్ విఫలం తత్తత్తద్వస్తు కథయామి తే ॥ ౨ ॥

॥ అథ గద్య స్తోత్రమ్ ॥

ఓం ఫ్రేం జయ జయ కామకలాకాలి కపాలిని సిద్ధికరాలి సిద్ధివికరాలి మహావలిని త్రిశులిని నరముణ్డమాలిని శవవాహిని కాత్యాయని మహాట్టహాసిని సృష్టిస్థితిప్రలయకారిణి దితిదనుజమారిణి శ్మశానచారిణి । మహాఘోరరావే అధ్యాసితదావే అపరిమితబలప్రభావే । భైరవీయోగినీడాకినీసహవాసిని జగద్ధాసిని స్వపదప్రకాశిని । పాపౌఘహారిణి ఆపదుద్ధారిణి అపమృత్యువారిణి । బృహన్మద్యమానోదరి సకలసిద్ధికరి చతుర్దశభువనేశ్వరి । గుణాతీతపరమసదాశివమోహిని అపవర్గరసదోహిని రక్తార్ణవలోహిని । అష్టనాగరాజభూషితభుజదణ్డే ఆకృష్టకోదణ్డే పరమప్రచణ్డే । మనోవాగగోచరే మఖకోటిమన్త్రమయకలేవరే మహాభీషణతరే ప్రచలజటాభారభాస్వరే సజలజలదమేదురే జన్మమృత్యుపాశభిదురే సకలదైవతమయసింహాసనాధిరూఢే గుహ్యాతిగుహ్య పరాపరశక్తితత్త్వరూఢే వాఙ్మయీకృతమూఢే । ప్రకృత్యపరశివనిర్వాణసాక్షిణి త్రిలోకీరక్షణి దైత్యదానవభక్షిణి । వికటదీర్ఘదంష్ట్ర సఞ్చూర్ణితకోటిబ్రహ్మకపాలే చన్ద్రఖణ్డాఙ్కితభాలే దేహప్రభాజితమేఘజాలే । నవపఞ్చచక్రనయిని మహాభీమషోడశశయిని సకలకులాకులచక్రప్రవర్తిని నిఖిలరిపుదలకర్తిని మహామారీభయనివర్తిని లేలిహానరసనాకరాలిని త్రిలోకీపాలిని త్రయస్త్రింశత్కోటిశస్త్రాస్త్రశాలిని । ప్రజ్వలప్రజ్వలనలోచనే భవభయమోచనే నిఖిలాగమాదేశితష్ఠుసురోచనే । ప్రపఞ్చాతీతనిష్కలతురీయాకారే అఖణ్డానన్దాధారే నిగమాగమసారే । మహాఖేచరీసిద్ధివిధాయిని నిజపదప్రదాయిని మహామాయిని ఘోరాట్టహాససన్త్రాసితత్రిభువనే చరణకమలద్వయవిన్యాసఖర్వీకృతావనే విహితభక్తావనే ।

ఓం క్లీం క్రోం స్ఫ్రోం హూం హ్రీం ఛ్రీం స్త్రీం ఫ్రేం భగవతి ప్రసీద ప్రసీద జయ జయ జీవ జీవ జ్వల జ్వల ప్రజ్వల ప్రజ్వల హస హస నృత్య నృత్య క ఛ భగమాలిని భగప్రియే భగాతురే భగాఙ్కితే భగరూపిణి భగప్రదే భగలిఙ్గద్రావిణి । సంహారభైరవసురతరసలోలుపే వ్యోమకేశి పిఙ్గకేశి మహాశఙ్ఖసమాకులే ఖర్పరవిహస్తహస్తే రక్తార్ణవద్వీపప్రియే మదనోన్మాదిని । శుష్కనరకపాలమాలాభరణే విద్యుత్కోటిసమప్రభే నరమాంసఖణ్డకవలిని । వమదగ్నిముఖి ఫేరుకోటిపరివృతే కరతాలికాత్రాసితత్రివిష్టపే । నృత్య ప్రసారితపాదాఘాతపరివర్తితభూవలయే । పదభారావనమ్రీకృతకమఠశేషాభోగే । కురుకుల్లే కుఞ్చతుణ్డి రక్తముఖి యమఘణ్టే చర్చికే । దైత్యాసుర దైత్యరాక్షస దానవ కుష్మాణ్డ ప్రేత భూత డాకినీ వినాయక స్కన్ద ఘోణక క్షేత్రపాల పిశాచ బ్రహ్మరాక్షస వేతాల గుహ్యక సర్పనాగ గ్రహనక్షత్రోత్పాత చౌరాగ్ని స్వాపదయుద్ధవజ్రోపలాశని వర్షవిద్యున్మేఘవిషోపవిష కపటకృత్యాభిచార ద్వేషవశీకరణోచ్చాటనోన్మాదాపస్మార భూతప్రేతపిశాచావేశ నదనదీ సముద్రావర్తకాన్తార ఘోరాన్ధకార మహామారీ బాలగ్రహ హింస్ర సర్వస్వాపహారి మాయావిద్యుద్దస్యువఞ్చక దివాచర రాత్రిఞ్చర సన్ధ్యాచర శృఙ్గినఖి దంష్ట్రి విద్యుదుల్కారణ్యదరప్రాన్తరాది నానావిధమహోపద్రవభఞ్జని । సర్వమన్త్రతన్త్రయన్త్ర కుప్రయోగప్రమర్దిని । షడామ్నాయ సమయ విద్యాప్రకాశిని శ్మశానాధ్యాసిని । నిజబల ప్రభావ పరాక్రమ గుణవశీకృత కోటిబ్రహ్మాణ్డవర్తి భూతసఙ్ఘే । విరాడ్రూపిణి సర్వదేవమహేశ్వరి సర్వజనమనోరఞ్జని సర్వపాపప్రణాశిని అధ్యాత్మికాధిదైవికాధిభౌతికాది వివిధహృదయాధినిర్దలిని కైవల్యనిర్వాణవలిని దక్షిణకాలి భద్రకాలి చణ్డకాలి కామకలాకాలి కౌలాచారవ్రతిని కౌలాచారకూజిని కులధర్మసాధని జగత్కారణకారిణి మహారౌద్రి రౌద్రావతారే అబీజే నానాబీజే జగద్బీజే కాలేశ్వరి కాలాతీతే త్రికాలస్థాయిని మహాభైరవే భైరవగృహిణి జనని జనజనననివర్తిని ప్రలయానలజ్వాలాజాలజిహ్వే విఖర్వోరు ఫేరుపోతలాలిని మృత్యుఞ్జయహృదయానన్దకరి విలోలవ్యాలకుణ్డల ఉలూకపక్షచ్ఛత్రమహాడామరి నియుతవక్త్రబాహుచరణే సర్వభూతదమని నీలాఞ్జనసమప్రభే యోగీన్ద్ర హృదయామ్బుజాసనస్థిత నీలకణ్ఠ దేహార్ధహారిణి షోడశ కలాన్తవాసిని హకారార్ధచారిణి కాలసఙ్కర్షిణి కపాలహస్తే మదఘూర్ణితలోచనే నిర్వాణదీక్షాప్రసాదప్రదే నిన్దానన్దాధికారిణి మాతృగణమధ్యచారిణి త్రయస్త్రింశత్కోటిత్రిదశ తేజోమయవిగ్రహే ప్రలయాగ్నిరోచిని విశ్వకర్త్రి విశ్వారాధ్యే విశ్వజనని విశ్వసంహారిణి విశ్వవ్యాపికే విశ్వేశ్వరి నిరుపమే నిర్వికారే నిరఞ్జనే నిరీహే నిస్తరఙ్గే నిరాకారే పరమేశ్వరి పరమానన్దే పరాపరే ప్రకృతిపురుషాత్మికే ప్రత్యయగోచరే ప్రమాణభూతే ప్రణవస్వరూపే సంసారసారే సచ్చిదానన్దే సనాతని సకలే సకలకలాతీతే సామరస్యసమయిని కేవలే కైవల్యరూపే కల్పనాతిగే కాలలోపిని కామరహితే కామకలాకాలి భగవతి ॥

ఓం ఖ్ఫ్రేం హ్సౌః సౌః శ్రీం ఐం హ్రౌం క్రోం స్ఫ్రోం సర్వసిద్ధిం దేహి దేహి మనోరథాన్ పూరయ పూరయ ముక్తిం నియోజయ నియోజయ భవపాశం సమున్మూలయ సమున్మూలయ జన్మమృత్యూ తారయ తారయ పరవిద్యాం ప్రకాశయ ప్రకాశయ అపవర్గం నిర్మాహి నిర్మాహి సంసారదుఃఖం యాతనాం విచ్ఛేదయ విచ్ఛేదయ పాపాని సంశమయ సంశమయ చతుర్వర్గం సాధయ సాధయ హ్రాం హ్రీం హ్రూం హ్రైం హ్రౌం యాన్ వయం ద్విష్మో యే చాస్మాన్ విద్విషన్తి తాన్ సర్వాన్ వినాశయ వినాశయ మారయ మారయ శోషయ శోషయ క్షోభయ క్షోభయ మయి కృపాం నివేశయ నివేశయ ఫ్రేం ఖ్ఫ్రేం హస్ఫ్రేం హ్స్ఖ్ఫ్రేం హూం స్ఫ్రోం క్లీం హ్రీం జయ జయ చరాచరాత్మక బ్రహ్మాణ్డోదరవర్తి భూతసఙ్ఘారాధితే ప్రసీద ప్రసీద తుభ్యం దేవి నమస్తే నమస్తే నమస్తే ॥

॥ ఫలశ్రుతి ॥

ఇతీదం గద్యముదితం మన్త్రరూపం వరాననే ।
సహస్రనామస్తోత్రస్య ఆదావన్తే చ యోజయేత్ ॥ ౩ ॥

అశక్నువానౌ ద్వౌ వారౌ పఠేచ్ఛేష ఇమం స్తవమ్ ।
సహస్రనామస్తోత్రస్య తదైవ ప్రాప్యతే ఫలమ్ ॥ ౪ ॥

అపఠన్ గద్యమేతత్తు తత్ఫలం న సమాప్నుయాత్ ।
యత్ఫలం స్తోత్రరాజస్య పాఠేనాప్నోతి సాధకః ।
తత్ఫలం గద్యపాఠేన లభతే నాత్ర సంశయః ॥ ౫ ॥